補返熱刺對紐卡素既賽後感......
之前講過紐卡素比熱刺有鬥心
就算作客都有力搏1分
但而家4:1既賽果就搞到通街眼鏡碎
小弟打死都唔信有人估得到
雙方都以 4-3-3 陣式應戰
客隊既基瑾已經連續3場用咁既陣式同埋人腳
雖然小弟依然認為基瑾0個陣仲有大把改善空間
但反正已有一定默契
上場仲開埋齋
再用無可厚非
但主隊既拉莫斯竟然都用 4-3-3
就好令小弟意外
比賽過程同埋賽果已經證明左佢今次失左手
而小弟打算就雙方既 4-3-3 陣式同埋用人去分析場波
先講雙方既前線
3個前線合力入第3球
有組織,奧雲埋門一腳都做得好好
算係一球金球
但小弟始終認為佢地3個既組合有好多弱點
維度卡真係唔搏得幾耐
如果基瑾下季真係仲繼續堅持用3箭頭
佢就真係要盡快搞掂 B.高米斯單野
但要馬田斯打邊同埋奧雲墮後幫波
小弟認為就真係唔係咁好
因為前者既傳中能力只係一般
後者亦唔見得特別擅長做中前場既聯繫
而同時間佢兩個擅長禁區搵食既本領就好多時會浪費晒
熱刺方面既3人箭頭
亦有類似既問題
祖爾時代既羅比堅尼有時已經要墮後串演進攻中場
但從未試過有佳作
而貝碧托夫同埋戴倫賓特無可避免
因前線多左人而少左發揮機會
連走位都會受影響
中前方面
紐記既3人似乎慢慢有默契
其實3個都係主守
但巴頓同埋謝列美比較多機會參與進攻
並中小弟覺得巴頓係3人當中最好
佢反守為攻既效率高左
入第4球就係全靠佢成功攔截之後
再助攻俾馬田斯
今場波既巴頓應該有佢本身全盛時期6成水準
講真佢唔發神經既話
絕對唔比贊拿斯,柏加,李奧曲加同埋卡域克差
希望佢錯左咁多次之後
肯做返個好人兼生性踢波
雙反對手既中場比較多問題
索高拿截到波之後都唔識發板
紐記球員見佢有波在腳驚都唔使驚
而侯度史東就因為唔擅長攔截
又走動唔多
經常只有等波踢
馬白蘭基就經常偏左搵食
加埋後上既奧哈夏
左路都算有一定威脅
但因為出多個前鋒
就搞到右路 hold 起左艾朗連儂
加上曉頓既助攻只係一般
令佢地攻勢唔平衡
而由於熱刺中前場咁多問題
到輸波既時候先識變陣
就算改用一個介乎 4-4-2 同埋 3-5-2 之間既陣式
對住士氣同埋信心都返晒來既紐記
仲因為後防多左空位而輸多兩球
最後想講多幾句紐記
佢地今場雖然先失波
但就冇好似以前咁即刻散晒
抵讚!
不過今場羸係羸鬥心同埋熱刺用錯陣同埋人
講實力佢地其實就算 top fit
都只係同人地五五波
紐記仲有好多要改善既地方
前幾段已經講左前線問題
所以唔再多講
後防方面都係類似既老問題
就令到中場用晒3防中都係死路一條
寄望基瑾可以搵到好中堅
等中場可以早日收起畢特
用多個有組織力既中場
例如安利或者索性季尾買卡域克
P.S.:
基瑾睇住1月唔肯加盟既玻璃腳活基治
開波幾分鐘就出洋相
又見到以為自己好勁
嫌紐記未夠班而想過檔維拉既戴臣
都唔見得有本事一夫當關
怕且佢於偷笑既同時
都可能要考慮俾多次機會羅辛奴
反正佢去左拉素都唔能夠長做正選
佢經理人又放風
一旦拉素到5月尾都者提出買斷佢
佢可能要重返紐記
咁就不如到時俾多次機會佢
因為而家陣中既其他中堅實在冇一個信得過
2 comments:
由於埸波小弟真係無睇，只係睇左入波片段，所以只能酌量講下......
失第一球，其實一對中堅唔多唔少都要負番d責任。依我琴晚睇完精華既記憶，應該當時禁區得戴倫賓特一個接應傳中，兩位中堅都竟然可以走甩。
至於我地入既第三球，的而且確係三人前鋒默契既成果。不過正如網主分析，維度卡已經有番咁上下年紀，下季多數會退居後備。其他兩人亦如網主所講一樣。
三人防中今埸無咩點俾意見，不過其中兩人都有波入，雖然我覺得兩球都帶有少少幸運，不過都叫做努力既成果。祖爾巴頓雖然無波入，不過完埸前佢搶果下真係一絕，造就埋馬田斯入波。相信祖爾巴頓應該逐漸會回復昔日水準。
個比數小弟都估唔到。雖然睇個比數似乎贏得好輕鬆，但係唔係多得熱刺一早就無野爭，我估今埸未必會出現咁既結果。
p.s.小弟都認為應該收番羅辛奴。不過有唔少巴打都覺得基瑾唔會重用羅辛奴，隨時就算拉素唔買斷佢，都會掛牌賣走佢。其實羅辛奴加盟果陣打得唔係太好只係因為未熟習英超，季中果時佢已經打得穩左，不過又俾基瑾借走。
另外，一個好消息，就係安利已經復出，係岩岩預備組打左一埸比賽，仲入左球協助球隊1:1迫和man u。
To: 舒利亞
1)
輸0個球波
係輸菲爾盯得戴倫賓特唔夠貼
加上起跳唔夠人地快同埋高
小弟覺得羅辛奴點都好過菲爾或者卡卡巴
2)
如果安利可以候命
小弟希望基瑾搵次試下用佢取代畢特
雖然少左個防中
但組織能力會好好多
奧雲仲可以唔使經常返後面駁腳
計落可能有賺
Post a Comment