2008-2-29

1)
擁有利物浦5成股份既希斯
聲言唔會出讓手上既利記股份予阿聯酋財團之外
亦會阻止吉列咁樣做

2)
加歷查涉嫌於週二因同人爭執後'動操'
(common assault 既定義好廣
由吐人口水到推撞都算係
所以暫時未知佢當日做過0的咩)
而被當地警方拘捕
消息指佢仲接受告誡

警方只表示星期二當日有單咁既 case
但就冇透露加歷查有冇牽涉在內
而利記方面就拒絕作出評論

3)
卡卡落實同AC米蘭續約至2013年

4)
賓尼迪斯表明拒絕晒所有來自西甲同埋意甲
對盧卡斯利華既斟酌

5)
賓科士打表示將於稍後時間
同費格遜商討將佢外借

6)
堅尼表示米拿被掛牌出售
係因為佢既遲到問題好嚴重

另外,佢表示準備將前阿仙奴前鋒史杜基斯外借

7)
彼德斯堡既 U-21 龍門李維士
被指成為利物浦既增兵目標

佢被費格遜個仔達連費格遜
季前以破球會紀錄既40萬鎊從諾域治引入

8)
祖雲達斯否認會引入費文尼

而原來費文尼要求週薪超過7萬鎊
同阿仙奴開出既5萬鎊明顯有一段距離

9)
古華特透露準備於季尾離開里爾
而佢表示有意於阿積士收山

10)
普耶承認熱刺想簽愛斯賓奴既中堅查基同埋龍門卡文尼
熱刺想簽前者已經係公開既秘密
不過小弟就估唔到原來後者都係熱刺既新龍門人選

11)
消息指賓尼迪斯將於季尾先決定希比亞既前途

2008-2-28

1)
洛杉磯銀河既對手原來唔係
佢地之前網頁所講既港聯
而係南華邀請隊

由於受到銀河同埋主辦機構既誤導
本地有傳媒曾指港聯將由
香雪晨曦,寶路華流浪,告富大埔同埋公民所組成

而家經羅傑承證實
佢地以唔使踢亞協盃既球員
(例如李海強同埋麥士維)
加上部份友會既球員
組成南華邀請隊同客軍踢表現賽

2)
伊度亞度達施華已經出院返屋企休養

另一方面,阿仙奴被指將會同馬略卡,拉科以及薩拉戈薩
爭艾爾切既阿根廷26歲龍門卡保拿路

3)
賓尼迪斯雖然唔止一次表示
沙比艾朗素唔會被賣走
佢前者終於首次承認同後者既關係唔算好
小弟認為後者真係有一定機會於暑假回流西甲

4)
奧查同布力般流浪相方同意
將原有合約延長一年

5)
堅尼決定將愛爾蘭防中米拿掛牌出售

6)
被曼聯外借到侯城既射手甘寶
盛傳成為查爾頓於暑假既200萬鎊羅致對象

7)
巴塞隆拿再次被指將引入艾比達同埋拿姆

8)
備受祖雲達斯注視既費文尼
同阿仙奴仍未就續約一事達成協議
前者對於兵工廠所開出
為期5年,週薪5萬鎊既合約依然感到唔滿意
如果雙方到季尾都傾唔掂數
前者就可以自由轉會

9)
列卡特再次被指將於季尾加盟車路士

10)
安察洛堤又話卡卡可以趕及對阿仙奴既比賽

11)
米卡李察士因膝傷尋日做左手術
佢將要缺陣幾星期

12)
尋日講過基雲要開刀醫治鼠蹊傷患
原來佢今季都唔可以再為紐卡素上陣

13)
波里路由於今季於熱那亞表現出色
不但吸引鄧納東尼選佢入國家隊
亦令到舊波士安察洛堤想搵佢重返AC米蘭

14)
中田英壽將於6月搞表現賽籌款
日本傳媒指佢準備搵摩連奴做明星隊既教練

15)
國米被指想從阿仙奴引入迪亞比

2008-2-27

1)
兩位美國老闆再被傳出售利物浦
消息指交易最快於3月內完成
但佢地已經作出否認

2)
英超方面宣佈暫時擱置
佢地既海外推廣(或者應該叫'侵略')計劃

3)
羅馬會長 L.辛斯小姐
否認會出售手上約6成既羅馬股份
以為老豆既公司償還2億債務

4)
艾利亞迪里被罰停賽4場
米堡對此勁不滿

5)
杜安既7個現役及前球員
因為同1個15歲少女非法性交
被瑞士警方正式落案起訴

6)
麥利殊透露馬田泰萊
因為搞到伊度亞度要長抖一事而好內疚
而家要接受心理治療

7)
京治於慶功宴醉酒鬧事
幸好事件最終未有越鬧越大

8)
唐寧落實同米堡續約5年

9)
基沙哥夫落實回流俄超
佢以490萬鎊既價錢由西維爾轉投莫斯科戴拿模

10)
前曼聯射手高爾涉嫌因打老婆而被警方拘捕
並被扣查左足足7個鐘

11)
貝碧托夫於熱刺捧盃後表態願意留隊

而拉莫斯被指將獲撥款4000萬鎊去增兵
路爾斯法比安奴,卡普,丹尼爾艾維斯,
迪亞高米列圖同埋艾比達等
西甲兵都被傳成為熱刺既羅致對象

12)
蘇連遜反對被借用到祖雲達斯
因為佢認為只要保方在狀態
佢只有長時間做後備

13)
卡素爾既年青射手 Gary Madine
被傳成為紐卡素既增兵目標

14)
被傳將於季尾離隊既希比亞
透露想用表現換取球會既新合約

15)
史特根表明些路迪唔準備出售麥基迪

16)
鄧卡迪否認同泰利有過衝突

17)
基瑾表示搵曉頓幫手可以改善防線既表現
幾日前小弟已經講過話唔睇好

佢加埋原本主力執防線既教練 Steve Round
兩條友有幾多料真係心照啦

睇熱刺季初條豆腐防漿就已經知前者功力有限
後者亦唔好得幾多
咁多年來教過既球隊包括打呲郡,米堡同埋英格蘭
將0個3條防線既優點加埋
都依然同好防線既定義差好遠

都係0個句:
季尾一定要同後防換血
但而家條防線仲好可能冇埋
要開刀治理鼠蹊傷患既基雲
就真係焗住要變

倒不如試下起用謝列美
佢踢波雖然向來都唔搶
但起碼夠穩定可以幫輕條防線少少

2008-2-26 (2)

1)
(多謝米堡迷 ck 來電通知......)

洛杉磯銀河落實訪港
佢地將會於3月6號由上海來港
3月9號對港聯
暫定3月10號離港
來港名單包括萬人迷碧咸

2)
前港隊隊長梁帥榮終於落實接手澳門代表隊

3)
安察洛堤表示擔心卡卡因為膝傷
而缺席對阿仙奴既歐聯16強次回合

小弟覺得可能又係煙幕......

4)
伊拉克足總宣佈開除教練奧臣

5)
由於歐聯出線有暗潮
聯賽優勢又由8分減到得返兩分
西班牙傳媒指蘇斯達已經有下台壓力

6)
雖然受到多間歐洲頂級球會垂青
賓施馬仍然表示冇意思離隊

7)
戴維斯宣佈季尾掛靴

8)
消息指如果伯明翰能夠護級成功
將向韋斯咸出價200萬鎊買森莫拉

9)
意大利傳媒指國米唔排除向利物浦出價3500萬鎊
利誘佢地出售謝拉特

10)
些路迪翼鋒麥基迪被指成為紐卡素1200萬鎊既羅致對象

11)
米堡既洛查碧克被指成為華斯高既增兵目標

12)
史達基倫堡再被指傳會於暑假加盟熱刺

2008-2-26 (1)

先講尋日未講既新聞......

1)
伊度亞度既傷勢冇當初估計咁嚴重
由於韌帶並冇受創
估計6-8個月可以康復

有專家向 BBC 表示
若非伊度亞度立即被送院接受治療
佢可能已經冇左隻左腳
而佢就算他日康復
左腳亦未必可以回復以前既水平

另一方面,收山王馬田泰萊收到死亡恐嚇......

2)
西班牙傳媒指摩連奴
已經成為巴塞隆拿可任教練既頂頭大熱
消息指如果佢接手
杜奧巴同埋林伯特都會願意轉投
而巴塞隆拿方面將會安排安歷基去協助佢

3)
史浩克04既巴西左閘拉芬夏被傳
將於暑假以500萬鎊既價錢加盟利物浦
當時人亦表明有興趣轉會
不過球會經理摩拿(前德國進攻中場)
就表明唔準備放人

4)
車路士成為最新一支同賓施馬扯上關係既球隊

5)
京治否認將會因傷掛靴

6)
AC方面表示就算佢地聯賽最終入唔到前4
都唔會炒安察洛堤

7)
錫週三好可能有新老闆
消息指出價約5000萬鎊

8)
占邦達於聯賽盃決賽被換出時態度勁差
即刻再有消息指佢會離隊他投
(其實已經傳過 n 次佢會過維拉,紐卡素或者西維爾)
今次就傳佢會以400萬鎊既價錢改投紐卡素

9)
保羅羅賓遜雖然於聯賽盃決賽表現不俗
但仍有消息指佢不獲拉莫斯信任
依然係被清洗既目標
傳聞佢可能以400萬鎊既價錢轉投米堡

10)
阿仙奴否認希比將轉戰西甲加盟巴塞隆拿

11)
路亞路亞被指成為紐卡素既200萬鎊羅致對象

12)
具加被指好可能於季尾
以自由身加盟布拉格斯拉維亞

13)
洛辛堡既20歲挪威中場 Per Ciljan Skjelbred
被指成為熱刺500萬鎊既增兵目標

2008-2-25 (2)

好多場波都唔想講
反而想講一堆廢柴

1) 格蘭

雖然尋晚聯賽盃決賽對熱刺輸0個兩球波
布歷治手球輸12碼同埋施治打手槌失誤
都唔關佢事
但佢既排陣同埋換人都好廢
令佢成為輸波既頭號罪人

先講排陣
佢唔用艾殊利高爾而用布歷治
究竟係因為前者最近因為婚變而跌 watt
定係因為後者話冇份踢決賽就要離隊
小弟唔想知
只知後者向來都比前者差左半班

而中場用米基爾而棄馬基尼里
令球隊成個上半場同埋下半場被追平後受壓得幾勁

而佢唔識點樣一次過用杜奧巴同埋安歷卡
就係佢尋晚最唔掂既地方
佢兩個其實都適合 4-3-3 陣式
但都只限於正箭頭
如果用佢齊佢兩個但又堅持要踢 4-3-3
咁其中一個就要走去邊線遷就另一個
結果其中一個就會威力最少減半

原本改踢 4-4-2 就可以解決問題
不過以尋晚既人腳又冇明顯既左中場

結果佢地個陣都唔知係 4-3-3 定係 4-4-2
兩頭唔到岸
或者應該話兩樣都唔係......

