2011-3-13

1)
利物浦被指已同雷恩新星 S.Marveaux 簽署加盟草約
佢將會於季尾以自由身加盟
24歲既佢多數踢左翼
亦可串演進攻中場

2)
由於漢堡尋晚大敗俾拜仁0:6
原本宣佈季尾離隊既教練華亞俾球隊提前開除

3)
英國傳媒指曼聯輸俾利物浦後
朗尼曾經同費sir發生口角

4)
曼城再次被指準備同車路士爭奪卡卡
而前者亦同卡雲尼扯上關係

5)
由於雲達沙重申唔會改善季尾掛靴既決定
意大利傳媒指費sir可能再打保方既主意

6)
朗尼性醜聞既女主角珍尼又有新獵物
今次爆鑊既係魯迪維爾

7)
賓特拿被指成為多間德甲球會既增兵對象
當中包括拜仁,多蒙特以及史浩克04

8)
巴塞再次同法比加斯扯上關係
而一旦收購失敗
報導指佢地將會利用資金改為收購尼爾馬或者柏圖

9)
報導指碧咸想返英超掛靴

10)
李察鄧尼以及占士哥連斯於球隊集體度假期間於住宿酒店搞事
佢兩個事後公開道歉

11)
希臘左閘查維拿斯無心插柳下破左德甲最遠入波紀錄
佢既73米長傳彈地反而笠死紐亞

p.s.:
曼聯羸兵工廠
費sir忽然將3個後衛推上中場
絕對估佢唔到

達施華兄弟踢翼效果唔錯
可能同佢兩個助攻意欲強有關
而奧沙以前亦曾經踢過防中
算係重彈舊調
佢地3個加埋吉遜有足夠截擊力對付兵工廠既半力中場

韋舒亞依然有水準演出
不過真係獨力難支
丹尼臣廢既程度
更甚利記既盧卡斯利華
而桑治雖然唔算好sharp
但迪亞比今季既表現亦俾佢比下去
可想而知佢要超越韋拉既目標應該好難實現

不過曼聯羸波既最大功臣絕對係雲達沙
佢先後5次化解兵工廠有威脅既攻門
睇表現真係唔似4張嘢
曼聯一眾後衛同埋費sir應該好唔捨得佢

對家既艾蒙尼亞其實都有好表現
當迪佐羅提早收咧
兵工廠而家陷入中堅荒
佢可唔可以持續打爭氣波
可能成為兵工廠爭英超既關鍵

2011-3-12 (2)

近兩日既部份新聞......

1)
謝拉特接受手術以根治腹股溝傷患
消息指佢將會缺陣4星期

2)
西班牙傳媒指法比安奴將會轉投聖保羅
轉會費為1300萬歐元

3)
利物浦被指準備同阿仙奴爭奪本田圭佑
消息指佢既身價約值1000萬歐元
利記亦有興趣從兵工廠接收唔肯續約既基治

4)
上個月於土耳其舉行既兩場國際友誼賽
玻利維亞對拉脫維亞以及愛沙尼亞對保加利亞
都被指有球證幫手做假
兩場比賽7個入波全部都係12碼
當中部份判決仲好離譜
國際足協已經展開調查

5)
德國傳媒指史浩克04準備搵列哈格接手

6)
皇馬被指可能以賤價2500萬歐元將卡卡賣返俾AC米蘭
若果佢轉投財力比較好既車路士
轉會費就應該唔止咁既數

另一方面,英國傳媒再次指摩連奴將於下季回歸英超

7)
馬拉加方面否認柏歷堅尼既報導

8)
愛華頓方面表示
一旦曼聯對莫耶斯展開斟酌
佢地會俾佢自己選擇

9)
由於阿仙奴只係得返艾蒙尼亞一個龍門
連而家外借侯城既文路尼都要養傷6星期
雲加希望英格蘭足總酌情俾佢地借用1名龍門應急
亦有報導指佢考慮搵列文出山

10)
巴里奧斯被指成為辛尼迪既新箭頭人選

11)
加拿斯表態希望同熱刺續約

西班牙傳媒指馬體會準備以4000萬鎊
一併將阿古路以及科蘭出售
而熱刺就被指係佢地既兜售對象

另一方面,祖雲達斯被傳有興趣收購艾朗連儂

12)
基斯甸艾歷臣表態就算將來離開阿積士
都只會考慮轉投巴塞

13)
車路士被指有興趣引入簡利拿斯

14)
雖然接連俾人恐嚇
連儂依然唔準備離開些路迪

15)
紐卡素被傳打算季尾從西甲搵新血
人選包括荷西卡里祖同埋柏度李安

而柏度就暗示可能買斷艾利蘭
佢亦表示唔預期賓艾化可以於季內復出

16)
西維爾被指準備向里昂挖角
既搵佩爾接手執教
亦想羅致佢地既箭頭利辛度盧比斯

17)
曼聯被指打算於季尾收購多名英格蘭球員
當中包括軒達臣,施亞蘭奇勒,艾殊利楊格以及魯迪維爾
而湯卡華利以及韋碧克就好可能會被回收

另一方面,佢地被傳準備同曼城爭奪杜格拉斯哥斯達

18)
蘇維被指成為祖雲達斯既新箭頭人選
不過佢既經理人透露佢傾向轉戰英超

19)
哥連泰斯以及法林明高都被指有興趣接收阿祖安奴
而佢已經表態唔會轉戰英超

20)
雲高爾表示離開拜仁後
將會休息1年充電

21)
戴亞以借用形式重返葉士域治

22)
柏巴斯特普路斯被指將會轉戰德甲
漢堡同埋雲達不來梅都被指打算接貨

23)
富咸被傳將於季尾向基達菲一併收購戴歷保定以及米古

24)
費倫天拿被指有多人可能離隊
當中包括蒙杜利禾,阿蒙洛夫以及梅度
前者被指成為AC米蘭既增兵對象
後者就可能轉投羅馬

25)
維也納以及聖保利被指爭奪保拉路斯

26)
杜斯亞接手深圳紅鑽後
被指想引入小野伸二以及稻本潤一

27)
加拉塔沙雷被指有興趣以300萬鎊接收富拿

2011-3-12 (1)

