2011-2-18 (1)

雖然遲左
不過都想講下兵工廠食’塞’

事後孔明
各大傳媒都話巴塞輸在哥迪奧拿忽然保守
又話雲加羸在敵退我進

不過其實誠如教授所講換人只係賭博
下場隨時係輸0:2,甚至0:3
不過既然要焗攻
就緊係趁主場而唔係作客魯營

另一方面,睇住韋舒亞由下半場開始越踢越free
哥迪奧拿只有兩個option
一係靠幾個技術型中場以效率彌補不足
二係換個防中入場幫手
考慮到幾個技術型中場本身唔夠韋舒亞咁好活力
仲已經搏左成粒鐘
所以換入基達既決定好正路
當然後果係點已係後話

換走韋拿當然比換走恩尼斯達上算
因為後者幫手控球既能力始終比較強
而睇巴塞被迫和後隨即反撲
就知佢都唔算太保守

小弟始終覺得巴塞輸波其實另有兩個關鍵
一係佢地入唔到燕梳球
二係域陀華迪斯送禮
其實兵工廠變陣後唔算佔到好大甜頭
多得佢又犯低級錯誤而打起對手士氣
仲搞到球隊要再次大軍壓上而埋下輸突擊既伏線

另一方面,巴塞下場羸1:0都已經夠入8強
形勢大抵唔見得太差

雲加就聲稱下場唔會放棄進攻
不過大抵只係龜縮後再反擊
下場對手多返佩奧爾
但又有碧基停賽
雲佩斯等人仍然有一定機會偷雞

雲加最擔心既怕且係防線
中堅位置已經長期不穩
桑治又明顯唔夠級數
佢今場仲因為早段既黃牌而患得患失
絕對係球隊隱憂
球隊如果入到8強
最大功臣話唔定係施捷斯尼
隨時又係一個時勢出英雄既例子

p.s.:
見到桑治同埋迪亞比
好多時都有恨鐵不成鋼既感覺
費文尼當年成才後因為錢而出走米蘭
果然係3輸局面

睇埋佢前晚對哥魯卡要人唔要波既雙腳離隊飛剷
打死都唔信雲加以前咁教佢踢防中
大抵佢已經學晒加度素啲衰嘢
又一個近墨者黑既例子

2011-2-16

1)
利物浦成為最新一間同謝雲奴扯上關係既球會
消息指佢而家既身價高達1500萬歐元
不過佢仲有年半就約滿
或者有減價空間

另外,利記亦被指睇中索察既23歲法國中場M.馬田
另一方面,G.Wijnaldum 亦係利記既增兵對象
不過車路士以及皇馬都對這名20歲飛燕諾翼鋒好有興趣

2)
巴塞被指打算收購伊拉奧拿
以取代仲未續約既丹尼爾艾維斯
而拜仁就被傳睇中C.艾迪安奴

3)
曼城被指有興趣引入卡雲尼以及柏斯托尼

4)
羅渣莊臣被指成為熱刺既新中堅人選

5)
艾利亞迪里透露唔滿意中東球會Al-Ain唔夠專業而拒絕加盟

6)
曼聯被指想收購馬里奧葛斯
以作為史高斯既接班人
消息指佢既身價可能高達1200萬鎊

而迪羅斯亦係費sir既另一考慮人選

7)
皇馬被指睇中費蘭尼
莫財既愛華頓可能要被迫放人

p.s.:
1)
尋晚熱刺作客聖西路
羸波功臣首推高美斯
條友似乎繼承左占士於英超既神經刀寶座

2)
雖然比較鍾意巴塞
不過都希望兵工廠唔好於主場失威

2011-2-15

近幾日既部份新聞……

1)
朗拿度宣佈掛靴
而卡路士早前亦同哥連泰斯解約
佢已同俄羅斯球會安卡簽約兩年半

2)
歐聯戰場重開
雲加將拿斯尼列入對巴塞既大軍名單
而巴塞就肯定有佩奧爾缺陣

另一方面,格里夫巴利亦肯定無份對AC米蘭
熱刺唯有寄望卡蘭積卡keep住有士哥

3)
卡塔爾皇室旗下既財團仲未同曼聯傾掂數
有報導指格拉沙家族其實想殺價18億鎊
甚至20億鎊

4)
熱刺被指打算於暑假收購碧咸
又或者等佢同洛杉磯銀河約滿後以自由身加盟

而由於中堅位置太多玻璃腳
佢地被指考慮於季尾從財困既愛華頓收購積基卡
而卡積亞亦係佢地既另一考慮人選
不過利物浦亦有興趣從禾夫斯堡接貨

5)
雲達韋爾再同多間大球會扯上關係
當中包括曼聯以及車路士

6)
鬧龍門荒既黑池曾經打算向曼城借用基雲
不過最終未能成事

7)
巴塞被指打算於暑假引入新血
傳聞人選包括尼爾馬,甘素以及阿歷士山齊士

8)
奧沙辛拿宣佈同甘馬曹解約
球隊將由文迪利巴接手

9)
些路迪既22歲以色列防中 E.Izaguirre
被指成為曼聯既新防中人選
而費sir被指考慮從里昂引入洛里斯

另一方面,貝碧托夫既新約週薪傳聞高達17萬5000鎊
僅次於朗尼

10)
雖然馬些路於日前對愛斯賓奴一役回勇
但摩連奴依然被指打算引入泰禾

而串王亦被指再打謝拉特既主意
不過由於當時人離隊機會唔大
報導指迪羅斯將成佢既另一目標

另一方面,皇馬被指打算放棄多達8名球員
當中包括加高以及賓施馬
而佩雷斯被指將親自去英國斟酌法比加斯以及格里夫巴利
不過阿仙奴已將前者定價8000萬鎊

11)
格連莊臣再同祖雲達斯扯上關係
報導指利物浦一旦賣走佢
將會從紐卡素收購荷西安歷基作為替補

12)
加拉塔沙雷被傳睇中柏杜夫

13)
馬田斯表態希望伯明翰買斷佢

14)
紐卡素同多名射手扯上關係
當中包括謝雲奴,域咸以及奇雲杜里
而佢地亦被指有興趣同新特蘭爭奪奧奴夏

p.s.:
小弟愚見
近十幾年球壇既真正巨星屈指可數
大抵只得大細哨,施丹,美斯
大哨當年勁到真係成個外星人咁
最終追唔上比利同埋馬勒當拿
既要怨個天唔錫住佢個玻璃膝頭
更要怪自己爛蒲爛飲爛滾

細哨晚年既身體質素雖然好過大哨
仲有對更出神入化既魔術腳
不過佢基本上行緊師兄舊路
回塘既機會遠大於回勇

想睇球王演出
此時此刻只得美斯
唯望屠夫對手對佢腳下留情之餘
亦寄望有超新星激發佢再升呢

2011-2-13

朗肥忽然hea碧上身
曼城輸波其實非戰之罪

想講既其實係文仙尼既排陣同埋調動
為左睇住蘭尼
而搵薩巴尼達客串左閘
搞到要高拉洛夫被迫踢前一格
倒頭來兩個既發揮都係水準以下
蘭尼亦如常入波
失敗!

