2008-10-31

近兩日既新聞......

1)
國際足協公布世界足球先生既23人侯選名單
包括C7,美斯同埋包括卡斯拿斯在內既6名西班牙國腳

2)
歐洲金童獎亦公布40人候選名單
當中包括阿古路同埋禾確特
而有4人入選既阿仙奴就成為大戶

3)
足總主席梁先生又有新搞作
同搞世界足球系列賽既搞手傾緊每年7月搞4角賽
又同英超賽會傾由香港再次舉辦英超挑戰盃

4)
西班牙傳媒指沙治奧拉莫斯同皇馬既關係已經變得幾差
消息指皇馬唔同佢傾續約之外
仲想將佢掛牌出售

5)
費甸南同埋舒靈咸都被指成為熱刺教練團既人選
而前者已經表態有興趣
另一方面,佢地打算於1月向曼聯借用賓科士打
而迪亞拉就被指係佢地1500萬鎊既收購對象

6)
熱刺準備起返個可以容納6萬人既新球場

7)
碧咸落實以借用身份加盟AC米蘭
日期由1月7號至3月初
AC米蘭就同美職盟簽約於技術上結盟作為合作條件

8)
華拉度列既19歲龍門阿辛祖被指成為曼聯,車路士同埋巴塞隆拿既羅致對象
不過佢既經理人表示佢唔準備於季中離隊

9)
龍格堡落實同西雅圖發音機簽約兩年
年薪250萬美元

10)
阿祖安奴表示想於1月離開國米返巴西落班

11)
賓尼麥卡菲被指成為維拉600萬鎊既羅致對象
更令希亞活於1月以400萬鎊轉投史篤城既傳聞有可信性

12)
早前同好多球隊扯上關係既希臘16歲中堅 K.Papadopoulos
被指成為曼聯400萬鎊既羅致人選

13)
蘇斯克查獲得挪威皇室一級騎士勳章

14)
彭迪夫被指成為車路士既增兵對象

15)
費 sir 透露佢已經同泰維斯傾緊正式轉會

16)
波蘭足總透露萬一烏克蘭冇能力合辦2012年歐國盃決賽週
佢地可以改為同德國合辦

17)
基辛尼舒維尼被指將於1月轉投韋斯咸
轉會費為75萬鎊

18)
屈福特20歲愛爾蘭 U-21 中場 J.J. O’Toole
同埋佐卡圖斯南非23歲中場 L.Davis 都同紐記扯上關係
前者今季已入7球既出色表現令佢被指將於1月以100萬鎊既價錢離隊

而後者上年到紐記同埋布力般流浪試腳都失望而回
而家佢同這間瑞典球會既合約將於年尾完結
這名可以踢右翼,右閘同埋中場中既球員速度好高
自由身絕對值得堅尼亞考慮

19)
韋根被指於1月打算開價600萬鎊收購史堤芬亨打

p.s.:
馬勒當拿單野今日冇時間講

2008-10-30

幾場波想講......

1) 紐卡素對西布朗

紐記只踢左大約半場好波
最終可以袋晒3分全因對手只係護級份子,兼入球能力幾唔掂既西布朗

由於 sammysir 對場波既分析實在太好
小弟只打算對紐記既前中後3線略有補充

杜夫,古迪利斯,馬田斯同埋艾美奧比既4人攻擊組合
已係現時人腳當中最好既選擇
不過之後艾美奧比就應該會因為奧雲既復出而要退居後備
小弟幾驚到時就算奧雲唔 fit
堅尼亞都因為奧雲既名氣而過早俾返個正選佢踢
既削弱前場既制空力
亦對近幾場有貨交既艾美奧比唔公平

中場方面
巴頓請纓射12碼
有波入對佢而言係一支強心針
佢同埋格夫里似乎會係未來紐記中場中路既正選拍檔
畢竟畢特同埋謝列美都年事已高

後防方面
sammysir 提到高路仙尼既漏洞
小弟就要為佢講幾句好話
高路仙尼其實係一個唔錯既後衛
但問題係佢同史堤芬泰萊都唔係擅於包抄既後衛
理想既中路組合總係一個搶波一個包抄
想佢兩個包抄到家應該要等一段時間
利記既加歷查應該係一個好例子
原本閱讀球賽能力幾強既卡卡巴係包抄型中堅既好人選
只可惜佢一把年紀,轉身又慢

2) 利物浦對樸茨茅夫

利記最終只係煲魚生粥絕對唔令小弟意外
因為預左一球起,兩球止
一來預左樸茅實死守
二來利記唔可能場場都出盡十成功力
踢聯賽同跑馬拉松一樣都要識收放
畢竟最重要只係攞足3分

3) 阿仙奴對熱刺

兵工廠球迷路斯基話場波令佢唸起'波係圓既'
小弟就唸起伍晃榮先生既另一個說話:
'足球比賽既入球多數係由錯誤引起'
有睇場波既都會明小弟講咩

不過講到犯錯既仲有雲加
佢尋晚既調動其實亦係球隊被迫和既原因
自從兵工廠再次 lead 住兩球之後
熱刺前線威脅好有限
因為戴倫賓特孤掌難鳴
而摩迪歷既體力就明顯嚴重下降
兵工廠再入波既機會明顯比熱刺多好多
但佢地把握唔到之餘
雲加先後換入迪亞比同埋桑治搞到隊波冇左原本個陣式
球隊亦當然 keep 唔到原本既進攻模式
結果鬥志大於一切既熱刺可以放手一搏

雲加其實以前亦犯過類似錯誤
02-03年球季阿仙奴對利物浦
羸緊2:1兼羸埋個勢既時候
雲加用盧茲尼入替伯金
令球隊因為俾人壓返轉頭而最終於補時被迫和
埋下最終被曼聯後上捧盃既伏線

其實早前歐聯作客對費倫巴治
雲加於球隊大比數領先既時候都冇唸住死守
其實以阿仙奴攻強於守既特點
往後踢聯賽佢似乎唔應該再咁保守

4) 曼聯對韋斯咸

只睇過精華
個人認為貝碧托夫既助攻絕對係近兩晚最精彩既鏡頭
比賓特尼既40碼笠射同埋林伯既乖巧熨射更令小弟興奮

小弟以前讀 U 既時候都試過(超好運)入過一球類似賓特尼既笠射
林伯特0個球講真亦熟好熟面
但貝碧托夫0個下就真係唸佢唔到
仲令小弟聯想起伯金當年 ko 達比薩斯既'足球小將式'假身

p.s.:
1)
新聞聽日先講
2)
馬勒當拿單野有機會再講

2008-10-29

1)
馬勒當拿接受傳媒訪問時證實即將執教阿根廷
而前國家隊教練貝拉度將會出任助教

2)
阿當斯搵前隊友基昂出任助教

3)
大哨表示唔會重返歐洲賽場
全因想返法林明高養老
佢亦表示如果操唔起狀態既話
或者會索性掛靴

4)
下季亮選澳職盟既金色海岸被指打算引入孫繼海

5)
薩基,耶高保,迪科爾,哥治同埋迪亞拉都被傳成為熱刺1月既增兵目標

6)
韋達斯再次被傳會以借用身份加盟列斯

7)
堅尼亞於紐記羸波後向記者表示佢想做球隊領隊

p.s.:
1)
森巴小志強阿祖安奴又打回原形
星期日晚對熱那亞已經因為表現差而只係踢得半場
點知即晚仲有心情同細哨落 bar 蒲通宵
衰過都有人肯再俾機會已經算佢好命
咁都唔識珍惜就認真自作孽

2)
紐記場波聽日先講

2008-10-28

近兩日既新聞......

1)
哈利列納搵左舊同事 K.Bond 入教練團
而佢亦已經同球隊前隊長舒活密斟
佢同時表示佢個仔占美列納同埋阿當斯都唔會加盟熱刺

另一方面,佢表示佢全權決定球員買賣
老闆只係負責科水
傳聞佢於1月將有7000萬鎊擴軍
佢亦暗示會返樸茨茅夫搵部份舊部屬幫手

2)
摩頓柏達臣同埋特羅素既波斯尼亞龍門拉莫域都被指成為熱刺既增兵對象

3)
雖然祖佐敦, Big Sam ,格蘭同埋杜維都一度被傳係可能人選
但消息指樸茅即將宣佈阿當斯為新領隊

4)
瑞典傳媒報導龍格堡即將同美職盟新球會西雅圖發音機簽約兩年

5)
莫斯科中央陸軍既俄羅斯進攻中場 A.Dzagoev 否認會加盟皇馬
但就透露想加盟車路士

6)
巴利再次被指成為車路士既1700萬鎊增兵對象

7)
C7被選為上個球季既 FifPro 最佳球員
而最佳陣容包括:卡斯拿斯,沙治奧拉莫斯,泰利,里奧費甸南,佩奧爾,
謝拉特,卡卡,沙維,C7,美斯同埋費蘭度托利斯

8)
AC米蘭方面表示係碧咸主動透過律師話想加盟佢地

9)
意大利傳媒指祖雲達斯睇中伊保爾同埋巴里

10)
當奴雲表示想於1月轉戰西甲或者英超

11)
列迪斯馬因為合約問題而同拉素高層不和
佢既經理人表示這名阿根廷進攻中場隨時買斷自己既合約離隊
傳聞國米同埋祖雲達斯一直都打佢主意

12)
波歷克同埋芬寧斯已向路維道歉

13)
希爾活特聲稱冇意思出讓手頭上阿仙奴既股份

14)
亨特拉爾同埋馬杜迪再次被傳成為阿仙奴既增兵目標
另一方面,雲加亦留意緊列斯聯既18歲新星 F.Delph
佢超強既體能同埋唔錯既攔截技巧同時吸引到新特蘭以及西布朗既注意

p.s.:
艾美奧比最近發圍
估唔到佢細佬都唔差
尋晚先入兩粒幫紐記預備組
於 Central Carling Cup 既分組賽羸 Hartlepool 2:1

2008-10-27

3場波想講......

