2008-8-31

三場波想講......

1) 阿仙奴對紐卡素

紐記未失波前既防守部署其實唔錯
至少基瑾識得重點加強左兩閘既防務

不過一球小弟認為唔應該判既12碼
就幫輕左兵工廠好多
亦令佢地可以踢得更放
加上紐記連運都輸埋
畢特既頭槌又中楣唔入
令主隊最終得以輕勝

兵工廠重新上力
走位同埋組織能力都正常返
有晒隊型既佢地羸波合理

而對比之下
紐記今場既反守為攻同埋控球方面都做得唔算好
就算有人攞到波
其他既都散得唔夠開
亦唔夠快
(當中只有蜘蛛俠一個比較似樣)
而有波在腳既又心急搵人俾波
最終就只會有失去控球權既下場

兵工廠本身已經羸技術
紐記班友仲要咁易失波
就只會形成惡性循環
有更多時間俾人搓住踢

如果唔係兵工廠半場就有兩球在手
下半場可以開始行行企企
紐記既控球指數應該連44%都冇

2) 侯城對韋根

主隊突然打回原形
當中關鍵一定係比賽初段就輸左烏龍波
遇上向來唔識入波,但突然神勇既客隊
result 就係一個發夢都唸唔到既賽果......0:5!

主隊如果唔改善後防
都唔知佢地點護級
而客隊領隊布魯士同埋班球探既眼光真係好
從埃及借到件好野薩基
睇來季尾0個至少500萬鎊既轉會費都應該走唔甩

3) 車路士對熱刺

1:1既最後賽果
如果有人只睇上半場
就會覺得車仔好唔抵
因為林伯特既笠射過唔到身高手長既高美斯
艾辛既衝力射球過到佢又過唔到門楣
而難得比列堤有波入
又更難得林伯特竟然意外幫對手做助攻

但睇埋下半場之後
車仔越踢越急
整體演出絕對在水準以下
後備落場既馬路達同埋沙洛文卡奴絕對冇作用
而大菲亦太遲換入迪卡度搏殺
就算全場爭取到60%控球時間都冇用
真係有威脅就只有林伯特想將功贖罪,但運滯既一腳

而今場好有鬥心既熱刺下半場越踢越有信心
拉莫斯換入艾朗連儂打突擊亦算正路
而侯度史東後備落場亦令中場既截擊能力好左少少
所以佢地最終攞到今季第1分
避免3連敗亦算合理

p.s.:
轉會消息容後再講

2008-8-29

近兩日既新聞......

1)
歐聯分組抽籤結果:
A 組: 車路士,羅馬,波爾多,克盧日
B 組: 國際米蘭,雲達不來梅,彭拿典奈高斯,安羅科薩斯
C 組: 巴塞隆拿,士砵亭,巴素利,薩克達
D 組: 利物浦,燕豪芬,馬賽,馬德里體育會
E 組: 曼聯,維拉利爾,些路迪,阿爾堡
F 組: 里昂,拜仁慕尼黑,布加勒斯特星隊,費倫天拿
G 組: 阿仙奴,波圖,費倫巴治,基輔戴拿模
H 組: 皇家馬德里,祖雲達斯,辛尼特,巴迪

2)
利物浦既新球場計劃再次宣佈延期

3)
愛斯賓奴已接受利物浦對尼亞拿既出價
而佢地因曼城願意俾800萬歐元既贖身費而被迫出售沙巴尼達
佢兩個已飛去英國做體測

4)
傳聞阿仙奴唸住邊同沙比艾朗素傾條件
邊同利物浦傾價錢

另一方面,兵工廠既總監費士文表示
如果雲加於轉會市場關閉前搵到岩用既球員
球會可以撥款3000萬鎊俾佢買人

5)
費 sir 表示唔樂觀可以於 deadline 前
完成貝碧托夫既收購

不過佢就決定先送走前線既瘀血
沙夏如果可以通過體測
將會轉投至愛華頓
而董方卓就被送返大連實德

6)
皇馬增兵失敗
大衛韋拿同華倫西亞續約6年
而皇馬只肯出價1600萬歐元買辛迪卡蘇拿
同維拉利爾要求既2800萬歐元相距甚遠
而當時人見轉會唔成功後亦決定同球會續約

7)
米拿占士最快可以於今日內轉投維拉

紐記被指想再次斟酌史基比特同埋泰亞高
其中對於傳聞紐記出價600萬鎊買前者
洛辛堡既體育總監承認這係一個令人難以拒絕既價錢

另一方面,青年人既畿內亞守將被指成為紐記300萬鎊既羅致對象
23歲既佢可踢中堅,右閘同埋防中

而標準烈治既20歲中場 M.費亞尼亦被紐記睇中
6呎5吋高既佢高波玩晒
所以既可串演中堅,亦可於死球屈機
不過佢最得人驚既都係佢既體能
兩個禁區之間既空間都係佢既活動範圍
佢近幾個星期先開始多人認識
先於奧運對巴西既時候被趕出場
而利記前晚歐聯外圍賽踢得咁辛苦都多得佢唔少

8)
車仔方面表示唔會於今個暑假完結前買卡卡
而佢地就被指打算向西維爾出價1800萬鎊買法比安奴
另一方面,羅賓奴隨時可趕及星期日鬥熱刺

9)
龍格堡被指可能以自由身加盟樸茨茅夫

10)
傳聞愛華頓加碼至1000萬鎊
以利誘雷恩出售麥比亞

另一方面,紅星既厄瓜多爾防中卡斯坦路就以借用身份加盟

11)
胡禮菲臘斯重返曼城,簽約4年

12)
AC米蘭將19歲射手柏路斯治既一半擁有權賣俾帕爾馬

13)
李榮杓轉投多蒙特,簽約1年

14)
董方卓由曼聯重返大連實德

15)
卡蘭積卡因足踝傷患而要養傷3個月

16)
謝拉特因鼠蹊傷患而要休息兩星期

17)
奧度以借用身份由AC米蘭加盟拜仁

18)
國際體育會既巴西龍門連南比圖落實轉投華倫西亞

另一方面,佢地將阿根廷防中巴尼加借用到馬體會

19)
巴特利被指成為米堡400萬鎊既增兵對象

20)
艾沙維承認難以於轉會市場 deadline 前離隊

21)
摩納哥天才攻擊球員文尼斯
被指即將以1185萬鎊既價錢加開羅馬

22)
漢堡先後收購馬素贊臣同埋阿歷士施華收改善防守力

2008-8-27 (2)

(拖左好多日)
想講下奧運場決賽......

決賽通常都唔精彩
今場都唔例外
特別係上半場為甚
傳失波既次數極多
更加唔好講會有悅目組織

而由於天氣太熱太濕
球證竟然吹停場波俾球員同埋自己去飲水吊命
就可以知有幾難頂
比賽節奏亦唔快

奧運足球總共有32場比賽
只有決賽踢下晝,仲要12點就開波
班球員點可能適應

下半場雙方演出略有改善
不過依然唔算好好
阿根廷終於靠一次反擊
憑美斯放球靚直線俾迪馬利亞一箭定江山

美斯由於苦無供應
成場波好多時回後搵波踢
有時仲後過列基美
而佢亦係陣中比較搶鏡既一個

阿根廷其實成個賽事所展示既攻力唔算好突出
有時仲有少少老鼠拉龜
當中對巴西雖然炒人3球
但未靠阿古路既幸運入球打破悶局之前
都有少少冇機會埋手
當中原因係陣中既攻擊球員唔係個個都 top fit
列基美明顯唔 fit
而天氣對佢既影響似乎比其他隊友更大
阿古路亦只係對巴西時踢左1場好波

但佢地既攻擊有個優點就係入球分佈夠散
唔計表現最穩定既美斯
列基美,阿古路,拿維斯,邦拿涪迪,阿哥斯達同埋迪馬利亞等人都曾經有過貢獻
對手講真又幾難頂

而對手尼日利亞方面
其實入決賽前既隊手
只有美國,日本,失準既荷蘭,
科特迪瓦同埋殘陣既比利時
俾到佢地既威脅好有限

而佢地4強大炒完比利時
阿根廷一定唔會輕敵
搞到佢地連偷雞既機會都冇埋
而佢地既組織能力唔及阿根廷亦係輸波原因
佢地全場既有威脅攻門多數靠湧搏亂

加上阿根廷既馬斯查蘭奴同埋加高做掃蕩做得好好
令尼日利亞冇機會靠擅長既中距離射門入波

總結成個比賽
阿根廷雖然唔係勁到難以形容
但其他對手都冇咩料到
造就佢地成功衛冕
而美斯表現最穩定
絕對係賽事最佳球員

p.s.:
小弟攞比利同埋馬勒當拿簽名既經歷太長
所以會另開新稿

2008-8-27 (1)

1)
羅賓奴即將以3100萬鎊既價錢上車
消息指雙方將簽約5年
佢既週薪高達12萬鎊

而西班牙傳媒指皇馬套現後
會即將搵新血
可能人選有身價約1600萬歐元既辛迪卡蘇拿
同埋傳左成個暑假既大衛韋拿
消息指華倫西亞將要求5000萬歐元

2)
占士米拿令人意外地突然同紐記攤牌
消息指維拉準備出價900萬鎊接貨
另一方面,佢地亦即將以750萬鎊從雷丁收購奇雲杜里

3)
李華度即將加盟烏茲別克球會賓約哥亞

4)
柏夫奴真高透露即將加盟熱刺

5)
愛斯賓奴俾尼亞拿3日時間去搞轉會
佢地證實有兩間英超球會出價買佢
出手高既一隊應該係愛華頓
不過尼亞拿就唔想轉投拖肥糖
而利物浦雖然出手較低
但就正正係尼亞拿既心頭好
所以利記仲要同愛斯賓奴傾轉會費

6)
AC米蘭表示軍刀既先借後買唔涉及卡卡既轉會

7)
布魯士表示希斯基係非賣品

8)
維迪澄清冇意思離開曼聯而轉投西甲球會

9)
新特蘭完成對安頓費甸南既收購

10)
澳洲防中格拿已落實由拖連奴轉投布力般流浪,簽約4年

11)
荷蘭U-17攻擊球員 D.Hoesen 透露即將轉投富咸

12)
曼城同埋布力般流浪都被指會於轉會市場 deadline 前收購胡禮菲臘斯

13)
保頓反對布力般流浪對佢地阿曼門將艾哈比斯既斟酌

2008-8-26

幾日冇講過新聞......

