2007-12-31

1)
賓尼迪斯表示可能會引入一至兩名新球員

2)
西班牙同埋英國傳媒指艾斯基路可以100萬鎊既價錢離隊
愛華頓,米堡同埋保頓都被指係佢既下一站

3)
馬菲泰萊被傳係新特蘭既300萬鎊增兵對象

4)
加特拿可能以300萬鎊既價錢轉投伯明翰

另一方面,熱刺仍然對艾曼紐臣死心不息
想再向阿積士出價450萬鎊

5)
沙地射手艾達度尼表示唔會加盟曼城

6)
打呲郡雖然資金唔夠
但仍然準備增兵5-6人

7)
小保加中場新星巴尼加被指成為華倫西亞既1100萬鎊換血對象

8)
消息指如果有大球會於1月向貝碧托夫展開斟酌
佢好可能會要求離隊

9)
些路迪否認中村進輔於1月重返橫濱水手既傳聞

10)
阿馬利被指係祖雲達斯既1700萬鎊增兵目標

11)
費格遜表示有份參加聖誕淫慾派對既球員
全部罰1星期人工
總數約100萬鎊將捐去慈善團體

而佢老人家表明如果有球員敢再犯
將會被佢賣走

小弟覺得佢老人家最正就係夠惡
雖然有時好小氣
但佢態度咁強硬係好岩既
因為領隊食唔住班0靚就遲早出事
值得其他領隊效法
例如紐卡素既 Big Sam 同埋車路士既格蘭

P.S.:
賽後感應該要等多日
唔好意思

2007-12-30

1)
艾美奧比再被傳被紐卡素放棄

另一方面,佢地終止左同曹宰榛傾合作事宜
不過這個南韓射手仍然唔愁出路
因為韋斯咸同埋富咸都對佢好有興趣

另一方面,紐記被指好可能會同巴頓中止合約
但保留佢既球員註冊
一旦將來如果有球會肯收留佢既時候
紐記可要求轉會費
(小弟聽落覺得未必可行
因為中止左合約之後
巴頓應該就會成為自由身)

2)
又有球員出事!......
馬瑟韋爾隊長前蘇格蘭球員奧當奴
尋日羸登地聯5:3既比賽中昏迷
送院後半個鐘不治

3)
消息指油王答應撥款5000萬鎊去增兵
車路士立即被指將向國米出價買佢地既巴西右閘馬干

4)
朗奴甸奴再被傳於短期內轉投AC米蘭

5)
哥治否認轉投曼城

6)
週薪只有2.5萬鎊既鶴臣如果成功協助富咸護級
將會有100萬鎊獎金

7)
達拉保拿被傳將轉戰蘇超
加盟格拉斯哥流浪

8)
科拿因為臀部舊患到美國開刀
將要抖成個月

9)
利物浦老闆又有牢騷
今次被批評既唔止賓尼迪斯
仲包括球員既表現

2007-12-29

1)
想同 Big Sam 講幾句好話......

紐卡素踢成咁
Big Sam 同埋球員都有責任
唔可能怪晒佢

講真教幾個月波就要證明晒實力
有時都好好好好苛刻
佢之前教保頓前後差唔多8年
都係後期先有料到

就算今季係佢於紐記既第二季
我都未必贊成季中炒佢
何況只係佢既頭半季

其實新手上任唔代表即刻會有好成績
有既話只係 bonus

時間會證明佢既領軍能力
坦白講
紐記自從冇左波比笠臣都衰左幾年
不妨信埋 Big Sam (最少)今季

而家只係聯賽踢得唔好
就算最終冇歐洲賽資格
咁最多等多年
聯賽盃出局係因為抽下下籤對阿仙奴
足總盃又未踢
邊個夠膽講紐記會踢得差

講買人
佢係有入錯貨
但禍害程度同巴布爾,保桑以及盧基無得比
而佢仲識得踢走巴布爾,巴巴耶路等廢物
已經同路達以及桑拿士高下立見

教波唔同打機玩足球經理
排錯陣唔可以 'save and then reload'......當冇事發生過
領隊係要負責
但有邊個領隊未試過排錯陣

講真紐記陣容係仲有改善既空間
亦即係表示球員都未夠好
而球員反對 Big Sam 既聖誕集訓決定
唔理球隊劣勢都掛住玩
而家玩到個心都散晒
真係爭唔落

咁要努力既即係唔止 Big Sam 一個
如果做得唔好就要即炒
奧雲,巴頓同埋卡卡巴......都應該要同時炒埋

2)
羅辛奴表示有信心紐卡素於季尾可打入前6

3)
朗拿度個老豆爆料佢個仔想於1月返巴西落班

佢想走之餘
其實好多球迷都想佢走
有球迷搞網上簽名要求 AC米蘭賣走佢同埋迪達

4)
雲加表示如果列文搵到合適既新球會
可以於1月離隊

另一方面,佢老人家澄清碧咸只係跟操
而唔會以借用身份加盟

5)
皇馬同巴塞隆拿等未出齊糧既球會
如果唔可以於限期前找數
將被禁止於1月作任何球員買賣

6)
馬菲泰萊被傳以500萬鎊既價錢轉投保頓
但佢地未賣安歷卡之前邊有咁多錢買人呀?

7)
拉爾拿強調冇意思轉投馬體會

8)
愛華頓被指向雷丁出價300萬鎊買史堤芬亨打

9)
比安基被傳以800萬鎊既價錢轉投馬體會

10)
阿仙奴小將馬利達被傳以借用身份加盟皇家蘇斯達

11)
利雲特既球員由於已經有幾個月無糧出
西班牙傳媒指佢地可於短期內單方面同球會解約

12)
前紐卡素中場羅拔被傳以自由身加盟葉士域治

13)
富咸宣佈搵到鶴臣接手

2007-12-28 (3)

1)
之前講過巴頓衰傷人同埋行為不檢
而家件案初次提堂後
佢唔准保釋
還押監房看管至1月3號
意味佢將要缺席對車路士同埋母會曼城既比賽

2)
Big Sam 再被傳帥位不保

3)
蘇格蘭16歲翼鋒曲巴由 Ross County 轉投利物浦
簽約至2011年

4)
由於比亞堤要養傷1個月
佢既球會隊友侯斯就被傳成為米堡新既增兵目標

5)
阿曼特查奧爾被傳成為韋根1月既增兵目標
以布魯士同雲加既友好關係
傳聞有一定可信性

6)
洛迪高竟然落選港聯最後名單
小弟認為擺明係羅先生衰小氣
因為洛迪高點計都比陳麒同埋基奧雲尼好
如果唔係羅先生旗下既張春暉
因為衰左傷人案而被雪藏
隨時連盧斯奧都冇份入選

7)
意大利傳媒指拉素既力量型中堅史丹達杜
成為AC米蘭同埋熱刺既800萬鎊增兵對象

8)
米卡李察士準備同曼城續約5年
週薪增加至5萬鎊

2007-12-28 (2)

1)
雖然阿仙奴有艾蒙尼亞同埋蘇比亞斯基兩個好龍門
但有消息指列文一旦離隊
阿仙奴將會搵多個龍門

目標人物有梅拿,蘇連遜,謝斯高連倫同埋保路錫
其中效力班士利既前者仲傳得好熱
轉會費大約100萬鎊
蘇連遜亦被指成為阿仙奴150萬鎊既替補目標

2)
前晚打呲郡對利物浦既比賽
禾路連被麥伊夫尼惡意侵犯
雙方領隊賓尼迪斯同祖維爾就事件於場邊互相對鬧
可能因而被足總處罰

3)
格拉斯哥流浪既曉頓再被傳以600萬鎊既價錢過檔曼聯

4)
費爾被傳成為AC米蘭既1000萬鎊增兵目標

5)
傑志有人事變動
教練狄恩被調任負責一個發展項目
朱志光將取代佢做教練

6)
伯明翰方面表示
唔會讓楊先生既人加入董事局

7)
巴頓同兩名親友因涉嫌襲擊同埋行為不檢被捕
佢兩名親友獲准保釋
但佢就要被拘留
佢三個將於今日提堂

8)
意大利傳媒指梅度可能為左踢歐聯而轉投羅馬
轉會費高達1500萬鎊

9)
林伯特要養傷幾個星期

10)
希比亞因為腳踭受傷
好可能於星期日倦勤
連埋感冒既艾比路亞同埋唔夠狀態既艾加
利物浦只餘下加歷查同埋賀比斯兩個中堅
賓尼迪斯可能要再用懷斯客串

11)
利達再被傳將以400萬鎊既價錢轉投新特蘭

Leixões S.C. 既23歲尼日利亞裔射手 Udo Nwoko
就被指成為雷丁既替補目標

2007-12-28 (1)

未講既3場波:

1)
先講韋根主場對紐卡素
小弟唔睇利物浦場波都要睇紐記輸波
以準備寫賽後感
唔係馬後炮
小弟真係估主隊羸
原因有3個:

第一,韋根對上兩季主場對紐記都羸1:0
0個日再羸有咩咁奇

第二,紐記對阿仙奴一場好波之後
接連3場加埋踢左半場好波都冇
韋根雖然對上16場只羸1場
但其實對上兩場1勝1和
似樣好多

第三,韋根領隊布魯士堪稱紐卡素尅星
之前試過帶伯明翰大炒過紐記

講返場波
先講陣容
紐記今場0個陣令人幾'驚'喜
一對中堅同埋防中換晒
羅辛奴同埋卡卡巴上場真係差
又有史堤芬泰萊同埋菲爾可以用
換人無妨

而巴頓同埋畢特都應該因為上場唔掂而被棄用
不過今場要作客當頭起既韋根
收起佢兩個而只用謝列美一個正式防中就有0的蝕章
而安利上場只有唔夠20分鐘既出場時間
反而今場就踢正選
可能為左針對上場冇組創造力既問題

最令小弟R頭既就係阿倫史勿夫既角色
最初睇出場陣容
仲以為紐記踢 4-4-2 或者 4-4-1-1
辣椒仔會踢前鋒或者輔鋒
開波之後先發現佢成個工兵
出現於自己禁區既時間仲多個於人地既禁區
4-5-1 似乎先係 Big Sam 既排陣

不過5個人當中
小弟認為杜夫同埋安利兩個未上力既球員當中
有1個要先被收起
出多個防中似乎先係比較保險而合理既排陣

維度卡一條友踢單箭頭
自己搵食之餘
仲要 hold 住個波等隊友 follow
但問題隊友冇波供應
就咩都係假
佢全場最有威脅既埋門都要多得米芝洛出錯

講表現韋根都唔係突出
不過已經好過紐記
因為紐記連一次似樣既組織都冇
結果泰萊連續兩季都射死紐記
原來佢都係紐記既尅星

寫 blog 前用手機睇多次精華
竟然成段片兩分鐘都只係有韋根唔太精彩既攻門
可想而知紐記今場踢成點

2)
伯明翰對米堡
客隊羸往績
人腳亦較好
睇佢地唔似有本事羸
估和波因為段估佢地都唔使輸
點知 Boxing Day 收3隻蛋做禮物

死因主要有兩個:
幾日前講過米堡班友係低能(低集中能力)既
今場又係咁
第二同第三球分別係完上,下半場之前輸

另一樣就係佢地出名冇韌力
踢逆境波通常只會輸得更大鑊
只計近兩個月既比賽
對曼聯同埋維拉都係類似咁輸
今場22分鐘唐寧擺老烏之後
結果場波又係咁樣發展

既然修夫基好似有免死金牌唔會炒
冇新領隊
主席吉遜可以考慮搵個心理醫生幫下手

3)
樸茨茅夫對阿仙奴

睇牌面同近況都一定係阿仙奴比較好
不過主隊雖然兩連敗
主場表現又唔夠作客好
不過講真佢地可以和波唔令小弟意外
原因有兩個:

