想講尋晚既歐聯決賽......
唔扮嘢,做自己
正係尋晚巴塞再次技術性擊倒曼聯既寫照
同09年既歐聯決賽一樣
除左開波頭10分鐘遇過險情外
巴塞其餘時間都算係主導球賽
行行企企都可以食飯幾味
中前場每個球員都恰如其分
雖然表現未至於好似打緊 winning eleven 咁誇
但明顯級數上高過曼聯唔止一班
如果唔係雲達沙有水準演出
巴塞羸兩球絕對唔係合理戰果
佢老人家亦隨時以半打失波作為告別戰既紀念品
印象中近兩年都未過曼聯踢得咁無助
而對上一次正係09年輸俾巴塞嗰場
小弟愚見
佢地輸波雖然係非戰之罪
但費sir個別部署明顯蝕章
除左開波乘半個主場之利而搶攻外
其餘時間都打算靠穩守突擊去對付巴塞
朗尼繼續墮後搵波踢
前線基本上只得小豆四圍遊走
唸住靠佢既靈活走位去偷雞
不過費sir似乎再冇 plan B
因為後備名單既球員似乎都係配合相同戰術
唔計古斯錫同埋史摩寧兩名後防
其餘既就係3名中場中
進攻方面特別有用既大抵只得蘭尼以及奧雲
某程度上反映費sir認為球隊有力死守巴塞到尾
可能俾人覺得小弟事後孔明
雖然貝碧托夫兩年前決賽嗰場既表現幫唔到球隊
不過如果費sir將佢放於後備席
球隊至少可以於落後下多一招高波屈機
畢竟巴塞後防仍然畏高
何況身高不足既馬斯查蘭奴仲臨場取代佩奧爾踢中堅
費sir知道後怕且揼晒心口後悔將嗰後備名額俾左安達臣
另一方面,費sir之前話過會請教摩連奴點樣對付巴塞
但尋晚所見既曼聯佈防同鐵洞陣仲差好遠
既唔能夠圍捕美斯
亦俾唔到幾多壓力沙維以及恩尼斯達
其實多得旁證誤判而半場唔使落後
費sir應該收起冇甚截擊力兼波都冇咩機會掂既傑斯
而派費查或者史高斯落場
就算前者狀態唔足
就算後者年老力衰
以當前形勢對球隊始終有較大幫助
小弟唔敢講踢多個防中就唔使輸
但至少可以多個人對付沙維先係正路既防守部署
要羸幾年前既巴塞
搞掂細哨前要先ko迪高
要羸而家既巴塞
搞掂美斯前要先ko沙維
因為佢地先係巴塞既靈魂
上季對國米同埋今季對皇馬
面對串王既大巴士戰術
俾人逼到抖唔到氣既巴塞一度要變身藝人足球隊去搵著數
但尋晚既巴塞可以做回自己同曼聯純技術較量
就可能係另一個指標反應曼聯其實俾唔到佢地幾多壓力
p.s.:
溫馨提示:
大婆台會直播下晝既足總盃決賽
不過想搵最後一戰既基士文簽名影相
就要頂住32度高溫去大球場
7 comments:
小弟尋晚都有同班fd係k房睇
幾個人就霸一部大電視
無得頂,不過真係幾貴.....
場波唔能夠叫做精彩
因為基本上曼聯只係捱打
而且先後唔能夠把握巴塞兩位中堅犯錯
令佢地偷雞機會都無埋
小弟對費sir唔擺貝碧托夫係後備
都極之O咀
就算真係唔能夠調走其他防守球員
貝碧托夫段估比奧雲更有威脅掛
尋晚失望既仲有卡域克同華倫西亞
前者復蘇一排後,尋晚又隱哂形
後者最上鏡都只係幾下既犯規
中場其實只有星仔支撐
令到向來以體力見稱既佢
下半場開波無耐竟然已經跑唔郁
美斯入果球
正正係星仔跟甩左
講番轉頭
一面倒還一面倒
有四個入球始終值哂回票價
真的沒想過戰情會這麼一面倒,
巴塞完全係西班牙既強化版,
曼聯就好似幾年前既暑假的傑志一樣,
巴塞就好似當年對傑志既季前暑假東來香港踢表演賽,
差不多全場10組既對決,
曼聯近乎輸哂,
艾夫拿同艾比度真係有很大差距,
朴智星真的技之所限,
有心無力,
小豆又係冇波掂,
曼聯板凳上沒有具實力同創造力既替補,
HEA碧這幾年在歐聯零入球,
唔入後備都冇乜野好講...
