尋晚睇利記到訪史丹福橋球場
心情就好似玩緊跳樓機
利記出人意表派盧卡斯利華代替謝拉特落場搏殺
這名巴西年青中場跟住馬斯查蘭奴同埋沙比艾朗素
同艾辛,波歷克同埋林伯特搶中場之餘
亦盡量唔俾佢地後上攻門
進攻既重任主要交俾前線既拖利斯,古治同埋班拿約
而比尼亞拿更靈活既後者就得到正選機會
原因應該係針對艾雲奴域既轉身速度
利記上半場入既兩球都係靠對手犯錯
本身表現未算好突出
不過踢法簡單直接
亦有6成既控球時間
整體上已經遠比首回合好
有兩球優勢既車仔鬥心明顯唔夠利記
上半場佢地面對轉左form既利記
亦有啲不知所措
睇完上半場小弟直係覺得原來冇嘢係impossible
不過希望越大
失望自然越大
今場波既頭號罪人首推拉爾拿
佢條友一啖砂糖一啖屎
輸第一球衰封唔晒位同埋反應慢
輸第二球就衰企錯位
而隊友排人牆排得唔好當然都係原因
結果一下子冇晒優勢
仲撻返慶車仔既摩打
小弟認為佢既失誤絕對係今場波既turning point
利記被迫大舉出擊
後防亦暴露左好多空位俾車仔打反擊
利記之後輸既兩球都係輸反擊
而賓尼迪斯孤注一擲用尼亞拿入替馬斯查蘭奴
亦變相放生左林伯特
06-07年歐聯決賽
落後1球既利記用哥治入替馬斯查蘭奴
結果放生左卡卡助攻俾恩沙基入第二球
而上場馬斯查蘭奴坐波監
利記條中場即刻搶唔羸車仔
幾個例子都反映左這名阿根廷隊長對利記有幾重要
佢絕對係小弟心目中當今世上既no.1防中
輸緊2:3既時候
賓帥已經半放棄咁收起托利斯
但場上既球員依然超搏命
仲一度反超前4:3而重燃晉級希望
功敗垂成都係非戰之罪
咁既鬥志絕對對得住球迷
同埋20年前希斯堡慘劇既96個亡魂
2 comments:
真的是一場扣人心弦既比賽
兩回合計利記雖敗不辱
轉捩點確實是2:1的入球
沒有謝拉特,
但戰意真的高昂,
進攻仍然有效率,
而家利記專心爭英超,
只要防守唔失大意波,
仍然有機.
To: sammysir
1)
場波冇睇就真係走寶
2)
雖然個別球員犯錯
不過佢地冇一刻放棄過
點可能唔收貨
3)
利記而家只好以平常心去比賽
小弟信利記聯賽會keep到好表現
就睇下曼聯夫添後
防線仲會唔會突然走樣
Post a Comment