而佢既換人亦令人 R 晒頭
祖高爾要先做後備已經有問題
到換走胡禮菲臘斯既時候
入場既竟然係卡奴
(而祖高爾到加時輸左波至有得出場)
佢入場後既表現只有在國家隊既頂多1/3
睇見卡奴一斷纜就火滾

而佢老人家之後用波歷克入替艾辛
球隊就咁冇左個正宗防中
而波歷克同林伯特之前已經證明過 n 次唔可能會有火花
可能連佢80歲,專誠去溫布萊既老父都知道唔應該咁換
但佢都仲要咁樣換人
真係好費解

難為佢賽後仲好意思同記者講
冇左聯賽盃唔緊要
因為佢會為車路士帶來其他錦標
佢竟然可以咁厚面皮去死撐
相對於佢既排陣同埋換人
小弟更加被佢吹脤

2) 施素高

祖記已經大約4個月聯賽未輸過
點知施素高處子登場
祖記就即輸
仲要輸比降班大熱里賈納

輸第一球
係因為施素高解圍失誤在先

輸第二球佢就一定要負全責
學人禁區內倒掛解圍
波就踢唔到
就踢中人地個頭
連累球隊下半場補時先輸12碼

咁既料都賣到超過800萬鎊
賓尼迪斯今次都算叻仔

3) 基治

佢可能因為伊度亞度受重創一事而嚇到呆左
補時階段竟然夢遊球場
連累球隊輸12碼而被迫和

4) 利物浦一眾防守球員

米堡出名攻力疲弱
利記主場對佢地都可以失兩球
成班防守球員責無旁貸
艾比路亞同希比亞好少於中路合作
毫無默契可言
其中前者簡直係差中之差
佢唔記得咩叫睇人
走甩對方前鋒 n 次

輸第一球
就又係衰包越位
佈越位咁差就唔好學人佈

輸第二球
睇住唐寧 one man show
追纏佢既竟然係班拿約
芬倫都唔知去左邊

5) 艾卡

之前講到利記班防守球員咁唔掂
利記最終都有得羸
第一個要多謝艾卡
佢明知托利斯黃雀在後
離門35碼都要頭槌回傳舒華沙
一個字:蠢!

不過如果佢頭槌真係好既話
小弟又吹佢唔脹
不過佢偏偏唔係
佢0個球頭槌毫無力水可言
15碼都頂唔到
托利斯,利記全體同人都應該向佢致謝

6) 舒華沙

佢係利記羸波既第二個恩人
無啦啦走出去
益晒托利斯射空門

7) 艾利亞迪里

當利記被追成2:3既時候
入波已經向來唔多
對球隊貢獻有限既佢
抵唔住馬斯查蘭奴既手多多挑釁
(小弟都同意阿根廷人先撩者賤,最少都應該收件黃牌)
當住球證面前兜巴還拖
佢想還拖都等到完場先去更衣室
佢咁被人趕出場
佢班隊友想追和都難

8) 紐卡素一眾防守球員

唔好有人同小弟講紐記輸波
係因為球證上半場唔判12碼

以佢地咁既防守表現
曼聯讓兩至三球都有本事羸

唸住佢地以逸待勞會拉近雙方距離
又有主場之利
算係有條件搶返1分
點知條防線又崩潰
唉!

之前羅傑承話歐洲球隊都未必頂得住南華既進攻
小弟唸左個幾星期終於明少少
羅先生指既歐洲球隊可能包括紐記
同埋星期六晚既米堡以及利記

9) 小弟

冇錯!
最後一條廢柴確係小弟!

小弟上年第一擊估荷蘭U-21
可以打破宿命成功衛冕
得左......不過之後無以為繼

暑假講過車路士有力同曼聯再爭過
點知摩連奴被炒
令車仔爭標夢幻滅

非洲國家盃估加納或者科特迪瓦又衰

最近講過如果阿仙奴既雲加唔太貪心
而皇馬只要主場對巴塞隆拿唔輸
佢地聯賽 lead 住5分應該幾有機
點知而家......
為左球壇既正常發展
小弟決定盡可能封左把烏鴉口

P.S.:
時間關係
新聞要儲埋聽日先 round up
請見諒!

2008-2-25 (1)

想講伊度亞度達施華既受傷事件......

因為阿媽要緬懷肥姐而睇南北媽打
小弟 miss 左伯明翰對阿仙奴
亦因而睇唔到伊度亞度點樣傷

之後睇場波既時候已經係補時階段
睇住基治夢遊球場跟住輸12碼
阿仙奴被迫和之後
鏡頭影住激動落淚既加拿斯

小弟既細佬仲問點解佢會咁激
仲未知伊度亞度單野
而只知阿仙奴3分鐘就踢多個既小弟
仲好天真好傻咁答:
可能因為羸晒形勢但咁樣被迫和而唔忿氣掛

跟住上網一睇先知真相
原來伊度亞度咁大鑊
睇相0個刻勁震撼
http://www2.discuss.com.hk/viewthread.php?tid=6522597&extra=page%3D2

而家 youtube 有段片據聞係電視台唔敢播既近鏡
http://www.youtube.com/watch?v=9i3ulLSoQ58
唔信自己去睇
不過段片可能會令某0的人不安
要有一定心理準備

見到佢隻腳咁樣變左'L'形
真係好唔安落
直情心都寒埋

睇一眾兵仔既表情
加拿斯既激動反應
法比加斯同埋希比等人既悲傷表情
睇場波要停咁耐
已可以想像伊度亞度有幾傷
搞到咁講真場波既勝負已經唔再重要

唔計近年既暴斃事件
如果只計嚴重受傷
睇波咁耐真係好少見到咁既場面

小弟大約12年前睇英超精華
見到曼城條友意外受到重創
(當年好似真係意外......)
曼聯既艾雲見到咁不安既場面
只係識遮住自己對眼
結果不幸者醫左成年都唔掂
最終只有無奈掛靴

05-06年球季阿倫史勿夫既意外受傷
又係恐怖得令人印象深刻
好彩0個時既醫學已比90年代進步左好多
辣椒仔先可以再踢返波

而家伊度亞度個 case
斷腓骨,脛骨同埋腳踝既關節一次過斷晒
手術做完都要今日再見醫生
先至初步知道仲有冇機會再落球場

小弟成日都覺得
球場係英雄地
而踢波又為左搵食
為名為利搏命踢天公地道
但類似既收山腳點就都講唔通

小弟可能真係好天真好傻
好唔明點解行兇者馬田泰萊
會有咁多人撐
佢前任同現家既 boss 布魯士同埋麥利殊
同埋隊友基利都話佢唔好惡意
當時佢班隊友仲夠膽死 challenge 球證點解要見紅

而網上好多人留言幫佢解話
有人話只係伊度亞度推甩腳在先
又有人話只係落腳 timing 唔岩
亦有人話佢只係單腳攔截唔似想收人山
仲有0的仲離譜既人無風起浪同阿仙奴班友翩舊帳
話佢地連續兩季令泰利受傷
又試過對其他球員作出過火既攔截

但小弟想問既係:
就算 timing 唔準
點解收山王都可以用單腳就搞到人而家幾乎收山
一句意外同冇心真係好難
令有 common sense 既人(包括小弟)相信

聲稱對事件好模糊
但又唔想睇返相同埋片段既伊度亞度
在行兇者去探過佢同埋向佢道歉後
話相信件事只係意外
小弟只可以講伊度亞度個人心胸好廣闊......

小弟雖然因為謝拉特初出道既時候
就已經認定佢既潛質而勁勁勁勁鍾意佢
但都會覺得佢有時過左火既攔截真係幾過份
慶幸踢法越來越成熟既佢而家已經再冇咁做......

而韋拉,堅尼,巴頓,米高布朗,戴卓爾等人
加埋而家響晒朵既馬田泰萊
佢地既粗野攔截真係令人髮指
不過英超聯賽會一直都冇好正視問題既嚴重性
令情況持續
收山王亦橫行無忌

小弟相信足總會開始嚴懲佢地
但代價實在太大

祝伊度亞度早日康復!

2008-2-23

1)
尹巴士頓落實接手阿積士
佢簽約4年
粉碎佢來季執教AC米蘭或者巴塞隆拿既傳聞

2)
車路士方面表示
唔打算簽細哨
亦透露林伯特曾表示會續約

3)
前熱刺教練曉頓加盟紐卡素
取代轉投修咸頓既皮亞臣出任教練

不過球員時代爛打兼硬朗既佢
出任熱刺教練期間
因為限米煮限飯
熱刺既防守只係好一般

小弟認為紐記搵佢唔會點幫到後防
倒不如搵幾個好後衛好過

4)
朗拿度表示仍未決定
會唔會因為傷患而提早掛靴

5)
紐根特會否以借用身份轉投葉士域治
將於約1個星期內有定案

6)
鍚耶納後衛羅利亞被指成為羅馬既增兵目標

7)
繼國米同埋祖雲達斯之後
拿玻里成為最新一支同帕爾瑪射手施加連尼扯上關係既球隊

8)
薩拉戈薩已為下季增兵作準備
除左基達菲既進攻重心古蘭奴之外
佢地亦考慮緊是否出價700萬鎊簽
馬略卡既阿根廷翼鋒古迪利斯

9)
艾比達將同華倫西亞既糾紛
交由法庭處理
佢指華倫西亞阻礙佢加盟某些球隊
消息指當中包括巴塞隆拿同埋皇馬

而家最新版本係如果佢願意同華倫西亞簽份協議書
承諾唔會加盟這兩支球隊
華倫西亞會讓佢自由轉會

10)
森多利亞打算於暑假
向莫斯科斯巴達出價350萬鎊買巴西中場莫沙特

11)
繼國米同埋阿仙奴後
祖雲達斯成為最新一支同拉傑錫扯上關係既球隊
消息指老婦人願意向史浩克04出價1000萬鎊

12)
加斯居尼又衰醉酒鬧事
難得修夫基同埋布魯士依然出聲撐佢
基瑾甚至已經同佢屋企人聯絡
仲表示紐記願意向佢作出協助

13)
消息指如果富咸可以護級成功
希比亞將於季尾以自由身加盟
以同前芬蘭國家隊教練鶴臣再度合作

14)
由於巴頓太難搞
佢既精神治療師準備終止為佢再作出治療

佢條友平時就搞搞震
被拘留期間見到0的真正既惡人就驚得要死
擺明只係欺善怕惡
都唔係好搞得清楚佢有咩精神病

好憎0的咁既垃圾
幾好波都冇用
最慘既係紐卡素用左550萬鎊等如跌左落海

15)
賓尼迪斯否認沙比艾朗素既轉會傳聞

2008-2-22

1)
中東財團入主利物浦既機會似乎越來越高之際
英國傳媒就好勤力咁為佢地既人起底
上年就介紹過佢地既富豪老闆
今年就介紹佢地既總裁 Amanda S.
(唔係平時睇八掛新聞
香港勁索0個個 model)
佢雖然冇香港0個個 Amanda S. 咁索
但來頭更勁
因為佢出名有腦
以前仲同安德魯王子拍過拖

2)
英格蘭足總表明唔支持海外聯賽計劃

3)
哥度巴因為整傷左韌帶而提早收咧
益晒利物浦......

