2009-11-30

想講尋晚既西班牙國家打呲......

巴塞基本上用返上場對國米代表作既人腳
只有美斯復出取代上場表現好 sharp 既柏度洛迪古斯
而皇馬方面就有C7復任正選
加上卡卡以及馬些路組成3進攻中場
後面就靠沙比艾朗素以及迪亞拉作第一度屏障

以上半場既表現
巴塞明顯係水準以下
佢地雖然羸控球時間
但沙維以及墮後幫手控球既美斯以及恩尼斯達
都受制於對手一對防中以及一對閘既硬朗攔截
做唔返上場對國米既流暢短傳組織
等到35分鐘先見到佢地第一次正式攻門
而亨利雖然勤力走動
但集中力稍嫌不足而多次跌入對手既越位陷阱

皇馬既佈防算係唔錯
令巴塞唔能夠於中路同埋兩邊發動攻勢
加上球証執法唔係太緊
令一對防中更加放心硬朗攔截

3名進攻中場既走位先後創造到幾次有威脅既埋門
可惜全部都無功而回
但就反映冇左耶耶托尼削弱左巴塞既中場截擊
而替工布斯基斯以及基達亦多次俾失波
俾唔到沙維應有既支援

經過緊張但唔太精彩既上半場
下半場節奏明顯快左之餘
雙方亦開始搏拳
教練既調動就成為勝負關鍵

哥迪奧拿先用唔夠體能應付全場既伊巴謙莫域入替冇料到既亨利
前者入場後週圍走動
皇馬後防根本就未適應點樣防範佢
到佢第一次於中路出現
已經係接應傳中盲眼位攻門入波
當時比比以及沙治奧拉莫斯都一齊走漏左佢
另一方面,傳中既丹尼爾艾維斯其實上半場4次傳中都遠離水準
但佢今次傳中前有比較多時間準備
或多或少可能係艾比路亞心態上放鬆左佢

幾分鐘後巴塞既優勢出現暗湧
布斯基斯有黃牌在身都竟然蓄意手球
唔夠經驗就係唔夠經驗

雙方教練隨即作出調動
哥迪奧拿將恩尼斯達移後踢中場
配合其他幾個好波之人利用控球消耗時間
最終控球比率仲由半場既56%增至62%
唔講隨時唔知佢地踢少個

而體能上有好大優勢既耶耶托尼亦獲派替補基達
如果只係要求前者專心防守
佢一個幾乎已經可以代替布斯基斯以及基達
此時巴塞最強中場線亦已齊人
而領先一球下前線踢少個都好正路

相反柏歷堅奴用賓施馬換走C7既決定就令小弟費解
雖然後者傷癒後未 top fit
不過計貢獻點都大過浪射王馬些路
倒不如用盡佢先再算

冇左C7後既皇馬只靠卡卡創造唔到幾多漂亮組織
賓施馬既一次黃金機會又過唔到佩奧爾
而後者之前亦成功於龍門口訓身攔截馬些路以及希古恩
一條友已經救左巴塞3次
絕對係今場既最佳球員

比賽尾段賓施馬以及另一後備魯爾具威脅既攻門
都只係係來自沙比艾朗素既死球

相反巴塞靠流暢突擊幾乎可以由艾比度以及美斯擴大領先優勢
後者既機會亦再次反映比比冇位置感既弱點

p.s.:
之後再講英超 Big 4 既表現

2009-11-28

繼大閆山後
尋日朝連鍾大哥都走埋

三十幾歲或以下既香港人
好多對佢都認識唔多
可能只記得'北漏洞拉'既集體回憶

小弟都係入港台做既時候先知佢幾堅
仲記得第一日返工
由於人事部搵唔到人小弟既 supervisor
接收小弟既竟然係鍾大哥
仲記得佢好親切咁俾份明報小弟消磨時間
聽佢講左幾句嘢
只係覺得佢把聲溫柔得來字正腔圓

其實小弟負責計數
根本唔會有機會同佢合作
只係之後聽兼任文化教育組主管既 team leader 講
因為佢實在超有料之餘
又好熱愛工作
所以高層見佢退左休都搵佢出山

而可能佢實在特別字正腔圓
同為廣播人既 team leader 因而聽唔慣好多講波佬既所謂評述
仲曾經問過舊同事德能
點解 i-cable 可以有咁多咬字有問題既講波佬
當中基仔仲係重點狂插對象

而佢嗰份專業得到所有人既敬重
返工做嘢有早冇遲
為左尊重份工而永遠都著西裝
本身中文超叻都仲隨身代住本字典
而更難得既係佢咁堅但從來唔擺款

相比之下而家既一代就差得遠
小弟以前有段時間返工雖然交足功課但都成日遲到
更離譜既係有人會扮病唔考試以及曠工
或者返工 hea 做搏炒
仲厚顏話因為人工唔高所以冇心機做

再講遠少少到待人接物
以前練跑見過部份人稍有成績
就當正自己係明星
言行不可一世
而睇本地波部份所謂球星既言行又係不敢恭維

小弟亦認識好多死0靚仔都係不知所謂
冇交帶冇禮貌大支嘢唔在講
有事鍾無艷同埋唔講口齒又係令人討厭

R.I.P.鍾大哥

2009-11-27

近兩日既新聞......

1)
傳聞阿仙奴忽然向雲尼斯杜萊招手
不過消息指佢傾向以借用形式加盟利物浦

而利記亦令人意外咁同基奧雲高,韋拉以及科蘭扯上關係
不過前者既經理人已經代佢否認有關報導
而熱刺就對後兩者有興趣

另一方面,有消息指萬一利記對愛華頓既打呲再有差池
賓尼迪斯會即刻被炒

賓帥就透露球隊餘下球季既首要任務係保住聯賽前4名
而唔係歐霸盃以及足總盃

2)
莫耶斯否認下台傳聞

而當地政府就拒絕愛華頓起新球場既申請
而由於利記亦因財政問題而未能興建新球場
有消息指拖肥糖方面考慮同利物浦夾份起新球場
不過利記方面表明暫時對合作計劃冇興趣

3)
格蘭落實接手樸茅

4)
巴塞隆拿同艾比度續約至2012年
贖身費高達9000萬歐元
粉碎一直有關佢離隊既傳聞

5)
鄧加表示唔會選大哨去南非

6)
莫拉堤否認同摩連奴關係轉差

7)
拜仁成為最新一間同奧達文迪扯上關係既球會
而佢地表明唔會俾利華古遜買斷卻奧斯

8)
祖雲達斯成為最新一間同戴倫特扯上關係既球會
這名荷蘭後衛亦表態有興趣加盟
而禾堡就被指準備從佢地接收泰亞高

9)
雲格透露準備同路斯基,加拿斯以及卡路士韋拿續約
當中前兩者既合約將於季尾完結

另外,尼斯前鋒雷美以及格流年青後衛丹尼威爾遜就被指成為增兵對象
有新亨利之稱既前者表態有興趣加盟
而後者就同時吸引到曼聯以及熱刺既垂青

10)
鶴臣同富咸達成續約協議
下季將會繼續領軍

11)
曼城被指準備出價1200萬鎊收購厄遜

12)
費sir否認準備引入艾堅費夫
維迪就否認因為家庭理由而離隊既傳聞
而曼聯亦再次同迪施高扯上關係

13)
克拉克由於仲未同里昂達成續約協議
消息指西維爾準備於1月出賤價收購佢
而佢地就將冇咩出場機會既捷天戈頓外借到阿特蘭大

14)
熱刺被指希望於1月引入米卡李察士

15)
新特蘭被指準備出價600萬鎊收購格連
而韋斯咸就被傳會向格流出價400萬鎊引入麥基哥作為替補

16)
費倫天拿被指有興趣以先借後買既形式接收加高

17)
保頓被指準備向黑池收購中場查理阿當
而桑恩戴維斯就因傷提早收咧

18)
歐洲足協再公布多5隊涉嫌打假波
分別來自阿爾巴尼亞,拉脫維亞,斯洛文尼亞以及匈牙利
同時亦有3名球證涉案


p.s.:
1)
內地公安亦就中國假波醜聞拉左16人
捉一個,少一個……

2)
C7同 Kim Sir 搏火後
好多東亞代表隊員又被發現冇於酒店集宿
加上拖左超耐既普高鬧劇
本地波真係一啖砂糖就好多啖屎

2009-11-26

近兩晚歐聯既焦點一定係F組巴塞讓車馬都羸國米

自從上季跟軒迪克上左兩堂之後
巴塞每次對勁隊
哥迪奧拿都會安排前鋒墮後幫手控球
今場繼9月作客聖西路後再次靠小組短傳搓死國米
沙維,恩尼斯達同埋柏度洛迪古斯都超搶
當中後者就算今場要客串唔擅長既正箭頭都有功課交
亦經常搵機會兩邊出擊
佢通馬干坑渠仲好有美斯既影子

