2010-8-18

雖然 outdate
都係想講英超首週比賽

以西布朗上季踢英冠都成日失波
重返英超就即刻吞足車仔半打蛋都唔係奇事
咁既賽程安排固然唔好彩
撞正車仔上下賽前俾油王狂插就只有死得仲慘

不過星期六晚最意外既賽果
一定係黑池作客大炒韋根4球
黑池作客同埋防線都只係一般
韋根又向來幾靠主場食糊
咁既賽果直係盡破數據

不過唔好因為一場波而即刻將佢地睇得太高
始終防線唔掂兼冇出色防中
英超路一定難行

曼聯就整體持續熱身賽既勇態
就算朗尼依舊冇態
都依然可以羸紐記3球

貝碧托夫近幾場明顯多左走動
如果成季都咁勤力
表現一定會係加盟曼聯以來最好既一季
最終死唔出大三元,甚至大四喜
就只好怨自己埋門一腳未夠班

講表現始終覺得兩老最搶
費sir似係重彈舊調
再次於季初靠老將食糊
到佢地季中跌 watt
季初受世界盃後遺症影響季初表現既球員已經上力接棒

紐卡素大敗
關鍵係搶輸中場
固然搞唔掂費查之餘
亦放生對方兩老
令唔齊腳既防線更加受壓
當然卡路爾如果3分鐘偷襲成功
場波既發展又可能會有唔同

最後要講既一定係雙紅會
利記以穩守突擊制敵
兵工廠中場前幾件技術型球員都因而冇咩機會發圍
當中只有今日證實要養傷成個月既拿斯利算係比較好
加上謝拉特同埋加歷查兩大長老又齊齊回勇
利記就算踢少個都有權攞齊3分

與其話拉爾拿擺老烏
或者尼哥治把握唔到入第二球既機會
而令利記失分
最大罪人點都係祖高爾
球證過嚴係唔好彩
不過踢左45分鐘都入唔到局就令人失望
希望佢之後有料到
唔好成為另一個基維爾