尋日因為時間同埋篇幅既原因而冇講尼日利亞出閘脫腳
小弟腦海依然有佢地90年代中期超勁既表現
佢地兩度出戰世界盃靠驚人體力
搞到阿根廷同埋意大利要出盡九牛二虎之力先羸到佢地
西班牙仲因為佢地而要分組賽出局
96年羸奧運就簡直係經典
佢地接連力挫強陣出擊既巴西以及阿根廷
當時仲有球評家預期佢地會成為世界一線勁旅
不過近年佢地既表現算係差過眾人期望
只係偶爾於青少年組別以及祖國奧運有比較理想既成績
不過整體表現其實亦只係一般
更要多得抽到好籤
大國腳就只係成為世界大賽既陪跑份子
06世界盃入唔到決賽週就更令人失望
小弟覺得佢地近年冇一個出色 playmaker 係可能原因之一
以前佢地有 top fit 既奧高查以及簡奴
但而家可以倚靠既就只有庸才米基爾
連續兩屆睇非國盃都見佢帶唔起隊波
前晚簡奴後備入替亦明顯有老態
冇組織力既球隊根本唔可能成為勁旅
佢地經常出口射手以及翼鋒
皆因球員多數都有體能同埋速度上既優勢
球探搵新血都集中搵這兩個位置
試問仲有幾多人會想踢進攻中場
(其實球隊個別位置特別出色
同當地人既想法幾有關係
有冇人留意到日本點解特別多出色 playmaker?
小弟就覺得好可能同當地人睇戴志偉睇到上晒腦有關)
前晚見到佢地既陣式由伏士年代既 4-4-2 轉為 4-3-3
不過攻力繼續單靠個別球員艱苦經營側擊始終唔係上策
埃及教練舒赫達下半場加強邊線防守
超霸鷹就隨即折翼
而佢地亦有其他缺點
首先過份靠個人力量令球隊好容易失去控球權
佢地有必要學習踢整體戰
而3個入波都反映中場效率唔高兼回防不力
加上耶保領導既防線只係對應付傳中既高波比較有把握
整體防守能力好難令人放心
如果阿姆度搞唔掂以上問題
超霸鷹好難飛到去世界盃8強既新天地
相反對手埃及冇左一對星級箭頭
陣中只有施丹以及哈辛特別出色
不過佢地靠整體戰就已經成功獵鷹
加上有個淡定布錢剩既教練舒赫達
佢地冇得去南非踢決賽週其實好可惜
p.s.:
唔計未出場既加納
以及衰到入圍都冇份既南非
其餘有份踢世界盃決賽週既球隊現時全部出閘脫腳
真係唸都冇唸過
不過去到6月隨時又係另一個故仔
當年塞內加爾就係好例子
2 comments:
小弟自睇波開始
一路都聽到超霸鷹
係非洲超班
不過睇落又唔似咁雄霸非洲
近年更加有新勢力上位
希望尼日利亞可以振作
畢竟馬田斯仍然係小弟所愛
講開塞內加爾
06年威完後
就好似沉足咁耐
同迪奧夫一樣
果年威完後
轉完會後一路都踢唔番最高水準
其實網主講到完整體戰
小弟覺得係有必要
只係當一隊波既球員
實力相差太遠
只係靠一兩個球員揹飛
其他球員連普通工作都做唔掂
整體戰其實又幫得幾多
好多非洲國家都係咁既情況
To: 舒利亞
1)
尼日利亞90年代中期既水準幾高
高而家至少兩班波
佢地當年既戰鬥力
仲勁過而家幾隊非洲勁旅
2)
塞內加爾係02年忽然發威
3)
講整體戰
唔係要每個球員都一個扭幾個
或者一個爆幾個
只係要佢地有意識同埋體力走多幾步補位
唔好搞到過份倚賴個別球員單打獨鬥
不過小弟都同意知易行難
亦講求教練既功力
Post a Comment