今朝既決賽
賽果幾令人意外
巴西以3:0羸左阿根廷
成功衛冕美洲國家盃
雙方既陣容冇大變動
只有巴西以伊蘭奴代替停賽既基拔圖施華
雙方其實都排出一個類似4-3-1-2既陣式
不過取向完全唔同
阿根廷傾向進攻
而巴西傾向截擊
開波3分幾鐘
伊蘭奴長傳予巴迪斯達
佢於禁區偏左位置控球後
大步向右推大位
避開艾耶拉
再狂抽遠柱上角掛網入
巴西領先1:0
8分鐘
阿根廷本可以火速扳平
美斯左路落底傳中
華朗再頭槌二傳
列基美接應腳指尾拉西
可惜拉得太盡中柱
阿根廷未能立即扳平
其實係今場波其一個關鍵
如果佢地可以即刻扳平
有理由相信佢地可以乘勢壓住巴西去攻
因為得勢不饒人係佢地今次賽事既特點
及後雙方各有唔多,但到肉既攻勢
先有巴西既馬干於兩分鐘內令阿根廷既後防風聲鶴唳
17分鐘,佢既一記冇力度射門令艾邦丹斯里幾乎出洋相
18分鐘,佢於右路技術性擊倒缺態既軒斯再傳中
但路數好既辛尼迪包入中路解圍
到35分鐘,列基美再次於禁區內勁射
但今次就被杜尼擋出
到左40分鐘,巴西終於再下一城
代替傷出既伊蘭奴而有機後備落場既D.艾維斯
於加路傳中
艾耶拉解圍既時候擺烏龍
巴西領先至2:0
整個上半場(其實全場都係)
巴西主要以犯規戰術對付控球時間比較多既阿根廷
令後者難以組織攻勢
後者整個上半場亦只有列基美既兩下埋門比較似樣
到左下半場,
關鍵係阿根廷可唔可以
會改用一些比較簡單既組織去攻門
但結果雙方形勢不變
阿根廷雖然先後以艾瑪同埋干沙利斯
入替甘比亞素同埋華朗
但這兩個調動其實作用唔大
因為佢兩個都唔擅長踢簡單足球
如果小弟可以話事換人
迪亞高米列圖同埋就算唔夠狀態既基斯普
都會係入替泰維斯既好人選
藉以組織一些比較簡單既埋門
而由於巴斯利唔識換人
阿根廷明顯冇能力平扳敗局
下半場路夫於左路助攻予D.艾維斯射成3:0既入球
就等如0係阿根廷傷口上灑鹽
巴西今場波將士用命
亦踢出整個賽事既最高水準
全場37次既犯規令對手難以組織攻勢
羸波合理
但阿根廷面對對方咁識搶波既中場
其實應該收起華朗
改用多一個防中
同埋踢法上應該簡單一點
由94年既世界盃到今朝
巴西已經不只一次話比世人知道
佢地既森巴足球
只要跟上世界球壇既主流
即係加上實用主義
係正常發揮下係足以無敵
小弟覺得如果巴斯利肯參考巴西既踢法
用3個勁既防中
配以犯規戰術
再加上列基美,美斯同埋基斯普
效果都應該會好好
不過唔知仲有冇機會見到Top fit 既列基美
為國家隊於重要賽事摶命
雖然列基美今場既表現一般
但佢依然係小弟心目中
整個賽事既MVP
No comments:
Post a Comment