而前場亦係巴塞既第一度防線
加上防守球員出身既哥迪奧拿上季接手後重點改善補位以及搶截既效率
令國米就算有波在腳都冇機會反擊
甚至連控球在腳都有壓力
所以摩連奴賴冇人替補史尼達令國米既論點
小弟只係覺得佢好似跌左落地都要執返堆沙

而串王最終肯讚舊'公司'幾句
可能只係想人地下場幫手打沉基輔戴拿模
畢竟而家既國米對魯賓卡山唔係攞硬3分

要擊敗眼前既巴塞
靠幾隊英超強隊以速度制衡應該仲有可能
不過眼前既國米中場
幾個工兵冇一個有一個基達咁硬朗
整體運作亦輸晒轉數
再次睇到國米於意甲池中無魚蝦自大既後遺症

之後簡單講下其餘幾組......

E組里昂同埋費倫天拿都重歐聯多於本土聯賽
當中後者3場主場既表現都咁堅
比3隊意甲傳統勁旅好得多

不過愛隊利記提早下馬真係衰自己
計實力唔比費倫天拿以及里昂差
偏偏後防錯完一次又一次

不過佢地轉戰歐霸就應該有一定勝算
最中最強對手可能係A組既祖記以及拜仁
前者尋晚輸兩個死球就真係抵佢地死
而後者既表現仲屎過上季
最終邊隊出局陪都利記都一樣唔抵可憐

B組曼聯抽到好籤輕鬆出線絕對正路
餘下3隊都仲有機爭次名
當中以禾堡比較大機會

C組既AC米蘭尋晚行運
可憐馬賽而家出局邊緣
睇過馬賽作客兩隊名牌既比賽發覺佢地球員質素係輸蝕
不過次次都輸人唔輸陣
如果佢地轉戰歐霸應該會係黑馬

D組車路士同埋波圖出線好正路
不過馬體會屎到咁離譜就有邊個唸得到

G組西維爾以及H組阿仙奴輕鬆出線
而不論史特加,烏尼雷亞,奧林比亞高斯同埋標準烈治邊隊入到16強
怕且都只會成為首名出線球隊既心水對手

2009-11-25

近兩日既新聞......

1)
由於費倫天拿主場羸里昂
令利物浦歐聯出局
賓尼迪斯既帥位再次被傳有下台壓力
但球隊方面表明冇意思易帥
亦表示只要球隊於歐霸盃有好成績
球隊最終可以收支平衡

而消息指賴恩巴布準備要求離隊

2)
國際足協12月2號會開緊急會議
討論亨利既二段手球,阿爾及利亞對埃及既球迷騷亂以及近日既假波醜聞
而走漏眼睇唔到亨利二段手球既球証馬田漢臣就公開唔肯認錯

3)
葉士域治會方否認解僱堅尼既傳聞

4)
基蘭基比斯尋晚對標準列治先復出
點知又俾對方既文嘉拉踢到蹠骨骨折
令雲加要搵人去客串左閘

而桑治以及年青射手 S.Watt 都同意續長約
另一年青球員 R.梅菲就被外借到賓福特3個月

另一方面,早前講過利物浦同埋曼聯都睇中史達寧
這名14歲前鋒已經同昆士伯流浪攤牌想走人
而兵工廠同埋曼城就成為最新兩間同佢扯上關係既球會
當中前者仲可能遲來先上岸

而同日亦有報導指雲加考慮引入艾邦拉賀

5)
拜仁成為最新一間同M.施素高扯上關係既球會
不過佢地已經作出否認

另一方面,東尼因為批評雲高爾而被罰內部停賽
隨即再有報導指佢會轉投羅馬

6)
雲達沙可能復出踢世界盃決賽週

7)
錫耶納決定俾馬萊薩尼接手到季尾

8)
遠藤保仁力壓國家隊隊友中村憲剛成為本年度亞洲足球先生

9)
樸茨茅夫宣佈同保羅赫特解約
消息指現任技術總監格蘭將於短期內落實接手

10)
禾夫斯堡將迪施高既身價定為3000萬鎊

11)
曼聯被指睇中佩斯卡拉既16歲天才中場
佢先後同羅馬,拉素以及韋斯咸扯上關係

而維迪再次被傳可能因為家庭理由而離隊
另一方面,新特蘭被指想借用賓科士打

12)
傳聞熱刺準備1月收購安頓費迪南以及查爾頓既27歲中場 J.Shevley
而愛華頓被指準備向佢地開價450萬鎊引入侯頓

13)
D.羅斯接手巴勒莫

14)
消息指車路士已經放棄羅致迪馬利亞
而戴倫特就成為最新一個同佢地扯上關係既球員
另一方面,卡卡向傳媒透露車路士於暑假曾經向佢斟酌

15)
森林落實借用索尼1個月
之前佢地被指準備出價300萬鎊收購巴里

16)
保積洛夫表態想帕爾馬買斷佢

17)
米堡同埋西布朗都被指打算借用普斯邦
當中史特根打人情牌令前者既機會比較大

18)
森保沙被指想由馬體會重返賓菲加

19)
伯明翰出價400萬鎊收購M.祖雲奴域失敗
而佢地被指有興趣引入韋達以及伊比斯域

20)
蘇拿表明唔會於1月放走卡頓高爾

21)
般尼被指打算買斷紐根特

22)
碧福特以及史堤芬列特被指成為保頓既增兵對象
不過列斯已經表明唔會放走前者

p.s.:
胎盤女醫神俾班拿約踢爆佢既另類治療法其實係用人既胎盤
小弟即刻唸起04年癲嬅同埋情人輝0個套餃子

2009-11-24

想講幾場英國波......

1) 利物浦對曼城

羸曼聯之後3場波只得兩分
水準起伏大到唔講都估到係利記
而佢地3線水準都令小弟好失望

拉爾拿對利記越來越重要
成條防線只有佢既防守能力令小弟放心
心水清既會發現連同西甲既卡斯拿斯,迪亞高盧比斯以及阿辛祖
4個西班牙國腳龍門平時俾紙板防線隊友出賣而俾對手操fit晒
西班牙得益既同時
利記,皇馬,黃色潛艇以及馬體會就好抵死咁賠上失球數字

而見到謝拉特要打止痛針落場
可想而知佢班手足有幾唔信得過
玻璃腳阿古蘭尼又未上力
與其夾硬靠唔夠班既盧卡斯利華
賓尼迪斯倒不如收起佢而轉用 4-4-2 陣式

前線方面
上次插水屈機既尼哥治今次就有撻Q助攻
但今季成日都要靠佢始終唔好
如果賓師真係1月借用雲佬
應該會係3羸局面

而老費羸完愛華頓後串其餘3個老對手唔識搞本土青訓
車仔有錢而兵工廠就有雲加
大鑊既講到尾都只有利記
所以長遠而言對利記最重要既可能係專職青訓既杜格利殊

2) 熱刺對韋根

9:1既賽果固然恐怖
不過更得人驚既係戰果唔足以反映韋根防線既鬆散程度

俾兵工廠大炒後小弟已經講過馬天尼斯接手後既韋根
球隊控球能力雖然有大改善
不過防線就因為冇左布魯士而變成豆腐

防線差解釋點解大敗
不過中場級數差別其實已經分左勝負
韋根有能力靠控球能力作客羸維拉以及般尼
但遇上相同踢法但級數更高既熱刺就難免下風
情況就好似熱刺早前先後被曼聯,車仔以及兵工廠技術性擊倒

當然柏拉斯奧斯既倒戈亦令雙方既實力相差更遠
佢一己之力已經 ko 迪亞美以及湯馬士

另一方面,英超歷史之前只有葉士域治以及錫週三試過好似佢地咁輸得咁甘
佢兩隊當季亦降班收場
球迷想要既怕且都唔會係回水
而係望佢地(特別係防線)可以回勇

3) 普雷斯頓對紐卡素

場波幾乎係作客羸卡迪夫城既翻版
一樣係輸形勢
一樣係對手唔識入波
分別可能係對卡迪夫城既時候更加有運

由於紐記前線冇可靠殺手
路蘭既後上已經係球隊既必殺技
佢同埋辣椒仔絕對係球隊而家最重要既球員

p.s.:
R.I.P.大閆生......

