去左足球沙漠幾日
想上網睇新聞又嫌8蚊美金一個鐘既上網費太貴
想從電視搵場歐洲波睇就近乎係唔可能既事
幾日以來只係睇到兵工廠迫和巴塞既少於1分鐘片段
成場波俾晒你睇既又只得一場美職盟
以及美國同墨西哥既女子隊超級悶戰
相反籃球,哥爾夫球,甚至乎格鬥節目就睇到你嘔
雖然俾機會小弟知道公爵大學真係幾堅
同埋膠穎拍電視既功夫有幾姐手姐腳
不過代價就係同當今球壇即刻脫節
返到香港由於累到想死
除左重溫曼聯主場輸俾車仔之外
其餘一律睇精華
曼聯兩連敗成為熱門話題
佢地雖然算係少少冇運
不過費sir既調兵遣將同球員臨場發揮
都俾人綁手綁腳既感覺
而費sir攞兩季前羸雙冠既經驗策略去搵食
就越來越走火入魔
加利佬未出場前個樣好有殺氣
但咁既質素同埋身體狀況都要連頂兩場
就抵佢俾法國佬玩足兩場
而史高斯同埋傑斯亦乾塘到好多時間隱左形
佢地冇朗尼就即刻冇料到
而家既然多數冇奇蹟
費sir唸計應急總好過又鬧球証
利記方面
保前4既希望越來越渺茫
換走托利斯或者係太為佢著想
不過見一場搏一場從來先係求生之道
另外,佢地放棄紐約財團注資
又令前途蒙上陰影
影響唔細得過下季絕緣歐聯
兵工廠方面
同巴塞踢埋同一家波
主場出擊就好似細路仔擺擂台越級挑戰
和波有運之餘亦要多謝艾蒙尼亞既超水準
而家冇埋法比加斯同埋艾沙維
救世主段估唔係拿斯尼
因為講技術巴塞遠在波圖之上
反而賓特拿如果有機會又肯生性
對巴塞既威脅應該最大
畢竟巴塞陣中而家只有耶耶托尼頂得佢住
馬古斯同埋米列圖兩個替工又唔多信得過
不過兵工廠既兩個叔父輩中堅其實仲大鑊
今晚出邊個都應該會爆鑊
紐卡素方面
返英超絕對可喜可賀
至少球會估值可能急升至1億7500萬鎊
不過佢地今季只係羸個人質素
整體發揮唔係太出色
紐記奧巴馬下季如果仲有得教
怕且真係要繼續 'Change! Change! Change!'
p.s.:
轉會傳聞冇咩新意
容後再講
6 comments:
太好了
下季又可以追番英超~~
第一季先求護級...
三線都要加強
特別係防中位....
阿仙奴對巴塞
無咩好講....
阿記主場都可以俾人禁住打
作客仲有咩期望?
To: 舒利亞
1)
紐記升班後先求護級
係正路既唸法
千祈唔好充大頭鬼
一開口就話要衝出歐洲
講真歷來冇幾多隊做得到
2)
事實擺在眼前
兵工廠對巴塞就係青年軍挑戰大人
而美斯踢波勁到好似睇緊人打 winning
輸都係非戰之罪
不過如果後衛少左類似豬達咁既廢物
應該可以唔使輸咁多
雲加唔知醒唔醒覺到冇中堅既負面影響
希望佢唔買人
都至少俾伊保爾重操故業
網主做新郎哥.
恭喜哂^-^
To: sammysir
謝!
原來Blacky結婚
真係恭喜
哎
都比你講中哂
豬維豬達根本係間諜嚟
4個失球多少都同佢有關
尤其是係俾美斯追平個球
都已經冇咗4件主力
仲要多個間諜
又係人地主場
想唔俾人大炒都唔得了
To: wtssoccer
1)
謝!
2)
踢後衛踢到俾人形容佢為無間道
豬達真係收山好過
不過如果雲加仍然堅持同佢續約
兼持續爆鑊都用佢
難保他日唔會俾人形容為無間道領隊
3)
巴塞對阿仙奴既賽後惑
可以睇'2010-4-8 (1)'
Post a Comment