想講兩場歐聯
先講巴塞對阿仙奴
如果話兵工廠班門弄斧
不如形容為中學生挑戰大學生
美斯賽後超正路俾眾人捧到上天
雲加一句’He’s like a Playstation player’
仲應該係萬千球迷或者機迷既心聲
而有同事仲好似忘記左6月有世界盃
睇完就估佢足以再羸足球先生
只睇今場表現
10分滿分我俾夠佢12分
因為面前既又只係人肉雪糕筒豬達
最後一關既艾蒙尼亞又孤立無助
想點 show off 都得
講真佢入夠半打都唔令人意外
美斯踢得搶其實亦因為球隊輕易搶羸中場
但下場要再對國米應該幾濕滯
雖然分組賽鬥兩次都佔優
不過如果國米再有作客史丹福橋一役既高水準
靠高效率同埋硬朗搶截
甚至乎有專人跟實沙維
應該會俾到巴塞唔少麻煩
而只要巴塞中場陷於苦戰
成隊波會即刻斷開三節
美斯唔止苦無供應
仲可能要墮後幫手控球
就算佢已經係地上最強都好難再有機會如入無人之境
而 Special One 忽然串咀話唔驚巴塞
怕且已有 Special Idea
搵兩個茅柴中堅用殺傷戰術對付美斯?
抑或加埋捷禾或者辛尼迪搵至少兩個人睇佢一個?
避左中場混戰而改用長傳突襲巴塞?
再排4-3-3陣式用兩個邊鋒去牽制巴塞兩閘?
靠死球用高波屈機?......
怕且都係要等到4強先知佢賣緊咩藥
另一方面,小弟唔敢講夫添既兵工廠有本錢偷雞
不過而家再次輸得咁大鑊
明顯又係衰板凳深度不足
當中最明顯係中堅位
而家有消息指萬一加拿斯唔續約
雲加將會決定引入兩個新中堅
傳聞人選仲包括漢基蘭,蘇保迪同埋謝路美保定
亦有傳佢會回收小將K.巴特利
而蘇甘保就被指將不獲續約
不過最犯眾憎既豬達既下場就未明
p.s.:
1)
馬勒當拿賽後忽然又有高見話美斯同耶穌並肩踢波
不過佢返到國家隊就好似變左另一個人
咁係唔係暗示’主’唔關照阿根廷?
2)
細哨當年一樣踢到識飛
之後都係衰唔自愛
希望美斯唔好步佢後塵
4 comments:
其實阿根廷前面有泰維斯,希古恩加美斯
中場有馬斯查蘭奴,麥斯洛迪古斯,
應該都唔係太差..
但又真係好似一盤散沙..
唔通真係冇其他似樣既playmaker?
我都驚美斯鋒芒太露,
返到國家隊又再次踢到隱形
To: sammysir
1)
就係衰冇個好似列基美既指揮軍
佢07年復出國家隊既時候 fit 到爆
當時既阿根廷係近年最好睇兼最強
(雖然最終都依然俾鄧加算死......)
而家陣中冇咩好選擇
華朗已經嚴重跌 watt
其他新仔又未有人上到位
偏偏老馬同列基美既關係近乎水火不容
2)
如果改用美斯踢中場
唔知有冇意外收鑊?
美斯應該唔係滾友既a_a
阿根廷緊係衰肥馬啦
條友邊識帶波
就算美斯世界盃踢到係巴塞水準
我都包保阿根廷唔行得遠
四強應該無佢地份
To: 舒利亞
1)
唔係驚美斯學細哨去蒲去滾
而係驚佢羸晒所有嘢之後冇以前咁好鬥心
細哨05-06年球季羸埋歐聯之後
真係比以前冇咁好鬥心
所以蒲同埋滾先會都多左
不過好彩阿根廷唔似可以羸南非世界盃
意味佢之後幾年都應該會好有鬥心
2)
02年決賽週前既巴西一樣屎到爆
到左世界盃又忽然正常
原因係決賽週前大菲仲處於調教球隊既階段
不過而家睇來肥馬唔似有咁既料
貝拉度雖然比較有料
不過已經脫節同埋唔知有幾多實權
3)
小弟都唔信阿根廷入到4強
Post a Comment