第一,佢地主場成績唔好
在於唔太擅長搶攻
羸唔到比較弱既隊手
唔代表和唔到比較強既隊手
可以主場對曼聯同埋利物浦力保不敗
自然有本錢守和阿仙奴

第二,阿仙奴羸熱刺0個場波其實踢得好辛苦
相反樸茅作客對利物浦早段輸兩粒
心態上已經半放棄場波
體力上消耗唔多
加上班黑鬼計體能一定比兵工廠班少爺仔好
體能上既優勢更明顯

場波阿仙奴又用返0個最佳11人踢 4-5-1 或者 4-4-1-1
小弟認為佢地既對手遲早會熟晒路

法比加斯踢得好過上一場
走動更多
但狀態仲有大把改善空間
而希比既表現就有少少失準

而樸茅就有針對性部署
簡奴取代烏達卡踢正選
佢既波底係全場22個球員中最好
用佢可以 hold 住個波等支援
但如果用烏達卡
全場既控球時間會比較少
變相令對手有更多時間搓住踢

羅倫取代因傷倦勤既格連莊臣
加埋好耐冇見既李察曉士
一齊倒戈就組成樸茅既右路
不過佢兩個冇咩見樹之餘
亦令基治多左時間入鏡
不過佢都係得個跑字

場波既下半場起
睇得出主隊被逼到更加死守
賽後雲加都對此有幾句牢騷
不過人地肯咁樣死守都係因為阿仙奴質高
人地唔通中門大開咩

兩隊各自有機會都把握唔到
守得幾好既樸茅可以執1分都合理

2007-12-27 (2)

1)
費倫天拿被傳接受利物浦既50萬鎊賤價
同意出售唔肯續約既烏化奴斯

另一方面,軒斯同埋布歷治都被傳係利記既增兵目標

2)
朗拿度被傳不惜減一半人工
唔要200萬歐元
以借用身份加盟法林明高半季
但AC米蘭已經否認報導

3)
阿仙奴,紐卡素,韋斯咸,曼聯,雷丁,打呲,熱刺同埋車路士
都相當注視既 Gillingham 15歲前鋒費文
先後會到前3者參加訓練
之後就會3選1

而家以阿仙奴爭羸既機會最大
兵工廠準備同佢簽兩年學徒合約
而合約亦包括佢之後兩年職業合約既優先選擇權

佢係足總杯正式比賽史上最年輕既出場球員
在當地得到球探既極高評價
有一定名氣

4)
繼上星期沙地既艾達度尼後
伊朗中前場球員拿沙特亦將會到曼城試腳

5)
格蘭表明要增兵
不過因為施治神奇復出
佢就可以唔搵龍門
之前傳聞佢地想向華倫西亞借用簡尼沙尼斯

6)
祖雲達斯已決定退出對B.艾雲洛夫既競逐
先後同祖記,AC米蘭,國米,曼聯,車路士,皇馬同埋巴塞隆拿7間大球會扯上關係既佢
而家以加盟曼聯既機會最大

7)
艾比達同埋簡尼沙利斯表示想同華倫西亞解約
跟住再以自由身搵球會落班
前者就岩岩被傳成為愛華頓400萬鎊既增兵對象

而大衛施華同埋韋拿都被傳頂唔順朗奴高文而可能離隊
後者繼皇馬後
又岩岩同熱刺以及車路士扯上關係

另一方面,施積被傳將被朗奴高文掛牌出售以套現買人

8)
盧普利被傳將以借用身份加盟打呲郡

9)
艾歷臣表示曾經唸過買辛達告魯斯
只係季前遲左一步

10)
意大利傳媒指賓施瑪係AC米蘭1200萬鎊既增兵對象

11)
里奧費迪南被傳將成為英格蘭既新隊長

12)
保桑由於於祖雲達斯冇機會出場
可能以140萬鎊既轉會費轉投比鍚達斯

13)
多蒙特成為最新一支同列文扯上關係既德國球隊

14)
曼城被傳將以卡斯伯舒米高再加錢
去買些路迪既保路錫

15)
Carlos Ischia 爆冷成為小保加既新教練

16)
格拉斯哥流浪既右閘侯頓被傳成為熱刺600萬鎊既增兵目標
之前曼聯被指想買佢去取代加利仔

17)
士砵亭既秘魯後衛洛迪古斯被傳將於短期內轉投維拉
葡萄牙傳媒指轉會費高達550萬鎊

18)
些路迪被傳向喜伯年開價100萬鎊買韋根既增兵首選大衛梅菲

19)
Maccabi Netanya 既23歲以色列中場哥漢
被指將轉投保頓
轉會費係超值既3.75萬鎊

20)
狼隊被傳向錫菲聯開價200萬鎊買比利沙伯

21)
日本前教練奧禪由於情況好轉
已離開深切治療部

2007-12-27 (1)

4場波想講:
(但今次唔包括利物浦!)

1)
第一場想講既梗係車路士對維拉既
峰迴路轉入球 show
講入波質素
車仔既明顯較高
但成條防線排住隊孭鑊
前面入幾多都死

上半場先輸0個兩球
第一球就衰睇唔住卡維
任佢做二傳
馬隆尼走位接應
又冇人跟到

第二球仲肉酸
馬隆尼一條友發難
保羅費拉拿同埋阿歷斯任人上腳
其中前者仲想用手拉人
不過只拉到空氣
神奇復出既施治面對一腳唔難撲既射門
竟然繼對阿仙奴後短短10日內兩度犯上嚴重失誤

上半場車仔攻唔入維拉
好明顯係因為冇左杜奧巴
維拉擺明於禁區靠人多頂住
倚靠雪到凍晒既比沙路同埋唔識踢衝撞足球既軍刀
真係好難入波

不過其中一個轉捩點於補時兩分鐘出現
禮特侵犯因林伯特傷出而後備落場既波歷克
輸12碼兼被趕出場
個波羸在波歷克肯衝入禁區搏亂
小弟認為冇左杜奧巴既日子
波歷克同埋比沙路已經係最有本錢搶點頂頭槌既球員

形勢一下子傾向車仔
維拉就算收起入波功臣馬隆尼
換入居迪斯戴維斯都冇用
49分鐘,軍刀繼完半場前既12碼
又靠一下有曲墮既中距離射門整多粒
之後阿歷斯仲將功補過助攻射成3:2

不過之後班後衛又出錯
被擅於死球助攻既馬田拿臣偷襲得手
賽事又返回起點

跟住卡華路唔生性雙腳要人唔要波被罰離場
就令佢班隊友餘下十幾分鐘同埋之後3場聯賽更加辛苦
如果小弟有得話事
一定扣卡華路人工
隊波冇左泰利唸住要靠佢
點知佢就咁唔識唸

場波好睇在大家都好似入波入到唔識停
祖高爾用個人技術上腳搏罰球
波歷克就入個靚罰球

不過佢地今場都係冇好下場
完場前艾殊利高爾門前混戰犯手球
輸12碼之餘又要被罰離場
不過小弟覺得佢冇心犯手球
12碼可以罰,但趕埋出場就似乎過嚴

之後就要講下車仔之後幾場波點搞
個陣殘到咁......
前線講過波歷克同埋比沙路要幫手去衝下
幫得幾多得幾多
軍刀似乎慢慢搵到佢既生存(入波)方式

中場方面
冇林伯特,都仲有波歷克
反正佢兩個好似不能共存

後防就真係好大鑊
阿歷斯加上賓希姆既組合
唔會好過希比亞加上賀比斯既組合好多
而另一方面,巴列堤似乎比保羅費拉拿更值得踢正選
而施治雖然10日內孭鑊兩次
但已經係而家車仔最可信既後防球員

P.S.:
因為今日 office hr 超累,個頭勁痛
阿仙奴,米堡同埋紐卡素3場波
連埋轉會消息
之後(希望今晚)先講

2007-12-26

1)
德國傳媒指尹巴士頓將於下季執教拜仁

另一方面,軒斯菲特就可能接手薩爾斯堡或者之前講過既瑞士

2)
早前接受訪問表示想離開德甲
以尋求新挑戰既盧斯奧
被AC米蘭列為季尾既增兵目標

3)
早前講過南非中場戴維斯
受到布力般流浪同埋紐卡素既試腳邀請
而家有消息指前者準備向佐卡頓斯開價70萬鎊

4)
要介紹個唔錯既教練......杜祖錫
當選07國內最佳教練既佢岩岩決定唔同柏迪遜續約
接手塞爾維亞代表隊
仲會帶奧運隊參加北京奧運

幾個月前佢帶U-21好似已經講過佢
佢擅於激勵球員士氣
唔要求球隊踢得太花巧
主張比較機動既足球同埋穩守突擊

代表作係塞爾維亞於外圍賽既附加賽主場對瑞典先輸0:3
幾日後帶隊出人意表地羸返5:0
入到決賽週後仲得到亞軍

佢簽約兩年
如果塞爾維亞可以入到南非世界盃既決賽週
佢張約會自動延長半年

佢多數會注入U-21既部份舊將入新既代表隊
以佢既功力
對住有少少名大於實既法國
同埋近年回勇既羅馬尼亞
就算最終出唔到線
塞爾維亞肯定可以左右大局

另一方面,柏迪遜搵左前車路士中場祖簡奴域接手

5)
早前爆料話艾蒙尼亞會入選西班牙國家隊既雲加
已經又改口風撐佢既球員代表英格蘭

6)
施治既臀部傷勢證實唔嚴重
可於新年後復出

7)
伯明翰由於唔夠後衛用
準備向些路迪開價50萬鎊買巴迪

8)
哈化柏林成為最新一支同列文扯上關係既球隊

9)
曼聯既風化案有新進展
伊雲斯好可能係無辜
只係當初被受害人點錯相

10)
辛天尼成為伊朗新教練既候選人
佢之前教過里昂,法國國家隊同埋熱刺等名牌
但小弟覺得佢既功力只係一般

11)
尋日講過史特根表示要帶麥費登到蘇超
最新版本就係佢地願意出價350萬鎊
但小弟覺得咁既價錢未必可以令愛華頓放人

P.S.:
黃興桂語錄......有成100句金句:
http://mcchow901.mysinablog.com/index.php?op=ViewArticle&articleId=55191
睇完既人就會明佢點解咁受人'愛戴'

2007-12-25 (3)

1)
賓尼迪斯成為最新一個
於比賽期間被爆格既利物浦成員
損失嚴重
當中包括一架車同埋股票

2)
國家打呲輸波後
列卞特,細哨,迪高同埋森保達再被傳1月離隊

3)
西班牙傳媒指巴迪斯達由於對巴塞隆拿有好表現
令佢得以留隊
但古迪就有消息指將被放棄

另一方面,射手蘇達度表態想離隊
以得到更多既出場機會
佢一直被指係賓菲加既增兵對象

4)
艾歷臣否認艾蘭奴轉投國米既報導

5)
意大利傳媒指AC米蘭將對杜奧巴展開斟酌

6)
些路迪提出借用麥費登被拒後
史特根表示將會唸其他方案將佢帶回蘇超

7)
卡斯伯舒米高重返曼城

8)
韋斯咸開價350萬鎊買班尼斯被打呲郡拒絕後
最新消息係佢地決定加瑪至500萬鎊
但打呲郡領隊就聲稱唔知有咁既事

9)
路蘭度比安基再度表示唔會離開曼城
決心要爭正選
佢先後同拿玻里,AC米蘭等幾支意甲球隊扯上關係

10)
有消息指卡比路會將艾蒙尼亞列入新龍門既候選人名單
而碧咸表態想同卡比路再次合作

11)
沙維治被傳轉投新特蘭
佢同莫高拿若最終都被出售
將可為曉士帶來資金買人
布加般流浪既董事局早前決定唔撥款增兵

12)
森美爾證實膝部韌帶撕裂
提早收咧

13)
由於施治可能因臀部傷患要休息一段時間
而古迪仙尼又傷左肋骨
車路士被指可能於1月搵多個龍門

2007-12-25 (2)

