想講兩場歐聯……
終止紐亞不失球既紀錄
居然係畢斯杜巴
真係日防夜防,家賊難防
咁既無間道後衛真係任何龍門既尅星
而射失12碼既馬里奧高美斯賽後仲笑笑口話下兩場掂梗
好似宴客都冇咩所謂咁
環顧德國隊正印11人就以佢兩個最危危乎
隨時係今個夏天羸唔到歐國盃既罪人
印象中德國佬只係試過踢歐國盃射12碼輸過一次俾捷克
世界盃PK戰就更加未遇過對手
只怕咁堅既齋砵都俾佢大方打爛埋
阿仙奴方面
尋晚羸波但表現只係一般
哥斯尼或者因為熟路
反而表現比幾名後防隊友都搶鏡
贊堅臣仍然處於學緊踢右閘既階段
今場見佢雖然多左引球出擊同埋走位上前線
不過傳中一腳,甚至推落底線仍然有排佢學
梅迪薩卡既踢法其實同當年既阿當斯類似
都係高波殺晒兼大隻到同你打埋摔角都仲得
就係衰在隨時仲慢過加利仔
如果唔想佢出醜人前
右閘同埋防中既補位就非常重要
以前迪臣就算助攻都識睇住形勢
這方面當然亦係贊堅臣有待浸淫既方面
不過這隻大水牛由細到大都係踢中堅
而家先要佢學踢右閘始終唔可能預期佢一步登天
不過尋晚連佢都傷埋
如果又要抖一段時間
右閘位置怕且要繼續靠迪佐羅接力做替工
中場方面
路斯基真係冇心冇力
與其用佢地就不如俾機會班拿約或者艾朗藍斯
後者既組織能力肯定同法比仔以及拿斯尼冇得比
不過佢後上攻門其實唔差
雲加如果唔想浪費這個500萬鎊既投資
倒不如趁早將佢改造
而艾沙維亦已淪為棄之有味既雞肋球員
謝雲奴而家提供到既貢獻肯定多過佢
如果可以改善埋入球能力又或者做個自私少少既球員
佢有望成為繼皮利斯後最勵害既兵工廠左中場
前線方面
match report話雲佩斯發揮平平
不過有時如果唔夠供應
根本就唔怪得佢太多
小弟反而想佢好似尋晚咁
製造多啲空位俾中場後上入波
一隊波得一個殺手既踢法已經過晒時
南非世界盃時都係多得佢於前線做跑狗
中場隊友先可以踢得咁 free
既係殺手,又係跑狗
咁先得人驚
p.s.:
近來英超既外國人老闆忽然無嘢搵嘢來搞
先有利記表態要分拆轉播權
而家又多幾個傻佬話要取消升降制
如果踢得屎都唔使降班
中下游球隊仲邊會搏老命去踢呀?
隨時hea過搏包尾爭新人抽籤頭籌既NBA魚腩
而英冠球隊如果無啦啦從此再冇機會去掘金
又邊到講得通呀
英冠,甚至加埋甲乙兩組既72隊仲隨時等住摺埋
2 comments:
一向都唔睇好畢斯杜巴
佢睇中衛只係一般
如果唔係拜仁中場夠強
以前又有前輩帶住
佢都好難上位
踢左後衛就更是災難
史浩克04既賀維迪斯肯定好過佢
贊堅臣真係有排學
祝福佢啦
阿仙奴中場其實仲可以俾多D機會Chamberlain
佢步大力雄射術都唔錯
另外，都好希望早日可以係英超見到宮市亮同埋朴主永
尤其是南韓隊長
在國家隊表現極佳
但來了後只踢過兩場聯賽盃
昨日終於有入波
出場兩場入一球都算係咁了
To: wtssoccer
1)
當然同意賀維迪斯好過畢斯杜巴
事實上後者係德國國家隊近年最屎既後衛
2)
從安歷卡到賓特拿到禾確特
再到近年既艾朗蘭斯以及韋舒亞
雲加向來都係慢慢增加年青新仔既出場機會
所以唔好預期張伯倫以及宮市亮
今季會有好多出場機會
3)
相對於禾確特
小弟覺得張伯倫既最大優點
係佢既身體質素以及移入中路搵波踢既能力
4)
贊堅臣就算做唔成出色右閘
都唔怪得佢
畢竟冇咁既天份
都唔知點樣可以半途出家
Post a Comment