雖然過氣
不過都想講下近日既幾場波……

1) 利物浦對曼聯

唔係馬後炮
愛隊羸波真係意料之內
畢竟史摩寧同埋布朗唔成氣候
前者只要累積多啲經驗同埋改善場外紀律
應該有日會成大器
後者就由始至終都只係A貨版既加利佬

古治雖然當選最佳球員
不過小弟覺得蘇亞雷斯仲sharp過佢
條友踢法幾似泰維斯
入球能力更可能好過佢
只要好好控制球場內既情緒
利迷真係可以從此忘記負心既托利斯
考慮到佢仲未完全適應英超節奏
下季應該先係佢大爆發既時機

另一方面,小弟覺得盧卡斯利華今場都踢得唔錯
甚至比負傷既謝拉特更好
條友今季幾場大戰都有超水準
可惜平均水準始終追唔到馬斯查蘭奴
而家意大利傳媒指拿玻里可能出600萬鎊接貨
杜帥乘機換血既機會都唔低

當然更大機會走既一定係保臣
以佢前晚對布拉加既劣作
佢怕且係利記近年最屎既國腳級次貨

2) 巴塞對阿仙奴

今場原來係歐聯有紀錄以來首場零埋門既比賽
怕且亦係兵工廠創會以來既第一次
搞到咁樣衰同埋輸波既關鍵
始終係雲佩斯兩黃一紅出場

佢既第二張黃牌係略為過嚴
不過球證俾佢既第一張黃牌亦已經放生左佢
事關要人唔要波既報復行為
足以直接見紅

如果有佢
打死都唔信兵工廠餘下三十幾分鐘都會繼續零射門
而如果有佢
最後階段有機會近距離攻門既就唔會係中堅賓
出局既隨時係表現比較好既巴塞

當然誠如哥迪奧拿事後既風涼話
輸波出局最應該自我檢討
法比加斯同埋雲佩斯兩個負傷上陣既大佬越幫越忙
真係希望越大,失望越大

而路斯基已經係雞肋中既雞肋
後備席上無論進攻,防守抑或駁腳方面都有比佢好既選擇
雲加都要再次搵佢踢正選
又係費解

不過教授更失敗既一著
怕且都係又買錯中堅
身價1000萬歐元既哥斯尼又衰一鑊

3) 熱刺對AC米蘭

哈利列納把口話會大踢進攻足球
落場後就緊係睬你都傻
紅黑兵團同上場相比
優勢明顯得多

不過最終都要出局
對手守得好固然係原因
不過關鍵怕且係本身冇左恩沙基

伊巴出左名歐聯隱形
柏圖又掛住瘟太子女而越來越廢
羅賓奴就從來都只係踢花巧足球既馬騮
結果有幾多攻勢都係徒然

p.s.:
兵工廠由叫四飛
搞到而家成為1.61賠既四大皆空熱門
傷痛難免

遇上苦難
只要夠韌
兵工廠同埋日本都會捱得過
God bless Japan!

2011-3-10

近兩日既部份新聞......

1)
繼雲高爾以及華亞後
史浩克04指馬加夫都要季尾走人
不過佢就唔認要落台

另一方面,拜仁被指想搵軒基斯下季接手
不過最終目標係搵路夫於歐國盃後執教

2)
雲加於對巴塞既歐聯賽事兩度同球證頂頸
面臨俾歐洲足協抽後算帳

3)
馬勒當拿被傳可能執教烏克蘭

4)
利物浦再次被傳同祖雲達斯爭奪艾利亞
而消息指拿玻里準備出價600萬鎊收購盧卡斯利華

5)
巴黎聖日早門被指有興趣以400萬鎊接收胡禮菲臘斯

6)
祖安就被指成為拜仁既新中堅人選

7)
布力般流浪被指想羅致杜夫

8)
紐卡素被指希望於季尾引入自由身既泰禾
佢早前表明希望轉戰英超
不過曼城同埋利物浦都對佢虎視眈眈

另外,紐記被指希望同新特蘭爭奪韋碧克之餘
更被傳可能接收俾羅馬解約既阿祖安奴

9)
阿仙奴被指有興趣羅致迪斯甸
而莫耶斯就表態希望同這名踢足每一分鐘聯賽既中堅續約

p.s.:
1)
歐聯8強已知一半
3隊都唔係名牌強隊
意甲已有兩隊收皮
再次反映佢地而家有幾流
抵佢地遲下少個歐聯席位

2)
招積完美掛冠
正!

2011-3-8

近兩日既新聞......

1)
一旦拉爾拿季尾離隊
報導指利物浦就會收購基雲或者比高域替補佢

而杜格利殊亦積極為中後場其他位置增兵
人選包括梅沙治奧,加利卡希爾以及加高

2)
雲高爾以及華亞將於季尾離隊

3)
雲加被指準備用丹尼臣加現金
向祖雲達斯收購美路

而教授亦希望引入柏度李安
西班牙傳媒早前指佢下季將被皇馬外借

4)
加里安尼透露卡卡既高薪成為佢回歸AC米蘭既障礙

5)
波歷克早前唔肯出任後備
可能俾利華古遜紀律處分

6)
消息指祖雲達斯球迷希望維埃里重返球隊執教

7)
杜奧巴被指成為車路士收購柏圖既交易籌碼

8)
迪方尼素以及古辛分別以借用形式加盟般尼同埋侯城

9)
希古恩已經復操

10)
曼聯再次被指將於季尾收購柏斯托尼
收購價高達4000萬歐元

11)
加美路被指成為紐卡素既新箭頭人選
而漢堡被指有興趣接收巴頓

12)
英格蘭足總推出國家球證發展計劃
以改善英超球證既形象

p.s.:
1)
比利訪港
公關公司竟然接連放流料
明明星期日下晝機就話夜機
(累小弟撲個空之餘
仲要飛的返屋企)
而明明住半島就話萬麗海景
傳媒同埋追星族都多得佢地唔少
不過更令人討厭既竟然係球王既隨身保鑣盡責到過左火位

講返 Cosmos 宣傳單嘢
吹風會除左公布 Umbro 贊助佢地波衫外
其餘時間都只係球王既吹水時間
講真對隊波既宣傳作用好有限

不過話說回頭
佢地訪港應該有著數
因為今日美國總商會嗰餐飯局冇十圍都有八圍
每圍又怕且都賣到幾皮嘢
扣除成本後都應該好可味

2)
早幾日有fd問超點解搵唔到新一期既Keymansoho
實情係佢地宣佈暫時停刊

3)
讀者'路斯基'話佢近幾個月都留唔到言
有冇高人可以指點原因係咩?

