想講下尋晚利記點解仆直……
一係輸中場
一條勁既中場線至少有一個playmaker
而要playmaker有機會發揮
關鍵係中場其他配角能唔能夠幫佢製造空間
施丹,派路等人可以淡定兼瀟洒咁踢波
其實好應該請馬基里尼,韋拉,加度素等工兵晚飯宵夜
利記雖然開局唔錯
不過隨住艾辛同埋波歷克慢慢入局
加上利記冇左停賽既馬斯查蘭奴
盧卡斯利華同埋沙比艾朗素既組合明顯輸晒體力同埋效率
利記同埋車仔之間既均等形勢就開始傾斜
playmaker謝拉特根本冇咩發揮機會
小弟夠膽講就算謝拉特尋晚冇傷
利記都難以有好下場
二係防守失誤
原本就算輸晒形勢
只要守得穩都至少可以保住不敗
不過尋晚既防守連英冠水準都冇
就肯定大檸樂
兩次輸死球俾伊雲洛域根本係集中力不足既低級失誤
兩隻閘亦成日俾馬路達同埋卡奴搵到機會偷襲
而面對top fit既杜奧巴
史卡泰爾明顯力遜一籌
如果唔係拉爾拿同埋加歷查先後補到鑊
利記輸足5球都唔奇
三係輸體力
車仔羸波既主要功臣
一定包括杜奧巴,艾辛,伊雲洛域,馬路達同埋卡奴
佢地都有體力充足既共通點
前兩者抖仲多過踢
後三者就長坐冷板凳
所以到4月既樽頸位依然大把貨賣
四係輸領隊把口
唔知係英文叻左
定係今季利記既表現大躍進
賓尼迪斯最近多左好多嘢講
仲夠膽死撩費sir隔空開火
不過佢可能唔記得左
利記捧歐聯嗰年佢初來步到
沉默是金到摩連奴撩極佢都唔回應
賽前軒迪克講明唔玩心理戰
只求做好本份
而賓帥串車仔聯賽兩場都輸晒俾利記
咪只會刺激對手士氣
真係死蠢!
3 comments:
我都有睇重播
上半場兩隊其實都係均勢
大家都浪費好多機會
兩隊後防亦有一些漏洞
下半場利記真的明顯跌哂WATT
中路防守真的比下去.
盧卡斯利華真的作用不大
兩翼又好似唔識出波,
沙比艾朗素D長傳質素就好似畢特既長傳一樣,
成隊輸到1:3就真的散哂了
總之整隊在下半場表現猶如另一支紐記翻版
主場霸氣真的唔見左,
不過以利記既往績,
下場在被人睇死既情況下要入3球
都唔係冇一線希望的,
泰利停賽點都有D影響的,
我都有睇巴塞VS拜仁
拜仁既後防完全係紐記後防既翻版
四人平排像雪糕筒輕易被巴塞前鋒穿透
兩閘又防不到對方兩邊底線出波
賽前奇連士文話會大敗
真的被他開口講中...
雖然首回合利記既表現令網主失望
但始終仲有次回合
機會係微，但唔係無可能。
利記作客可以贏曼聯四個一皮，點解對車仔做唔到?
巴塞對拜仁
雖然預左大手筆，但估唔到拜仁連還擊之力都無......
其實拜仁論球員質素，無咩可能攪到咁既田地(小弟又諗起紐記)。
不過係聯賽雖然仲係有機攞冠軍
但三番四次被大炒
歐聯十六強雖然頭威頭勢
點知八強又係被人炒
其實奇哥都有一定責任......
To: sammysir & 舒利亞
1)
其實自從波歷克同埋艾辛入左局
利記就開始冇料到
2)
今場波睇到一個超勁防中有幾重要
利記聯賽羸車仔兩次
原因之一係車仔冇左艾辛
今場就輪到利記冇左馬斯查蘭奴
跟住利記成隊即刻
3)
就算只得1/10000既機會
小弟都同意利記唔應該下場波放軟手腳
4)
利爾咁既料都唔知佢點樣做正選
而臨急搵雪到硬晒既畢特取代雲昇
奇連士文就又係搵自己笨
一對中堅又各有問題
咁既防線梗係任對手穿花蝴蝶
5)
巴塞隆拿既球員走位超靈活
而拜仁中場踢多個都依然冇料到
沙維同埋恩尼斯達於技術上
徹底咁ko左拜仁
6)
迪米捷利斯真係慘
近3場波(太公波+球會比賽)失左15球
Post a Comment