4場波想講……
1) 利物浦對新特蘭
鶴臣越睇越似係一個過份保守既領隊
對阿仙奴以及曼聯既排陣
居然同主場對付黑貓既幾近相同
前線多個人幫輕唔 fit 既托利斯
總好過中場太多工兵
唔等使既仲要係越幫越忙既保臣
令端納送既大禮就咁嘔返出來
2) 阿仙奴對西布朗
身處茶餐廳睇波既好處就係可以同時兼顧兩場波
右邊利記唔爭氣
點知左邊既兵工廠仲唔掂
路人甲都知艾蒙尼亞因為冇左信心而越來越海鮮波
小弟亦一早講過一對法國中堅
因為未適應到英超節奏而唔多可靠
加上兩閘因為支援前線而暴露太多空位
有睇場波既都應該會同意
佢地守唔住超水準既西布朗其實唔係好意外
更衰既係前線唔爭氣
法比隊長繼續養傷
責任更大既艾沙維偏偏越踢越沉
積極性絕對唔及拿斯尼
亦搞到查馬克更加成為對手防線既眾矢之的
而路斯基以及韋舒亞係唔係太遲落場
兼且係唔係雲加為左留力而計錯數
就好視乎佢有幾睇重歐聯同埋下場既倫敦打呲
3) 羅馬對國米
繼幾個月前既羅馬打呲
今次被換走既又係托迪
偏偏雲尼亞里又係靠胡真歷食多次糊
不過有留心王子近來既言論
都可能同意佢地之間既不和問題應該越來越嚴重
亦令小弟對羅馬既借勢反彈好有保留
國米方面
賓尼迪斯果然將隊波越執越衰
防線明顯走樣之餘
進攻結構亦有隱憂
佢地而家仲有少少優勢
大抵只係競爭對手都唔見得爭氣
不過可唔可以捱到季尾
倒成疑問
4) 利雲特對皇馬
客隊羸形勢但冇實際
只係前線幾個大佬冇帶射門鞋
只要C7唔好獨食
進攻結構有望於短期內成型
更可喜既係防線有明顯改善
亦係佢地挑戰巴塞既最強本錢
p.s.:
1)
紐記應該係今季英超頭號海鮮波......
2)
本地足總搞咩呀?
對澳洲U-20既熱身賽居然14:00開波
返工返學既都唔知點去睇?
3)
28號又係Keymansoho正式出版既大日子......
請多多支持!!
4 comments:
主場連輸兩場,
對住一些爛打型既球隊,
仲係唔夠佢地硬淨,
仲以為落左英冠一年,
對這種打汰既球隊已經可以好有計,
點知...
紐記今屆都可能又好似前幾季咁,又係要輸番15-17場波先安樂,
作為紐迷都係有這個心理準備會好一些,
起碼免受太大刺激,
總之最緊要護級成功...
To: sammysir
1)
紐記今季真係海鮮到爆
2)
小弟覺得紐記最大問題係後防冇人壓得到場
3)
雖然其餘兩隊升班馬都會忽然嚇你一驚
不過對紐記既護級依然審慎樂觀
因為狼隊同埋韋根都幾屎
老實講，作客成績仲好過主場，暫時係幾失望
始終應該贏既
偏偏一場都贏唔到
雖然宜家排第十係可以接受
不過來緊又要作客曼城
到季尾可能又要因為唔應該失既分數而喊苦
小弟唔會因為一兩場波就輸打贏要
曉頓一向係小弟心目中
都唔算一個戰術大師
調動亦唔係好強
不過佢有能力攪得掂內部
所以小弟支持佢
To: 舒利亞
曉頓何止搞得掂內部
仲識激勵士氣
小弟覺得佢係繼波比sir後
最好既紐記教頭
Post a Comment