2009-1-12

今次既賽後感想講下英超3強......

先係利物浦作客史篤城又和0:0
利記雖然羸控球時間同埋攻門次數
不過比賽既頭3/4時間
對手史篤城反而有更多到肉攻勢
直至尾段發力先靠冇運既謝拉特攞返兩個尾彩
不過為時已晚搞到又唔見兩分

原因係咩?
主隊守得好同埋搏命絕對係事實
不過賓尼迪斯收工返屋企更應該唸清楚點去破密集
(收購希斯基既念頭相信會再於佢老人家腦海浮現)
同埋 remind 自己換人一定要果斷
總好過佢用有限既英文能力去撩費 sir 同埋基爾嗌交
或者暗地裹埋怨馬勒當拿腳頭唔好

至於紅藍大戰方面
曼聯羸波唔令人意外
不過羸到3:0就唸都冇唸過
當中主因絕對係車仔條防線忽然兵工廠上身
輸兩球死球一定令車迷同埋摩連奴冇眼睇
而輸第二球祖高爾,施治同埋A高都要負好大責任

相對之下
曼聯既佈防就似樣得多
朴智星同埋費查一對工兵雖然唔算好 sharp
不過佢地就算搶唔羸車仔中場
甚至試過有幾個時段俾車仔有最少7成控球時間
全軍只要好有紀律咁於18碼範圍緊密佈防
就即刻令車仔冇晒計

車仔而家既進攻絕對令小弟有打亂章既感覺
中前場只得祖高爾擅長側擊
林伯特,迪高同埋波歷克分工唔清
加上杜奧巴唔夠狀態
安歷卡又只識對弱隊時踢順境波
小弟直情覺得大菲只係一心搵夠人落場
結果當然冇辦法威脅紅魔大門

攻不銳,守不穩絕對係佢地近3場作客場事只得兩分既原因
難怪大菲講明如果隊波冇改善
今季聯賽可以係咁先

大菲如果唔能夠及時撥亂反正同埋平息內亂
佢絕對有機會成為近年最快一個俾人落鑊既主帥
油王雖然掛住瘟女
不過炒人魷魚打個電話就搞掂
大菲如果唔想提早退休
最好好自為知

睇下而家積分表
利記同埋車仔仍然排前二
不過踢少兩場既曼聯已經成為失分最少既球隊
小弟上個月已講明這方面既憂慮

曼聯慣性於1月搶分
打好個底再去兼顧歐聯戰線
可以預料往後幾場3分落袋既機會甚高
利記同埋車仔如果未能及時改進
一旦落後太多
聯賽隨時於2月中歐聯戰線重開前已分勝負

但願愛隊利記生性平常心咁去比賽
唔好理其他人既閒言閒語
更希望賓尼迪斯可以回復冷靜
一如以往咁默默耕耘

畢竟踢聯賽似跑渣打馬拉松
而家既曼聯就好似一個準備加速入長青隧道既領先跑手
愛隊利記只要落後唔多既話
稍後先發力都仍有勝算
邊個敢保證領頭羊唔會於西隧仆親
或者臨到維園門口先突然抽筋

p.s.:
由於篇幅問題
今次唔多講紐記
(請見諒!)

佢地略羸形勢都只得1分
防線,防中同埋前鋒都責無旁貸
前兩個 pt 因為已經講到口臭而費事多講

前鋒方面
安迪卡路爾越睇越有台型
佢只要改善到體能,埋門一腳以及球場外既紀律
絕對有力成為繼舒利亞之後最好既紐記中鋒

紐記高層與其倚靠俾個良心佢都當狗肺既玻璃腳奧雲
倒不如將籌碼押到青春無敵既安迪卡路爾身上
起碼低成本,高回報,年期仲可以好長......