1) 西布朗對侯城

戰果唔反映雙方實力既分野
冇運既西布朗3次射中門框
不過佢地本身都有唔少問題
25次攻門都冇波入就睇到埋門一腳唔慌好
而佢地亦因為回防速度慢而俾對手連續兩場突擊得手
加埋防守死球又唔集中
輸波好應該自我反省下

侯城而家就明顯係一隻著左(虛)火既老虎
死球加快速突擊加基奧雲尼既神來之筆
已經係佢地羸波既一條方程式
想睇佢地變返隻病貓
怕且可能要等到聖誕

2) 新特蘭對紐卡素

場波緊張但質素一般
新特蘭有得羸只因紐記踢得比佢地差

新領隊要執靚隊波總要逐步慢慢來
堅尼亞激勵完士氣之後
就要唸下隊波既攻守表現

基雲簡直係紐記版既卡斯拿斯
中後場人腳幾近夫添都保護唔到佢
短期內睇唔到佢地既防守會有進步
既然係咁堅尼亞不如先改善進攻
對新特蘭場波紐記多數只有杜夫同埋一對箭頭參與進攻
到古迪利斯落場後其實對球隊有幫助

而前線既一對箭頭
馬田斯既狀態有待提升
而有高度同埋 build up 左信心既艾美奧比就應該多0的時間於禁區等波
因為佢走出禁區後紐記隨時冇人去完成最後一擊

3) 車路士對利物浦

雙方都有主力缺陣或者紮住上陣
之前有唸過愛隊利記可以保住不敗
但終止埋對方86場聯賽主場不敗既金漆招牌就有少少驚喜
有細心睇晒場波既都會發現其實利記羸波合理

今場波其實係車仔季初對曼聯既翩版
最大既分別係利記既佈防比曼聯出色得多
利記尋晚既 4-3-3 陣式其實就係 4-5-1
負責兩邊側擊既古治同埋尼亞拿又夠勤力
中路同埋兩側都封死晒車仔既去路
令車仔既地面戰戰術徹底失效
利記防守死球亦好集中
車仔全場最有威脅既攻門又因越位在先而搏唔到12碼
結果尋晚欖球員上身既佢地只能不斷遠(浪)射

車仔早前對曼聯時已經暴露左艾辛缺陣既影響
當時佢地面對夏格維斯,費查同埋朴智星都要陷於苦戰
今次面對級數更高既利記中場當然更加無啖好食

利記既攻勢同埋控球時間都唔算多
不過有威脅既埋門就俾對手多
沙比艾朗素既入球絕對係好運好過好波既例子
不過佢下半場中柱既罰球總算當還返個人情俾施治
而謝拉特上半場既半窩利
同埋巴布完場前既快射亦遠比車仔球員既浪射精彩
另外,佢地亦有幾次悅目既小組推進
以上所講既野車仔尋晚一樣都做唔到
咁仲唔抵輸?

另一方面,托利斯繼對曼聯既大戰後再次缺陣
但利記兩次都羸波就證明利記唔係只係靠王子先入到波

尋晚場波可以講係利記今季既代表作
向列強示威之餘
仲可以俾利迷知道今季係自英超成立以來最有力挑戰冠軍既一次

不過講咩都假
而家只係俾車仔,兵工廠同埋紅魔鬼失少3至5分
聯賽亦只係踢左9場
根本冇野值得高興

上次羸完曼聯之後竟然和史篤城
最緊要都係星期四凌晨對無領隊狀態既樸茨茅夫攞晒3分
否則羸幾多次 Big 4 對手都係冇用

2008-10-26 (2)

唔想大家每次只係睇新聞同埋賽後感
今次想一次過介紹十幾個新星......

1) 比連奴
19歲既佢係巴西 U-23 代表隊隊長
拜仁上季向聖保羅出價1150萬歐元
爭羸AC米蘭同埋皇馬先簽到佢
佢被形容為巴西新一代最好既中堅
亦有評論指佢係未來巴西隊隊長人選

2) A.Abdi
這名22歲蘇黎世進攻中場係軒斯菲特接手瑞士後既心頭好
佢俾波,扭波同埋遠射腳頭都唔錯

3) 韋舒亞
16歲既佢係兵工廠暑假既其中一個大發現
這名左腳仔可以踢中場任何一個攻擊既位置
創造力強既佢亦擅長後上埋門
佢以16歲256日破左兵工廠最年輕出場紀錄

4) O.Wendt
這名22歲哥本哈根瑞典左閘速度同埋腳法兼備
傳聞祖雲達斯,錫耶納同埋慕遜嘉柏都睇中佢

5) J.Sammir
這名巴西進攻中場現時效力薩格勒布戴拿模
(即係伊度亞度達施華以前踢0個隊)
現年21歲既佢有速度高,扭波叻,腳頭仲好重
這個左腳仔已經成為幾間荷蘭球會既收購對象

6) G.Arlauskis
這名20歲立陶宛龍門現時效力羅馬尼亞球會 Unirea Urziceni
雖然佢只有1米84
但位置感強令佢出迎高波唔算好蝕底
而佢亦擅長出迎封單刀波

7) 沙利豪域
賀芬咸季初於德甲有好表現
這名24歲波斯尼亞左中場絕對係功臣之一
佢擅長踢進攻中場同埋左翼
亦可以客串前鋒

8) A.Al Mohamady
這名21歲埃及右閘現時效力當地球會 Enppi Cairo
佢出色既助攻力令佢得到機會稍後去布力般流浪試腳

9) T.Belaid
現年21歲既佢於法國出世
細個既時候去過國米同埋燕豪芬碰運氣
現時效力捷克球會 Slavia Praha 既佢波底好,效率高同埋入球能力強
佢先後代表突尼西亞 U-17 同埋法國 U-19 出賽
最終就選擇成為突尼西亞既大國腳
如果佢可以改善紀律問題應該會有比較好既發展

10) 柏斯斯
這名20歲法國中場被形容為新韋拉
賓帥上年暑假轉會 deadline 前從里昂買入佢
身形佔優既佢雖然冇施素高咁辣
不過攔截既準繩度同埋俾波既能力都比施素高好
今年4月佢第1次為利記上陣就鬥兵工廠
演出羸得好評
而好有領導能力既佢仲於今季對克魯既聯賽盃賽事出任對長

11) F.Ivanovski
這名22歲馬其頓射手現時效力波蘭球會 Polonia Warszawa
佢左右腳都擅射,有速度,踢法亦唔自私

12) Tamás Kádár
這名18歲匈牙利防守球員係 Big Sam 離開紐卡素斟酌返來
雖然 Big Sam 俾艾殊利開除
紐記最終依然爭羸保頓成功引入這名可踢中堅同埋左閘既球員
佢雖然最想踢中堅
但就講明唔介意改踢左閘以爭取上位機會
佢已入選匈牙利A隊
不過現時仍未有機會出場

13) 保沙利
這名23歲阿根廷射手現時效力學生隊
佢因為希望得到更多出場機會而離開小保加
小保加知道這名典型射手遲早去歐洲搵食
所以只收學生隊轉會費400萬歐元
但就要分到佢下次轉會既一半收益

14) P.Wernbloom
這名哥登堡21歲球員可踢進攻中場或者前鋒
已經成為大國腳既佢成為幾間丹麥同埋德國既羅致對象

2006-10-26 (1)

近兩日既新聞......

1)
熱刺尋晚一次過炒晒拉莫斯,普耶同埋哥莫尼等人
仲即刻宣佈搵哈利列納接手
熱刺將會俾樸茨茅夫500萬鎊作為賠償
今晚主場對保頓場波將由基夫阿倫暫時領軍

2)
消息指科威特富豪用自己財團收購紐卡素一事接近成事
收購價約3億鎊

3)
傳聞曼聯想搵摩連奴做費 sir 既接班人
不過紅魔鬼已經作出否認

4)
朗拿度既經理人已經同巴黎聖日耳門開過會

5)
皇馬主席卡特朗聲稱球會冇意思再斟酌 C7

6)
咸美頓既20歲後衛伊斯頓成為韋斯咸1月既增兵對象

7)
雖然有傳聞夏格維斯將被掛牌
費 sir 就澄清冇咁既事

8)
華倫西亞,樸茨茅夫同埋巴勒莫都被指睇中
夏積既20歲克羅地亞射手 N.Kalinic
比歷曾經形容佢係克羅地亞將來既希望
西班牙傳媒指華倫已經出價700萬歐元

9)
昆士伯流浪開除領隊杜維

10)
對於加拿斯俾狗仔隊影到佢夜蒲兼擔住口未點既煙
雲加表明會搵佢照肺

p.s.:
等埋今晚既紅藍大戰
賽後感聽日先講

2008-10-24

1)
樸茨茅夫亦想向洛杉磯銀河借用碧咸
另一方面,銀河教練原來事前唔知碧咸將會被借走

2)
堅尼亞同紐卡素達成協議
將會繼續執教至球會正式出售為止

3)
意大利傳媒指熱那亞打算季尾搵奧雲以自由身過檔

4)
由於本土聯賽成績未乎理想
岩岩於歐聯俾維拉利爾大炒既阿爾堡解定同教練李奧治解約
佢當年曾執教兵工廠約1個球季
柏金都係佢一手引入英超

5)
路維表示已經召波歷克返德國
要佢解釋點解公開插佢

6)
日本傳媒指橫濱水手準備出價唔少於1000萬歐元
將中村俊輔帶返 J-League
水手方面就表示仲未傾掂數

7)
放棄收購查爾頓既杜拜財團被指已改打愛華頓既主意
消息指佢地打算2億鎊收購
仲會注資7800萬鎊作去起新球場同埋幫手償還部份債務

8)
NAC 既28歲加納射手艾莫亞 被指成為愛華頓既增兵對象

9)
維拉成為最新一支對薩基有興趣既英超球會
而 Zamalek 就否認利記想收購這個埃及射手

10)
維拉被指打算出價950萬鎊羅致辛達告魯斯

11)
北京市體育局表明會申辦2018年世界盃

12)
雲加證實伊度亞度達施華將可以於三星期後對韋根既聯賽盃賽事復出
不過路斯基就要抖到過左聖誕

13)
西班牙傳媒指曼聯睇中畢爾包兩名球員
佢地分別係艾摩連比達同埋查維馬天尼斯

另一方面,紅魔鬼亦睇中山度士既16歲巴西前鋒 Neymar
不過就要同阿仙奴,車仔,巴塞隆拿同埋皇馬爭過

2008-10-23

1)
碧咸仍未落實以借用身份加盟AC米蘭
而美職盟方面表明由於新球季會於4月重開
碧咸既借用期唔會多過3個月

2)
舒利亞暗示佢已經隨時準備成為下一任紐記領隊後
前愛爾蘭代表隊教練積查爾頓即刻撐佢
不過堅尼就認為堅尼亞值得得到機會教落去

3)
波歷克就芬寧斯唔受重用
同埋路維公開表明唔會再徵召古蘭爾一事
而同佢隔空駁火

不過對於被問到會唔會因而換隊長
甚至唔會再徵召波歷克
路維就冇任何回應

4)
由於獲英格蘭足總撤銷紅牌
比耶可以於對新特蘭既東北部打呲戰上陣
而巴頓同埋古迪利斯就最少可以擔任後備
不過奧雲就只得4成機會趕及候命

5)
艾古爾被傳將被馬體會辭退
傳聞佢地想搵拉莫斯接手

6)
布魯士透露已同 Zamalek 傾好薩基既725萬鎊轉會費
不過佢表示依然坦心有其他英超球會好出更高價錢搶人
利物浦同埋曼城都被指有興趣同伯明翰爭奪這個埃及射手

7)
杜拜財團已終止收購查爾頓既計劃

8)
古爾沙由於唔適應土耳其既足球風格
因而有傳聞指佢想離開費倫巴治
消息指曼城有興趣1月帶佢去英超

9)
紅牛既25歲奧地利特手贊高被指成為米堡既增兵對象

10)
法比加斯向傳媒表示暑假既時候曾收到AC米蘭既斟酌
另一方面,標準烈治既比利時中場迪科被指成為兵工廠1月800萬鎊既羅致人選

p.s.:
利記尋晚又傷3件
謝拉特,羅比堅尼同埋沙比艾朗素都有輕傷
加埋已有肯定缺陣既托利斯同埋史基泰爾
傷兵情況都咪話唔令人擔心
加上歐聯後遺症又比對手嚴重
作客史丹福橋唔輸都已經算有交代

2008-10-22

近兩日既新聞......

