2010-7-3

想講尋晚兩場波......

頭場方面
荷蘭對斯洛伐克已經暴露防線中路弱點
開波前仲要由奧查臨急頂替馬菲臣
自然更易俾巴西直線劏穿
失波根本係預期之內

而以荷蘭初段,甚至上半場夢遊咁既表現
洛賓又受制於巴西中後場既夾擊
只係輸一球其實有賺

有人話巴西反勝為敗係因為下半場縮得太後
不過踢穩守突擊就係咁架啦
論點唔見得有說服力

轉捩點應該係下半場既烏龍波
失波後唔止防線散散地
而係成隊波散晒
其實被追平後重頭再來絕對係兵家常事
要解釋佢地點解進退失據就只有怪佢地心理質素太差
成班老波骨原來一踢逆境波就收皮
唔怪得鄧加太多
怨就怨而家唔係打籃球冇得叫暫停

加埋出名燥底既美路又搵岩時間爆炸
結果令巴西連少少搏翻身既機會都冇埋
條友賽後仲頂癮到話自己冇踩斷洛賓對腳而唔算係茅柴
賓尼迪斯睇完之後九成九縮沙
最驚雲加又為左慳家而趁低吸納

睇返荷蘭
佢地下半場初段其實依然受制巴西既嚴防而表現一般
不過表現至少有改善
證明心理質素都唔太差
史尼達同埋洛賓都多左機會掂波
雲達韋爾亦先後俾到巴西兩個左閘唔少麻煩
肯搏又有運既結果係一舖翻身

另一方面,球證去到關鍵階段通常唔會一開始就狂俾牌
不過今場波初段已見有球員失控
洛賓亦真係有試過俾人踢得幾應
俾你係佢見到球證竟然唔多做嘢
見有腳埋身而本能反應跳左先都唔怪得晒佢

唔信可以參考皮里斯既例子
佢02年因為逃避攔截而斷韌帶後俾人批評插水成性
佢都反駁話當球證保護唔到自己
先逼於無奈跳得就跳

尾場方面
還原 4-5-1 既加納踢得唔太保守
領先後亦冇太龜縮
而就算因為三流龍門京治再次出錯而被追平
都冇好似巴西咁滯晒氣
之後仲靠體能上既優勢而越踢越進取

而烏拉圭防線雖然冇晒一對正選中堅
但中後場尚算緊密
令加納既中前場球員冇太多空位發揮佢地既爆炸力
加上梅斯利拿繼續有水準演出
令加納踢到加時都只係一直羸形勢

但最關鍵都係加時下半場補時階段蘇亞雷斯出手救國
平時習慣攞角既基恩
又因為太緊張又太冇運而狂抽中楣
對於陣中有唔少年青球員既加納而言
之後未互射12碼已經輸晒氣勢
畢竟心理質素有時係要培養
艾迪耶亞宴客都應該係因為咁

不過順帶一提
基恩係陣中負責互射12碼既第一人
於咁短時間內重拾信心兼夠吉士攞埋梅斯利拿既右上角
嗰份勇氣同埋責任感已經羸盡掌聲(至少有我掌聲!)
只可惜既係佢既心理質素調整得真係遲左
又或者可以講句'天亡加納'!

p.s.:
尋晚兩場波都睇到心理質素對踢波有幾重要
路維旗下既德國兩年前踢歐國盃決賽未夠70分鐘就泄晒氣
阿根廷今屆亦未踢過逆境波
今晚大戰隨時又因心理質素而定高低