2009-11-23

1)
國際足協可能抽後算帳
罰亨利於決賽週停賽一至兩場
而條 cheap 精又出招話件事令佢受到好大困擾
曾經考慮從此退出國家隊
不過而家已經改變初衷

2)
利物浦被指考慮借用雲尼斯特萊

3)
傳聞舒利亞可能接手錫菲聯

4)
巴勒莫宣佈同辛格解約
消息指D.阿拉干尼,D.羅斯以及巴列達都可能接手

5)
阿根廷足總被指想搵軒迪克同老馬一齊帶隊踢決賽週
不過英國傳媒就話佢可能重返車路士舒舒服服做技術總監

6)
消息指堅尼即將被炒

7)
為數大約200場既歐洲假波案
當中涉及前歐聯份子杜安既一場國內聯賽
佢地仲即刻將涉嫌踢假波既外援奧馬法耶內部停賽

8)
意甲賽會決定未來3年既意大利超級盃都會安排於中國舉行

9)
費sir表示球隊1月唔會增兵
但依然被傳同車路士爭奪愛華頓新星洛迪維

而朗尼忽然被傳成為巴塞既增兵對象
消息指曼聯準備以17萬鎊週薪既新合約利誘佢留隊

10)
車路士被傳打算於1月一次過收購列貝利,阿古路以及咸錫
增兵預算高達1億鎊

11)
熱刺被傳考慮用摩達歷再加現金向曼聯回購卡域克

12)
財困問題嚴重既查爾頓於1月將要賣走多名主力套現
亦要於下季前搵人接手注資
否則好可能被清盤

13)
M.祖雲奴域打算季尾以自由身離開標準烈治
意味佢唔會於1月轉投愛華頓或者華倫西亞

14)
薩格勒布戴拿模由於早前歐霸盃賽事有球迷搞事
結果俾歐洲足協禁止參加歐洲賽3年

15)
迪保基斯決定同西班牙足總延長合約至2012年

16)
米卡李察士再次同維拉扯上關係
佢被指成為奧尼爾既1300萬鎊新中堅人選

17)
莫斯科中央陸軍被指要收到2500萬鎊以上既價錢先肯放走艾堅菲夫

18)
薩基表示唔會加盟樸茅
原因係佢地陣中有兩名以色列人格蘭以及賓希姆
亦有阿爾及利亞人比夏積

19)
洛杉磯銀河射輸12碼俾皇家鹽湖城
碧咸亦將於1月以借用形式再次加盟AC米蘭
而由於佢多數有份踢世界盃
佢多數要7月中先會重返銀河

20)
本地足總決定介入屯門普高拖糧事件
星期四會決定佢地既前途

2009-11-22

近兩日既新聞......

1)
雲格認為法國足總應該表態要求國際足協重賽
而簡東拿就勁插亨利以及杜明尼治

2)
迪米捷利斯以及迪亞追柏洛迪被指成為皇馬既增兵對象
前者曾經同柏歷堅奴於河床合作

3)
國米被指打算出價4000萬鎊收購阿古路
而由於巴洛迪利同摩連奴不和
傳聞佢地想用這名年青射手作為羅致法比加斯既交易條件

4)
Big Sam 因為要進行心臟小手術而缺席3場聯賽

5)
拜仁方面透露車路士曾於暑假出價6500萬歐元收購列貝利

而車仔將趁禁買令上訴期間增兵已係公開秘密
佢地被指打算於1月以400萬鎊既價錢收購阿當莊臣
之後再將佢借返米堡踢埋餘下半季

6)
柏仙尼被指成為阿仙奴既1800萬歐元新箭頭人選
不過消息指森多利亞還價2500萬歐元
而車路士亦對這名意大利射手有一定興趣

另一方面,佢地亦再次同巴尼達扯上關係
這名瑞士中場既身價高達1000萬鎊

7)
艾曼紐臣被指成為巴塞1000萬歐元既新左閘人選
不過佢地依然準備同艾比度以及馬基斯續約
而丹尼爾艾維斯被指成為曼城既增兵對象

另外薩拉戈薩被指想趁指G.米列圖長抖復出後唔慌爭到正選而乘機挖角
不過這名阿根廷中堅已經透過經理人表示想留隊

8)
辛尼特被傳考慮接手梅斯達

9)
前巴黎聖日耳門攻擊球員彭卡迪去紐卡素試腳成功
紐記而家決定同佢簽約到季尾
佢可以踢箭頭或者翼鋒
不過紐記未必可以趕及於對普雷斯頓前為佢完成註冊

10)
費倫天拿考慮於1月向拉素收購洛基

11)
由於古爾沙希望重返西甲
費倫巴治被指想收購施積作為替補
而羅馬亦被指對這名華倫西亞長人射手招手

12)
耶耶托尼亦證實感染豬流感

13)
樸茨茅夫成為最新一間同華素爾扯上關係既球會

14)
古迪仙尼已經出院
不過就要提早收咧
傳聞熱刺打算羅致賓科士打或者史葛路治
不過曼聯已經表明唔會賣走前者

15)
保頓被指打算出價700萬鎊羅致史葛布朗

16)
韋利最終決定唔加盟巴西丙組球會 Botafogo Rio de Janeiro

17)
葉士域治被指想搵戴亞回巢

18)
熱那亞成為最新一間同維路素扯上關係既球會
不過士砵亭已經表明唔會放人

p.s.:
1)
意甲最高薪教練一定係1100萬歐元年薪既摩連奴
不過原來第2高既雲尼亞里只有160萬歐元
第3高既李安納度,費拉利以及加斯伯連尼更只得120萬歐元
2至5名加埋既520萬歐元仲少過摩連奴既一半人工

2)
不經不覺原來寫到第1000篇

2009-11-21

近日新聞......

1)
愛爾蘭足總要求重賽
亨利亦貓哭老鼠話愛爾蘭值得入圍兼贊成同人地重賽
不過有關要求已經被國際足協拒絕

2)
禾路連,賴恩巴布,杜辛拿以及菲臘迪根都被傳將於1月被放棄

而利物浦被指有意接收雲尼斯杜萊
不過同樣有興趣既仲有富咸以及熱刺

另一方面,利記雖然成功引入盧頓U15球員莫里
不過就可能面臨非法斟酌既指控

3)
軒迪克表示會考慮去向

4)
安察洛堤表示無意於季尾接手意大利

5)
加度素既經理人否認這名防中會加盟曼城

6)
卡路士即將落實加盟哥連泰斯

7)
阿拿奧度域加盟國米後完全爭取唔到出場機會
傳聞國米打算同佢作為羅致彭迪夫既籌碼

8)
有傳皇馬想搵史高拉利取代柏歷堅奴
而佢地被指同國米爭奪奧達文迪
而大衛施華再次同佢地以及巴塞扯上關係

9)
費倫天拿成為最新一間同蘭尼扯上關係既球會
佢地被指打算先借用再以1500萬鎊既價錢買斷佢

10)
日本傳媒指賓約哥以及韋根都有興趣羅致田中鬥莉王

11)
伊度亞度達施華同阿仙奴續約到2014年

12)
禾夫斯堡表示只要價錢合適就會放走迪斯高

13)
法比加斯再次同巴塞扯上關係
而薩克達既巴西射韋倫安被指成為佢地既新箭頭人選

14)
迪阿歷辛度被指成為多蒙特500萬歐元既增兵對象

15)
禾達史勿夫否認重返蘇格蘭代表隊
而赫斯教練 C.Laszlo 以及登地聯教練 C.Levein 都被指可能會接手

16)
艾比度,科里斯以及奧沙辛拿3名球員都被證實染上豬流感
而前者既球會隊友耶耶托尼亦可能中招

17)
伯明翰被指打算於1月向貝迪斯收購唔受重用既伊文拿

18)
祖雲達斯被指打算引入尼爾馬以及M.施素高
消息指佢地上個月請既巴西球探有好勁既人際網絡
令佢地有較大機會爭羸車路士羅致前者
而里昂,熱刺以及AC米蘭都同樣向後者招手

