2009-2-23 (1)

幾場波想講……

1) 巴塞隆拿對愛斯賓奴

巴塞今場輸波
原因有幾個
主因當然係基達忽然痴左總掣連累球隊踢少件

二係同市打呲
對手就算近況幾差都會忽然踢高幾皮波
佢地早前於國王盃相遇
巴塞作客已經羸唔到對手
就算主場羸波都於最後30分鐘俾人圍攻輸返兩球

三係計時炸彈域陀華迪斯再次於重要時刻爆鑊
條友真係廢到冇朋友
近年踢強隊既廢龍門
只有上季既迪達可以同佢相比

不過佢班後防隊友講真都爭唔落
俾矮一截兼唔擅頂既迪拉彭拿偷到雞
真係責無旁貸

巴塞一直被傳想斟列貝利或者哥古夫等攻擊球員
講真繼續為防線換血似乎更加實際
而家第 n 次有消息指佢地想引入阿拉祖去取代域陀華迪斯
希望等左幾個暑假之後終於有個新龍門啦

巴塞既領先優勢一下子由12分減到7分
數字上當然有危機
不過只要美斯仔冇傷冇病
哥迪奧拿又唔好過份鍚住佢唔用
巴塞既戰鬥力依然好有保證

加上皇馬既人腳唔比佢地多同埋強
兼且兩隊一齊要搏歐聯
只要個別球員唔好持續爆鑊
巴塞羸聯賽既機會依然樂觀

2) 曼聯對布力般流浪

一冇左維迪既曼聯就即刻失波
佢地條防線俾奧查一腳簡單直線就劏開左
里奧咁既身型又竟然撞唔羸柔弱既辛達告魯斯
忽然覺得維迪比里奧更加值3000萬鎊既身價
而家曼聯仲傷埋伊雲斯
旨意里奧夾奧沙,布朗甚至乎預備組既查斯特
摩連奴唔開心死就奇

3) 利物浦對曼城

利記羸唔到波既原因有好多
可以怨冇運
因為比拿美既倒戈入波係省中人而改變左方向
亦可以話因為基雲一如以往咁勁

不過真正既原因似乎係佢地冇左謝拉特就冇晒組織力
上半場其實只有初段一陣急攻
之後就冇料到
講真半場唔使輸都要多謝艾利蘭把握力夠差

下半場輸波後
佢地都係繼續老鼠拉龜
冇人俾到波
古治同埋托利斯就算幾勤力走動都冇用
而班拿約一場之內踢左至少3個位都幫唔到大忙
最終有1分落袋已經係不幸中之大幸

4) 紐卡素對愛華頓

忽然發傻既唔止基達
原來仲有路蘭
咁樣雙腳攔截真係抵佢見紅

不過紐卡素踢少個之後反而踢得仲集中
防線都少左甩漏
終於近9場波第一次力保不失
防守上既表現堪稱近期既代表作
本季最大發現既巴斯桑治再多一場代表作

另一方面,抵讚既仲有侯頓既調動
佢先用勤於走動,防守能力更高既古迪利斯代替杜夫
之後又用馬田斯入替艾美奧比
靠前者既速度去牽制拖肥糖條防線
講臨場反應已經快過身處晏菲路既曉士