4)
祝兵迷今晚好運
雖然小弟比較鍾意巴塞......

2011-3-6

1)
歐洲足協董事會同意出年既歐國盃決賽週
用埋第5球證之餘
仲會透過科技去肯定嗰波係唔係過左白界

2)
拉爾拿表示唔保證下季留隊
暗示如果利記再次無緣歐聯
佢就會離隊他投

3)
基迪拉被指成為拜仁既增兵對象

4)
由於比比仲未落實同皇馬續約
國米再次被指乘機搶人

而馬干再次同皇馬扯上關係
不過佢已經否認有關報導

5)
拿玻里被傳有多名增兵對象
當中包括胡仙歷,蘇達杜以及諾斯連奴

6)
紐卡素被指睇中燕豪芬既J.朗斯
這名新晉荷蘭國腳可以踢翼鋒同埋箭頭

而紐記擱置同巴頓傾續約
維拉隨即再次被指打算搶人

7)
班拿約將於下月復出

8)
梅迪薩卡被指成為西維爾既新中堅人選

9)
侯利亞被指睇中美納特
這名布里斯托城24歲射手幾日前先同紐記扯上關係

10)
幾日前先講過曼城想收購艾沙姆
而家利物浦,阿仙奴同埋熱刺都被指希望爭埋一份

11)
史篤城被指想搵馬華龍京治於季尾以自由身過檔

12)
報導指辛尼特睇中馬治奧以及基斯薜圖
而後者既經理人已否認有關報導

13)
曼聯被指希望收購柏斯托尼或者迪羅斯
以補充中場實力

14)
禾簡被指成為熱刺既新龍門人選
不過拉素,馬賽以及安德烈治都對這名30歲龍門好有興趣

p.s.:
尋晚兵工廠冇運失分
利記今晚為己為人
真係要ko曼聯

2011-3-5

1)
由於基治仲未肯同阿仙奴續約
雲加可能被迫季尾賣走佢
而教授被指考慮以借用形式引入簡拿利斯

另外,艾利蘭透露曼城於1月拒絕兵工廠羅致基雲既要求

2)
雲加同高路托尼聯絡後
透露佢應該係因為誤服老婆既減肥藥而藥檢肥佬

3)
消息指油王想搵格蘭回巢出任總監
不過當時人希望帶領韋斯咸打護級戰而拒絕

而車仔被指考慮從多蒙特一併收購蘇保迪以及巴里奧斯
而佢地亦被指想搵史尼達取代林伯特

另一方面,肥安再次被指下季過檔羅馬

4)
消息指烏甸尼斯準備出售阿歷士山齊士以及恩拿既其中一人

5)
曼聯同費查續約到2015年

6)
夏薩特落實同里爾續約至2015年
粉碎佢轉戰英超既傳聞

7)
列卡特亦被指可能接手士砵亭

p.s.:
1)
原來年幾前既卡路爾
俾紐記賤賣100萬鎊都冇人要......

2)
聽朝11點於斧山道運動場
有學界足球決賽

2011-3-4

近兩日既部份新聞......

1)
高路托尼於對曼聯賽後既毒品測試既首個樣本呈陽性反應
曼城已經即時將佢內部停賽

2)
利物浦被指有興趣收購迪亞高
艾加或者史基泰爾仲可能成為交易既一部份

3)
紐卡素被指再次斟酌施巴斯坦拿臣
不過維拉以及布力般流浪同樣對佢虎視眈眈

另外,柏度被指視布里斯托城既美納特為新箭頭人選

另一方面,荷西安歷基繼續同AC米蘭扯上關係
報導指懷斯就係紐記既替補選擇

4)
魯賓卡山被傳打算羅致保方以及卡卡
而另一俄超球會安卡亦被指想以天價合約利誘加度素
不過這名意大利防中已經表明唔希望離隊

5)
香川真司暫定4月中復出

6)
費sir於紅藍大戰後批評艾堅遜
可能俾英格蘭足總抽後算帳

另一方面,佢決定同卡域克續約3年半
粉碎季尾賣走佢既傳聞

7)
尼維特否認接手祖雲達斯
而雲高爾就被傳下季過檔祖記

8)
曼聯被指願意俾3400萬鎊贖身費羅致洛蘭迪

9)
維拉被指打算季尾踢走多名高薪球員
當中包括費度,皮利斯同埋艾利蘭

而侯利亞被指打算引入保羅羅賓遜去取代前者
不過熱刺亦想翩兜佢
事關高美斯可能重返巴甲發展

10)
白賴仁笠臣以及高爾將於4月9號訪港
出席聯合國兒童基金會以及曼聯慈善基金會既慈善晚宴

11)
阿仙奴近幾個月一直同羅連安特射手加美路扯上關係
不過當時人暗示希望轉投祖雲達斯

12)
加利列納透露曾經拒絕艾哈里既斟酌

p.s.:
1)
招積公布作客馬爾代夫既奧運隊名單
人腳同主場羸4:0完全一樣

另外,佢既細仔尋日於學界比賽打倒掛搞到左手手腕骨骨折
要養傷4星期
祝佢嗰仔早日康復

2)
講下3代森巴球王既消息.....

大哨既告別賽將於7/6舉行
對手係羅馬尼亞

而薜高就可能出山接手士砵亭

另外,比利就會於星期日至星期三
聯同宇宙隊幾名高層訪港
星期一會於半島酒店開吹風會
星期二就會去港會場教青少年踢波
期間仲會出席商業場合同埋演講
佢地到訪期間就會住灣仔既萬麗海景酒店
不過而家未知簡東拿以及鐘斯會唔會同行
因為本港傳媒有唔同既版本

2011-3-2

近日既部份新聞......