19)
曼聯打算1月從布拉加收回保斯邦
而里奧費迪南小腿受傷
消息指佢要1月先可以復出

20)
前伯明翰老闆蘇利雲想入主韋斯咸

21)
華素爾可能回流加盟保頓

22)
熱刺被指計劃收購賓艾化以及路亞路亞
而曼城想以800萬鎊加埋馬田柏杜夫同佢地交換賓特尼

23)
雲佩斯以及林伯特用另類療法治傷
利用馬胎盤液體幫助修復軟骨組織......
真係聽都冇聽過
不過班拿約,尼亞拿,安格拿以及薩巴列達等人都話好掂

24)
德國警方透露大約200場歐洲賽事有問題
當中涉及3場歐聯

p.s.:
原來星期三晚輸波港隊部份球員賽後依然嘻皮笑臉
前晚東亞運代表隊練波悲情城市飛馬又有5條友遲半粒鐘
真係頂佢地個肺

2009-11-19

想講世界盃附加賽......

賽前賽後既焦點都係法國對愛爾蘭
主隊於總統,名宿以及球迷面前
俾豁出去既愛爾蘭再次羸晒表現
亦令高傲但冇料既杜明尼治再次出醜人前

慶幸接應杜夫傳中既唔係羅倫士而係羅比堅尼
愛爾蘭至少可以攞返應得既90分鐘勝利
如果佢地既整體埋門把握可以好少少
以及洛里斯210分鐘都有好表現
兩回合已經羸法國幾球

又使咩俾機會法蘭西人渣接連出術屈機
先有安歷卡插水唔成都唔使收牛肉乾
之後仲有亨利既二段上帝之手
搏大霧手球成日都見
好似佢咁離譜用手先控再修正就真係唸都冇唸過
賽後佢仲要將個責任推俾球証就真係俾人小得少
當然旁証越位兼手球都睇唔到又係令人扯火

慘過俾人打劫既愛爾蘭賽後上下當然條氣唔順
白禮達再次俾人插都係抵肯佢死
由遲遲唔肯拍板引入高科技幫助執法
到忽然將附加賽定下種子制
難免再次令人聯想到佢地偏幫強隊既陰謀論

另一隊名大於實既強隊葡萄牙亦有得入圍
佢地表現比首回合好之餘
對手冇左米斯莫域亦令佢地可以輕鬆好多

而俄羅斯同埋烏克蘭兩隊同根生一齊出局就唔算令人太意外
前者就算有軒迪克執教都依然作客腳軟
而後者主場向來無甚威力之餘
亦無甚進攻板斧
列哈格排出5人防線已經係坐和望羸格局

其餘趕上尾班車既有烏拉圭以及阿爾及利亞
埃及又一次同世界盃擦身而過令人失望既同時
阿爾及利亞就令小弟有興趣知佢地除左好跑得之外仲有咩其他強項

p.s.:
順便講下香港
班友捱到74分鐘先輸第二球已經算有交代
不過只係忽然有 heart 真係唔足夠
畢竟技術同埋體能既差距真係太大
人地咁堅都依然咁認真追求進步
我地而家咁既低水準有咩理由再 hea 落去

2009-11-18

近幾日既新聞......

1)
漢諾威星期日於主場AWD球場為安基舉行追思會
有超過4萬5000人參加
當中包括球迷,朋友,國家隊既職球員以及名宿參加
德國傳媒仲形容為前總理阿登納喪禮後32年來首次咁大型既悼念活動

而德國今晚主場對科特迪瓦既熱身賽仍會繼續悼念佢
下半旗,默哀儀式同埋黑紗之餘
後備席又會掛住安基既1號波衫
而今場出場既龍門亦當然唔會著1號

2)
賓尼迪斯表示一旦球隊出售托利斯
佢將會劈炮唔撈

而上星期有報導指巴塞財政有問題
而家竟然又有傳聞指佢地已經同馬斯真蘭奴傾好個人條件
這名阿根廷防中最快可以於1月加盟

而利記就同漢堡既艾利亞扯上關係
這名荷蘭翼鋒係上季荷超既最佳年青球員

3)
南非,意大利,西班牙,巴西,德國,阿根廷,英格蘭以及法國
都被指將會被列作第一級種籽隊
而萬一法國出局就會由荷蘭代替

4)
傳聞皇馬將於1月放棄戴倫特,加高,迪亞拉,雲佬以及雲達華治
當中前者被指成為阿積士既羅致對象

5)
尼維特被傳將重返祖雲達斯出任總監
而報導亦話佢之後或會轉教青年軍

6)
蘇格蘭足總最終決定解僱佐治貝利
而禾達史密夫,麥亞里士,哥連斯,卡特活,高利以及桑拿士都被指係可能接手人選
不過後兩者已經作出否認

7)
希超球會拿尼沙確認佢地既墨西哥前鋒迪尼格斯
懷疑因心臟病發逝世

8)
老馬對烏拉圭賽後於電視直播爆粗
俾國際足協停賽兩個月
停賽令即時生效
令佢唔可以出席12月4號既決賽週抽籤

9)
雖然AC米蘭再次同路爾斯法比安奴扯上關係
不過西維爾已經表明冇得傾

10)
韋利被指可能轉投巴西丙組球會博亞維斯塔

11)
曼聯計劃同巴塞爭奪身價高達1500萬鎊既拿姆
而其他增人選包括班諾特捷奴,蘇亞雷斯,查馬克
以及弗賴堡既奧地利後備龍門蘭加
當中後者將會去曼聯試腳
而賓科士打被指唔滿意太少出場機會而準備於1月離隊

12)
米堡向史篤城借用射手傑臣兩個月

13)
文仙尼,史巴利堤,柏蘭迪利同埋肥安都被指成為下任意大利教練既人選

14)
希丁克唔怕失業而拒絕俄羅斯足總既續約要求

15)
士砵亭任命卡華夏出任新教練
取代月初請辭既保羅賓圖

16)
迪施高透露希望下季加盟AC米蘭

17)
消息指樸茨茅夫已經成功籌錢還轉會費
英超賽會將於短期內解除對佢地收購球員既禁令

18)
雲佩斯於友誼賽俾基亞連尼踢傷腳踭韌帶
要養傷4至6星期
而陣中前線有多名傷兵
兵工廠只有伊度亞度達施華以及卡路士韋拿兩名健康既箭頭

而雲格被傳打算於1月向禾堡出價600萬鎊收購米斯莫域

另一方面,辛達路斯不滿長居後備而希望離隊

19)
哥頓手臂骨折而可能要養傷到2月

20)
錫耶納有7名球員可能感染豬流感
同樣命運亦有馬體會教練科里斯

21)
賓菲加表明唔會1月賣走迪馬利亞

22)
有報導指遲尚斌懷疑李瑋峰以及李蕾蕾等球員都有打假波
不時以傷病為借口唔肯上場或者出場交行貨

23)
熱刺計劃1月向西維爾收購迪亞高卡普
而佢地亦被指打算用柏夫奴真高同羅馬交換巴迪斯達
不過後者既經理人已經否認有關報導

p.s.:
1)
有線忽然爭到英超
加埋世界盃,歐聯,歐霸同埋德甲
冇辦法唔重新上台之餘
亦真係要 check 下同 now 簽既合約

2)
早幾日講古迪仙尼炒車而提及一個認識既消防員
佢就係尋日報紙所講同冇良司機達成和解協議0個個

3)
日本強陣兼認真到好得人驚
香港今晚唔想再俾人大炒真係要搏老命

2009-11-16

想講下幾日前多場關乎出線既大戰

先講巴林
西亞死剩種主場既時候扭埋空門都唔入
次回合作客又唔入12碼
兩次放生新西蘭真係想唔連續兩次附加賽飲恨都難
佢地冇左胡比爾就冇左進攻重心
於比賽尾段仲亂晒章
根本冇好好利用腳下功夫既優勢
表現同埋結果都令小弟好失望