1)
甘賓尼已經轉會曼城

2)
英格蘭足總行政總裁巴域克將於年尾離任

3)
施維斯達轉會阿仙奴
轉會費估計約75萬鎊
佢同兵工廠簽約兩年

而雲加表示暫時再冇其他收購目標

4)
車路士向士砵亭借用前鋒派姆一季
仲可能於季尾正式買斷佢

5)
西維爾射手因為左膝十字韌帶撕裂
而要養傷6-8個月

6)
施斯同埋大衛希利加盟新特蘭
賓尼麥卡菲亦有可能加盟
不過咁多前鋒加盟
令史杜基斯既出場機會大減
佢被指可能被借到列斯或者錫菲聯

另一方面,黑貓亦即將以800萬鎊既價錢羅致安頓費迪南
韋斯咸被指打算向馬賽出價500萬鎊買法國後衛基維作為替補

7)
泰亞高決定唔以借用身份加盟愛華頓
佢選擇繼續留隊

8)
辛達告魯斯同布力般流浪續約4年

9)
羅賓奴表態想離隊
皇馬方面表示唔會阻佢離隊
但教練蘇斯達就唱反調話要挽留佢

10)
白高敦證實搵過費格遜
希望佢可以於倫敦奧運帶領英國隊
而哈利列納同埋碧咸都表示有一定興趣

11)
熱刺想盡快搞掂貝碧托夫單野
不過如果收唔到合理價錢
就寧願將佢下放到預備組

而熱刺被指將收購亨特拉爾,科倫式同埋希斯基當中既其中一人
以取代貝碧托夫

12)
摩連奴證實想引入哥利斯馬
不過消息指國米要先賣走蘇亞素或者基斯普套現

另一方面,犘佬可能向費倫天拿提出
以貝迪素交換佢地既葡萄牙中堅達哥斯達

13)
軍刀落實回流AC米蘭
佢以先借後買既形式加盟
不過轉會費就由當年既3000萬鎊縮水至1300萬鎊

而紅黑兵團亦借用辛達路斯一季
更可能於季尾買斷佢
而這個瑞士中堅只待過埋體測就可落實加盟

14)
拉樸達以55.8%既低票數留任

15)
辛拿同維拉利爾續約至2011年

16)
奧華馬斯正式復出

17)
傳聞指愛華頓打算借用施積

18)
辛尼特以3000萬歐元既價錢從莫斯科斯巴達收購丹尼
意味佢地可能於短期內賣艾沙維到熱刺

19)
漢堡被指準備各樸茨茅夫出價800萬鎊買卡蘭積卡
消息指樸茅套現後
就會向有財政壓力既馬體會收購莫達

20)
費爾因為唔妥杜明尼治而決定退出國家隊

21)
前利物浦同埋愛華頓既名宿班比
介紹左自己14歲既仔入曼聯

22)
艾朗蘭森首次入選威爾斯代表隊

23)
迪華奧被指以借用身份加盟博洛尼亞

24)
曼城被指準備以840萬鎊既價錢向韋斯咸收購比拿美

25)
愛華頓落實引入丹麥自由身右閘積及臣
雙方簽約1年

另一方面,拖肥糖亦被指準備向愛斯賓奴出價1200萬鎊
攔途截劫利物浦既心頭好尼亞拿

26)
巴路士即將加盟加拉塔沙雷

27)
紐卡素令人意外地被指打算以1200萬鎊
向車路士收購馬路達

28)
保拿特被指成為保頓500萬鎊既增兵對象

29)
韋根否認想斟酌卡爾

30)
熱刺亦被指想同紐卡素爭比利時保干路尼

31)
利物浦仍未為左路搵到新球員
唐寧就再次被指成為佢地既1400萬鎊羅致對象

32)
格羅寧根荷蘭20歲射手尼蘭特
即將以280萬鎊既價錢轉投燕豪芬

2008-8-25

1) 利物浦對米堡(下半場) (by 死佬)

無應承 Blacky 寫呢篇賽後感，因為知道自己會夜返屋企，結果真係！不過都睇到下半場，但只可算係利記賽後感。

上半場無紀錄零比零。下半場主場o既利記佔有較多控球，不過都未能夠威脅到米堡大門。謝拉特明顯不在狀態，班拿約左邊失晒蹤，沙比同古治雖然多波踢，但始終前面兩個箭頭仲未有默契，好多時羅比堅尼較波比人入”sip”，王子都未企好位。似乎成支球隊因為羅比堅尼而改踢o既4-4-2真係要時間適應。後備入替的巴布同艾沙亞都唔見o左影，特別係前者。

後防尚算清閒，62分鐘端基一記柏金式轉身擺脫後防差點先開紀錄，但幸好被拉爾拿救出。左後防杜些拿似乎未適應英超節奏，比對方艾利亞迪尼有好多空間發揮，所以沙比經常要回後補位。

後備入替的美度一記25碼地波於70分鐘為米堡先開紀錄。85分鐘，沙比傳中球，對方奧尼爾雙手將波擋住，加力查見球證無表示就一腳 ”省”入中路，結果省中對方保加迪斯改變方向入網。

眼見1比1平手完場之際，神奇隊長踢o左全場唯一一腳好波，於補時94分鐘把握羅比堅尼控定，於18碼一腳射死米堡。神奇隊長就係咁神奇！

2) 紐卡素對保頓 (by 舒利亞)

第一次寫賽後感，請多多指教a_a
上埸作客曼聯，以1:1力保不敗既紐卡素，今埸沿用上埸既陣，而後備名單就多左傷愈復出既奧雲。對面排出五三二既陣式，前面由奇雲戴維斯拍住上埸有波入既艾文達。
開波早段，保頓即刻搶攻，雖然攻勢唔少，但係有威脅既埋門亦都唔多。
紐卡素方面，奇雲基瑾今仗較保守，只不斷以反攻尋找入球機會。其實係呢方面，小弟有少少不滿，因為紐記上埸表現唔錯，今仗又係主埸，再對住作客又係唔多掂既保頓，竟然採取較保守既戰術。
所以上半埸保頓較為佔優，可惜只係控球在腳，甚少可以撕破紐記防線。數次遠射亦未能命中目標。紐記反擊亦都受制於對方既硬朗既摌波，古迪利斯更差點受傷。其實默契亦是紐記較大問題之一，因為始終合作只有一埸，今埸比賽產生的誤會，誤傳亦都唔少。
更衣室出番來後，紐記算係將比賽拉番成均勢，都可以同保頓對攻。而馬田斯既頭鎚亦都差少少先開紀錄。不過到中段，史堤芬泰萊係禁區連環手球被球證判十二碼，可惜主射既奇雲戴維斯宴客，被演出持續穩定既基雲橫身撲出。其實真係要讚基雲，因為撲出呢球令紐記唔單止唔洗落後，更振奮左軍心。
早前馬田斯頂波可能拉傷，所以由傷愈既奧雲入替。入替後隨即有次黃金機會，可惜執雞時被門將快手托出底線。而謝列美亦都係大約十分鐘後入替。無耐，呢對後備組合就合作炮製致勝一球。謝列美係禁區外，左路偏中既位置拿到解圍出來既波，再傳入禁區俾攝到靚位既奧雲一頂入網，紐記終於領先。之後謝列美亦都有一次黃金機會，可惜近門起腳未能命中目標。
其後保頓大舉進攻，可惜紐記防守做得仍然唔錯，最有威脅既一記禁區內抽射亦被史堤芬泰萊頂走。結果紐記最後以1:0取勝。
睇完埸波，對住打仔格既保頓，紐記完全無任何優勢。就算個人突破做得幾好，最後傳中或者射門都會被對方的守將以身體擋出，甚至好多時唔夠對方撞而失去控球權。所以球隊絕對有需要買番一位衝撞型中鋒開路，否則對住中下游球隊失分機會都幾大。
而球員方面，基雲仍然係我心目中全埸最佳球員。馬田斯，古迪利斯亦都經常威脅對面防線。占士米拿間中亦有靚傳中，古費列掂波機會唔多，有一次更加係後埸甩波，好彩又係古迪利斯回防幫手。駁腳佢仍然係唔錯。
杜夫經常帶甩波，射門亦較求其，明顯仍未夠態，不過同馬田斯拍得幾好。畢特今埸少左傳失波(定係其他人多左?)，亦經常清波，值得一讚。尼索比亞經常係自己後埸扭失波，雖然經常助攻，但出波幾差，又令左面成日空哂，唔該基瑾重用安歷基或者買過第個。
其餘球員表現不過不失。
下埸對住阿仙奴，會係暫時最難打一埸。馬田斯又未知有無事。假如我地拎到一分，我已經好滿足。

p.s.
(1)另一埸利記對米堡，要到最後階段先連入兩球反勝，表現亦似乎未如理想，有唔少網友亦怪責賓帥太就羅比堅尼。唔知網主點睇=.="?

(2)寫賽後感真係幾辛苦，我足足寫左差唔多一粒鐘，平時真係難為網主=.="

## by 小弟......
因為太累
聽日先一次過總結由上星期四開始堆到而定既新聞
同埋講下奧運決賽
仲有搵到比利同埋馬勒當拿攞簽名單野

2008-8-20

總結近兩日既新聞......