1)
雲佩斯要養傷6星期

2)
皇馬再次被指準備踢走卡卡
消息指佢地希望可以至少收返4500萬歐元
而簡拿利斯,柏度李安,杜迪克,加高,加雷以及迪亞拉都應該冇得留低
不過前兩者似乎只會被外借

3)
杜格利殊被指準備為後防增兵
當中哥本哈根既瑞典左閘O.Wendt以及哥魯卡都係佢既考慮人選

4)
AC米蘭,曼城以及熱刺都被指打算引入沙高

5)
里昂成為最新一間同甘素扯上關係既球會

6)
柏度被指已開始斟酌謝雲奴
而紐卡素被亦指有興趣接收賓特拿

另一方面,列斯中場巴特利莊臣季尾約滿
紐記,保頓同埋史篤城都被指想佢以自由身過檔

7)
國米落實從飛燕諾以300萬歐元引入卡斯達尼奧
而史尼達被指成為車路士既增兵對象

8)
哥斯美落實接手巴勒莫
雙方簽約至季尾

9)
史杜烈治放風希望可以正式轉投保頓

10)
史浩克04方面聲稱曼聯打算引入紐亞
而曼聯落實以60萬歐元從安德烈治截劫比利時16歲右翼祖魯沙

11)
曼城上個球季勁蝕1億2000萬鎊
不過佢地依然準備繼續掃貨
最新版本係佢地有興趣羅致艾沙姆

p.s.:
車仔為人為己ko曼聯
英超緊湊返好多
不過關鍵都係雲加搞唔搞得掂班小兵既心理病

另一方面,維迪又見紅
加埋里奧費甸南仲未復出
蘇亞雷斯星期日隨時好free

2011-2-28

近日部份新聞......

1)
利物浦方面否認現階段為杜格利殊續約兩年既報導
而安祖卡路爾現正積極減肥以提升狀態

2)
柏天尼宣佈重辦象徵歐洲足球先生既歐洲金球獎

3)
巴勒莫尋晚主場俾烏甸尼斯大炒7:0
消息指迪里奧羅斯將被革職
柏巴普路同埋哥斯美就係接手大熱

4)
前熱刺以及狼隊中堅迪恩李察士因病英年早逝
終年只係36歲

5)
俄超球會塔利克繼早前搵古烈治教波後
再打算以800萬美元年薪利誘大哨出山
而另有俄甲球會打算出價1000萬歐元收購希比

6)
由於阿祖安奴甩底唔去做體測
忍無可忍既羅馬證實準備同佢解約
由於有巴甲球會打佢主意
所以羅馬方面希望唔賠錢俾佢

7)
曼聯被指打算出價8000萬鎊一併收購格夫里巴利以及摩迪歷

8)
近日重返巴甲發展既文仙尼涉嫌強姦一名飲醉酒既少女

9)
消息指如果繼續因為托利斯既加盟而要轉任後備
杜奧巴將會提出離隊

而油王再次被指考慮踢走陣中部份老將
泰利同埋林伯特都可能冇得留低

另一方面,艾殊利高爾因為於訓練場玩氣槍令1名年青球員受傷
而面臨俾球會罰佢兩個星期波糧
而當地警方準備介入調查

10)
消息指阿仙奴即將同包括拿斯尼既6名球員續約
不過佢既經理人就否認這名法國中場已經同球會達成續約協議

而加拉塔沙雷就被傳有興趣接收艾沙維
加上賓特拿可能離隊
雲加就被傳睇中拉脫維亞新星 A.Rudnevs
現年23歲既佢可以踢箭頭同埋右翼

另一方面,列文已報讀教練訓練班
佢早前仲返兵工廠客串幾日龍門教練
不過指導對象只係青年軍

11)
雲達美迪宣佈即時掛靴
而芬寧斯亦將於季尾收山
不過佢會加入球會既管理層

12)
保頓希望向車路士買斷史杜歷治

13)
曼城打算以12萬鎊週薪既條件同尼祖迪莊續約

14)
傑志宣佈26/5同維拉利爾踢表演賽

15)
第一場甲組波就一入波一助攻
令流浪客既年青龍門曾文輝響晒朵
消息指足總打算曾有noise而搞返個鬥腳力既比賽

16)
紐卡素近日除左再次同奇雲杜里扯上關係外
亦被傳有興趣引入哥治以及奧丹維治

p.s.:
1)
兵工廠輸得意外兼樣衰
至怕球隊因為今場波而信心崩潰

但今場波踢得最差既3個位:
龍門,中堅同埋防中
正係雲加近年最應該買而又偏偏唔多買
就算買左都買唔岩既位置
唔知教授可會醒覺做嘢
不過施捷斯尼總算係有潛質既新人
仲值得繼續俾機會

另一方面,近兩個星期日既路斯基已經越來越似雞肋
如果兵工廠要換血
佢應該冇得留低

2)
有限度服務中
請見諒!

2011-2-24

由於小弟於上星期六再度入廠開刀
現時休養中
所以近期只能提供有限度服務

日前見到個關於英超波士文球員既list
唔計肯定掛靴既雲達沙以及韋拉
當中其實有唔少好嘢以及有名氣既老嘢
大家不妨為自己既愛隊考慮下:

夏格維斯
奧雲
基傑亞高斯
艾蒙尼亞
保辛華
希拿里奧
加拿斯
古迪仙尼
厄遜
格連
史碧達
戴亞
蘇甘保
小路亞路亞
艾文達
史甸臣
高漢
馬華路禾尼
沙加度
占邦達
卡維
費度
皮利斯
李奧曲加
大衛鐘斯
夏利文
京遜
謝拉
卡馬拉
彭素爾
卡達維
麥法頓
施巴斯坦拿臣

2011-2-18 (2)