新西蘭講表現其實亦只係平平
真係令小弟留下好印象只有多次解圍既尼爾遜
以及表現穩健既龍門柏斯頓
以佢地咁既人腳同埋水準整定係列強點心

而其餘6個席位
只有作客羸哥斯達黎加既烏拉圭機會算係好大
歐洲區方面就仲咬得好緊
而焦點一定係法國以及葡萄牙死好命過左半關

愛爾蘭衰冇運兼埋門把握奇差
到比賽中後段冇體能上優勢後
已經再冇本錢壓佳法國圍攻

不過當年蘇格蘭作客都可以羸法國1:0
15年前法國有簡東拿同埋真路拿都可以主場先勝後敗俾保加利亞
杜明尼治賽後居然咁肯串以為已經掂左
查伯東尼隻老狐狸食鹽多過佢食米
愛爾蘭爛命再搏多舖隨時有羸驕兵既意外收鑊

葡萄牙方面就仲好命
門框救足佢地3次
對手中前場幾件堅嘢都幾識用波
返主場絕對有力反勝

而俄羅斯臨完場前幾分鐘幾乎倒水咁倒
以軒迪克接手後踢正式比賽3次作客硬嘢
只係和過克羅地亞0:0
對英格蘭以及德國就分別輸0:3以及0:1
難免令人覺得佢地出線機會仍然高過對手既同時
亦有唔細既隱憂

希臘主場同烏克蘭兩無紀錄
作客基輔依然係一場五五波
一來冇失作客入球俾對手
二來對手之前對英格蘭既表現亦只係一般
俾唔到人好大信心

日前最緊張刺激既正式比賽
可能係冇得睇既埃及對阿爾及利亞
佢地又係兩個只能活一個既局面
不過特別在佢地本身係同組對手
睇文字報導都覺得球場內外都好激

國際足協見佢地分數,得失球,入球總數以及對賽成績都分唔到勝負
所以俾佢地於中立場蘇丹再砌多場
兩隊打多場收多場錢之餘
亦總好過靠抽籤咁兒戲

p.s.:
瑞士打瓜埋尼日利亞羸左世少盃
有時間都想八下佢地咩料

2009-11-15

近幾日既新聞......

1)
消息指古迪仙尼既康復進度理想
不過都要休息3個月
熱刺軍醫就表示有信心這名36歲龍門可以成功復出

2)
消息指利物浦考慮將盧卡斯利華以1400萬鎊既價錢掛牌
另一方面,班拿約以及尼亞拿都因為肌肉拉傷而要休傷3至4星期

3)
大哨表示考慮下年退休
佢表示希望可以再次為巴西羸世界盃
不過佢表示如果哥連泰斯奪得2011年南美自由盃既參賽資格
佢可能會踢多1年

4)
雲昇暗示可能於1月離開拜仁

5)
犘連奴暗示有意返英超執教

6)
杜奧巴上星期俾伊雲斯踢傷
科特迪瓦國家隊軍醫詳細檢查後發現佢肋骨骨裂
將要缺陣3星期

而林柏特拉傷大腿要休息3星期
加上泰利,艾殊利高爾以及保辛華
車路士一下子冇左半隊正選

7)
AC米蘭被指願意接收古迪

8)
幾段曼聯既消息:

俾費sir公開批評既球証韋利考慮控告費sir誹謗

而里奧費迪南為左根治背傷而搵專家尋求新方法治療
暫時未知佢要抖到幾時

另一方面,蘭尼日前公開批評費sir令佢於球隊前途亮起紅燈
隨即有傳聞指AC米蘭以及祖雲達斯願意以1500-1800萬鎊既價錢接貨

另外,昆士借流浪被指有興趣再次向曼聯借用希頓

9)
英超既藥檢措施比前嚴謹
接受監察者全年任何1日都要報到
當局可以指定1個鐘頭要求球員交代行蹤
以便進行突擊藥檢
就算度假亦唔例外

10)
哥利斯馬可能於1月被外借到馬體會

11)
卡迪夫城被指想向侯城借用射手卡辛

12)
阿爾克馬爾既瑞典中場安姆被指成為布力般流浪400萬鎊既羅致對象

13)
足球聯會主席 L.Mawhinney 宣佈提前退休

14)
英超聯方面否決格流以及些路迪加入既建議

15)
華素爾好可能因為安卡拉高古冇糧出而離隊

16)
錫耶納搵前萊切教練巴利達接手

17)
沙格拿雖然一直同皇馬以及祖雲達斯扯上關係
不過佢表明冇意思離開阿仙奴

另一方面,兵工廠繼熱刺後
亦與水晶宮射手摩西斯扯上關係

18)
泰維斯表示如果阿根廷羸到南非世界盃
佢就會索性退休
因為佢已經厭倦足球同埋想有更多時間陪屋企人

p.s.:
1)
保方,施素高以及阿祖安奴都透露曾經患上抑鬱症
似乎有關方面真係有必要強制要求球會請心理醫生
雖然成效有幾大又係未知之數

2)
賽後感之後再講......

2009-11-13

想講下安基

德國自98年起已經成為小弟既至愛
第一次聽安基個名應該係列哈格年代既德國隊
條老鬼教國家隊咁保守都居然俾機會個小朋友
當時就算未睇過佢咩料都對這個名略有印象

不過之後佢踢賓菲加,巴塞同埋費倫巴治幾間大會就越踢越沉
如果唔係玩CM都應該唔記得左佢

一切直至佢返德國發展先再有轉變
佢於國內既表現比簡尼更穩定
如果唔係國家隊有太多大牌龍門
佢應該已經有份踢06世界盃

06年世界盃後簡尼決定退出國家隊
由於當時列文亦已經一把年紀
有記者問大猩猩邊個可以接棒
佢既答案竟然係神經刀韋爾斯
原因係佢踢過歐聯見過大場面

當時小弟心唸唔止一次同大球會扯上關係既安基最好盡快轉會
以波論波佢反應唔慢得過韋爾斯之餘
水準亦出名全德甲最穩健
無理由冇上位機會

小弟好多時由佢聯想到哥普基
大家都踢弱隊兼等機會等足好多年
所以幾驚佢冇前輩咁好既際遇

不過幾個月後佢為左同老婆於小鎮繼續生活
以及報答當年漢諾威俾佢機會翩身
最終決定唔加盟大球會

之後路維仲肯俾機會佢正式加入國家隊
但就錯在唔肯俾佢做正選
列文冇左簡尼這個老對手俾壓力佢
無論於國家隊定係球會既表現都明顯下滑
偏偏路維兩年內都唔夠吉士換人
對安基同埋艾達都幾唔公平

歐國盃過後列文終於收皮
安基就算多災多難先後缺陣5個月
都仍然羸得路維既信任
佢雖然冇艾達以及紐亞咁年青
更冇後者既天生神力
不過佢只係30出頭
如果保養得宜踢埋2014世界盃都仲得
而大家既反應差唔多
穩定性已經足以分高下

不過而家講咩都冇用
抑鬱症帶走晒一切

小弟唔可能完全理解抑鬱症病人既痛苦
但讀小學既訓導主任以及張國榮都以跳樓來解脫
安基仲連時速160公里既火車都唔驚
將心比己都可以想像抑鬱症對佢地而言比死亡更可怕
佢地自殺可能唔係真係想死
只係想擺脫各種問題所帶來既困擾或者痛苦

不過抑鬱症唔係冇得醫
最緊要就係唔好收埋自己
安基正正係最新一個反面教材

p.s.:
認識兩個疑似抑鬱症病人
佢地好在都仲肯搵下人吹水
希望兩個都可以早日康復

2009-11-12

近幾日既部份新聞......

