非常感謝讀者'舒利亞'超高水準既歐聯決賽 preview
全文如下:
今屆歐聯決賽
有網友戲言係全世界最黑人憎果兩隊對決
不過無可否認
或者今季只有曼聯
先至係實力上最接近巴塞
數據上巴塞無疑係較出色
無論係射門次數
或者係入球
都比曼聯高出唔少
而且09年歐聯決賽
正正又係巴塞對曼聯
結果大家都知
就咁睇落去似乎巴塞贏歐聯機會幾大
不過巴塞亦都有隱憂
一、決賽係位於英國倫敦既溫布萊球場，
曼聯可謂有半個主場之利。
況且巴塞作客英國既成績一向唔算好，
今屆就試過作客輸俾阿仙奴
二、四強巴塞對皇馬果陣，
巴塞球員被侵犯時過於誇張既動作，
已經被全球大罵
決賽球證一定捉得緊左，
對巴塞無疑係另一隱憂
三、最後就係上年累到巴塞出局既冰島火山灰問題。
上年火山灰令巴塞搭n個鐘巴士
結果就作客輸俾國米，
間接攪到佢地出局。
咁岩今年歐聯決賽前，
冰島火山灰又出馬，
巴塞大軍又要經陸路去倫敦，
話無影響一定無人信。
身為中立既小弟
只希望睇到一場精彩既決賽
而雙方傷兵問題唔大
巴塞艾比度同佩奧爾相信都可以復出
曼聯相信亦都可以全力迎戰
同時呢場都係雲達沙告別戰
曼聯上下付出既一定係120%
相信球迷果晚一定唔會失望
決賽既關鍵
小弟覺得係雙方門將
特別係兩隊門將幾乎係今季表現最佳既門將
相比下域陀華迪斯仍然稍有不穩
希望決賽唔會係佢出事
小弟係兩隊中都有一個球員特別想提
曼聯既小豆係巴塞要特別提防既球員
比起貝碧托夫同朗尼
小豆更加活躍，威脅可能更大
至於巴塞
秘密武器應該係多數打後備既阿費利
唔知佢下季仲會唔會係巴塞
不過後備出場下真係隨時趁曼聯唔覺意而偷雞
就好似對皇馬咁
雖然係中立
不過基於一向唔like曼聯
小弟其實都係偏向支持巴塞
希望巴塞踢出漂亮一仗
唔好再被人抽水
3 comments:
謝甚舒利亞高水準既賜稿
小弟想補充多少少意見:
1)
小弟愚見
如果皇馬用足3防中
絕對有力同巴塞一戰
2)
原來自從08-09年歐聯16強開始
巴塞總共踢左15場作客比賽
當中只係羸到3場
羸波率只得兩成
而要留意既係
巴塞羸既只係無辜踢少個既皇馬,
基輔戴拿模同埋彭拿典奈高斯
可見佢地歐聯作客真係唔多掂
今次曼聯有半個主場
更對佢地不利
不過佢地只係輸過兩次
和波率亦有66.67%
可見今場肯定唔係九死一生格局
3)
巴塞而家俾外界label左係藝人足球隊
而家最壞既情況唔係決賽俾球證捉到佢地扮嘢
而係俾費sir乘機搵著數
因為到時就算巴塞多名藝人真係受到侵犯
球證吹罰曼聯怕會有壓力
4)
巴塞已提前於星期二晚出發
令佢地有較多時間 recover
影響應該冇上年咁大
5)
艾比度既狀態唔可能咁短時間操返起
而曼聯陣中亦冇明顯可靠既右閘
係雙方陣中最大既漏洞
6)
當然同意雙方龍門既表現好重要
亦同意域陀華迪斯冇雲達沙咁穩
事實上曼聯對上兩次羸歐聯
舒米高同埋雲達沙都有拯救球隊既水準表現
不過小弟唔同意佢兩個係今季最好既龍門
卡斯拿斯以及祖赫特都稱先佢地少少
7)
同意小豆對巴塞既威脅更甚於朗尼
佩奧爾既執漏特別重要
至於阿費利
小弟都同意佢好勁
做巴塞輪換替補真係有少少浪費
不過佢今場比較難偷雞
因為曼聯邊線回防做得好過皇馬
艾夫蘭應該唔使次次都同佢單打獨鬥
況且佢既能力絕對在馬些路之上
另一方面,雙方都有奇兵
曼聯有蘭尼以及貝碧托夫
而巴塞除左阿費利
亦有保贊
哥迪奧拿亦可能搵基達坐鎮中場
而將恩尼斯達推上前線
8)
費sir聲稱有辦法對付美斯
其實辦法不出圍捕以及搵專人死跟
當中朴智星應該會係最好人選去凍結美斯
而佢應該會繼續安排朗尼返中場幫手搶截
如果中場名單包括朴智星,費查同埋卡垣克
甚至用埋華倫西亞
曼聯現有人腳有條件 copy 摩連奴當日執教國米所用既戰術
9)
傑斯近日雖然備受婚外情醜聞困擾
不過畢竟係有經驗既老鬼
表現應該唔會走樣
至於正選抑或後備
就要睇費sir想用幾多個工兵
星仔影響力其實都舉足輕重
期待佢同美斯鬥法
p.s.
小弟都係無聊下亂寫
都要多謝網主俾個位小弟分享下
To: 舒利亞
1)
如果費sir選擇搵專人死跟美斯
以身體條件計
朴智星應該係最正路既選擇
2)
小弟聯想起86世界盃決賽
碧根鮑華搵馬圖斯去死跟馬勒當拿
當年兩隻'老馬'鬥法
前者就算手骨意外骨裂都繼續忍痛頂硬上
後者雖然係最後勝方
不過佢環顧整個職業生涯既時候
都讚前者係佢遇過最勁既對手
p.s.:
唔好客氣
最好之後得閒再寫
為左多謝你今次(同埋以後)賜稿
有份小禮物留左俾你
敬請笑納
之後小弟會再聯絡你
Post a Comment