近兩日既新聞……

1)
杜格利殊被指已有多名增兵人選
當中包括艾利亞,艾殊利楊格,拿維斯以及加利卡希爾
而如果收購後者失敗
杜帥就可能退而求其次引入羅渣莊臣

2)
傳聞沙治奧拉莫斯同摩連奴不和
皇馬可能用佢同AC米蘭交換柏圖

3)
簡東拿被指向費sir推薦華布拿
當時人暗示為左更好既發展而離開馬賽

4)
哥連泰斯被指希望借用卡卡

5)
兩間米蘭球會都被指睇中甘素
佢就暗示下季加盟AC米蘭

6)
消息指熱刺同葉士域治已就域咸既轉會費達成協議
這名17歲新星既身價高達1000萬鎊
佢地亦被指準備同兩個米蘭球會爭奪法比安奴

另一方面,哥魯卡既傷勢冇預期咁差
不過都要休息1個月
而活基治又受腹股溝傷患而打柴
暫時未知又要抖幾耐

7)
切爾達既曉高摩路被指成為車路士既新右閘人選

8)
葉士域治打算向維拉借用比耶

9)
奧雲再次因為腹股溝傷患而要休息
不過應該可以趕及下星期對馬賽既歐聯賽事候命
而法國傳媒指艾夫蘭已同意同曼聯續約到2015年

10)
胡禮菲臘斯暗示季尾離隊

11)
新特蘭被指打算季尾收購卡頓高爾

12)
阿古蘭尼透露仲未決定會唔會轉會祖雲達斯
消息祖記指一旦同佢傾唔掂數
就可能改打派路既主意

另一方面,祖記被指有興趣收購法芬
不過就要先爭羸幾間西甲球會

13)
蒙杜利禾再次表示無意離開費倫天拿

14)
紐卡素再次同M.Gradel扯上關係
佢早前決定季尾先同列斯傾續約
英國傳媒指萬 一列斯重返英超失敗
佢就會提出離隊

另外,荷西安歷基暗示可能為左參加歐洲賽而要求離隊
不過佢對利物浦斟酌佢既報導感到震驚

15)
大哨希望巴西足總為佢搞場告別賽
而對手就係當今最強既西班牙

16)
歷格斯因為阿斯里斯腱受創而要養傷半年

p.s.:
利記兩位前老闆真係麻煩
睇見佢地既新聞已經本能反應skip晒

2011-2-18 (1)

雖然遲左
不過都想講下兵工廠食’塞’

事後孔明
各大傳媒都話巴塞輸在哥迪奧拿忽然保守
又話雲加羸在敵退我進

不過其實誠如教授所講換人只係賭博
下場隨時係輸0:2,甚至0:3
不過既然要焗攻
就緊係趁主場而唔係作客魯營

另一方面,睇住韋舒亞由下半場開始越踢越free
哥迪奧拿只有兩個option
一係靠幾個技術型中場以效率彌補不足
二係換個防中入場幫手
考慮到幾個技術型中場本身唔夠韋舒亞咁好活力
仲已經搏左成粒鐘
所以換入基達既決定好正路
當然後果係點已係後話

換走韋拿當然比換走恩尼斯達上算
因為後者幫手控球既能力始終比較強
而睇巴塞被迫和後隨即反撲
就知佢都唔算太保守

小弟始終覺得巴塞輸波其實另有兩個關鍵
一係佢地入唔到燕梳球
二係域陀華迪斯送禮
其實兵工廠變陣後唔算佔到好大甜頭
多得佢又犯低級錯誤而打起對手士氣
仲搞到球隊要再次大軍壓上而埋下輸突擊既伏線

另一方面,巴塞下場羸1:0都已經夠入8強
形勢大抵唔見得太差

雲加就聲稱下場唔會放棄進攻
不過大抵只係龜縮後再反擊
下場對手多返佩奧爾
但又有碧基停賽
雲佩斯等人仍然有一定機會偷雞

雲加最擔心既怕且係防線
中堅位置已經長期不穩
桑治又明顯唔夠級數
佢今場仲因為早段既黃牌而患得患失
絕對係球隊隱憂
球隊如果入到8強
最大功臣話唔定係施捷斯尼
隨時又係一個時勢出英雄既例子