1)
安基前日跳火車軌自殺身亡
佢老婆同埋醫生透露佢因為患上抑鬱症而決定自殺解脫
而佢既葬禮將於星期日舉行

德國足總已取消星期六對智利既友賽以示對佢既尊重
國家隊所有成員亦會出席佢既葬禮
而漢諾威就可能會要求將21號對史浩克04既聯賽改期

2)
紐卡素有球迷發起收購球會既行動
籌款e-mail會發俾4萬個球迷
要求佢地每人捐2000鎊
以集資8000萬鎊贖返紐記

而再有傳聞指紐記將於1月引入蘇甘保
這名前英格蘭中堅以及曉頓都暗示希望成事

3)
就批評球証韋利一事
費sir被罰停賽4場,其中兩場緩刑
佢亦被罰款2萬鎊

4)
拜仁重申列貝利既身價為6000萬鎊

5)
由於葡萄牙足總既隊醫證實C7既傷患
令佢地最終決定放棄徵召這名世界足球先生

6)
消息指巴塞由於資金有限
所以只能借用羅賓奴
當然亦冇本事收購馬斯查蘭奴

7)
中東電訊品牌 Etisalat 落實贊助曼城

8)
古迪仙尼揸電單車出事
手腕骨折以及盆骨碎裂
球員生涯好可能就此玩完

今次事件可能令史葛丹治加盟既機會增大
熱刺一直被指願意出600萬鎊向屈福特羅致佢

9)
史巴列堤承認收到辛尼特既合約
不過佢表明唔會於俄超季尾前作決定

10)
柏夫尤真高表示將會要求離隊
而利物浦以及華倫西亞都被指打佢主意
當中利記打算1月借用佢

11)
卡頓高爾被傳成為利物浦既另一新箭頭人選
不過韋斯咸將佢定價2000萬鎊

而艾殊頓宣佈掛靴
槌仔幫打算向英格蘭足總索償700萬鎊
當時人亦想向胡禮菲臘斯以及足總索償

12)
消息指古迪以及雲達華治都將於1月離隊
哥連泰斯打算向前者招手
而後者就否定重返阿積士既可能性

13)
伯明翰被指準備向熱刺出價300萬鎊收購侯頓

14)
桑坦德以及彼德堡分別決定同文迪亞以及戴倫費格遜解約
消息指佢地視基文迪以及古比士利為接手人選

15)
查理戴維斯早前因為嚴重車禍而留院1個月
終於前日出院

16)
史米沙以及禾高兩名老將近日先後掛靴
前者隨即加入捷克足總負責行政工作

17)
朗尼既細佬J.朗尼可能以50萬鎊既價錢加盟修咸頓
現年18歲既佢都係踢前鋒
現時效力英乙馬高斯菲特

18)
為左爭羸拿玻里引入列迪斯馬以及彭迪夫
國米被指準備用蒙達利作為交易籌碼
而佢地亦被傳想用大衛辛頓同帕爾馬交換肯雅防中馬列加

另一方面,施薩索拉斯終於落實續約到2014年
粉碎佢轉投曼聯既傳聞

19)
消息指利禾奴打算賣走基斯坦奴盧卡利尼以套現換血
佢可能會轉戰法甲

20)
保辛華因為膝傷要開刀而要缺陣3個月

21)
拿姆同埋東尼分別俾拜仁罰款
前者早前公開批評球會既轉會制度
後者就衰上場冇份踢而發脾四鬆人

22)
水晶宮射手摩西斯被指成為熱刺100萬鎊既羅致對象

23)
昆尼被指會撲水俾布魯士1月增兵
人選包括費古路亞以及阿當莊臣

2009-11-11

身心俱疲所以去左泰國幾日

幾經波折到酒店落腳已經係星期日凌晨
個人散晒見到卡坦尼亞對拿玻里咁弱既戲碼就睇都唔想睇
不過之後發覺當地免費電視台播巴塞對馬略卡就即刻醒晒

雖然美斯,沙維同埋恩尼斯達都只係後備落場
不過可以今季第一次唔靠大陸台兼清清楚楚睇西甲
唔訓覺都覺得值得

巴塞唔使夫添都一樣咁好睇
皆因落場既都熟晒4-3-3陣式以及短傳入滲既踢法
而柏度洛迪古斯既質素勁到可以入國家隊
巴塞後備都咁堅就證明俾心機搞青訓比狂借錢買人更有助長遠稱霸

不過佢地中後場今季轉攻為守既效率略嫌不足
之前兩鬥魯賓卡山已經吃盡苦頭
隨時係佢地今季既最大弱點

之後原來仲有場馬德里打呲
估唔到皇馬冇C7都可以作客入死敵3球
大抵係因為主人家今季太唔爭氣

柏歷堅奴既調動有好有唔好
馬些路近期轉型踢左中場真係唔錯
條友幫補球隊攻力之餘
亦冇咁多機會於後防出錯

不過這個智利教頭見羸3球就縮
類似既調動根本唔岩冇死守本錢既皇馬

第二日殘軀去翟道翟掃平貨兼食足兩餐
夜晚趕返酒店睇拉素對AC米蘭以及車路士對曼聯

頭場紅黑兵團有波羸只因對手近況低沉
佢地全隊只得中堅以及箭頭4個位置令人可以好放心
整體前景始終唔太令小弟樂觀

同西甲以及意甲唔同
英超應該只有收費頻道先有得睇
搞到小弟要落 lobby 既酒吧先有得睇
因為兩舊幾水住一晚既房係冇得睇收費電視

費sir為左減輕一對替工中堅既壓力
改用4-5-1陣式搶中場係明智
球隊表現比車路士更好
而費查既表現亦係全場最佳
最終輸波就只好怨防守唔集中又輸死球

不過費sir又插球証隨時玩死自己
艾堅遜冇罰車仔12碼以及冇吹杜奧巴越位既同時
亦睇漏伊雲斯既天殘腳
杜奧巴痛到典地都仲要俾佢誤會拖延時間而收到牛肉乾
一場大戰可以錯咁多嘢就證明佢只係未夠班吹咁大場波
何來偏幫之有

之後返房就再睇多陣華倫西亞對薩拉戈薩
畢竟餓左西甲實在太耐
亦好耐都未試過幾個鐘頭內連睇意甲,英超同埋西甲
當中仲有時間轉台睇埋歐聯,巴甲以及俄超既精華
絕對係 Super Football Sunday

星期一就好晏先出發去連串 outlet 搵平貨
Levi's 同埋 Jim Thompson 固然大路
去到坐落 Amarin 既 Asia Books 就簡直驚喜到爆

佢地今個月為左慶祝開業40週年
報紙雜誌以外既一律只賣40泰銖(唔使港幣10蚊)
雖然全部都出版左至少幾年,甚至10年
不過依然可以搵到唔少好嘢

當中包括近年碧咸以及活士既多本自傳
又有同利物浦,阿仙奴,曼聯,世界盃以及歐國盃有關既舊書
小弟最驚喜係搵到當年慶祝亞洲足協50週年而出版既 'Power of Dreams'
最終只係捧得一個紙箱返酒店已經算自己好忍手

血拼過後訓完幾個鐘再睇利記失分收場
睇左21年利記都未見過佢地傷疲情況去到咁嚴重
班友落場散下散下對住對手既血肉長城
無計可施就只有頻頻浪射
衰到要靠尼哥治插水呃12碼就真係抵俾卡斯利串冇家教
連酒吧職員睇到咁既利記都話冇意欲偷懶睇波

星期二繼續有嘢同足球有關
下晝去左曼聯轉門店睇嘢就失望而回
店內所謂既紀念品只係一件簽名波衫同埋兩支紀念旗
所展示既球員版波衫竟然仲包括廢柴居迪斯
而4款復刻版波衫全部要港紙六舊幾之餘
上季羸歐聯既紀念版波衫連禮盒居然賣二千蚊港紙就真係趕客

夜晚行夜市之前就睇左一陣泰國波
不過好衰唔衰場波質素唔高
入場人數亦唔見得多過本地波
有機會真係想深入少少了解下泰國足球

幾日以來少左 follow 足球新聞
miss 左可能係古迪利斯為紐記入既唯一一球亦真係可惜

不過知道安基自殺就簡直震驚
之後有機會再講下這個小弟認為係近年德國最勁既龍門
R.I.P. Robert......

2009-11-7

近幾日既新聞......