之前仲有D組既 PREVIEW 未寫
希臘,瑞典,西班牙同埋俄羅斯
其中瑞典同埋西班牙繼外圍賽後又重逢

希臘同埋俄羅斯都係靠個好領隊
如果冇列哈格同埋軒迪克
佢兩隊好難有得踢決賽週

希臘就應該繼續踢擅長既穩守突擊
不過冇對手會再睇小佢地
成功偷雞既機會大減
小弟認為佢地出線機會最低

俄羅斯踢法同希臘一樣咁機動
但人腳比較參差
而佢地既 3-4-3 陣式係佢地既最大弱點
因為防守時有漏洞
但以軒迪克教波既作風
應該唔會貿然轉陣式
講到尾俄羅斯想出線都要睇軒迪克既臨場調動

瑞典同埋西班牙講人腳明顯佔優
後者粒粒皆星
但身為西班牙國家隊最大供應商既華倫西亞而家搞成咁
對國家隊既負面影響好大
而佢地條中場線講波底好勁
但截擊力不足隨時被其餘3隊算死
佢地仲有個教波同埋做人都唔多掂既廢領隊阿拉斯干尼
講真出線機會並唔係外界睇到咁坐定粒六

而瑞典近年於大賽既表現幾穩定
唔會去得遠,但就多數成功於小組出線
佢地既命運似乎好睇伊薩臣同埋伊巴謙莫域
前者於曼城出場機會不足
後者於球會踢到識飛
但於外圍賽
因為紀律問題,冇得踢加埋唔肯踢,最終只係踢左幾場
雖然時有助攻
但一球都未入過
明顯有改善空間

結論:
小弟覺得瑞典有能力出線
但未必首名
而另一個出線席位
明顯係西班牙同埋俄羅斯之爭
以西班牙既往績,近況同埋領隊而言
結局隨時係軒迪克又威多次......

2007-12-25 (1)

1)
列文將於下星期定去向
佢承認禾夫斯堡同阿仙奴已有接獲
佢亦相信有幾間球會對佢有興趣
其中一個有消息指就係曼城

2)
史必為左延長球員生涯
同意被外借到錫菲聯
之後佢仲可能會同錫菲聯簽長約

3)
謝拉特表示於暑假曾游說亨利轉投利物浦
但佢最終決定加盟巴塞隆拿

4)
熱刺簽左卡迪夫城既威爾斯左閘根達
轉會費為300萬鎊
佢早前代表國家象對愛爾蘭同埋德國都有好表現

2007-12-24 (2)

1)
英國傳媒指現時利物浦兩位美國老闆吉列同埋赫基斯
由於債務重組同埋撲水起新球場方面
同銀行傾唔掂數
可能要被逼出售股權
傳聞上次收購失敗既杜拜財團有興趣接貨

2)
英格蘭足總將於季尾搞夏令營
令卡比路可以加深同球員既認識
當中仲有場對蘇格蘭既友誼賽
而消息指卡比路真係想搵史高斯出山

另一方面,卡路士爆料
碧咸於皇馬被雪藏
完全係會長卡特朗既命令
而唔係卡比路既主意
卡路士所以認為碧咸將會繼續被卡比路重用

3)
賓尼迪斯表示買入卡拉迪斯既機會已過

有消息指利物浦將再次向烏化奴斯展開斟酌
佢同費倫天拿既合約將於季尾完結
但多數唔會續約
令佢有機會被賤賣

4)
尹達華治似乎就快轉投祖雲達斯
轉會費介乎800-1000萬鎊

5)
熱刺體育總監高文尼否認戴倫賓特轉會韋斯咸既報導

6)
新特蘭繼續為後防物色球員
消息指佢地想向維拉借用加利卡希爾
同埋向曼聯開價200萬鎊買小將比士利

7)
比歷否認將接手富咸

8)
A.莊臣雖然於愛華頓既出場機會驟減
但表示冇意思轉投韋斯咸

9)
AC米蘭被指將借用森保達

10)
英格蘭又爆性醜聞
似乎有食搖頭丸既米卡李察士
同隊友搵靚妹玩3P
仲拍埋短片
不過條片唔知點解最終落入'世界新聞報'手中

11)
國米被指開價向馬體會買文尼捷

P.S.: Merry Christmas......

2007-12-24 (1)

好好好多場波要講......

1)
今次第一場想講既係阿仙奴對熱刺
主隊繼續用近乎最強人腳踢 4-5-1
但尹佩斯連後備都冇都幾令人意外
客隊中後場既人腳天殘地缺
但拉莫斯早前要求球隊以不失球為首要目標後
佢地既防守真係明顯比前集中
防中仲有個新人奧哈夏踢得唔錯
肯搏又難得唔怯場
佢地可以守和半場佢有唔少功勞

下半場兵工廠開記錄個球擺明係羸在法比加斯既後踭
不過佢地羸緊波谷多幾分鐘
就縮後引熱刺
再等機會反擊
以佢地一條唔算太穩健既防線
就真係幾捉蟲
唔使輸返轉頭都係因為羅比堅尼腳頭無靈

場波最正0個段就係由熱刺開始還拖
到阿仙奴再度領先0個十幾分鐘
兵工廠有得保住3分
今次唔係雲加醒
而係熱刺自己大意

拉莫斯犯左換人既大忌
死球前換人往往會令球隊唔集中
而熱刺班友睇住神高神大既賓特拿入場
竟然冇專人去緊盯佢
某程度同佢地中後場唔夠經驗有關
保羅羅賓遜已經係最有經驗0個個
佢有責任提場
而輸波後既佢地已經係強弩之末
因為幾日前作客曼城有70分鐘踢少個
今場尾段無以為繼係可以預期既

而近4季既聖誕冠軍最終都羸聯賽
對阿仙奴而言真係好兆頭

2)
利物浦對樸茨茅夫
羸波唔奇,羸3球就幾意外
關鍵在於早段就 lead 住兩球
令唔擅長主攻既客隊進退失據

而佢地今場條防線失失慌
連向來倒戈對利記有表現既占士都唔例外
解釋左對上8場只失3球既佢地點解今場就失左4球

最後想講基維爾
講近來既表現佢值得利記為佢提供一份新約
佢有佢存在既價值
因為巴布同埋拉圖都仲未成功上位

3)
雖然民意調查顯示本地波冇人岩
但點都要講下尋日東方對傑志場銀牌決賽
小弟賽前已想東方羸
因為佢地季初被人睇死
同米路不歡而散既羅傑承仲勁冇品串東方係降班膽

但小弟認為只要有擅於激勵士氣既米路
再加個咁有料既體能教練
隊波拉雜成軍都有一定戰鬥力
而佢地咁多件巴西外援
點都有幾件好野掛

盧斯奧講來頭及唔上同鄉奧利華拉
但計表現絕對係近幾季本地最穩定既龍門

洛迪高被人話係歷臣加埋史賓沙既混合體
小弟覺得佢冇前者咁好波
但速度同埋 style 就好似後者
勾起小弟18年前既回憶

歷高同埋保羅就明顯已過高峰期
但靠質素於本地搵食都仲掂
佢兩個處理死球既能力真係幾好

最後想講賽後雙方領導層既反應
米路羸波暗串羅先生話想同佢一齊慶祝
真係大快人心
羅先生之前幾個月對米路既有關言論好令人反感

輸波既傑志就有伍健輸波羸風度
佢扶起輸波既頭號罪人王振鵬令人好感動
伍健給予小弟既印象一直都係幾負面
但尋日所展示既氣量講真有幾多老闆會有
對上一個已經係退出左球壇幾年既快譯通老闆譚先生

4)
曼聯對愛華頓
客隊講表現真係值1分
但最終全失3分
派拿真係要負全責
禁區內睇唔到傑斯就憑感覺用後腳攔截
佢當而家睇緊足球小將呀

5)
國米對AC米蘭既打呲
後者靠派路一腳值滿分既罰球先開記錄都冇用
因為夫添既佢地講表現真係及唔上對手

國米因中場傷兵勁嚴重
捷禾依舊要串演防中
但佢地每人走多步令對手難以組織功勢之餘
亦成為左球隊每次進攻既起點
佢地反敗為勝只係時間既問題

結果AC米蘭防線相繼犯錯
其中迪達再一次係最離譜既一個
睇住佢地輸1:2之後
小弟已經可以安心轉台

6)
巴塞隆拿對皇馬
最想講既係寧願冇細哨同埋亨利
都唔想冇左美斯

尋晚場波皇馬一球定勝負
巴迪斯達同埋雲佬個下撞牆
同埋前者之後埋門個腳都咁靚
巴塞隆拿抵輸啦

不過以佢地條向來唔穩既防線
最需要既向來都係進攻火力
但冇美斯既佢地即刻死火
細哨冇態就預左
而恩尼斯達今場冇左美斯拍檔即刻冇左5成威力
就睇到美斯既影響力
亦注定巴塞隆拿冇運行
結果成場波冇一下攻門令人好深印象

兩季前細哨作客皇馬令人覺得君臨城下
列卡特既 4-3-3 陣式亦獨步西甲
過埋尋晚場波
佢兩個離隊既日子應該會加快倒數

7)
最後想講兩隊衰波
先講米堡
佢地對住近況唔差既韋斯咸
本身都連羸阿仙奴同埋打呲
講近況唔會被比下去
講往績亦往往於主場食住對手
難得既係講傷兵問題對手被佢地更嚴重
但都要反勝為敗

最大問題係佢地既集中力好有問題
兩個半場完結前都失波
佢地今季已經犯過 n 次咁既錯誤

另外,韋達又犯錯
佢既錯誤真係幾層出不窮
今次咁樣包越位想唔輸都難
佢係有一定條件成為好中堅
但現實係仲差好遠
講真小弟對佢既評價比辛達路斯同埋賀比斯更差
活基治加侯夫似乎係比較好既中路選擇

8)
另一隊想講既衰波係紐卡素
雖然統計話佢地有24次攻門
但小弟只係睇左上半場精華同埋最後既廿幾分鐘
已經覺得佢地失分真係唔抵可憐

小弟咁少睇打呲郡既波
都知佢地既進攻中場班尼斯擅射中距離
巴頓同埋畢特到底當時去左邊

另外,上場對富咸同埋尋晚既比賽
佢地都冇咩創造力
尋晚既對手比較防守性
冇必要用雙防中
雖然安利後備落場都冇咩表現
但小弟依然覺得比較識用波既佢值得踢正選

而 Big Sam 好似唔識用阿倫史勿夫
佢既位置比較岩踢中路
另一方面,紐記既攻勢好唔平均
右路向來都冇料到
旨意辣椒仔客串或者比爾後上都唔可以徹底解決問題
似乎要等杜夫回勇之後
再長放占士米拿於左路先可以解決問題

