幾場波想講:
1)
富咸對車路士
睇左主隊近兩場波
完全感受到新領隊鶴臣帶來既正面影響
上場未正式上任
只係坐看台睇波
班友仔已經踢得咁搏命
尋面佢第一場帶隊
面對殘陣兼用錯人既車仔
主隊上半場踢得好好
中場完全冇失勢
係近半季既代表作
最終輸波只係因為技不如人
主場對強隊輸波講真對整體護級形勢唔會有大影響
搵鶴臣接手似乎係富咸班無腦高層近年最明智既決定
對爭取護級好有用
搵到一個好領隊
好過簽到幾個好球員
上星期小弟先同人講富咸越來越似降班膽
但而家小弟覺得佢地既護級前途係光明既
不過新領隊對班波既正面刺激始終有日會完
大洗既山齊士季前用左咁多錢買人
亦令鶴臣好可能冇錢增兵
佢地能否護級成功
重點係鶴臣可唔可以改善球隊既兩大弱點:
作客唔識嬴波
(好似已經27場作客未羸過)
同埋比賽中後段隊波慢慢走樣
至於車路士
雖然卡奴又有波入
但小弟始終認為祖高爾 + 卡奴 + 胡禮菲臘斯
唔係一個有火花既組合
另外,薜維爾似乎真係唔夠班踢車仔
不過可能同格蘭埋沒佢後上攻門既能力
同埋要佢專心防守有關
不過都要讚下格蘭
半場即刻換走唔掂既薜維爾尚算果斷
雖然如果尋晚仲係摩連奴揸 fit 既話
薜維爾唔可能踢多過30分鐘
2)
阿仙奴對韋斯咸
羸得比想像輕鬆
主因係主隊初段已經有甜頭在手
可以睇住去踢
其中艾迪巴約入既第二球仲好靚
令小弟唸起上年亨利為 Nike 拍廣告
當中既其中一個高難度入球
講返轉頭
兩隊既防守都唔算太好
客隊輸既兩球
伊度亞度同埋艾迪巴約都有好多時間同埋空位去做野
反映防守唔夠緊密
而主隊亦因為對方既死球攻勢
後防曾經出現混亂
再次反映佢地唔擅長應付高空轟炸
3)
唔擅長應付高波既唔止阿仙奴
熱刺既問題似乎更加嚴重
尋晚輸兩球高波
真係好離譜
佢地今季類似既失球多到數唔晒
人地一有死球就已經好似打牌叫緊糊
唔怪得拉莫斯話要為後防增兵
No comments:
Post a Comment