1)
施維斯達即將令人意外地以75萬鎊既價錢轉投阿仙奴
兵工廠一出手
新特蘭同埋曼城即刻收皮

2)
收購羅賓奴無望後
消息指車路士將專注斟酌卡卡

3)
紐卡素向奧雲開出一份為期3年,週薪14萬鎊既合約

4)
芬倫考慮離開利物浦

5)
馬略卡雖然唔會再出貨
但似乎敵唔過英超球會既高價
西布朗被指加碼至700萬鎊以收購西班牙中場保查華利路
而紐卡素亦有興趣出價500萬鎊買阿根廷射手查祖

6)
泰利繼續出任英格蘭隊長

7)
泰亞高被指將以先借後賣既形式由祖雲達斯轉投愛華頓
拖肥糖將於季尾以800萬鎊既價錢買人

8)
曼聯被指可能同沙地電訊公司合約
簽一份價值1000萬鎊既5年合約

9)
麥克干沙里斯否認轉投賓菲加既傳聞

10)
阿連拿接手洛杉磯銀河

11)
36歲老將史杜比斯因膝傷決定掛靴

12)
布力般流浪被指向華倫西亞出價950萬鎊買祖亞昆
另一方面,巴尼加被指將被華倫西亞外借到森多利亞

13)
瑞士後衛梅拿被指將以自由身加盟祖雲達斯

14)
王大雷到燕豪芬試腳一星期

15)
紐卡素被指打算向阿爾克瑪爾出價600萬鎊買佢地既左閘保干路尼
這個比利時奧運腳防守夠晒死纏爛打
而頻頻助攻既佢腳頭仲幾重

16)
基士文終落實加盟巴黎聖日耳門

17)
加納中場安南早前去布力般流浪試腳得到好評
阿仙奴亦想搵佢去試腳
但佢因為要替 Stabæk 出賽己未成事
消息指兵工廠願意出價150萬鎊買人

18)
消息指艾雲洛夫將以借用身份加盟AC米蘭

19)
朗斯既26歲阿爾及利亞後衛比夏積
同埋被漢堡放棄既前阿根廷左閘蘇連
都被指成為樸茨茅夫既增兵對象

20)
莫斯科斯巴達被指打算邀請文仙尼執教

21)
被紐卡素放棄既塞內加爾後衛迪亞達
雖然被指得到巴黎聖日耳門同埋馬賽既垂青
但佢表示比較希望可以於英超落班

22)
新組軍既西雅圖搵左前美國國腳基拿幫手

23)
安德魯戴維斯落實轉投史篤城
轉會費約150萬鎊

24)
迪亞高卡普被指成為巴塞隆拿既最新羅致目標

25)
烏斯達利證實要養傷8個月

26)
施斯即將以借用身份加盟新特蘭

27)
由於8月31號係星期日
所以轉會市場既關閉日期順延一日

p.s.:
保特破埋米高莊遜保持左12年既200米世績
一個字:勁!
不過都唔及幾日前佢好輕鬆咁破100米帶來既震撼

2008-8-19

小弟冇唸到自己咁有耐性睇晒成晚既盛裝舞步
搞到遲左出 post
請見諒
時間關係,今日只講早前 Big 4 既賽後感

1) 阿仙奴對西布朗

主隊雖然近乎半力出擊
不過班新仔用活力同埋質素搭夠
整體演出依然流暢
只嫌埋門把握依舊一般兼防守能力唔算強

西布朗就明顯唔夠班
不過作客兵工廠只輸一球已算有交代
如果做好防務
特別係右閘
絕對有力護級成功

2) 新特蘭對利物浦

愛隊利記只能靠對手一時睇漏左托利斯而羸波
表演冇說服力
狀態連7成都未有

不過小弟最擔心既都唔係佢地未上力
而係球隊既陣式問題
賓尼迪斯究竟of3因為冇左巴布而其他射手又唔 fit
而暫時唔用4-3-3?
抑或因為遷就羅比堅尼而改用 4-4-2?
如果係因為後者,咁上季先砌得靚既組合咪又要再夾過?
似乎不利於爭標

多一套戰術同埋陣式唔係壞事
不過小弟認為賓帥應該多倚靠4-3-3陣式
畢竟陣中絕大部份球員自上季季中開始
踢4-3-3都開始有化學作用

3) 車路士對樸茨茅夫

大菲明顯想向其餘3強施以下馬威
亦要向球員同埋球迷證明自己既功力絕不下於犘連奴

佢最抵讚在於用晒3大名牌中場都冇塞車
當中迪高走位最多
波歷克就略後於林伯特
負責俾波多0的
林伯特就主力後上
就算入唔到波都引左樸茅防守球員
就咁樣佢地就技術性擊倒左對手一條冇左蒙達利就廢左5成既中場線

4) 曼聯對紐卡素

兩隊都唔齊腳
不過曼聯既情況比紐卡素更嚴重

紐記嚴格來講只係冇左一對戰頭
不過有馬田斯押陣都廢唔晒

但曼聯冇左養傷既C7同埋返祖家奔喪既迪維斯
再加埋停賽既蘭尼
前線真係廢左好多
而卡域克同埋傑斯先後傷出就更加係雪上加霜

雖然佢地羸唔到波
都可以賴冇運中楣同埋基雲守得勁好
但小弟認為佢地組織到既攻勢唔多先係真正原因
而這就係中前場唔齊腳既必然後果

紐記方面
佢地今場亦算守得唔錯
3個新兵亦睇落唔錯
而今場既4-4-2陣式同埋人腳都接近小弟心目中既最佳陣容
只要同馬田斯搵到個好拍檔
紐記於英超絕對可以排中上

P.S.:
1)
巴西同埋比利時今晚輸波唔係奇事
但唸都唸唔到佢地輸得咁大鑊
等小弟搵多0的料之後有機會再講

2)
小弟將於星期四上北京
想搵人幫手寫今個星期紐記對保頓既賽後感
(米堡迷CK已答應幫手寫利記對米堡0個場......)
有冇人幫到小弟?

2008-8-18

1)
波比笠臣撐里奧做新隊長
原因有3:
佢比5年前成熟
如果俾佢做隊長,佢會發揮110%既水準
越大既舞台,佢越有料到

2)
貝碧托夫公開要求熱刺准佢離隊
而奧雲就再次被傳將加盟熱刺

3)
韋根既洪都拉斯防中柏拉斯奧斯
再次被指成為利物浦600萬鎊既新防中人選
布魯士表示將盡力挽留佢

4)
熱刺已同艾沙維傾好個人條件
但仍然未肯俾辛尼特所要求既1970萬鎊轉會費
消息指辛尼特已 set 左今日為 deadline
如果仲傾唔掂數就唔會同熱刺再傾落去

5)
傳聞費 sir 打算改為斟酌辛達告魯斯

6)
皇馬會長卡達朗表示本季唔會俾羅賓奴轉投車路士

7)
羅馬會長辛斯尋晚病逝,終年82歲

另一方面,佢地被指打算向薩克達收購現正外借到曼城既墨西哥攻擊球員卡斯迪路

8)
基亞連尼同埋賓積洛夫都因傷而要長抖

9)
科拿同布力般流浪簽約半年

10)
新特蘭被指打算向韋斯咸開價800萬鎊買安頓費甸南

11)
祖高爾再被傳會以1000萬鎊既價錢離隊
今次既傳聞出偵球會就係維拉
唔知係唔係同艾殊利楊格玩野要加兩倍人工有關

12)
艾比亞透露已回復自由身
而佢亦否認會重返布雷西亞

13)
漢堡以穆罕默德施丹加上現金同多蒙特交換柏達歷

14)
加維臣被些路迪放棄

15)
消息指米堡決定加碼至500萬鎊以引入占士夏柏

16)
馬略卡最終被西布朗既550萬鎊出價打動
願意放走23歲西班牙中場保查華利路

17)
AC米蘭被傳準備以1000萬鎊既價錢向巴塞隆拿收購馬基斯

18)
哈利列納否認重返韋斯咸既傳聞

p.s.:
劉翔今朝因傷無奈退出
Big 4 既賽後感都冇心機寫
聽日補返,請見諒!

2008-8-17 (2)

9) 布力般流浪
球隊冇左曉士,賓特尼同埋費度
係球隊今季既隱憂

除左辛達告魯斯之外
賓特尼同埋費度係最有星味同埋最重要既球員
冇左佢地影響唔細

但更大既影響係冇曉士
佢既離去可能加速辛達告魯斯,奧查,禾洛克,達比舒亞同埋麥卡菲既離隊

接手既恩斯係費 sir 門徙
唔慌差得去邊
但第一季教英超
亦唔慌叻得去邊
而佢教波之餘仲要唸計留住班有離心既球員
擔子一定唔輕

10) 韋斯咸
最大問題係冰島老闆唔科水
龍格堡解約同埋早前隊長尼爾可能被賣去加拉塔沙雷
都係因為佢地既高人工
咁格連同埋艾殊頓等有價有市既球星又會留到幾時

而古比士利既教波質素亦係另一隱憂
小弟唔止一次講過
佢教既球隊有一個特點
就係每季總有一段大趺 watt 既日子
就算隊波好地地
都可以突然表現大插水一個月
萬一隊波又好似上季咁傷兵一籮籮
球隊同埋佢本人既前景未許樂觀

早前曾經傳過佢可能被削權
亦傳過佢同意大利佬技術總監唔夾
而佢人工又唔低
球隊再冇咩突出表現
佢有得再留低先奇

11) 熱刺
大換血後既球隊
季初通常都冇咩好下場
何況熱刺仲出名只係熱身賽之王
(結果尋晚佢地真係又出事......)