2007-12-23

1)
之前講過韋拿亦好唔滿意朗奴高文
有消息指佢亦可能會要求轉會
西班牙傳媒即刻指皇馬願意開價3500萬鎊
打動負債累累既華倫西亞放人

2)
消息指利物浦行政總裁佩利
已向賓尼迪斯承諾撥款於1月買人

3)
巴塞隆拿真係家衰口不停
細哨練波唔認真被列卡特怒插
仲要被電視台拍低晒

而可能冇得踢正選既迪高
就竟然表示摩連奴係球隊教練既好人選
擺明剃列卡特眼睸

4)
哥治表示外援鍾意插水既言論
不但惹來米基爾經理人既炮轟
仲可能惹來種族歧視既指控

5)
羅素終於向小保加請辭
聯賽成績唔理想
世冠盃又鬥唔羸AC米蘭
佢既離職係必然既下場
前教練比安基同埋巴迪斯圖達成為接手既熱門

6)
祖爾同埋比歷成為富咸新領隊既傳聞人選

7)
Big Sam 暗示於1月會盡可能引入3個新球員

8)
莫高拿表示雖然要求離隊被曉士拒絕
但因為冇出場機會而依然想離開布力般流浪

2007-12-22

1)
富咸炒左山齊士
球隊暫時由助教利雲頓同埋麥堅尼成為臨時領隊
岩岩向喜伯年請辭既哥連斯雖然否認接手
但依然被指係新領隊既大熱

2)
經過3星期既跟操
安哥拉24歲前鋒文洛祖得到曼聯提供1份3年既合約

另一方面,費格遜否認會再次借用拿臣
而雲達沙就再續約1年

3)
傳聞祖雲達斯將向愛斯賓奴開價600萬鎊買迪亞歷辛度
佢自從同艾瑪開拖後
就一直被傳將會離隊

4)
活基治被傳成為熱刺既增兵目標
消息指熱刺願意外借卡保爾
又或者用迪科爾作為交易條件

5)
碧咸將會到阿仙奴跟操

6)
拉素同埋帕爾瑪都被指有興趣接收AC米蘭既史米

7)
馬華路禾尼同樸茨茅夫傾緊續約
最快1月成事
人工獲增加最少9000鎊
粉碎近兩個月佢轉投祖雲達斯既無聊傳聞

8)
迪亞拉被傳成為皇馬簽泰亞高既交易條件

P.S.:
前幾日既意見調查
多謝晒 Jordan Chan, 舒利亞同埋死佬 3人既意見
如果你地之後再唸到有咩野想睇
就唔該你地留幾隻字同小弟講

2007-12-21 (2)

1)
歐聯十六強抽籤:
利物浦 vs 國際米蘭
阿仙奴 vs AC 米蘭
里昂 vs 曼聯
奧林比亞高斯 vs 車路士
羅馬 vs 皇家馬德里
些路迪 vs 巴塞隆拿
費倫巴治 vs 西維爾
史浩克04 vs 波圖

2)
國米原來早前曾開價買阿古蘭尼但被拒

3)
卡拉迪斯再次被傳將於1月轉投利物浦
轉會費約600萬鎊

4)
拿玻里想買艾文達
但圖盧茲既1200萬鎊叫價令交易胎死腹中

5)
有消息指利物浦要拖到2009年先可以從銀行班水3億鎊起新球場

6)
盧卡尼利被傳將於1月以借用身份轉投羅馬

7)
尋日講過華倫西亞炒人
有傳原來係因為3位老將同前科利斯關係太密切
而又對朗奴高文搞對抗

另外,韋拿被傳有意離隊
而艾比達,繼利物浦後,又同祖雲達斯扯上關係

8)
張春暉日前因為於灣仔登龍街襲擊一個17歲靚仔
被警方拘捕帶署扣查
羅傑承表示唔排除炒佢

9)
由於謝列美將於1月離隊踢非洲國家盃
Big Sam 表示要搵個新隊長
當中畢特同埋阿倫史勿夫係大熱
基雲,奧雲,史堤芬泰萊同埋巴頓都有一定機會

2007-12-21 (1)

1)
熱刺向阿積士開價700萬鎊買艾曼紐臣被拒

2)
約翰哥連斯向喜伯年請辭
喜伯年季初戰績令人驚喜
一度成為蘇超唯一保持不敗既球隊
但最近戰績滑落
小弟最初以為佢因而辭職
不過真實原因原來係高層唔肯放水被佢買人保充實力

佢上任1年只得到36萬鎊既撥款鎊買人
不過其他球員就相繼他投
眼見左閘大衛梅菲又勢將以7位數字既轉會費轉戰英超
佢向高層攞錢被拒
於是一怒之下劈炮
而佢澄清佢離隊並唔係準備加盟富咸以取代山齊士

3)
消息指曼聯將為蘇斯克查於下季季前搞告別賽
對手多數係拜仁

4)
艾歷臣表示佢決定用赫特為正選龍門
而佢暗示伊薩臣可以於1月離隊

5)
迪科爾同埋哥治都被傳
成為米堡1000萬鎊既增兵對象

6)
謝斯基連倫被傳將以200萬鎊價錢加盟加拉塔沙雷

7)
雲達美迪被傳將以借用身份加盟韋根

8)
於季尾自由身離開費倫天拿既鳥化奴斯
被傳成為熱刺季後既增兵目標

9)
畢特同紐卡素傾掂續約

2007-12-20 (3)

1)
阿祖安奴被外借到聖保羅半年

2)
巴塞隆拿收到3間英超球會對古莊臣既600萬鎊開價
當中包括紐卡素,曼城同埋韋斯咸

3)
由於高路托尼要踢非洲國家盃
阿仙奴要求佐羅歸隊

4)
布朗被指將於季尾以自由身加盟紐卡素

5)
雖然保頓唔認安歷卡轉會車路士
但格蘭已表明有信心佢會以1000萬鎊既轉會費過檔

另一方面,曼城據報亦已經加入戰團

6)
愛華頓否認將麥費登賣到些路迪

另一方面,阿迪達亦否認會重返西甲加盟馬體會

7)
曼聯被傳提出以沙夏,布朗再加現金
以打動熱刺出讓貝碧托夫
但拉莫斯表明一定唔放人

8)
沙地射手艾卡達尼將到曼城試腳

9)
恩斯表示無意加入國家隊既教練團

2007-12-20 (2)

1)
華倫西亞進行清洗
簡尼沙利斯,艾比達同埋安古路遭棄用
前二者於之前已經獲提早放冬假

雖然佢三個近期既表現真係唔好
朗奴高文咁做又得到好多高層撐佢
但小弟依然認為咁做對球隊唔係好事

小弟認為華倫西亞踢得唔好
除左例牌既傷兵問題外
最大原因係朗奴高文既主攻踢法累事
華倫西亞既班底習慣晒賓尼迪斯同埋科利斯兩個前教練
個套實用而機動既穩守突擊踢法
冇人唔准朗奴高文執隊波
但要隊波突然接受一套新野根本係強人所難

另外,被放棄既3人都係陣中既老大哥
佢地對球隊既影響力係 invisible
球隊士氣一定比之前更差

小弟於朗奴高文宣佈接手既時候
已經講過唔睇好
只不過而家隊波被佢搞到仲衰仲臭
華倫西亞雖然從來都唔係小弟既愛隊
但留意佢地既排陣同埋用人已經好多年
(因為真係可以識多好多野......)
今朝睇到單新聞真係好唔開心

2)
原來講既風化案嫌疑犯
果然係曼聯既人
佢係19歲後衛伊雲斯
代表過北愛爾蘭8次既佢係新特蘭1月既增兵對象

3)
軒斯菲特表示雖已對前程作出決定
但要到1月中先會對外交代
不過佢就重申佢仲會係球隊下半季既教練

有消息指拜倥高層因戰績未如之前所料咁超班
而對佢有微言
亦有傳佢係瑞士足總下任國家隊教練既首選
小弟就覺得佢走硬

2007-12-20 (1)

想講尋晚利記輸波
作客車仔讓晒車馬炮
事緣謝拉特胃痛
托利斯又有輕傷
而另外好幾件正選亦已經好累
換9個正選
一睇就知賓尼迪斯被迫半放棄聯賽盃
因為聯賽加埋歐聯既擔子真係好重

相反車仔就有誠意得多
雖然泰利同埋杜奧巴因傷倦勤
但其餘人腳基本上出得既都出晒
波歷克仲現身後備席
只有新仔冼佳亞取代祖高爾

利記尋晚咁既人腳
講真唔可能苛求太多
上半場見到哥治,禾路連同埋盧卡斯利華既3角短傳
已經係全場最似栖既幾腳波

車仔因為人腳比利記好
有超過5成半既控球時間
羸左個勢
對住又有新仔賀比斯出場既利記防線
入波只係時間問題
但佢地發揮唔見太突出
未入波前只有卡奴同埋艾辛既兩腳勁射令小弟有印象
連埋艾比路亞後場傳失波益左林伯特
佢地3個機會都過唔到仲未發作既伊坦積

車仔最終可以入四強對愛華頓
哥治既'功勞'都幾大
佢55分鐘把握唔到卡華路既誤傳而帶來既機會
幾分鐘後車仔就被講波佬講中
車仔真係要靠符碌波先可以打破悶局
林伯特既射門省中加歷查再笠死伊坦積

利記即刻以摩洛哥年青射手艾爾沙
入替明顯冇態,下半場近乎隱形既沙比艾朗素
唸住搏一搏
不過佢地好快就被一盆冷水淋醒

哥治好似驚班隊友踢得未夠辛苦
從後發茅雙腳夾低米基爾
球証唔使望米基爾點樣當自己拍緊AV咁樣七情上面
就已經趕左哥治出場

除左兩個向來小弟都覺得唔多正常既講波佬之外
小弟真係唸唔到有邊個會覺得球証罰得太嚴
賓尼迪斯都幫理不幫親
話佢個下犯規係可以避免
(雖然都有例牌發少少牢騷......)

因為哥治令人難忘既5分鐘
利記就由幾乎先開記錄
搞到輸波兼踢少個
這5分鐘隨時係佢於利記既最後時光
因為有消息指面臨3場停賽既佢將被出售套現

之後場波其實已經分左勝負
補時階段,後備入替米基爾既波歷克頭槌二傳跣後
舒夫真高狂抽近柱都有得入
只係錦上添花
同埋再次提醒賓尼迪斯
伊坦積除左出迎畏高以外仲有另一弱點......唔識封近柱
佢守左3場聯賽盃賽事就兩次被人射近枉收死
難為佢初來報到既時候仲好意思話要瞄準拉爾拿個正選位

2007-12-19

1)
伯明翰主席高特表示
楊先生若果(其實幾乎肯定)未能於24/12既限期前完成全面收購
佢願意5折買返楊先生既29.9%股份

小弟忽然發覺高特可能係大老千
而家迫到楊先生進退失據
人地還利息還死,賤賣股份又蝕大本
人地當初1500萬鎊買貨
5個月一來一回高特就想賺750萬鎊(1500萬鎊*50%)
(雖然5折似係等人還價,最終應該賺唔到咁多)

小弟不禁懷疑佢究竟係咪
早就睇死楊先生其實只係充大頭鬼
如果唔係當時有人出價其實比楊先生更高
佢點解要同錢作對
段估佢唔會咁天真以為靠楊先生
伯明翰就可以打入大陸市場掛

2)
拜仁既一對閘都成為曼聯既增兵對象
沙洛早前已要求轉會
目的地多數係祖雲達斯或者曼聯
而拿姆因為仲未肯續約
令佢被傳可能轉會曼聯或者巴塞隆拿

3)
紐卡素已經就 Ben Tozer 既轉會
同史雲頓達成協議
總值100萬鎊
Big Sam 表示會先將佢外借以吸取經驗

另一方面, Big Sam 亦表示 Jon Walters
唔係紐記既增兵對象
但有消息指韋根想開價200萬鎊買佢

4)
加歷查表明無意重返國家隊

5)
卡斯迪路落實以借用身份加盟曼城
但為期只係1年
而唔係最初消息指既年半

6)
哈利列納否認蒙達利轉投利物浦既傳聞

7)
阿仙奴既球探被發現現身於
幾日前卡坦尼亞對烏甸尼斯既比賽
消息指兵工廠既目標係後衛華加斯同埋射手馬天尼斯
前者於幾個月前曾經係利物浦球探既目標
所以一度被傳會於1月轉投利記

