想講下小弟心目中歐國盃既最佳陣容......
龍門係卡斯拿斯
4人防線(由左至右)包括:
沙哥夫,基亞連尼,佩奧爾同埋沙治奧拉莫斯
2個防中就係辛拿同埋派路
3個進攻中場包裝:
大衛施華,史尼達同埋艾沙維
單箭頭係F.托利斯
印象中既好龍門仲包括雲達沙同埋保方
選卡斯拿斯係因為自從踢淘汰賽開始
佢既狀態進一步提升
集中力亦好強
而佢經常成功出迎應付高波
幫輕左出名畏高既防線
另外,佢於對意大利既賽事4個12碼都捉到路
仲救到其中兩球
好難唔選佢
沙哥夫其實除左於4強俾沙治奧拉莫斯食住之外
其餘既比賽都有非常好既發揮
而佢每次助攻後都趕得切回防
亦經常移入中路補位
講名氣唔及拿姆同埋艾比度
但表現就羸晒
基亞連尼臨時拉伕頂替馬達拉斯即有高水準演出
好難令人相信佢只係踢左中堅幾個月
佩奧爾於8強復出後一直有穩定演出
佢帶住馬真拿去夾擊東尼同埋柏夫奴真高
令球隊冇之前咁畏高
沙治奧拉莫斯於分組賽頭兩場波既表現其實差到幾得人驚
不過自從俾傳媒同埋阿拉干尼斯狂插後
於8強比賽就踢返應有水準
冇唔睇形勢就助攻
而就算助攻上前亦趕得切回防
佢同埋佩奧爾少左助攻其實係成熟既表現
而佢亦係整個賽事唯一一個頂得住沙哥夫既右閘
辛拿就簡直係西班牙既馬基里尼
佢為4個進攻中場做晒所有粗重野
係無名英雄
連艾沙維同埋波歷克都俾佢搞到冇晒發揮機會
派路既作用亦近似辛拿
攔截功夫雖然唔夠辛拿好
但論到補位,放長波同埋處理死球既功力
佢依然係現時所有防中當中最好既一個
小弟認為佢既缺席亦係意大利8強出局既其中一個原因
至於3個進攻中場既名額
一定要有西班牙球員
不過小弟既選擇就係當中最冇名氣,最唔受注目既大衛施華
同恩尼斯達,沙維同埋法比加斯相比
佢雖然冇一場波係最搶鏡
(極其量只有對意大利既上半場)
但勝在表現最穩定,跑動亦最多
恩尼斯達同埋沙維於對瑞典同埋意大利既比賽都冇料到
法比加斯踢得搶鏡既比賽其實只得一場四強
對比下大衛施華就成為小弟唔難唸既選擇
史尼達就係小弟既另一個選擇
佢其實於分組賽頭兩場都好搶鏡
荷蘭輸俾俄羅斯既比賽
佢亦係中前場唯一一個踢得比較好既球員
如果其他攻擊球員可以踢好0的
有人走位同佢合作既話
俄羅斯根本唔可能近乎全面封殺荷蘭既攻勢
而艾沙維就係小弟既最後一個選擇
佢雖然只係踢得3場波
當中最後一場仲隱左形
不過對瑞典同埋荷蘭既比賽已經令佢攞夠印象分
盤,傳,控,射都絕對係頂班貨色
前線方面
小弟既選擇係神射手韋拿既拍檔托利斯
因為嚴格而言前者只係踢左兩場好波
而且佢既踢法幾自私
後者雖然腳風唔順,但勝在踢法全面
頭頂腳踢,助攻入波,應有盡有
p.s.:
賽事最佳球員竟然係沙維
真係俾所謂既技術小組吹到啤一聲
小弟認為卡斯拿斯或者辛拿比佢更值得當選
因為西班牙冇任何一個中前場攻擊球員係不可或缺
但相反冇左卡斯拿斯或者辛拿既話
小弟打死都唔信鬥牛勇士有盃捧
2 comments:
今屆歐國盃，有睇既賽事唔多，而且網主揀既球員都幾正路，所以都無咩異議。其實我心目中都有唔少球員係值得入選，包括雲佬，洛賓，如果法國可以走得遠d，馬基里尼都會係其中一個。
今屆歐國盃有少少遺憾，因為有唔少我覺得會係今屆賽事光芒四射，或者有所表現既球員，都因為得唔到機會，或者受球隊影響而未能有預期般既水準。包括法國既賓施馬同拿斯利，荷蘭既亨特拉爾(有波入，但係出埸機會唔多。)仲有既係意大利既波里路等。
當然亦都有唔少球星上位，最好例子當然係艾沙維啦，仲有一班俄羅斯球員。
To: 舒利亞
1)
今屆賽事最令人高興既係
多左球隊肯踢進攻足球
2)
小弟認為馬里奧高美斯亦幾人令人失望
Post a Comment