不過以熱刺既班底加上拉莫斯既功力
球隊整季聯賽既成績依然令人期待
雖然小弟唔會唸佢地今季就即刻可以入前4
但前6絕對係一個合理要求
而佢地夠人多
就算分心搏下盃仔都仲得

12) 紐卡素
唔知因為冇錢
定係本身吸引力唔夠
全個夏天只有3宗主要收購
不過好在買既都應該係好野

中場同埋防線都比去季強
只要基瑾早日立定主意用 4-3-3 定係 4-4-2
球隊成績一定比上季好

爭前4明顯唔會係未來一至兩季發生既事
歐協盃席位都窄窄地
但7-10名就應該係合理(基本)要求

全隊人腳最大問題係前線
除左馬田斯之外
冇一個信得過
奧雲唔肯續約兼似又想玩野
維度卡走緊下坡
卡路爾又太新
而佢3個都似係玻璃腳
艾美奧比同埋辣椒仔就更加唔可靠
價錢唔太賤既話都賣走好過

不過全隊最大問題應該都係老闆艾殊利
佢把口話唔賣
但種種跡象都似想放盤
咁既情況對球員一定唔係好事

13) 米堡
上季佢地既最大問題係唔識入波
今季默契好左
又有米度重拾狀態
加上應該漸漸適應英超既端基同埋艾維斯
仲有新加開既艾寧斯
而中場供應又唔似會不足
入波一定比上季多唔少

中場冇左前隊長保定同埋潛質優厚既卡達莫
表面睇好似好大損失
但考慮到前者因傷病同埋年紀漸大而走緊下坡
亦同修夫基似有不和
而後者攞牌多過食飯
球場外既紀律亦唔見得好
而家由來自巴黎聖日耳門既迪加特取代佢地
對球隊可能係好事

成隊波最大問題係後防
鍾斯真係夠料取代舒華沙咩
而後防可用既當打球員亦唔見得好多
加上佢地上季 n 次一失波就散晒
如果冇改善
小心入埋都唔夠輸

14) 韋根
小弟心目中上季既第二大降班膽
好在佢地見勢色唔對就搵左布魯士接手
否則佢地已經返左英冠

上季佢地既最大問題又係唔識入波
今季佢地多左卡普,迪列達同埋薩基
加上成功留住華倫西亞同埋希斯基
應該有力入多0的波
否則會有一定既降班壓力

15) 保頓
留到謝斯高連倫力上引入梅姆巴
令球隊既防守有一定保證

但前線冇左迪奧夫去創造機會
多左艾文達同埋奇雲戴維斯肯留隊都令人好唔放心
而身價高達1000萬鎊既前者雖然可以踢幾個位置
但佢從來都唔係入波多既球員
靠佢取代安歷卡似乎未許樂觀

加上領隊麥臣功力一般
護級份子應該有佢地份

16) 新特蘭
0的人話堅尼傻左亂掃貨
小弟就覺得佢搵人比上季叻左
因為今季既新兵起碼證明左有力於英超立足
只不過價錢偏高

只耍堅尼可以為後防搵多一兩件有質素既球員
應該可以避免'第二年魔咒'

17) 富咸
領隊鶴臣為球隊大換血後
人腳似樣返好多

如果改善到作客腳軟既弊病
應該可以唔使搞到上季咁驚險
否則佢地依然有降班危機

18) 西布朗
攻強守弱係小弟對佢地既印象
中後場信得過既只有卡臣,蘇華隆同埋美迪

而中場冇左謝拉
創造力大減
前線冇左菲臘斯
靠大舊衰貝特拿就真係等死
只好等勞基摩亞快0的好返

佢地咁既人腳
難免要為護級而努力

19) 史篤城
小弟心目中既降班穩膽
人腳只有蘇連遜,迪亞奧,菲爾,富拿,格芬叫薄有名氣
當中有幾多人信得過真係心照
最衰既仲係早前比利開金口貼佢地護級成功
有咩辦法唔收皮

20) 侯城
識得搵幾個英超棄將
基奧雲尼,保定,馬華龍京治,加特拿,班比等人幫到佢地唔少

加上曾踢英超既文迪,
男人四十都仲有心有力既韋達斯
以及實而不華既科朗同埋法根等球員
人腳雖然依然略遜於其他護級份子
但未必絕望

小弟遇左佢地護級路途艱辛
但段估衰極都唔使包尾
更加唔會好似上季既打呲郡咁任人魚肉

2008-8-17 (1)

1)
傳聞賓尼迪斯因為兩個美國老闆唔肯科水俾佢買巴利而威脅要離隊
但佢就表示冇咁既事

2)
費 sir 表示將於短期內有新前鋒加盟

3)
魯爾繼續落選西班牙國家隊

4)
基斯普以借用身份重返拉素既願望落空後
消息指佢可能考慮接受被外借到些路迪
不過兩隊高層就佢既高薪仲有排要傾

5)
曼城年青中場史杜歷治被指成為車路士800萬鎊既羅致對象

6)
戴倫賓特,艾殊利楊格,哥治同埋艾殊頓
都冇份入選對捷克既友賽
其中後者係因為小腿受傷而被卡比路割愛
但希斯基就意外獲重召

而消息指新隊長既人選將不出泰利以及里奧費甸南
當中以後者既機會較大

7)
麥卡菲被指成為新特蘭既增兵對象
轉會費被指介乎850-900萬鎊

8)
富咸證實已同意格拉斯哥流浪對史堤芬戴維斯既300萬鎊出價
另外,佢地亦準備俾禾斯以50萬鎊既價錢轉投葉士域治

p.s.:
soccernet 又出錯資料
fixture 既 table 將四強對戰搞錯左
令小弟以為應該有夢幻決賽睇
但小弟因為'秦皇島事件'而信佢地唔過
一 check 自己之前 download 既簡體賽程表
就發現原來巴西4強已經要硬撼阿根廷

2008-8-16 (3)

1)
幾段紐卡素既轉會消息......

菲爾落實以225萬鎊既價錢轉投史篤城

而艾美奧比亦被指轉投葉士域治
轉會費為250萬鎊

紐記亦被指打算向皇馬借用沙維奧拿

另外,佢地就因為同祖雲達斯傾唔掂泰亞高既人工
而難以借用這個葡萄牙防中
佢現時最有機會加盟愛華頓

2)
拜仁被指打算向利物浦出價2500歐元買沙比艾朗素

拜仁陣中既雲邦美有質素
但已略走下波
奧圖夠年青
不過仲有排要浸
佢地想買沙比既傳聞聽落有一定可信性

不過沙比已為利記踢過歐聯
拜仁買左佢都唔可以派佢踢歐聯
同2500萬歐元買佢去只踢德甲
小弟就唔多信啦

3)
比沙路被外借到雲達不來梅至季尾

4)
雖有傳聞指西布朗打算1000萬鎊向馬略卡買3個球員
但這支西甲球隊已表示冇意思繼續出貨

5)
美國奧運腳伊度即將以270萬鎊既價錢
由FC多倫多轉投格拉斯哥流浪
22歲既佢擅長踢防中
亦可客串中堅

6)
前荷蘭 U-21 中堅盧雲斯落實由卡迪夫城轉投些路迪

7)
熱刺賣加特拿俾侯城
成功套現250萬鎊

8)
米堡落實以300萬鎊既價錢羅致賀迪
雙方簽約4年

2008-8-16 (2)

英超 preview (Part 1)

1) 曼聯
小弟唔睇好佢地今季既前途
原因有3個

曼聯留到C7個人
但留唔到個心又有咩用
佢而家仲要抖3個月
就算朗尼大踢爭氣波
或者費 sir 成功斟酌貝碧托夫
曼聯整體攻力必定唔及上季

而隨住昆洛斯離隊
冇佢幫手執靚條防線
曼聯既防守仲可唔可以維持高水準頓成疑問

而講鬥心
小弟又唔多信曼聯球員會好得過其餘3強

2) 車路士
佢地係小弟今季最睇好既球隊
史高拉利功力夠,亦有威嚴
格蘭上季球場內外既犯錯
唔可能從大菲身上搵到

而後防多埋保辛華
只要傷病情況唔太嚴重
整體防守實力絕對不下於曼聯同埋利記

中場多左迪高亦加強左球隊既組織能力
前面如果多埋羅賓奴
佢加上祖高爾同埋杜奧巴既組合
絕對令人期待

不過佢地有兩個隱憂
一係內訌
迪高同埋杜奧巴應該係正選
林伯特高薪續長約後亦唔似會做後備
波歷克同埋安歷卡肯唔肯長任後備好成疑問

而另一個隱憂就係球隊放走馬基里尼之後
陣中冇一個可靠既防中艾辛既替補
可串演防中既波歷克又唔似會俾大菲咁用
況且就算係踢都係後備
佢肯乖乖就範先至奇

3) 利物浦
小弟個人認為要爭聯賽
一定要先有一個整體高水準既班底
再於個別位置增兵作輪換
方為上策

等左賓尼迪斯幾年
今年初一個介乎 4-3-3 同埋 4-5-1 既陣式
終於似係佢老人家心目中既初稿

今季既增兵亦不過不失
只係嫌佢買羅比堅尼買貴左
如果搵多個側擊球員
(多數係左路)
就算而家應該簽唔到巴利
球隊都依然有一個近年最有力挑戰聯賽冠軍既陣容

而賓尼迪斯上季後半段起已偏向有節制咁輪換
只要佢有本事改善球隊既穩定性
利物浦就算最終爭唔羸車仔
都絕對有力趕過曼聯以及阿仙奴

4) 阿仙奴
從來都係全英超最好睇既足球
不過好睇唔代表好食
埋門一腳唔掂,後防畏高,板凳唔夠深度
同埋整體經驗不足
就令佢地近年多次同冠軍擦身而過

佢地今季初段既比賽比較易踢
有助年青球員 build up 信心
隨時繼上季後再帶俾人驚喜
但如果佢地想最終有盃落袋
之前講既弱點就一定要有大改善

5) 愛華頓
穩健防線加上一個幾有料既領隊莫耶斯
佢地上季攞第5絕對唔令人意外
今季如果想再接再厲
除左後線繼續交到功課之餘
莫耶斯必須盡快為中場增兵
否則以佢地現有人腳
唔足以應付本土同埋歐協盃兩條戰線

