想講下幾日前多場關乎出線既大戰
先講巴林
西亞死剩種主場既時候扭埋空門都唔入
次回合作客又唔入12碼
兩次放生新西蘭真係想唔連續兩次附加賽飲恨都難
佢地冇左胡比爾就冇左進攻重心
於比賽尾段仲亂晒章
根本冇好好利用腳下功夫既優勢
表現同埋結果都令小弟好失望
新西蘭講表現其實亦只係平平
真係令小弟留下好印象只有多次解圍既尼爾遜
以及表現穩健既龍門柏斯頓
以佢地咁既人腳同埋水準整定係列強點心
而其餘6個席位
只有作客羸哥斯達黎加既烏拉圭機會算係好大
歐洲區方面就仲咬得好緊
而焦點一定係法國以及葡萄牙死好命過左半關
愛爾蘭衰冇運兼埋門把握奇差
到比賽中後段冇體能上優勢後
已經再冇本錢壓佳法國圍攻
不過當年蘇格蘭作客都可以羸法國1:0
15年前法國有簡東拿同埋真路拿都可以主場先勝後敗俾保加利亞
杜明尼治賽後居然咁肯串以為已經掂左
查伯東尼隻老狐狸食鹽多過佢食米
愛爾蘭爛命再搏多舖隨時有羸驕兵既意外收鑊
葡萄牙方面就仲好命
門框救足佢地3次
對手中前場幾件堅嘢都幾識用波
返主場絕對有力反勝
而俄羅斯臨完場前幾分鐘幾乎倒水咁倒
以軒迪克接手後踢正式比賽3次作客硬嘢
只係和過克羅地亞0:0
對英格蘭以及德國就分別輸0:3以及0:1
難免令人覺得佢地出線機會仍然高過對手既同時
亦有唔細既隱憂
希臘主場同烏克蘭兩無紀錄
作客基輔依然係一場五五波
一來冇失作客入球俾對手
二來對手之前對英格蘭既表現亦只係一般
俾唔到人好大信心
日前最緊張刺激既正式比賽
可能係冇得睇既埃及對阿爾及利亞
佢地又係兩個只能活一個既局面
不過特別在佢地本身係同組對手
睇文字報導都覺得球場內外都好激
國際足協見佢地分數,得失球,入球總數以及對賽成績都分唔到勝負
所以俾佢地於中立場蘇丹再砌多場
兩隊打多場收多場錢之餘
亦總好過靠抽籤咁兒戲
p.s.:
瑞士打瓜埋尼日利亞羸左世少盃
有時間都想八下佢地咩料
4 comments:
新西蘭一無左澳洲就威番次a_a
不過佢地咁既料子
隨時又係做三零部隊
法國完全唔值入決賽週
小弟更想有黑馬feel既愛爾蘭同波斯尼亞入
p.s.
瑞士有望有新血接棒??
To: 舒利亞
1)
新西蘭同北韓
應該係南非世界盃最弱既兩隊
2)
小弟都支持愛爾蘭以及波斯尼亞
3)
n年後如果仲冇俾其他國家搶人
瑞士係會多左幾件有料既大國腳
小弟都想了解瑞士有咩料
只知佢地有個龍門以及進攻中場都唔錯
等之後搵多少少料先再講
瑞士既青訓血來都做得幾好
我記得辛達路斯,巴尼達都好似贏過歐少盃
唔知有冇記錯
To: wtssoccer
你冇記錯
02年辛達路斯領軍捧盃
當時既人腳仲包括比哈美
Post a Comment