2010-4-30

近兩日既新聞......

1)
賓尼迪斯透露利物浦要引入4至5個新球員
先有力爭英超

而麥利殊再次否認接手利記既傳聞
伯明翰方面就想同佢續約3年

2)
巴塞被傳出價4000萬歐元另加保贊以及希比
向華倫西亞收購大衛韋拿

另一方面,域陀華迪斯由於襲擊摩連奴
而面積俾歐洲足協重罰

3)
雲加透露會同伊度亞度達施華交待
由於佢下季要同雲佩斯,查馬克,賓特拿爭奪1個出場名額
所以出場機會變得相當有限
俾佢考慮係唔係再繼續留隊

而佢將於季尾同加拿斯,蘇甘保以及施維斯達傾去向問題
佢亦透露球隊將會引入兩至三個新球員
佢將於世界盃前落實第一個新球員

另外,兵工廠被傳睇中布力般流浪兩名年青球員
包括菲爾鍾斯以及尼桑斯

4)
富咸現時於 Fair Play League 力壓般尼
不過如果前者之後羸到馬體會捧走歐霸盃
將會益左後者下季都有份踢歐霸盃

5)
消息指阿古路將以4000萬鎊既價錢加盟車路士

6)
侯利亞拒絕接手禾夫斯堡

7)
拜仁方面非常支持備受性醜聞困擾既列貝利
早前雲邦美仲直情做埋家訪去探訪列貝利夫婦
漢尼斯就表示希望方誠意可以打動佢續約

8)
祖雲達斯委任安格尼利為新主席
佢透露球隊暑假有8000萬歐元增兵

9)
Big Sam 表示第39場英超事在必行
以保住英超在歐洲球壇既競爭力

10)
朗尼當選英格蘭足球先生
成為雙料足球先生

11)
消息指蘇拿要求攞足190萬鎊賠償
而槌仔幫被傳想引入韋定咸以及伊高斯

12)
貝尼斯干尼證實李安納度季尾離隊
而外界指泰索迪同埋加里有機會一齊接手

13)
熱刺成為最新一間同咸美艾天托普扯上關係既球會
而佢地亦被傳想引入當尼或者費達歷斯同高美斯作良性競爭

另外,再有報導指曼聯想用卡域克作為收購莫達歷既籌碼

14)
漢堡被傳想搵奇連士文下季接手

15)
紐卡素被指考慮羅致史堤夫亨打

16)
曼聯同蘇保迪扯上關係
報導指1500萬歐元或以上既出價先可以打動多蒙特放人

17)
迪高澄清下季尾之後先想返巴西落班

18)
曼城被傳有1.5億鎊增兵資金
當中東尼,拉度同埋希比都同佢地扯上關係

另外,基雲將可趕及下季季初復出

19)
安貞煥入選南韓30人初選名單

20)
侯城方面指佢地唔會落得被接管既下場

21)
查斯古特再次同哥連泰斯扯上關係

2010-4-29

想講兩場歐聯......

1) 里昂對拜仁

由於防線上一圈兩鬥曼聯都於早段發波瘟
今次仲要鬧埋中堅荒
雲高爾就索性比上回合更加以攻為守

前線4人將對手既防線逼到幾後
印象中里昂兩閘加埋踢左135分鐘只係成功出擊過1次
而小豬有雲邦美復出幫手亦足以搶羸對手
搞到里昂中後場好似斷開兩截
直接導致佢地中後場傳球失誤既比率偏高

加上左右兩閘於早段甚少出擊
以專心應付巴斯圖斯同埋高禾
結果里昂兩名攻擊重心迪加度以及利辛度盧比斯就仿如被孤立
當中前者由左路移入中路後仲有嚴重既'抗拒反應'
中路防線有隱憂既拜仁就咁立於不敗之地

當然戰局發展落去亦係拜仁主導比賽
而最後多得基斯小不忍則亂大謀
簡接幫奧歷連中三元

相反佩爾既調動就明顯低唔止一班
半場輸一球換入B.高美斯搏殺絕對正路
不過要巴斯圖斯兼顧防守就唔多實際
結果造就拿姆多左好多出擊機會

而迪加度咁屎既表現都可以踢79分鐘就更係出奇
相反比真歷同埋艾達臣都係大勢已去先有得落場
卡士唐就更加要坐足全場冷板凳
冇晒組織能力既中前場只係俾人大打亂章既感覺

2) 巴塞對國米

摩連奴原用上回合既防守戰術
總之龜縮兼收窄防線
而佢大抵估到美斯會比上回合更多時間墮後協助沙維
所以就算踢少個攻擊球員
都要加多個捷禾去招呼美斯

不過莫達被逐就打亂晒佢既部署
亦令球隊之後連少少還拖既能力都冇埋
靠既就只有餘下10個球員既防守紀律同埋鬥志
大丈夫話唔出就唔出

巴塞方面
好開心見到耶耶托尼有出場機會
不過哥迪奧拿搵米列圖串演左閘就搞到之後浪費左1個換人名額

而形同虛設既伊巴再次於60分鐘後被換走亦唔令人意外
畢竟佢狀態平平兼冇咩走動
森美爾就好似佢面前難以爬越既圍牆
巴塞亦明知國米唔多驚高波而用唔著佢既高大身軀

之後用謝法倫取代布斯基斯亦好正路
畢竟後者扮嘢令莫達被趕離場已經係佢對球隊既唯一貢獻

但相對於用咩人腳
踢法先係最大問題
佢地好波到走唔出地上最強既框框
好似只係識中路短傳滲入或者個人突破
就算老鼠拉龜到最終只得浪射了事都唔肯轉章
最終20射只得4中又點威脅到祖里奧施薩

唔用高波值得諒解
畢竟佢地普遍先天不足之餘
連練波亦未必會踢高波
就算靠伊巴同埋碧基都唔似可以從牛高馬大既國米球員身上搵著數

但佢地有能力拉邊都唔好好去做就好有問題
似乎上至哥迪奧拿,下至球員
都唔記得上回合既入波係來自國米既右路漏洞

謝法倫入場後同柏度洛迪古斯一左一右
但前者好少靠速度同埋體能上既優勢沉底
亦堵塞麥士維後上
如果美斯有更多機會專攻左路
效果一定好好多

面對好波但頑固既巴塞
國米當然唔介意全場只得1次零角度射門
更加唔介意只得14%既控球率
因為後人只會記得巴塞咬唔入國米

p.s.:
同事彼德同小弟都估中拜仁同埋國米入決賽
唯有靠歐霸去決定邊個先係今期 office 估波王
利記對漢堡?
定係馬體會對富咸?

2010-4-28

1)
黃健華否認收購利物浦

而利記從查爾頓引入18歲英格蘭中場舒爾維爾
首期轉會費係170萬鎊
不過總數會隨住佢為利記以及英格蘭出場而增加

2)
謝拉特老婆否認婚變傳聞

3)
英格蘭傳媒指車路士已經同阿古路達成秘密協議

4)
摩連奴否認客串教加納踢世界盃

5)
蘇蘭奴涉嫌強姦1名22歲女子而被拘捕
佢之後獲准保釋候查

6)
艾夫蘭被指成為皇馬2000萬鎊既新左閘人選
而文達丹就放風有興趣轉投曼聯

7)
紐卡素被傳打算以100萬鎊收購羅拔斯
而史篤城就再次被指有興趣引入卡路爾

8)
蘇利雲同拍檔高特大唱反調
暗示唔會撐蘇拿

而槌仔幫被指有興趣引入杜蘭斯以及奇雲保定
不過西布朗已經拒絕佢地對前者既400萬鎊出價

9)
曼城再次會換血
今次既版本就包括艾利蘭,布歷治,胡禮菲臘斯同埋艾迪巴約

消息指維拉好有興趣接收前者
而報導指賣走後者唔止係因為套現買托利斯
文仙尼亦嫌佢場內場外都麻煩多多

另外,有傳佢地會同韋拉續約1年
報導指週薪高達14萬鎊

另一方面,佢地落實從新特蘭借用富洛普

不過有報導指佢地仲想提前收回祖赫特
雙方仲未就伯明翰要求既賠償達成協議

10)
阿仙奴被傳考慮羅致費爾
而佢地亦被指有興趣回收迪亞拉

11)
維拉同埋新特蘭都被指考慮引入希比

12)
洛杉磯銀河被傳想引入細哨以及魯爾
以保持球隊既星味
就算交易形式只係借用亦冇問題

13)
消息指些路迪有興趣買斷卡馬拉同埋收購保拿特
富咸就表明要收到350萬鎊先肯放走前者

14)
狼隊被指打算接收比基以及美納特

15)
阿祖安奴打算重返意甲
消息指佢最有可能加盟羅馬

16)
伯明翰再次同賓科士打扛扯上關係

另外,楊先生先按法庭判決而過數220萬鎊顧問費俾 Seymour Pierce
不過佢之後透過伯明翰國際表示會提出上訴

17)
奧迪加獲肥馬重召返國家隊

p.s.:
里昂對拜仁既賽後感
等埋今晚場波再講

2010-4-27 (2)

