3個月前阿根廷熱身賽羸左德國
馬勒當拿嫌湯馬士梅拿既唔係教練亦或係大牌球星
而唔肯同佢一齊接受傳媒訪問
老馬大概冇唸到幾個月後就現眼報
而老馬近來成日 call 摩連奴去惡補戰術知識
不過佢應該冇聽過巴塞因為冇 Plan B 而衰俾國米既例子
美斯今場終於俾德國佬成功圍捕
原來又係唔識踢逆境波既阿根廷即刻廢左半力
泰維斯同埋迪馬利亞亦因為類似情況而徒勞無功
老馬之後換入同類型既柏斯托利同埋阿古路
就只係繼續錯落去
如果老馬肯用大米或巴勒莫取代隱形人麥斯洛迪古斯
改踢簡單足球兼多個可靠既二傳點
最終搏唔搏到冇人知
不過至少可以擾亂德國既佈防
德國佬以前都經常靠穩守突擊制敵
死守既時候就似刀槍不入既鐵甲威龍
碧根鮑華,馬圖斯,森瑪等自由人之後因應場上形勢而忽然出擊
幾次傳波走位已經殺入對手腹地攞分
跟住繼續死守去等下一次突擊機會
近兩場既德國其實繼續都係打唔死既鐵甲人
尋晚梅迪薩卡既顏面擋球仲絕對係最佳寫照
唔同既只係冇左波歷克後
佢地而家係靠個別球員好似一幅布咁更快速去移動
奧達文迪離場前後既右路都咁多漏洞
自然最多時間成為德國進攻既重點
德國今場羸波比上場羸英格蘭更有說服力
亦係路維最 update 既代表作
不過冇嘢值得咁早開心
下場對西班牙隨時會係另一個故仔
雖然迪保斯基仲未夠吉士收起托利斯
搞到現時既 4-3-3 陣式三不像
而鬥牛國踢左5場既整體表現都只係一般
尋晚過到關都要多得卡斯拿斯回勇
不過德國佬最驚組織力超強既球隊
所以鬥牛國所帶來既威脅肯定大過英格蘭同埋阿根廷
暫時唔講心理質素之餘
亦假設迪保斯基唔變陣
用對付希古恩既策略已經可以搞掂托利斯
一對中堅雖然笨重
但只要保持集中力就應該唔會再俾佢入到波
而卡迪維拿助攻平平
除非恩尼斯達忽然轉邊幫拖
否則拿姆加埋隊友回防有足夠人手凍結韋拿
上兩場既關鍵係圍捕朗尼同埋美斯
下場既關鍵就應該係凍結沙維
好彩一對防中都唔使停賽
小豬一定要再有尋晚 man of the match 既水準
德國佬本身都有隱憂
暫時未知謝路美保定既背傷情況
馬素贊臣絕對冇本事對付恩尼斯達(甚至再多一個沙治奧拉莫斯)
所以普度斯基既回防繼續相當重要
而下場冇左無辜再攞黃牌既湯馬士梅拿
杜查奧斯基既技術型踢法對住卡迪維拿比較難搵食
而拿姆又有後顧之憂而唔敢太多助攻
折翼既機會幾大
p.s.:
1)
早前想搵冷門波衫
日前終於收到件洪都拉斯兒童版波衫
(件衫印左當地卡通圖案同埋代表球迷既12號)
一個字:正!
不過失望既係俾左錢十幾日買北韓波衫都仲未有貨
2)
C7忽然宣佈做左老豆
不過唔肯講邊個係嗰仔既阿媽
一個24歲法國內衣 model 就係傳聞女主角
4 comments:
本來以為阿德大戰好精彩
點知原來係睇德國表演
阿根廷咁多腳射門
印象中似乎得美斯最後兩腳係有少少威脅
其餘係有中目標
不過無力無角度真係嘔血
而且睇到德國係成隊波
阿根廷係十一個人十一隊波
完全無組織
老馬換人一來太慢
二來只係用一個同類球員換番另一個同類球員
就只係學界比賽既調動
唔明點解係都唔(重)用大米
堅持選巴勒莫但又係唔用
奧達文迪又係明顯一個唔多夠班既例子
明白輸咁多球唔係龍門一個人責任
不過第一球一定要小佢
小弟連續第二日成班人一齊係廣場睇
今次企正係中央
熱鬧好多
小阿根廷既聲音亦大左
連續兩場大炒(強?)隊
德國下場再對一線球隊
條線最難行
最後真係贏埋世界盃就真係最有說服力
To: 舒利亞
1)
馬勒當拿向摩連奴取經
不過除左森美爾之外
其餘摩連奴重用既阿根廷球員都唔係老馬杯茶
偏偏串王既棄將貝迪素就因為森美爾受傷
而接連有得擔正
2)
奧達文迪唔係唔夠班
而係俾老馬玩死
佢雖然可以踢後防所有位置
不過最擅長既位置其實係中堅
佢唔高但跳得高
被形容為繼哥度巴同埋簡拿華路之後
最勁既矮仔彈弓人後衛
佢其實比迪米捷利斯同埋貝迪斯都信得過
由於古迪利斯成日失位
老馬決定再用4個中堅組成防線
以便佢隨時變陣改用3人防線
辛尼迪當初落選
都係因為老馬認可以踢埋閘既中堅比較實用
3)
輸壞第一球
奧達文迪同埋羅美路都要負責
4)
小弟嗰晚去左朗豪坊睇
5)
對英格蘭同埋阿根廷
小弟都對愛隊德國有一定信心
不過西班牙既實力明顯難打得多
德國想再下一城
一定要搞得掂沙維
6)
德國傳媒估計卻奧斯會取代湯馬士梅拿
不過小弟始終認為杜查奧斯基既機會比較大
小弟曾經因為去旺角睇葉問前傳
而短暫係朗豪坊睇左大約廿分鐘巴西對提子牙
不過印象中果度睇幾辛苦
昂住個頭仲要幾高下
不過有得入明報攪果個圈仔坐住睇又唔同
To: 舒利亞
小弟反而鍾意成班人咁企0係度睇
氣氛幾好
如果企前排睇都唔錯
不過就要一早去霸好位
小弟星期六晚20:45就去到搵位
如果想有得坐
不妨考慮中港城,奧海城同埋時代廣場
有同事去過前者
話唔多人之餘
仲可以攞埋 Food Court 既凳用
但氣氛只係一般
Post a Comment