p.s.:
見到桑治同埋迪亞比
好多時都有恨鐵不成鋼既感覺
費文尼當年成才後因為錢而出走米蘭
果然係3輸局面

睇埋佢前晚對哥魯卡要人唔要波既雙腳離隊飛剷
打死都唔信雲加以前咁教佢踢防中
大抵佢已經學晒加度素啲衰嘢
又一個近墨者黑既例子

2011-2-16

1)
利物浦成為最新一間同謝雲奴扯上關係既球會
消息指佢而家既身價高達1500萬歐元
不過佢仲有年半就約滿
或者有減價空間

另外,利記亦被指睇中索察既23歲法國中場M.馬田
另一方面,G.Wijnaldum 亦係利記既增兵對象
不過車路士以及皇馬都對這名20歲飛燕諾翼鋒好有興趣

2)
巴塞被指打算收購伊拉奧拿
以取代仲未續約既丹尼爾艾維斯
而拜仁就被傳睇中C.艾迪安奴

3)
曼城被指有興趣引入卡雲尼以及柏斯托尼

4)
羅渣莊臣被指成為熱刺既新中堅人選

5)
艾利亞迪里透露唔滿意中東球會Al-Ain唔夠專業而拒絕加盟

6)
曼聯被指想收購馬里奧葛斯
以作為史高斯既接班人
消息指佢既身價可能高達1200萬鎊

而迪羅斯亦係費sir既另一考慮人選

7)
皇馬被指睇中費蘭尼
莫財既愛華頓可能要被迫放人

p.s.:
1)
尋晚熱刺作客聖西路
羸波功臣首推高美斯
條友似乎繼承左占士於英超既神經刀寶座

2)
雖然比較鍾意巴塞
不過都希望兵工廠唔好於主場失威

2011-2-15

近幾日既部份新聞……

1)
朗拿度宣佈掛靴
而卡路士早前亦同哥連泰斯解約
佢已同俄羅斯球會安卡簽約兩年半

2)
歐聯戰場重開
雲加將拿斯尼列入對巴塞既大軍名單
而巴塞就肯定有佩奧爾缺陣

另一方面,格里夫巴利亦肯定無份對AC米蘭
熱刺唯有寄望卡蘭積卡keep住有士哥

3)
卡塔爾皇室旗下既財團仲未同曼聯傾掂數
有報導指格拉沙家族其實想殺價18億鎊
甚至20億鎊

4)
熱刺被指打算於暑假收購碧咸
又或者等佢同洛杉磯銀河約滿後以自由身加盟

而由於中堅位置太多玻璃腳
佢地被指考慮於季尾從財困既愛華頓收購積基卡
而卡積亞亦係佢地既另一考慮人選
不過利物浦亦有興趣從禾夫斯堡接貨

5)
雲達韋爾再同多間大球會扯上關係
當中包括曼聯以及車路士

6)
鬧龍門荒既黑池曾經打算向曼城借用基雲
不過最終未能成事

7)
巴塞被指打算於暑假引入新血
傳聞人選包括尼爾馬,甘素以及阿歷士山齊士

8)
奧沙辛拿宣佈同甘馬曹解約
球隊將由文迪利巴接手

9)
些路迪既22歲以色列防中 E.Izaguirre
被指成為曼聯既新防中人選
而費sir被指考慮從里昂引入洛里斯

另一方面,貝碧托夫既新約週薪傳聞高達17萬5000鎊
僅次於朗尼

10)
雖然馬些路於日前對愛斯賓奴一役回勇
但摩連奴依然被指打算引入泰禾

而串王亦被指再打謝拉特既主意
不過由於當時人離隊機會唔大
報導指迪羅斯將成佢既另一目標

另一方面,皇馬被指打算放棄多達8名球員
當中包括加高以及賓施馬
而佩雷斯被指將親自去英國斟酌法比加斯以及格里夫巴利
不過阿仙奴已將前者定價8000萬鎊

11)
格連莊臣再同祖雲達斯扯上關係
報導指利物浦一旦賣走佢
將會從紐卡素收購荷西安歷基作為替補

12)
加拉塔沙雷被傳睇中柏杜夫

13)
馬田斯表態希望伯明翰買斷佢

14)
紐卡素同多名射手扯上關係
當中包括謝雲奴,域咸以及奇雲杜里
而佢地亦被指有興趣同新特蘭爭奪奧奴夏

p.s.:
小弟愚見
近十幾年球壇既真正巨星屈指可數
大抵只得大細哨,施丹,美斯
大哨當年勁到真係成個外星人咁
最終追唔上比利同埋馬勒當拿
既要怨個天唔錫住佢個玻璃膝頭
更要怪自己爛蒲爛飲爛滾

細哨晚年既身體質素雖然好過大哨
仲有對更出神入化既魔術腳
不過佢基本上行緊師兄舊路
回塘既機會遠大於回勇

想睇球王演出
此時此刻只得美斯
唯望屠夫對手對佢腳下留情之餘
亦寄望有超新星激發佢再升呢

2011-2-13

朗肥忽然hea碧上身
曼城輸波其實非戰之罪

想講既其實係文仙尼既排陣同埋調動
為左睇住蘭尼
而搵薩巴尼達客串左閘
搞到要高拉洛夫被迫踢前一格
倒頭來兩個既發揮都係水準以下
蘭尼亦如常入波
失敗!

而占士米拿留守中路助攻助守
但幾近隱形
又係失敗!

迪施高入場後
最初估佢既作用應該係牽制曼聯中路防線
以解放泰維斯出任另一個自由人
點知波斯尼亞人最多時間出現既竟然係曼聯既禁區頂
如其靠佢搏腳做二傳
倒不如直接搵佢去強攻
失敗中既失敗!

既然有齊迪施高,泰維斯同埋大衛施華咁堅既兵器
文仙尼又咁驚輸而要出齊3個防中
米卡李察士同埋高拉洛夫又出名出擊力強
4-3-2-1陣式真係fit晒曼城
文仙尼咁都唔肯行返國米條舊路
真係好懷疑佢個腦係用來裝草
一個只係識chok樣既領隊都唔知有咩用

2011-2-12

近兩日既新聞......

1)
英國傳媒指卡塔爾皇室所領導既財團即將入主曼聯
消息指作價高達16億鎊

2)
西布朗最終決定搵鶴臣接手
雙方簽約至下季尾

3)
收購蘇亞雷斯後
利物浦被指有興趣從阿積士引入另一球星基斯甸艾歷臣
不過被形容為’新伯金’以及’新勞特立’既佢已經表明唔會離隊

另一方面,利記亦被傳考慮接收保贊

4)
羅比堅尼因為脛骨傷患而要休息6星期

5)
布力般流浪方面承認考慮於1月引入法比安奴
不過最終因為想搵一個比較年青既射手而放棄收購

6)
AC米蘭只準備同派路續約1年
兼要佢減薪5成
令佢離隊幾成定局
曼城,華倫西亞以及馬體會都有興趣接貨
當中前者仲願意以430萬鎊年薪利誘佢過檔

不過當時人又要養傷6星期
未知會唔會嚇怕幾個準買家

7)
消息指車路士仍然有興趣於季尾收購尼爾馬
而伊雲洛域已落實續約到2016年

8)
告魯夫回歸阿積士
加入佢地既技術改進小組

9)
蘭加日前因為未有接受隊醫檢查就離隊
可能俾英格蘭足總禁止佢於對布力般流浪既聯賽上陣

而有傳英格蘭足總打算訂立新例
但凡有球員聲稱有傷病而唔肯踢太公波
都唔可以於之後5日內既球會賽事上陣

10)
英國地區球會 Forest Green Rovers 既班主
為左球員以及球迷既健康著想
禁止球會餐廳再出售紅肉

11)
愛華頓成為最新一間同艾文達扯上關係既球會

2011-2-10

好耐冇講過新聞
近兩日部份新聞包括:

1)
曉頓被傳接手西布朗

2)
曼聯近日再次同拉爾拿以及紐亞扯上關係
前者被指如果利記下季又冇份歐聯
佢就一定會要求離隊
而德國傳媒指後者既合約訂明
只要有球會開價1280萬鎊
史浩克04就一定要放人