1)
國際足協參考NBA訂做冠軍指環
不過這隻價值18萬7000歐元既戒指只會頒俾最佳球員

2)
魯殊回歸利物浦
出任足球學校既推廣大使

另外,利物浦就令人意外咁同泰維斯扯上關係

另一方面,賓尼迪斯表示可能改用阿古蘭尼踢進攻中場

3)
史尼達尋日唔能夠跟大隊練波

4)
阿仙奴被指打算利透法比加斯續約
除左俾300萬鎊簽字費佢續11萬鎊週薪既新約外
仲追加返佢近兩年既人工

另外,梅里達被指已同意同馬體會簽約5年

5)
紐卡素被傳有興趣羅致耶保以及派迪利

6)
由於基雲同埋史超活泰萊都要養傷
曼城要求英超賽會俾佢地臨時借用1名龍門
消息指佢地打算向新特蘭借用3號龍門富洛普

7)
堅尼被指想遊說畢特延遲退休
兼下季加盟葉士域治

8)
侯城,般尼同埋韋斯咸都可能面臨散班命運

侯城只係數字上仲有機會成功護級
佢地早前已經被指向英超賽會預支'恩恤金'
消息指佢地想搵菲臘布朗歸隊幫手重組
首要任務係將波糧支出由4000萬鎊大減至1500萬鎊
所以高薪球員都會被賣走

例如保拿特就可能以300萬鎊賣去西布朗
基奧雲尼就好大機會以100萬鎊轉投奧林比亞高斯
而沙耶高,加特拿,保定,雲尼古,莫耶高洛,基賓尼,文迪,
奧路芬贊拿以及基拿斯都待價而沽

而肯定降班既般尼亦有同類情況
主席基比狂插白賴仁羅斯要為球隊降班負責
史堤芬費查以及伊高斯雖然人工減半
不過下季繼續踢英超既機會唔低
前者得到舊波士奧雲高尼賞識
轉投保頓只係時間問題
而後者就可能因為得返1年約而被賤賣

另外,比歷克可能索性掛靴
而隊長阿歷山大就續約1年以同球隊共同進退

槌仔幫方面
高特雖然開聲撐蘇拿
不過佢於球隊既前景仍然唔樂觀

而蘇利雲就表示除左柏加之外
其餘球員有好價就會賣

9)
科拿下季轉投另一間澳職盟球會 Perth Glory

10)
梅斯達下季重返德甲
以自由身加盟史浩克04

11)
碧咸要養傷到11月
意味佢缺席今季美職盟

12)
曼聯被傳用貝碧托夫加現金收購列貝利

13)
里昂方面表示冇考慮向費倫天拿羅致費爾
不過就暗示想買基拿甸奴

14)
伊隆加被傳成為巴黎聖日耳門200萬鎊既新左閘人選
而佢地亦好可能從皇馬接收迪亞拉

15)
魯爾同埋雲達華治都因傷提早收咧
不過後者既傷患應該唔影響佢參加世界盃

另外,考到歐洲教練牌既前者早前雖然表明下季仲會留隊
不過華丹奴就向傳媒表示願意俾佢季尾轉會

另一方面,西班牙傳媒指古迪下季轉戰阿聯酋聯賽

16)
馬卡爾宣佈季尾退休

17)
蘇連遜唔使做手術之餘
亦可趕及參加世界盃

18)
雲加提議卡比路選蘇甘保踢世界盃
而卡帥忽然改變主意俾WAGS隨隊
佢透露係參考納比上次帶世界盃既經驗

19)
漢堡決定解僱拉巴迪亞
導火線應該係日前聯賽俾哈化柏林大炒5:1
教練職務由助教莫利斯暫時接替

20)
愛華頓以及新特蘭都想搵引入自由身既摩頓柏達臣

21)
賓施馬透過律師發聲明
表示自己同醜聞女主角冇發生過性關係

22)
巴塞再次同艾殊利楊格扯上關係

23)
熱刺再次被指有興趣從曼城接收米卡李察士同埋比拿美
而佢地希望以頂薪點5萬鎊既條件同巴里提前續約

另一方面,狼隊打算搵羅比堅尼回巢

p.s.:
拜仁尋日練波只得14人
令德國傳媒擔心佢地今晚作客里昂既下場

不過德國佬出名夠韌
96年歐國盃決賽前佢地咪一樣唔夠腳
結果都可以後上羸捷克捧盃

2010-4-27 (1)

世界盃轉播鬧劇終於告終
兩個免費台死撐唔係屈服
不過用自己頻道播人地節目之餘
連廣告都要幫人地搵埋
實際輸到仆直

但畸寶A台既覆蓋有限
亦有好多人冇錢買機頂盒或者換高清電視
三家都聲稱為左公眾利益而達成協議
實情係一家將獨大局面合理化
其餘兩輸家就死雞撐飯蓋

搞到咁既局面
國際足協其實亦有責任
冇搞清楚香港咩環境
見好價就三扒兩撥同畸寶簽約
以而家香港既情況
根本唔算好符合國際足協要求普羅大眾都有波睇既條件

最煩既係而家只係惡夢既開始
倫敦奧運同埋巴西世界盃都係類似形勢
考慮到畸寶屎上最強既客戶服務
上網睇波或者飯局睇波可能先係出路

是是但但台同埋二奶台實情都好令人討厭
搵唔到機會賺過億廣告費就嘈嘈閉
兩者平時俾左幾多資源播體育節目就真係心照

前者之後仲要再行'小花'政策
小弟雖然都覺得周嘉儀成個公仔咁好可愛
不過更想見到既都係一個完整既新聞專輯

2010-4-26

近兩日既新聞......

1)
中國富商黃健華透露準備搵人 check 利物浦盤數
佢透露而家同一個中東買家爭緊利記
交易將於6月明朗化
佢仲表明賓尼迪斯唔會被炒

佢為左入主利記而於早前放棄手上所有騎士股份
亦透露08年9 月尾已經打算入主利記
不過覺得10億美金既叫價唔合理而唔成事

佢同鄭裕彤生意上向來有來往
早前就有傳聞彤叔個孫同佢合資收購利記

2)
謝拉特被指背妻同一個16歲0靚妹偷食之餘
仲滾大左人地個肚
報導仲話佢向法院申請禁制令唔俾當時人爆料
而佢老婆就被傳媒指佢同打呲郡二打六中場甘文斯關係密切

3)
傳聞賓尼迪斯想原價出售阿古蘭尼
更有報導話佢可能重返羅馬
不過佢既經理人已經否認有關報導

而奧拿里奧就同AC米蘭扯上關係
佢既經理人透露佢仲有可能續約
不過已經有幾隊向佢斟酌

另外,報導指莫耶斯將派拿既身價定為2000萬鎊
仲話明如果價錢唔合理
就寧願一拍兩散都唔俾佢提前離隊
之前曼城羅致尼史葛
莫耶斯亦係靠吊高來賣去爭取到2400萬鎊既筍價