8)
保頓否認安歷卡轉投車路士既傳聞

9)
之前講過韋根想簽大衛梅菲
而家有消息指佢地既出價為250萬鎊
另外,西布朗就唔認對佢有興趣

10)
費文尼即將同阿仙奴續約
人工仲加至4萬鎊週薪

11)
曼聯被傳成為最新一支同艾雲洛夫扯上關係既球隊
之前已經有消息指車路士,祖雲達斯同埋國米都想簽佢

12)
波歷克可能今晚復出鬥利物浦

13)
羅馬里奧因藥檢唔合格被罰停賽120日
佢聲稱禁藥成份來自佢醫止脫髮既藥物
睇佢而家0的頭髮少左咁多
小弟覺得佢又唔似講大話

14)
傳聞愛華頓想開價800萬鎊買唐寧
但米堡已經立即作出否認

15)
艾比達同埋簡拿沙利斯因為近期演出不濟
而被朗奴高文提早放聖誕假
隨即有傳賓尼迪斯想帶前者到利物浦再合作

另一方面,華倫西亞被傳有興趣於1月出價買懷斯

16)
尋日曼徹斯特市一間酒店發生風化案
當時成間酒店被曼聯 book 左開P
1名26歲女子涉嫌被性侵犯
1名19歲既男子就被警方帶走以進行問話
暫時未知佢係唔係曼聯既職球員
而曼聯方面到而家都冇評論過件事

17)
由於些路迪唔肯買斷
而只肯借用軒基
令交易告吹

2007-12-18 (2)

1)
利物浦兩個老闆表示賓尼迪斯依然係領隊既最佳人選
但另一方面,尋日講過佢兩個唔肯科水買人
就似乎係堅料

而家傳聞賓尼迪斯於1月
勢將施素高同埋哥治當中最少1人出售
以套現買中堅

2)
卡卡07年既成為世界足球先生
美斯,C7,杜奧巴同埋細哨就排2至5
而瑪達就當選足球小姐

3)
以下係幾段有關英格蘭足總既手尾:

星期日泰利因為被伊布爾惡意侵犯而傷出
驗傷後發現右腳有3處骨折
估計要抖6星期
小弟認為足總應該要對伊布爾抽後算帳
個下攔截實在太肉酸

另一方面,艾殊利高爾因為對兵工廠球迷做侮辱手勢
而勢將被足總落 charge

而利物浦因有球迷涉嫌用哥爾夫球掟朗尼
亦面臨被足總起訴
而利記已查緊單野以搵出搞事者

另外,堅尼因為完場後同球證遭左幾句
好可能被足總落 charge 告佢行為不檢

小弟覺得足總都幾忙
星期六,日加埋咁多場波有手尾

4)
利物浦行政總裁派利表示
新球場既興建計劃可能比早前既稍為降級
但就話依然會有70000個座位

5)
Zalaegerszeg 既匈牙利17歲小將卡達
最近先後到紐卡素同埋保頓試腳
前者想搵佢踢中堅
後者就想搵佢踢左閘
但佢就表明比較想踢中堅

6)
葉士域治24歲射手禾達斯被傳係紐卡素既增兵對象
佢同 Big Sam 曾於低組別球會合作

7)
西班牙傳媒指愛斯賓奴願意出價700萬鎊買杜蘭

8)
布力般流浪高層決定唔撥款比曉士1月買人

9)
皇馬被傳將於1月放走部份球員
其中迪亞拉同埋戴倫特都被指係費倫天拿既增兵對象
轉會費加埋仲高達2200萬鎊

10)
軒基傳聞將以200萬鎊由西維爾轉投些路迪

11)
雖然利物浦被傳冇水於1月買人
但就仍然被傳於季尾會向樸茨茅夫開價1200萬鎊買蒙達利
小弟都好想成事
因為佢絕對係英超現時其中一個最佳球員

12)
馬田拿臣將會同維拉傾續約
小弟覺得如果利記真係莫財
可以考量開賤價買佢或者美爾保

13)
巴黎聖日耳門被傳將各巴塞隆拿開價100萬鎊買艾美臣

14)
富咸證實宋鍾國將會去試腳
小弟認為當中應該涉及商業因素
因為佢地係由韓國品牌贊助

15)
謝拉被傳係保頓既100萬鎊增兵對象

16)
列卡特因對里昂鬧球証而被逐出場
而家被判罰停賽兩場
換言之16強主客兩回合都冇佢份

17)
古莊臣唔排除於1月轉會

18)
迪亞拉因為轉投阿仙奴後唔受重用而要求轉會
有消息指曼城願意開價450萬鎊接貨

19)
阿仙奴小將干路尼成為昆士伯流浪1月既增兵對象

20)
阿當莊臣被傳係熱刺既增兵目標
消息指佢地願意向米堡開價550萬鎊
佢其實有一定潛質
但同唐寧位置重疊令佢唔會有太多既出場機會
暑假既時候利物浦都傳過打佢主意

21)
自由身既柏拉辛迪成為好幾間球會既1月增兵對象
當中包括:森多利亞,里簡納,米堡,韋根,
巴素利,法蘭克福同埋哈化柏林

2007-12-18 (1)

小弟個 blog 想轉型:
方便既唔該比個意見

例如:

有咩轉會消息,賽後感,或者花邊新聞
係想睇或者唔想睇?

轉會消息又會唔會仲係過多?
(雖然已經好忍手......)

係咪真係要再將賽後感既篇幅減少?

又或者有咩 preview 想睇?
例如:英超,歐國盃......

寫埋本地波會唔會有人有興趣?

金球重溫又如何?

或者經典賽事回顧?

另外,如果介紹名將近況又得唔得
例如班尼斯岩岩就走左去左做球探......

戰術或者陣式分析又有冇人岩睇?

2007-12-17 (3)

1)
賓尼迪斯尋日賽後同兩個美國老闆進行會面
雖然有消息指會面氣氛良好兼正面

但亦有傳兩個老闆表明要集中資金用作起新球場
又怕季中買人隨時被人當水魚咁劏
所以1月唔會放水買後衛
更唔會同意季尾1700萬鎊買馬斯查蘭奴既交易

2)
想講多次卡比路既人工
原來佢既稅前人工係由最初既400萬鎊累加至最終既800萬鎊
平均每年600萬鎊
而有消息指如果英格蘭羸到2010年世界盃
佢將會有500萬鎊花紅

另一方面,卡比路表示會游說
一至兩個已退出國家隊既球員復出
一般估計當中包括加歷查同埋史高斯

3)
卡比路既助教班底多數由4個舊拍檔組成
4人既平均年薪合計100萬鎊
但最終既助教人選待定
有消息指皮雅斯,舒利亞或者蘇拿都有機會加入教練團

古烈治就成個八婆咁加把口
提醒卡比路要小心舒利亞
因為佢會自以地位祟高而搞對抗

4)
尋日AC米蘭羸陣容不整既小保加4:2
卡卡成為賽事最佳球員
賽後馬甸尼宣佈將於季尾掛靴

另一方面,一個世界冠軍球會盃
好明顯唔足以保住安察洛堤既飯碗
因為再有報導指摩連奴既下一站就係AC米蘭

5)
車路士雖然同格蘭續約4年
但西班牙傳媒仍指列卡特將於季尾'上車'

6)
列貝利當選法國足球先生
相對於逢大賽幾乎死火既亨利
小弟覺得法國自從冇左施丹
列貝利似乎已經係最可信賴既一個

7)
美斯因傷將缺陣下星期既'西班牙打呲'

8)
米堡被傳想開價500萬鎊買巴路士

9)
華素爾表示選擇留隊
令佢轉投打呲既機會大減

10)
莫耶斯表示愛華頓本季將再以聯賽前4作為目標

11)
雲達沙被傳成為巴塞隆拿季尾既增兵目標
以作為域陀華迪斯既副手

2007-12-17 (2)

2)
阿仙奴對車路士
雖然唔算好好睇
但一定比雙紅會好睇

客隊車路士冇杜奧巴,艾辛同埋卡華路
又有泰利傷出
(伊布爾0個腳咁狼罰紅牌講真都唔過份......)
等如讓人車馬炮

主隊阿仙奴就最終 full team 應戰
連同對利物浦同埋曼聯兩場波
對主要對手既3場波都用 4-5-1 陣式,相同人腳應戰

但相對於前兩場
今次對車路士係佢地踢得冇咁 sharp 既一場
上半場,胡禮菲臘斯同埋舒夫真高先後兩度攻門
都為艾蒙尼亞帶來麻煩
而車路士最大既兩次危機都竟然係原自自己友
阿歷斯幾乎擺烏龍
而施治既罕有失誤
益左倒戈既加拿斯除左以穩定防守外
亦以入波向舊老細報復

下半場接戰
阿仙奴繼續控球在腳等機會
雙方互有攻守
不過都把握唔到
或者應該講艾蒙尼亞打場好波
證明左龍門既重要性
(雖然一次失誤唔會令小弟對施治失信心
佢依然係小弟心目中除左保方以外最好既龍門)

今場阿仙奴羸波既最大意義
唔係羸左車路士
而係止左個跌勢
一季聯賽既最大關鍵係邊隊可以將低潮期縮到最短
面對今次既低潮
兵工廠(雲加)今次係成功既

車路士方面
問題同利物浦相若
佢地先後作客其餘3強
竟然只曾於作客利記搶到1分
仲要係靠球證既誤判
咁樣既表現想羸聯賽似乎真係好窄

3)
富咸對紐卡素
後者靠阿倫史勿夫補時搏到12碼而羸波
講真計晒整場表現
和波似乎比較合理

但講返轉頭
富咸今季既表現幾令人R頭
印象中佢地只有3次於上半場落後
但好多時到下半場就慢慢走樣
有時仲要係領先緊都會出事
例如對阿仙奴,新特蘭,布力般流浪......
今次又再衰收尾
由羸變和,同埋由和變輸
條數山大斬埋有柴
山齊士真係要唸下計
吾則下季英冠再見

紐記方面
同上場對伯明翰一樣
講表現羸波都冇說服力
但連績兩場臨尾入波
有0的人叫尾運
(office 有條好唔識波既肥仔仲話運氣係實力既一部份)

但小弟覺得某程度係睇到紐記球員既集中力同埋鬥心
唔係因為佢地連績咁樣羸兩場先讚佢地
只要唸下上季臨尾兩個幾月既皇馬
點樣成日臨尾入波
最終後上羸聯賽就會明小弟講咩

2007-12-17 (1)

3場波想講,先講利記......

利記尋日主場對曼聯全失3分
保唔住主場不敗走勢之餘
亦近乎斷送左球隊今季既超聯冠軍希望

因為首循環主場對其餘3隊既 Big 4 同埋熱刺
竟然只得3和1負既劣績
次循環對佢地全部都要作客
加埋歐聯同埋足總盃既負擔
再追返雖然踢少1場,但落後阿仙奴10分以及曼聯9分既差距
講真真係好難......