而占士米拿留守中路助攻助守
但幾近隱形
又係失敗!

迪施高入場後
最初估佢既作用應該係牽制曼聯中路防線
以解放泰維斯出任另一個自由人
點知波斯尼亞人最多時間出現既竟然係曼聯既禁區頂
如其靠佢搏腳做二傳
倒不如直接搵佢去強攻
失敗中既失敗!

既然有齊迪施高,泰維斯同埋大衛施華咁堅既兵器
文仙尼又咁驚輸而要出齊3個防中
米卡李察士同埋高拉洛夫又出名出擊力強
4-3-2-1陣式真係fit晒曼城
文仙尼咁都唔肯行返國米條舊路
真係好懷疑佢個腦係用來裝草
一個只係識chok樣既領隊都唔知有咩用

2011-2-12

近兩日既新聞......

1)
英國傳媒指卡塔爾皇室所領導既財團即將入主曼聯
消息指作價高達16億鎊

2)
西布朗最終決定搵鶴臣接手
雙方簽約至下季尾

3)
收購蘇亞雷斯後
利物浦被指有興趣從阿積士引入另一球星基斯甸艾歷臣
不過被形容為’新伯金’以及’新勞特立’既佢已經表明唔會離隊

另一方面,利記亦被傳考慮接收保贊

4)
羅比堅尼因為脛骨傷患而要休息6星期

5)
布力般流浪方面承認考慮於1月引入法比安奴
不過最終因為想搵一個比較年青既射手而放棄收購

6)
AC米蘭只準備同派路續約1年
兼要佢減薪5成
令佢離隊幾成定局
曼城,華倫西亞以及馬體會都有興趣接貨
當中前者仲願意以430萬鎊年薪利誘佢過檔

不過當時人又要養傷6星期
未知會唔會嚇怕幾個準買家

7)
消息指車路士仍然有興趣於季尾收購尼爾馬
而伊雲洛域已落實續約到2016年

8)
告魯夫回歸阿積士
加入佢地既技術改進小組

9)
蘭加日前因為未有接受隊醫檢查就離隊
可能俾英格蘭足總禁止佢於對布力般流浪既聯賽上陣

而有傳英格蘭足總打算訂立新例
但凡有球員聲稱有傷病而唔肯踢太公波
都唔可以於之後5日內既球會賽事上陣

10)
英國地區球會 Forest Green Rovers 既班主
為左球員以及球迷既健康著想
禁止球會餐廳再出售紅肉

11)
愛華頓成為最新一間同艾文達扯上關係既球會

2011-2-10

好耐冇講過新聞
近兩日部份新聞包括:

1)
曉頓被傳接手西布朗

2)
曼聯近日再次同拉爾拿以及紐亞扯上關係
前者被指如果利記下季又冇份歐聯
佢就一定會要求離隊
而德國傳媒指後者既合約訂明
只要有球會開價1280萬鎊
史浩克04就一定要放人

另外,為左解決防中唔夠腳既問題
曼聯亦被指打算引入馬斯查蘭奴

另一方面,查伯東尼提議吉遜轉會以尋求更多出場機會
佢隨即被傳暑假加盟維拉

3)
保贊被指成為拿玻里既增兵對象
消息指落實續約到下季尾既哥迪奧拿如果繼續唔重用佢
佢會認真考慮離隊

4)
柏度早前透露將羅致自由身箭頭
最終搵左連英冠都踢唔掂既古基
不過佢既頂上功夫確實係陣中前線缺乏
總比其餘兩個傳聞人選艾殊頓以及艾利亞迪里好

另外,由於艾文達同保頓既合約將於季尾完結
紐記被傳可能季尾打佢主意
只簽約到季尾既古基明顯只係臨時工

另一方面,西班牙傳媒指華倫西亞有興趣帶荷西安歷基返西甲

5)
油王被指再有新既收購目標
當中包括費蘭尼以及法比加斯

馬里奧高美斯就透露車仔曾於1月向拜仁出價3500萬鎊收購佢
而羅馬就被傳季尾想搵肥安過檔
另一方面,施哥夫亦可能跟佢去意甲搵食
不過目的地就係祖雲達斯

6)
皇馬被指已同曼城達成協議
將於季尾以1190萬鎊買斷艾迪巴約
而一旦他日佢幫皇馬羸到歐聯
皇馬將要再俾多170萬鎊

另外,皇馬亦被指有興趣從拜仁收購比連奴
因為比比仲未同佢地達成續約
佢近日先後同車路士以及阿仙奴扯上關係

7)
禾夫斯堡被傳睇中施多夫

8)
莫斯科斯巴達被指想搵柏夫奴真高回巢
羅馬亦被指對佢有一定興趣

9)
利物浦被指睇中J.湯馬士
這名前兵工廠青訓產品同西布朗只剩下年半合約
而達寧以及艾殊利楊格就繼續同利記扯上關係

p.s.:
1)
利華蘭尼同巴勒莫提前解約
其實佢比畢特更適合成為南華既 playmaker
羅神如果仲有 budget
真係不妨唸唸佢

2)
尋日因為工作關係而去唔到睇香港對印尼既奧運隊熱身賽
不過對手唔勁都竟然失左4球
真係好失望
好彩對馬爾代夫前總算仲要時間改善

2011-2-8

雖然遲左
但都想講下紅藍大戰

車仔原有既3箭頭陣式
基本概念就係馬路達以及安歷卡於左右二路
為正箭頭杜奧巴輸送彈藥
可惜尋晚見到既3箭頭陣式空有咁既作用
費托身在杜奧巴之後
原意應該係想俾空間前者發揮佢既高速
不過佢唔係踢邊
加上安歷卡仲九唔搭八墮後駁腳
於中路苦無供應既杜奧巴自然動彈不得
費托既去路亦俾佢阻左唔少
結果全場除左俾回勇既加歷查補位硬食佢一嘢
費托其餘時間等同’廢’托