4)
朗尼當選今季英格蘭球員先生
而占士米拿就羸得最佳年青球員獎項

另外,最佳陣容既人腳包括:
祖赫特,伊雲奴域,鄧尼,華美倫,艾夫蘭,
華倫西亞,占士米拿,法比加斯,費查,朗尼同埋杜奧巴

另一方面,拉迪比就獲頒最有貢獻獎
表揚佢退休後對社區既貢獻

5)
雖然費sir表示朗尼因為腹股溝,膝頭同埋腳踭都有傷而要提早收咧
不過當時人就表示會爭取於煞科戰鬥史篤城復出

6)
法林明高被傳想搵李安納度出任足球總監

而巴洛迪利既經理人爆料條麻煩友早前係被迫公開道歉
加上對阿特蘭大既聯賽佢忽然被收起
佢亦索性返家鄉睇布雷西亞既乙組比賽
令佢轉投AC米蘭既賠率轉熱

另一方面,柏圖因為爛滾而離婚收場
仲有傳聞指高層已經決定踢走佢同埋細哨兩條滾友

7)
蘇爾達度同埋施斯都被傳係布力般流浪既新箭頭人選
而愛華頓亦有興趣引入前者

8)
曼聯被傳有興趣從學生隊引入保斯利

9)
蘇連遜尋晚對車仔整傷手肘
好可能趕唔切決賽週前復出

10)
肥安簡單一句話收購球員唔計較球員既過去
就俾傳媒指佢準備引入列貝利

另外,燕豪芬既17歲新星拿耶特就同車仔扯上關係

另一方面,狼隊被傳接收文切尼

11)
傳聞如果曼城冇份踢歐聯
泰維斯將考慮離隊
而佢地被傳想買哥古夫以及伊斯米洛夫

另一方面,由於基雲甩骹要提早收咧
令球隊只可以倚靠法羅群島龍門尼爾遜

12)
樸茅被傳私吞癌症基金既捐款
總數超過1萬4000鎊

13)
莫耶斯表示有興趣接收辛達路斯

而漢基蘭同埋蘇保迪就再次同阿仙奴扯上關係
皇馬,曼聯,曼城同埋車路士都有興趣羅致後者

14)
侯城被傳向英超賽會要求預支降班既'恩恤金'
而佢地被傳想搵菲臘布朗回巢接掌球隊

15)
皇馬被傳有興趣羅致舒韋恩史迪加以及迪米捷利斯
不過亦有報導指拜仁想從佢地接收迪亞拉

另一方面,柏歷堅尼被傳下季轉投華倫西亞

16)
史高爾以私人理由向拜仁高層請辭唔教預備組

17)
希活再次同紐卡素扯上關係
不過奧林比亞高斯亦對佢幾有興趣

18)
列特成為最新一個韋斯咸新領隊既傳聞人選

p.s.:
摩連奴連續3次於歐聯淘汰賽次回合前話史尼達可能因傷倦勤
狼來了既故仔大概冇人會信

而西班牙傳媒就指哥迪奧拿已決定幾乎原陣出擊
只有米列圖取代停賽既佩奧爾同阿哥過招
而如果艾比度趕及康復
亦會取代麥士維踢正選

2010-4-24

1)
費sir否認退休傳聞
而佢暗示賓科士打仲有留隊空間

另外,法比安奴就放風有興趣加盟紅魔

2)
柏天尼睇死法國陪跑之餘
亦炮轟杜明尼治

3)
肥安將從預備組提升5名新球員同埋買兩個新兵
卡卡,柏圖,舒韋恩史迪加,韋拿以及阿古路等名牌亦同車路士扯上關係

另外,幾名球員就被傳會被棄用
當中包括迪高,卡華路,保羅費拉拿,希拉里奧同埋波歷克
前者早前就表示因為家庭理由而想返巴甲落班

4)
費城將有球隊加入美職盟
佢地證實已經對皮利斯展開斟酌

5)
利物浦被傳出賤價600萬鎊收購雲達華治
佢地亦想從格流搶走仲未流續約既新秀丹尼威爾遜
打算先收購後再借返俾格流

另一方面,巴布,尼亞拿同埋奧拿里奧就將被踢走

6)
阿仙奴被傳同曼城爭奪靴里拉
不過這名薩拉戈薩中場既2000萬鎊贖身費就一定係交易障礙

而祖雲達斯以及AC米蘭亦被指想引入沙格拿

7)
巴黎聖日耳門被傳想接收比夏積

8)
富咸以及熱刺都想收購卡維

9)
伯明翰被傳有意引入保夫萊特
而佢地被指只係唸縮數想借用賓科士打

p.s.:
米列特藥檢肥佬而即將停賽兩年
米高莊遜後最強既400米跑手好可能從此收皮
可惜又抵死

2010-4-23

近幾日既新聞......

1)
消息指波腫將於日內公布金猴忠再次執教港隊

2)
法國國腳嫖妓醜聞女主角蒲頭接受傳媒訪問
索爆既佢承認同列貝利，高禾以及賓施馬都有性交易
不過事前就冇同佢地提及自己仲未夠秤

有報導指皇馬已打消收購列貝利既決定
更可能季尾踢走賓施馬

3)
雖然摩連奴表明唔會放棄巴洛迪利兼俾佢正選機會踢聯賽
不過仍有報導指這隻過街老鼠已經決定離隊
但佢已經隨即作出否認

另一方面，日前執法國米對巴塞既賓克倫卡
俾傳媒踢爆佢之前同摩連奴合資開餐館
亦曾經涉嫌於葡超吹死賓菲加
而佢亦曾經承認係國米球迷

4)
祖雲達斯球迷為左國米同樣要因為電話門事件而受懲罰
既響應都靈體育報既簽名運動
亦出錢請大狀迫意大利足總做嘢

5)
消息指利物浦將於暑假賣走巴西後備龍門迪亞高
再從狼隊收購軒尼斯作為拉爾拿既副手

而利記同曼城以及熱刺都被傳有興趣羅致派拿
不過佢既經理人透露佢冇打算離隊

6)
由於下季英超新例規定２５名A隊球員當中
要有至少８名球員於２１歲前於英格蘭受訓至少３年
所以報導指雲加下個月搵球探去巴西尋寶

另外，塞內加爾中堅迪亞克亞迪以及梅斯達
都被傳成為雲加既新中堅人選
現年２５歲既前者被基輔戴拿模外借到聖伊天
至於後者就被指亦係史特加以及雲達不來梅既增兵對象

另一方面，祖雲達斯被傳打算用保方同埋美路
同兵工廠交換雲佩斯

7)
歐洲足協駁回樸茅踢歐洲賽既申請
（亦令英超第７有得補踢歐霸）

而雪上加霜既係
由於卡保爾既轉會費合計埋比高域既身價
熱刺有權要求佢地回水１００萬鎊
不過追唔追得返又係另一件事
事緣財政報告透露佢地原來窮到４０鎊肉批都要拖數

8)
曼城被傳將會踢走多名球員
當中包括：羅賓奴，比拿美，馬田柏杜夫，韋拉，辛達告魯斯，加拉度，
施雲奴，胡禮菲臘斯，艾利蘭，馬華路禾尼，米高莊遜以及卡斯度

而佢地入咩新貨就要視乎下季踢邊歐聯定係歐霸
當中佢地被傳考慮向賓菲加出價４０００萬鎊
一併收購奧斯卡卡度素同埋迪馬利亞
佢地亦被傳同拉素爭奪卡坦尼亞既烏拉圭射手馬天尼斯

9)
消息指畢特將於季尾退休
聽晚紐卡素對葉士域治仲好可能係佢既告別賽
而賽前佢會以隊長身份捧起英冠獎盃
曉頓就提議佢加入教練行列

而紐記就再次被傳想引入查理阿當
不過１５０萬鎊既傳聞價錢似乎唔足以打動黑池
而甸丹尼以及馬田柏度夫都同紐記扯上關係

另一方面，韋斯咸被傳考慮羅致史堤芬泰萊

10)
洛里斯被傳成為拜仁既新龍門人選
不過亦有可能係德國佬為左擾敵而放風
而佢地亦令人意外咁被指同維拉爭奪卡頓高爾

另一方面，咸美艾天托普勢將以自由身離隊
報導指費倫巴治，加拉塔沙雷以及馬體會都對佢幾有興趣

11)
西班牙傳媒指希古恩原來已經３度拒絕皇馬既續約要求

而魯爾表示未必於皇馬收山
不過至少下季仍然留隊

12)
蘇拿離開韋斯咸似乎只係時間問題
不過由於佢同埋奇勒既年薪加埋高達３１０萬鎊
令韋斯咸得返４０００鎊週薪既預算去搵新領隊
除非佢地之後肯加碼
否則比歷，麥利殊，曉士，格蘭，修夫基同埋麥卡倫都唔似會接手
而後者仲被傳成為漢堡既新教練人選