1)
AC米蘭證實準備向洛杉磯銀河借用碧咸
另外,佢地就否認想斟酌麥薩斯

2)
奧雲被指成為熱刺1月既500萬鎊增兵對象
而佢地亦想向財困既韋斯咸出價250萬鎊收購柏加
另一方面,波蘭球會 Wislaw Krakow 既 P.Brozek 亦被指成為增兵人選
這名25歲波蘭球員可以踢左路任何一個位置

3)
馬勒當拿早前自薦教阿根廷
但佢既86世界盃拍檔華丹奴就表示佢唔夠經驗接手
另外,貝拉度同埋比安基就被傳係最新既接手人選

4)
馬田柏度夫將因膝傷而缺陣3至4個月

5)
雖然真路拿表示熱刺唔使咁急炒拉莫斯
不過就放風想返熱刺幫手
而比歷就表態唔會接手熱刺

6)
法比加斯否認拒絕同兵工廠續約

7)
傳聞狼隊想斟酌自由身既卡爾

8)
利物浦被指想收購薩基

9)
大哨既經理人承認有意甲球隊想斟酌R9
不過就絕非森多利亞同埋錫耶納

10)
莫斯科中央陸軍既23歲塞爾維亞右中場 M.Krasić
被指成為曼聯收購對象
不過踢法幾似尼維特既當時人就已經否認有關報導

11)
阿仙奴被指打算出價1000萬鎊買麥比亞

P.S.:
摩連佬發口痕話英超 Big 4 各有插水高手
分別係費蘭度托利斯,雲佩斯,杜奧巴同埋C7
而C7最近就俾網民選為英超插水王
佢既得票率仲幾乎 double 第2既杜奧巴

身邊既球迷如果唔係紅魔或者C7既死硬派
十之八九都會同意C7插水最叻
簡直就好似選舉有鐵票

小弟都同意C7真係當今最叻插水既球星
不過亦想乘機推介多幾個跳水王子
分別係:美斯,阿古路,馬路達,杜奧巴,羅賓奴同埋托迪
而費蘭度托利斯之前踢馬體會亦係一個插水王
不過去左利記後已經改過自身

2008-10-21 (2)

想講下尋晚既紐卡素對曼城......

主隊有馬田斯同埋比耶趕及復出
亦有巴斯桑治取代尼索比亞踢左閘
而客隊就有艾蘭奴退居後備

可能知道堅尼亞首次領軍,而比耶就傷癒復出
英超近年其中一個出名好廢既球証史泰利斯(Styles)就決心增慶
比耶明顯掂到個波先
而羅賓奴就擺明插水
好有 Style 既 Styles 都可以即判12碼兼趕埋比耶出場
最令人扯火既係基雲叫佢問下旁証先
因為旁証根本冇舉旗示意犯規
但佢知道自己個底咁花都夠吉士拒絕咁做
就整定佢又一次誤判

堅尼亞真係識激勵球員士氣
落後一球兼踢少個既紐記依然頂得住
右中場謝列美移後踢右閘
一人走多步就唔見得好蝕底
對比之下,前晚熱刺前晚輸俾史篤城就抵死得多

而曼城自己又攞0黎衰
胡禮菲臘斯移入中路搵食
結果同墮後既羅賓奴一齊塞車
而米卡李察士又助攻不足
偏左搵食既艾利蘭又唔擅長側擊
佢於中路後上埋門同埋遠射既能力亦因此被浪費
加拉度既助攻又只限於死球
曼城自己廢晒兩邊就令紐記更加容易死守
曼城上場輸俾利記既側擊
曉士咁都學唔到野真係抵鬧

上半場過左30分鐘既時候
仲開始組織到比較似樣既攻勢
馬田斯狀態不足
艾美奧比就反而令人意外地成為紐記前線最搶眼既球員
佢先俾直線杜夫埋門
再把握鄧尼解圍失誤門前撻入平手既一球
如果李察臣同埋富拿睇到佢咁都入到波
只可以奈何好波不如好運

之後形勢膠著到63分鐘
岩岩用年青射手伊雲斯入替防中夏文既曼城
未開始加強攻力就俾鄧尼既烏龍波打窒條氣

之後曼城依然故我
只靠浪射同埋死球根本難以考驗基雲
紐記睇落反而仲有機會擴大比數
只可惜艾美奧比既入波 quota 已經用盡

艾利蘭於比賽後段開始移入中路搵食
佢先以一記中距離射門同基雲打個招呼
但紐記防線仍未醒覺
中場冇人跟死佢之餘
後衛又掌握唔到佢入涉既時間
之後終於俾佢接應羅賓奴既斜傳為客隊返平
及後客隊食住個勢
再次成功入涉既艾利蘭仲幾乎為客隊戲劇性反勝

如果曉士唔係自廢兩邊側擊
又咁遲先解放艾利蘭既攻擊力
打少個既紐記應該唔會有分落袋
紐記有幸有不幸
曼城就捉到鹿唔識脫角
和波不失合理戰果

p.s.:
講波佬提及紐記技術成份不足
小弟就認為紐記球迷唔使太過擔心
一來堅尼亞而家限米煮限飯
搵到11個健康既球員落場已經算係咁

二來當年佢教溫布頓
陣中雖然充斥好多打仔格球員
但佢總會俾技術型球員有發揮空間
當年李安赫臣同埋米高曉士都踢得幾搶眼
杜夫同埋古迪利斯(甚至乎干沙里斯)都應該會係佢杯茶

2008-10-21 (1)

兵工廠球迷路斯基問起拿斯尼於馬賽同埋國家隊既戰績......

21歲既拿斯尼細個已經鍾意去街頭踢波
佢父母驚佢學壞
就於8歲既時候送佢去 Pennes Mirabeau
佢9歲既時候就俾馬賽既球探睇中佢
佢就一直踢到今年暑假先轉投阿仙奴
來自阿爾及利亞既佢
由於同施丹同一個鄉下
又於馬賽冒起
加上出眾既扭波技巧同埋傳球視野
所以俾人稱佢為新施丹

佢於馬賽多年
適逢當時既馬賽依然未回復90年代初期既強勢佢只係為馬賽羸過05年既圖圖盃
不過當時佢仲係年青球員
只係出場1次入左1球
捧盃唔多關佢事

佢之後為馬賽於06-07年度攞法國盃亞軍
同埋近兩年都爭取到歐聯資格
已經算係佢效力馬賽既代表作
而佢亦於06-07年球季當然法甲最佳年青球員

至於國家隊方面
佢先後為U-15至U-21共5個不同年齡既代表隊
而04年既 U-17 歐洲國家盃
佢仲於決賽射入致勝既入球
佢07年3月起成為大國腳
不過至今就未有任何代表作

2008-10-20

近兩日既新聞......

1)
歐洲足球先生既30人候選名單公布
C7,卡斯拿斯,沙維,費蘭度托利斯,韋拿,美斯,卡卡等人都有份入選
小弟個人認為以前3人既得獎呼聲最高
當中又最想卡斯拿斯可以攞獎
大家又有咩心水?

2)
奧林比亞高斯16歲希臘中堅 K.Papadopoulos 被指成為紐卡素既羅致對象
歐洲足協早前曾經形容佢為歐洲現時最有天份10大球員既其中一人
佢已經先後同阿仙奴,車仔,曼聯,森林同埋愛斯賓奴等球隊扯上關係

3)
費特因為俾自己球迷嘲笑而想離開里昂

4)
夏格維斯被指將於1月被曼聯掛牌以1500萬鎊既價錢求售
消息指曼城同埋巴塞隆拿都想接貨
另一方面,費 sir 話想盡快搞掂泰維斯單野
小弟就覺得好可能係佢老人家向高層施壓既手段

5)
加利安尼表態歡迎碧咸1月去AC米蘭跟操
但佢亦表示最終由安察洛堤決定
消息指AC米蘭想乘機斟佢加盟
但亦有版本指碧咸想同銀河於11月解約後過檔
而當年佢加盟銀河前其實有一定機會過檔紅黑軍團

6)
前利物浦24歲美國後衛韋伯特而家於米禾爾有好表現
消息指布力般流浪,西布朗同埋愛華頓都想於1月出價100萬鎊買佢

7)
波比 sir 撐舒利亞接手紐卡素
另外,有傳新老闆可能搵侯利亞或者艾歷臣接手

8)
法比加斯被傳拒絕兵工廠既9萬鎊續約條件

9)
尼斯,史特拉斯堡同埋樸茨茅夫都被指
有興趣向朗斯收購法國 U-21 代表 R.Boukari
21歲既佢可踢前鋒同埋進攻中場

P.S.:
8場只得兩分既熱刺其實最 urgent 有個好領袖領軍
上季羅比堅尼激勵隊友30分鐘內連追維拉3球既一幕仲歷歷在目
佢既領導能力仲將廢柴祖爾徹底比下去

尋晚見到代隊長贊拿斯射罰球之前既眼神就知熱刺冇運行
因為同而家既雷曼苦主一樣只有無奈
有領導才能既京治應該先係熱刺既救世主
仲何況尋晚有哥魯卡傷出同埋戴臣之後要坐3場波監

