今日想講英超形勢……
小弟將20隊分為5個梯隊
第1梯隊只有車路士同埋曼聯
佢地應該係最有心有力既爭標份子
不過車仔本身有唔少隱憂
多左幾個年青人長遠對球隊活力係好事
不過表現不穩就難免會係短期代價
而中後場近年成日有主力受傷
而家仲有卡華路離隊
狀態大不如前既泰利唔似可以頂得好耐
另外,球隊隨時為左應付老闆壓力而過份專注歐聯
隨時顧此失彼
曼聯既中後場實力其實冇咩加強
傷兵問題亦同車仔一樣難搞
不過佢地年青球員既成熟程度好過車仔之餘
輸左聯賽之後亦多數反彈
只要費蘭迪斯同埋哥利亞幫輕到朗尼
佢地絕對有力’過車’
曼城,阿仙奴同埋利物浦就係第2梯隊
表面係爭標強隊
不過多數有心無力
隨時未到聖誕已經轉 plan 力保前4
曼城既來勢係好勁
不過文仙尼功力有限
有好多好球員都未必有用
加上佢地係最受’青訓球員’條例影響既前列球隊
有錢有冠軍?
No way!
兵工廠方面
軟硬兼施留到法比加斯
係雲加暑假最重要既一招
幾個年青新兵雖然應該幫到手
不過始終唔係球隊最需要既經驗球員
搵極都搵唔到好龍門亦係佢地既隱憂
利記方面
雖然謝拉特同埋托利斯都唔走
不過整體實力其實冇咩增強
而鶴臣唔算係頂級教頭
亦冇咩執教強隊既經驗
當年接手國米都係虎頭蛇尾
難免令人擔心
不過更煩既一定係兩個美國佬仲係賴死唔走
第3梯隊有熱刺,維拉同埋愛華頓
熱刺就算最終增兵成功
都唔似有力兼顧兩邊戰線
英超成績勢必下滑
維拉方面
冇左奧尼爾一定對球隊有短期既負面影響
維拉今季既下場
絕對要睇由邊個接手
不過艾歷臣似乎唔係一個好人選
條友要有錢增兵先可能交到好成績
而家咁既時勢
美國老闆唔似肯繼續大開水喉
而巴特利有料冇經驗
亦未必搞得掂維拉
莫耶斯雖然因為球會冇錢
而被迫成為暑假第一個完成增兵既英超領隊
不過佢地基本班底唔變
只要留得住積基卡同埋艾迪達
佢地下季應該有力重返歐霸盃戰場
第4梯隊就包括
伯明翰,韋斯咸,新特蘭,史篤城,布力般流浪同埋富咸
佢地既戰鬥力比上不足,比下有餘
下半季隨時專攻盃賽
餘下6隊就係第5梯隊
當中包括紐卡素,保頓,韋根,狼隊,西布朗同埋黑池
紐記同埋保頓既人腳同埋防守能力算係比較好
護級前景審慎樂觀
如果連進攻方面都有改善
隨時俾到球迷驚喜
當中馬田柏度夫如果可以克服傷患
佢同李青龍雙翼齊飛都幾令人期待
韋根同埋狼隊上季唔使降班
就只係多得有窮鬼同埋魚腩包底
如果防線繼續咁屎
當中至少有一隊要返英冠
西布朗就成日做升降機
迪馬堤奧接手後係改善到球隊組織力同埋攻力
不過如果防線持續發瘟
就算卡臣表現再好都係等死
黑池就衰莫財
連 bonus 都要拖數
仲何況增兵搏護級
佢地既防線係近年升班馬當中最差
如果下季繼續4-3-3陣式
隨時因為中場失守而輸得仲多
單靠查理阿當去越級挑戰英超真係幾難樂觀
5 comments:
果然有波, 有分析, 只欠天氣!
坦白講
曼城又大換血
領隊又唔係勁
佢地今年唔見得比舊年更可怕
而且另一有力挑戰者維拉又有問題
今季係時候到big4重聚了
預左紐記以護級為主
而事實上真係唔能夠太多期望
始終實力無明顯加強
比較觸目既兩個收購
一個就仲有排傷
另一個就有排操
仲有主將受傷
季前預測
曼聯冠軍
歐聯資格再次由big4奪得
西布朗、黑池、狼隊降班
英超始終都係果6隊既人腳最強,
其他的都是陪跑,
哪隊是降班大熱都好難講...
如果紐記能在轉會市場關閉前多簽一名後衛,
同埋簽到賓艾化
我估今年都可以踢到12-13名,
否則今年既目標只能是15-17名左右...
賓艾化應該可以打兩邊中場或中路做playmaker,
佢既打法應該非常適合紐記,
如果有佢,
再加埋nolan,barton或smith,
古迪亞利斯既中場線,
在攻守上都應該幾可靠..
To: 舒利亞 % sammysir
1)
小弟都想 Big 4 歸位
雖然車仔尋晚既表現好似好堅
不過隱憂唔少
曼聯絕對有力過車
2)
今季英超中下游
其實至少有4隊比較差
紐記如果再一次搞到降班
大抵只係另一次衰自己既例子
3)
小弟覺得降班球隊
不出韋根,狼隊,西布朗同埋黑池
黑池尋晚嚇人一驚
考慮到上季般尼開季似樣都要降班收場
小弟唔會將黑池既評價一下子大幅提高
反而幾坦心韋根
因為佢地上季唔使因為玻璃防線而降班
只係對手更加唔掂
同埋佢地主場戰績唔差
如果今季連主場優勢都冇埋
打死都唔信佢地可以逃出生天
4)
賓艾化如果唔搞事
真係可以幫到紐記好多
小弟覺得佢可以踢後上箭頭
4-4-1-1 陣式可以加強紐記既組織能力
5)
希亞活一掃烏氣
曉頓有冇少少後悔冇接收佢?
To: 死佬
我都叫有波?
Post a Comment