1)
利物浦被指有多個新箭頭人選
杜sir既被指想用卡路爾作為交易籌碼羅致戴倫賓特
又被指睇中迪科爾同埋洛蘭迪
Comment:
3個都係正箭頭
某程度反映而家球隊既箭頭幾咁唔掂
英超難踢過荷甲超多
阿蘇唔能夠好似以前咁食波當食生菜都好正常
不過佢同其餘幾個射手既埋門一腳始終真係不敢恭維
特別係考慮到球隊兩邊傳中其實比上季做得好左
2)
韋根被指準備以200萬鎊向些路迪收購森馬拉斯
Comment:
踢成20場先入得18球
攻力同上季相比毫無進步
增強火力一定係馬天尼斯今個月既指定動作
不過這名希臘射手向來入波唔多
好似今季到而家踢左成23場先入得嗰3球
點睇都幫唔到韋根幾多
3)
英國傳媒指摩連奴派球探觀察史堤芬費查
Comment:
由三年幾前佢為喜伯年第一場波就連中三元起
這名蘇格蘭射手就成日同皇馬扯上關係
不過如果佢真係咁堅
買佢既又點會只係般尼同埋狼隊呀
p.s.:
日之泉JC晨曦搵到阿古路師兄?!
4 comments:
主觀願望都很想卡路爾能回歸紐記(始終會有這一天,不過估計並非而家),
相信以一個紐卡素本地人回鄉重返母會,
表現應該特別醒神,
始終紐記打法粗枝大葉,
技術及戰術層面都不用太講究,
岩哂佢,
以而家卡路爾既表現,
坦白講真係連一千萬磅都唔值,
期望佢真係可以快些復甦,
其實很難想像利記今年幾名中前場既入球數目會下降得這麼多,
又時常欠運,
因為論牌面算係星光熠熠,
牙擦蘇,卡路爾,古治,比拿美,查理阿當,麥斯...,已經有好多人可用,
利記個進攻戰術運用真係咁多變同咁複雜?
以佢地既個人技術同閱讀球賽能力,
應該唔難夾得熟...
可能以前真的太倚靠托利斯,謝拉特,或後期的魯爾梅利斯,仲有班拿約去組織進攻同搵食...
都係覺得以前賓尼迪斯同而家杜格尼殊領隊放錯人...
To: sammysir
非官方統計
利記係今季英超最冇運既球隊
唔肯定係唔係12碼宴客最多既球隊
不過中楣中柱最多就一定係佢地
但冇運唔足以解釋佢地點解入咁少波
埋門一腳同埋組織能力都好難令人滿意
當中過多新兵就係導致後者既主因
而原本兩翼傳中係有進步
不過卡路爾又唔爭氣
而家謝拉特復出
幾個新兵又要同佢培養默契
加上阿蘇既冤獄以及古治已經雪到硬晒
但成單嘢要負最大責任既應該係杜sir
由買人到佢成日轉陣式都玩死隊波
因為以全部英超球隊在所有比賽計起,
唔理佢地踢多OR踢少,
利記係最少輸波既球隊,
曼城,曼聯同熱刺輸波既次數都較利記多
(當然計埋歐聯歐霸同聯賽盃既賽事)
所以我覺得以現時利記既人腳同級數,
其實應該係可以同前五隊完全可以睇齊的,
反而我想知
以而家利記既陣容,
唔計一些要整季長抖既球員
可以排一個什麼既陣,
佢地人腳真係好多,
真係可以有PLAN A同PLAN B既陣
我個人覺得查理阿當,佐敦軒達臣,唐寧三人
應該要做番後備,
比拿美,麥斯,古治,謝拉特四人場場都應該踢正選
To: sammysir
1)
利記係輸得少
不過實在和得太多
如果唔係成日羸形勢下和波
佢地一定有份爭英超
2)
利記中前場既人腳一定夠兩隊波用
個人認為如果踢4-4-2
箭頭一定係阿蘇
而佢既拍檔就視乎戰術
中場方面
謝拉特復出後就肯定係鐵膽
而由於盧卡斯利華長抖
用軒達臣似乎比查理阿當好
一來可以乖機將前者轉型為助攻助守既球員
二來查理阿當越睇越似只配做細球會大佬
而今季既兩邊陣擊雖然已有改善
不過改善空間仍然幾大
當中關鍵係除左唐寧外
其餘既勤力有餘
但都唔擅於個人突破
麥斯洛迪古斯雖然有得落場就例搏
不過整體水準真係差過幾年前
K角位既重炮亦已經冇見好耐
如果真係要選
表現漸上力既唐寧會係其一
可以略為幫補前線既古治會係另一選擇
比拿美同佢既作風有啲似
不過脾氣同埋穩定性都唔多好
岩做後備多過做正選
Post a Comment