2010-9-4

想講本地波......

幾日前去睇黎新祥紀念賽
頭場雖然有9個入波
不過愉昇元老居然大炒流浪元老八個一皮
已知場波好睇極有限

尾場方面好睇得多
銀禧精英對香港代表隊聯隊既戲碼
仲簡直係港甲華人明星賽

不過睇完之後更覺新不如舊
現役球員既組織能力絕對差過前輩至少一班
羸波只因年青力壯兼疊馬
招積怕且有排搞

至於今日就入左場睇南華對公民
順便做埋善事

南華羸波係意料中事
不過雖然入左兩球靚波
但發揮只算中上

如果唔計超低能球證
威廉王子應該係全場最差
佢以前最擅長踢突擊
去左南華就越踢越沉
佢曾經講過南華既主攻踢法令佢少左表演機會
不過多次睇南華既波
都發覺南華有唔少快攻機會
只係佢通常都把握唔到
至於係唔係壓力太大而影響表現
怕且只有佢最清楚

而南華防線其實有唔少甩漏
不過慶幸既係英雄輝同埋艾維斯都越踢越好
前者撲出鞠盈智既後半場笠射
一定係今季其中一個最佳撲救
而港版卡卡雖然身材偏瘦
不過搶點準繩之餘
對住迪天奴都照搶可也既膽汁
亦證明佢有力成為港甲其中一個最佳中堅

另一方面,傻邦既世界波正到爆開
港甲謝拉特果然唔講得少
不過白鶴明顯唔係中堅既好材料
如果佢重返防中位置
加上老當益壯既強哥似會墜後半格
以類似沙比艾朗素既踢法搵食
Kim sir 點分配佢地幾個既出場時間
小弟倒好有興趣