4)
有消息指高路托尼可能可以趕及作客AC米蘭場波

5)
有消息指泰利同埋林伯特會被格蘭收起
冇份踢星期日既聯賽盃決賽
小弟就打死都唔信

6)
米堡方面準備同舒華沙傾新約

7)
文仙尼被指可能於季尾由羅馬轉投國米
轉會費為1700萬鎊

8)
就C7被 laser 騷擾一事
里昂好可能因而被判罰

9)
圖盧茲既喀麥隆中場伊馬拿被指
成為拿玻里同埋費倫天拿500萬鎊既羅致對象

10)
西班牙傳媒指馬體會同埋華倫西亞
都打算出價500萬鎊買入燕豪芬既後衛沙斯度

11)
愛斯賓奴被指願意向艾美利亞
出價600萬鎊買佢地既中場文尼

12)
雖然有消息指國米可能於季尾
向馬賽出價1000萬鎊買佢地既進攻中場拿斯里
但當時人表明最想都係留隊

13)
阿仙奴成為最新一間有興趣簽下拉傑鍚既球會

14)
雖然賓施馬表示冇興趣轉投曼聯
但傳聞紅魔依然準備加碼至2500萬鎊
以求先打動里昂

15)
占邦達再被傳將於季尾轉投維拉
轉會費約400萬鎊

16)
東尼否認會轉投熱刺

17)
由於認為球迷受到西班牙警方唔公平既對待
保頓已向歐洲足協投訴

18)
紐卡素主席莫特否認球會既轉手傳聞

2008-2-21 (2)

想寫幾隻字講歐聯晉級形勢

1)
講到入8強
巴塞隆拿明顯最穩陣
作客羸些路迪兼有3個作客入球
反勝為敗既機會更乎零

以佢地聯賽既表現
要趕過皇馬真係好難
佢地隨時將重心放在盃賽

早前列卡特表示球隊踢西班牙盃
會以捧盃為目標
連西班牙盃都咁搏
何況歐聯

只要美斯一日仲有貨賣
就始終唔可以睇少勝在目標明確既佢地

2)
愛隊利物浦既情況同巴塞隆拿相若
佢地聯賽而家只可以以第4為目標
國內盃仔仲已經全部出晒局

而佢地而家個情況同04-05年球季勁似
目標明確點都算利好條件
賓尼迪斯又要為自己同埋隊波既前途而加多兩錢肉緊
兼且佢又係當今其中一個最勁既盃賽專家
小弟(主觀兼客觀)都認為佢地今季歐聯會有一番作為

而家有兩球優勢兼冇失波
作客聖西路只要唔大失準
都可以助定粒六等8強抽籤

3)
車路士同埋曼聯作客都和波
但對手始終唔係勁
靠主場羸波入8強既機會仍然幾高

不過前者冇左摩連奴
要靠個樣越睇越似盧海鵬扮米奇老鼠既格蘭
就即刻冇晒冠軍相

而後者雖然踢歐洲賽既表現比上季穩定左
但要注意既係同佢地到而家都未遇過勁隊有關
而佢地既捧盃機會
亦要睇費格遜既取捨

4)
皇馬同埋西維爾作客雖然輸波
但有作客入球在手
返到主場要扭轉劣勢始終唔算太難
特別係前者原來歷年來於班拿貝踢生死戰
羸波比率仲高達75%

不過前者作客一定腳軟
後者又冇左拉莫斯
都唔似係歐聯既真命天子

5)
波圖作客史浩克先輸0:1
不過佢地主場表現有保證
教練費拿又有料過對手既史林卡
晉級8強仲未絕望

不過最終無論邊隊入到8強
都應該會係當中牌面最差既一隊

6)
最矚目既始終係阿仙奴對AC米蘭
前者主場羸形勢但只係和波
高路托尼又傷埋
之後作客聖西路要靠晒辛達路斯
牌面一定輸蝕

不過只要佢地踢到05-06球季既防守水準
又未必冇機會
因為只要卡卡同埋施多夫被凍結
AC米蘭就會死晒火

小弟估雲加隨時用埋基拔圖施華去伙拍費文尼
踢 4-5-1 陣式
搶中場再靠突擊等運到

不過人腳唔算多既佢地既命運
好睇雲加既取捨
如果佢老人家太貪心
隨時搞到英超同埋歐聯雙失收場

而AC米蘭方面
除左目標明確同埋夠晒經驗之外
真係睇唔到佢地仲有咩利好條件
雖然近8場只失1球
但防守上其實大把弱點
咁弱既防守能力
就算可以搞掂阿仙奴
最終要打破宿命成功衛冕都真係幾難

2008-2-21 (1)

1)
紐卡素班主艾殊利雖然聲稱唔打算放盤
但消息指而家佢面對3億鎊既出價
可能會考慮改變主意出讓紐記既擁有權

2)
伏士向尼日利亞足總請辭

3)
查爾頓同山東魯能宣佈結盟

4)
圖盧茲射手艾文達被指成為保頓暑假既增兵目標

5)
意大利傳媒指施仙奴
成為曼聯同埋馬體會600萬鎊既羅致對象

6)
尼安同馬賽達成續約協議
粉碎佢季尾轉投熱刺既傳聞

7)
新特蘭成為最新一支想簽下布朗既球隊

8)
之前講過基治成為祖雲達斯既增兵對象
意大利傳媒指轉會費可能高達1200萬鎊
小弟就唔多信一個左閘會咁貴

9)
梅度否認佢會於季尾離開費倫天拿
意味佢唔會轉戰英超加盟樸茨茅夫

10)
高路托尼證實將要養傷3星期
令尋晚羸形勢但冇實際既阿仙奴
要出線8強又多左一個不利因素

除左艾迪巴約頂中楣
球證又判少左球問題12碼
佢地其實成場波自己 miss 左好多機會
其中好多次都兜口兜面省向
之前傳聞手指受傷而出唔到場既卡勒

雖然兵工廠尋晚主場冇失波
但放虎歸山
下回合作客仲要靠辛達路斯踢正選
都幾牙煙

11)
曼聯尋晚作客里昂和波1:1
賽前熱身C7受到不明來歷既 laser 影響
覺得有少少頭暈眼花
但仍可以落場比賽
曼聯為此作出投訴
而歐洲足協會就事件展開調查

2008-2-20 (3)

1)
格蘭收到死亡恐嚇

2)
高文正式接手高雲地利
簽約3年半
而佢即刻從舊球會富咸借用伊恩皮雅斯

3)
曼聯再被傳會於季後從士砵亭簽下華路素

4)
基文迪同伊朗足總合作告吹
因為佢希望長住西班牙
再定期去伊朗帶隊操練
但咁就同合約有所抵觸

5)
新特蘭想於季後從修咸頓簽下年青中場舒文
21歲既佢有一定腳法同埋傳送能力
值得留意

6)
今日第二段稿講過
里賈納既15歲天才後衛 Vincenzo Camilleri
受到車路士同埋曼聯既注視

里賈納而家向意大利足總同埋歐洲足協
投訴車路士搶走佢地既球員
車仔幾個月前開始私自接觸 Vincenzo Camilleri
而家當時人表明唔肯同里賈納簽約

7)
保羅費拉拿同車路士續約5年

8)
告魯夫重返阿積士
佢將會出任一個技術性既職位

9)
NBA 球星拿殊同熱刺主席達成合作協議
但未知做咩職位
亦未知幾時開始

10)
勞基摩亞以借用身份加盟西布朗

11)
卡斯利由於表現出色
將得到愛華頓既新合約

12)
葉士域治方面證實
佢地想向樸茨茅夫借用紐根特3個月

2008-2-20 (2)

1)
尋晚開波前
有消息指一旦賓尼迪斯被炒
維拉既奧尼爾會成為新領隊既其中一個候選人

2)
沙比艾朗素被傳會以1000萬鎊既價錢重返西甲
轉投巴塞隆拿以取代迪高

3)
賓希姆由於於車路士冇上陣機會
消息指佢考慮於季尾轉投紐卡素
轉會費約250萬鎊

4)
國米被指願意開價4300萬鎊買美斯

5)
阿仙奴同埋熱刺都被指
想從史托港簽入年青翼鋒湯美路夫

而西班牙傳媒指佢兩隊同時睇中西維爾新星卡普

6)
丹麥年青中堅卡查落實於季尾轉投巴勒莫
佢一度被指係利物浦,車路士,皇馬同埋米堡既增兵目標

7)
AC米蘭同埋阿仙奴成為最新同賓施馬扯上關係既球隊

8)
艾比達被指可能會轉投馬體會

9)
熱刺被指將於暑假向拜仁同埋巴塞隆拿
分別開價700萬鎊買東尼同埋古莊臣

而戴倫賓特就被指考慮轉投維拉
以尋求更多既出場機會
轉會費約1000萬鎊

10)
賓特拿被傳成為韋斯咸既600萬鎊羅致對象

11)
布力治再被傳將會轉投利物浦
轉會費約700萬鎊

12)
西班牙傳媒指皇馬睇中喜伯年射手史堤芬費查
仲曾派出球探去進行觀察

13)
水晶宮既射手摩利臣被指
將於季尾以自由身轉投雷丁

14)
之前同祖雲達斯以及紐卡素扯上關係既
捷克年青進攻中場卡龍達
而家最有可能轉投莫斯科中央陸軍
因為俄超轉會市場既 deadline 係7/3
充足既時間令佢地成功機會大增
另一方面,車路士亦被指有興趣買人
佢地可能會先同 FC Brno 傾掂數
再要求卡龍達簽下 pre-contract

15)
繼占士之後
利禾奴既意大利國家隊2號龍門艾美利亞
被指成為熱刺既新門將人選

16)
而家以借用身份效力愛華頓既加特拿
表示希望可以於季尾由熱刺正式轉會

17)
里賈納15歲後衛 Vincenzo Camilleri
被指成為車路士同埋曼聯既長線投資目標

2008-2-20 (1)

火速反底......
愛隊利物浦尋晚把握有2/3時間踢多一個人既優勢
以2:0擊敗國米
得到歐洲賽既第100場勝仗

精銳盡出既利記
有托利斯,謝拉特,馬斯查蘭奴同埋拉爾拿復任正選
一開波就向國米進襲

因為同車路士場波一樣
有盧卡斯利華同埋馬斯查蘭奴做 back up
被解放既謝拉特又再踢得好生猛
計表現應該係佢近來最好既一場
(其實亦係全隊近來最好既一場
小弟認為咁既表現
就算11個對11個
佢地都有本事羸)

