2008-1-31 (1)

記得兩個月前有個講波佬批評過賓尼迪斯
羸波就出來邀功讚自己調動好
輸波就賴冇運
總係話利物浦計表現應該已經羸左

當時小弟都有同感
其實早兩年已經幾覺得佢係咁
(講真大把人都係咁)
但只要唸下佢總算為利記帶來過功績
咁就算啦

之後0個個講波佬早前又表示
佢覺得賓尼迪斯抵炒
原因係賓佬搞左咁耐都未執得掂個班底
但個講波佬好似又冇講幾時炒

小弟覺得如果冇左佢
搵邊個接手呀
等季尾先同佢計數
對佢本人同埋球隊都比較公平

另一樣要注意既係
佢話晒建立緊一個班底去爭聯賽
雖然搞左咁耐都未完
但陣容某些位置真係比之前好左

而如果貿然換領隊
新領隊又要時間重新建立個新班底
咁所有野都要重頭再來
就算利記下季搵到摩連奴接手
小弟都唔認為佢可以帶領利記下季即刻羸聯賽

仲有既係佢幾得球員同埋球迷既歡心
炒左佢可能眾怒難犯

所以如果只講公事
唔計私人恩怨
對於炒唔炒賓佬
利記既兩位美國老闆
其實係處於一個兩難既局面

不過小弟覺得都係等季尾再唸
而家最緊要既都係穩定軍心
因為上星期主場對維拉和波後
謝拉特表示球隊既內部問題對球員做成困擾

之後其中一個美國老闆希斯
開聲支持賓佬教埋餘下兩年
擺明想穩定軍心
但佢兩位老闆同賓佬前前後後搞出咁多是非
撐賓佬一次就想擺平件事
邊有咁易呀?

而球員有腦架
心理上又邊會即刻 recover 呀?
結果上星期對業餘隊都兩度落後
尋晚就10年來第一次作客韋斯咸輸波

兩位美國老闆解決財政危機後
如果想解決埋內部不和既問題
就不如低調0的
唔好再講咁多冇意義既說話

講返場波
唔係馬後炮
失分係預左
雖然10年都未試過作客韋斯咸輸波
但主場對韋根同埋維拉
作客對米堡同埋曼城
全部都和波
今場失分一0的都唔奇
但臨尾香埋就有少少意外

講表現就明顯唔掂
後防繼續唔穩
只失一球應該多謝對手既般莫迪
深明待客之道
竟然兩度埋門失機
抵佢離場既時候被人串

中場方面
沙比艾朗素明顯未上力
冇反守為攻既長傳
而謝拉特又係冇態
佢兩個對住盧保同埋梅連斯真係冇甜頭

倒戈既班拿約唔知係路數被睇通
定係狀態持續飄忽
今場又冇料到
而基維爾可能復出初期太搏
最近狀態又轉沉
以佢近期既狀態
賓佬隨時於季尾唔同佢續約

而後備入替佢兩位既
巴布同埋盧卡斯利華
前者繼續做佢既自閉青年
一個人帶住個波
有時真係唔知佢想點
後者就踢過大約10分鐘好波
之後又無以為繼

前面既托利斯同埋古積特
就由於成日要等波
所以冇咩發揮機會
佢兩個就好似大陸等搭火車既民工咁
得個等字

成隊利記加埋只係踢左大約十幾分鐘好波
就係下半場岩岩出來既十幾分鐘
上場對維拉又係同一段時間
小弟認為應該同賓佬半場既調節有關
但當對手適應左後
佢地又變得冇機會落手
賓佬應該留意下

聯賽雖然比前6球隊踢少場
但跌到第7既佢地
已經落後排第4,同市宿敵愛華頓3分
真係無路可退

其他踢歐聯既球隊通常趁分組賽之後
就集中於聯賽搶分
偏偏利記咁既時候就倒水咁倒

遲少少歐聯戰線重開
佢地仲要掛住同愛華頓,維拉同埋曼城爭前4
希望唔好到時兩頭唔到岸