其實費托似係車仔長遠換血而舖路
如果而家硬要加插佢斯於3箭頭陣式
肥安只有兩個選擇:
中路既杜奧巴以及右路既安歷卡
偏偏條友收起最唔應該收起既馬路達

到車仔要焗攻既時候
變陣4-2-4又過唔到將士用命既利記防線
(尋晚除左麥斯洛迪古斯以外
利記個個都有貨交)
當然利記有得羸波
利記上下除左要多謝施治同埋伊雲洛域接連出錯外
亦要慶幸球證睇唔到格連莊臣嗰肘

遠在香港既陳浩然亦同肥安同病相憐
明星老闆先將英超工兵畢特當 playmaker 用
再硬插過氣躁火但而家死晒火既基士文入球隊
好衷唔衰陳浩然又唔識執生
咁耐以來都唔試下搵李海強同埋白鶴夾下佢
基士文唯有繼續適應南華兩翼傳中既踢法
結果冇表現就俾陳教練多次公然抗旨收起佢
完全係一個惡性循環
至怕羅神抽後算帳
他日賜佢有病

p.s.:
1)
由於要爭取時間養病
miss左英超8場41個入波既happy Saturday
更可惜就係睇唔到曼聯俾隻餓狼破處

另一方面,睇唔到紐記對兵工廠
可能對身體有益
畢竟實在太激

事後睇左重播
如果唔係迪亞比小不忍而亂大謀
打死都唔信紐記可以翩身

不過小弟覺得杜特同樣有問題
多個判決都偏幫主隊
簡直係雙重標準
難怪而家佢同埋路斯基被傳收左黑錢

2)
柏度否認想引入亨利
唔好玩啦
肥佬出晒名縮骨
邊肯俾高薪搵佢返來養老

2011-2-5

轉會市場閂門
正係做英超中期分析既好時機

曼聯現時爭標形勢最好
佢地亦一如以往於歐聯重開前起勢搶分

費sir擅長輪換
加上華倫西亞就快復出
以及安達臣同埋朗尼回勇在即
3條戰線唔算特別難搞

反而球隊作客時有腳軟
先係佢既最大難題

阿仙奴而家失多5分
肯定仲有機
當然關鍵一度要主場做低曼聯

雲加於季中已經借走艾朗藍斯同埋卡路士韋拿
反映球隊中前場都幾齊腳
相反最終搵唔到新中堅
先係兵工廠既最大隱憂

而法比安斯基雖然提早收咧
但對球隊既影響唔大
一來佢唔見得好過艾蒙尼亞好多
二來施捷斯尼更值得期待

曼城方面
佢地雖然守得唔錯
不過遇強即縮
始終難寄厚望
最致命既仲係佢地好多時對住中下游球隊都無甚霸氣
所以佢地只配成為列強既攔路虎
文仙尼一日唔走
富豪老闆揼幾多水都冇用

車路士方面
球隊近日終於回勇
失多曼聯7分亦未到放棄時候
油王最終撥款收購托利斯以及大衛雷斯
總算回應肥安既增兵訴求
不過萬一最終衛冕失敗
只怕佢亦難逃落台下場

熱刺方面
雖然雲達華治聲稱佢地有力爭英超
不過保住前四似乎先係哈利列納既合理目標
佢地而家只係失多曼城兩分
最終保唔保得住歐聯資格
關鍵唔止係佢地歐聯可以行到幾遠
而係中堅既傷兵潮

話說回頭
哈利列納季中只係搵左個南非中堅
本來已經唔夠用
明知京治同埋卡保奧有傷
戴臣又要停3場
佢老人家已經執左派拿
都仲要於最後一刻都只係掛住斟酌查理阿當
好多熱刺球迷可能就咁激到嘔血
而高美斯以及古迪仙尼都明顯係前7球隊當中最唔可靠既龍門
就突顯中堅問題對佢地特別重要

新特蘭方面
雖然多左施斯隆同埋蒙達利
但又冇左戴倫賓特
球隊整體戰力略為下降
爭奪歐霸盃席位既願望隨時落空

利物浦方面
杜格利殊已經針對球隊攻守弱點做嘢

前線方面
雖然兩個箭頭都買貴左
不過考慮到冇咩時間買人
而蘇亞雷斯已經證明係高質筍貨
卡路爾既年齡以及本土球員既身份又令投資有升值空間
(雖然大佢3年既洛蘭迪會係更吸引既人選!!!)
兩個投資都尚算合理

而魯爾梅利斯得到解放後亦接連有貨交
小弟對佢同謝拉特既組合好有期待,

不過中場線既截擊力始終令小弟擔心
因為盧卡斯利華以及保臣都唔係好貨色
而杜帥近日試用3-5-2陣式既成效仲有待驗證
一來兩閘既漏洞更加重工兵既負擔
二來萬一溝通得唔好
3中堅陣式更易出事
艾加既包抄會係實驗成敗既關鍵

另一方面,杜殊一定唔會咁快放棄歐聯席位
但要同時兼顧歐霸戰線
關鍵會係佢點樣利用球隊既剩餘物資
畢竟祖高爾,尼哥治,麥斯洛迪古斯以及祖雲奴域都應該仲有貨交
特別係後者唔肯轉投禾堡
令利記少收600萬鎊

如果硬要挑剔杜帥既增兵行動
大抵就係佢冇為兩閘以及防中增兵
上述位置利記都唔多夠腳
佢老人家應該會用更多新人
當中馬田基利就已經係好例子

保頓方面
隨住李青龍回歸以及成功借用史杜歷治
佢地既進攻線終於再有速度
另一方面,韋達既加盟將會加速加利卡希爾既離開
餘下幾個月應該會係佢於保頓既最後半季
佢地爭歐霸盃席位既關鍵
肯定係奧雲高尼有冇本事執返好條防線