13)
希迪布蘭下季可能重返史特加
而薩爾斯堡就想羅致列文或者雲昇取代斷腳長抖既正選龍門

14)
由於艾達傷左肋骨
應該趕唔到德國之後３場熱身賽
有傳路維考慮放棄佢而改為選列文入國家隊做３號龍門
不過簡尼就反建議選畢特或者維丹費拿

15)
AC米蘭被傳下季接收恩沙基
而佢地就決定俾柏路斯續下季再以借用形式效力帕爾馬

另一方面，車路士被傳想用伊雲奴域再加現金收購柏圖

16)
傳聞費sir點名莫耶斯接手
不過後者已經即時同曼聯畫清界線

另外，曼聯被傳用貝碧托夫同AC米蘭交換亨特拉爾
而巴里，占士米拿以及柏仙尼就同佢地扯上關係

另一方面，曼聯連續６年被評為最值錢球會
估值１８億歐元

17)
米基爾因為膝傷而缺陣最後３場聯場
不過佢仍有機會趕及足總盃決賽
可憐既艾辛就有可能踢唔到世界盃

而杜奧巴雖然受疝氣傷患困擾
不過就表明就算缺席下季季初賽事
都會捱到過左世界盃先開刀

18)
韋比克落實下季起執教阿爾克馬爾３季

19)
艾朗連儂將於聽晚對曼聯復出
而卡比路向熱刺既醫療團隊攞京治每場聯賽之間既身體狀況報告
以考慮佢既傷患同埋復原速度岩唔岩踢世界盃

20)
費高透露將來可能加入國米教練團

21)
穆罕默德施丹因為右膝韌帶嚴重撕裂而要養傷半年

22)
侯城被傳下季想搵保羅蘇沙接手

23)
尼索比亞因為酒精測試搵人頂包而被捕
（抵死（蠢）！）

24)
艾寧斯因為唔受史特根重用而考慮離隊

25)
迪馬提奧被傳考慮從錫週三引入李爾格蘭同卡臣作良性競爭
而佢早前暗示唔會引入占士

26)
伯明翰被傳有興趣接收賓科士打

27)
森莫拉傷左阿斯里斯腱
不過比碧咸好彩既佢仍然有望趕及次回合鬥漢堡

p.s.:
１）
都話左尼哥治信唔過
當然盧卡斯利華同埋基傑亞高斯都唔係好貨色

唔怪旁證發雞盲
只希望下場謝拉特及時振作

２）
R.I.P.薩馬蘭奇

2010-4-22

想講國米對巴塞

早講過國米踢得返史丹福橋一役既水準
絕對有力同巴塞一戰
巴塞輸波既其中一個原因一定係體力
國米早佢地一日踢聯賽之餘
又唔使捱長途車
不過俾人技術性擊倒既關鍵絕對係摩連奴
寫巴塞大炒兵工廠既賽後感
已經提過串王一定有幾招旁身
只係揭終先見識到佢原來集百家大成

大抵上季既車仔同埋學生隊已經做晒示範俾佢睇
而皇馬次次主場唔識死咁將防線壓前
益晒巴塞頻頻破越位屈機既片段
亦一定在串王腦海日夜重播
所以串王今場既部署主要有幾點:

一係任巴塞於唔危險既地方盡情搓波
國米球員就龜縮誘敵
亦有少少放棄兩側而收窄防守區域
既阻平均技術比較好既巴塞球員短傳滲入或者個人突破
亦唔好俾機會沙維一下直線就劏穿條防線
結果球員成場波基本上做到部署
先輸1球只係因為馬干同埋甘比亞素忽然夢遊
落後下都冇心急改變戰略
佢地主導球賽後就更加搞到巴塞老鼠拉龜
甚至乎連射中距離都受制於血肉長城

二係搵專人聯防美斯同埋沙維
結果地上最強遇上幾個同鄉
忽然好似由火星回歸地球
而佢於右路動彈不得亦俾唔到好多空位丹尼爾艾維斯後上
傳球天才亦因為冇左恩尼斯達同佢合作而越踢越沉

三係專攻巴塞左路
艾比度踢正選都被評為巴塞最大漏洞
何況係國米棄將,速度路數都欠奉既麥士維
條友有助攻都功不抵過
輸三球都同佢有一定關係

四係再用伊度奧同埋彭迪夫拉邊
前者大打爭氣波
四圍走搞到巴塞球員疲於奔命
如果後者唔係大波隱形
巴塞防線應該更風聲鶴唳

五係放長傳避免同巴塞中場過招
三扒兩撥將個波送去前場
既減輕中後場壓力
亦可以以快打慢
特別係巴塞中後場既平均速度真係好一般

另一方面,巴塞輸波當然另有罪人
雖然輸3球都同麥士維有關
不過零射門既伊巴謙莫域或者更令巴塞球迷激心
冇態之餘又唔肯走動
自然鬥唔過小動作多多既盧斯奧
更慘成國米龍門口既大巴士

而布斯基斯以及基達亦令人失望
佢兩個不但俾唔到沙維應有既支援
更大鑊既係睇唔實史尼達
到而家都唔明點解哥迪奧拿成日唔用防守能力更好既耶耶托尼

另外,哥迪奧拿雖然已經羸晒所有嘢
不過始終唔夠經驗同老狐狸過招
軒迪克同埋摩連奴都明顯算到佢盡

而唔慣下風波既佢
連續兩季歐聯4強都將無奈同埋焦急盡現人前
佢提到羸唔到波係因為拉唔開比數
而唔肯承認俾摩連奴算死佢既事實
就更令人擔心佢有冇本事10年後再次領軍重演先輸1:3都後上過關既好戲
要知道當年佢係隊長
而串王就正正係助教

p.s.:
1)
洛賓好波又有運
如果佢同史尼達都有份踢決賽
皇馬又係咩面都冇

2)
之前主觀願望巴塞入決賽
不過知道幾乞人憎既上司拉雲拿利集資3000蚊買巴塞捧盃
改撐國米羸波都開心

2010-4-20 (2)

1)
樸茅既債務原來高達1億1900萬鎊

而早前講過朗斯希望甸丹尼可以踢足總盃決賽
原來佢地係希望儲夠22場之後問樸茅攞借用費
仲好優惠話打個5折只收200萬鎊
不過樸茅方面已經表明冇得傾

2)
紐約紅牛被指打算引入迪比亞路
而另有幾隊美職盟都打佢主意
不過報導指佢既家人傾向於紐約定居

3)
阿仙奴方面依然希望同雲加續約到2014年

4)
傳聞費sir決定下季尾退休
摩連奴,哥迪奧拿,卡比路,軒迪克,雲加以及奧尼爾
都隨即被傳係曼聯既接手人選

5)
意大利傳媒指AC米蘭既巴西幫將會一個不留
當中包括李安納度,細哨,柏圖以及迪達
而亨特拉爾亦大熱冇得留低

有出就有入
卡拉錫同埋迪施高再次同佢地扯上關係
貝碧托夫就直情令人意外

而佢地亦打算引入年青球員
當中包括安德列治既盧卡古以及紐卡素既胡基斯
而曼聯就準備同佢地爭奪後者

6)
比拿美再次同熱刺扯上關係
消息指佢為左離隊仲肯減人工

7)
皇馬為左改善防線
被指將向甘美奧收購中堅M.費蘭迪斯
消息指國米同埋巴塞亦對這名可兼任右閘既19歲球員幾有興趣

8)
阿古路暗示希望加盟車路士
而狼隊希望下季向車仔續借文切尼

9)
戴夫因為膝傷而要倦勤8個月

10)
卡比路被傳考慮徵召戴臣去南非

11)
法國國腳衰十一醜聞
列貝利同埋高禾既律師都話兩名球星被警方邀請出任證人

但當地傳媒指法院消息人士透露(何來可以咁做?)
列貝利其實係事件主角

而賓施馬以及賓艾化亦被傳同事件有關

12)
慕遜加柏被傳向標準列治出價400萬歐元收購比利時射手迪卡馬高

p.s.:
紐卡素提早穩奪英冠
恭喜晒!

2010-4-20 (1)

今晚摩連奴將帶隊再次倒戈巴塞
如果入到決賽仲有機會再遇前上司雲高爾
正好趁機會講少少摩連奴既嘢

話說波比笠臣帶佢入巴塞做助手
前者及後被雲高爾所取代
兩個名教頭都教左佢好多戰術方面既知識
總算係佢師傅
後者仲直情俾佢客串教B隊以累積執教經驗

雲高爾時代既摩逢奴已經認為自己好有料
所以自發做左好多額外既工作
做球探之餘亦監視其他西甲球隊既表現
但由於雲高爾真係冇叫佢咁做
佢既開支亦自然 claim 唔返錢
住唔起酒店既佢唯有問唔同既記者借宿做廳長
順便同人地講下波經

串咀既佢當時竟然曾經同記者講過雲高爾其實唔係好堅
佢自己就總有一日會出人頭地
但當時其實冇咩記者識欣賞佢既才華
令佢最終有西班牙記者唔識波既結論

而串王早年成日都叻唔切
從波比sir年代開始
同球員下傳指令既時候
有時竟然私自加上自己唸法
直至有次俾雲高爾揭發就成為佢最終離隊既導火線

由於當時西班牙球壇冇咩人識欣賞佢既足球理念
佢被炒後連西乙球隊都冇打過佢既主意
最終唯有返葡萄牙發展

到佢04年帶波圖羸左歐聯
總算係一'冠'成名
加上同年希臘爆大冷羸歐國盃
部份記者形容為消極足球僥倖獲勝既一年既言論
就激嬲左已經串得起既摩連奴

英國記者同佢關係唔算好
但就一定唔差
事關佢既偉論令記者可以作少幾單新聞
而舌戰其他名教頭又真係好睇過戲

但去到意大利既摩連奴就唔多如意
教超班既國米羸聯賽根本只係最基本既要求
做到都唔會俾當地傳媒覺得佢 special
佢同傳媒互相唔俾面就搞到關係已經差無可差

佢份工就算羸聯賽都未必保得住飯碗
何況而家仲俾財困既羅馬過頭
對摩連奴最重要既只有歐聯
羸左既可以塞住老闆以及傳媒把口
而留隊抑或風光過檔到時都只有佢話晒事

不過佢既下一站應該唔會係巴塞
佢近日同傳媒講哥迪奧拿比佢更岩教巴塞
因為羸得最多錦標既就係最佳教練
唔好理佢係唔係又打心理戰
至少今次食齋不如講正話

如果賓尼迪斯暑假返唔成皇馬
小弟覺得摩連奴做船長既機會都幾大

2010-4-19

近兩日既新聞......