前面既托利斯未 top fit
不過已經足以搞到速度上輸晒既馬達拉斯大出洋相
佢30分鐘就已經兩黃一紅可以提早沖涼
(雖然小弟認為第二張黃牌略嚴)

利記一開波就壓住國米去搶
當國米踢少個之後
利記個勢就仲勁
結果全場控球時間高達7成

如果利記班友可以把握得好0的
而如果球證又冇發雞盲
兩次手球都竟然唔罰12碼
就算國米算係死守得算相當唔錯
利記應該都唔使搞到臨完場前幾分鐘
先靠古治同埋謝拉特兩球靚波先 ko 國米

除左謝拉特之外
場波其實仲有幾個球員幾抵讚
馬斯查蘭奴全場搏命搶
全場面對甘比亞素,捷禾同埋韋拉都不落下風

而古治自從上場波打破入球荒後
今場又整球靚波打破彊局
佢雖然入波唔多
但勝左踢法全面又唔自私
小弟都幾鍾意佢
希望佢唔好因為家事而選擇離隊

而國米方面
左飛右撲既祖里奧施薩,
最終因傷被迫退下火線既哥度巴同埋
於馬達拉斯被逐後由防中改踢中堅既捷禾
都踢得唔錯
利記咁遲先入到波
佢3個真係好有功勞

而家兩球優勢
又冇失作客入球
晉級形勢係唔錯

不過依然唔可以鬆懈
因為去聖西路一旦輸左中場
以伊巴謙莫域既級數
有波送到去佢腳下
佢絕對可以輕鬆 ko 加歷查同埋希比亞
到時就大鑊啦

2008-2-19 (2)

因為唔同既原因
幾日都冇交過功課
(請見諒!......)
而家一次過講晒幾日以來比較重要既新聞

1)
有財團想出價2億5000萬鎊買紐卡素
仲為左令球迷比較願意佢地
想搵舒利亞做代表
而艾殊利就表明冇意思出讓

小弟愚見:
千祈唔可以賣
因為一旦新財團入主紐記
基瑾幾乎一定要走人
佢同舒利亞冇咩可能共存
而領導層成日有變動
紐記仲難翩身

2)
利物浦易主就越來越有機會成事
因為原來兩個美國佬既純利高達5000萬鎊
對於兩個美國佬走人
小弟好贊成
雖然領導層有變動對球隊短期而言會做成混亂
但佢兩個既存在真係對球隊有負面影響
咁就長痛不如短痛

3)
AC米蘭被指會同大哨續約
真係人間有情......

4)
英超既行政總裁可能
因為全球化(侵略)單野收皮而要下台

5)
法比加斯同阿仙奴續約5年
週薪高達8萬鎊

6)
杜林被傳季尾以自由身加盟阿仙奴
做教練兼球員

而雲加就否認會以20萬鎊簽下埃及龍門艾哈達里

7)
熱刺被指想簽占士同埋馬賽既喀麥隆射手尼安
而查基亦第 n 次被傳將轉投佢地

8)
祖雲達斯就被指想於季尾向阿仙奴出價買基治

9)
AC米蘭再被傳有興趣簽舒夫真高
而費拉利亦被傳可能以自由身從羅馬轉投

10)
利物浦被指有興趣向皇馬出價2000萬鎊簽迪亞拉
小弟認為成事機會唔大
因為一來已經就快簽到馬斯查蘭奴
二來到季尾賓尼迪斯都唔知仲係唔係利記既人

11)
曼城被指有興趣向些路迪出價買佢地既翼鋒麥基迪

12)
金正友到韋根試腳後
有望正式加盟

13)
布力般被指有興趣簽下高雲地利既馬耳他射手米蘇特

14)
韋斯咸被指有興趣於暑假簽布力治

15)
費格遜承認對里昂一對小將
賓施馬同埋賓艾化有興趣

16)
車路士將以色列小將賓沙夏外借到錫週三

17)
基瑾將布朗,布力治(800萬鎊)
同埋艾殊頓(600萬鎊)列為首要既增兵目標

18)
高文被傳接手高雲地利

19)
皇馬同埋雷丁都被指想簽下美國18歲射手艾迪杜里

20)
曼聯同埋熱刺都被指想簽下
剛果15歲天才防守球員 Paul Jose Mpoklu

21)
利物浦可能將保加利亞年青門將米赫洛夫賣到川迪

22)
桑坦德阿根廷中堅加雷被傳
可能於1200萬鎊既價錢轉投巴塞隆拿

23)
拉傑錫再被傳可能於季尾加盟國米

24)
謝斯高連倫被指可能以自由身轉投些路迪

25)
柏迪遜方面否認已接受費倫天拿對祖雲歷既出價

26)
沙比艾朗素被指成為巴塞隆拿同埋國米既1400萬鎊增兵對象

27)
唐寧已同米堡續約
粉碎佢轉投熱刺,愛華頓同埋紐卡素既傳聞
而韋達亦準備同米堡續約

2008-2-19 (1)

兩場波想講:

1) 利物浦對班士利

主場對低唔止一班既對手都要輸波出局
利記真係好羞家

但問題出0係邊?
而家個個都話賓尼迪斯要負責
小弟都認為佢要負一定責任
但有份上陣既球員其實亦好有問題

佢地既攻勢係比對手多好多
但竟然只入到一粒
除左對手既借將龍門史迪爾守到上左身
同埋賴少少冇運之外
小弟覺得其實佢地既埋門一腳做得唔好
先至係主因
哥治同埋古治從來都唔係一個好穩定既射手
如果前者把握得好0的
上場對車路士同埋星期六對班士利已經羸左波

而中場方面
巴布今場其實踢得算好
而入替佢既基維爾都唔錯
右面既班拿約雖然唔夠左邊既隊友搶鏡
但都不過不失

反而中場中既沙比艾朗素同埋盧卡斯利華就明顯唔算好
所以好多人都話謝拉特應該正選出場
寧願羸夠數再即刻換走佢
小弟認為歐聯一定比足總盃重要
謝拉特先做後備亦可以理解
不過75分鐘先換人就真係太遲
小弟認為當球隊被追平1:1既時候
賓尼迪斯其實已經要換佢入場搏殺

小弟成日都講中前場廢
大不了冇波入
後面既人廢就真係冇一隊會有好下場
有加歷查同埋希比亞既防線都頂輸高波
真係抵鬧
而完場前輸0個球
沙比艾朗素,懷斯同埋加歷查
真係應該要拖出去逐個打
佢地3個如果其中有一個做得好少少
場波已經唔使輸

而家0的人狂插賓尼迪斯
佢既命運好睇歐聯
對手國米個勢好利記勁多
好多人跟紅頂白話利記冇運行
不過小弟夠膽話場波只係五五波

國米踢意甲表面好似好掂
小弟就唔多唔少有'池中無魚蝦自大'既感覺

佢地條防線算係穩固
但速度只係一般

中場線係好有效率
不過唔算好突出
冇費高同埋占美利斯既話
仲冇咩創造力可言

前線既伊巴謙莫域雖然係當今既一等一射手
佢對住利記既中堅
就算單打獨鬥,甚至以一敵二都冇問題
不過佢始終係一個要人供應既射手

以利記既實力
仲要佢地係一隻受左傷既野獸
主場搶羸對手中場有咩咁奇
而中前場又咁多人有入球能力
今晚場波仍然可以審慎樂觀

2) 曼聯對阿仙奴

大家都知咩事
歐聯一定比足總盃重要
所以一齊留力

阿仙奴結果被大炒4球就好令小弟意外
而佢地輸咁多小弟認為有以下既原因

C7 連後備都冇份
泰維斯亦只係後備
不過佢地後防係夫添
打好個底最少可以保住不敗
中前場就用費查,星仔,卡域克同埋蘭尼4個邊緣人
去輔助朗尼同埋安達臣

而阿仙奴就要用賀迪同埋阿曼特查奧爾一對仲未夠班既閘
中場亦以雪到硬晒既基拔圖施華
代替 fit 到爆既費文尼
前面亦以賓特拿代替艾迪巴約
結果前中後3線都受影響

而阿仙奴既後備力量係英超前4當中最薄弱
曼聯之後又只係對今季走樣既里昂
但阿仙奴就要對雖然都有退步,
但始終係歐洲一線兼要衛冕既AC米蘭
邊隊易踢一唸就知
所以曼聯唔使過份留力
心態上亦可以踢得比較放

另一方面
曼聯今場既5人中場線真係搶羸晒阿仙奴
(小弟老豆覺得蘭尼踢得最好
小弟就覺得費查先係真正既最佳球員
雖然佢冇蘭尼咁搶
但佢既搶截比佢入既兩球更重要)

冇左費文尼既兵工廠真係冇晒動力
而曼聯其實於前面
已經由朗尼同埋蘭尼等人開始迫
阿仙奴班友由後場控球已經開始有難度
失左波之後一對未夠班既閘又被人屈機
邊有可能唔失波

而半場輸3球
已經分左勝負
伊布爾仲唔生性要人唔要波
阿仙奴就更加唔使追
不過講真佢地都唔似有心去追
佢地一早已經放棄左場波
對住有蘭尼玩敵既挑釁
佢地似踢人多過踢波
完場後仲有10個人留0係球場已經賺左

一場大敗唔會令小弟睇淡佢地聽晚對AC米蘭既機會
因為佢地已經試過幾次火速反彈
而只要佢地夫添出擊
依然威力驚人

何況而家人地既迪達肯定倦勤
卡勒又只有少少機會上陣
好大機會要用似龍門訓練員多過3號龍門既費奧利
佢老人家現年38歲
仲已經超過3季未為AC米蘭踢過正式比賽
點頂得住呀

2008-2-15

1)
朗拿度既主診醫生表示
雖然大哨既手術算係成功
但佢好可能因今次受傷而提前掛靴

2)
英國警方懷疑轉會市場再有’黑金’交易
所以決定對上月既轉會交易展開調查

3)
托利斯應該可以趕及下星期主場對國米既比賽上陣

4)
前意大利名將泰迪尼落實擔任
查伯東尼既副手
佢之前曾帶領意大利 U-21 羸得歐洲賽冠軍
亦曾執教國米

5)
利物浦被傳將於季尾向西維爾
開價2000萬鎊買丹尼爾艾維斯

6)
鍚菲聯於笠臣既帶領下越踢越沉
董事局想將佢升上神枱
搵佢做足球總監
但深感冇癮既笠臣一口拒絕
仲決定即時離隊
而家鍚菲聯由比歷維暫時接手至季尾

7)
西班牙傳媒指巴塞隆拿己有6人清洗名單
當中包括細哨,迪高,杜斯山度士,森保達,古莊臣同埋奧利古亞

8)
魯爾同埋卡斯拿斯都落實同皇馬再續長約
兩人將分別留效至2011年同埋2017年
而古迪亦會同皇馬簽下類似既長約踢到收山
粉碎佢將會離隊轉投拿玻里或者曼城既傳聞

