1)
紐卡素尋晚成功止血
於主場同阿仙奴踢成1:1
只睇比數既會話紐記迫和兵工廠
但有睇場波既都會同意阿仙奴今場受壓既時間其實比紐記更多
尋晚既賽果其實有跡可尋
紐記上場雖然對布力般流浪輸1:3
但表現明顯有改善
加上賽前已知兵工廠肯定冇左法比加斯同埋希比
(臨場原來連費文尼都冇埋)
而上場對維拉雖羸波
但表現唔算太好
失分危機其實已經隱現
講返出場陣容
紐記方面
陣式係近幾場既 4-4-2 陣式
似乎 Big Sam 已明白這個階段
唔可以夾硬要球員跟佢既 4-3-3 陣式
要注意既係針對阿仙奴組織力較強
用上謝列美,巴頓同埋畢特3個防中
而 Big Sam 用前者踢右中場
明顯針對對方既左路攻勢
要知道特別係冇左法比加斯同埋希比
路斯基理所當然係阿仙奴既進攻起點
結果,今場路斯基既表現只係好一般
而阿仙奴一向既流暢傳送亦唔多見
另一方面,謝列美亦可以於比爾上前助攻既時候回防補位
小弟覺得 Big Sam 這個安排好正
而上場表現失色既畢特
唔計臨完場前既回傳失誤
今場其實踢得幾好
巴頓雖然冇咁搶鏡
但其實亦做左好多 invisible 既野
佢兩個雖然做既野差唔多
但絕對唔係講波佬講既位置重疊
因為對住基拔圖施華同埋迪亞拉
佢兩個合力之下冇搶輸中場
亦冇給予對手中距離射門既機會
佢兩個基本上做到小弟所強調既中後場聯繫
尋晚如果用安利取代其中一個防中
效果一定冇咁好
Big Sam 既部署加上球員既搏命
解釋左中場唔齊腳既阿仙奴
點解全場只有6次射門
而前線續由阿倫史勿夫踢正選
佢今場既表現比上場好
做到二傳既次數更多
不過依然冇咩埋門機會
所以小弟依然覺得紐記有必要搵多個好中鋒
講返場波
紐記4分鐘就失守
艾迪巴約既一控一射冇野可以挑剔
但於後場誤傳在先既尼索比亞就一定要被人炳
係佢既犯錯令伊保爾有機會做助攻
失波後既紐記其實係踢得幾好
講組織唔夠人地
就針對阿仙奴防守高波既弱點靠死球搵食
入波講真只係遲早既問題
而努力亦最終有回報
一個靚組織加上史堤芬泰萊既擦柱波就追返1:1
講真如果佢有運既話
尋晚甚至可以入夠3球
1:1後雙方都換個射手入來搏槌
阿仙奴換人唔換陣式
但紐記就不惜收起謝列美
羸波決心更明顯
換入維度卡係正確
不過阿倫史勿夫就要客串唔岩踢既右中場
等如廢左佢同埋球隊右路既功力
要換既話小弟寧願換走巴頓
因為辣椒仔既可繼續執行 Big Sam 既戰術安排
亦可後上攻門
小弟就好唔同意 Big Sam 這個調動
亦認為右中場係紐記要考慮增兵既地方
雙方於尾段都有機會置對方於死地
紐記幾次埋門都失之交臂
而佢地既後半場多左空位
有黃牌在身既比爾同埋入波功臣史堤芬泰萊
先後都靠超技術先可以阻截艾迪巴約
(不過球證可能因艾迪巴約之前插水而有唔好印象
兩次都竟然冇吹罰紐記......)
大家都把握唔到機會
最終1:1都算合理
紐記今場雖然羸唔到波
但已踢出今季代表作
Subscribe to:
Post Comments (Atom)
5 comments:
雖然仍然係贏唔到波，但係表現已經令到小弟好開心。早排時間球隊既陣式位置一直係度變，到最近先搵到暫時係最佳既陣。防守方面今埸無比阿仙奴太多機會，真係要歸功於big sam排出既三位防守中埸。畢特傳波仍然係恐怖，好彩防守都叫做踢出水準。祖爾巴頓我認為係今埸既無名英雄。謝列美表現亦都慢慢比岩岩來到果陣好。
右路攻勢方面，我覺得占士米拿如果打番右面，左面就由就復出既杜夫打，應該可以平衡番。
前線方面，無睇錯入果球應該係馬田斯故意漏俾泰萊，呢下都算幾正。今埸佢係無咁生，但係佢拍住史密夫，暫時係今季紐記既最佳鋒線。(所以小弟已經開始諗奧雲幾時走，趁宜家仲值錢就快手賣走佢，唔係有佢就會無馬田斯。)
你地兩個都分析得好好,等我將版主既分析放在紐記球迷會討論區到
咁我點樣睇到紐記球迷既 comments?
你要在紐迷討論區登記做會員
forum.hknewcastle.net
但我今生今世都只係利記既人
又點可以咁不忠
去紐迷討論區做會員
Post a Comment