仲要唔現身看台,
有欠大將之風,
總之捱夜睇決賽,
值...
港甲足總盃
睇到下半場已經睡魔急CALL
訓醒已經是加時24分鐘,
真的很好訓,
場波在29度氣溫下踢,
可能好多有上陣既球員,
昨晚都有捱夜睇歐聯,
感覺上兩隊演出都失準,
但戰情算OK,
有攻有守有入球,
基士文入番球算係咁,
希望佢返回歐洲有班落,
踢次級聯賽都唔差,
其實紐記都可以諗諗佢做下後備殺手都得卦...
To: 舒利亞 & sammysir
1)
就算貝碧托夫踢歐聯唔識入波
佢既身高至少都可以好好利用
就算直接攻門唔掂
都可以靠佢做二傳
2)
今季既貝碧托夫已經勤力左好多
體能亦有明顯進步
冇理由仲俾人叫hea碧
3)
卡域克其實已經跑左好多
不過仍然幫唔到手
一來係級數問題
二來星仔同埋華倫西亞主力守住邊線
支援佢既好多時只係得唔擅長截擊既傑斯
踢起來特別辛苦
4)
如果每個位置去比較
曼聯羸既大抵只有雲達沙
5)
其實艾比度仲未上晒力
不過球隊好多時都唔使佢助攻已經夠殺
加上蘭尼入場後佢先比較忙碌
令佢踢得仲算輕鬆
6)
艾夫蘭全晚只有下半場護空門算係傑作
佢既最大問題係唔睇形勢都死去助攻
佢既左路單係上半場已多次俾巴塞反擊
到下半場唔係佢唔想出擊
只係丹尼爾艾維斯下半場出擊多左
令佢連出擊既機會都冇
7)
朴智星上半場要幫艾夫蘭補位
下半場當甩尼爾艾維斯助攻多左
亦令佢更加辛苦
而佢有時移入中路追住美斯
根本就係苦差中既苦差
近年見過算係對付到美斯既球員
印象中只得一個辛尼迪
上季國米圍捕佢
好多時成功截到佢既都係辛尼迪
8)
費sir主打突擊
講求既係效率
而佢應該靠傑斯俾靚直線
但問題係佢連掂波既機會都唔多
9)
咁多高質素組織以及攻門
捱夜都值得
To: sammysir
1)
同意南華發揮唔好
佢地法定時間內唔輸已經夠運
2)
張寶春已經同球員講明尋晚唔可以睇波
至於球員有冇聽話就唔知
不過現場所見
佢地既體能應該好過南華球員
3)
事實上自從金判坤離隊
南華球員既體能真係差左好多
唔知係唔係自己知自己事
前線幾個球員都冇緊逼大埔既後防球員
令佢地於廿幾分鐘穩住陣腳後
就可以比較輕鬆將個波送上前場
4)
大埔既陣式似係4-2-3-1
前線4名球員都係好跑得既箭頭類型
上半場靠速度同埋走位多次拉開南華既防線
而要注意既係
佢地後備席仲有因傷退居後備既李圳業
以及有身高優勢既陳立明
5)
基士文今場既發揮
明顯好過陳7以及基奧雲尼
佢入嗰球雖然多得陳旭智送禮
但半車身其實都好易炒高
總算係有質素既表現
6)
不過話說回頭
陳旭智又犯低級錯誤
難怪佢出道咁耐都入唔到香港隊
7)
消息指基士文既下一站
可能係中東或者美國
8)
小弟覺得基士文加盟後既表現算係唔錯
佢唔能夠發揮得更好
只係教練唔識用佢
以及隊友未能好好配合佢
9)
雜誌社既編輯讚佢好nice兼好有職業道德
佢同好多行家都鍾意佢
不過小弟又識得人聲稱
見過佢同畢特未完場就提早鬆人
而佢兩個又唔止一次俾生果報踢爆操練早退
究竟佢有品定冇品
等小弟再收下風
有機會再講你知
小弟愚見
歐聯16強阿仙奴首回合贏巴塞
哥斯尼守美斯都守得幾好
但怕且都係撞彩
加上有主場之利卦
To: wtssoccer
1)
唔計星期六晚嗰場於溫布萊踢
唔知點解
美斯作客英超隊既表現真係唔多掂
2)
話辛尼迪勁
係因為佢勁到多次唔使靠犯規
都可以連波都偷埋
好難想像佢當時已經36歲
3)
印象中哥斯尼既代表作
係今季阿仙奴主場羸曼聯1:0嗰場波
Post a Comment