2007-10-4 (1)

好嬲!
愛隊利物浦尋晚又令我失望
竟然於主場以0:1不敵本季演出持續唔掂既馬賽
佢地既整體表現真係好差好差
只比上場作客對波圖既表現好少少
佢地既表現如果冇改善
要羸歐聯以及聯賽只會係幻想

尋晚利記無論控球時間同埋埋門機會都差過馬賽
幾乎令小弟忘記左佢地於晏菲路作賽

馬賽有備而來
岩岩接手既比利時名宿吉列斯
排出 4-5-1 陣式同利物浦搶中場
人地組織緊密
又少傳失波
搵岩位先去進攻
其中華布拿演出搶鏡
除左入球世界波外
傳送同埋走位都見水準
亦令到施素高同埋加歷查因侵犯佢而領黃牌
而左後衛泰禾不時後上助攻
射手尼安亦起到牽制作用

而利物浦
除左門將穩陣之外
一隊強隊應該有既特點尋晚既利記都比唔到人睇
列圖同埋哥治令人意外地出任正選
前者未能於進攻上有貢獻之餘
亦未能牽制對手既右路進攻
後者全晚比小弟既印象
就只有越位,傳失波同埋拖慢進攻
佢兩個再加上全場最差既施素高
係小弟睇完半場已經想佢地即刻被換走既球員

施素高再一次證明佢未夠火候
全場無論控球同傳球都多次出現失誤
人地入0個球都係因佢既失誤而起

小弟再想講多次
最近利記踢得唔好
同輪換制度既關係唔大
因為佢地係整體表現好差
唔係只有個別少出場機會既球員踢得唔好

而表現飄忽既佢地尋晚
又係衰在創造唔到機會
同埋拉唔開對手既防線
當然經常失左控球權
就即係比機會人地做低自己