1)
內地賭波案再爆出多名現役職球員涉案
除早前講過既杜威外
仲包括前國家隊教練戚務生

2)
體育仲裁法庭宣布暫時凍結禁買令
直到上訴有最終判決為止

而佢地打算出售球場冠名權搵錢
阿聯酋航空以及Samsung都被指好有興趣

3)
賓尼迪斯表示托利斯可能唔使開刀
而佢會返祖家搵專家求醫
不過謝拉特既情況依然未明

之前講過利物浦有興趣從昆士伯流浪引入14歲前鋒史達寧
佢地同埋曼聯前日都派球探觀察佢代表英格蘭U-16對北愛既表現

而杜辛拿就被傳將於1月被外借到拿玻里
不過佢已經作出否認
而禾路連亦被傳可能被漢堡接收

4)
高安基正式擁有阿仙奴29.9%股份
有權展開全面收購

5)
曼聯成為最新一間同迪馬利亞扯上關係既球會

而佢地被指準備於1月收購艾堅菲夫
令公開批評雲達沙既古斯錫好可能被踢走

另一方面,佢地亦被指準備同阿仙奴以及曼堅爭奪塞爾維亞翼鋒卡歷錫
這名中央陸軍球員既身價高達900萬鎊

6)
西班牙政府公佈打算向年薪60萬歐元以上既外勞加稅
令西甲方面非常不滿
不過佢地唔透過罷賽以示抗議

7)
洛辛堡教練夏雲落實接手挪威
佢暫時會身兼兩職
直至出年8月先會全職執教挪威
而洛辛堡被指想搵蘇斯克查接手

8)
拉素被指想搵米赫洛域接手

9)
C7預期要養傷多兩星期
令佢多數趕唔到世盃附加賽

10)
哈利列納被指己對高美斯冇晒信心
仲準備1月引入占士取代佢
而由於雲佬同皇馬既合約將於季尾約滿
消息指佢地亦有興趣於1月出賤價買人

11)
幾段紐卡素既消息......

主場今季餘下時間都會易名為sportsdirect.com@St James' Park
林比亞斯解釋想測試市場反應
同埋吸引其他贊助商購買下季起既冠名權

而史堤芬泰萊應該可以星期六復出
艾美奧比亦預期可於月尾歸隊

古迪利斯就再次表態希望留隊
而保頓就被指睇中卡路爾

另一方面,紐卡素雖然莫財
不過仍然有傳聞指佢地將於1月向史篤城出價100萬鎊收購L.確特

12)
史特根表示無能力阻止身價1000萬鎊既阿當莊臣離隊

而米堡就向維拉借用奧斯邦尼兩個月
這名近年發展一般既年青中場初出道時一度被形容為新韋拉

而佢地亦被指想引入菲臘斯
不過伯明翰已表明唔會放人

13)
除基斯保迪外
另一格流球員史提芬戴維斯亦係麥利殊既增兵人選
而這名蘇格蘭領隊拒絕評論引入舒夫真高既傳聞

14)
哈化柏林希望引入蘇甘保

15)
哥迪奧拿公開指責亨利詐傷
話佢好番晒都仲要成日睇醫生攞假紙放假
而就算有機會後備落場都夢遊球場

16)
史浩克04負債1.8億歐元
馬加夫表明除左紐亞外既主力都可能被賣走
當中拿傑迪錫同埋古蘭爾

17)
郭甫否認出山執教白禮頓

18)
費倫天拿被指打算向財困既馬體會收購麥斯洛迪古斯

19)
舒亞拿以及西布朗既斯洛文尼亞進攻中場高倫
都被指係富咸1月既增兵對象

p.s.:
1)
前日睇明報話老馬去加爾各答做慈善訪問
一班連衫都冇得多件既小朋友為左歡迎佢兼同佢慶祝生日
夾左200鎊買左個4呎高既蛋糕兼插埋阿根廷國旗迎接佢
點知條串精以減肥為理由連一啖蛋糕都唔肯食
俾人批評佢好冇禮貌

唸起上年去北京搵佢攞簽名既經歷
自己身在衣食無憂既香港都會肉赤買機票以及自傳既錢
將心比己可以想像班小朋友有幾難受

2)
身心俱疲去泰國充電
星期三先再交功課

2009-11-5

想講歐聯......

拜仁又輸
雲高爾仲教得衰過奇連士文
後者上季明顯衰改革過快
點知條串友改得仲多仲急仲亂

而波爾多兩次中框就羸2:0
絕對係高層增兵頭重尾輕既報應

佢地咁屎既表現幾乎令人以為禾堡先係當今德國球壇既班霸

而曼聯半力和波反映左朗尼以及艾夫蘭既重要性
亦預告蘭尼同埋布朗兩條廢柴既前途未許樂觀

另一方面,馬捷達季初到而家出場機會唔多
應該又係費sir既保護政策

至於國米就似乎唔係羸自己
而係對手輸龍門
仲一度令膠刀以為自己終於可以向串王成功復仇
偏偏巴塞而家係隻受傷既老虎
下輪佢地作客魯營有排受

兩日以來小弟留意得最多既一定係利記既生死戰
殘陣利記雖然任務失敗
不過表現絕對係今季歐聯最好既一場
表現明顯好過里昂
主人家要到利記將防線推前之後先搵到機會作有威脅既攻門

利記今場雖然冇水銀瀉地既進攻
不過頑強鬥志已經對得住球迷有餘
見到托利斯拖住隻腳'慢波'起動
又睇到巴布終於生性似返個身價1200萬鎊既球員......

最終俾里昂迫和而家九死一生
小弟唔會怪後衛
亦唔會怨前線至少5次好機會都竟然入唔到波
因為今場有份落場既都已經盡晒力
要怨就怨佢地頭3場波太唔長進

一日未出局
一日都可能有運行
仲未肯放棄既一定唔止加歷查

2009-11-4

1)
林比亞斯透露紐卡素1月冇錢增兵
而紐記再次被指打算借用挪威進攻中場史基比特

2)
蘇甘保投訴諾士郡阻住佢於1月加盟其他球會

3)
車路士方面承認有興趣引入迪馬利亞

4)
伯明翰被指想打舒夫真高既主意

5)
辛尼特被指準備向拜仁回購泰摩斯卓克

6)
樸茅CEO史杜利被控逃稅

7)
麥卡菲以及同胞雲希亞頓由於不受 Big Sam 重用而打算於1月離隊
當中前者可能以借用形式加盟樸茅
不過亦有消息指樸茅最想向曼城借用舊將馬華路禾尼

8)
韋斯咸成為最新一間同柏夫奴真高扯上關係既球會

9)
告魯夫將會出山擔任加泰隆尼亞既義務教練
而第一場波就會對祖家荷蘭

10)
費倫天拿被指準備引入沙柏達華倫西亞

11)
新特蘭被指將於1月羅致賓特尼

12)
華倫西亞以及西維爾都有興趣收購保積洛夫

13)
基治因為下背受傷而要養傷1個月
而伊保爾表示希望轉投巴黎聖日耳門

14)
雲達不來梅中場肯特拒絕代表英格蘭出賽
阿媽係英國人既佢從未代表德國大國腳令卡比路一度打佢主意

p.s.:
謝拉特,格連莊臣,史基泰爾,奧利里奧,尼亞拿因傷肯定缺陣
菲臘迪根因為未有在歐聯註冊亦唔可以上陣
而有背傷既艾加就仲未知過唔過到體測

托利斯受鼠蹊傷患困擾依然要紮住上陣
阿古蘭尼唔夠狀態都可能要擔正
而新仔達比以及得到歐洲足協額外開恩先有得註冊既艾耶拉
應該至少會有一個踢正選

不過殘陣踢生死戰從來都唔代表死硬
至少小弟未肯認輸

2009-11-3

近幾日既新聞......