6) 維拉
奧尼爾慢慢執靚隊波
加上應該留得住巴利
越來越覺得佢地似一支英格蘭B隊

除住費度同埋居拿等新防守球員既加入
當佢地建立到默契後
防線水準應該比前更穩健

不過球隊整體成績能否再進一步
就幾睇佢地能否改善組織能力
因為柏度夫識分波
但唔夠速度跟上隊友既快速節奏
而巴利於組織方面又唔見得幫到球隊好多

7) 曼城
曉士上任後
對球隊既好處係佢感染力強
加上佢鍾情 4-4-2 陣式
只要等埋祖奧歸隊
有佢去同艾蘭奴,馬田柏度夫同埋賓積洛夫拍檔
球隊既攻力應該強過上季

後防雖然多左賓希姆
鄧尼又肯留隊
但加拿度同埋波爾都守唔掂左路
右路既哥魯卡又幾可能離隊
防守方面好難令人放心

不過講到令人擔心
防線都遠不及老闆他信
一個月前曼城仲似會大搞
令人好期待
但他信而家大大鑊
曼城會否如傳聞唔夠錢用
對球隊今季(同埋以後)既前途好有影響
老細足球既弊處莫過於此

8) 樸茨茅夫
上季既成功
源於穩健既防線同埋中前場體力化壓迫

今季佢地雖然有卡保爾加盟
但占士,蘇金寶,迪斯甸,派密斯同埋靴達臣都唔算年輕
成條防線會唔會因體力問題而走樣
令人關注

而佢地中場冇左蒙達利
對球隊既影響好大
因為迪亞拉等人比蒙達利起碼差左一班

中後場都冇上季咁 sharp
就算前線因為有哥治而多左一辨高波
整體實力都唔似好過上季
小弟認為佢地如果可以 keep 到前8都已經算係咁

(由於睇奧運好忙
餘下12隊聽日先再講)

2008-8-16 (1)

想講下玩 yahoo 既足球經理人大賽

其實如果係玩
就不如玩英超官網0個個啦
話晒都係官方野

yahoo 個 game 好玩在可以低買高賣
唔似得官網既 game 賺就只可以賺一半
不過球員身價差距略嫌大左少少

如果係真係想玩 yahoo 個 game
買攻擊球員
季初可以主力搵阿仙奴
因為佢地季初比較易踢
班小朋友又膀在有體能優勢
拿斯利,賓特拿同埋卡路士維拿都好抵買

而買防守球員
就只從利記,曼聯,車仔,愛華頓同埋樸茅搵人
其他球隊既幾平都死
因為失波多扣分都扣死
拿臣同埋基治咁有助攻力既就當然例外

而中場方面
謝拉特,法比加斯,迪高同埋林伯特
成日有波入同埋助攻
一定要考慮

此外負責寫12碼既都要注意
例如林伯特,謝拉特同埋巴利

另外,要留意下一0的岩岩踢英超既球員
好多都好抵買
例如犘達歷,保辛華,杜辛拿,菲臘迪根,
仲有之前提及過既拿斯尼同埋迪高
當然要考慮佢地需要時間
去適應英超節奏同埋硬朗踢法

另一方面,有0的肯定踢爭氣波既球員值得注意
今季利記係近年最有機會爭英超既一次
謝拉特肯定勁搏
而朗尼要證明自己既價值
趁C7養傷亦會仲搏過平時
如果唔介意朗尼經常攞牌
真係可以唸唸佢

小弟隨意選左個陣容:
拉爾拿,泰利,杜辛拿,維迪,
謝拉特,摩達歷,拿斯尼,迪高,
艾迪巴約,基奧雲尼同埋戴倫賓特

法比加斯同埋保辛華因為頭幾場唔踢得
所以唔用
之後可以考慮買佢兩個
因為前者肯定高分
後者既平,助攻仲勁,車仔條防線又穩

C7就等佢抖完3個月之後先再唸
不過佢有冇鬥心又好成疑問

這個陣容只作參考
因為你每個星期都要變陣同埋換人......

2008-8-15

1)
辛尼特決定將艾沙維減價出售
消息指交易將於幾日內完成

另外,辛達告魯斯同埋簡路迪都同熱刺再次扯上關係

2)
迪亞高文迪斯被指將以先借後買既形式加盟紐卡素
如果紐記用完一季後覺得岩用
就會以800萬鎊收購佢

不過到而家都未搵到中場中路球員既愛華頓
都被指想爭埋一份

3)
高路仙尼已經正式轉投紐卡素
將可趕及星期日作客對有朗尼復出既曼聯

但由於馬略卡依然 hold 住約拿斯古迪利斯既轉會紙
佢自然申請唔到工作證同埋註唔到冊
佢將會同埋一眾傷兵無份出場

4)
車路士表示冇意思放走艾雲洛夫
不過有消息指車仔想外借佢去吸收經驗

5)
禾路連向賓尼迪斯提出離隊要求

6)
里昂既法國防中杜拿蘭被指成為阿仙奴既新防中人選
更有消息指交易將於幾日內完成

但亦有傳聞指兵工廠既真正目標係耶耶托尼

7)
早前有消息指曼聯即將羅致貝碧托夫
而巴塞隆拿又因為留用伊度奧而唔會再搵新前鋒
不過而家又有消息指熱刺 hold 住交易
因為巴塞隆拿又想出手爭貝碧托夫
不禁令人相信這兩名保加利亞同埋喀麥隆既射手前途仍未肯定

8)
奧查被指可能去阿爾克馬爾養老

9)
消息指如果布力般流浪決定賣禾洛克俾紐卡素
就會從富咸收購高捷斯基作替補

10)
紐卡素被指打算向巴勒莫出價400萬鎊收購比斯安奴
這個28歲澳洲攻擊球員可以踢中前場任何一個位置
最擅長踢左中場既佢仲係死球專家
而有一定防守能力既佢亦曾經客串防中
全能到得人驚
不過紐記想簽佢就先要爭羸格拉斯哥流浪

11)
格拉斯哥流浪即將以300萬鎊既價錢由樸茨茅夫羅致文迪斯
消息指格流亦準備引入比斯安奴同埋麥法頓

12)
就襲擊舊隊友達保一事
英格蘭足總宣佈巴頓承認行為不檢既控罪
佢地之後會再交待佢既停賽安排同埋罰佢幾多錢

13)
就要賠錢俾車路士一事
梅度上訴失敗之餘
仲要比最初賠多400萬鎊
即係而家要賠1400萬鎊

14)
侯城方面透露貝碧托夫落實加盟曼聯後
費沙金寶將可能被外借多一個球季

15)
菲爾同埋J.湯馬士落實由查爾頓分別轉投史篤城同埋樸茨茅夫

16)
羅馬落實收購巴迪斯達
轉會費1100萬歐元
不過當中有200萬歐元係 variable

17)
艾比亞再次被傳成為韋斯咸既600萬鎊增兵對象

18)
法國傳媒指巴黎聖日耳門有興趣以1200萬鎊收購安歷卡

19)
卡卡既細佬中堅迪加奧
被AC米蘭外借到標準烈治一季

20)
西布朗被指打算向馬略卡出價1000萬鎊買佢地3個球員
當中包括23歲西班牙中場保查華利路,
20歲阿根廷前鋒查祖同埋31歲葡萄牙後衛荷西紐尼斯
小弟就唔信西布朗有咁多閒錢用
更加唔信已經有幾個主力離隊既馬略卡仲肯繼續散貨

p.s.:
女排又反勝為敗
好好好好好好好激心
英超 preview 都即刻冇心機寫

2008-8-14

1)
林伯特同埋大衛施華都落實同球會續約5年

2)
消息指貝碧托夫將於今日內正式轉投曼聯
轉會費約2500萬鎊

3)
占士米拿再次被傳將被紐卡素套現
消息指出價既係好想有本土班底既維拉

4)
多蒙特22歲右翼巴拉斯塞高斯基
被指成為利物浦800萬鎊既增兵對象
佢擅長扭波,速度又高
更因有一定防守意識而可串演右翼衛
今年夏天佢因為傷患而退隊冇踢歐國盃決賽週
所以好多人對佢冇咩印象

5)
芬倫決定復出代表愛爾蘭

6)
早前表明唔會再出貨既布力般流浪
果然已拒絕曼城對辛達告魯斯既出價

所以紐記雖然被指向暴力幫出價400萬鎊買禾洛克
睇來成事機會亦只係一般

7)
曼城被指一旦收購辛達告魯斯失敗
就會改向巴塞隆拿出價500萬鎊買古莊臣

8)
消息指熱刺賣走貝碧托夫套現後
將向辛尼特出價一次過買晒艾沙維同埋柏夫奴真高

9)
紐卡素再次被指打算於轉會市場關閉前
以1200萬鎊既價錢從韋斯咸引入艾殊頓
消息指當時人都想轉會紐記
以吸引卡比路既注意

另一方面,卡比路早前曾同佢講
佢雖然好波
但如果想入選都要先減肥
因為佢跑得唔夠快

10)
阿仙奴已同意米堡對賀迪既出價

另一方面,米堡被指有興趣向保頓以200萬鎊收購阿曼龍門艾哈比斯

11)
韋根將馬華龍京治外借到侯城一季
不過咁唔代表後者已經搵夠前鋒
佢地依然同彭迪安尼同埋希利扯上關係

12)
禾夫斯堡既德國中堅馬龍
同埋卡迪夫城既前荷蘭 U-21 中堅盧雲斯
都被指成為些路迪既新中堅人選

13)
雖然一直有傳聞指漢堡想以1200萬鎊既價錢斟酌古治
但當時人表示冇意思轉會

14)
意大利傳媒指AC米蘭有興趣以1500既價錢收購沙比艾朗素
小弟就認為可信性一般
因為佢地已經有好多防中
反而後衛同埋前鋒就唔腳

15)
摩納哥巴西中場利尼一直被指即將離隊
佢既目的地將不出羅馬或者熱刺

16)
艾歷臣重召夾波王白蘭高入國家隊

17)
艾美奧比再次被傳將會轉投史篤城
轉會費約400萬鎊

P.S.:
利記今季第一場正式比賽就幾乎收皮
返 office 同搭車都聽到有人怨聲載道
講真利記踢得差係抵鬧
不過0的人為左輸錢而數臭小弟隊愛隊
就真係好過份

佢地冇波羸其實預左
事關謝拉特有傷未好晒
又要掛住開鑼作客新特蘭
作客對住狀態唔差既標準烈治
冇波贏都唔知有咩咁出奇

0的爛賭鬼唔識波,只信名牌就想羸錢
同一個公司名都唔識,只記 number 就買股票既阿婆有咩分別?