9)
繼祖雲達斯後
熱刺亦被傳打算於暑假開價850萬鎊
買西維爾既卡普

10)
消息指一旦林伯特選擇離隊
車路士將向羅馬開價1500萬鎊買迪羅斯

11)
雖然有傳聞指黃金海岸銀河想斟簡奴以自由身加盟
但哈利列納表示相信簡奴會選擇留隊
佢只要多出賽兩場就會夠20場
令佢可以得到多一年既合約

12)
傳聞韋斯咸將於暑假向車路士出價400萬鎊買薜維爾

13)
索尼表示將會暫時終止同雷丁傾新約
要留待季尾先再定前途

2008-2-14

1)
英國傳媒指杜拜財團將於短期內
同吉列達成協議買佢既50%股份
而之後亦會買埋希斯既部份股份
以全面收購利物浦

有消息指易主後既紅軍
將會以阿拉干尼斯於下季取代賓尼迪斯

小弟個人認為如果佢地要用新領隊
就唔該搵個勁0的既
阿拉干尼斯係小弟心目中
一個明顯名大於實既無能領隊
仲成日講錯野得罪人
佢把口有摩連奴咁臭
但功力可能連佢5成都冇

2)
朗拿度尋晚為AC米蘭上陣對利禾奴
後備落場3分鐘左膝就受到重創
佢要開刀做手術
估計要抖9個月至1年
不過小弟覺得佢既球員生涯隨時因而提早結束

3)
雖然被人狂插
但英超聯行政總裁史根達摩表示
20間球會一致支持增加 1 round 去海外踢波搵錢既建議

4)
意大利傳媒指祖雲達斯想於暑假
向車路士出價800萬鎊買林伯特

5)
有消息指一旦新特蘭護級成功
將於暑假嘗試買艾殊頓同埋古馬斯

6)
愛斯賓奴中堅查基否認熱刺有向佢斟酌
但承認有幾間大球會對佢有興趣

7)
查伯東尼落實接手愛爾蘭
佢既人工一部份係由當地一個富商資助
而查伯東尼就表示想搵林伯拉迪做助手
不過當時人一直於阿仙奴搞青訓搞得咁好
會唔會放棄阿仙奴份工實屬疑問

8)
鄧尼再被傳會於暑假轉投紐卡素
今次既版本係佢會買斷自己同曼城餘下12個月既合約
再以自由身轉投紐記

9)
布力治警告格蘭
如果佢冇份於溫布萊踢聯賽盃決賽
將會下定決心離隊

10)
利物浦被傳將於暑假買尼日利亞射手奧丹維治
佢雖然埋門一腳唔算好可靠
但出名高速
亦可串演翼鋒
係賓尼迪斯向來喜愛既類型

11)
堅尼米拿被傳將會跳船
於暑假由打呲郡轉投格拉斯哥流浪

12)
勞基摩亞同埋蘇連遜都被指會遭外借
前者去西布朗
後者就去班士利
而如無意外佢仲會於星期六為佢地把關
作客利物浦既足總盃賽事

2008-2-13

1)
就英超聯於世界各地進行額外聯賽既計劃
亞洲足協尋日同埋澳洲0個邊亦今日相繼表態
前者呼籲亞洲各地足總唔好接受有關計劃

小弟就英超聯賽會咁既計劃
第一個反應就係唔 make sense
因為而家附加既一 round 聯賽
只係用抽籤決定對賽球隊
而前5又唔會對壘
搞到個聯賽好不倫不類

而且季中無啦啦搞一場
0個班已經因為冇得歇冬既球員將會更加辛苦

而成個 plan 雖然聲稱可為每間會帶來收益
但如果場波當0係香港踢
又只係例如打呲郡對富咸咁唔吸引既戲碼
隨時蝕大本收場
(今年既賀歲盃已經係例子)

而佢地若果只係為左推廣英超聯
倒不如搞多幾個英超挑戰盃
亞洲,大洋洲,美國等地每年暑假都搞

2)
以下係幾段關於利物浦既轉會消息:

馬體會19歲中場查維馬天尼斯,
摩納哥既20歲天才攻擊球員文尼斯,
卡坦尼亞既秘魯後衛華加斯,
被譽為哥倫比亞近年最有天份球員既 Sherman Cardenas,
甚至乎艾殊利楊格,哥利斯瑪,卡拉迪斯,
艾瑪,軒斯,加雷,大衛施華同埋米高莊遜
都被指係利記既增兵人選

而有入自然有出
沙比艾朗素被傳會重返西甲
但目的地未明
亦有消息指佢可能會成為收購查維馬天尼斯既籌碼

而懷斯同埋賓納特都被傳可能於季尾齊齊轉投紐卡素
不過後者亦被指可能會成為收購艾殊利楊格既交易條件

卡臣就近乎鐵定轉投維拉

希比亞同埋基維爾亦被傳將不獲續約

而哥治,禾路連,甚至乎古治亦被指有一定機會離隊

於一隊冇發展空間既格夫里亦幾乎肯定會離隊
但目的地似乎要視乎保頓同埋富咸既護級結果

3)
加蓬國家隊21歲中場代表捷哥馬
於國內聯賽進行時被撞暈
因失救而致死

4)
曼聯被指將以400萬鎊從華斯高引入天才球員阿歷斯
佢被形容為細哨加謝拉特既混合體

5)
雖然AC米蘭否認會將哥古夫賣到阿仙奴
但仍有消息指這宗交易最終會於暑假成事

6)
費查再次被指將於季尾離開曼聯

7)
舒利亞否認重返修咸頓

8)
拿玻里被指有意於暑假從皇馬引入古迪

9)
朗拿度被傳將不獲AC米蘭續約

10)
夏文同曼城續約一年

11)
亨達拉爾勢於季尾離開阿積士
佢既經理人透露暫時以羅馬比較積極

2008-2-12 (2)

1)
阿仙奴尋晚主場羸布力般流浪2:0
而家聯賽優勢增加至5分
但雲加依然表示唔可以掉以輕心
而費格遜就表示4月份對阿仙奴以及車路士既比賽
將會成為能否衛冕冠軍既關鍵

小弟就反而認為
雲加既貪心可能先會係關鍵
因為阿仙奴而家聯賽叫緊糊
歐聯又未出局
如果兩邊都搏
兵力不足隨時會兩頭唔到岸

2)
基文迪接手執教伊朗

3)
荷蘭足總有意搵雲馬維克
於歐洲國家盃決賽週後接手
而尹高爾早前就表示有意接手

4)
愛爾蘭足總表示將於今個星期內
落實搵查伯東尼接手球隊
而佢將於5月同薩爾斯堡約滿後正式接手

5)
謝拉特同埋加歷查都表示
而家球隊應該集中精神
同維拉以及曼城爭第4
(但偏偏冇提及而家真正排第4既死對頭愛華頓)

雖然小弟已經知道個事實兩個月
但聽到佢兩個投降......唉!

6)
加利仔同埋卡富兩個右後衛
不約而同表示冇意思退休

7)
車路士既球探 R.Bonhof 被發現
現身於漢堡對利華古遜既比賽
即時再有傳言指車路士打算季尾搵雲達華治加盟

8)
尋日講過有消息指曼聯打算放棄沙夏
而家既最新版本係曼聯想用佢加現金
同里昂收購賓施瑪
亦有消息指佢地其實打算開價4000萬鎊
一次過買晒賓施瑪同埋賓艾化

2008-2-12 (1)

##
非洲國家盃......

1)加納

係小弟估錯
加納同埋科特迪瓦兩大熱門都4強就收皮

不過前者既實力講真真係唔及06年0個隊
小弟於 preview 講過冇艾比亞遲早出事
佢地最終於4強出事
艾辛要墮後串演中堅
中場只得蒙達利就搞到條防線唔多夠力

而 preview 講過佢地既前鋒好似好緊張
點知睇多場對納米比亞就發現
原來佢地係冇料
而唔係緊張
0個個阿高高唔怪得只係踢森林
佢本身既踢法已經粗枝大葉
埋門0個腳仲要成日射網頂
入就掛全網頂入
唔入就成日一飛沖天

不過睇晒成個賽事
佢地既實力仍應該排非洲前4
出線南非世界盃仍然樂觀

2) 科特迪瓦

雖然佢地只得第4
但有睇晒賽事既都應該會發覺佢地真係近乎非洲頂班
人腳同踢法都掂

雖然4強場波失準出局
但講真場波既其中一個關鍵
係佢地於早段失左球半烏龍
打亂晒部署
不過唔識踢下風波
比佢地做到盟主都會有人唔服氣

3) 埃及

雖然佢地衛冕成功
但小弟始終認為科特迪瓦比佢地強少少

佢地羸在踢法夠整體
默契又好
反擊亦快

不過佢地捧盃其實真係有少少運
8強羸安哥拉入既第二球
同埋4強對科特迪瓦入既第一球
都係有運既
決賽入0個球仲係對手既桑治送既
咁樣羸冠軍
小弟又唔覺好有說服力

4) 喀麥隆

愛隊唔爭氣真係好令小弟失望

8強對突尼西亞
羸兩球就放軟手腳
被人追平後幾乎連加時都冇得踢就輸埋

4強對加納
雖然羸波
但發揮其實唔夠對手
有得羸只係神來之筆一個靚組織
同埋對手既前鋒勁廢

決賽終於因隊長桑治既低級犯錯而失落冠軍

除左桑治之外
其實佢地好多人都踢得唔好
龍門卡文尼水準飄忽
而桑治既拍檔比基簡直係計時炸彈
第一場對埃及手多多輸12碼
開壞個頭
4強又突然發神經推跌個醫療人員
小弟睇成廿年波都未見過有人咁樣被人趕出場

前面既伊度奧一踢淘汰賽就腳軟
抵佢冇得入選最佳陣容

如果佢地仲唔醒醒定定
隨時冇得踢南非世界盃

##
賀歲盃

港聯有得15年來羸波
除左要多謝無能足總竟然要用1100萬
搵3隊咁弱既隊手之外
(夏德同埋彭拿路仲要冇態)
都真係要多謝佢地自己踢得好

初賽對預左茅波既彭拿路
踢多兩個只羸一球已經算少
泰利史高斯同埋祖利亞都好搶

決賽對夏德
人仔細細既哥倫入兩球頭槌固然響晒朵
但迪天奴其實都抵讚
佢入場後分散左夏德條防線既注意力

而麥士維出名高速屈機
對住夏德0個條有名氣同埋高度
但冇速度既防線真係可以為所欲為

而法圖斯亦掃左好多波
佢雖然踢法粗枝大葉
但就效率搭夠

講本地聯賽既外援質素
雖然而家普遍仲係好唔掂
但個別既其實都相當唔錯

2008-2-11 (2)