2008-10-19

因為 ck 兄客串既賽後論戰已經有大約1500字
所以小弟今日每場波都會講少0的

1) 利物浦對韋根

又一次踢得唔好,但都可以靠韌力反勝
確實係羸聯賽既其中一個必要條件

艾加同埋杜辛拿既失誤都係可以避免
進攻方面好多時間只係羸形勢
場波既關鍵真係華倫西亞既小不忍
之後賓帥再豁出去用兩閘換兩翼
結果軍臨城下反勝

2) 阿仙奴對愛華頓

雙方都受到傷兵問題困擾
後防亦唔見得可靠
兵工廠有波羸全因中場前質素較高

拖肥糖今季趺晒 watt
其中一個主因真係後防水準勁跌
既驚史篤城手榴彈
對利記同埋兵工廠又忽然有睇漏人
就算侯活 keep 到水準都整定勁失波

3) 富咸對新特蘭

有機會可以睇下精華
睇下李察臣點樣一球罰球省中3次柱都唔入
又可以睇下佢之後入到罰球
又俾動作多多既占邦達累到佢

4) 曼聯對西布朗

如果西布朗唔係開始放膽壓上前
朗尼(同埋曼聯)有冇波入真係一個問題

另外,佢加上C7同埋貝碧托夫
短期內似乎成為費 sir 既首選
因為費 sir 唔會收起 on fire 既朗尼
又要操起C7既狀態同埋幫貝碧托夫盡快融入球隊

泰維斯既出場時間於短期內真係會大幅減少
而家經濟又步入寒冬
唔怪得泰維斯俾人拖佢續約

5) 米堡對車路士 (by ck) (謝!)

鋼鐵就是這樣煉成的

米杜士堡 0 車路士 5
十月十八日英超早場, 主隊米杜士堡凈吞車路士五蛋。

有留意開本blog的朋友都知道,筆者是米堡的球迷,因此今次想寫的是今場波到底發生了甚麼問題。

米堡出場11人是守門員端布爾,後衛由右至左有格蘭迪斯、拉葛特、韋達、安德魯泰萊；中場由右至左有阿當莊臣、奧尼爾、梳基、唐寧；前線有艾利亞迪里及米度。

就今次排陣,領隊終於肯把阿當莊臣出任正選, 這個決定我亦很滿意, 因為他是米堡中場線少數有突破能力的球員, 筆者認為他的速度及膽識更勝唐寧, 但可惜的是犧牲了阿方素艾維斯---一個在米堡陣中有身型、保護皮球能力亦強的進攻球員, 亦注定了米度這場賽事會踢得非常辛苦。

中場方面, 其實上一場賽時對韋根時,奧尼爾打得很有拚勁, 但是筆者發現了一個問題, 就是其移入中間之後, 進攻時經常作出斷纜傳送, 甚至防守先落多了一腳導致球隊輸罰球, 可能因為責任多了, 令其無所適從。而梳基則「識守唔識攻」, 防守往往做得不錯, 但轉守為攻時卻不知怎樣做, 這條中場線中路的組合, 真的很難去制造攻勢, 往往都要米度、唐寧及艾利亞迪里幫忙返中場hold波幫手派牌已看得出。其實這個問題是可以根治的, 只要把奧尼爾移去右路打右中場, 或梳基及奧尼爾,兩個只能出一個, 騰空出來的中路位置則由艾卡及迪加特去爭奪便可把問題解決, 因為兩者皆有成為球隊playmaker的能力, 懂得控制節奏去轉守為攻, 但前者因傷, 後者則因為領隊保護年輕球員, 不予其場場正選, 以免遭大球會因其表現好以挖角, 到頭來也是米堡的損失。事實上, 迪加特的在陣, 能夠把攻勢的運行做得更好, 他亦比艾卡更全面, 不過艾卡有的是經驗及防守力較佳。 而今場把阿當莊臣、唐寧、艾利亞迪里三位翼鋒全放出來的後果是……高波比阿歷斯頂贏, 想過人時又被保辛華及布歷治看穿, 結果是---一籌莫展。

後衛方面更大問題, 領隊竟把一個不懂右腳, 甚至只有10場一隊經驗的格蘭迪斯打右閘, 筆者看過5場有格蘭迪斯的比賽,他真的不懂用右腳連控球都不會用右腳控竟放他在右閘加重了中後場的壓力結果有很多隊友的傳球就算放在其面前也未必控得定何況出右腳攔截對手左腳因此成為了球隊極大的弱點上半場領隊還未懂得清醒要待巴列堤射入世界波之後才懂得換正式右閘新人約翰莊臣入替可說是太遲了。因此時米堡開始組織攻勢但數次因右閘失位而給予多次射門及傳中機會予對手做成今場大敗的主因。

還有中路的拉葛特及韋達先講拉葛特他是一位被迫作清道夫型中堅且有一定經驗理應有一定領導作用但可惜的是其企位與其餘防守球員隔隔不入當韋達上去助攻未回防時他竟然會學人去「爭波」但前面已有泰萊及梳基幫手他竟然出去爭埋一份而頂波亦會於韋達撞位導致韋達「頂唔晒」並出洋相才有第一球失球出現；還有遇著一個有技術及身型的前鋒往往都會出腳極慢上場對韋根打得好的原因可能有米度教路但今場把其鹵莽表露無遺看來其最佳拍檔只會是修夫基因為修夫基不會迎波頂只會做最冷靜的一個。

而唐寧於球會失第一球的防守技倆令人噴飯巴列堤其實有少少甩腳先射佢竟然在皮球已落在巴列堤腳下時唐生的腳竟在空中故巴列堤就算甩腳都射得最後射中泰萊身體再彈中韋達再落在卡奴腳下輕鬆射入如果唐生冷靜少少先出腳我想韋達及泰萊不會變波子機

不過筆者今日引用了屯門普高總監的話「鋼鐵就是這樣煉成的」來作結希望米堡一班年青球員吸取教訓為下一場的勝仗奮鬥。筆者愛隊的平均年齡定必比屯門普高的一班年輕吧

2008-10-18

近兩日既新聞......

1)
布魯士指將於季尾約滿既希斯基幾可能於1月離隊
消息指利物浦,維拉同埋熱刺都有興趣收購佢
不過小弟就唔多信佢既轉會費會貴到500萬鎊

2)
隨住史堤芽泰萊大讚皮雅斯
後者被傳會係紐卡素新領隊既人選

3)
消息指認真出價收購紐記既買家只得3個
佢地既出價大約3億英鎊
消息指佢地分別來自美國,中國同埋科威特
中國買家應該係許榮茂
至於科威特買家應該係 N.Kharafi
佢係全球排第48既富豪

4)
堅尼亞表示理解法蘭西斯點解唔肯加盟紐記
因為前者冇能力俾後者一份長約
而後者而家於史篤城又有份一星期只返兩日既 part-time
而後者又因為唔想承受太多壓力而唔太想於比賽日返工
何況史篤城亦有興趣搵佢簽長約
後者就算改變主意肯比賽日返工
都會好自然選擇史篤城

5)
馬略卡準備透過法律行動
要求紐記就古迪利斯既轉會賠800萬鎊

6)
巴斯利於阿根廷作客輸俾智利後向足總請辭
傳聞佢係俾美斯迫走

聖羅倫素教練 A.Russo,
河床教練兼前國家隊隊長施蒙尼
同埋奧運隊教練巴迪斯達都被指係接手既大熱

7)
韋斯咸方面否認以700萬鎊賣比哈美到羅馬以套現既傳聞

8)
泰維斯被指成為皇馬既增兵對象

9)
阿仙奴被指將於1月向巴塞隆拿收購耶耶托尼
而消息指巴塞隆拿套現後就會向利物浦收購沙比艾朗素

10)
麥基迪被指成為維拉既1000萬鎊羅致對象

11)
芬寧斯連續兩場國際賽唔受路維重用
佢威脅會考慮退出國家隊

12)
多蒙特既28歲德國龍門維丹費拿被指成為曼聯300萬鎊既增兵人選

13)
基奧雲高同祖雲達斯續約到2013年

P.S.:
英超現役球星燒銀紙排名榜
今日開估講埋頭5名
第5名係古迪仙尼(22萬5000鎊)
第4名係京治(28萬5000鎊)
第3名係賓積洛夫(48萬鎊)
第2名係加利仔(84萬鎊)
第1名係戴亞(110萬鎊)

2008-10-17

幾場波想講......

1) 白俄羅斯對英格蘭

卡比路今場繼續用上場既人腳
但就改用4-4-2陣式出擊
偏左搵食既謝拉特射球靚波開記錄
不過中後場繼續有漏洞
半場各一平手都好合理

場波既關鍵係卡比路下半場變陣出擊
佢見謝拉特今場生猛左
朗尼最近又入唔到唔識停
索性進一步解放佢兩個

個陣式介乎 4-3-3 同埋 4-2-3-1
不過就好過上場對哈薩克既 4-3-3 好多
因為冇左墮後同巴利專心防守既林伯特阻住晒
謝拉特可以攻得更放
而前線既朗尼都係偏左
不過就識得同希斯基中玩移形換影

羸波之餘仲歷史性首次於世盃外圍賽開局連羸4場
英格蘭同埋本地傳媒老馮大肆吹捧
但小弟覺得英格蘭依然未算一等一勁旅
就算唔計後防
中前場仲有其他問題有待卡比路去解決

首先,今場下半場林伯特專心防守
但既然想搵多個人專心踢防中
倒不如之後起用夏格維斯

而如果之後祖高爾復出
陣式應該傾向 4-4-2 或者 4-4-1-1
中前場梗有一個要退位
究竟會係謝拉特,林伯特,巴利定係希斯基?

