德國頭5場入13球都唔代表攻力真正強勁
只因為反攻易過搶攻
而要有效阻止佢地既突擊
就唯有前場緊迫同埋快過佢地回防
而西班牙正正兩樣都做得到就為晉級打好基礎
西班牙尋晚算係踢出今屆代表作
另一關鍵就係迪保斯基終於肯用柏度洛迪古斯取代缺態既托利斯
算係半個 Plan B 令西班牙終於發揮到 4-3-3 陣式既真正威力
而正選有7個巴塞球員就令佢地更有默契上既優勢
幾日前提過德國要羸波就必須凍結沙維
不過冇左沙維既西班牙仍有其他球員可以靠短傳滲入
當中恩尼斯達經常墮後幫到球隊好多
令德國唔可以郁下就用幾個球員圍捕沙維
凍結沙維失敗就自然俾西班牙搓住踢
亦埋下輸波伏線
不過最終竟然輸在強項死球就令小弟好失望
佩奧爾上半場初段門前頂波底已係預警
德國佬失波一刻邊有理由可以睇漏佢
佢一條友企禁區邊就擺明大古惑
當時奧斯爾其實同佢成一水平線但相差至少10個身位
佢企既位置係德國佬最易解圍既地方
明顯等緊機會反擊
盯緊佩奧爾唔應該係佢既責任
真正要孭鑊既應該係幾個中路球員
碧基目標再大都冇理由 trible team 佢
及後雙方角色對掉
偏偏德國無本事平反敗局
原因唔係好似兩年前歐國盃決賽咁提早放棄
亦唔係好似對塞爾維亞咁冇帶射門鞋
而係冇板斧咬得入防守高度集中既西班牙
如果唔係柏度洛迪古斯獨食
佢地仲可以以其人之道還治其人之身咁買埋保險
西班牙同埋荷蘭既中前場各有殺著
不過前者既防守無論計個人抑或整體都比較優勝
只要保持到今場既防守水準同埋原陣出擊
絕對等如拎住盃耳去踢
另一方面,德國出局就代表小弟既世界盃已經完結
回顧過去6場波既整體表現算係唔錯
連挫英格蘭同埋阿根廷仲一掃多年烏氣
冇左波歷克果然仲好
路維應該因為冇其他好人選接手而有得留底
不過德國之後幾年有冇得打破14年既錦標荒
就要睇佢點樣改善球隊既主攻能力
畢竟真正既一線球隊唔可能冇 Plan B 揸手
而更多主力勢必外流取經亦會對球隊有正面影響
情況就好似早兩年既西班牙
2 comments:
場波真係好睇
小弟認為德國係今年防守最好球隊
可惜對住於今場有最強攻擊力的西班牙
都係招架不住
勁密集既防守
西班牙仍然可以玩短傳滲入
咁既球隊先係名正言順世界盃冠軍
當然德國反擊亦唔係講笑
只係西班牙防守亦穩
同上兩場唔同既係
對方門將簡直係高幾班
卡斯拿斯唔係羅美路同占士之流
而普通既射門又點可以過到卡斯拿斯
展望未來
德國仍然前途光明
一班今年主力
兩年甚至四年後
仍然當打
只要更多經驗
兩年後仲有機會
To: 舒利亞
1)
西班牙中前場太多球員可以靠短傳滲入
令德國唔可能搵幾個人去圍捕沙維
要對付西班牙
唯有效法軒迪克或者摩連奴對付巴塞既方法
更徹底咁去死守
2)
頭5場波既西班牙其實唔係守得特別好
而幾個後衛同埋卡斯拿斯
頭幾場波都輪住出錯
沙比艾朗素同埋布斯基斯都冇辛拿咁搶
不過對住德國就齊齊交到貨
考慮佢地08年羸歐國盃
入左8強之後再冇失過波
佢地似係有遇強越強既特性
佢地最後20分鐘 9-0-1 死守既高度集中力
冇主攻本錢既德國根本冇得搞
3)
同西班牙一樣
德國國內其實仲有好多好嘢
佢地本身都有唔少出場機會
希望路維可以搵到可靠既中堅之餘
亦為高路斯搵到接班人
4)
同西班牙以及德國相比
英格蘭同埋意大利既新人少好多上位機會
唔止係國家隊
連球會都係咁
希望英超要求球會註冊8個本土球員既政策
長遠可以幫到英格蘭
Post a Comment