1)
幾段利物浦既新聞......

托利斯因為膝傷而要養傷6星期
意味佢要提早收咧
不過佢仍趕及踢決賽週

另外,利記就再次同韋拿杜姆以及加利卡希爾扯上關係

另一方面,赫基斯聲稱利物浦市值8億鎊
遠高於估值既5億鎊
而被球迷會狂插

2)
幾段阿仙奴既新聞......

雲加終於表態會同蘇甘保傾續約
而施維斯達,辛達路斯,伊保爾同埋伊度亞度都被傳會被清洗
里昂就被傳有興趣出價800萬鎊接收後者

另一方面.艾沙維同埋基治就再次同巴塞扯上關係
前者既經理人隨即作出否認

有出就有入
兵工廠被傳準備收購祖赫特,路蘭,卡積亞以及加利卡希爾
不過雲加表明唔會破壞薪酬制度

3)
幾段曼城既新聞......

曼城打呲前曾有消息指比拿美曾考慮罷踢
事緣佢向1名高層借糧被拒後同對方炒大鑊

而曼城就再次同保方以及祖高爾扯上關係

另外,佢地仲未同因為膝傷而持續倦勤既馬田柏度夫續約
令人相信佢於季尾約滿後會被放棄
泰維斯就被指成為皇馬既增兵對象

另一方面,佢地幾名球迷超冇品
賽後於球場外從後襲擊馬美迪奧夫既一個兄弟

4)
李安納度被指因為家庭理由而季尾離隊
而佢就拒絕作出任何回應
AC米蘭就被指同祖雲達斯以及費倫天拿同時斟酌阿里基

另一方面,漢堡既左閘艾奧高被傳成為AC米蘭既增兵人選

5)
拜仁表明季尾會回收東尼
又被傳有興趣接收貝碧托夫
令高路斯離隊既傳聞更有可信性

6)
C9透露唔信朗尼會轉投皇馬
而曼聯亦被指以15萬鎊週薪利誘佢留隊

另外,馬捷達被傳季尾轉投巴勘莫
佢既經理人已經否認有關報導

另一方面,哥頓被傳可能加盟

7)
奧奴夏由於早前拒絕出席尼日利亞既集訓
而被教練拿格碧克剔出45人初選名單之外

8)
史特根透露準備同韋達續約
維拉同埋伯明翰近日都被傳打佢主意

9)
富咸被指可能以400萬鎊從樸茅接收威爾遜

10)
國米被指打算用哥利斯馬另加2000萬歐元
向賓菲加收購拉美利斯

11)
新特蘭再次被傳準備收購費古羅亞
而佢地亦希望向里昂續借文沙

12)
馬勒當拿提前差唔多兩個月公佈首場分組賽既正選
人腳同早前熱身賽羸德國既陣容完全相同

13)
楊家誠表示希望伯明翰可以引入1名中國球員
以助球隊打入大中華市場

14)
賀爾表態希望紐卡素買斷佢

p.s.:
1)
唔檢點真係隨時搞到一身蟻
英格蘭有迪科爾玩車震而隨時坐半年監

法國足總就仲頭痕
3名國腳就被揭發嫖妓
由於事件涉及未成年少女已陸續被警方問話

2)
C9終於承認美斯係當今最強......

2010-4-18

幾場波想講......

1) 國米對祖雲達斯

施素高其實比美路可靠
不過衰魯莽就累死全家
就算簡拿華路,保方同埋迪亞高忽然回勇都冇用

前兩者回勇對國家隊而言絕對係好消息
可憐後者早已俾鄧加打入冷宮

2) 曼城對曼聯

好唔明白點解賽會會搵艾緊遜取代賓納特執法
小弟雖然當日都計過數
發現佢首循環既超長補時唔係偏幫曼聯
但英超冇其他球證咩
點解賽會唔識避嫌搵其他人執法
而家條友又爆鑊吹漏加利佬既12碼
難免令人會有聯想

話說回頭
兩隊表現其實都唔多值3分
不過主隊最終連1分都保唔住
文仙尼既排陣同埋調動都好有問題

艾迪巴約以及賽前同高層嘈交既比拿美都表現失準
根本唔值得踢咁耐
相反阿當莊臣同埋胡禮菲膿斯應該有更多既出場時間
而布歷治攻守都唔掂
搵巴利客串左閘既效果應該會仲好

另一方面,費sir尾段將史高斯推前搏殺
文仙尼竟然唔搵防中跟佢
反而要負責支援泰維斯既艾利蘭回防
又係錯得出奇

3) 熱刺對車路士

客隊又輸後防
當中保羅'廢'拉拿廢到俾人話過就過
加利仔應該慶幸有佢包底做左Big 4最廢右閘
好難想像佢當年既身價竟然高達1300萬鎊
而更難想像既係點解肥安唔用伊雲奴域踢正選

另外,泰利就終於因為手球而輸12碼
奧雲高尼應該深感天地原來真係有正氣
而佢持續患得患失既表現
肥安同埋卡比路都應該好頭痛

另一方面,杜奧巴既傷又係一個謎
仲搞到球隊下半場變相踢少個
加上再次大波隱形既安歷卡過多返中場搵波踢
就算泰利冇兩黃一紅
車仔都唔慌追得返
如果唔係柏夫奴真高打回原形
車仔應該輸得仲多

4) 韋根對阿仙奴

難得爭標希望重燃
更難得豬達冇破壞之餘仲有埋建設
兵工廠羸兩球都可以輸凸俾韋根
頭號罪人應該係雲加
而唔係再次應付唔到傳中既法比安斯基

同意講波佬話雲加算得太盡
其實亦可以話佢睇小對手
俾韋根追到1:2都只係換入梅里達同埋伊保爾
事實證明佢兩個明顯壓唔到場
而唔用尹佩斯就絕對係鼓勵韋根大軍壓境
到佢有機會落場都為時已晚

2010-4-17

近兩日既新聞......

1)
利物浦宣佈放盤
而布禮頓亦一如所料空降利記
消息指一名有阿聯酋皇室撐腰既敍利亞商人有意入主

另外,賓尼迪斯既經理人透露賓帥1月拒絕祖雲達斯既斟酌
之後雙方亦再無聯絡

另一方面,謝拉特第n次同國米扯上關係
今次既版本仲話國米肯用巴洛迪利作為交易條件

2)
AC米蘭否認日前已經同李安納度解約既報導

3)
阿仙奴主席希爾活特表示唔相信球會會被全面收購

4)
皇馬被傳再以破世界紀錄既9000萬鎊收購朗尼
而佢地亦想搵卡比路回巢

5)
鄧加成為最新一個同祖雲達斯扯上關係既名牌教頭

6)
曉頓承認冇巨額增兵資金
而紐卡素就被傳有興趣羅致查理阿當

7)
國米準備同辛尼迪再續約
意味佢可能踢到39歲

8)
文仙尼就早前同莫耶斯嘈交
而被英格蘭足總罰款2萬鎊

9)
漢堡方面透露準備俾謝路美保定離隊

10)
法國足總將里昂於歐聯4強次回合前既聯賽改期
雲高爾炮轟之餘
亦表態希望歐洲足協插手

11)
由於阿積士同埋飛燕諾既球迷係世仇
荷蘭足總證實兩隊既荷蘭盃決賽
將由以往既一場過賽事變成主客兩回合
而客隊球迷都唔俾入場

12)
曼聯被傳打算季尾收購連尼斯以及大衛雷斯
前者係彭拿典奈高斯20歲希臘進攻中場
後者係賓菲加既巴西中堅
一直同曼城,車路士以及國米扯上關係

另一方面,佢地宣佈同史高斯續約1年

13)
富咸再次同保查拉扯上關係
佢地亦同愛華頓都有興趣向川迪羅致拜仁雷斯

14)
梅度既經理人透露當時人希望停賽令唔好超過1年
亦希望之後可以繼續留隊

15)
恩斯宣佈季尾第二度離開米爾頓凱恩斯

16)
曼城既中東班主艾拿希恩打算發展曼城球場附近地皮
當中包括將球場擴建至可容納8萬人

17)
史篤城有興趣引入洛達列加同埋柏加

18)
保贊再次被指成為巴塞羅致列貝利既籌碼

19)
朗斯為左將迪丹尼賣個好價錢
而批准佢免費為樸茨茅夫於足總盃決賽出場
但條件係佢餘下球季都唔可以再踢英超

不過樸茅認為佢到時應該唔夠比賽狀態
而已經反對有關建議

p.s.:
1)
布歷治早前去美國溝既美女
竟然俾傳媒發現同C9有路
而C9近日又被爆仲有其他獵物兼且國家打呲前玩通宵
似乎輸俾美斯都抵佢死

2)
費sir既前家嫂即將下嫁戴倫賓特
原來戴倫費格遜以前曾經衰到虐打老婆
抵佢離婚收場

3)
免費台睇4場世界盃既機會越來越渺茫......

