奧脫福淪陷肯定係球壇焦點
輸到1:6肯定冇人估得到
不過亦唔應該將伊雲斯被逐既影響過份高估
有睇小弟寫嘢既都知小弟鬧佢地嗰條紙紮防線鬧到口都臭埋
里奧而家既戰鬥力可能仲低過佢細佬
費sir過份倚重佢既所謂經驗根本等同埋定個炸彈
近幾場英超加埋只分4失其實已經賺到笑
今次俾曼城重創只算係本利歸還
出得0黎行
原來真係預左要還
當然輸得咁大鑊好大程度同對手中前場超水準發揮有關
曼城控球指數冇優勢
不過好在唔貿然進攻
大衛施華既表現絕對係頂級指揮官應有既水準
連帶幾個隊友都俾佢帶起埋有好表現
相對於費sir
文仙尼今次明顯有針對性部署
佢明知基治睇唔住蘭尼
所以搵埋大衛施華回防幫拖
加上艾殊利楊格向來又最驚米卡李察士嗰類靈活既大隻佬
曼聯兩個進攻起點隨即死火
亦令卡維利缺陣同埋朗尼態沉既影響浮現晒出來
始終安達臣十場都未必有一場好波
而佢搶截能力一般
亦加重費查既壓力
費sir旨意佢忽然爆發其實都幾捉虫
一場大敗唔足以決定英超冠軍
印象中曼聯以前亦試過好多次輸得咁杰
96-97年嗰季仲試過俾對手連炒3場
不過多數最終都無阻佢地最終封王
反映曼城唔多似可以靠今場波改朝換代
費sir既其中一句金句係’聯賽稱王關鍵等如將低潮期盡量縮短
只要佢肯正視將今場大敗浮現出來既後防問題
落後5分絕對有得追
特別係冇人會知曼城上下拉開差距後承唔承擔到俾對手追趕既壓力
p.s.:
1)
曼城幫阿仙奴報到大仇
下次再從兵工廠入貨
雲加會唔會打返個折俾文仙尼?
2)
利記竟然咬唔入諾域治
冇運之餘都要同意杜sir對魯迪既好評
不過講到技驚四坐就一定係西維爾既查維華拉斯
3)
16/10睇完疑似係阮兆祥既失散家姐所發表既偉論
過去幾日睇本地波都特別留意下本地龍門
謝德謙這名’俾人講唔出名既第二個龍門’當然有料到
否則公民絕對唔會捱到咁多場先至輸波
而彭梓健表現搶鏡又唔鍚身
論穩定性更加將李翰灝徹底比下去
抵佢做到大埔1號門神
粱興傑就把握魏釗上場發波瘟而忽然坐正
睇佢熱身既表現其實都有少少為佢擔心
不過佢場上發揮都尚算對辦
臨尾香只怪香港亨利忽然’亨利’上身
勁到離門40碼都居然入到衝力射球
侯宇就把握到何國泉出迎畏高而搶到正選
佢有身型又有反應
出場3次都冇失過波既佢肯定係近年最勁既國援龍門
高田壽典既表現亦係到港發展後既代表作
佢雖然唔見得比本地龍門超班
不過今季表現始終對辦
而佢對隊友既感染力以及對足球既熱誠亦值得大家俾個like佢
6 comments:
想不到無論控球,射門,攔截等所有數據都係曼城佔上風,
曼聯被徹底擊潰應該令好多反曼聯FANS大快人心,
幾名英格蘭核心,好似費迪南,朗尼既表現真係好一般,狀態咁沈,
如果用朴智星會唔會好一些呢...
感覺上利記好似過份倚靠牙擦蘇去禁區同三閘線上鑽營,
其他中場又好似只得盧卡斯既狀態最好...
兩翼用比拿美同古治都唔錯,
不過當人地一收窄條防線死守又好似變左老鼠拉龜,
感覺上利記同紐記都有些似,
進攻板斧好似唔係太夠多,
打法好靠球員作個人突破....