小弟個人心水就係繼續 4-4-2 而收起林伯特

2) 德國對威爾斯

場波冇咩想講
因為只係睇左精華
但就想再次推介入波功臣杜查奧斯基
好記性既應該記得小弟上年已經介紹過佢
矮細既佢無論踢法同埋身型都有希士拿既影子

擅長踢進攻中場既佢當年於拜仁冇機會上位而轉投漢堡
但又俾雲達華治食住而要改踢左中場
左邊推大位再抽遠柱係佢既拿手好戲
佢同埋拜仁既新紮師兄卻奧斯都仲有足夠時間上位踢南非世界盃

3) 巴西對哥倫比亞

鄧加明知哥倫比亞作客會死守
好心佢就唔好用3個防中啦
一年前美洲盃決賽踢擦鞋仔波偷雞羸阿根廷3粒佢用左3防中
而家主場要搶攻又係3防中
一本通書又點可以睇到老

而羅賓奴,祖奧同埋柏圖等射手冇料到當然亦係另一死因
曼城一對箭頭身價總值5100萬鎊
但今場波睇到既埋門把握仲衰過本地波既巴西次貨

卡卡就解釋話因為頻頻撲撲太辛苦
搞到落場既時候就腳軟
小弟聽完就仲扯火

委內瑞拉之行係好辛苦
佢地返到巴西備戰既第一件事好自然係放假
不過佢地有得抖都唔抖
好多蒲精固然即刻出去 we we wet wet
就算卡卡咁乖冇去蒲都要抽時間為名人堂打腳印
試問冇好休息又邊有力踢好波

小弟睇過既巴西球星由羅馬里奧到而家既羅賓奴同埋阿祖安奴
除左卡卡應該唔會早熟早殘之外
點解冇咩邊個大球星可以紅得耐
最大既可能就係佢地太貪玩同埋爛滾
如果個個多幾個卡卡咁既乖仔
森巴足球又點會只羸得5次世界盃咁少

2008-10-16

1)
奧斯曼洛夫否認出售阿仙奴既股份

2)
歐洲足協可能暫緩執行馬體會既主場禁賽令
以免令好多訂左波飛,酒店同埋機票既利記球迷受到影響
賓尼迪斯亦表示希望歐洲足協可以盡快有決定

3)
托利斯,巴布同埋羅賓奴都為國捐軀
其中前者估計要抖7至10日
好可能缺席倒戈馬體會同埋英超鬥車仔既關鍵賽事

另一方面,奧雲雖然冇份踢太公波
不過都避唔開受傷厄運
佢尋日練波整親鼠蹊
紐記仍未收到掃瞄報告
堅尼亞表示佢只有5成機會鬥曼城
最壞情況係佢要缺陣4星期

4)
多蒙特既波蘭右路球員巴拉斯塞高斯基再次被指成為利物浦既增兵對象
消息指賓尼迪斯出價400萬鎊
但被對方還價800萬鎊

5)
安察洛堤各傳媒表示打算於1月重召哥古夫
但有消息指AC米蘭既高層打算搵佢作為收購艾加既籌碼

6)
侯城決定以250萬鎊既價錢向瑞士球會年青人買斷沙耶迪
這個24歲既畿內亞國腳可踢中堅,右閘同埋防中

7)
柏拉斯奧斯被指將於1月以1500萬鎊既價錢轉投曼聯
不過買斷泰維斯單野就要 hold 到季尾

另一方面,消息指曼聯最近睇中兩名青年軍
分別係甘美奧既巴西 U-19 進攻中場杜格拉斯哥斯達
同埋柏迪遜既17歲塞爾維亞右中場杜查積
不過佢兩個都唔想太早出國搵食而請曼聯食檸檬

8)
施斯被指將被馬賽以600萬鎊既價錢賣走
消息指佢既下一站將不出新特蘭或者曼城

9)
艾美利亞既23歲西班牙射手列加度再次被指成為熱刺既羅致對象

10)
1斯咸否認想斟酌費倫天拿既阿根廷22歲射手奧斯維度

11)
保頓被指成為最新一間有興趣收購保拿特既球會

p.s.:
1)
尋日講既燒銀紙遊戲
小弟講得唔夠清楚
其實只係計現役英超球員由上個球季到而家
邊個有出糧,但極少落場

尋日講過路斯基排第8
平均踢一場波就用左兵工廠12萬7000鎊
今日再講多幾個
排第10既係約基(5萬8000鎊)
第9係沙夏(6萬7000鎊)
第7係薜維(14萬2000鎊)
第6係希古臣(16萬5000鎊)

至於前5位
有興趣既再估過
俾個貼士既係其中一位球星係近乎冇傷冇病但長坐冷板
而慶幸既係利記同埋紐記都冇球星入選10大

2)
尋日下晝5點半踢到今朝11點既世界盃外圍賽
有幾場小弟之後想講下賽後感

2008-10-15 (2)

1)
杜明尼治居然可以繼續留任

2)
基瑾被指打算各紐記追討餘下3年半既人工
估計總值大約1050萬鎊

3)
幫艾殊利放盤既投資銀行 Seymour Pierce 既主席哈利斯
向傳媒表示收到7份計劃書
但透露早前同紐記扯上關係既尼日利亞同埋南非財團
都冇顯示出好有興趣收購紐記
佢又話收購價並唔係高達4億鎊
但大約係3億鎊

另一方面,佢亦表示冇一個財團表明收購後一定會搵某一個領隊執教
意味基瑾唔係一定會於球會易手後立即回歸

4)
格勒洛布林既法國18歲全能中場 S.Feghouli
被指已吸引多達至少10間球會既注意
當中包括利物浦,阿仙奴,車仔,愛華頓,布力般流浪,
巴塞隆拿,華倫西亞,阿積士同埋AC米蘭

5)
莫耶斯正式同愛華頓續約5年

6)
摩達歷被指可能考慮跳船
佢被傳成為祖雲達斯1800萬鎊既增兵對象

7)
Zabeel Investment 否認收購韋斯咸

8)
卓斯坦以自由身加盟韋斯咸
而槌仔幫亦被指打算向車路士借用年青中場文斯恩尼

9)
奧查成為彭拿典奈高斯既50萬鎊羅致對象

10)
巴塞隆拿聯同居於邁亞密既玻利維亞實業家 Marcelo Claure
打算出價競討美職盟球隊於邁亞密既經權

11)
拖連奴進攻中場羅仙拿否認轉戰英超既傳聞

12)
米堡最初想收購標準烈治比利時中場迪科
不過因為對方高達1500萬鎊既身價而決定放棄
修夫基想改打同隊另一個19歲中場維素既主意
但對方已表明想留隊至少一季

p.s.:
路斯基既經理人否認這名捷克球星既收山傳聞
但球場莫札特抖仲多過踢
有網站計過佢既人工同埋出場次數
佢為兵工廠平均出賽一場背後既代價原來高達12萬7000鎊
不過佢於這個燒銀紙排名榜亦只係位列第8

心水清既都應該大約估到仲有邊0的球星會入選
答案稍後開估

2008-10-15 (1)

有兩場波想講……

1) 德國對俄羅斯

德國佬踢左半場好波都冇
咁都羸到俄羅斯真係大話夾好彩
睇完場波
覺得佢地有兩大隱憂

一係防線問題
06世界盃既拿姆令人眼前一亮
初時仲以為佢同前輩布林美一樣咁穩健
而家佢就俾人話過就過
而連佢都信唔過
德國佬防線而家冇一個信得過

二係中前場既活力
講體能德國佬由以前到而家都唔差
不過對住現時既俄羅斯就仲係差左少少
佢地中後段冇左個勢同體能下降好有關係

兩年後既南非世界盃
波歷克(今場踢足全場),
芬寧斯(冇態既佢只係83分鐘後備落場)
同埋高路斯(只係踢左71分鐘)等老大哥應該仲會在陣
(史尼達到時就未必)
萬一佢3個同時落場
中前場既活力就好有問題
隨時虎頭蛇尾

球隊既新人上唔上到位係一個問題
路維到時夠唔夠吉士唔用班大哥又係另一個問題
始終只係對付古蘭爾咁既二打六
睇唔到佢係咪咁夠威嚴

2) 委內瑞拉對巴西

小弟終於等到心目中既理想攻擊組合
卡卡復出
細哨唔收皮先至奇
鄧加都忍得佢耐啦

而羅賓奴雖然以前好花巧
不過近一兩季已經改善中
等佢再踢多0的硬朗既英超
佢踢波既風格就應該會變得越來越爽

不過最重要都係森巴小志強肯浪子回頭
佢雖然唔識直線盤球
更加冇雷獸射球同埋猛虎射球可以出賣
不過佢既力量始終對森巴兵團好有用

p.s.:
委內瑞拉出名多美女
簡直係男人既天堂
如果下次佢地足總想玩 dirty trick
不如索性賽前搵幾打美女去孝敬森巴(炮)兵團
雖然卡卡應該都唔受
但對其餘玩家應該超有用

2008-10-14

近幾日既新聞......

1)
英國傳媒爆料話醫生發現路斯基出現骨髓水腫既情狀
報導仲話佢有提早收山既危機

2)
有消息指法國足總主席埃斯克萊特為左爭取連任
準備同杜明尼治解約
現任技術總監既侯利亞就係頂頭大熱
同佢合作左好多年既西蒙仲已被任命為軍醫
更加添傳聞既可信性
而少帥派代表迪甘斯就係次熱人選

3)
馬體會既球迷涉嫌種族歧視馬賽既球迷
賽後仲襲擊馬賽既隊巴
歐洲足協罰佢地需要於主場200里外既中立場踢餘下兩場分組賽
令費蘭度托利斯冇得返卡達朗球場倒戈

4)
蘇斯達表示會要求皇馬於季尾出價9000萬歐元斟酌C7

5)
意大利傳媒報道馬勒當拿會將於下個月加盟國米
負責南美球員既轉會

另一方面,基斯普被指將於1月被賣到華倫西亞
以作為收購巴尼加既其中一個交易條件

6)
有消息指堅尼亞打算斟酌自由身球員以可於1月前增強球隊實力
不過佢已經作出否認

另一方面,舒亞拿早前因為返澳洲踢太公波而冇左個正選位
佢暗示如果情況持續
佢將會要求於1月離開韋根
傳聞如果堅尼亞1月都仲在位既話
將會提出以250萬鎊既價錢收購佢