1)
賓尼迪斯被傳只得3場機會同自己翩身

而謝拉特既鼠蹊傷患可能要靠開刀解決
佢可能因而要缺陣到12月中

另一方面,利記被指睇中昆士伯流浪14歲前鋒史達寧
佢地更被傳想用杜辛拿同羅馬交換舊將懷斯

2)
S.Kroenke 再度增持阿仙奴既股份至26.6%
只要持股量再增加0.3%
佢就可以提出正式收購兵工廠

3)
文仙尼,艾歷臣,米高勞特立成為最新既皇馬教練候選人
當中前者拖左年幾後終於同國米達成解約協議
難免令人聯想文仙尼準備接手
不過民意調查結果顯示賓尼迪斯先係皇馬球迷既首選

4)
AC米蘭即將引入加納射手艾迪耶亞
幫加納羸得世青盃既佢仲攞埋神射手獎以及金球獎

5)
前阿根廷中堅卡沙利斯遇賊中槍昏迷

6)
賓科士打被傳將於1月被外借
不過費sir已經作出否認

另一方面,費sir要求夏格維斯既新約改為出場先有糧出

而里奧費甸南傳聞可能因為背傷復發而要養傷8個星期
佢近期表現走樣令費sir不滿
有傳聞指哈利列納想向這名舊部屬招手
費sir當然同樣否認有關報導

7)
傳聞伯明翰準備1月引入柏夫奴真高,魯迪治,阿當莊臣以及孫繼海
不過出場機會唔多既麥舒菲爾可能被外借到錫菲聯

8)
意大利傳媒爆料史巴列堤即將加盟辛尼特
兩年合約總值1600萬鎊

9)
史特根被指有1500萬鎊資金增兵
不過狼隊既蘇格蘭前鋒伊維路莫就否認有意加盟

10)
艾比亞落實加盟博洛尼亞

11)
古迪利斯既經理人透露有歐洲球會打這名阿根廷中場既主意
傳聞球會正係羅馬
一般相信紐記會要求600萬鎊既價錢

而曉頓透露冇意思引入蘇甘保
不過就唔排除於借用窗完結前再增兵

另一方面,紐記亦被指將於1月向錫菲聯出賤價收購基加隆
這名英格蘭中堅既合約將於季尾完結

12)
費倫天拿秘魯中場祖安華加斯被指成為皇馬既增兵對象
而C7公開表示想搵朗尼過檔皇馬
另一方面,雲達華治被指考慮重返漢堡

13)
雖然曉士暗示曼城1月唔會增兵
不過佢地依然同幾名球員扯上關係
當中包括列貝利,馬干,蘇亞雷斯,艾斯基達同埋莫里路
前者被指係羅賓奴既替補
後兩者就同係效力奧沙辛拿

14)
古比士利控告韋斯咸唔合理解僱佢一案獲判勝訴
而槌仔幫被指打算收購卡斯唐以及查馬克增強攻力
而佢地可能會出售厄遜套現

15)
Audi 以8000萬歐元買入拜仁9.5%股份

16)
大衛辛頓既經理人表示這名意大利左閘唔準備以借用身份離隊

17)
沙格拿被指成為祖雲達斯既新右閘人選

18)
菲臘布朗得到新主席既公開支持

19)
樸茅成功搵到1500萬鎊貸款
暫時舒緩財政危機

20)
傑斯透露希望將來可以執教威爾斯

21)
消息指哥利斯馬好可能於1月被外借
愛華頓對佢最有興趣
拖肥糖亦被傳打算引入查維加西亞以及奧尼爾

22)
戴維斯未能就個人條件同李斯特城達成合作協議

23)
安達迪可能復出加盟英超球會

p.s.:
1)
今年本地球壇好多名宿離開我0地
最新一個係前香港奧運隊教練白馬康
佢上星期六因為肺癌病逝
今晚於香港殯儀館設靈
R.I.P.......

2)
南華同熱刺結盟值得高興
不過聽到C7俾羅先生形容為'可能係第一個於英超上陣既香港球員'
始終認唔住笑左

2009-11-2 (2)

幾場波想講......

1) 伯明翰 vs 曼城

越來越覺得曼城條防線似皇馬
幾個後衛有身價同埋名氣但偏偏冇好表現
唔係有個好龍門真係多多都有得輸

季初都仲可以用新埋班作為藉口
但近期表現越來越唔掂
個別球員既低級犯錯絕對同身價不符
當中尼史葛仲令小弟唸起好多續左長年貴約就放軟手腳既NBA球星

而佢地前線用3箭頭又擦唔出火花
似係曉士難以取捨星級射手下既決定

伯明翰方面演出尚算唔錯
羸唔到只怪對手有基雲上左身既表現
小弟打死都唔信俾兩次機會麥利殊都護級失敗

不過佢左路搵中堅列治維客串就真係搵自己笨
用未上力既域奴或者搵卡爾客串都好過搵隻大水牛
這亦係小弟認為佢今場波排陣既唯一錯誤

2) 阿仙奴 vs 熱刺

上一段講到曼城有基雲補鑊所以唔使輸
不過如果好似熱刺咁
包括龍門在內既防守球員排住隊出錯
就整定死路一條
一場預期好激既倫敦打呲踢左岩岩好1個鐘就可以放入雪櫃

另一方面,上星期已經提過兵工廠部份球員幾疲累
將心比己都知羸3球兼疲累既情況下唔會想再去盡

但雲加今場波同之前一樣好遲先俾部份主力休息
想盡數死敵唔難理解
佢想謹慎亦好合理
但真係要作出取捨

法比加斯,艾沙維同埋雲佩斯3名攻擊主力
全部有疲態兼玻璃腳
但後兩者都要踢到尾段先可以收工
而就算辛達路斯入替其中一個勤工獎中堅亦唔過份

另一方面,桑治以及迪亞比現階段表現唔算好理想
雲加其實亦可趁咁既機會俾伊保爾重彈舊調踢防中
隨時可以解決球隊防中實力不足既老問題

3) 富咸 vs 利物浦

咁多不利因素之下作客富咸
有晒心理準備利記會失分
托利斯未退下火線前
表現絕對值得有1分落袋

不過冇左王子前線就死晒火
再加上一條輸足3次突擊既不穩防線
失波只係時間問題
而菲臘迪根之後俾球証過嚴趕埋出場就簡直好似俾人判埋死刑
加歷查及後既紅牌就只係若然未報只因時辰未到既例子

而家聯賽劣勢暫且唔好唸
踢得返之前對曼聯既水準作客里昂唔係死硬
畢竟踢生死戰既利記向來韌到得人驚

4) 祖雲達斯 vs 拿玻里

印象中已經係祖記今季第4場正式比賽
因為後防失誤而失分
當中3場聯賽加埋失既7分仲係而家同國米積分榜上既差距

由上年主場保方俾費倫天拿射爆廠而發老脾
佢班後防隊友講真無論出咩人從來都只係倚賴佢
難怪有膝傷都要拖夠兩個月先肯去開刀

祖記高層增兵頭重尾輕
最終可能再次益左池中無魚蝦自大既國米

2009-11-2 (1)

早幾日米堡迷ck兄話有fd搵到批冷門波衫以及足球用品
問小弟有冇興趣一齊上網賣衫
其實小弟都有少少心郁
一來對波衫有興趣
二來如果好似ck兄0個fd咁有門路
每件衫賺少少車馬費都山大斬埋有柴
但偏偏衰在太忙冇時間

小弟曾幾何時都有唸過賣波衫搵外快
而入貨就好考眼光
因為大把奸商賣假嘢之餘
就算搵到正貨亦要考慮款色
畢竟件衫太樣衰又點好意思叫人著上身
而如果搵到落場版同埋特別版就仲正

有時遇有賤價次貨其實都入得過
因為件衫可能只係廣告 logo 花左或者衫身有少少甩線
賣平少少應該都唔愁冇捧場客

至於衛衣以及 track suit 就未必有咁多捧場客
不過遇到熟客有特別要求先同佢搵貨都未遲
至於波boot就由於成本唔平
開業初期或者驚風險就真係索性唔好入貨
因為要賣好幾件衫先可以 cover 波boot滯銷既損失

查實波衫喜好各有唔同
好多人都因為唔想同人撞衫而鍾意冷門嘢

順便同佢賣定廣告
佢0個fd搵到既貨源真係夠晒冷門
英格蘭,德國,西班牙同埋意大利既部份中小型球會已經係小兒科
希臘,危地馬拉,巴拿馬,哥斯達黎加以及玻利維亞等地既
球會或者國家隊都可能有貨就唔到你唔服
當中其實另有一至兩隊強隊既筍貨
不過所有嘢都要等ck兄0個fd稍後落實

以小弟所知售價仲算幾抵
遲少少等ck兄俾到條link
小弟會 post 0係度俾大家參考
真係唔買都值得睇下