另外,為左解決防中唔夠腳既問題
曼聯亦被指打算引入馬斯查蘭奴

另一方面,查伯東尼提議吉遜轉會以尋求更多出場機會
佢隨即被傳暑假加盟維拉

3)
保贊被指成為拿玻里既增兵對象
消息指落實續約到下季尾既哥迪奧拿如果繼續唔重用佢
佢會認真考慮離隊

4)
柏度早前透露將羅致自由身箭頭
最終搵左連英冠都踢唔掂既古基
不過佢既頂上功夫確實係陣中前線缺乏
總比其餘兩個傳聞人選艾殊頓以及艾利亞迪里好

另外,由於艾文達同保頓既合約將於季尾完結
紐記被傳可能季尾打佢主意
只簽約到季尾既古基明顯只係臨時工

另一方面,西班牙傳媒指華倫西亞有興趣帶荷西安歷基返西甲

5)
油王被指再有新既收購目標
當中包括費蘭尼以及法比加斯

馬里奧高美斯就透露車仔曾於1月向拜仁出價3500萬鎊收購佢
而羅馬就被傳季尾想搵肥安過檔
另一方面,施哥夫亦可能跟佢去意甲搵食
不過目的地就係祖雲達斯

6)
皇馬被指已同曼城達成協議
將於季尾以1190萬鎊買斷艾迪巴約
而一旦他日佢幫皇馬羸到歐聯
皇馬將要再俾多170萬鎊

另外,皇馬亦被指有興趣從拜仁收購比連奴
因為比比仲未同佢地達成續約
佢近日先後同車路士以及阿仙奴扯上關係

7)
禾夫斯堡被傳睇中施多夫

8)
莫斯科斯巴達被指想搵柏夫奴真高回巢
羅馬亦被指對佢有一定興趣

9)
利物浦被指睇中J.湯馬士
這名前兵工廠青訓產品同西布朗只剩下年半合約
而達寧以及艾殊利楊格就繼續同利記扯上關係

p.s.:
1)
利華蘭尼同巴勒莫提前解約
其實佢比畢特更適合成為南華既 playmaker
羅神如果仲有 budget
真係不妨唸唸佢

2)
尋日因為工作關係而去唔到睇香港對印尼既奧運隊熱身賽
不過對手唔勁都竟然失左4球
真係好失望
好彩對馬爾代夫前總算仲要時間改善

2011-2-8

雖然遲左
但都想講下紅藍大戰

車仔原有既3箭頭陣式
基本概念就係馬路達以及安歷卡於左右二路
為正箭頭杜奧巴輸送彈藥
可惜尋晚見到既3箭頭陣式空有咁既作用
費托身在杜奧巴之後
原意應該係想俾空間前者發揮佢既高速
不過佢唔係踢邊
加上安歷卡仲九唔搭八墮後駁腳
於中路苦無供應既杜奧巴自然動彈不得
費托既去路亦俾佢阻左唔少
結果全場除左俾回勇既加歷查補位硬食佢一嘢
費托其餘時間等同’廢’托

其實費托似係車仔長遠換血而舖路
如果而家硬要加插佢斯於3箭頭陣式
肥安只有兩個選擇:
中路既杜奧巴以及右路既安歷卡
偏偏條友收起最唔應該收起既馬路達

到車仔要焗攻既時候
變陣4-2-4又過唔到將士用命既利記防線
(尋晚除左麥斯洛迪古斯以外
利記個個都有貨交)
當然利記有得羸波
利記上下除左要多謝施治同埋伊雲洛域接連出錯外
亦要慶幸球證睇唔到格連莊臣嗰肘

遠在香港既陳浩然亦同肥安同病相憐
明星老闆先將英超工兵畢特當 playmaker 用
再硬插過氣躁火但而家死晒火既基士文入球隊
好衷唔衰陳浩然又唔識執生
咁耐以來都唔試下搵李海強同埋白鶴夾下佢
基士文唯有繼續適應南華兩翼傳中既踢法
結果冇表現就俾陳教練多次公然抗旨收起佢
完全係一個惡性循環
至怕羅神抽後算帳
他日賜佢有病

p.s.:
1)
由於要爭取時間養病
miss左英超8場41個入波既happy Saturday
更可惜就係睇唔到曼聯俾隻餓狼破處

另一方面,睇唔到紐記對兵工廠
可能對身體有益
畢竟實在太激

事後睇左重播
如果唔係迪亞比小不忍而亂大謀
打死都唔信紐記可以翩身

不過小弟覺得杜特同樣有問題
多個判決都偏幫主隊
簡直係雙重標準
難怪而家佢同埋路斯基被傳收左黑錢

2)
柏度否認想引入亨利
唔好玩啦
肥佬出晒名縮骨
邊肯俾高薪搵佢返來養老

2011-2-5

轉會市場閂門
正係做英超中期分析既好時機

曼聯現時爭標形勢最好
佢地亦一如以往於歐聯重開前起勢搶分

費sir擅長輪換
加上華倫西亞就快復出
以及安達臣同埋朗尼回勇在即
3條戰線唔算特別難搞

反而球隊作客時有腳軟
先係佢既最大難題

阿仙奴而家失多5分
肯定仲有機
當然關鍵一度要主場做低曼聯

雲加於季中已經借走艾朗藍斯同埋卡路士韋拿
反映球隊中前場都幾齊腳
相反最終搵唔到新中堅
先係兵工廠既最大隱憂

而法比安斯基雖然提早收咧
但對球隊既影響唔大
一來佢唔見得好過艾蒙尼亞好多
二來施捷斯尼更值得期待

曼城方面
佢地雖然守得唔錯
不過遇強即縮
始終難寄厚望
最致命既仲係佢地好多時對住中下游球隊都無甚霸氣
所以佢地只配成為列強既攔路虎
文仙尼一日唔走
富豪老闆揼幾多水都冇用

車路士方面
球隊近日終於回勇
失多曼聯7分亦未到放棄時候
油王最終撥款收購托利斯以及大衛雷斯
總算回應肥安既增兵訴求
不過萬一最終衛冕失敗
只怕佢亦難逃落台下場

熱刺方面
雖然雲達華治聲稱佢地有力爭英超
不過保住前四似乎先係哈利列納既合理目標
佢地而家只係失多曼城兩分
最終保唔保得住歐聯資格
關鍵唔止係佢地歐聯可以行到幾遠
而係中堅既傷兵潮

話說回頭
哈利列納季中只係搵左個南非中堅
本來已經唔夠用
明知京治同埋卡保奧有傷
戴臣又要停3場
佢老人家已經執左派拿
都仲要於最後一刻都只係掛住斟酌查理阿當
好多熱刺球迷可能就咁激到嘔血
而高美斯以及古迪仙尼都明顯係前7球隊當中最唔可靠既龍門
就突顯中堅問題對佢地特別重要