7)
辛達告魯斯表示有興趣轉投曼城同羅賓奴合作

8)
古烈治返AC米蘭出任球探

9)
蘇華隆被指成為曼聯600萬鎊既增兵人選

10)
賓特尼由於於熱刺既發展未如理想
佢仲曾經發炮炮轟拉莫斯
利物浦被指打算於1月向熱刺出價1200萬鎊買有離心既佢

另一方面,波爾多既阿根廷射手卡雲拿基亦被指成為利記1300萬鎊既羅致對象

11)
阿馬利準備代表意大利出賽

12)
拖連奴射手羅仙尼成為熱刺1000萬鎊新前鋒既人選

13)
將於季尾同保頓約滿既艾哈比斯由於仲未得到新合約
消息指包括冇可靠龍門既米堡在內既幾支英超隊都打佢主意

14)
奧沙辛拿辭退沙根達
前皇馬同埋賓菲加教練甘馬曹就隨即接手

15)
桑恩戴維斯成為愛華頓250萬鎊既增兵人選

p.s.:
亨利向傳媒表示冇意思離開巴塞隆拿
仲話要接受輪換安排既唔止佢一個

上年暑假佢收到巴塞隆拿既斟酌
就好似鄭歌詠遇到姣佘
可憐既兵工廠就好似整容細妹咁俾人拋棄

而家睇住亨利折墮都覺得佢唔抵可憐
如果佢踢巴塞隆拿都可以踢到收山
姣佘怕且都會嫁俾鄭歌詠

2008-10-13

想講下英格蘭對哈薩克場波

如果只睇賽果會覺得英芥蘭既表現都過得去
實際就不知所謂
睇完今場波
小弟忽然覺得卡比路有少少艾歷臣既影子
上半場佢排4-3-3冇問題
問題在於佢用既球員部份唔岩踢咁既陣

最明顯係朗尼同埋希斯基
鍾意四圍走既前者於曼聯今季幾次踢加邊都冇料到
今場為國家隊改踢左路唔通會忽然有貨交咩
而出名唔識入波既希斯基踢正箭頭
再次暴露佢把握能力差既弱點之餘
仲冇機會發揮佢為隊友開路既優點
而右路既禾確特係有幾次落到底
不過傳中落點冇準
如果冇近鏡影到佢個靚仔樣
隨時令人誤會賓納特重返代表隊

中場方面
雙特冇火花已經唔值得多講
但卡比路搵巴利踢防中
配上雙特踢兩個進攻中場既屎橋
就搞到中場塞車情況仲嚴重左
小弟成個上半場都覺得佢地3條友爭波踢
既然對手只係世界排名仲低過香港一名,兼用左半隊 U-21 既哈薩克
如果今場唔係國際賽
不如當讓賽收起雙特其中一個
踢10個可能反而有運行

下半場卡比路肯面對現實改用4-4-2
結果靠高波屈機羸波
以己之強,攻彼之弱從來都唔難明
如果一早肯用高波屈機
羸唔到10球都應該有7球

而卡比路收起既係巴利
雙特問題依然未解決
佢之前又話今場唔掂既話就收起其中一個阿特
但賽後又話下場繼續用雙特
咁即係咩呀?
雙特今場咁既表現都叫收貨呀?
唔係掛?

後防又係令人扯火
艾殊利高爾就簡直係差中之差
同蘇格蘭0個個離門3碼冇人看管都唔中枉既伊維路莫一樣咁廢
佢助攻零貢獻
小弟已經唸死佢留力返酒店開 sex party
但點都唸唔到佢全場唯一似樣既傳中竟然係傳返自己中路

厄遜明顯只係球會級後衛
開波初段俾人迫兩下就唔用腦回傳
唔知仲以為睇緊文彼德踢波
而古基耶夫可以把握A高既自殺式回傳
就係因為佢同埋里奧費甸南唔夠人地咁勤力走動

賽後里奧費甸南同埋卡比路仲好意思批評球迷向A高柴台
佢兩條友都唔知有冇睇新聞
塞內加爾0個邊因為國家隊世盃外圍賽出局而搞到幾萬球迷暴動呀
柴幾句台都唔得
出得0黎行,錯要認,打要企定
如果俾真金白銀睇波都冇得柴台
本地大球場平均每場波都唔知有冇100個觀眾

A高應該慶幸佢係今場波出錯
如果踢世盃決賽週先出錯
佢隨時步艾斯高巴後塵俾人買起

P.S.:
1)
其他新聞儲埋聽日講
2)
德國,巴西等球隊既表現
搵日一次過再講

2008-10-11

紐卡素同瑞典球會 Vasteras SK 合作
後者將向紐記提供有潛質既年青球員
當然紐記亦會
成事原因應該同而家負責學徒球員事務既總監 R.Money 有一定關係
佢曾於04-05年球季執教這隊球隊

而家已經有丹麥U-18射手 K.Mensah 於紐記試腳
佢被評為繼賓特拿之後
丹麥本土最好既年青攻擊球員
而未來既幾個月將有大約8名年齡介乎14-16歲既小朋友去紐記試腳
當中包括佢地青年軍陣中比較有名氣既尼爾臣同埋蘇達貝治

另一方面,紐記原來亦另外 target 左幾件好野:

1) 迪科尼素
17歲既佢已經係維拉一隊既成員
佢代表左英格蘭 U-17 5次就已經入左6球
幾個月前維拉派左班小朋友到香港踢7人賽
維拉既職員曾向本地傳媒透露佢最有機會上位
而奧尼爾亦講過佢好有潛質
小弟覺得佢簡直係一個有高空優勢,同埋超勤力回防既艾邦拉賀

2) J.Reckord
佢係英格蘭 U-17 既一個力量型守衛

3) 普爾利文斯
佢係NAC既20歲荷蘭中堅
亦可客串防中同埋中鋒

4) R.梅菲
17歲既佢係阿仙奴預備組同埋英格蘭 U-17 既射手

5) 蘭斯貝利
佢亦係兵工廠既青訓產品
佢最擅長踢進攻中場
不過由於球隊既競爭太過激烈
佢只能踢右翼,甚至客串加右閘
不過17歲既佢已經入選英格蘭 U-19 代表隊
質素應該唔差

6) S.Wuytens
佢係燕豪芬既19歲比利時中場
今季仲上埋一隊

睇樣佢好熟口面
不過佢既外型燕豪芬青年軍就起碼有半打
小弟趕住睇波而冇咁多時間 check 佢既料
唔肯定佢幾個月前有冇隨隊到港踢7人賽

2008-10-10

1)
有消息指紐卡素賣盤單野要拖到聖誕節

2)
法蘭西斯表示將會同堅尼亞會面
以商討合作既可能性
而史篤城就想佢由 part-time 教練轉為長工

3)
對於第39輪英超既'侵略'提議
亞洲足協會長哈曼忽然玩 U-turn 表示願意聽任何提議
佢仲話如果英超球員肯向亞洲球員傳授經驗同埋技術
而英超球會高層又肯教亞洲球會點樣去培訓教練同埋搞推廣
亞洲足協會好歡迎英超球隊到訪

4)
巴黎聖日耳門成為最新一支有興趣斟酌朗拿度既球會

5)
由於阿契里斯腱(腳跟同埋小腿之間既肌腱)既傷患斷唔到尾
維度卡已經去左澳洲見專家
如果佢要接受手術
將要被迫休養半年

6)
消息指史譚重返曼聯出任球探
佢被派去巴西觀察某些被 target 既小朋友

7)
阿仙奴,熱刺,曼城同埋新特蘭最近都派左球探去觀察B.高美斯既表現
現時只得3萬鎊週薪既佢被指可能於1月轉投英超球會
現時身價高達1650萬鎊既佢幾個月前曾一度被指成為紐卡素既增兵對象

8)
標準烈治既20歲比利時中場 S.Defour,
烏特勒支既22歲荷蘭進攻中場 I.Afellay
同埋阿爾克馬爾既21歲比利時天才球員 M.Dembele
都被指成為阿仙奴既羅致對象

技術全面既 S.Defour 可以客串防中同埋好有領導才能
而 I.Afellay 被稱為新告魯夫或者新史奈達
聽個名己經知這個爆炸力強兼強壯既進攻中場有幾勁
M.Dembele 就可以踢前鋒,進攻中場同埋翼鋒
擅長扭波既佢亦同時吸引到曼城既注意
而佢既身價高達1150萬鎊
比其餘兩人高出足足400萬鎊

9)
車路士同埋曼聯都向外表示冇財政壓力

10)
雲尼亞里雖然得到高層力撐
但佢同迪比亞路以及尼維特等老將因為戰術問題而不和亦係事實
賓尼迪斯同埋史巴利堤都被傳係祖記新教練既人選
另一方面,耶耶托尼被指成為佢地1月既增兵對象

11)
車路士向挪威球會 Lyn 同埋佢地既前任 CEO M.Andersen 索償1600萬鎊
事緣於米基爾既交易中
車仔係俾 M.Anderson 提供既假文件誤導

12)
雖然消息指伯明翰好想借用熱刺既德國中場保定到季尾
不過當時人就因為想於1月重返德國而拒絕

2008-10-9

1)
紐卡素宣佈占美利斯已離開球會
紐記既聲明指佢離隊係為左追求其他興趣
但身為 recuitment team 阿頭既佢講穿左咪即係跳船
佢走人意味艾殊利真係賣盤在即

2)
聖伊天21歲法國中場 B.Matuidi 由於拒絕同球會續約
令身價被估值高達1000萬鎊既佢於1月被出售既機會大增
由於阿仙奴既駐法國球探基文迪一直好欣賞佢俾波好毒
而家就有傳聞指兵工廠將會出價買人

3)
將於季尾同皇馬約滿既簡拿華路表態想返拿玻里養老

4)
森多利亞否認會於1月賣卡斯辛路俾曼城

5)
曼聯被指打算向韋根出價1200萬鎊同利物浦爭華倫西亞

6)
堅尼批評雲加既青訓計劃好多時都係靠用錢買年青球員再培訓
實際上同車路士冇分別

7)
中超所有球隊都同意中國足協取消武漢既參賽資格

8)
巴黎聖日耳門否認搵迪甘斯去取代拿古恩

p.s.:
而家連體育版都講金融海潚
暑假買賣球員全英超最縮骨,
而家連老闆都自身難保既槌仔幫就理所當然咁俾人睇死
抖仲多過踢既雙箭頭艾殊頓以及比拿美,
當打既盧保,厄遜同埋格連都係熱門既套現人選

但就甚少人提及(或者唔被列入5強人選)
人工高(5萬鎊)但質素好一般既尼爾
冇料既佢之前都仲可以靠混水摸魚搵多幾個錢
踢職業波同打份牛工根本冇分別
人工高但偏偏冇料既人於而家咁既時勢通常都冇運行

如果下季開咧佢都仲未俾人踢走
槌仔幫步列斯或者費倫天拿後塵都唔抵可憐

2008-10-8 (2)