布力般流浪方面
從炒左Big Sam到傳聞羅致細哨
都反映佢地既高層於管理方面好有問題
球隊於堅恩接手後唔見有大起色
增兵亦冇針對創造力缺乏既問題對症下藥

由於成功挽留尼爾遜,森巴同埋沙加度
佢地既人腳應該唔愁降班
但如果一眾高層繼續固我
佢地既長遠發展肯定唔會有好結果

紐卡素方面
冇咩聽過英超領隊要陪老闆去賭場玩通宵
柏度應該係小弟印象中既第一個
條肥佬見到3500萬鎊筍價就即放卡路爾
小弟肯定柏度敢怒不敢言
做領隊做到成個傍友咁
真係不知所謂

而家連艾美奧比都打柴
加上艾利蘭以借用形式同巴頓重逢
紐記幾可肯定以4-5-1陣式應戰
柏度透露想搵自由身箭頭
不過貝斯或者盧雲卡蘭斯其實已經係佢既好選擇
而路蘭亦有機會要谷得更上
當然賓艾化復出後亦可能串演箭頭

史篤城方面
借用卡維反映普利斯繼續主打高Q大棍
雖然日子越耐
其他對手對佢地已經越有防範
不過今季英超比佢地差既球隊應該唔止兩隊
所以佢地依然唔愁降班

富咸方面
佢地既增兵其實唔算順利
不過都至少搵到古莊臣同埋卡古達
不過高層唔炒曉士
其實係球隊最關鍵既一步
佢雖然唔係超級有料既領隊
但應該有足夠時間於中型班撥亂反正

黑池方面
佢地向來有前冇後
增兵都至係識搵比亞堤
小弟冇寄望佢地下半季於防守上有改善
而家查理阿當最終戲劇性留隊
佢而家既心態以及球隊士氣
先係佢地下半季成敗既關鍵
而下半季忽然走樣隨時降班收場
96/97球季既水晶宮正係經典例子

維拉方面
侯利亞終於做返佢應該做既事
先留得低李察鄧尼,費度,希斯基同埋艾殊利楊格4個有用之人
而其餘搞屎棍就悉數踢走
再針對球隊弱點羅致戴倫賓特以及馬干
只要球隊繼續於防守上有改善
上返前10既日子指日可待

愛華頓方面
雖然因為莫財而有出冇入
不過以佢地既人腳一定唔愁降班
莫耶斯下半季最重要既任務
一定係檢視陣中仲有邊啲剩餘物資可以於季尾套現

西布朗方面
球隊自從12月頭打瓜紐記後就打回原形
迪馬堤奧仲一度因為連敗而有下台壓力
其他對手明顯已經睇死佢地前線太倚靠奧丹維治
而家借用卡路士韋拿絕對係正確既方向
護級關鍵就要睇下迪馬堤奧點樣改善球隊防線

伯明翰方面
球隊防線果然走樣
賓科士打固然冇料取代祖赫特
兩閘亦繼續出事
中場擺幾多工兵都係冇用
而前線方面
施積唔適應英超亦令球隊失晒預算

季中主要增兵只有居迪戴維斯以及馬田斯
前者只係取代提早收咧既史葛丹恩
馬田斯又向來唔係多產射手
前路肯定難行

韋斯咸方面
留用柏加同埋引入羅比堅尼絕對係利好消息
不過格蘭仍然in-charge就絕對係球隊隱憂
條友教左半季都仲未摸到個最佳陣容
如果唔係奧尼爾拒絕接手爛攤子
佢應該已經落鑊

韋根方面
佢地控球在腳既踢法確實幾好睇
不過絕對唔好食
加上球隊於1月亦冇針對黃大仙防線而增兵
降班機會幾高

狼隊方面
其實佢地幾好命
偏偏利記同埋車仔最季最沉既時候先對佢地
益佢地執晒好多球隊都攞唔到既6分
但佢地咁都要包尾
就反映佢地其餘時間有幾唔掂
佢地同韋根一樣都係冇咩增兵救亡
奧哈拉唔似幫到好多

上季佢兩隊唔使降班只因有更差既對手包底
今季怕且再走唔甩
而陪佢地重返英冠既應該不出黑池,西布朗,伯明翰同埋韋斯咸

2010-1-17

1)
雲尼亞里被傳成為利物浦下任領隊既人選
而佢亦暗示有興趣過檔
而胡仙歷亦被傳係利記既增兵對象
不過羅馬方面就表明唔會放人

另一方面,利記被指有興趣出價1000萬鎊從維拉收購達寧

2)
戴倫賓特主動要求離開新特蘭
布魯士證實佢將以1800萬鎊轉投維拉

3)
軒迪克表明唔會接手車路士
而傳聞油王想搵格蘭返車仔出任足球總監
意味佢俾槌仔幫掃走都唔驚失業

另一方面,一旦羅致派拿失敗
車仔被指將改以600萬鎊收購卡蘭積卡

4)
消息指有力般流浪準備放棄迪奧夫以及占邦達
而森巴就被傳係阿仙奴既600萬鎊新中堅人選

5)
愛華頓被傳有興趣接收蒙達利

6)
李斯特城打算借用古斯錫
不過當時人表明唔想踢英冠

另一方面,夏格維斯為左曼聯肯同佢續約
不惜提出每場1.5萬鎊既賤價

7)
由於紐卡素表明唔會賣走卡路爾
熱刺被指改打G.羅斯既主意

p.s.:
1)
巴頓聲稱唔認為有英格蘭中場踢得好過佢
所以好唔明點解冇得入選
幾年前佢其實亦有類似言論

不過就算佢既表現值得入選
俾你係艾歷臣或者卡比路都唔會選個炸彈入隊掛

2)
尋日既銀牌決賽
比當年利記反勝AC米蘭更加峰迴路轉
可能n年後都仲有人講

可惜既係小弟尋日下晝2點幾開始忽然身體不適
搞到凌晨兩點幾先可以由醫院返屋企
就咁miss左場經典大戰
有機會都想上網download返場波重頭睇返次

3)
人到中年
不經不覺由當年既鐵人變返做個普通中坑
係時候做返運動兼調理好身體
大家都要愛惜身體

2010-1-16

近兩日既部份新聞......