講返場波
雖然班拿約同埋基維爾既體力都唔多好
但利記既出場陣容同幾日前作客馬賽完全一樣
加上一開波就壓前去搶
睇得出賓尼迪斯係想趁佢地有氣有力前盡快爭取領先優勢

面對上半場踢得唔好既對手
佢地既表現其實亦只係一般
壓住對手來踢
但兩邊拉唔開對手防線
(其實近乎全場都係,右邊仲特別差)
雲達沙同維迪兩度有誤會
利記球員咁都把握唔到機會入波
以佢地一條並唔係特別好既防線
就只有等住失波
球波咁樣輸好多人都要負責

到下半場
搏左初段都追唔返
其實已經可以打定輸數
因為4日內咁樣搏兩場真係唔多可能
而對手下半場既緊迫踢法
令體力驟降既利記球員連控球在腳都難
而泰維斯禁區犯手球又死好命逃過球證法眼
巴布既遠射同埋謝拉特既罰球已經係最有威脅既攻門

即使朗尼79分鐘0個腳咁射得咁大意
聽到曼聯迷老豆話利記大難不死
小弟都即刻話佢地應該唔會有後福
因為真係睇唔到佢地有本錢追平

臨尾想講多兩句賓尼迪斯既調動
今場波其實好幾個球員都唔在狀態
最明顯就係班拿約同埋古治
下半場講波佬話利記球員集中於左路同埋中間踢波
其中一個原因就係班拿約其實全場波都有心無力
小弟覺得佢比基維爾更加應該被換走
而幾次後備上陣都ok既盧卡斯利華冇得落場亦係幾令小弟費解

而以往對曼聯有唔錯表現既哥治
亦太遲被派落場
唔係馬後炮
小弟真係覺得佢係尋日前線既首選
佢有能力令曼聯防線更加手忙腳亂

面對咁既聯賽劣勢
而家可以做既就只有盡快改善於主場經常失準確(失分)既弱點
再慢慢等機會
因為機會只會留比唔肯放棄同埋做足本份既人

2007-12-15

1)
卡比路落實簽約4年半
佢準備帶之前合作過既助教團到英國
亦有消息指英格蘭足總會安排 U-21 教練皮雅斯幫手
一來協助卡比路同球員溝通
二來令皮雅斯有機會學野

2)
拜仁之前雖然唔肯認
最終尋日證實聖保羅18歲中堅拜爾奴
轉會費冇透露
但消息指最少880萬鎊

3)
曼城將借用墨西哥射手卡斯迪路年半
佢轉會薩克達後冇正選踢而要求離隊

4)
班士利龍門 H.梅拿同埋中場白賴仁侯活
被指成為利物浦,愛華頓,曼聯,格流同埋些路迪既增兵目標

5)
費格遜被判行為不檢
將面臨停賽兩場
包括對韋斯咸同埋伯明翰兩場聯賽

6)
Big Sam 表示因為加利仔仲要抖
唔信曼聯會賤賣唔肯續約既布朗
令佢仲要搵其他目標

7)
韋根最想買左後衛
艾文成為佢地既最新目標
傳聞佢地準備向雷恩開價150萬鎊

8)
史高斯將於1月尾復出

9)
格流既上季最佳球員29歲中場希丹尼
被傳成為米堡同埋雷丁既增兵對象

2007-12-14 (2)

1)
先講幾段紐卡素既轉會消息:

紐記睇中史雲頓既17歲後衛 Ben Tozer
佢而家跟愛華憤試腳

另一方面,杜蘭既經理人表示
這個土耳其新星唔會於歐洲國家盃決賽週前離隊

而傳聞米堡同埋諾域治都想於1月買艾美奧比
但由於馬田斯要離隊踢非洲國家盃
有消息指 Big Sam 未必肯賣走佢

另外,他信表示曼城唔會買奧雲

2)
沙比艾朗素可列入對曼聯既球員名單
而芬倫既情況就未肯定
艾加就因冇態而一定繼續缺陣

3)
楊家誠表示冇能力於下星期五前成功籌集3000萬鎊
意味佢全面收購伯明翰既計劃失敗

4)
莫斯科中央陸軍既巴西中場D.卡華路
最快可於幾日內落實於1月轉投國米

5)
新特蘭被傳出價400萬鎊買羅拔斯
但布力般流浪就表示唔想放人

6)
勞基摩亞因為想有更多出場機會而勢必離隊
消息指保頓將向維拉出價200萬鎊

7)
盧普利可能於1月以借用身份加盟拿玻里至季尾

8)
阿米朗由於被雲尼亞里長期棄用
極可能於1月以600萬鎊既轉會費
由祖雲達斯加盟莫斯科中央陸軍

9)
鄧尼即將同曼城續約

2007-12-14 (1)

1)
卡比路獲英格蘭足總高層通過成為新教練
而家只餘下討論合約既細節就可以落實

之前既版本話佢既年薪只有400萬鎊
好多人都會唸點解咁平
竟然只係艾歷臣當年既8折
原來400萬鎊係指除稅後既人工
除稅前既人工其實高達650萬鎊
比艾歷臣當年既人工高3成

2)
波比笠臣接受訪問時表示
紐卡素既難題其實原於佢被開除
佢言語間亦埋怨當年被炒時
成績並唔太差
連輸兩場都未試過就被炒
暗示佢係因其他原因而被迫離開

其實佢05年既自傳 'Farewell but not Goodbye'
已經炮轟過薜伯特同埋賀爾對佢削權
波比笠臣當年被炒根本就係因為人事問題

另外,佢就嘉許紐記近兩場聯賽既表現

3)
由於迪卡仲未肯續約
布加勒斯特星隊為免可踢前鋒同埋進攻中場既佢
於季尾約滿自由身轉會
傳聞佢地願意割價350萬鎊出售
消息指米堡係暫時最有機會接貨既球會
佢地仲已經同意價錢

但維拉,士砵亭,賓菲加,里爾同埋奧林比亞高斯
一直都對佢虎視眈眈
令交易仍傳變數

4)
格蘭得到車路士續約4年

5)
索菲亞利夫斯基既新星 Nikolay Dimitrov
將到阿仙奴試腳
現年20歲既佢可踢左翼或者前鋒

另一方面,有消息指雲加想從AC米蘭引入同鄉哥古夫
傳聞轉會費高達1500萬鎊

6)
盧森保高表示唔會同山度士續約
仲話準備同一間英格蘭球會傾緊合作

7)
烏化奴斯既經理人透露
這名捷克中堅有8成機會於季尾以自由身轉投西維爾

8)
馬賽主席迪奧夫表示
施斯可以於1月離隊

9)
巴塞隆拿成為最新一支同莫天拿扯上關係既球會
之前已經傳過佢最快於1月轉戰英超
加盟阿仙奴或者車路士

10)
克魯既防中加利羅拔斯成為韋根既200萬鎊增兵目標
這個20歲既年青球員體能唔錯
仲擅長處理死球同埋12碼
值得留意

2007-12-13

1)
英國傳媒指卡比路最快聽日接手

另一方面,新教練將會決定隊長人選
消息指泰利可能會因於場外既惡行而冇得再做隊長
而成為近18年來首個連續7場為利記入波球員既謝拉特
就被認為係新隊長既大熱

2)
加拉塔沙雷既20歲翼鋒杜蘭
被傳係紐卡素同埋米堡既增兵目標

佢係歐洲其中一個最令人期待既新星
擅踢左翼,亦可客串右中場
右路扣大位斬中或者遠射係佢既招牌動作
初出道已經有人話佢踢波有少少赫傑既影子
控球技巧好,扭波叻,廣闊既傳球視野同埋傳送落點準確都係佢既優點
不過身體對抗性就有待改善

兩間東北部球會要簽佢其實都有相當難度
因為利物浦,熱刺同埋兩支米蘭球會一直都對佢幾有興趣

3)
施素高表示對於作客對馬賽冇機會出場
令佢定居於法國既屋企人睇唔到佢比賽
感到好憤怒
仲話可能於1月要求離隊

同一時間傳出愛華頓有興趣接貨
不過小弟認為吹水居多
一來係死敵
二來瑞士防中禾高獲貝迪斯批准自由轉會
多數於1月轉投拖肥糖

4)
謝拉特成為近兩年第8個遭入屋爆竊既利物浦市球員

印象中只有華亞係愛華頓既人
小弟覺得可能利記有內鬼

5)
Big Sam 表示唔會於1月從哥本哈根買入 Brede Hangeland

6)
法比加斯同埋希比未必可以趕及對車路士
但雲佩斯同埋費文尼就應該可以候命

7)
艾迪巴約,杜奧巴,艾辛,迪亞拉同埋簡奴迪
成為今年非洲足球先生既最後5強

8)
艾歷臣被傳得到5000萬鎊撥款去擴軍
曼城被指將以破球會紀錄既2100萬鎊
買薩拉戈薩既阿根廷射手迪亞高米列圖

9)
伯明翰被傳將向里昂開價500萬鎊
買同教練佩連不和既巴路士

10)
消息指布魯士將獲老闆科水2000萬鎊增兵以護級
佢地被指睇中梅西亞射手恩尼高
準備開價1000萬鎊買人

11)
侯城否認想搵奧高查過檔

12)
消息指洛查碧克考慮離隊
重投士砵亭
仲話願意減一半人工

13)
森林射手泰臣被傳成為保頓既300萬鎊增兵對象

14)
史堤芬侯活被指將由打呲轉投雷丁
轉會費約200萬鎊

15)
列文表示決定於本季餘下時間留隊

16)
董方卓尋晚有機會落場對羅馬
成為繼孫祥後
歷來第2個踢歐聯既中國球員

17)
蘇金保考慮退出國家隊

2007-12-12 (2)

1)
雲加同埋費格遜都表態
撐卡比路接手英格蘭

2)
Big Sam 指艾美臣既狀態於短期內難於提昇
所以肯定唔係紐卡素1月既增兵對象
但就話想於季尾帶佢過紐記

3)
有傳文仙尼因為同總監白蘭卡以及醫療隊不和
而勢於季尾離隊
而摩連奴將會接手任教
但國米主席莫拉堤否認有關消息
指出同摩佬冇簽下任何草約

4)
曹宰榛被傳將於1月由清水心跳轉投富咸
轉會費為200萬鎊
佢早前曾經同查爾頓,甚至阿積士扯上關係

5)
新特蘭被指將向車路士開價500萬鎊買薜維爾

6)
迪贊巴到布力般流浪試腳

7)
克魯後衛丹尼禾達斯被指成為新特蘭同埋米堡既增兵對象
24歲既佢擅踢右閘
亦可客串右翼

8)
傑斯獲頒OBE

9)
FIFA將於星期六開會
研究而家於世冠球會杯測試中既晶片足球

10)
傳聞史迪基倫保成為熱刺新龍門既目標
轉會費約500萬鎊

11)
西布朗左閘保羅羅賓遜被傳
成為格流,保頓同埋韋根1月既增兵對象

2007-12-12 (1)

絕境逢生......
利物浦克服頭3場分組賽只得1分既劣勢
對同馬賽有關既宿命論亦一於少理
於最後一輪分組賽踢出分組賽既代表作
作客輕取馬賽4:0
完成連羸餘下最後3場分組賽既 'Mission Impossible'

尋晚利記羸波就一定可以出線
和波就要靠比錫達斯爆冷作客羸波圖
咁就梗係靠自己實際
為左球隊同埋賓尼迪斯既前途
當決賽咁踢既利記一開波就反客為主

3分鐘,謝拉特帶波後上攻門
搏到邦納特犯規
球證唔知點解唔罰佢紅牌
不過都仲記得要判12碼
謝拉特操刀雖然被文當達擋出
但佢快步執雞就令紅軍好快打開記錄
佢既第23個歐洲賽入球亦趕過左奧雲既紀錄

只得1球優勢
冇可能咁快就唸住死守至完場
繼續施壓既利記令人驚喜好快又入多球
11分鐘,托利斯接應基維爾既傳送
於禁區邊開始發難
連過兩個後衛再射遠柱入網
小弟覺得場波其實已經差唔多分左勝負

而咁短時間就兩球在手既利記
可以稍為縮後等機會踢反擊
解釋左點解佢地全場既控球時間大約只得1/3

和波就足以出線既馬賽明顯進退失據
而5人中場線今次再發揮唔到威力
佢地上次作客羸利記可以倚靠擅長既反擊踢法
今次要焗攻就顯得無能為力
因為拿施尼因傷只係後備
就算佢之後負傷上陣都因為冇態而威脅有限
結果半場餘下時間佢地都冇能力組織有威脅既攻門
(其實全場波都近乎係!)
反而謝拉特,托利斯同埋基維爾都先後有機會增添記錄
只可惜全部都把握唔到

下半場一開波
馬賽索性換入施斯改踢 4-4-2
不過佢地返平既一絲希望好快就幻滅
48分鐘,有主力基維傷出既馬賽防線被古積特再插多刀
落後3球亦等如宣佈佢地死刑
試問全世界有幾多隊波好似利記咁堅韌

跟住場波其實已經係垃圾時間
令人最有印象既已經係施斯既頭槌攻門
提醒領隊吉列斯其實佢並唔係咁廢

到補時階段
後備入替托利斯既巴布繼續佢只識踢風流波既特性
接應長傳既佢
推右走左過埋文當達再射空門
在馬賽既傷口上灑鹽

次名出線既利記同埋波圖一齊入16強
代表佢地將要面對一隊唔係來自英格蘭既小組首名

而小弟覺得人腳有限令馬賽唔可以長時間 keep 住好表現
而季初聯賽失利既佢地
最近仲要場場搏命去搶分護級
講表現真係唔 fresh
頭3場已經有7分在手既馬賽
亦因為虎頭蛇尾
結果只得降格踢足協盃