2010-4-16

近幾日既新聞......

1)
英格蘭球員先生候選人包括:
朗尼,法比加斯,杜奧巴以及泰維斯
而前兩者亦同時同占士米拿同埋祖赫特爭奪最佳年青球員

2)
幾段利物浦既新聞......

托利斯既膝傷證實只係虛驚一場
佢將趕及倒戈對馬體會

而近期同祖雲達斯扯上關係既馬斯查蘭奴
就表示準備同利物浦簽7年新約

另一方面,意大利傳媒指如果祖雲達斯下季無緣歐聯
未必有足夠財力請賓尼迪斯以及撥款俾佢買人
不過祖記就要求賓帥一個星期內決定

但同時間又有另一冇咁可信既版本指佢地決定再搏2億鎊翻身
而人選包括馬斯查蘭奴,托利斯,基拿甸奴,迪施高以及柏仙尼
當中美路可能成為羅致前者既籌碼

3)
紅武士再次被傳準備收購曼聯

另一方面,費sir被發現親身觀察洛里斯既表現
令曼聯準備向里昂收購佢既傳聞更有信服力
而艾堅費夫就同曼聯劃清界線

另外,貝碧托夫再次被傳將被sir踢走

4)
皇馬再次同大衛施華扯上關係
當地傳聞指佢將於暑假以3500萬歐元加盟

而佢地亦被指已經同山度士就羅致尼馬爾達成口頭協議
消息指這名18歲左翼將於2011年正式加盟

另外,費蘭尼既攔截能力亦令佢成為皇馬既增兵對象

另一方面,佢地被傳內訌
土炮同埋外援分別就支持以及反對柏歷堅尼而分成兩派

5)
傳聞列基美可能因為勾義嫂而被迫離隊
事緣佢狂 send msg 俾柏保路莫治既名模索老婆盧莉
不過事敗之餘仲俾女主角篤爆

6)
車路士忽然擱置同幾名老將傾續約
波歷克因而被傳可能改投國米

而比列堤就宣佈季尾約滿離隊
傳聞佢重返巴甲加盟聖保羅

7)
西甲球員工會決定取消罷工

8)
阿仙奴主席活特表示巴塞於暑假唔會收購法比加斯
不過巴塞方面已經隨即否認

9)
納比再次同AC米蘭扯上關係
而馬甸尼早前原來拒絕球隊搵佢復出客串既要求

另一方面,佢地被傳同細哨已布口頭協議雙方續約至2014年

10)
曼城被指出價1100萬鎊收購謝路美保定
消息指當時人已經向漢堡攤牌要求離隊

11)
卡比路考慮徵召阿當莊臣踢決賽週

12)
國米被傳想搵沙格拿取代可能離隊既馬干
佢現時既身價約值1200萬歐元

13)
艾禾卡特向比利時足總請辭
佢被傳將會接手俄羅斯

14)
卡利亞里決定解僱教練艾基利
球隊暫時由青年軍教練米利斯接手

艾基利係上季最佳教練
早前亦曾經同意大利足總以及祖雲達斯扯上關係

15)
馬基里尼重申季尾退休既決定

16)
韋斯咸被傳想搵格蘭接手

17)
紐卡素被傳考慮羅致史雲頓20歲射手C.奧斯甸
而愛華頓就成為最新一間同卡路爾扯上關係既球會

另外,現時被外借去諾域治既 F.科士打
透露將於季尾考慮前途

18)
列貝利表示將於兩星期內決定去向
而高路斯以及泰摩斯卓克就被傳成為羅致迪施高既籌碼

19)
基奧雲高因傷提早收咧
而佢近日先後同拿玻里,巴勒莫以及森多利亞扯上關係

20)
莫耶斯被發現親身去觀察韋素爾以及剛果射手 D.Mbokani

21)
甸丹尼被傳下季將會轉投布力般流浪

p.s.:
兵工廠又輸後防就好抵死
雲加再唔引入新中堅兼踢走豬達
雖然未必好似哈利列納咁講熱刺幾年來會超越兵工廠
不過就真係唔知幾時先可以再捧盃

不過雲佩斯久休復出唔足狀態都依然好勁
兵工廠中前場即時有返個重心
雲加可能因為驚佢唔夠狀態而遲左換入佢
否則小弟深信佢地真係冇得輸

另一方面,對一球成名既丹尼路斯有冇印象?
其實佢上年有份落場對南華
4個月前金猴忠仲曾經大想頭到提議羅先生借用佢

2010-4-13

近幾日既新聞……

1)
消息指利物浦已經搵巴克萊銀行幫手搞3億鎊債務重組
而BA主席布治頓仲會空降出任主席
負責撲水同埋調停兩個美國老闆既分歧
不過有消息指佢兩個獅子開大口
6億鎊放盤價高過市值足足兩成

另外,賓尼迪斯公開要求6000萬鎊增兵
仲暗示可能賣走謝拉特或者托利斯
而恩疏亞同埋班拿約都被傳可能離隊
前者被指轉戰西甲
後者就成為莫斯科中央陸軍既900萬鎊增兵對象

另一方面,托利斯被傳可能提早收咧

2)
阿仙奴其中一位股東 Lady Nina Bracewell-Smith
欲出售手上16%股份
以成全球會俾人全面收購

消息指現時兩大股東都有一定興趣
佢地分別持有29.8%同埋26.29%股份
法例規定邊個持有3成或以上股份就可以隨時提出全面收購
不過兵工廠估值可能高達10億鎊就可能係成事障礙

3)
由於德甲球會於歐洲賽既表現比意甲球會好
令佢地好可能於2012年球季從意甲手中搶多一席歐聯席位

4)
古迪宣佈季尾離隊
而有消息指皇馬亦考慮同魯爾解約
另一方面,佢地被指有興趣同巴塞爭奪艾殊利楊格

5)
樸茅早前冇如期申請歐洲足協牌照
佢地而家希望英格蘭足總網開一面俾佢地參加下季歐霸賽事
而消息指佢地既好表現吸引左幾名買家

6)
曼聯再次同大衛施華以及賓施馬扯上關係
而英國傳媒指紅魔鬼羅致韋拿既最大障礙
係佢要求20萬鎊週薪

7)
加利安尼否認李安納度同埋柏圖既離隊傳聞
而佢地就同塞爾維亞進攻中場哥高加卡扯上關係
祖雲達斯亦有意從哈化柏林接貨

8)
曼城近日再次同多名星級球員扯上關係
當中包括法比加斯,伊巴謙莫域,謝路美保定,
賀維迪斯同埋奧斯爾
不過後者近日就同雲達不來梅續約至2012年

而尼史葛提早收咧
仲可能緣盡決賽週

另外,辛達告魯斯被指成為熱刺既羅致對象
而當家射手泰維斯就忽然插文仙尼既訓練方法
仲撐曉士應該有更多時間證明自己

另一方面,艾迪巴約宣佈退出多哥國家隊
佢表示決定係因為1月既槍擊案

9)
迪甘斯表明冇興趣接手法國
而杜明尼治表示唔一定選亨利踢決賽週

10)
法卡奧既身價已升至1500萬歐元
消息指華倫西亞以及西維爾都有興趣收購佢

11)
古蘭爾否認轉投祖雲達斯

12)
比歷表示有興趣接手韋斯咸

13)
車路士再次同迪馬利亞扯上關係

14)
些路迪看守領隊證實球隊將有大清洗

15)
布力般流浪被傳表接收賓希姆

16)
保頓成為最新一間同奧尼爾扯上關係既球會

17)
辛達路斯被指成為紐卡素既新中堅人選
而希活以及奧哈拉都同佢地再次扯上關係

18)
阿根廷射手巴里奧斯入藉巴拉圭
希望因而有機會踢決賽週

p.s.:
珍惜眼前人......

