尋晚有利物浦對韋根都唔睇
因為唸住愛隊應該會掂
最主要都係想睇紐卡素迎戰
作客好唔掂(只曾試過開咧羸韋斯咸)既曼城
可以乘機爭氣反底
跟住寫篇比較有水準既賽後 report
不過兩場都好令小弟失望
仲更加覺得天寒地凍
兩場波既死因都大致一樣
老套0的講
前面入波唔叻
後面又唔穩陣
就只有等死
紐卡素對曼城
雙方因為上場都踢得唔太差
所以都幾合理咁近乎冇變動
只有維度卡取代養傷既辣椒仔
基本上曼城全場都靠突擊搵食
控球時間同埋埋門機會都唔夠紐記多
不過一樣有波羸
原因在於兩樣野:
紐記班友唔識入波之餘
防中同後防冇聯繫既老問題又發作
先講前線既問題
失守前既紐記其實有好幾次機會可以入波
菲爾同埋比爾把握唔到小弟唔怪佢地
但馬田斯同埋維度卡咁都入波
就幾令小弟失望
而前面入唔到波
以佢地既防線就只有等死
其實紐記明顯吸取首循環作客輸波時既教訓
令馬田柏度夫少左好多空位發圍
佢全場既威脅雖然都仲有,但真係唔多
不過識得防範佢
兩個防中就睇唔實艾蘭奴
38分鐘,這個巴西仔本季第n次後上攻門得手
當時小弟見到畢特有回防
不過係幫手追纏華素爾
其實如果佢有 sense
一定會將踢單箭頭既華素爾
交由齊晒人既後衛去睇
佢一定要做既反而係睇緊人地既進攻中場艾蘭奴
不過畢特其實已經比菲爾好
因為睇返慢鏡
艾蘭奴後上起腳既時候
菲爾已經收步兼睇波
小弟夠膽講細個踢波既時候
勤力過佢最少10倍
只係落後一球仲有得吊住條命
半場後三十幾秒
入替馬田斯既奧雲單刀失機
明顯係今場波既一個關鍵位
幾日前阿仙奴作客反勝愛華頓已經係一個好例子
之後紐記繼續唔識入波
下場就只有等幾時輸多球
但又係咁輸都幾冇癮
不過入替菲爾既安利本身係攻擊球員
入場後又要專注進攻
佢回防搞唔掂同樣係後備落場既費蘭迪斯
小弟唔太怪佢
不過 Big Sam 真係要正視下4人防線前
對手有太多空位做野既老問題
近兩個月因為'讀者反應'
好留心紐記既比賽
今場輸既兩球
又係熟口熟面
印象中最少對布力般流浪同埋打呲郡都試過咁樣失波
Big Sam 同佢班球員肯定知錯
只不過好多時都唔肯去改
最後想講下 Big Sam
講真佢今場既排陣同埋臨場調動都冇問題
紐記失第一球波後
鏡頭影佢食香口膠呆下呆下
小弟第一時間就唸起祖爾
可能大限將至既人都係咁既衰樣
不過小弟始終唔認為炒佢係好決定
雖然對上12場波只得9分落袋
係炒佢好有力既理據
不過佢地衰到咁都仲排11
球會高層其實都仲有空間去睇定0的先做決定
P.S.:
利記場波唔想講
因為只睇左精華
睇晒之後再唸清唸楚
遲少少有時間同埋機會先狂插
5 comments:
你唔睇愛隊都睇睇newcastle+寫賽後感
thx very much
I also watched the match last night
Man city 一個攻勢已經足夠入波
把握力好幾十倍
又抵輸
anyway I think that Big Sam shouldnt be fired at the moment as newacastle started to improve a bit
罵都罵球員唔罵big sam啦今埸
完全係隊波問題，把握力差到咁樣。
無野好講，只係希望主席用下個腦，炒球員定炒領隊。
紐卡素球員問題..心態...
不知所謂
唉...我地隊波...
To: 幾個紐卡素球迷
都係0個句
小弟唔知 Big Sam 既私人操守
係咪真係傳言咁講有問題
但講領軍能力
佢比上不足,比下有餘
小弟有時會唸球員既問題似乎更大
球隊既幾個老問題例如:
後防低能
防中唔掂
冇創造力
埋門把握差
用錯人同埋陣
心態問題
(例如:聖誕唔肯集訓加操,要死去玩)
士氣差
......
當中有好多都係球員方面既問題更加大
To: Jordan Chan
只係唸住自己隊利記會掂
(點知咁失禮......)
同埋幾想睇紐記反底
(講真小弟認為紐記主場對曼城係有本錢羸)
所以先捨棄利記而睇紐記
你太客氣
To: 死佬
唔好唸聯賽啦
而家曼城個勢咁狼
有前4都偷笑
睇來賓尼迪斯會專攻盃賽去保住個飯碗
如果有時間同埋機會
會寫場波既賽後感
因為咁樣又失兩分都幾令人扯火
Post a Comment