不過都唔影響小弟對佢地領隊吉列斯既唔錯印象
因為睇得出馬賽係有能力踢到隊型
而效率同埋用波都唔錯
踢唔到主攻足球只係因為拿斯尼冇態
只要吉列斯有多0的時間
馬賽下季係有力上返法甲前列
甚至成為僅次於里昂既強隊

2007-12-11

1)
傳聞如果利物浦對馬賽同埋曼聯出左差池
賓尼迪斯將會被奇連士文取代
消息指決定飛到法國同球隊會合既兩位美國老闆
好欣賞奇哥份人咁有性格
同埋比賓仔好得多既英語能力

2)
摩連奴同英格蘭足總高層會面後
決定唔會接手
而卡比路就成為頂頭大熱

另一方面,古比士利亦拒絕出任助教

3)
由於球證承認佢唔准12碼重射既技術錯誤
足總決定和富大埔對東方既聯賽需要重賽
但日期同埋地點待定

有球證肯出來認錯係好事
但成件事足總既處理手法好有問題

首先佢地雖然跟足當年烏茲別克對巴林既案例而判重賽
但當年既判決根本離譜
而全世界既球證成日犯錯
香港既就更加大鑊啦
咁可以重賽得幾多次

而尋晚既決定原來已經係終極
東方冇機會上訴
大陸既所謂公平審判都有上訴機制啦
足總真係好有霸權主義既味道

而仲只定下12月18號同埋25號兩個賽期
要東方二選一踢重賽
偏偏東方23號就要踢銀牌決賽
咁擺明玩野啦

4)
紐卡素同巴巴耶路達成解約協議

5)
南非22歲快馬戴維斯將到紐卡素試腳
過去1星期佢就先到布力般流浪試腳
佢擅踢右中場
亦可串演右閘
佢而家效力瑞典球會 Djurgarden
之前就踢過慕尼克1860

另一方面,布朗亦被傳係紐記既增兵目標

但同日又有消息指 Big Sam 得唔到球會財政上既支持
不過小弟就覺得可信性唔大

7)
梅度同皇馬以及樸茨茅夫扯上關係
不過後者既領隊哈利列納已經作出否認

8)
雖然球隊連續3場對弱旅失分
但維拉利爾仍決定同教練柏歷堅奴續約至2010年
令佢季尾轉投燕豪芬既傳聞不攻自破

9)
國米再被傳準備向摩納哥出價800萬鎊買文尼斯

10)
熱刺左閘巴里要養傷3個月

11)
西維爾門將柏立因手骨折斷而要養傷3個月
令迪辛迪斯得到放人返意甲既機會大減

另一方面,由於朗奴高文對簡尼沙利斯既表現唔多放心
令希迪布蘭獲球隊外借到禾夫斯堡既機會大減

12)
迪亞奧以自由身加盟史篤城
簽約至2009年

13)
韋根打算於1月為後防增兵
目標有喜伯年23歲左閘大衛梅菲
同埋曼聯20歲中堅梳格斯

14)
雷丁準備出價300萬鎊買法國中堅 Sebastien Puygrenier

15)
錫菲聯想簽奧高查以增強中場實力

16)
格流既法國射手 Daniel Cousin 最近同米堡以及保頓扯上關係
佢表示想於下季轉戰英超

2007-12-10 (3)

1)
消息指摩連奴決定唔接手英格蘭
事情有兩個版本

一係為左證明葡萄牙足球好過英格蘭
所以費事教好英格蘭
而佢又驚教英格蘭會得罪同胞

二係有一間歐洲大球會將於季尾換師
而佢將會接手
小弟估這間大球會應該不出AC米蘭或者巴塞隆拿

小弟覺得兩個版本都有一定可信性
而摩佬可能同上年既史高拉利一樣
之前只係借英格蘭足總自抬身價

2)
BBC 搞既年度體壇頒獎典禮尋日舉行
波比笠臣獲頒終身成就獎

3)
傳聞韋根將向米堡開價200萬鎊
買佢地既防中保定
但小弟唔多信修夫基會將球隊隊長出售

4)
消息指布力般流浪將向保頓開價1200萬鎊買安歷卡

5)
基拔圖施華又再被傳會於1月離開阿仙奴
今次既版本係以500萬鎊既轉會費轉投國米

6)
有消息指森莫拉被韋斯咸掛牌500萬鎊出售
目的地可能係富咸或者雷丁
但古比士利已經否認有關傳聞

2007-12-10 (2)

2007-11-24
米堡主場對維拉大敗0:3
仲要係已經輸得算少
點解咁短時間內佢地既表現就各走極端?

1)
維拉52年來首次於主場不敵樸茨茅夫
有人賴每月既最佳獎項唔老黎
向來都唔信邪既小弟肯定唔接受咁既解釋
但究竟佢地衰咩?

首先,維拉踢反擊真係好醒
但由上季到而家
奧尼爾都未能改善維拉唔擅長搶攻既弱點
之前用冇咩速度既柏度夫分波
就驚影響進攻速度
但而家冇左因傷倦勤既佢
隊波明顯冇人識分波
而天雨路滑亦影響左艾邦拉賀同埋艾殊利楊格既發揮
令維拉當日用波既能力大減

而且,佢地埋打0個腳其實只係一般
奧尼爾都話佢地要為失機頻頻而付出代價
全隊冇一個有把握把握既殺手
後衛助攻就更難要求太多

此外,李奧曲卡轉型為全能中場既進展雖然係唔錯
但佢當日面對蒙達利就真係被徹底比下去
輸第3球佢仲要負幾大責任
不過講返轉頭,蒙達利真係超勁
特別係後上進攻既能力
如果可以再改善攔截技巧同埋表現既穩定性
佢應該有機會轉到更大既球會

另外,唔好彩於今場波都真係一個解釋
開波初段就輸球烏龍波
但對方守衛蘇金保既半烏龍
就有守到上左身既占士幫佢補鑊
而艾邦拉賀又曾經頂中楣

講返轉頭,樸茨茅夫而家排第5
但小弟唔會覺得佢地既歐洲賽資格十拿九穩
因為佢地係全英超最受非洲國家盃影響既球隊
而卡蘭積卡亦未踢出本身既高水平
全季而言佢地既成績應該好唔過曼城
就算對住維拉同埋紐卡素亦只可以睇高半線

2)
阿仙奴繼作客紐卡素後再失分絕對唔令小弟意外
但輸波,仲要堪稱佢地本季最差既表現就令小弟幾意外
米堡就相反踢出本季既代表作
佢地起碼有8成時間於前場就開始施壓
令阿仙奴班友好難用波

其實上半場米堡開記錄
都係靠高路托尼魯莽犯錯輸12碼
之後其餘時間都冇好有威脅既攻門
但迫到中前場只係半力出擊既阿仙奴死晒火
對之前4和7負既米堡而言
已經好抵讚

到下半場雙方既表現差距更大
端基同埋保定既埋門都先後柱邊出界
不過大難不死既阿仙奴都冇後福
因為冇左法比加斯同埋希比
佢地連基本用波都有問題
輸多球只係時間既問題
結果羸到兩球後既米堡更可以專心死守
路斯基(其實係全隊阿仙奴)於補時階段既第一腳好波只可以用作破蛋

米堡成功反底
加上艾卡復出
護級前途係樂觀既
最驚佢地轉過頭又冇鬥心
佢地之前成日一落後就成隊散晒
睇到人頭擰擰

而佢地用人方面仲有野可以唸下
侯夫近兩場算幾好
用佢取代韋達似乎更好
韋達今場冇爆鑊
好大程度係因為阿仙奴既前鋒得唔到供應

阿仙奴方面
原來黑色11月順延至12月
佢地如果唔改善表現
而中前場4個主力又趕唔到復出
下場主場鬥車路士都幾危

2007-12-10 (1)

有幾場波想講:

1)
第一場通常都係利物浦
聯賽不敗之身終於被打破
可能有歐聯既後顧之憂
踢得有點患得患失
而對手雷丁於主場又真係特別醒
今場仲好似特別勤力

但有睇場波既都知佢地輸得幾唔抵
和波似乎比較合理
因為有兩腳靚波都省中門框
而輸頭兩球波都幾唔抵

輸第一球既12碼
其實事發地點係禁區外
但電光火石之間又好難怪球證
要怪既反而係加歷查太魯莽

輸第二球拉爾拿既視線略為受阻
輸左都唔可以怪佢

場波既轉捩點係謝拉特既遠射中楣唔入
未能追和後兩分鐘就輸到1:3
足球比賽有時一來一回真係爭好遠

之後連賓尼迪斯都半放棄場波
托利斯,謝拉特同埋加歷查3大主力先後被換走
其中用巴布入替謝拉特前
其實賓尼迪斯想換走既係賀比斯
不過與其改踢 3-4-3 或者 3-5-2 狂攻搏個和局
倒不如留力下場作客馬賽

講返球員既表現
好多都在水準以下
但最好既一定永遠唔欺場既謝拉特
佢追成1:1球波好有功架
一控一推一射做得都好流暢
哥治同埋基維爾都 ok
其中小弟認為後者比巴布更適合對馬賽踢正選

最後想講下賀比斯
佢第一次踢正選
表現唔好唔怪得佢
佢可能真係加歷查第二
無論踢法,領導能力同埋身形都似
不過最衰既係連轉身同埋速度都似
如果賓師1月仲未被人炒
而美國老闆又肯科水
佢老人家真係要買個好中堅以備不時之需

2)
紐記都幾好野
一場波可以令人有希望之後就勁失望
想讚 Big Sam 幾句跟住又想狂插佢老人家兩刀

先講陣容
今場 Big Sam 既排陣其實可以比較進取
不過用回幾日前對阿仙奴有唔錯效果既原陣亦可理解

輸波之後用維度卡入替畢特
Big Sam 夠果斷,抵讚
佢地上半場由中段起既20分鐘
踢得幾好
但要憑球證既誤判先追和1:1就令人感覺上有瑕疵
馬田斯被侵犯時已經冇晒進攻機會
如果小弟做球證就真係唔會吹罰
追平後占士米拿既遠射中楣真係可惜
小弟認為佢既傳中落點可以好0的
其實夠晒班入國家隊
結果有幸有不幸之下佢地同對手半場只係平手

正當所有人期待紐記下半場踢得仲好之際
佢地反而被伯明翰壓住踢左起碼15分鐘
半場休息時
領隊通常趁機會調節隊波
今次就唔多明 Big Sam 搞咩
但另一方面就睇到麥利殊既功力

半場調節做得唔好
臨場再變都補到鑊
但佢老人家今場目標要羸波
亦知道對手實力唔及阿仙奴
面對對手既5人中場
點解唔早0的用安利
雖然安利落場後都唔係踢得好
但作為領隊佢老人家最少要做好本份掛
如果唔係比爾補時入波
肯定又再有佢老人家被少既傳聞

最後想講幾句紐記既防線
有時唔怪得成日被人傳佢地會於1月買後衛
面對對手單調既跑狗戰術
佢地既防線都竟然會手忙腳亂
特別係羅辛奴
輸第一球佢真係孭晒鑊

P.S.:
To: 舒利亞
小弟暑假講過羅辛奴唔係一線後衛
你而家知冇點你啦
哥安真係好貨色
不過紐記多數爭唔羸曼聯同埋曼城

2007-12-9

1)
雲加向英格蘭足總推薦英藉領隊
例如哈利列納同埋古比士利
但消息指摩連奴可能於幾日內落實接手英格蘭

2)
備受曼聯同埋曼城注意既黑山17歲天才射手祖雲歷
表態最想加盟既其實係皇馬
令佢下季轉戰英超既機會大減

3)
幾日前講過祖雲達斯想借用熱刺既卡保爾
而家連馬賽,摩納哥同埋歐塞爾亦被傳想借用佢

4)
柏天尼表現希望將歐國盃決賽周既參賽球隊
由16隊增加至24隊

5)
尋日講過布朗同曼聯仲未達成續約協議
最新消息就係佢連 final offer 都拒絕左
佢可以於1月起直接接受其他球隊斟酌
而曼聯亦有可能將佢賤賣

6)
杜奧巴將於下星期日開刀
格蘭暗示佢可能唔踢非洲國家盃

7)
雷耶斯控告皇馬
仍然拖欠佢大約8個月糧同埋羸波獎金

8)
國米由於中場有太多傷兵
意大利傳媒指佢地可能於1月向皇馬開價1500萬鎊買迪亞拉
佢由於不停要求加人工
同埋蘇斯達唔滿意佢既表現
近月一直被傳係皇馬既開刀對象

9)
由於艾歷臣口多多
向祖雲達斯推薦維拉既美爾保
被奧尼爾炮轟

P.S.:
聽日有幾場波想講
包括:利物浦,紐卡素,拜仁,維拉......