幾日冇講過新聞
今日會有個小 round-up

1)
埃及以１：０擊敗喀麥隆
成功衛冕非洲國家盃
仲破紀錄第６次捧走非洲國家盃冠軍
（賽後感應該聽日會有．．．．．．）

2)
英超聯賽會計劃於將來額外加入一輪聯賽於海外國家進行
而１０場賽事將會在唔同既國家進行
新加入既比賽將以抽籤形式決定
但聯賽前５名既球隊就唔會對壘
如果成事英超聯賽會將於在　2011/12 年球季　進行新計劃
（遲少少有機會小弟都想講多幾句
因為個計劃唔多 make sense)

3)
幾段關於紐卡素既消息：

a)
助教皮雅臣向紐記請辭

b)
有消息指尼索比亞因為於轉會市場關閉前
唔能夠落實轉投熱刺而唔開心
基瑾就表明會盡力令佢留隊

c)
基瑾表示希望奧雲可以同球會績約

d)
基瑾接受訪問既時候
竟然透露想買亨利
雖然佢好似有６０００萬鎊既資金去增兵
但以紐記而家既 situation
小弟只係唸到３個字：大想頭！

e)
佢地被指將於季尾向米堡開價１０００萬鎊買唐寧

f)
埃及防中艾拉布被指
成為紐記同埋保頓來季既增兵對象

4)
韋拿表態想轉戰英超
熱刺同埋車路士都被指有興趣買人
而華倫西亞被指只要收到２５００萬鎊就會願意放人

5)
消息指如果林伯特同車路士最終達唔成續約協議
佢將會選擇以５００萬鎊買斷自己同球會餘下既合約
再以自由身轉投巴塞隆拿

6)
由於越來越多大球會睇中賓特尼
最新既就包括皇馬，華倫西亞同埋西維爾
曉士就表示想用新約綁死佢

7)
沙夏被傳將被曼聯放棄

8)
FC　東京被傳將於季尾以５００萬鎊
向祖雲達斯買尼維特
小弟認為成事機會唔低
因為老婦人向來認錢唔認人

9)
消息指一旦貝碧托夫於季尾離隊
熱刺將會向買薩拉戈薩既迪亞高米列圖作替補

10)
加納中場 A.安南被指成為
車路士於季尾既１００萬鎊增兵目標

11)
早前全面收購伯明翰失敗既楊家誠
一直想將麥馬拿文同埋范志毅
引入伯明翰董事局以增加話事權
可惜遭到伯明翰方面反對
佢地既體育經理仲聯絡其他股東
要求佢地否決有關提議

1２)
列卡特表示歡迎杜奧巴加盟巴塞隆拿
但就表明唔會以伊度奧作為交易條件

1３)
FC　達拉斯決定唔同丹尼臣續約
佢而家最新去向就係轉投彭美拉斯
佢既人工將會按表現而定

1４)
米卡李察士同曼城續約５年半至２０１３年

１５）
伯明翰簽下塞內加爾後衛迪亞達
佢可以踢中堅同埋右後衛
體力，制空力同埋助攻都唔錯
只係踢法好粗枝大葉

佢以自由身加盟加盟至季尾
佢之前效力比錫達斯
有消息指佢於球隊被利物浦大炒８：０後
成為高層下令炒人出氣既８個代罪羔羊之一
但亦有消息指係佢自己提出買斷合約離隊

１６）
國際體育會既１８歲巴西防中普斯邦
落實加盟曼聯
轉會費大約２３０萬鎊

其實持意大利護照既佢
早就傾掂數加盟曼聯
只係要等佢夠歲數先可以落實

2008-2-11 (1)

車路士對利物浦

曼聯意外輸波
如果車仔羸到利記既話
同曼聯既差距將會縮減到只得1分
但以佢地尋晚既人腳同埋表現
想羸利記又真係好難

先講排陣
主隊有林伯特復出
不過小弟反而好放心
因為佢同波歷克早已經被證明唔能夠共存

而客隊方面
希比亞同埋托利斯因傷倦勤
直接簡接令史基圖同埋哥治得到出場機會

史基圖既速度一定比希比亞好
對住安歷卡冇咁輸蝕
而哥治就令車路士班後衛輸晒高度
唔知賓尼迪斯係被迫用佢兩個
抑或係佢既針對性部署

中場方面
就有馬斯查蘭奴同埋盧卡斯利華
為謝拉特做 back-up
等佢可以專心進攻
而巴布就壓倒近期表演令人失望既基維爾踢正選

不過前線既古治
一如以往咁經常偏右搵食
就令佢地既陣式似 4-5-1 或者 4-3-3
多於 4-4-2

開波初段
車路士明顯想爭取球賽既主導權
但好快佢地就發現
主導緊比賽既根本係利記

哥治成為前線明顯既進攻點
隊友都睇住佢來斬波
不過利記最終都冇本事入波
原因除左高佬既埋門一腳唔多掂之外
其餘既球員冇意識走入去禁區搵食都係原因之一

一邊要斬波
另一邊既冇野好做
咁都唔走入去禁區搵食真係唔知等咩
而謝拉特雖然可以專心進攻
表現亦係小弟認為上半場全個球場最好既一個
但又未至於 free 到可以時時入禁區

結果羸左形勢
兼且有巴布唔玩自閉(不過唔知係暫時定係以後)
既利物浦都只係冇實際
仲幾乎因為馬斯查蘭奴既阻人前進而輸12碼
好彩萊利尋日比較手鬆利記先逃過一劫

下半場之後
利記優勢不再
好大原因係馬基里尼提醒所有人
34歲既佢必要時其實都仲可以幾堅

不過車仔亦唔見得特別有料到
所以大家既形勢只係相若
因為林伯特同埋波歷克依然撻極都冇火花
所以即使插水王馬路達入替胡禮菲臘斯
只要佢未好似首循環咁衝入禁區搏大霧
小弟都睇唔到利記有咩危機

直至71分鐘
當林伯特被米基爾入替後
仲要發覺賓尼迪斯以唔識斬波兼冇左腳既賓納特
取代巴布踢左邊後
(結果佢落場後只有一下冇人睇
但都頂唔中龍門既頭槌令人記得佢出過場)
小弟就開始有少少驚啦

不過即刻生猛左既波歷克
於80分鐘個腳窩利柱邊出界
而懷斯臨完場前既插水式頭槌回傳又有驚無險
整定各踢半場好波既雙方各得一分

曼聯同車仔各自失分
最開心既應該都係今晚先對布力般流浪既阿仙奴
而同聯賽錦標 say bye 已經8個星期既利記又失分
阿仙奴老實講就應該感覺唔大啦
反而本週齊齊羸波既愛華頓,維拉同埋曼城就應該幾興奮

P.S.:
由於時間關係
歐洲國家盃同埋賀歲盃應該會聽日先講

2008-2-10

3場波想講:

1) 米堡對富咸 (From: ck (thx a lot!))

憑艾利亞迪里的入球, 昨晚米堡以一比零擊敗富咸。

今仗球隊依舊收起保定, 利用南美中場中路組合, 及側擊力強的唐寧及奧尼爾, 對抗一班打仔,如梅菲、布拿特、利安安達臣；前鋒線則由艾利亞迪里加李東國衝鋒陷陣。

球賽甫開始米堡便大舉進攻, 十分鐘就得到回報,當時艾卡分波予奧尼爾, 奧尼爾推兩步後就突然放直線予高速的艾利亞迪里,結果後者不負所託, 冷靜地射穿富咸門將尼美大小龍門, 米堡就以這一入球擊敗了富咸。

這場賽事富咸下半場才有較入肉的攻門,但所謂入肉其實只是射中龍門而已, 加上其高Q大棍的踢法,完全比韋達同侯夫包晒；相反米堡的攻勢更盛,尤以侯夫四次頭槌攻門最為搶鏡,此舉也揭示了富咸的高空防守極度不濟。

看來富咸領導層真係要諗下如何好好使用旗下35個一隊球員了。

2) 維拉對紐卡素

對於紐記似乎已經講得太多
(每星期都係0個幾瓣野)
所以長話短說
只有幾樣野想講:

a)
對於紐記既中路防守
小弟已經唔想(亦唔會)再有期望

上場佢地掛住睇韋達就 miss 左侯夫
今場佢地對維拉
掛住睇馬田拿臣就 miss 左卡維
上半場卡維既頭槌柱邊出界已經算紐記大命
到下半場終於被卡維入左一粒
都仲未識死
結果又被人屈機整多球

如果被艾迪巴約同埋侯夫咁樣入波叫抵死
尋晚被卡維咁樣屈機屈幾次
只有係好好好好抵死

b)
基瑾既用人同埋調動都幾令小弟 R 頭
用卡爾踢左閘
但正宗左閘荷西安歷基就後備
如果後者真係咁唔掂
點解唔於轉會市場關閉前賣走佢

輸波都咁遲先換入安利
究竟佢有冇從奧尼爾半場即刻換走兩個既決定學野架

而維度卡就直情有得坐冇份踢
但問題係阿倫史勿夫又唔見得值得留0係球場

c)
雖然基雲尋晚蝦碌左
但佢依然係小弟心目中比較喜愛(或者係睇得順眼)既紐記球員

3) 曼聯對曼城

曼聯失分唔奇
但失晒3分小弟就真係冇唸過

費格遜言語間賴賽期
小弟就唔多同意
利物浦05年羸歐聯八強對祖雲達斯
都有為當年既慘劇進行默禱儀式
又唔見利記班友跟住踢得唔好?

曼聯主場都要輸
係因為明顯曼城踢得比佢地搏命同埋好

佢地冇左朗尼就將 C7 推前左
但佢同泰維斯冇咩火花可言
而泰維斯除左一腳轉身抽射之外就再冇咩佳作

中場方面
蘭尼坐冷板已經坐到硬晒
安達臣同埋史高斯
又被夏文同埋費蘭迪斯食住

中前場咁既表現
對住演出水準既曼城中後場又點會有甜頭
佢地最終破蛋成功
最大原因只係曼城既中後場臨尾精神唔集中
唔見得係費 sir 既調動得宜

而佢地輸0個兩球
就真係自己攞離衰
馬田柏度夫咁勁
因為睇唔住佢而出事既球隊多不勝數
當中包括韋斯咸,紐卡素,雷丁,富咸......
曼聯都可以任佢左右兩邊拉弓

而輸第一球幾秒內任人起腳3次
輸第二球就被馬華路禾尼今季兩第二次被用高波收死
(季初佢踢樸茅用頭槌幫球隊迫和曼聯
今次踢曼城就用膊頭)
曼聯咁樣輸其實真係冇咩好賴

P.S.:
因為唔夠時間
非洲國家盃同埋賀歲盃就之後先講

2008-2-6

1)
更正:
馬華路禾尼既轉會費原來只係480萬鎊

2)
尋日太忙未講......
杜奧巴失落非洲足球先生
原來係因為佢唔肯出席頒獎典禮
當時人當然不滿啦
佢表明以後都唔會再競逐非洲足球先生

人地身在加納踢緊非洲國家盃
非洲足協就叫人飛去多哥領獎
完全唔 make sense
而家仲要 no show 就冇獎
原來除左本地電子傳媒同埋亞洲足協外
世界上仲會有主辦單位咁野蠻

3)
卡忽路宣佈委任謝拉特為代隊長

4)
西班牙傳媒指告魯夫為巴塞隆拿私下同摩連奴會面
以討論佢下季取代列卡特既可能性
但前者已經否認有關報導

5)
有消息指卡卡可能最終要養傷4個月

6)
紐卡素被指打算於季尾向利物浦出價600萬鎊買古治

7)
魯殊將出任馬來西亞代表隊既教練
當地足總副會長 Khairy Jamaluddin 表示
希望佢可以改善球隊既埋門一腳

8)
西班牙傳媒指皇馬同埋巴塞隆拿
都準備於季尾向里昂出價2500萬鎊買賓施馬

9)
消息指韋達準備同米堡續約
粉碎佢有機會轉投紐卡素既傳聞

10)
費度同布力般流浪續約多1年
佢將會留隊至2010年6月

11)
阿方素艾維斯獲發工作証

P.S.:
1)
由於屋企部腦既 I.E. 自星期一起又有問題
小弟今日放工返屋企後
如果未能成功急救部腦
未來幾日將再冇辦法寫 blog
請見諒

2)
新年快樂!