1)
利物浦再次被指以2000萬鎊收購蘇亞雷斯
而巴布就可能成為交易籌碼

另外,特拉布宗就借用米蘭祖雲奴域
並於季尾有權買斷佢

2)
奧尼爾被傳將會接手韋斯咸
另一方面,阿仙奴被指準備以跳樓價50萬鎊收購厄遜

3)
艾迪巴約,高路斯以及雲佬繼續同皇馬扯上關係
當中高路斯既經理人證實皇馬已有初步查詢
而德國傳媒又指雲佬以罷賽威脅漢堡俾佢離隊

另一方面,皇馬被指同曼聯爭奪干查奧
而賓菲加將佢既身價定為2000萬鎊

4)
桑馬干落實以600萬鎊轉投維拉

5)
由於車路士未能同派拿就個人條件達成協議
交易可能胎死腹中
而車仔亦再次同大衛雷斯扯上關係

另一方面,佢地決定將文斯安尼繼續外借狼隊

6)
馬拉加好可能遲來先上岸
成功借用G.米列圖
而佢地亦準備出價500萬歐元收購保拿洛迪

7)
布力般流浪即將以借用形式從史浩克04引入J.鍾斯
而佢地亦睇中巴塞年青中場域陀華斯基斯

8)
熱刺已經接受伯明翰對羅比堅尼既600萬鎊出價
而佢地被傳考慮以破紀錄既3000萬鎊收購卡路爾

另一方面,由於洛杉磯銀河企硬要碧咸2月歸隊
哈利列納透露可能會放棄借用佢

9)
丹巴巴亞最終決定加盟史篤城

10)
紐卡素再次同保夫萊特扯上關係
不過當時人已經否認有關報導

11)
曼城被指準備以10萬鎊週薪同祖赫特續約5年
國米被指有興趣以1700萬鎊收購巴利
以取代肯定離隊既蒙達利

12)
朗尼細佬轉戰亨利,加盟紐約紅牛

p.s.:
1)
法比安奴可能以500萬歐元重返巴甲,加盟哥連泰斯
佢近幾個月既身價大幅插水超過一半
西維爾而家應該好後悔

2)
下晝大婆台有銀牌直播
唔入球場都有得睇

2010-1-14

近幾日既部份新聞......

1)
杜格利殊希望老闆放水俾佢增兵
而利物浦近日被指再有多名增兵對象
當中包括蘇亞雷斯,哥魯卡,大衛辛頓,尼索比亞,艾利亞以及A.張伯倫
其中後者亦吸引多間英超球會既興趣
消息指修咸頓唔準備接受低過1000萬鎊既出價

另一方面,富咸被指想從利記接收恩疏亞
而艾加就被指可能轉投費倫天拿

2)
雲高爾表示想搵奇連士文重返拜仁
出任佢既副手

3)
希古因好可能要提早收咧
皇馬再次被傳引入高路斯或者艾迪巴約

4)
車路士被指希望以700萬鎊引入域咸

5)
紐卡素同施巴斯坦拿臣傾唔掂個人條件
而紐記被指另有多名增兵對象
當中包括韋倫,甘明斯以及 A.Lallana
後者係柏度於修咸頓既舊部屬

6)
辛達告魯斯即將重返布力般流浪
而布歷治已落實以借用形式加盟韋斯咸

7)
祖雲達斯被傳有多名增兵對象
當中包括路蘭度,迪拿達利,拿斯尼以及巴布

8)
意大利傳媒指拿玻里希望借用G.米列圖

9)
國米被指有興趣從拜仁引入年青左閘干坦圖
而文仙尼就落實轉投明尼路

10)
韋達可能轉投保頓

11)
熱刺被指有興趣羅致菲臘仔以及布朗
不過莫耶斯唔想放走前者
要求對方用柏夫奴真高或者賓特尼交換

另一方面,列納表示有信心成功引入碧咸
不過佢肯定趕唔切對曼聯

12)
AC米蘭否認羅致保辛華既傳聞

13)
施仙奴落實以借用形式加盟維拉利爾

14)
費sir嗰仔重返彼德堡
雙方簽約4年半

15)
保斯利轉戰意甲,以借用形式加盟熱那亞

16)
黑池被指可能引入咸美爾
這名前利記青訓產品早前亦被指成為紐卡素既50萬鎊收購對象

17)
曼聯被指有興趣收購香川真司以及查理阿當
不過多蒙特已經表明唔會賣走前者

18)
伯明翰落實借用賓特尼到季尾

p.s.:
超級死八婆發緊夢
明知唔可以更新資料都走去入機
仲要衰左都唔走去自首
累我無辜OT兩個幾鐘
頂!

2010-1-11

1)
杜格利殊表示有興趣下季繼續任教利物浦
另外,尼格度就否認過檔利記既傳聞

2)
由於洛杉磯銀河企硬要熱刺為碧咸買保險
佢為左資助熱刺
願意將週薪由12萬鎊大減至6萬5000鎊

不過佢既加盟仲有另一問題
事緣熱刺希望借用期限
由原來既10/2延至3月尾

另一方面,熱刺被傳希望以150萬鎊收購菲臘仔既同時
哥魯加就可能被掛牌

3)
細哨落實以300萬歐元轉投法林明高
雙方簽約3年半
而佢既週薪高達13萬歐元
消息指球會贊助商願意額外俾錢係成事既關鍵

另一方面,AC米蘭就落實引入17歲巴西中堅艾利

4)
維拉被指希望用李奧曲加交換巴頓
而佢地已加碼至350萬鎊
希望利誘黑池放走查理阿當

5)
國米方面表示增兵任務已經完結

6)
富咸以及馬體會都被指希望以400萬鎊收購胡禮菲臘斯

7)
紐卡素被指想搵伊朗商人 K.Joorabchian 出任顧問
消息指佢會主打處理轉會
巴頓,阿倫史勿夫以及蘇甘保等高薪球員好可能冇得留低

泰維斯以及馬斯查蘭奴以前去英超發展
以至前者早前玩嘢要離隊
全部都係 K.Joorabchian 既'杰'作
條友向來睇錢做人
絕對只係一個對足球冇咩認識既生意佬