1)
韋根正面臨俾強隊搶人
利物浦被指打算出價1000萬鎊
另加賓納特以收購厄瓜多爾中場華倫西亞
而洪都拉斯防中柏拉斯奧斯就被指成為曼聯1800萬鎊既羅致對象

2)
史基泰爾既傷勢冇之前估計咁嚴重
唔使捱刀佢應該可於聖誕節復出

3)
法蘭西斯仲未決定係唔係加入紐卡素既教練團
而這個前熱刺領隊亦被指成為史篤城既羅致對象

4)
熱刺陣中有唔願意透露姓名既球員表示
陣中部份球員 prefer 球隊由普耶接手
因為佢地唔鍾意拉莫斯既輪換制度

另一方面,格羅寧根既22歲瑞典射手被指成為佢地900萬鎊既增兵對象

5)
卡比路透露將起用胡禮菲臘斯客串左翼

6)
艾沙維既經理人透露如果這個俄羅斯攻擊球員轉戰英超
只會選擇 Big 4 球會
佢仲點名指紐卡素同埋米堡兩支中型班一定冇機會

而消息指辛尼特而家同幾間球會傾緊賣走艾沙維
不過當中冇一間係英超球會

7)
雖然開季成績未如理想
不過雲尼亞里同埋史巴利堤依然被祖記同埋羅馬既高層力撐
另一方面,辛斯家族被指考慮以3億6500萬鎊既價錢出售羅馬

8)
曼城被指打算於1月收購卡斯辛奴

9)
朗拿度既體能教練透露大哨可於1個月復出

10)
有傳聞指泰維斯因為續約一事俾費sir同埋基爾拖到季尾而好不滿
但亦有消息指曼聯將於1月正式買斷佢

11)
薜羅拔圖透露可能於季尾轉戰美職聯

12)
冰島第二大銀行 Landsbanki 被接管
佢地既最大股東兼主席就係韋斯咸既冰島老闆 B.Gudmundsson
難免令人為槌仔幫既財力擔憂
早前曾經同紐卡素以及愛華頓扯上關係既印度富商安巴尼就被指可能乘機收購

13)
南非富商 Cleland 表示雖然有幾個同鄉有錢佬縮沙
但佢表示將會搵其他人夾錢收購紐記以令交易成事

14)
修安聯既16歲中場 M.Abalimba 尋日為利記既預備組上陣
賓尼迪斯仲為左這個被評為波底好,俾波觸覺又敏銳既球員而入場睇波
早前亦同阿仙奴以及車仔扯上關係既佢將於月尾到曼聯試腳

15)
有傳聞指武漢既中國國腳中場鄭斌打算去香港搵食

p.s.:
波比 sir 有本新書 'My Kind Of Toon' 將於下星期四面世
內容提及做紐記領隊既光榮同埋責任感
佢亦有提及做成功領隊既條件

“It’s all there for a manager to be successful, provided he makes sensible buys, knows the game well, is tactically adept and can motivate players and enforce discipline. But relationships are vital.

“The manager and his directors are crucial to each other. If it’s a good partnership and they are backing each other up, if the scouting network is solid and the purchase of players is sensible and correct, there’s no reason why Newcastle can’t be in the top five or six every season.”

“The fact they haven’t got that far tells its own story. Managers are not magicians and we need proper tools to do our jobs, not wands. The most crucial aspect, as it always has been, is being given significant time on the grass.”

2008-10-8 (1)

想講下熱刺......

大換血後既球隊
通常季初都冇好下場
只係熱刺踢季前熱身賽太勁
令人對佢地季初既表現有過份期望
而開季開得唔好自然影響佢地既信心

佢地留唔到羅比堅尼同埋貝碧托夫
就令球隊既進攻失去重心
最唔掂既仲係
技術總監搵既替補人選只係得柏夫奴真高
有睇歐國盃既都會知佢埋門一腳唔多掂
佢同戴倫賓特既踢法又似
拉莫斯又唔想用兩個踢法類似既箭頭
不過陣中球員又普遍唔習慣4-5-1陣式
結果發揮再打折扣

而拉莫斯開季後都仲試緊部份球員既最佳位置
賓特尼就曾經投訴已經試過踢3個位置
杜斯山度士亦唔好得佢幾多
加上陣中有幾個球員都冇英超經驗
初來報到既演出未符身價亦情有可原

另外,近年既熱刺都有中場截擊力不足既問題
陣中只有索高拿一個專責既防中
但佢明顯唔係頂班貨色
而其他中場既回防意識同埋效率都唔高
令向來不穩陣兼多玻璃腳後衛既防線更加受壓

至於新龍門高美斯原本質素比保羅羅賓遜高
但季初曾出現既大意失患
令佢到而家既表現都依然患得患失

另一方面,球場外佢地亦有其他野煩
例如拉莫斯既離隊傳聞
同埋亞洲財團既收購
全部都係好影響軍心

結果成隊波由龍門,後衛,中場,前鋒
到領隊以及技術總監都咁有問題
又邊可能有運行
而信心蕩然無存兼且壓力越來越大
就令佢地越來越唔似樣
未來十幾日既國際賽期令佢地可以抖下氣
拉莫斯亦有最後機會去補鑊
如果佢老人家都仲係搞唔掂
美國老闆怕且都會捨得賠1500萬鎊俾佢

2008-10-7

近兩日既新聞......

1)
利物浦行政總裁佩利表示新球場既興建
要等到經濟環境穩定左先可以進行
因為而家好難搵到財團搞融資

2)
史基泰爾因為右膝十字韌帶撕裂而要抖幾個月
正好俾機位艾加攞返正選位置

3)
紐卡素可能於5個星期內易手
另一方面, Big Sam 趁機出來抽水話艾殊利買紐記只為搵快錢

4)
堅尼亞於星期日場波被發現走入球員通道教路
足總好可能決定唔追究
不過足總就準備要求佢解釋點解上星期咁好火爆粗鬧記者

另一方面,堅尼亞原本唸住搵前熱刺領隊法蘭西斯加入教練團
不過落筆前仲未知佢肯唔肯接手

5)
拉莫斯到而家都未俾熱刺開除
好可能係因為美國老闆唔捨得俾1500萬鎊既分手費
另一方面,熱刺而家既代罪羔羊好可能係總監高莫利
佢被指買賣球員方面犯左好多錯誤
消息指雲拿保斯同埋格蘭都可能係新總監既人選

6)
有傳聞指車路士打算出價1300萬歐元收購阿根廷年青攻擊球員拿維斯
不過拿玻里已表明佢係非賣品

7)
施拿被指成為皇馬1月既增兵對象
薩克達於8月曾經拒捕利物浦既出價

8)
李偉峰澄清唔打算到香港落班

9)
艾迪巴約表示因為唔滿意回國既行程太長而決定暫時退出國家隊
但難免令人聯想佢係因為出場費既問題而玩野

10)
緊尼否認想斟酌韋拉

11)
波蘭足總方面表示已唸到解決辦法
去同時滿足波蘭體育部同埋國際足協
建議仲已經 pass 左俾當地既體育大臣
意味波蘭足總既職員復職在望
不過咁仍然唔代表波蘭可以保住歐國盃決賽週既主辦權

12)
拜仁被指打算於季尾向AC米蘭收購哥古夫

13)
慕遜嘉柏炒左教練盧侯基
由總監薜基暫時接手至搵到新教練為止

p.s.:
卡比路繼續同奧雲 say no
而祖高爾亦因傷未有入選
正當所有人都唸緊達寧,謝拉特,巴利,甚至乎朗尼
會係適合既替補人選
點解冇人唸過布歷治既?

2008-10-6

好多場波想講......

1) 曼城對利物浦

紅軍半場輸兩球都可以後來居上
除左要多謝羅賓奴既失機同埋薩巴列堤既紅牌
其實仲要多謝佢地自己
雖然下半場初段依然老鼠拉龜
但起碼肯拉邊搵機會
而到尾段史基泰爾傷出
雙方真正10個踢10個
利記明顯比較想羸

好多時一場波既勝負
係取決於比賽心態
今場波係利記近季英超比賽比較有霸氣既一場
踢聯賽唔可能場場好波
但踢得唔夠好都可以羸波
有時就係靠一份霸氣

曼聯同埋阿仙奴以前羸英超
都仲俾人睇到佢地個種鬥心
今季既利記都有少少咁既味道
而家睇牌面利記依然唔及車仔同埋曼聯
但只要改善到穩定性
有咁強鬥心既利記至少唔會提早上岸

2) 愛華頓對紐卡素

同一晚絕境逢生既仲有紐記
佢地踢左開咧作客奧脫福後既另一場好波
不過就係佢地最令小弟感動既一場波

堅尼亞教波唔算好叻
但佢教既波從來都冇人敢睇小
就係因為佢既球隊都好夠 heart

以前既紐記經常一輸就散晒
但堅尼亞接手之後既兩場波
雖然佢仲未可以落場領軍
但紐記劣勢下都仲似返隊波
從中可以睇到堅尼亞擅於激勵球員士氣既優點

另一方面,由於悉斯高現時絕對係球隊既負資產
今場波紐記索性以4-4-1-1陣式示人
亦不失為好計策
而稍後當古迪利斯同埋比爾傷癒後
取代尼索比亞同埋卡卡巴後既陣容
仲應該有一返作為

3) 新特蘭對阿仙奴

上年 Boxing Day 阿仙奴作客樸茨茅夫
俾人地既 9-0-1 戰術搞到唔見左兩分
牙痛咁聲既雲加批評對手既戰術唔要得
哈利列納就回應話明知兵工廠攻得咁堅
冇理由中門大開掛

9個幾月後思想略為頑固既雲加稱讚黑貓守得好之餘
又有類似既 comment
小弟上次撐哈利列納
今次都係唔幫雲加
對方守得好有部署
中間蟻多螻死象之餘
兩隻閘縮得好後

禾確特冇空位就唔識踢波既缺點再次暴露於人前
不安於本份既雲佩斯又多數於左路 no show
而法比加斯為左唔好同丹尼臣位置重疊而移得更前
不過成場波除左一腳遠射同埋追平0個球頭槌之外就冇腳好波

利記對曼城既時候都識夾硬拉邊去踢
但雲加見勢色唔對
先後換入既賓特拿同埋拿斯尼對拉空兩邊都冇咩作用
結果死結依然未解開
賽後只係識 comment 球證既誤判又有咩用
佢地怕爛仔波同埋驚人踢9-0-1既弱點
可能連唔熟波既路人甲都略知一二
如果仲唔搵對策
今季失分俾弱旅既情形將會持續

另一方面,佢地連續俾人睇定射入世界波
就反映佢地中場線既截擊能力仲有待提高

4) 布力般流浪對曼聯

紅魔最終羸波
小弟無異議
因為佢地真係羸質素
貝碧托夫又多左走動
朗尼亦再次入開有條路
當然主隊亦再次話俾大家知佢地原來真係好欺善怕惡
不過紅魔下次可唔可以唔靠球證既誤判呀
好厭呀!