新特蘭方面
雖然多左施斯隆同埋蒙達利
但又冇左戴倫賓特
球隊整體戰力略為下降
爭奪歐霸盃席位既願望隨時落空

利物浦方面
杜格利殊已經針對球隊攻守弱點做嘢

前線方面
雖然兩個箭頭都買貴左
不過考慮到冇咩時間買人
而蘇亞雷斯已經證明係高質筍貨
卡路爾既年齡以及本土球員既身份又令投資有升值空間
(雖然大佢3年既洛蘭迪會係更吸引既人選!!!)
兩個投資都尚算合理

而魯爾梅利斯得到解放後亦接連有貨交
小弟對佢同謝拉特既組合好有期待,

不過中場線既截擊力始終令小弟擔心
因為盧卡斯利華以及保臣都唔係好貨色
而杜帥近日試用3-5-2陣式既成效仲有待驗證
一來兩閘既漏洞更加重工兵既負擔
二來萬一溝通得唔好
3中堅陣式更易出事
艾加既包抄會係實驗成敗既關鍵

另一方面,杜殊一定唔會咁快放棄歐聯席位
但要同時兼顧歐霸戰線
關鍵會係佢點樣利用球隊既剩餘物資
畢竟祖高爾,尼哥治,麥斯洛迪古斯以及祖雲奴域都應該仲有貨交
特別係後者唔肯轉投禾堡
令利記少收600萬鎊

如果硬要挑剔杜帥既增兵行動
大抵就係佢冇為兩閘以及防中增兵
上述位置利記都唔多夠腳
佢老人家應該會用更多新人
當中馬田基利就已經係好例子

保頓方面
隨住李青龍回歸以及成功借用史杜歷治
佢地既進攻線終於再有速度
另一方面,韋達既加盟將會加速加利卡希爾既離開
餘下幾個月應該會係佢於保頓既最後半季
佢地爭歐霸盃席位既關鍵
肯定係奧雲高尼有冇本事執返好條防線

布力般流浪方面
從炒左Big Sam到傳聞羅致細哨
都反映佢地既高層於管理方面好有問題
球隊於堅恩接手後唔見有大起色
增兵亦冇針對創造力缺乏既問題對症下藥

由於成功挽留尼爾遜,森巴同埋沙加度
佢地既人腳應該唔愁降班
但如果一眾高層繼續固我
佢地既長遠發展肯定唔會有好結果

紐卡素方面
冇咩聽過英超領隊要陪老闆去賭場玩通宵
柏度應該係小弟印象中既第一個
條肥佬見到3500萬鎊筍價就即放卡路爾
小弟肯定柏度敢怒不敢言
做領隊做到成個傍友咁
真係不知所謂

而家連艾美奧比都打柴
加上艾利蘭以借用形式同巴頓重逢
紐記幾可肯定以4-5-1陣式應戰
柏度透露想搵自由身箭頭
不過貝斯或者盧雲卡蘭斯其實已經係佢既好選擇
而路蘭亦有機會要谷得更上
當然賓艾化復出後亦可能串演箭頭

史篤城方面
借用卡維反映普利斯繼續主打高Q大棍
雖然日子越耐
其他對手對佢地已經越有防範
不過今季英超比佢地差既球隊應該唔止兩隊
所以佢地依然唔愁降班

富咸方面
佢地既增兵其實唔算順利
不過都至少搵到古莊臣同埋卡古達
不過高層唔炒曉士
其實係球隊最關鍵既一步
佢雖然唔係超級有料既領隊
但應該有足夠時間於中型班撥亂反正

黑池方面
佢地向來有前冇後
增兵都至係識搵比亞堤
小弟冇寄望佢地下半季於防守上有改善
而家查理阿當最終戲劇性留隊
佢而家既心態以及球隊士氣
先係佢地下半季成敗既關鍵
而下半季忽然走樣隨時降班收場
96/97球季既水晶宮正係經典例子

維拉方面
侯利亞終於做返佢應該做既事
先留得低李察鄧尼,費度,希斯基同埋艾殊利楊格4個有用之人
而其餘搞屎棍就悉數踢走
再針對球隊弱點羅致戴倫賓特以及馬干
只要球隊繼續於防守上有改善
上返前10既日子指日可待

愛華頓方面
雖然因為莫財而有出冇入
不過以佢地既人腳一定唔愁降班
莫耶斯下半季最重要既任務
一定係檢視陣中仲有邊啲剩餘物資可以於季尾套現

西布朗方面
球隊自從12月頭打瓜紐記後就打回原形
迪馬堤奧仲一度因為連敗而有下台壓力
其他對手明顯已經睇死佢地前線太倚靠奧丹維治
而家借用卡路士韋拿絕對係正確既方向
護級關鍵就要睇下迪馬堤奧點樣改善球隊防線

伯明翰方面
球隊防線果然走樣
賓科士打固然冇料取代祖赫特
兩閘亦繼續出事
中場擺幾多工兵都係冇用
而前線方面
施積唔適應英超亦令球隊失晒預算

季中主要增兵只有居迪戴維斯以及馬田斯
前者只係取代提早收咧既史葛丹恩
馬田斯又向來唔係多產射手
前路肯定難行

韋斯咸方面
留用柏加同埋引入羅比堅尼絕對係利好消息
不過格蘭仍然in-charge就絕對係球隊隱憂
條友教左半季都仲未摸到個最佳陣容
如果唔係奧尼爾拒絕接手爛攤子
佢應該已經落鑊

韋根方面
佢地控球在腳既踢法確實幾好睇
不過絕對唔好食
加上球隊於1月亦冇針對黃大仙防線而增兵
降班機會幾高

狼隊方面
其實佢地幾好命
偏偏利記同埋車仔最季最沉既時候先對佢地
益佢地執晒好多球隊都攞唔到既6分
但佢地咁都要包尾
就反映佢地其餘時間有幾唔掂
佢地同韋根一樣都係冇咩增兵救亡
奧哈拉唔似幫到好多

上季佢兩隊唔使降班只因有更差既對手包底
今季怕且再走唔甩
而陪佢地重返英冠既應該不出黑池,西布朗,伯明翰同埋韋斯咸