8)
車路士被傳有興趣引入米卡李察士
而年青射手波連尼為左爭取出場機會
好可能重返意甲發展,加盟帕爾馬

9)
熱那亞希望從韋根接收保斯利
以替補離隊既東尼

10)
費倫天拿被指有興趣收購今季表現回勇既艾文達

11)
梅迪薩卡表態唔會離開雲達不來梅

p.s.:
1)
美斯跑出
大抵只係因為坐享漁人之利
如果有得選擇
佢大抵寧願捧返次世界盃
都好過做多十次八次足球先生

2)
台灣隊長陳柏良可能加盟天水圍飛馬
wtssoccer如果見字
見字可唔可以介紹下佢

2010-1-10

1)
杜格利殊搵左奇勒出任一隊教練
另外,雲歷克被傳下季可能執教利物浦

2)
熱刺借用碧咸遇到阻滯
事關銀河企硬要熱刺為碧咸買保險
如果最終唔成事
碧咸只會去熱刺跟操1個月

另一方面,哈利列納被指有興趣引入卡雲尼

3)
雖然阿仙奴再次同梅迪薩卡以及加利卡希爾扯上關係
不過由於始終仲未搵唔岩新中堅
雲加可能第3度羅致蘇甘保
不過就只會同佢簽約到季尾

另一方面,亨利返左兵工廠跟操

4)
葉士域治宣佈搵祖維爾接手

5)
祖奧透過經理人表示唔會離開曼城

6)
紐卡素已就施巴斯坦拿臣既轉會費
同伯明翰達成協議

另一方面,布力般流浪被指有興趣羅致狀態回勇既巴頓
而另有傳聞指一旦艾夫拿離隊
曼聯就會搵荷西安歷基作為替補

7)
由於仲未搵岩新箭頭
皇馬可能改打高路斯既主意

8)
車路士被指打算引入派拿

9)
加利亞雷拉因為膝傷而肯定提早收咧
新加盟既東尼正好做佢替補

p.s.:
尋晚輸左個唔應該判既12碼
又有四哥忽然衰衝動
杜格利殊既頭炮就咁收皮
不過從精神面貌而言
利記算係合格
至少足足1粒鐘踢少個都冇再多失

杜帥更重要既考驗
會係接連兩場6分波大戰
因為如果順利羸晒
球隊不但可以脫離降班組
仲有餐士爭取歐霸盃資格

2010-1-9

1)
英國傳媒分析利物浦下季領隊已有5大人選
當中包括杜格利殊,列卡特,韋拿斯保亞斯,奧雲高尼以及奧尼爾

另外,利記被指打算出價1700萬鎊收購尼格度
而賴恩巴布就可能被放逐去賀芬咸

2)
熱刺落實羅致古馬奴既同時
亦將賓特尼外借到伯明翰

3)
新特蘭被傳準備接收蒙達利

4)
馬田斯可能轉戰法甲,加盟摩納哥

5)
韋拉透露有5成機會季尾掛靴

6)
韋斯咸再次同保夫萊特扯上關係

7)
堅尼米拿拒絕加盟伯明翰
原來係因為希望轉戰英國以外既聯賽
消息指佢可能轉投費倫天拿

8)
柏度透露唔準備放走阿倫史勿夫
而紐卡素準備同新星H.Vuckic續約5年半

9)
阿仙奴被指有興趣羅致夏薩特

p.s.:
1)
艾度淪落去德乙 FC Ingolstadt 04 試腳
條友早前想去瑞士同埋丹麥落班
但最終都失望而回
近年世界球壇小時了了既經典例子
首推都真係佢

2)
新既開始!
紅軍今晚要頂住!

2010-1-8

1)
利物浦宣佈於雙方同意既情況下同鶴臣解約
球隊會由杜格利殊接手至季尾

另一方面,利記早前再次同艾利亞扯上關係
消息指佢既身價高達1300萬鎊

2)
白禮達表態希望2022年卡塔爾世界盃改於冬天舉行

3)
祖雲達斯從熱那亞接收東尼
雙方簽約至下季季尾

4)
富咸臨尾截韋斯咸糊
成功收購薜維爾

5)
比哈美好可能轉投費倫天拿

6)
米列圖由於希望爭取出場機會
而可能以借用形成轉投薩拉戈薩或者熱那亞

7)
伯明翰打算以跳樓價接收堅尼米拿
不過消息指當時人拒絕加盟

而賓特尼以及查理阿當就成為伯明翰其他增兵對象

8)
迪施高終於落實轉投曼城
而勢必離隊既艾迪巴約就可能轉投馬拉加

9)
紐卡素被傳希望借用布歷治

10)
愛沙尼亞即將成為首個同歐洲足協52個國家都交過手既球隊

11)
昆士伯流浪為左爭取重返英超
打算借用麥卡菲以增強攻力

12)
布力般流浪被指希望以借用形式搵杜夫回巢

p.s.:
英格蘭足總被傳想搵碧咸同埋哈利列納聯手領軍衝擊巴西世界盃
係真唔係呀?

2011-1-7

近幾日既部份新聞......