昨晚都有透過NOW直播睇飛馬對傑志,
亦有機會睇高田壽典既演出,
身手都幾好,
雖然飛馬最終反勝為敗,
不過估唔到場波既水準都幾高,
飛馬既進攻組織有效率,
只係最後出波同臨門一腳較差,
同埋領先二比一之後就慢左下來唔係點去再組織進攻,
因而被傑志用2分鐘時間反敗為勝,
如果本地波能維持到咁高水準
就應該好抵睇....
其實比數當然反映唔到真實情況
睇番曼城六球，有三球都係九十分鐘後先入
就知曼聯班友放hea哂先大敗
當然其實球員一個一個比
曼城真係仲高班過曼聯都唔奇
不過始終穩定性有待改善
聯賽冠軍仍然言之尚早
p.s.
究竟偉論係咩
不過講開門將
經驗睇來真係好重要
彭梓健幾年前踢到慌失失
毫無亮點
宜家竟然咁大轉變
To: sammysir & 舒利亞
1)
將朴智星移入中路
應該都好過用安達臣
2)
曼聯補時再輸多3球
唔係因為hea踢
而係掛住盡量拉近比數而空郡而出
里奧費甸南以及艾夫蘭等比較有經驗既球員
賽後亦因為咁而俾費sir勁插
3)
自從杜sir接手後
盧卡斯真係踢得好左
不過佢幾好狀態都係假
咪又係繼續交失波
4)
比拿美同埋古治個人突破既能力唔算太高
所以效果只係一般
5)
飛馬尾段唔掂
唔係因為運作慢左
而係因為鄧景煌入場後既左路幾近淪陷
球隊仲點樣去還拖呀
6)
佢話香港足球有硬件而冇軟件
香港足球有新計劃同埋球場
但除左英雄輝外
佢講唔出第二個本地龍門既名
似係暗示香港好球員唔多
其實小弟話曼聯hea踢
少少係因為最後只係得韋碧克仲會番後場追波
其他部份球員企係度眼望望
利物浦個場只係睇左20分鐘左右既精華
三次中柱當然欠運
但蘇亞雷斯跟比拿美明顯唔夾
蘇亞雷斯好獨食
比拿美入個球都係佢自己爭番黎既
如果兩人有默契一D
早就拉開比數
魯迪幾神都無用
曼城今季其實已經穩左好多
又有兩套先發陣容
連泰維斯咁高質既前鋒都可以擺佢入雪柜
就知道文仙尼有幾多人可以用
真係羨慕死隔離
不過，曼城都唔係冇缺點
中衛都唔算係頂級
記得社區盾被曼聯反勝個球
就係中衛無端端出錯
曼城如果再補多個世界級中衛
隨時可以三線都有作為
順便講吓我愛隊阿仙奴
又係靠雲佩斯入兩粒搞掂
仲係後備入替
不過都要讚吓謝雲奴
似乎開左竅
唔再一咪扭波唔睇人
入波之餘兩球助攻
如果場場都係咁
佢真係幾有威脅
期待韋馬倫下週可以復出
鬥車仔仲有D希望
To: wtssoccer
1)
蘇亞雷斯以前踢阿積士仲獨食
2)
利記最大既問題係合作問題
球星既個別戰鬥值唔使懷疑
不過偏偏冇化學作用
當一加一唔可以等如三之餘
仲要細過二
正係利記近廿年羸唔到聯賽既主因
3)
於社區盾送大禮既高柏尼
其實已經係曼城陣中最可靠既中堅
而佢其實質素唔太差
上季既佢肯定係英超3大中堅之一
4)
謝雲奴其實唔係未開竅
而係同隊友冇默契
佢其實一啲都唔獨食
佢上季同蘇維夾到爆
起勢助攻俾佢入波
佢既絕招就係扭落底線
再淡淡定助攻俾隊友撞射
印象中尹佩斯今季已經最少4次咁樣入波
Post a Comment