5) 拜仁對波琴 & 海倫芬對阿積士

兩位少帥教既波向來娛樂性十足
唔講仲以為係基瑾同埋舒哈夫既結拜兄弟
不過而家拜仁同埋阿積士既防守結構都好有問題
而個別守衛既質素一般之餘
仲鍾意踢高章波
如果仲唔改
真係多多都有得輸

6) 巴塞隆拿對馬體會

美斯技壓阿古路完全唔令小弟意外
畢竟真係高半班波
但巴塞隆拿繼06-07球季既6:0後
又炒馬體會一鑊勁就發夢都唸唔到

客軍班友0個種唔集中絕對令人廢解
作客魯營唔係應該打醒十二分精神既咩
佢地既教練艾古爾基於問責精神話肯負全責
講真有幾多野關佢事
人工唔係最高,但又偏偏最受壓同埋要第一個走出來切腹謝罪
好多球星收山後唔肯教波都真係正常選擇

另一方面,美斯,伊度奧同埋恩尼斯達絕對係巴塞隆拿前線既鐵膽
新仔保贊就一定係4哥
至於亨利對球隊既作用可能連古莊臣都不如
但就依然當自己係 star
哥迪奧拿可能只會(小弟就絕對會)將佢當係阿6
佢為人為己
季中唔走,季尾都應該好走

p.s.:
新聞聽日先一次過講

2008-10-4

1)
辛尼特既24歲俄羅斯射手普基尼耶克
被指成為拜仁1月1200萬歐元既增兵對象
佢之前接受訪問時曾透露奇連士文係佢細個既偶像
令傳言更有可信性

另一方面,高路斯就否認拜仁打假波既醜聞

2)
施拿既經理人爆料指利物浦曾於8月出價收購這個克里地亞翼衛
不過就被薩克達即時拒絕

3)
辛達告魯斯表示有朝一日會為左踢歐聯而離開布力般流浪
似係為佢他日離隊離低伏線

4)
史高斯同埋查費都同曼聯達成續約協議

5)
想講下幾個領隊既動向......
莫耶斯透露將於日內(隨時係今日)同愛華頓續約

而堅尼亦表示佢既律師已經同主席昆尼傾緊續約細節
而消息指續約幾近成事既佢仲唸緊增兵既野
佢已經要求到昆尼科水俾佢向國米收購韋拉

不過,艾禾卡特就表示因為家庭理由而想返荷蘭教波

6)
安歷卡早前因為抽筋令肌肉輕微拉傷
令車路士聽晚鬥維拉隨時只得阿根廷小將迪辛圖一個正箭頭

7)
西班牙傳媒爆料指皇馬因為唔滿意沙治奧拉莫斯近期既表現
不惜搵私家偵探調查佢既私生活
單野當然令當時人好不滿
AC米蘭就隨即再次被指想乘機出價收購佢

8)
早前宣佈退出國家隊既雲達沙
因為史迪基倫保傷出而決定返國家隊客串兩場

9)
踢埋今季就會收山既艾斯巴利亞決定今季唔收錢
佢只希望可以為畢爾包踢夠500場
以成為球隊史上出場次數最多既球員

p.s.:
得到加利麥臣聲援既堅尼亞爆完粗還拖之後
終於再次正正經經講波經
佢表示由於陣中前線傷兵好多
所以將會重用悉斯高
佢仲幫這名西班牙射手減壓
話大家要俾時間佢適應英超先

2008-10-3

近兩日既新聞......

1)
南非富商 J.Cleland 承認曾於星期一同基瑾傾回巢既野
但以當地另一個富商 V.Imerman 為首既財團就表明冇意思收購紐記

2)
之前講過傳聞皇馬打艾加既主意
而家佢地既副主席山齊士已經承認希望於1月出價收購這個丹麥中堅

另一方面,蘇斯達就否認艾沙維將於1月加盟既傳聞
因為這名俄羅斯中前場球員一心想加盟巴塞隆拿

3)
傳聞熱刺打算搵曉士去取代拉莫斯
不過佢地已經作出否認

另一方面,拉莫斯被指打算於1月斟酌舊部屬 C.阿祖安奴

4)
漢堡被指將於1月向利物浦出價1400萬鎊收購沙比艾朗素

5)
俄羅斯一名黑幫聲稱
分別向拜仁以及格流出價2000萬同埋4000萬歐元賄款
以令辛尼特可於上季捧走歐協盃
不過辛尼特已否認有關醜聞

6)
杜奧巴因為膝傷而要抖6個星期

7)
維拉被指打算於1月向雷丁出價600萬鎊
另外加上希亞活作為交易條件
以收購愛爾蘭射手奇雲杜里

8)
費古羅亞以借用形式加盟小保加1年
而小保加更可於借用期滿後以120萬鎊既價錢買斷佢

9)
拉素打算向沙地球會艾沙特買斷射手薩拉迪
不過前者高達1200萬歐元既叫價就成為障礙

10)
巴黎聖日耳門被指將於1月向祖雲達斯借用薜比拿

11)
Bursasper 既18歲土耳其射手 Sercan Yildirim
向當地傳媒透露佢成為曼聯既壘羅致對象
紅魔鬼既球探曾接觸佢同埋佢既屋企人

12)
辛拿被指成為莫斯科中央陸軍既800萬鎊增兵目標
但維拉利爾既教練比歷連尼就表示辛拿一定會留隊

13)
簡尼沙尼斯同佢既心理醫生朋友
涉嫌性侵犯一名15歲少女既案件於日前開審

14)
曼城被指打算於1月向國米出價1500萬鎊收購甘拜亞素

15)
新特蘭同埋愛華頓都被指有興趣向熱刺出價800萬鎊收購贊拿斯

16)
話說侯城爆冷扑低阿仙奴令前者既領隊菲臘布朗聲名大燥
佢竟然被傳成為紐卡素長期領隊既人選
不過佢就表明想長期執教'老虎'
但問題係:連邊個係新老闆都未知,何來新既長期領隊?

p.s.:
堅尼亞否認會搵卡爾回巢
而佢就表示假如於1月依然在位既話
將會要求球會俾佢增兵

另一方面,佢早前用勁多'F'字頭既操口炮轟傳媒對佢既批評
有興趣既可以睇下
http://soccernet.espn.go.com/news/story?id=578459&sec=england&cc=4716

2008-10-1 (2)

1)
波蘭政府因為干預當地足總
而可能失去同烏克蘭合辦2012年歐洲國家盃既機會
而蘇格蘭就係後補既主辦國

2)
有傳聞指打算收購紐卡素既南非財團
為左吸引基瑾回巢同埋令佢長留於球會
將俾佢5-10%既球會股份

以當日阿拉伯財團搵投資公司做既調查去計算
紐記大約值2億鎊
即係基瑾既身家將會多左1000-2000萬鎊

3)
皇馬被指打算向利物浦出價1000萬鎊收購艾加
但當時人就表明冇意思離隊

另一方面,19歲威爾斯左閘巴里
因為傷患而於熱刺既發展停滯不前
有傳聞指賓尼迪斯打算於1月開價1000萬鎊收購佢

4)
同阿仙奴,樸茨茅夫同埋布力般流浪都傾唔掂人工既艾比亞
而家最有可能加盟韋斯咸

另一方面,槌仔幫既玻璃腳艾殊頓證實最快要抖到出年3月

5)
之前同紐卡素扯上關係既印度富商
而家有興趣收購愛華頓

6)
由於紐卡素太多傷兵
佢地被指打算搵仲未有班落既卡爾歸隊
同佢簽短期合約

7)
史高斯因為拉傷韌帶而要抖10個星期

2008-10-1 (1)

幾場波想講......

1) 愛華頓對利物浦

主隊其實踢得唔錯
對住利記不落下風
入唔到波略為冇運
而中段兩次走漏托利斯更要負上沉重代價

2) 紐卡素對布力般流浪

上季有基瑾帶隊
主場羸晒形勢都可以於最後一刻輸波
何況而家只得曉頓帶隊?

場波後防繼續鬆散
輸兩球波都走空晒森巴同埋辛達告魯斯
而中場又繼續脫節
不過就最少做到基本搶截
前線既悉斯高就越睇越似係次貨

而堅尼亞雖然未正式上任
但半場見隊波唔掂
就入更衣室發揮佢擅於激勵士氣既強項
下半場既紐記雖然始終唔能夠追成平手
但至少令人覺得佢地仲有鬥志

3) 曼聯對保頓

場波既主角只得兩個
就係C7同埋球證史泰利斯
佢兩個犯既錯誤都係熟口熟面

C7搏返來既12碼多數來自插水
除左曼聯 die hard fans 之外
有睇波而又有正常視力既都應該會同意

至於後者
小弟有理由相信佢係一個好驚青既球證
佢見到有攻擊球員於禁區跌低
就會本能動作俾12碼

不過同上年馬路達衝過去芬倫0個次相比
小弟覺得其實我地已經唔怪得 Styles 咁多
畢竟佢既執法咁有個人 style
錯左亦肯企出來道歉
佢同好多政客相比已經算好好多

4) 阿仙奴對侯城

班兵仔驚爛仔波已經係全世界都知道既野
如果南華有機會對住佢地
迪天奴都可能會一戰成名

雲加暑假既時候講過話要搵個擅頂既後衛
希望1月真係搵到啦

5) AC米蘭對國米

小弟覺得場波其實和波比較合理
因為最近知死而肯加操既細哨入0個球波真係越位

但如果講場波既排陣同埋調動
摩連奴今次就真係俾肥安比下去

肥安搵位置感強既施多夫略為墮後
補返派路既空缺
令防線前既3防中不至於只係識破壞而唔識建設

摩連奴方面
佢今場衰換人唔夠果斷
文仙尼咁屎都可以踢到59分鐘
哥利斯馬仲直情可以踢足90分鐘

而阿祖安奴同埋告魯斯落場之後
連埋伊巴謙莫域足足有3支大炮
但側擊拉唔開
只係靠中路夾硬來或者射中距離
結果羸形勢冇實際

6) 辛尼特對皇馬

皇馬尋晚有波羸
講真幾有運
上半場開波初段靠人地擺烏龍而開紀錄
到下半場俾人狂攻
對方既丹尼近門撞射僅僅越楣高出
艾沙維又射中遠柱

主隊講表現比客隊好
皇馬既控球時間俾佢地搶到得返4成
以祖記尋晚既表現
之後作客辛尼特絕對未許樂觀