1)
葉士域治終於開除堅尼

2)
鶴臣,肥安,侯利亞以及格蘭都被傳好快冇得撈
利物浦被指打算向波圖挖走33歲少帥韋拿斯保亞斯
英國傳媒指鶴臣已經預左要落台
所以已經於星期三賽後同球員道別

3)
利物浦再次同本田圭佑扯上關係
而佢地亦九唔搭八咁被傳有興趣從紐卡素羅致魯迪治

4)
熱刺方面希望可以於星期日前落賓引入碧咸
佢地早前已經催促洛杉磯銀河盡快放人

另一方面,佢地落實將K.獲加外借去維拉
列斯方面亦承認想借用活基治
不過當時人已經表明唔想踢英冠

5)
AC米蘭落實俾細哨返巴西搵食
加里安尼暗示法林明高最有機
而甘美奧以及彭美拉斯就繼續同佢扯上關係

而柏圖就成為另一個可能離隊既森巴兵
AC米蘭被傳可能用佢同曼城交換巴洛迪利
亦可能以3000萬歐元將佢賣俾車路士

另一方面,安祖胡就被外借去川迪
而舒姆沙就被指成為佢地700萬歐元既新左閘人選

6)
熱刺一度被傳準備用羅比堅尼,卡蘭積卡以及賓特尼
同紐卡素交換卡路爾
不過柏度已經表明卡路爾係非賣品

而做唔成交易籌碼既羅比堅尼亦唔愁出路
佢一度被指好有機會轉會伯明翰
不過出post前仲未落實

另一方面,柏度其實都想引入賓特尼
不過買斷賓艾化後已經冇足夠財力買佢
所以改為以150萬鎊斟酌施巴斯坦拿臣

7)
基斯薜圖被指成為拜仁既新左閘人選

8)
迪施高可能因為護照問題
而趕唔切於1月底前申請工作證

而禾堡就被指打算以600萬歐元收購艾拿奧杜域
作為迪施高既替補

9)
曼聯再次被傳打祖里奧施薩既主意
而費sir最終將馬捷達外借去森多利亞

10)
雲加雖然表示只準備收購新中堅
不過阿仙奴依然被指打算從波圖引入射手法卡奧

另一方面,艾蒙尼亞好可能轉戰土超,加盟加拉塔沙雷
身價150萬鎊既佢將以5萬鎊週薪既條件簽約

11)
車路士落實將班高頓外借去斯肯索普
而保爾馬就成為漢堡既伯用人選

12)
文仙尼好可能重返巴甲,加盟明尼路

13)
迪亞拉被指成為馬拉加既增兵對象

14)
布力般流浪一度翻兜細哨
仲被傳打算截劫碧咸

15)
般尼被指希望搵林拔接手

16)
丹巴巴亞以罷操威脅賀芬咸賣走佢
消息指佢最有可能加盟韋斯咸

17)
阿古路落實同馬體會續約至2014年
不過新約既贖身費卻由原來既6000萬歐元減到4500萬歐元

18)
再講幾單紐卡素既消息......

幾名年青球員先後被外借
當中包括 B.Tozer, M.Grieve, J.Tavernier 同埋 J.S.Edmundsson
而合約為期由1個月到半季都有

而柏度被傳同摩納哥爭奪禾堡既施安尼
不過紐記應該負擔唔到佢既700萬鎊身價

另外,列斯就被指有興趣回收阿倫史勿夫

另一方面,柏度俾卡路爾去杜拜1星期
療傷之餘仲可以乘機充電

2011-1-3 (2)

想講下幾場英超……

1) 西布朗對曼聯

4人防線只有艾夫蘭冇爆過鑊
加埋都只係失得一球
如果留力既曼聯咁都唔叫有運
就係西布朗自己唔爭氣

2) 利物浦對保頓
麥斯洛迪古斯上半場忽然有貨交
可惜驚喜之餘
利記其餘球員繼續態沉
整體表現同上場輸俾狼隊既經典劣作冇咩分別

走甩出名擅頂既奇雲戴維斯
當然又係另一個自己攞0黎衰既例子

下半場唔係初段入返球靚波
利記幾可肯定主場兩連敗
而之後就算羸返個勢
整體運作依然唔見順利
祖高爾既絕殺都要多得對手冇運送禮

另一方面,保頓冇左李青龍
右路攻勢真係差左
否則漏洞之一既奧拿里奧肯定爆鑊連連

3) 車路士對維拉
多得林伯特狀態略為回勇
車仔今場既攻力明顯有改善
不過艾辛持續態沉
否則李奧曲加一定搵唔到著數

車仔最終守唔到尾亦係輸自己
咁有經驗都守得咁唔集中
俾件新仔奇勒後上就搞掂

幾季前佢地同樣試過俾維拉逼和4:4
過程同尋晚幾乎係翻版
嗰季佢地最終因為後防問題而睇住曼聯羸英超
佢地而家失多曼聯9分
數字上一定仲未絕望
不過如果條防線繼續穿窿
就算俾佢地兩循環都羸晒曼聯
都唔似可以衛冕英超

另一方面,費度於利記年代已同侯利亞有牙齒印
而家於維拉自然難以安享晚年
麥基哥亦已經同維拉扯上關係
不過以費度尋晚既表現
要搵過另一間球會落腳依然唔難

4)韋根對紐卡素
紐卡素尋晚得以止血
關鍵係令韋根唔可以好似平時咁搓得咁輕鬆

韋根雖然以控球在腳為主
不過佢地唔係兵工廠同埋巴塞嗰皮
中後場球員既波底其實平平無奇
紐記於前場已經開始俾壓力
韋根自然冇踢得咁算

當然紐記比韋根更冇運
否則可以羸得仲輕鬆

紐記焗靠艾美奧比擔正
不過佢始終唔係卡路爾嗰皮
所以柏度都用左盧雲卡蘭斯分擔佢部份工作
由於卡路爾仲要缺陣兩星期
下場針對韋斯咸略嫌唔夠速度既防線
柏度應該先用幾隻快馬放乾對手
老味反而適合於比賽既中後段落場屈機

2011-1-3 (1)