2008-8-13

1)
祖高爾竟被傳成為利物浦左中場既1700萬鎊增兵人選

2)
艾殊利表示佢未入主紐卡素之前
紐記已因買人有2700萬鎊街數未找
但有消息指基瑾依然會得到撥款買人

3)
曉士澄清冇意思離開曼城

4)
費倫巴治要求基士文嘔返06年加盟時既100萬歐元
這個塞爾維亞射手當然 say no
佢一日未同這間土耳其球會傾掂數
佢轉會巴黎聖日耳門單野都仲未可以完成

5)
消息指車路士向皇馬出價2500萬鎊買羅賓奴
而這亦係車仔既 final offer

6)
傳聞指新特蘭向愛華頓出價600萬鎊買巴尼斯

7)
奧運足球既分組賽完晒
8強賽程如下:
巴西 對 喀麥隆
意大利 對 比利時
阿根廷 對 荷蘭
尼日利亞 對 科特迪瓦

2008-8-12

1)
洛杉磯銀河地震
拉拿斯被炒
球會老闆解釋話球隊既目標
係要成為一隊於國際舞台有競逐力既球隊
所以為左求變而唔等拉拿斯約滿就炒左佢

不過小弟認為銀河近期7場波都羸唔到
而又唔似可以入到季後賽
似乎先係拉拿斯被開刀既主因
美國體壇由總經理去斟教練同埋球員
佢地咁重手去斟碧咸同埋古烈治
令支出急升
收入雖然亦有明顯增長
不過球隊既成績依然停滯不前
拉拿斯要負上政治責任絕對唔令人(至少小弟)意外

至於古烈治方面
佢就決定向球會請辭
佢既原因係佢同家人都唔適應加洲既生活
不過有消息指佢其實亦唔適應美職盟制度既各種規限
例如薪酬上限
佢3月頭就因為咁而要放棄舊部屬巴巴耶路

而小弟認為拉拿斯被人炒後
唔似碧咸同球會有高薪長約既佢可能都自知時日無多
所以索性劈炮
被鍾斯暫時所取代既佢仲表示要考慮下會唔會再踏足球壇

2)
大衛施華決定留於西班牙發展
令佢轉會巴塞隆拿幾成定局

3)
曼聯即將以2800萬鎊既價錢羅致貝碧托夫

4)
居拿即將以780萬鎊既價錢轉投維拉
佢希望轉戰英超以加強入選西班牙國家隊既機會

禾達史勿夫就表示唔係因為格流財政唔掂而賣走佢
不過佢地既龍門麥基哥就被指成為下一個即將離隊既重心
佢被傳成為阿仙奴500萬鎊既新龍門人選

5)
由於他信棄保潛逃
佢既部份財產將被凍結
曼城既財政狀況因而令人擔心
有傳聞指部份星級球員將被出售
而曉士亦被指因而考慮向曼城請辭

另一方面,哥魯卡就表態有興趣轉投熱刺

6)
伊度奧極可能留隊

7)
史米轉投摩納哥

8)
前曼聯青年軍高列特因為於預備組賽事
被米堡既G.史勿夫踢斷腳而提早收山
倫敦高院判佢可獲賠償400萬鎊
由米堡既保險公司負責俾錢

9)
戴倫賓特於季前熱身賽入左13球
有消息指卡比路因而考慮召佢入國家隊

10)
紐卡素被指打算向韋根出價600萬鎊買希斯基

另一方面,艾美奧比就表態希望紐卡素將佢既轉會費定得比較合理
令佢可以順利離隊

11)
列達同埋比基都被可能以200萬鎊既價錢
分別轉投布力般流浪同埋侯城

12)
維拉被指有興趣以400萬鎊既價錢收購阿倫史勿夫

13)
希斯貝加成為最新一個同愛華頓扯上關係既中場中路球員

P.S.:
犘連奴表示唔睇好阿仙奴
因為佢地有經驗既球員唔多
而佢就睇好利物浦今季可以一嗚驚人
隨時連英超都羸埋
佢早前貼中西班牙攞歐洲國家盃
小弟都望佢開口又中

2008-8-11

1)
消息指利記高層雖然唔贊成咁貴買巴利
不過買年紀比較輕兼好有升值潛力既大衛施華就冇問題

2)
再有傳聞指曼聯想斟亨利過檔
仲肯俾2000萬鎊向巴塞隆拿買人

3)
他信同佢老婆棄保潛逃去左英國
曼城既財政狀況隨即令人懷疑

4)
尋日講過龍格堡考慮轉投洛杉磯銀河
而家拉素亦有興趣搵佢加盟
以代替轉投韋斯咸既比哈美

5)
車路士被指依然希望於轉會市場關閉前收購卡卡

6)
愛華頓被指有興趣向中央陸軍出價1500萬鎊買巴西射手路夫
消息指成事機會仲幾高

7)
西班牙傳媒指由於C7之前已同皇馬傾好晒條件
但而家又決定踢多曼聯一季
皇馬可能要求佢賠償1700萬鎊
不過如果佢肯於09年夏天加盟既話
皇馬就唔使佢賠錢

8)
意大利傳媒指由於皇馬最終肯打個75折俾羅馬
巴迪斯達將可於短期內以900萬鎊既價錢加盟

9)
早前講過有英超球會想斟大哨
原來就係曼城

10)
樸茨茅夫已落實卡保爾既600萬鎊轉會
這個前法國U-21後衛將簽約4年

11)
艾比亞由於同球會高層關係幾差
離隊只係時間上既問題
有傳聞指佢將於900萬鎊既價錢加盟韋斯咸

12)
奧華馬斯掛靴後於荷乙球會Go Ahead Eagles 出任總經理一職
有感球隊成績只係一般
佢決定親力親為復出做球員領軍

13)
有傳聞指沙維因為同哥迪奧拿不和而想提出離隊
佢被指考慮轉戰英超
而阿仙奴同埋紐卡素就被指幾有興趣羅致佢
而前者亦被指有其他中場增兵人選
收購當中包括佢既隊友耶耶托尼同埋曼城既米高莊遜

14)
禾夫斯堡已將巴西進攻中場馬些連奴賣去法林明高

15)
消息指侯城同埋史篤城都有興趣向車路士羅致比沙路

16)
富咸既德國右路球員禾斯被指成為米堡既200萬鎊新右閘人選

17)
消息指布力般流浪已拒絕維拉對辛達告魯斯既1000萬鎊出價

18)
戴卓爾被指可能以自由身轉投韋斯咸

19)
消息指查爾頓已拒絕西布朗對鄭智既出價

20)
普雷斯頓被指打算向愛華頓借用安尼捷比

21)
里昂法國右閘克拉克因膝傷而要抖半年

p.s.:
國奧隊上場對新西蘭令人有恨鐵不成鋼既感覺
點知今場仲衰
尋晚佢地連球品都輸埋
譚望嵩同埋鄭智咁樣抽水
不如轉行去做打手
丟晒國家既架
不知所謂

睇祖國男子隊踢波
可能真係測試忍耐力既好方法

2008-8-10

1)
利物浦行政總裁佩利承認巴利既1800萬鎊價錢實在太貴
亦有消息指兩個美國老闆都因為價錢咁貴而唔贊成買佢

另一方面,賓尼迪斯暗示可能賣走沙比艾朗素
其實路人甲都知佢想搵個好價放走沙比
佢老人家既口風使唔使轉完又轉呀?

2)
紐卡素同埋布力般流浪成為最新兩間想羅致泰摩斯卓克既英超球隊
辛尼特早前先後拒絕熱刺同埋愛華頓既出價
表明要2000萬歐元或以上既價錢先肯放走球隊隊長
不過隨住這名29歲烏克蘭防中堅持要轉戰英超後
態度軟化既辛尼特相信會以800萬鎊既價錢蝕讓
(佢07年2月時既轉會費傳聞高達1000萬鎊)

佢效率高,後上攻門出色同埋有領導能力
所以其實近年已先後同祖雲達斯,羅馬,些路迪同埋飛燕諾扯上關係
如果佢適應到英國波既快速節奏
絕對有能力成為英超其中一個最好既防中

3)
龍格堡表示考慮轉投洛杉磯銀河

4)
巴塞隆拿肯放美斯踢奧運
不過阿根廷就要承擔醫療責任
同埋於未來一年內既友誼賽都唔可以徵召佢

5)
AC米蘭被指準備向車路士提出以180萬鎊既賤價買艾雲洛夫

6)
大衛施華被指將以2500萬鎊既價錢轉投巴塞隆拿

7)
車路士被指加碼至2400萬鎊買羅賓奴

8)
愛華頓被指將莫天奴既收購價提高至1300萬鎊
不過士砵亭就未有回應

9)
史篤城承認向華倫西亞斟酌施積

10)
再有傳聞指紐根特將會轉投葉士域治
而佢既隊友桑戴維斯就被傳將以250萬鎊既價錢加盟些路迪

11)
傳聞賀迪成為米堡新右閘既300萬鎊人選

12)
雖然國米方面早前表示增兵完成
但佢地依然被指打算斟酌拉素既列迪斯馬
這名25歲阿根廷中場出名創造力強同埋射門腳頭重
值得大家留意

13)
馬賽既法國後衛基維被指將以175萬鎊既價錢轉投韋斯咸

14)
曉士承認哥魯卡成為熱刺既增兵人選
消息指800萬鎊既轉會費足以打動曼城放人

15)
賣走雲達華治既漢堡為左保持競爭力
被指打算向些路迪出價700萬鎊收購雲尼古

16)
皇馬因為斟酌C7失敗
被指將目標轉為哥利斯馬

p.s.:
小弟上 soccernet
睇到今晚意大利對南韓,
幾日後既中國對巴西
同埋其中一場8強賽
竟然全部係廣東踢?????