2010-4-12

幾場波想講……

1) 皇馬對巴塞

冇唸過皇馬可以羸
不過就唸過佢地如果唔自掘墳墓
應該有本事偷雞攞返1分
點知佢地都係唔爭氣

最錯一定係睇唔緊沙維
已經講到口臭要擊敗巴塞
第一步唔係要ko地上最強既美斯
而係要凍結簡單實際既沙維
上年軒迪克客串教車已經做左近乎完美既示範
遲下摩連奴為左保住飯碗都會盡力去做
偏偏皇馬就係唔夠班做到

不過都唔怪得晒柏歷堅尼
因為高層招兵買馬從來搵唔到艾辛級數既防中
加高以及沙比艾朗素根本唔係咁既類型同埋材料

睇唔實沙維固然大鑊
不過都未至於死硬
偏偏皇馬主攻將防線壓前之餘
佈越位既水準又根本唔足以應付當今最強既地面推進
上季死得咁慘都仲唔知死

佢地始終冇一流既中路守將
加雷同埋艾比奧爾都係要人帶住踢既中堅
而兩閘散水有時亦唔夠快
加上巴塞又借球例既灰色地帶搵著數
皇馬佈越位失敗根本只係時間既問題

另外,相對於哥迪奧拿既人盡其才
以及好有耐性咁引蛇出洞
柏歷堅尼就再次好明顯咁被比下去
佢冇自知之明咁將防線壓前之餘
而用左成季都仲未提升到中場效率
更加莫名奇妙既係佢對馬些路始終不離不棄

皇馬勢必三大旨空
亦意味大地震將至
古迪已經宣佈離隊
賓施馬,雲達華治以及魯爾都幾有可能步佢後塵
不過如果佩雷斯繼續當皇馬係明星足球隊
球隊怕且只可以慢慢苦等巴塞物極必反
因為金錢永遠買唔到默契

2) 利物浦對富咸

段估唔會係今季歐霸盃決賽戲碼
前者入決賽既機會點都高過後者
不過就唔代表前者踢英超羸到後者
事關利記既兵力唔足以雙線發展

幾日前同狼隊冇咩關係既同事彼德仲話睇好利記後上返前4
當時小弟已經講明冇機
事關強勢曼城根本唔驚硬仗連場
趕過佢地既機會已經好微
所以賓帥梗係重歐霸而輕英超

上星期羸唔到伯明翰賓帥都要收起托利斯
就係為左主場做低賓菲加
為爭歐霸之餘
亦為執掌利記之後對佢地輸足3次攞返個彩
到尋晚鬥富咸
功成身退既托利斯仲連後備都冇
雖則話佢又有輕微膝傷
不過賓帥唸住搏咩已經係公開既秘密

但話說回頭
尋日賓帥又換錯人
古治落場入替既應該係庸碌既尼哥治
而唔係阿古蘭尼
而巴布算踢得唔差又偏偏要提早沖涼
有時覺得賓帥換人都已經換到冇晒章法

3) 保頓對曼聯

一早睇死冇左朗尼既曼聯惡唔出樣
事實再次擺在眼前
貝碧托夫繼對拜仁後備落場後再次隱形
佢加盟曼聯越來越似錯配

事關以4-4-2陣式踢歐洲賽先可以發揮佢既最大威力
偏偏踢英超佢只係輔助朗尼既配角
踢歐洲賽又因為費sir偏愛5人中場線
就算有得落場亦多數冇發圍機會

尋晚費sir焗住靠佢同馬捷達食糊
後者有活力但同佢毫無默契可言
而兩翼都拉唔開對手防線
就連傳中俾機會佢二傳都難
難怪又唔見兩分益晒車仔

費sir已經講明下季仲會用奧雲
加上馬捷達以及墨西哥新仔
而費sir對賓施馬以及韋拿仲未死心
hea碧離隊既傳聞有一定可信性

2010-4-9

近兩日既新聞......

1)
賓尼迪斯表示仲未放棄爭前4
而佢表示球隊要增兵
亦暗示唔夠資源就會離隊

另外,莫斯科斯巴達宣佈擱置500萬鎊收購尼亞拿既計劃
原因係這名西班牙左翼要求既人工過高

2)
意大利足總主席阿比迪決定重新調查電話門事件
而祖雲達斯方面暗示國米亦應受到類似懲罰

而國米就被指打算出價1600萬歐元收購米高巴斯圖斯
而哥利斯馬就可能被賣去士砵亭

3)
部份樸茅球員因為人工或者獎金問題
而威脅對熱刺既足總盃4強後就會罷踢其他賽事
樸茅方面就威脅其中一名星級球員收回主意
否則將唔會有份去溫布萊

4)
哥迪奧拿被傳想搵巴治奧做助手

5)
巴塞訪華既最新版本係8/8去鳥巢踢表演賽
而唔係當初報導既上海
(咁皇馬又會去邊?)

6)
科拿被指即將轉投FC悉尼

7)
費sir日前先宣佈唔會大量增兵
曼聯就宣佈從墨西哥球會芝華士引入前鋒J.靴南迪斯
消息指這名21歲墨西哥國腳既身價高達600萬鎊

而CEO暗示曼聯仲有其他收購
佢地隨即再次同大衛韋拿扯上關係

8)
祖雲達斯被指一旦俾曼城挖走保方
就會向里昂收購洛里斯作為替補
當中可能會用查斯古特或者森莫蘭尼斯作為交易籌碼
亦可能全數俾1500萬歐元

而佢地亦被傳有興趣引入自由身既古蘭爾

9)
雲佩斯可能復出下星期三既打呲戰對熱刺
而麥薩斯同埋魯迪維爾都被傳成為雲加既新中堅人選

10)
白蘭斯被指下季接手西維爾

11)
曼城被指打算出價2400萬歐元收購胡仙歷
不過羅馬已經即時表明唔會放人

12)
艾殊利高爾以及艾辛即將復出

13)
費文尼爆料李安納度可能劈炮
消息指泰索迪就係最可能既接手人選

14)
巴黎聖日耳門唔想馬基里尼退休
而希望利誘佢續約多兩至三季

15)
紐卡素被指將有1500萬鎊增兵資金
而佢地就同基達菲中場艾賓扯上關係

另一方面,前主席賀爾透露患上前列腺癌

16)
隨住艾古爾重掌墨西哥
白蘭高暗示復出國家隊

17)
韋拉以及皮利斯被傳成為幾間美職盟球會既增兵對象

18)
辛頓透露將會考慮去向

19)
馬體會有興趣買斷堤亞高文迪斯
不過就唔同意祖雲達斯要求既850萬歐元

20)
伊朗足總被指想搵艾歷臣或者泰林取代現任教練哥迪比

21)
邦路斯雖然被傳成為曼聯以及曼城既增兵對象
不過佢暗示為左國家隊席位而只考慮於意甲發展

22)
摩頓柏達臣可能轉投奧林比亞高斯

23)
目前有一個荷蘭教練應徵執教香港隊
不過因為履歷一般而未獲考慮

24)
迪亞拉由於同柏歷堅尼不和
而被傳可能季尾轉投熱刺

25)
麥馬拿斯透露即將同些路迪以及米堡傾去向
而布力般流浪被傳將於季尾出價250萬鎊收購奧尼爾

p.s.:
1)
現在台宣布已經攞左下兩季法甲播映權
小弟早前介紹過法甲轉播權本身成本幾高
不過法甲始終唔係主流
對留客冇咩大幫助

2)
大炮德竟然話如果伯明翰場波爆棚
波腫會分到大約200粒
聽完覺得佢個人都得意兼樂天

3)
阿根廷同埋巴拉圭有興趣決賽週後訪港
係真唔係呀?

2010-4-8 (2)

講埋曼聯對拜仁

唔知係冒險定係煙幕
朗尼果然做正選
而佢加上吉遜都係費sir排陣既妙著
前者負傷上陣至少做足牽制作用
後者亦再有招牌入波

加上球隊再次把握拜仁超慢熱既缺點而領先3:0
晉級應該十拿九穩
偏偏衰在四樣嘢:

一係信錯拉菲爾
條友表現冇大過失
不過衰獨食搞到球隊少左球保險
更衰既係有黃牌在身都唔生性
前後兩張黃牌其實都冇俾錯
費sir賴拜仁球員俾壓力球証絕對係護短既另一例證

二係冇做功課
Soccernet 既賽後報告話畢特如果有做定功課
就會知吉遜既招牌入波
其實更冇做功課既係曼聯班友

奧歷向來靠勤力搵意外收鑊
曼聯竟然每個回合都送禮俾佢
今場既卡域克羸晒身型都衰就正一高大衰

而衰俾洛賓又係類似情況
上場佢對費倫有人阻住都入到波
死守既曼聯居然又俾佢 open shoot

三係費sir又衰保守
踢少個人而用奧沙入替負傷既朗尼好正路
不過陣式變成 4-5-0 就即係鼓勵拜仁大軍壓境
而事實上仲有咁多時間踢9-0-1亦好難唔失波
如果當時同時換入馬捷達
效果應該會較好