2008-2-5 (2)

1)
利物浦即將落實買斷馬斯查蘭奴
佢將會簽約4年
轉會費高達1800萬鎊

另一方面,英國傳媒指熱刺準備於季尾
向利物浦開價1400萬鎊買沙比艾朗素

2)
馬華路禾尼既轉會鬧劇終告一段落
佢落實轉投曼城
轉會費為700萬鎊

3)
消息指瑞士足總將於2月尾
正式任命軒斯菲特為下任國家隊教練
佢將於08歐洲國家盃決賽週後接手執教瑞士

4)
西班牙同意大利兩地傳媒都指
季後勢必離隊既迪高
好可能以1000萬鎊既價錢轉投祖雲達斯

5)
熱刺準備於季尾再向米堡出價1200萬鎊買唐寧

6)
原來紐卡素於轉會市場 deadline 前
從 BK Haken 引入瑞典 U-17 門將 Ole Soderberg

7)
由於謝拉仿未同西布朗續約
有消息指保頓領隊麥臣想搵佢以自由身過檔
當麥臣執教西布朗時
佢兩個曾經合作過
傳聞有一定可信性

8)
熱刺既威爾斯左閘巴利
因傷將缺席餘下賽季

2008-2-5 (1)

今次只講英超既東北部打呲
紐卡素主場對米堡

(## 感謝 sammysir 同埋 ck 抽空客串)

From: sammysir (紐記)

有幸獲邀寫英超賽後報告,基於文字性質不同既關係,因此用了口語化形式書寫...

紐卡素上半場排陣,既似442,又似352,左面尼索比亞同杜夫輪流上前進攻,右面主要靠卡爾以翼衛姿態不斷上前幫手,間中巴頓都試過幫下手在右面斬波,不過作用不大,

中場中方面,安利復出負責造波分波,畢特主力做好防中既角色,而巴頓主要是協助這兩人助攻助守,
前面以阿倫史密夫串演類似中鋒角色,為前鋒奧雲衝鋒陷陣,而杜夫間中以輔鋒姿態出現

由於主場出擊關係,上半場紐記佔上風,角球為8:0,開波初段曾為奧雲帶來一次機會,可惜被球證誤判撞開守門員舒華沙,其餘時間所既角球均受制於米堡既高大後衛,因此作用不大,

進攻組織方面,中場造波及分波均受制於米堡中場既壓迫性防守,好多時將紐記既進攻逼回自己既後半場,甚至要比番守門員基雲解圍,這就間接影響紐記進攻既流暢性,甚至顯得凌亂,而泰萊亦間有甩漏,位置感不太足,制造一些險象,

防中畢特速度較慢,好多時都做唔到第一道牆既角色,以致上半場中後段米堡亦敢於向紐記埋門,而巴頓亦好似久疏戰陣,狀態不足,唔太清楚自己既角色,

阿倫史密夫,杜夫,奧雲既進攻配合不太有默契,米堡後防身型高大,但紐記仍用兩邊或中場斬波為主,可說是老鼠拉龜,創造性不足

巴頓同畢特既中場對抗性及狀態均不足,造就米堡好多時有打反擊既機會....

下半場初段米堡形勢較紐記好,製造好多射門既機會,不過紐記一次安利既罰球,造就奧雲騰空式頂入,士氣為之振奮,

之後兩隊形成對攻既形勢,奧雲亦踢得好勤力,好多時都回中場迎波及分波,轉做隊長果然較以前踢得投入.

而米堡不斷的反守為攻,面對今場以踢得比較柔既畢特同巴頓為主既防守,就不斷製造到好多空位射門,

卡卡巴算是包到好多後防既空位,但佢個位亦都被米堡不斷入楔,可惜泰萊好多時都幫不到多少忙,

奧雲射門撻Q,維度卡雖能控到球及牽制對方後守,但動作始終太慢,好多時紐記球員攻到對方禁區就臨門起腳失機,注定埋下被追平既伏筆,而最後被米堡後衛屈機成功,結果握手言和.

總結:

紐記進攻受制於米堡身型高大的後衛及粗枝大葉的踢法,身體對抗性亦不足,阿倫史密夫作用不大,畢特今季拚搏過多,狀態漸沈,等菲爾回來讓他休息一下會好些,而維度卡及巴頓如能及時操起,應該對日後紐記既戰績有所提升,和波雖感失望,但踢法進取,球員鬥心較以前強,等4名非洲球員回來,戰績應可獲改善..





From: ck (米堡)

賽後報告:
一比一的比數,完成了次循環的東北打比大戰(球隊還有一次要作客光明球場)。

就球隊步署而言,修夫基先排出四五一陣式, 以體力充配的卡達莫任防守中場,而艾卡就負責派牌,洛咸碧克負責連繫中後場再施以長傳戰術,配合擅打反擊的艾利亞迪里作單箭頭,兩翼則由唐寧及奧尼爾擔任, 防線則以侯夫拍韋達,一個緊盯奧雲,一個睇實史密夫,加上兩閘由穩陣的普加迪斯及楊格擔綱, 好肯定的是上半場米堡打穩守突擊,先做好防務先。

一如我所料,紐卡素頭二十分鐘壓住米堡來踢, 兩分鐘時巴頓的射門被韋達閂出,而奧雲的頭槌攻門又被判詐糊, 這球詐糊如果睇番電視慢鏡, 奧雲頂之前的確掂到舒華沙的, 但是否真的影響了球証的判斷那就不得而知了。紐卡素的控球時間的確很多,但很多時他們只會吊球高波去中間, 因此韋達同侯夫均能一一化解, 對於他們來說應付高波只是他們表演的時間。

二十五分鐘過後米堡開始組織到反擊機會,當中奧尼爾與唐寧三番四次策動反擊,可惜前面只得艾里亞迪利一人,此子抵讚的地方是他可以做到全場奔走, 故此絕對符合快速反擊戰術, 不過因為他的周圍走踢法, 有時隊友交波, 好多時都比過晒位,導致失去了比波的目標, 波又落番去對手腳下。希望阿方素艾維斯及米度的復出,可以解決欠缺正中鋒問題。上半場最後各無入球,0-0打成平手。

下半場甫開賽,米堡至少都可以保持住控球在腳,並慢慢地把攻勢組織,當中艾利亞迪利、唐寧及奧尼爾兩次的射門皆被基雲所救, 而侯夫把卡達莫搏回來的罰球射到球迷看台上。此時我發現 ,今日米堡多了用右路攻門,好明顯尼索比亞常以左中場支態出現,導致奧尼爾打得比往日輕鬆,且很多射門、傳中機會。

到了59分鐘, 僵局終於打破, 尼索比亞搏得楊格的犯規,於左路獲得罰球, 由安利開出, 此時奧雲攝得個靚位之餘並搶得最高點,一頭把皮球送入網。這球失球,奧雲攝得靚,彈跳力又佳, 我無得挑剔, 抵輸!

及後紐卡素以維度卡及米拿,入替史密夫及安利, 當中米拿有機會入第二粒, 可惜僅僅斜出, 而奧尼爾又有一個射門機會, 可惜皮球省中卡卡柏。

到了70分鐘米堡換入李東國,把卡達莫換出,變回4-4-2陣式。此時米堡大舉進攻,當中韋達的射門再逃不了基雲的十指關, 之後皮球差點落在李東國之時,卻給卡卡柏快一步剷走。

這場賽事不得不提李東國,他浪費了幾次傳送的機會,觸球的感覺又不知去了哪裏, 除了可以多個人hold波外,真不知他可以做甚麼。

米堡追成平手的入球於88分鐘出現, 此時韋達,侯夫已經全部走上前線, 艾卡就在右路(又是紐記左面的防線)把球吊入禁區,處於越位位置的李東國漏頂,但後上的侯夫頂到, 皮球呈拋物線入網,笠過基雲,追成一比一平手。

於補時階段米堡狂攻紐卡素, 韋達的窩利被基雲所救, 之後李東國搏得罰球,唐寧主射中柱,艾利亞迪利補射入網,惜被判越位在先。

大家最後握手言和,各得一分。

這場賽事兩隊平分分數是最好的結局,皆因雙方都有取勝機會, 米堡於落後下仍能沉著應戰,防守仍能保住不失多球固然抵讚,且取回主動權去製造不少攻勢, 到追成平手之後亦沒有特別退縮, 繼續與紐記對攻,這場打比大戰頗為精彩的。

值得一讚的是球隊打出了隊型,且做到了全場緊迫,把紐記最危險人物之威脅減至最低,且常於右路取得甜頭；而基謹的戰術落伍, 相信佢自己都要進修下之餘,亦要諗下如何取得更多入球,去迎接第一場勝仗。





From: 小弟

先講陣容
主隊有安利坐完波監復出
亦有巴頓復任正選
佢兩個代替已離隊既羅辛奴同埋占士米拿
其餘人腳不變

客隊既陣容亦有變動
唔知係傷抑或唔 fit
美度連後備都冇
加上 Tuncay 因傷倦勤
前線只用艾里亞迪里踢單箭頭
而保定雖已經傷癒可候命
但正選位置依然被卡達莫所取代

成個上半場
(特別係前25分鐘)
紐卡素明顯形勢佔優
不過羸既只係控球時間同埋角球次數

講真特別令小弟印象既 moment 只得兩個
一係3分鐘奧雲把握舒華沙既低級失誤入波
被誤判為侵犯龍門
(講真小弟認為奧雲只係好輕微咁掂到舒華沙
球証實在吹得過嚴)
二係普加迪斯無心之失犯左手球
(小弟今次就認同球証唔罰12碼既決定)

