3場波想講......
1) 西布朗對侯城
戰果唔反映雙方實力既分野
冇運既西布朗3次射中門框
不過佢地本身都有唔少問題
25次攻門都冇波入就睇到埋門一腳唔慌好
而佢地亦因為回防速度慢而俾對手連續兩場突擊得手
加埋防守死球又唔集中
輸波好應該自我反省下
侯城而家就明顯係一隻著左(虛)火既老虎
死球加快速突擊加基奧雲尼既神來之筆
已經係佢地羸波既一條方程式
想睇佢地變返隻病貓
怕且可能要等到聖誕
2) 新特蘭對紐卡素
場波緊張但質素一般
新特蘭有得羸只因紐記踢得比佢地差
新領隊要執靚隊波總要逐步慢慢來
堅尼亞激勵完士氣之後
就要唸下隊波既攻守表現
基雲簡直係紐記版既卡斯拿斯
中後場人腳幾近夫添都保護唔到佢
短期內睇唔到佢地既防守會有進步
既然係咁堅尼亞不如先改善進攻
對新特蘭場波紐記多數只有杜夫同埋一對箭頭參與進攻
到古迪利斯落場後其實對球隊有幫助
而前線既一對箭頭
馬田斯既狀態有待提升
而有高度同埋 build up 左信心既艾美奧比就應該多0的時間於禁區等波
因為佢走出禁區後紐記隨時冇人去完成最後一擊
3) 車路士對利物浦
雙方都有主力缺陣或者紮住上陣
之前有唸過愛隊利記可以保住不敗
但終止埋對方86場聯賽主場不敗既金漆招牌就有少少驚喜
有細心睇晒場波既都會發現其實利記羸波合理
今場波其實係車仔季初對曼聯既翩版
最大既分別係利記既佈防比曼聯出色得多
利記尋晚既 4-3-3 陣式其實就係 4-5-1
負責兩邊側擊既古治同埋尼亞拿又夠勤力
中路同埋兩側都封死晒車仔既去路
令車仔既地面戰戰術徹底失效
利記防守死球亦好集中
車仔全場最有威脅既攻門又因越位在先而搏唔到12碼
結果尋晚欖球員上身既佢地只能不斷遠(浪)射
車仔早前對曼聯時已經暴露左艾辛缺陣既影響
當時佢地面對夏格維斯,費查同埋朴智星都要陷於苦戰
今次面對級數更高既利記中場當然更加無啖好食
利記既攻勢同埋控球時間都唔算多
不過有威脅既埋門就俾對手多
沙比艾朗素既入球絕對係好運好過好波既例子
不過佢下半場中柱既罰球總算當還返個人情俾施治
而謝拉特上半場既半窩利
同埋巴布完場前既快射亦遠比車仔球員既浪射精彩
另外,佢地亦有幾次悅目既小組推進
以上所講既野車仔尋晚一樣都做唔到
咁仲唔抵輸?
另一方面,托利斯繼對曼聯既大戰後再次缺陣
但利記兩次都羸波就證明利記唔係只係靠王子先入到波
尋晚場波可以講係利記今季既代表作
向列強示威之餘
仲可以俾利迷知道今季係自英超成立以來最有力挑戰冠軍既一次
不過講咩都假
而家只係俾車仔,兵工廠同埋紅魔鬼失少3至5分
聯賽亦只係踢左9場
根本冇野值得高興
上次羸完曼聯之後竟然和史篤城
最緊要都係星期四凌晨對無領隊狀態既樸茨茅夫攞晒3分
否則羸幾多次 Big 4 對手都係冇用
4 comments:
估唔到打比戰班友都可以打成咁。如果唔係對面無運同把握力普通，我地起碼輸三四粒。第一球竟然可以走甩左施斯空哂，果陣禁區得佢一個，班後防唔知攪咩竟然無人mark佢。第二球仲火，俾人地連過三個，逼到要係禁區頂犯規，結果輸埋。
宜家唯有希望古迪利斯同巴頓兩個復出幫到紐記，今晚主埸ko西布朗啦......艾美奧比個態唔錯，善用身位既佢，其實係前面幫助唔細。當然，射術方面仍然有非常大既進步空間。馬田斯仍然未夠態，希望快d操番fit
1.如果今晚紐記連西布朗都WIN唔到就真的很大件事了,希望今晚可WIN啦,因為已經等左兩個月了.