1)
布力般流浪否認接收細哨既傳聞
另一方面,佢地可能以200萬鎊既價錢搵禾諾克回巢

2)
無望轉戰英超既細哨依然唔憂出路
法林明高繼甘美奧後
聲稱已同佢就個人條件達成協議
似乎佢既轉會關鍵係邊間球會可以同AC米蘭傾掂轉會費

3)
AC米蘭宣佈卡斯辛奴已落實加盟

4)
利物浦被指睇中普雷斯頓19歲北愛中場阿當巴頓
轉會費仲可能高達500萬鎊

5)
拜仁方面透露巴尼斯婉拒佢地既斟酌

6)
柏度暗示有興趣羅致碧咸

7)
國米被指將以先借後買形式收購卡卡
當中半季借用費就可能高達500萬歐元

8)
曼城有望於今個星期內落實以2700萬鎊羅致迪施高
雙方以10萬鎊年薪既條件簽約5年

而佢地同埋熱刺都被指有興趣1月引入雲邦美
不過消息指當時人考慮如果季尾以自由身離隊
可以叫價更高

9)
米堡考慮將仲未續約既韋達出售
佢最有機會以150萬鎊轉投史篤城

10)
雲達不來梅落實引入瑞典箭頭艾迪域

11)
基爾禾以及保頓都希望借用卡路士韋拿
早前有消息指佢最大機會暫戰西甲

另一方面,羅馬被次同伊保爾扯上關係

12)
卡蘭積卡以及波連尼被指成為韋斯咸最新既增兵對象

13)
考慮到阿歷士既出場次數以及表現
車路士方面考慮將佢掛牌出售
但前題係佢可唔可以於月底前復出

14)
由於戰績不濟
水晶宮決定同貝利解約

15)
般尼被指想搵 Big Sam 或者麥基接手

16)
巴黎聖日耳門被指有興趣引入卡馬拉

17)
華倫西亞落賓以600萬歐元引入拉米
不過會先將佢借用返里爾半季

18)
愛華頓以及西布朗成為最新兩間希望借用馬捷達既球會

19)
麥基哥被指成為維拉既新龍門人選

20)
雲歷克由於唔滿意賀芬咸賣走古斯達禾而決定辭職

2011-1-2

1)
哈利列納透露碧咸願意加盟熱刺
消息指佢將以週薪12萬鎊既條件簽約3個月
而佢既加盟就加速賓特尼離隊
傳聞紐卡素係最新一間有興趣接貨既球會

2)
利物浦被傳爭羸皇馬
成功羅致法國20歲防中麥維拉

而梅迪薩卡就再次被指成為鶴臣既新中堅人選
不過鶴臣隨時等唔到佢就已經下台
有消息指只要利記落實到下任領隊
就會宣佈同佢解約
賓尼迪斯,列卡特同埋杜格利殊都被傳可能接手

3)
蒙杜利禾表態唔會於季內離隊
變相否認佢唔會1月轉投國米

4)
消息指阿仙奴早前拒絕富咸對賓特拿既500萬鎊出價
英國傳媒指雲加希望至少收返650萬鎊

另一方面,雲加終於承認艾蒙尼亞可以離隊
消息指佢可能重返西甲
加盟馬拉加或者馬體會

5)
維拉被指希望借用艾迪巴約
而古辛就被外借去侯城1個月

6)
活基治拒絕以借用形式回歸列斯
消息指佢寧願轉投狼隊或者韋斯咸

7)
由於費sir希望馬捷達更加適應英超節奏
所以改變初衷只考慮將佢借俾英超球會
當中維拉以及韋根都準備接貨

8)
曼城被指打算出價1800萬鎊收購盧卡古
而消息指迪施高要求17萬鎊週薪

9)
韋斯咸希望向曼城借人
人選就會係胡禮菲臘斯以及布歷治既其中一人
因為英超定明每間球會只可向友會借用1名球員

10)
羅比堅尼被指成為伯明翰600萬鎊既新箭頭人選
不過前題係佢要肯減人工
而佢地亦被指同車路士以及韋斯咸爭奪保夫萊特

p.s.:
1)
陳偉豪同埋翟廷峰被傳以7位數字上山
有冇咁好價呀?

2)
R.I.P.華叔......

2011-1-1

近兩日既部份新聞......

1)
鶴臣表態唔會辭職
佢亦否認賣走艾加既傳聞

另一方面,雖然鶴臣賴死唔走
不過佢前兩日批評球迷唔撐佢就得罪唔少利迷
利記高層被傳再次考慮踢走佢
英國傳媒更指佢得返兩星期時間改善戰績去令老細改變主意

而利物浦近日再有傳聞增兵對象
當中包括加雷,施巴斯坦拿臣,史杜歷治以及水晶宮箭頭W.Zaha

2)
龍格堡落實以自由身加盟些路迪

3)
車路士可能將卡古達外借去馬賽
而軒迪克透過經理人否認重返車仔執教

另一方面,車仔日前出價1750萬鎊收購大衛雷斯
但賓菲加就企硬2600萬鎊先肯放人

4)
熱刺被傳打算借用碧咸

5)
尼索比亞仲未同韋根達成續約協議
傳聞利物浦,曼聯,阿仙奴以及紐卡素都打佢主意

6)
拉素打算透過借兵增強實力
人選包括文仙尼以及馬捷達

而佢地表明唔會放走拉度
巴塞,車路士以及曼城都被指打佢主意

7)
希古恩將入廠開刀治療背傷
消息指佢將要抖多3個月

另一方面,皇馬被指想用加高作為交易籌碼
向小保加收購18歲射手沙治奧阿拿祖

8)
紐卡素被指睇中列斯小將 M.Gradel
這名23歲新晉科特迪瓦國腳可以踢兩翼或者第二前鋒
不過列斯方面已經表明唔會放人

另一方面,消息指紐記將於短期內開價買斷賓艾化
似係趁佢長期養傷而趁低吸納

9)
曼城被指打算以700萬鎊向波爾多收購迪亞華

10)
韋斯咸方面聲稱大量增兵
人數仲可能多達15人

消息指人選包括羅比堅尼同埋奧雲
狼隊以及紐卡素亦被指打前者主意
不過槌仔幫已經就個人條件同佢傾掂數

薜維爾就率先落實以借用形式加盟

另一方面,比哈美就以先借後買既形式加盟羅馬

11)
曼聯準備接收狄亞拉
佢地亦被指睇中基拿甸奴
仲可能肯用馬捷達作為交易條件

另一方面,費sir唔滿意佢嗰仔俾普雷斯頓炒左
而收回3名外借俾佢地既年青球員

12)
保羅達施華好可能以150萬鎊
加盟墨西哥球會 Cruz Azul

13)
西班牙法院裁定球員工會唔可以罷踢1月2號既比賽

14)
A.盧比斯以自由身加盟韋根

15)
雲加準備收回艾朗藍森既同時
就準備外借卡路士韋拿
當中薩拉戈薩以及華倫西亞都對佢好有興趣

而早前威脅離隊既賓特拿就改變初衷
表示唔會以借用形式加盟拜仁或者祖雲達斯

另一方面,雲佩斯忽然同祖雲達斯扯上關係

16)
侯利亞透露羅致G.Fofana遇到阻滯

17)
史篤城宣佈放棄古莊臣
布力般流浪被傳打算接收佢

18)
艾耶拉宣佈掛靴

19)
保夫萊特被指成為富咸200萬鎊既新箭頭人選

20)
禾夫斯堡打算收購古蘭爾去取代迪施高

21)
尼斯希望借用蒙桑

p.s.:
1)
今期足球週刊有2010年各方面既回顧
好值得大家買返本珍藏

而向來幾'粗製濫造'既10蚊雞本地波書
雖然今期水準依舊唔見突出
不過就介紹本地紐記球迷會

2)
前利記射手卡馬拉出任畿內亞體育部長
又一個退休從政既例子

3)
馬來西亞歷史性羸得東南亞錦標賽
政府將31/12定為公眾假期
點解本地政府唔效法下?

4)
去唔到大陸都唔緊要
14:55都可以睇省港盃直播