最初開心到彈起
不過唔夠3秒冷靜下來
就發覺原來這個著名網站竟然將秦皇島既英文名寫左做廣東
Qinhuangdao = Guangdong?
真係一場歡喜一場空

http://soccernet.espn.go.com/fixtures?league=fifa.olympics&cc=4716

2008-8-8

1)
賓尼迪斯表示雖然知道羅馬視班拿約為增兵對象
但冇意思割愛

而對於漢堡希望羅致古治既傳聞
賓帥亦表示唔會考慮放走這個荷蘭射手
不過亦有消息指漢堡既真正目標係禾路連
不過小弟就覺得傳聞既600萬鎊出價似乎高得有少少唔合理

2)
熱刺再次被指願意出價1200萬鎊收購同紐記只餘下一年約既奧雲

3)
隨住格流歐聯意外出局
佢地既財政狀況令人擔心
立即有傳聞指佢地考慮以900萬鎊既價錢出售西班牙中堅居拿以幫補一下
而利物浦同埋紐卡素都被指係可能肯接貨既球會
不過小弟就覺得機會唔大
因為兩隊而家都唔等中堅用

4)
前拜仁既加納中堅古科透露有兩隊英超隊打算羅致佢
消息指這兩隊球隊正是紐卡素同埋史篤城
不過而家來睇最終肯俾 offer 佢既應該係後者

5)
英國傳媒指車路士向皇馬出價1970萬鎊買羅賓奴
雖然羅賓奴既經理人放風話成事機會好高
不過小弟依然覺得出價未免過低
唔似可以打動好叻搵水魚既皇馬

6)
西班牙傳媒指大衛韋拿準備同華倫西亞續約

7)
繼上季被外借到切爾達後
奧祖舒艾比耶今季就被莫斯科斯巴達放逐到伯明翰

22歲既佢出身於阿積士少年隊
不過直至加盟阿仙奴青年軍
同埋代表荷蘭出席世青盃後先開始比較多人認識
佢可踢左翼或者前鋒既
佢速度好高,不過埋門把握唔掂加上紀律一般
影響左佢既發展
佢於今年初決定成為加納既大國腳

8)
喀麥隆中場麥比亞透露
愛華頓已向雷恩提出一個不少於800萬歐元既收購價

9)
維拉落實一次過引入楊格同埋索梳尼
消息指維拉總共俾左600萬鎊買佢兩個
不過維拉仍會繼續增兵
最新目標就係約值500萬鎊身價既施巴斯坦拿臣

10)
雷耶斯被馬體會外借到賓菲加至季尾

11)
新特蘭同埋愛華頓都被指亦有興趣收購麥卡菲
消息指佢地願意出唔少於600萬鎊既價錢買人
而亦有傳聞指前者準備向阿仙奴出價400萬鎊買賀迪

12)
雖然馬路達多次表示會留隊
但佢最近又被傳將以1200萬鎊既價錢被賣到羅馬

13)
巴黎聖日耳門玩野
想改為先向費倫巴治借用基士文
令轉會出現變數

p.s.:
近兩晚都係邊睇奧運邊寫 blog
尋晚睇到國奧隊咁樣踢波
絕對有恨鐵不成鋼既感覺
今晚就慶幸可以見證中國人既驕傲
相信未來17日既日子都應該係咁過

2008-8-7 (2)

1)
蘇巴保拿落實加盟富咸
簽約1年

上年佢來香港踢回歸盃既時候
小弟曾經問佢會唔會考慮再次選擇英國球會
當時佢表示機會好微
原因同效力西布朗時既唔開心經歷冇關
而係因為佢覺得年事已高而唔想再出去闖
(小弟估其實佢似乎係想保住國家隊一席)

小弟就同佢講笑話英國唔夠好龍門
佢可以憑級數搭夠
當時一笑置之既佢於一年後竟然真係重返英國
仲第一次踢英超
所以世事既野邊道講得埋?

2)
已先後5次患癌既波比笠臣承認患上肺癌
佢表示醫生已告知佢今次成功克服病魔既機會唔大
而佢亦決定過好生命餘下既日子

雖然波比 sir 既功力同埋成就
及唔上碧根鮑華,摩連奴,納比同埋史高拉利等人
但敬業既態度,以德服人既風範同埋對生命既執著
都足以解釋點解佢係小弟睇波20年來最有好感既領隊

To: Sir Bobby
Pls take care!

2008-8-7 (1)

1)
體育仲裁法庭終於判巴塞隆拿等3間球會上訴成功
球會有權拒絕放人參加奧運
不過消息指巴塞隆拿最終決定唔召回美斯

2)
他信否認出售曼城

3)
拉科證實已就高路仙尼既轉會費同紐卡素達成協議
消息指轉會費最高可達1300萬歐元

4)
圖盧茲既剛果中堅 H.Ilunga 由於不滿冇正選踢
威脅會於8月尾前離隊
法國傳媒指佢可能以200萬鎊既價錢轉投紐卡素
圖盧茲教練卡沙盧維冇透露會唔會放人
只表示於漫長既球季總有用得著佢既時候

5)
新特蘭再次被指有興趣羅致阿倫史勿夫
消息指黑貓肯出價300萬鎊買人
咁既價錢似乎已經足以令基瑾放人
關鍵反而係紐記肯唔肯賣球員俾死對頭

6)
由於陣中本身唔夠後衛用
(特別係中堅位置)
所以有傳聞指祖記打算向車路士借用艾雲洛夫

7)
C7表態至少下季會留於曼聯

8)
英超史上最年輕既球證卡坦貝治
早前俾人爆佢大鑊
指佢欠債6萬鎊
佢因而被足總同埋球證聯會暫停佢既執法

9)
韋斯咸方面宣佈已同龍格堡終止合約
這個前 CK 底褲既御用男 model 如果唔肯加盟亞洲或者美職盟既球會
將極可能要選擇提早掛靴

10)
兜兜轉轉後
A.莊臣終以1050萬鎊既價錢轉投富咸
但富咸只需要先俾愛華頓750萬鎊

11)
布力般流浪簽入辛達告魯斯既細佬祖里奧
這個18歲既攻擊球員同球會簽約3年
佢既加盟隨時令辛達告魯斯決定留隊

12)
由於自知成功引入費沙甘保既機會唔大
侯城被指極可能改打馬高高拿既主意
這個27歲葡萄牙射手由於不在新教練科里斯既計劃當中
極可能被賓菲加賤賣

13)
曼寧加早前先由薩爾斯堡紅牛轉投烏甸尼斯
不過佢日前又決定改投祖雲達斯
佢亦成為繼回巢既基文迪後
今個暑假內另一個由烏甸尼斯加盟祖記既龍門

14)
薩拉戈薩既西班牙龍門施薩可能以借用身份加盟熱刺

15)
加拉塔沙雷被指打算向布力般流浪出價500萬鎊收購賓尼麥卡菲

16)
阿馬朗落實以借用身份加盟費倫天拿

17)
保頓從屈福特簽下尼日利亞守將薜圖
雙方簽約3年

18)
維拉成為最新一支同費拉利扯上關係既球隊

19)
祖爾被指打算提出以800萬鎊既價錢
從熱刺引入舊部屬索高拿

20)
麥法頓被指將可能以500萬鎊既價錢跳船至布力般流浪

21)
沙洛因肌腱撕裂而又要長抖

22)
韋托特因批評教練拉甘比以同足球無關既原因而棄用佢
被雷恩暫時逐出一隊

2008-8-6

1)
謝拉特尋晚於對華拉倫加既熱身賽大腰輕微拉傷
可能缺席下星期三對標準烈治既歐聯外圍賽

2)
大衛施華既經理人透露
這個西班牙國腳將於下個星期前落實去向
如果到時華倫西亞未能同佢達成續約協議
就可能考慮賣佢去巴塞隆拿或者利物浦以減債

3)
雲加又睇中兩個小朋友
分別係皇馬青年軍龍門 F.拉莫斯
同埋哥連泰斯既19歲射手迪天奴
後者最近拒絕左沙地球會艾希里既斟酌

4)
高路仙尼今日會到紐卡素進行體測
如果冇咩意外仲會即刻同紐記簽埋約

5)
紐卡素被指願意以450萬鎊既價錢出售阿倫史勿夫
不過消息指現時愛華頓只肯俾150萬鎊
似乎唔足以令基瑾放人

6)
由於條防線超唔掂
加上尼斯達仲可能要開刀長抖
聖保羅既巴西奧運隊後衛阿歷士施華同埋自由身既費拉利
都被指成為AC米蘭既增兵對象
不過紐卡素亦被指仍對後者幾有興趣

7)
朗尼由於感染病毒
可能缺席社區盾,甚至開咧既聯賽
但同時染病既卡域克已經康復復操

8)
早前轉會基達菲爛尾既迪拉列達而家被指可能轉戰英超
消息指阿仙奴願意俾皇馬所要求既950萬鎊

9)
繼辛達告魯斯後
達比舒亞被指成為另一個曉士睇中既舊部屬

10)
韋斯咸被指肯俾700萬鎊買賓納特
簡直係利迷既好消息

11)
伊雲斯勢必離開曼聯
而家熱刺同埋紐卡素都被指係可能買家

12)
比拿美而家一身蟻
事緣日前對葉士域治既熱身賽
當佢因傷被換出既時候
有個敵對既女球迷出言撩佢
佢就回敬一句鬧人係妓女
而家當地警方同埋韋斯咸已經開左 file 去查