2.講番喜鵲對黑貓場波
上半場追平一球後打法欠進取都算可理解,
但下半場既形勢已經很惡劣,
見紐記既中場都已經被黑貓既球員扯散個中場
最奇怪就是將謝列美踢左邊,
完全是沒有作為調動
而佢同畢特踢至60多分鐘既轉數已經慢了很多
古費爾取了黃牌後亦踢得好似保守左
追波都差左,
當時我見到蜘蛛人同巴頓都做了很久的熱身
但堅尼亞遲遲都未換人
結果中場一次又一次咁被人地劏開左
最後終於出事
如果堅尼亞在70分鐘前快些換人
能一次過換入巴頓,尼索比亞,蜘蛛人
加強中場活力
我估有望平手的
不過現在講都只是馬後炮
(雖然當晚我是這樣想)
3.紅軍vs車仔
我覺得歐聯後遺症對兵源不足既車仔既影響真的好大
佢地當晚既表現真的彷如另一隊紐記
進攻板斧單調
傳送又欠準
照睇落去
其實紐記都唔係好差
真的很不明白為何會踢到咁既成績
兩隊既球員走動都算好多好嚴密
我覺得基本上形成均勢的
不過車仔既進攻板斧對著擅守既紅軍
真的像老鼠拉龜
形成戰情膠著
球來球往居多
利記雖然WIN左
但入球仍然帶少少幸運
神奇隊長既壯態仍然很沉
如果唔係沙比同馬斯查蘭奴踢得好
其實都好難保持勝局至完場
平心以論
上星期兩隊WIN對手都踢到曉飛一樣
但今場榜首大戰就緊張而不精彩
坦白講可算是一場悶戰
(我有一位已捧了利記30年以上既朋友都有同感,就是覺得場波好悶><)
如果單以兩隊這場既進攻火力去比較
就真的與曼魚同兵工廠有些距離
希望之後佢地既進攻會好似之前幾週咁好
而紐記都希望有改善
學下bIG 4
To: 舒利亞 & sammysir
1)
西布朗既弱點唔比紐卡素少
講防守
兩隊就算死守既時候都唔算好集中
而兩隊回防速度都唔夠快
令中場線同埋4人防線之間露出好大既空位
講進攻
紐記就比較好
因為西布朗既埋門把握真係幾差
既然紐記進攻方面做得比西布朗好
又有主場之利
今場仲唔反底等幾時?
2)
關於紐記打呲戰輸波
有少少野要補充
施斯可以離門幾碼都冇人睇
第一球真係好抵死
不過見得多都慣
而下半場紐記既中場失晒勢
畢特其實係靠半場休息打止痛針先可以繼續踢
堅尼亞咁都唔用巴頓入替佢
明顯因為覺得已經缺陣好耐既巴頓信唔過
其實都係可以理解
小弟都覺得
謝列美過左去左路係幾怪既調動
因為要佢踢左路
不如用尼索比亞代佢
古迪利斯入場亦係算遲
唯一 make sense 既解釋
又係堅尼亞認為佢抖左太耐唔敢太早用佢
3)
不過紐記就算早少少換人
都依然似會輸波
因為佢地既中場線同防線隔得太遠
新特蘭既球員有好多空位推進
To: sammysir
想講下利記場波......
1)
場波悶係預左
因為兩隊都擅長防守
同埋場波既重點係中場攔截
2)
如果你同你個利記朋友用戰術角度去睇場波
其實唔會好悶
3)
謝拉特好多時間助守
除左一腳靚窩利令人留下印象之外
佢於進攻方面其實再冇咩佳作
難免令你覺得佢狀態低沉
4)
就進攻火力而言
利記真係唔見得比其餘3強優勝
不過可以做到攻守平均
小弟這個利記迷已經收貨
5)
利記今場既防守部署同埋表現
對紐記而言係好好既教材
如果佢地學到一半
已經足以入返前8
6)
anyway, 小弟都信(亦希望)紐記有轉機
只要有返個穩定既局勢
堅尼亞(或者下任領隊)應該有本事扶返正佢地
p.s.:
就由今晚對西布朗場波做起
Post a Comment