小弟認為紐記羸形勢但冇實際既原因
在於兩邊攻守唔夠平均
左路繼續有杜夫同埋尼索比亞
而復任正選既安利雖然多於中路出現
但佢始終係左腳仔
而佢踢正選令占士米拿要先任後備
導致右路主要靠年紀有返咁上下既卡爾後上助攻
雖然阿倫史勿夫同埋巴頓亦曾於右路出現幫手
但與其咁搞
倒不如用占士米拿取代前者仲實際

而紐記面對輸晒控球時間
但起碼中後場夠人多,有隊型,兼肯踢擦鞋仔波既米堡
亦難以於中路夾硬組織攻勢
而傳球空間有限既佢地
有時只有無奈咁向後傳
從後場重新來過
但重覆又重覆咁做事實上又唔見得會有用
解釋左點解紐記有安利對組織都冇咩大幫助
而不斷既兩邊出波
對住韋達,侯夫同埋普加迪斯等高佬真係幾難會有優勢

而米堡方面
雖然人多頂住主隊
不過控球指數輸咁多
小弟認為同冇左保定好有關係
卡達莫雖然好有潛質
但講攔截能力同保定仲有段距離
要知道緊迫對手難
(難在辛苦)
成功攔截對手更難

而米堡成個上半場有威脅既攻門
當然亦係唔多
不過有都要多得卡爾同埋史堤芬泰萊既犯錯

成個上半場可以講話緊張但唔精彩
但下半場就好睇得多

米堡上半場最後既1/3時間
其實已經開始踢得比較放
但下半場開波後既十幾分鐘
個勢就直情可以講係反客為主
不過面對穩健既基雲
以佢地既埋門把握
入唔到到波又真係唔奇
(佢地全英超入波只比打呲郡多
唔多唔少都真係可以反應佢地既埋門把握)

結果紐記最終憑奧雲既頭槌打破悶局
米堡輸高波都幾令人意外
高佬都要輸高波好多時係因為被人涉左前柱位
今次都唔例外

斬波既安利同埋搶點既奧雲
都明顯有默契以近柱為目標
球波似係練波得來既成果
唔似係神來之筆
但奇就奇在佢地踢左差唔多2/3場波先識咁做
不過遲做點都好過唔做

及後紐記乘勝追擊
先後以占士米拿同埋維度卡
入替安利以及有黃牌在身兼表現平平既阿倫史勿夫

而講波佬亦曾經講過換走安利係咪明智
但小弟可以好肯定咁話係
因為佢既體能向來唔算好
要佢搏足90分鐘未必化算
加上今場紐記組織方面依然唔算太理想
倒不如換入占士米拿
踢簡單既兩邊側擊好過
雖然占士米拿落場後既表現唔搶
但基瑾起碼做左佢應該做既野

而之後紐記既攻勢雖然唔夠米堡多
但都有一定威脅
而奧雲表現幾落力
不時回中場搵波踢
仲試過返到三閘線幫手防守
可能個隊長臂章真係有0的用
今場係佢加盟紐記後比較令小弟留下印象既一場波
不過佢76分鐘心急撻Q
小弟就認為好可能係場波既轉捩點

而落後既米堡當然要比之前攻得更搏命
修夫基亦做左佢既份內事
先後以李東國同埋 A.莊臣
入替卡達莫同埋洛查碧克
改踢 4-4-2 陣式

不過小弟估修夫基只係盡人事
佢都可能都預左李東國唔會有咩建樹
李東國入場後面對卡卡巴
接連將第一控球差,唔夠意識等既
亞洲前鋒常見弱點暴露於人前

而米堡前面又唔到波
都仲有後面既高佬可以倚靠
今季韋達出色既助攻能力
已經令人留下好深刻既印象
小弟玩 Fantasy 買左佢
而米堡每次有死球攝影師先生都 focus 佢
紐記球員都應該明顯好顧忌佢
但咁唔代表佢地可以對米堡既其他球員大意
結果放生左侯夫既佢地
就只有付出被追平既代價

幾日前作客阿仙奴
艾迪巴約開記錄既一球
防守佢既係移入中路補位既卡爾
尋晚侯夫入波既時候
隔離竟然又係卡爾
(遠少少應該都仲有個占士米拿)
小弟第一個反應就係
究竟一對中堅當時又搞緊咩
竟然連續兩場波都輸在錯配防守

而今場艾卡出波既位置
同上場對阿仙奴輸第一球既位置一樣
都係尼索比亞既左路
對阿仙奴吞3蛋既賽後感已經講過
上場起重彈舊調既佢
於球隊死守時都成日失位
今場佢仲要掛住助攻
結果令紐記左後防空間更多
(只要睇奧尼爾成日入鏡已經知)

左路同埋中路既防守
連續兩場犯上相同錯誤
兩個字:抵死

和波後兩隊繼續對攻
米堡仲有唐寧於補時階段罰球中柱
艾里亞迪里補中又越位在先
最終各一平手

唔係馬後炮
尋日小弟同米堡迷 ck 講起場波
已經講話五五波
和波味濃
因為紐記雖然輸近況
但睇得出佢地真係有 heart
而近況唔錯既米堡
對中下遊既球隊又唔見得特別醒
今季只羸過富咸同埋打呲郡
(羸前者仲要多謝球証既誤判)

講今場表現
紐記今場既表現係基瑾上任以來最好既一場
而佢地上半場係明顯羸形勢
而下半場兩隊既表現都有改善
但就以米堡踢得比較好
大家今場都各有幸有不幸
和波都算合理

最後想寫多幾句紐記既野
基瑾講到出口想買進攻中場
但其實小弟認為紐記季後更應該買防中
雖然小弟有時會幫畢特等人講幾句好說話
但如果基瑾堅持踢 4-4-2
好似今場咁
想用畢特同埋巴頓兩個有截擊力既中場
但又想用安利踢進攻中場
最終就只有放棄一隻翼
咁倒不如季後搵個超勁既防中專責搞防守
(不過一定要超勁......要勁到好似以前既堅尼,韋拉咁既 level)
等安利可以專心組織攻勢
(佢既表現其實有改善空間)
而基瑾亦可以繼續用齊兩隻翼

2008-2-4

1)
花名'小黑'既'香港之寶'姚卓然日前病逝

2)
蘇拿被指將為紐卡素出任球探
為紐記於意大利搵新血
所以佢將可以繼續長駐意大利工作
唔使辭去 U-21 既助理教練一職

3)
謝拉特被英格蘭球迷選為2007年
最佳既代表隊球員

而米卡李察士同埋碧咸就分別係第2同埋第3

4)
查伯東尼成為接手愛爾蘭代表隊既大熱

5)
羅賓奴,祖安同埋卡卡被傳將代表巴西出戰奧運

6)
原來迪科爾暫時只係以借用身份加盟樸茨茅夫
但交易將於本星期內完成
消息指係因為佢地於未賣出馬華路禾尼之前
未有足夠現金
而馬華路禾尼過曼城單野將於今日有定案

7)
利物浦被傳將於季尾向布力般流浪出價700萬鎊買辛達告魯斯

8)
阿仙奴被指將於季尾向波圖開價2000萬鎊買哥利斯瑪

9)
英國傳媒指 C7 已同曼聯續約6年至2014年
週薪高達14萬鎊

P.S.:
由於米堡迷 ck 既大作仍未到手
小弟又想等埋佢一次過出晒3段讀後感
所以個 post 要稍為押後
請見諒

2008-2-2

1)
更正一:
之前講過既'伊巴謙莫域二世' Goran Slavkovski
原來最終因為暗傷
而過唔成米堡
佢最終以借用身份加盟錫菲聯至季尾

(多謝米堡迷 ck 既指點)

2)
更正二:
尋日 comment 講過紐卡素既新血
除左 Ben Tozer,
Tamas Kadar
同埋 Fabio Zamblera 之外
尋日講少左 Wesley Ngo Baheng
佢仲已經早於1月初已經為紐記上陣

3)
簡奴迪當選非洲足球先生

4)
舒利亞拒絕重返紐卡素擔任教練

5)
艾殊頓被指成為曼城季尾既600萬鎊增兵對象

6)
熱刺被指將於季尾向西維爾出價1000萬鎊買卡普

P.S.:
今個星期既重點賽後感
當然係紐卡素對米堡既東北部打呲

小弟非常高興
搵到紐記迷 sammysir 同埋米堡迷 ck 一齊發表意見
一場波主客兩隊既球迷陪小弟寫波
唸起都興奮

2008-2-1

1)
曼城以900萬鎊羅致馬華路禾尼既計劃爛尾
因為佢地未能於 deadline 前完成註冊
曼城就指馬華路禾尼未能於原定時間趕到曼城
令佢地唔夠時間做野

不過哈利列納就暗示佢地同賽會講緊數
因為樸茨茅夫已經以700萬鎊簽入迪科爾
同埋借左巴路士
前線已經突晒腳
而如果賣唔出馬華路禾尼
佢地就好難做到收支平衡

2)
而曼城雖然未知能否簽入馬華路禾尼
向史浩克04出價370萬鎊買蘇連拿臣又被拒

但就成功以500萬鎊從巴素利
簽入厄瓜多爾射手卡斯度

而菲臘比文仙尼(國米教練文仙尼個仔)就以借用身份加盟

3)
紐卡素外借羅辛奴到拉素直至季尾

小弟都幾意外兼失望
因為紐記本身已經冇咩好中堅
新中堅又買唔到
而家仲益埋拉素......
好費解!

4)
曼聯將文洛祖外借到彭拿典奈高斯直至季尾

5)
富咸簽入列馬倫
轉會費不詳

而史泰迪利就以借用身份加盟

6)
保頓最終未能從雷丁以700萬鎊簽入列達
但就從修咸頓借用波蘭高大射手拉斯亞克

7)
達保以自由身加盟拉素
簽約年半

8)
查奧爾被外借到雷恩

9)
基拔圖最終成功加盟熱刺
消息指佢當初未能加盟係因為文件既問題
而唔係體測失敗

10)
韋根向辛尼特借用挪威中堅海根

亦從維拉利爾買斷厄瓜多爾中場華倫西亞

11)
艾莫迪安拿落實由巴勒莫轉投拖連奴

12)
A.加特拿以借用身份加盟愛華頓

13)
阿爾克瑪爾打算告上國際足協
以阻止阿方素艾維斯為米堡出賽
令趕及於 deadline 前29分鐘完成轉會既佢
依然未能安心

14)
原本有消息指卡拉斯奧路同意轉戰蘇超
同意總值800萬鎊既4年合約
加盟格拉斯哥流浪
但佢於最後關頭決定改投布雷西亞

15)
利物浦方面雖然表示
仍未完成馬斯查蘭奴既交易
但消息指佢本人已同意4年約
轉會費高達1860萬鎊

16)
伊薩臣反對被外借到加拉塔沙雷

17)
利物浦將奧地利小將 Besian Idrizaj 外借到奧咸至季尾

18)
史提芬戴維斯以借用身份
由富咸轉投格拉斯哥流浪