13)
簡奴同樸茨茅夫續約一年

14)
朗斯中場 J.沙保同時收到
希臘球隊 PAOK 同埋布力般流浪既邀請去參加試腳
不過這名28歲法國球員表明對英超比較有興趣
所以只會到後者試腳

15)
楊格成為維拉400萬鎊既新右閘人選

P.S.:
格流尋晚輸俾弱旅卡奧拿斯
歐聯第二圈就玩完
抵佢地既球迷發言人會用'恥辱'來形容

2008-8-5

1)
雖然尋日賓尼迪斯雖然講過話唔準備賣走沙比艾朗素
不過如果否認會出價收購巴利既阿仙奴
如傳聞所指願意出價1600萬鎊買這個西班牙2號防中
小弟認為賓帥改變主意既機會幾高

亦有消息指兵工廠既真正目標係士砵亭既莫天奴

2)
有消息指一旦車路士未能成功羅致羆賓奴
將改向馬體會出價2000萬鎊收購森保沙

3)
英國傳媒指熱刺準備於季前收購多3名球員
當中包括大衛韋拿,艾沙維同埋哥魯卡

熱刺被指準備先以3000萬鎊賣走貝碧托夫
再以破英超轉會費紀錄既3200萬鎊價錢向華倫西亞買人
而消息指熱刺願意俾佢10萬鎊週薪

艾沙維既轉會就隨住辛尼特態度軟化
肯以2100萬鎊既價錢賣人而重現曙光

至於可踢閘同埋中堅既哥魯卡亦俾拉莫斯睇中
不過消息指既680萬開價鎊就似乎太低
唔似可以打動有他信撐腰既曼城

4)
傳聞阿仙奴向紐卡素提出以300萬鎊
另加上辛達路斯既 offer 利誘紐記出售基雲

5)
尹達華治落實以1300萬歐元轉投皇馬
佢同球會簽約5年
佢將會代替十字韌帶冇斷
但部份韌帶斷左而要養傷3個月既史尼達

6)
尹巴士頓決定放棄包括
盧基,羅美度,皮里斯同埋李安納度在內既8個球員

7)
AC米蘭現時陣中只有卡勒同埋迪達兩個廢物龍門
前者更於日前解圍踢空氣導致大敗
消息指忍無可忍既AC米蘭高層已準備
從山度士引入巴西既柏沙利斯去取代佢地

8)
尋日講過菲爾想離隊
而家就有傳聞韋根想出價250萬鎊買人

另一方面,阿倫史勿夫被指成為愛華頓既羅致對象

9)
伊度亞度達施華透露希望可於聖誕節復出

10)
奧雲將可以於今個星期內復出

11)
史巴利堤透露羅馬將簽入兩名新球員以替補古利同埋文仙尼
分別係摩納哥既文尼斯同埋利物浦既班拿約
消息指後者既轉會費大約係700萬鎊

12)
雲佬宣佈退出國家隊

13)
施斯可能以借用身份加盟曼城

14)
愛華頓於早前先後嘗試羅致麥比亞同埋莫天奴都未能成功
有消息指莫耶斯可能改打保拿特既主意

15)
繼柏夫奴真高同埋科蘭之後
尼尼成為最新一個熱刺新射手既人選
這名摩納哥巴西射手約值800萬鎊

16)
森遜將以借用身份效力布力般流浪一季

17)
樸茨茅夫成功從甘比亞球會 Banjul Hawks 引入18歲射手高路馬
之後隨即將佢外借到諾域治

18)
米堡被指打算各利華古遜出價400萬鎊買瑞士中場巴尼達

19)
紐卡素希望可於今個星期內完成高路仙尼既轉會

20)
消息指新特蘭向曼聯開價850萬鎊買沙夏

21)
列圖最終被利物浦外借到奧林比亞高斯

22)
隨住史特加拒絕拜仁對馬里奧高美斯既出價
當時人亦表態願意留隊

23)
韋希姆臣落實加盟艾希里
年薪有180萬歐元既佢決定簽約兩年

24)
侯城方面承認引入費沙金寶以及奇雲戴紐斯既機會唔大

p.s.:
巴塞隆拿,史浩克04同埋雲達不來梅已向體育法庭上訴
希望阻止美斯,拉菲爾同埋迪亞高參加奧運
以小弟愚見
佢地雖然出糧俾球員
國際足協亦冇權迫球會一定要放人
但因為唔放人踢奧運而同球員既關係變差
始終唔係好事
何況球會亦應該尊重球員踢奧運既心願

2008-8-4

兩日冇講過新聞
請見諒......

1)
兩條來自亞洲既水喉被指有興趣收購紐卡素
印度買家係全球排名第6既富豪安巴尼
佢有210億英鎊身價
足足係油王既兩倍
不過佢已經作出否認
而新加坡財團就搵到前利物浦英格蘭中場麥馬漢出任商務總監

2)
奧尼爾忽然表示巴利離隊一事
仍有可能於轉會市場關閉前發生
賓尼迪斯就表示仍會盡力引入巴利
不過就表明唔會賣走沙比艾朗素去套現
消息指交易可能於今個星期內完成

3)
紐卡素被指願意屈服
向拉科魯尼亞付出1000萬鎊收購高路仙尼
而巴斯桑治就已落實加盟紐記
不過就有消息指菲爾可能向紐記提出離隊要求

4)
由於史尼達可能要長抖半季
令皇馬要加緊羅致尹達華治
漢堡方面已宣佈佢即將轉投皇馬
但現時依然有傳聞指皇馬打算向曼聯提出以6000萬鎊買C7

5)
大哨繼被傳加盟燕豪芬同埋法林明高後
而家又被指將轉投英超球會

6)
熱刺成為艾沙維最有可能加盟既球會
不過辛尼迪企硬要2000萬鎊以上既價錢
就成為交易既障礙

7)
拉度爾被指即將以1450萬歐元既價錢由布加勒斯特星隊轉投國米

8)
艾迪巴約同阿仙奴續約4年
週薪8萬鎊

9)
鄭智被指成為西布朗200萬鎊既羅致對象
而查爾頓就有球迷抗議鄭智可能被球會賣走

10)
基士文透露即將轉投巴黎聖日耳門

11)
杜奧巴即將同車路士續約4年

12)
消息指樸茨茅夫希望於星期日前引入索尼同埋卡保爾

13)
奇雲戴維斯被指成為侯城300萬鎊既增兵對象

14)
西布朗被指向錫菲聯出價200萬鎊買中場當治

15)
皇馬已落實將19歲中場柏利外借到昆士伯流浪一季

16)
熱刺再次被指打算出價收購科蘭

17)
薩克達既捷克龍門拉斯杜夫卡已落實以借用身份加盟韋斯咸

18)
早前被傳俾利物浦外借到奧林比亞高斯既施巴斯坦拿臣
唔會發工作證
令賓尼迪斯必須盡快借走佢

19)
巴塞隆拿既西班牙20歲中場 Marc Crosas
被指成為些路迪既200萬鎊既增兵目標
打法幾似哥迪奧拿同埋沙維既佢
係巴塞隆拿後備龍門佐基拉既堂細佬

20)
曉士被指想同辛達告魯斯再次合作
消息指曼城願意出價1500萬鎊買人

2008-8-1

1)
維拉限時英國時間星期三17:00
要利物浦答覆肯唔肯俾1800萬鎊買巴利
點知利物浦17:15先回覆話肯俾錢
不過維拉已於17:00即刻於官網宣佈留隊
令利記羅致巴利既希望正式落空

2)
巴頓雖然唔使被紐卡素減人工
不過返到球隊都依然唔好過
因為英國傳媒爆料話佢被隊友排斥

而佢上年5月打傷達保一事
英格蘭足總可能抽後算帳罰佢停賽10場

小弟同意英格蘭足總咁做
不過遲左15個月就超冇效率

3)
美斯已起程去踢奧運

4)
肥安否認會搵舒夫真高回巢

5)
阿仙奴正式簽下費斯卓夫
雲加形容簽曾經兩度開刀既佢係一場賭博

6)
艾沙維同埋柏夫奴真高成為熱刺最新既增兵對象

7)
施斯既經理人透露這個法國射手
成為曼城同埋韋斯咸既增兵對象
而前這名前利物浦射手唔 prefer 轉戰意甲
粉碎佢轉投羅馬既傳聞

另一方面,羅馬接連斟酌柏夫奴真高,巴迪斯達同埋佢都唔掂
加上阿古蘭尼遲遲唔肯續約
而家被指可能接受國米以阿祖安奴交換這個意大利中場既建議

8)
由於國米陣中有多位中堅受傷患困擾
消息指摩連奴極可能會簽入自由身既費拉利

9)
賓特尼過檔熱刺
阿仙奴將可分得當中700萬鎊既轉會費

10)
新特蘭今季專攻失意軍人
些路迪既畿內亞中堅巴迪同埋沙夏都成為佢地既最新目標
前者極可能加盟
後者就可能考慮回流法甲,加盟巴黎聖日耳門

11)
巴勒莫既澳洲中場比斯安奴
被指成為恩斯心目中替補賓特尼既人選

12)
巴塞隆拿否認會引入查斯古特

13)
班拿約既經理人透露這個以色列進攻中場將會留隊

14)
麥比迪即將加盟芝加哥火焰

15)
樸茨茅夫被指打算引入愛斯賓奴既喀麥隆龍門卡文尼

16)
路易斯加西亞被指將轉投賓菲加

p.s.:
馬田斯既職業操守真係超好
咁快就歸左隊