1)
阿仙奴被指打算有興趣於1月以800萬鎊收購丹尼素夫
Comment:
這名俄羅斯防中原本已經係俄超頂薪球員之一
見到侯克同埋韋素高薪加盟就又話要加人工
可見佢要求肯定唔低
雖然報導話辛尼特肯以800萬鎊賤價踢走佢
有必要搵防中既兵工廠
又可能因為馬維拿既傷患以及狀態而未必會於1月出價
不過以雲加咁慳家既性格唔似會俾佢開天殺價
就算上年盤數又賺三千幾萬鎊都係咁話
2)
利物浦近日同以下球員扯上關係:
盧斯安奴拿辛格,史杜特文,加坦,漢基蘭以及丹巴巴亞
Comment:
曼聯自上季已睇中史杜特文同埋加坦
冇錢又冇得踢歐聯既利記好難爭
而盧斯安奴拿辛格可以踢進攻中場兼兩翼
估值600萬鎊就有交易的確好吸引
不過燕豪芬亦唔似會於1月同時放走兩個主力
至於丹巴巴亞
由於佢合約既離隊特別條約已過期
加上佢今季仲fit過柏比ABC
意味要簽佢就要俾紐記開天殺價
最有興趣既反而係同富咸季尾約滿但仲未續約既漢基蘭
英國傳媒估價佢值600萬鎊
不過到左1月應該要最少打個5折
雖然佢已經31歲
不過穩定性更勝利記現時幾個中堅
就算做後備都至少比加歷查信得過
p.s.:
1)
尋日入場睇左銀羅艦隊對港版巴塞
前者同上季相比少左斬中靠高波屈機
而多左於中路靠傳送突波
效果唔算太突出只因默契輸蝕
幾場同幾年確實會有好大距離
佢地中場有好幾個球員擅長中距離射門
可以係破關方法之一
不過印象中佢地只係首場對橫濱FC先有比較多嘗試
伊達踢得比較自由
進攻中場,最前,甚至兩邊都隨時搵到佢
但同上季季初既中村估人一樣未算太適應
而南華前線少左個有威脅既正箭頭
李安度太廢而迪亞高又稍嫌獨食
後者最終由右翼位移至正箭頭就入波
某程度係因為對手一對中堅一時唔適應佢既走位
不過最深印象既係狄卡奧
肯跑肯搶又好波
佢加上轉型多左參與防守既陸志豪以及踢得好自由既伊達
就令球隊既控球能力不下於傑志
加上佢地有貼身招呼對方大腦林嘉諱
亦係尋日有運之餘既另一羸波原因
2)
利記終於開齋
so good!
不過話時話都幾擔心曉頓就快冇得撈
2 comments:
丹巴巴亞雖然係主力
但成日覺得佢係紐記唔多開心
就算最近入好多波都覺得佢好似唔多滿足
走都真係唔出奇
咁當然係想佢唔好走
但到目前呢一刻
仍然係覺得佢同CC兩個只能存一個
唔係只會攪死隊波
取捨既野
就緊係留番比收人工既人諗啦~~
To: 舒利亞
1)
上季既下半部份
丹巴巴亞表現回落
主因係柏度有時要佢走出禁區
仲要係佢唔多擅長既左路
以免黑雙煞於禁區爭食
2)
我重來唔反對兩個正箭頭長期並存於禁區
關鍵只在於分工
好似以前約基同埋高爾
由於約基較擅長二傳
所以好多時捕最前既都係高爾
但現時柏比ABC同埋丹巴巴亞偏偏冇咁既默契
柏度接手紐記後既大改變係著重場控球
佢要其中一個射手有時走出禁區都正常
佢兩個都有遠射腳頭
如果二擇其一
小弟反而prefer柏比多啲時間走出禁區
因為佢以前都試過踢偏左既位置
Post a Comment