四係衰控球能力
拜仁兩回合都羸控球權
可以搓住曼聯去踢
同以前既德國隊相若
未必好睇但一定實際
相反曼聯(特別係)中後場既傳球失誤都比平時多
變相自找麻煩

另外,有分析指曼聯衰大戰連場
不過實情係拜仁上星期六亦有出力作客力挫史浩克04
所以比較公道既講法應該係:
拜仁球員普遍體能上好過曼聯

另一方面,拜仁雖然羸波
不過佢地慢熱兼防守唔集中
當中迪米捷利斯同埋畢斯杜巴仲係後防明顯漏洞
都唔知點解早前有傳聞話後者得到皇馬垂青
如果隊波對住里昂冇大幅度改善
雲高爾唔使旨意有機會倒戈鬥巴塞

2010-4-8 (1)

想講兩場歐聯
先講巴塞對阿仙奴

如果話兵工廠班門弄斧
不如形容為中學生挑戰大學生

美斯賽後超正路俾眾人捧到上天
雲加一句’He’s like a Playstation player’
仲應該係萬千球迷或者機迷既心聲
而有同事仲好似忘記左6月有世界盃
睇完就估佢足以再羸足球先生

只睇今場表現
10分滿分我俾夠佢12分
因為面前既又只係人肉雪糕筒豬達
最後一關既艾蒙尼亞又孤立無助
想點 show off 都得
講真佢入夠半打都唔令人意外

美斯踢得搶其實亦因為球隊輕易搶羸中場
但下場要再對國米應該幾濕滯
雖然分組賽鬥兩次都佔優
不過如果國米再有作客史丹福橋一役既高水準
靠高效率同埋硬朗搶截
甚至乎有專人跟實沙維
應該會俾到巴塞唔少麻煩

而只要巴塞中場陷於苦戰
成隊波會即刻斷開三節
美斯唔止苦無供應
仲可能要墮後幫手控球
就算佢已經係地上最強都好難再有機會如入無人之境

而 Special One 忽然串咀話唔驚巴塞
怕且已有 Special Idea
搵兩個茅柴中堅用殺傷戰術對付美斯?
抑或加埋捷禾或者辛尼迪搵至少兩個人睇佢一個?
避左中場混戰而改用長傳突襲巴塞?
再排4-3-3陣式用兩個邊鋒去牽制巴塞兩閘?
靠死球用高波屈機?......
怕且都係要等到4強先知佢賣緊咩藥

另一方面,小弟唔敢講夫添既兵工廠有本錢偷雞
不過而家再次輸得咁大鑊
明顯又係衰板凳深度不足
當中最明顯係中堅位

而家有消息指萬一加拿斯唔續約
雲加將會決定引入兩個新中堅
傳聞人選仲包括漢基蘭,蘇保迪同埋謝路美保定
亦有傳佢會回收小將K.巴特利
而蘇甘保就被指將不獲續約
不過最犯眾憎既豬達既下場就未明

p.s.:
1)
馬勒當拿賽後忽然又有高見話美斯同耶穌並肩踢波
不過佢返到國家隊就好似變左另一個人
咁係唔係暗示’主’唔關照阿根廷?

2)
細哨當年一樣踢到識飛
之後都係衰唔自愛
希望美斯唔好步佢後塵

2010-4-7

近幾日既新聞......

1)
幾段利物浦既新聞......

雖然利記拒絕紐約財團既4成股份收購
不過蘇格蘭皇家銀行以及美聯銀行
仍然決定俾利記延遲償還1億鎊街數

有分析指可能係利記已經搵到其他財團注資
甚至係搵到新老闆

另外,利記落實同三間續約10年
贊助合約總值1億5000萬鎊

另一方面,利記被指暑假向飛燕諾收購韋拿杜姆

2)
法國傳媒證實查馬克落實下季以自由身轉投阿仙奴
4年合約總值1200萬鎊

而兵工廠亦同韋根兩名年青球員
占士麥卡菲以及洛達列加扯上關係
前者已經表明為左出場機會而唔會考慮兵工廠

不過亦同利記扯上關係既後者就可能離隊
報導指馬天尼斯準備從愛斯賓奴以500萬鎊引入荷西卡利祖取代佢

3)
伊保爾同埋比夏積再次同羅馬扯上關係

4)
華拉度列決定同山齊士解約

5)
幾段AC米蘭既新聞......

柏圖既新經理人透露柏圖因為冇盃捧而想離隊
皇馬同埋車路士都被傳想接貨
報導仲話前者想用賓施馬同紅黑兵團換人
不過賓斯(臭)馬肯唔肯走人就可能成為交易障礙

而紅黑兵團亦可能從史特加引入卡卡奧
佢表明唔會同史特加續約
亦已經先後同西維爾,華倫西亞,保頓,布力般流浪扯上關係

另一方面,費華利考慮為左繼續踢波
而放棄於季尾轉任助教
改同洛杉磯銀河簽多1年

6)
皇馬被指想用德倫特同埋2200萬歐元
利誘費倫天拿割愛華加斯

7)
列文被指可能同紅牛簽約1年

8)
國米被指打算以一份於2011年生效既執行總監合約
去挽留托度直至退休

而曼城被傳考慮以1500萬鎊接收巴洛迪利
亦有版本指國米想用佢連現金收購謝拉特

9)
幾段祖雲達斯既新聞......

意大利傳媒指祖記下季尾將有8名老將約滿
可能會索性換血
而佢地可能用基奧雲高作為羅致卡積亞既交易條件

另外,雲加同埋卡比路忽然被傳成為下季教練既熱門

另一方面,忽然有報導指查斯古特可能轉投哥連泰斯

10)
利禾奴宣布由前任教練魯托路取代高斯美

11)
馬體會被傳可能羅致阿辛祖

12)
有報導指紐卡素準備截劫侯頓
早前新特蘭被指準備向熱刺出價400萬鎊買斷佢

而格流既保查拉就被傳成為紐記既新中堅人選
佢近年已經唔止一次同紐記扯上關係

另一方面,消息指布力般流浪有興趣接收畢特

13)
鄭智再次被傳離隊

14)
夏薩特表明只考慮轉投阿仙奴以及皇馬

15)
艾殊利高爾被傳已有新歡

p.s.:
忽然有消息話朗尼可以完成40分鐘既射門練習
仲可以今晚正選出場
係堅唔係呀?

2010-4-6

去左足球沙漠幾日
想上網睇新聞又嫌8蚊美金一個鐘既上網費太貴
想從電視搵場歐洲波睇就近乎係唔可能既事

幾日以來只係睇到兵工廠迫和巴塞既少於1分鐘片段
成場波俾晒你睇既又只得一場美職盟
以及美國同墨西哥既女子隊超級悶戰

相反籃球,哥爾夫球,甚至乎格鬥節目就睇到你嘔
雖然俾機會小弟知道公爵大學真係幾堅
同埋膠穎拍電視既功夫有幾姐手姐腳
不過代價就係同當今球壇即刻脫節

返到香港由於累到想死
除左重溫曼聯主場輸俾車仔之外
其餘一律睇精華

曼聯兩連敗成為熱門話題
佢地雖然算係少少冇運
不過費sir既調兵遣將同球員臨場發揮
都俾人綁手綁腳既感覺

而費sir攞兩季前羸雙冠既經驗策略去搵食
就越來越走火入魔
加利佬未出場前個樣好有殺氣
但咁既質素同埋身體狀況都要連頂兩場
就抵佢俾法國佬玩足兩場
而史高斯同埋傑斯亦乾塘到好多時間隱左形

佢地冇朗尼就即刻冇料到
而家既然多數冇奇蹟
費sir唸計應急總好過又鬧球証

利記方面
保前4既希望越來越渺茫
換走托利斯或者係太為佢著想
不過見一場搏一場從來先係求生之道

另外,佢地放棄紐約財團注資
又令前途蒙上陰影
影響唔細得過下季絕緣歐聯

兵工廠方面
同巴塞踢埋同一家波
主場出擊就好似細路仔擺擂台越級挑戰
和波有運之餘亦要多謝艾蒙尼亞既超水準

而家冇埋法比加斯同埋艾沙維
救世主段估唔係拿斯尼
因為講技術巴塞遠在波圖之上

反而賓特拿如果有機會又肯生性
對巴塞既威脅應該最大
畢竟巴塞陣中而家只有耶耶托尼頂得佢住
馬古斯同埋米列圖兩個替工又唔多信得過

不過兵工廠既兩個叔父輩中堅其實仲大鑊
今晚出邊個都應該會爆鑊

紐卡素方面
返英超絕對可喜可賀
至少球會估值可能急升至1億7500萬鎊

不過佢地今季只係羸個人質素
整體發揮唔係太出色
紐記奧巴馬下季如果仲有得教
怕且真係要繼續 'Change! Change! Change!'

p.s.:
轉會傳聞冇咩新意
容後再講