2007-12-8

1)
英國傳媒指英格蘭足總已聯絡摩連奴既經理人
而消息更指英格蘭足總定於聖誕前公佈人選
不過佢地就否認準備同摩佬以及卡比路會面

另一方面,摩佬唔想佢接手英格蘭既風吹得咁勁
不惜臨時決定取消返英行程

2)
南韓足總宣布前教練許丁茂
再次出任國家隊教練

另一方面
佢地既前教練魏比克落實執教澳洲

3)
曼城想買阿祖安奴

4)
加利仔由於又有新既傷患
復出日期將再稍為延遲

另一方面,布朗將於季尾同曼聯約滿
但雙方仲未達成續約協議
費格遜聲稱已提出 final offer

5)
柏天尼批評雲格既青訓計劃
話佢唔應該只集中於從海外搵新血

6)
樸茨茅夫教練祖佐敦否認接手蘇格蘭

7)
雖然雲加早前爆料話艾蒙尼亞會被選入西班牙國家隊
但當時人就話佢始終未代表過西班牙
仲可以選擇代表其他國家
當佢有英國護照後
佢唔排除選擇代表英格蘭

8)
辛達路斯被傳係些路迪既500萬鎊增兵目標

2007-12-7

1)
消息指杜奧巴因開刀醫膝傷要抖成個月
加埋之後要幫國家隊踢非洲國家盃
令佢最遲可能要到2月先會再為車路士出賽

2)
艾沙維表示
如果紐卡素真係向佢斟酌
佢原則上有興趣加盟
以尋求新挑戰

3)
馬體會被指將於季尾開價1500萬鎊買雲達華治

4)
賓尼迪斯堅稱利物浦會買斷馬斯查蘭奴

5)
可能因為感同身受
Big Sam 開聲撐修夫基係最岩帶領米堡既人選

6)
摩連奴被指將拒絕執教英格蘭國家隊
因為佢寧願等列卡特最終被炒後接手巴塞隆拿

但另一方面,尹巴士頓就被傳已經拒絕巴塞隆拿既斟酌
傳聞下季佢最大機會重返阿積士執教

7)
由於未能帶領塞爾維亞打入決賽週
教練基文迪被當地足總解約

8)
傳聞希迪布蘭將以借用身份加盟禾夫斯堡

9)
保桑被傳將轉投史特加
轉會費約300萬鎊

10)
意大利傳媒指卡卡既新約將附加特別條款
如果AC米蘭唔可以參加歐聯
佢可以要求以合理既轉會費離隊
但報導就冇指出合理轉會費既定義

11)
舒華沙將同米堡傾續約

12)
消息指賓特拿不滿出場機會少而考慮離開阿仙奴
熱刺據報有興趣出價1200萬鎊

13)
戴倫特為左更多既出場機會
被指將於1月轉會車路士
轉會費約800萬鎊

14)
新特蘭被指開價400萬鎊買馬菲泰萊
而套現後既樸茨茅夫將向馬略卡開價600萬鎊
買佢地既新晉西班牙國腳射手古爾沙

15)
AC米蘭被指將於季尾向阿積士開價2000萬鎊買亨特拉爾

2007-12-6 (2)

1)
柏天尼澄清
利物浦狂數比錫達斯8:0既賽事
唔涉及假波

2)
由於波蘭教練布克拿表示
只要杜迪克於球會有一定既出場機會
佢將會再被選入國家隊參加歐洲國家盃決賽週
令佢考慮於1月離開皇馬

3)
意大利傳媒指利物浦同埋紐卡素
都想搵卡比路取代賓尼迪斯
但利記行政總裁佩利已率先澄清冇咁既事

4)
尋日講過南韓足總既新教練人選
會於侯利亞同埋麥卡菲二選一
但兩人都表示冇意思接手

5)
曼聯被傳將於1月向雷丁開價500萬鎊買索尼

6)
歐洲足協研究重新設立站立看台既可行性

7)
新特蘭既中場愛華士因斷腳將要抖6個月

8)
AC米蘭被指將出價600萬鎊買盧卡利尼

9)
伯明翰想向阿仙奴續借佐羅

10)
馬路達批評車路士後
隨即有消息指皇馬準備開價1300萬鎊買佢

11)
熱刺否認會將卡保爾外借到祖雲達斯

12)
雖然有消息指樸茨茅夫會於1月向史特加開價400萬鎊買美拉
但當時人聲稱從未同任何英格蘭球會有接觸

13)
韋根否認會各奧林比亞高斯買前紐卡素後衛杜米

14)
西班牙傳媒指文迪達將於季尾退休

15)
英國傳媒爆料
馬斯查蘭奴既顧問上星期
曾經同曼城班主他信既代表會面
隨即有消息指佢會於季尾加盟曼城

2007-12-6 (1)

1)
紐卡素尋晚成功止血
於主場同阿仙奴踢成1:1
只睇比數既會話紐記迫和兵工廠
但有睇場波既都會同意阿仙奴今場受壓既時間其實比紐記更多

尋晚既賽果其實有跡可尋
紐記上場雖然對布力般流浪輸1:3
但表現明顯有改善
加上賽前已知兵工廠肯定冇左法比加斯同埋希比
(臨場原來連費文尼都冇埋)
而上場對維拉雖羸波
但表現唔算太好
失分危機其實已經隱現

講返出場陣容
紐記方面
陣式係近幾場既 4-4-2 陣式
似乎 Big Sam 已明白這個階段
唔可以夾硬要球員跟佢既 4-3-3 陣式

要注意既係針對阿仙奴組織力較強
用上謝列美,巴頓同埋畢特3個防中
而 Big Sam 用前者踢右中場
明顯針對對方既左路攻勢
要知道特別係冇左法比加斯同埋希比
路斯基理所當然係阿仙奴既進攻起點
結果,今場路斯基既表現只係好一般
而阿仙奴一向既流暢傳送亦唔多見
另一方面,謝列美亦可以於比爾上前助攻既時候回防補位
小弟覺得 Big Sam 這個安排好正

而上場表現失色既畢特
唔計臨完場前既回傳失誤
今場其實踢得幾好
巴頓雖然冇咁搶鏡
但其實亦做左好多 invisible 既野
佢兩個雖然做既野差唔多
但絕對唔係講波佬講既位置重疊
因為對住基拔圖施華同埋迪亞拉
佢兩個合力之下冇搶輸中場
亦冇給予對手中距離射門既機會
佢兩個基本上做到小弟所強調既中後場聯繫
尋晚如果用安利取代其中一個防中
效果一定冇咁好

Big Sam 既部署加上球員既搏命
解釋左中場唔齊腳既阿仙奴
點解全場只有6次射門

而前線續由阿倫史勿夫踢正選
佢今場既表現比上場好
做到二傳既次數更多
不過依然冇咩埋門機會
所以小弟依然覺得紐記有必要搵多個好中鋒

講返場波
紐記4分鐘就失守
艾迪巴約既一控一射冇野可以挑剔
但於後場誤傳在先既尼索比亞就一定要被人炳
係佢既犯錯令伊保爾有機會做助攻

失波後既紐記其實係踢得幾好
講組織唔夠人地
就針對阿仙奴防守高波既弱點靠死球搵食
入波講真只係遲早既問題

而努力亦最終有回報
一個靚組織加上史堤芬泰萊既擦柱波就追返1:1
講真如果佢有運既話
尋晚甚至可以入夠3球

1:1後雙方都換個射手入來搏槌
阿仙奴換人唔換陣式
但紐記就不惜收起謝列美
羸波決心更明顯

換入維度卡係正確
不過阿倫史勿夫就要客串唔岩踢既右中場
等如廢左佢同埋球隊右路既功力
要換既話小弟寧願換走巴頓
因為辣椒仔既可繼續執行 Big Sam 既戰術安排
亦可後上攻門
小弟就好唔同意 Big Sam 這個調動
亦認為右中場係紐記要考慮增兵既地方

雙方於尾段都有機會置對方於死地
紐記幾次埋門都失之交臂
而佢地既後半場多左空位
有黃牌在身既比爾同埋入波功臣史堤芬泰萊
先後都靠超技術先可以阻截艾迪巴約
(不過球證可能因艾迪巴約之前插水而有唔好印象
兩次都竟然冇吹罰紐記......)

大家都把握唔到機會
最終1:1都算合理
紐記今場雖然羸唔到波
但已踢出今季代表作

2007-12-5 (2)

1)
尹巴士頓宣佈於歐洲國家盃決賽週後離任
小弟覺得佢0個名之後既幾個月
將會不斷同AC米蘭,巴塞隆愇同埋車路士扯上關係

2)
尋晚AC米蘭都幫埋薩克達
主場羸些路迪1:0
但佢地竟然於主場輸比賓菲加1:2
羸完頭兩場分組賽之後
令人意外咁連晒之後4場
搞到而家甚至連歐洲足協盃既席位都被賓菲加攞埋

東歐球隊近年明顯唔入流
就算稍有表現既
例如上季既中央陸軍同埋今季既薩克達
亦只係虎頭蛇尾
睇來短期內都唔會有一隊
好似98-99球季基輔戴拿模咁勁既球隊

3)
國足一代鋼門李富勝病逝
終年54歲
郝海東同埋高峰都表示將為佢搞義賽

4)
和富大埔向足總要求重賽
原因係當日球證既誤判
令佢地冇得重射12碼

5)
華倫西亞被指肯收留艾美臣
但條件係要巴塞隆拿免收轉會費

6)
聖伊天想於1月向西維爾借用迪梅爾到季尾

7)
曼城被傳將於1月向阿仙奴開價600萬鎊買迪亞比

8)
維拉成為最新一支同列達扯上關係既球隊

9)
今季西甲既其中一個最佳球員利亞拿
被傳成為熱刺既增兵目標

10)
今晚阿仙奴將要作客紐卡素
開波前雲加先撐 Big Sam
指紐記應該給予佢更多時間去重建球隊

11)
南韓足總表示國家隊既新教練
將會從侯利亞同埋麥卡菲二選一

12)
白蘭恩射手 Thorstein Helstad 被指成為愛華頓既增兵目標
轉會費大約150萬鎊

2007-12-5 (1)

今次為C組拆局

荷蘭繼分組賽後再遇羅馬尼亞
都幾難搞
而意大利將於分組賽再對法國
將係兩年內既第4次
亦係10年內既第6次
雖然睇佢地互插既新聞幾有娛樂性
但對得多真係有少少悶

如果東尼冇傷
意大利既攻擊力其實唔錯
只要以簡拿華路為首既防線生生性性
小弟覺得佢地既出線機會係比較大

而法國方面
佢地應該慶幸同組冇踢法硬朗既球隊
但亨利踢大賽多數死火
查斯古特又應該冇份入選
靠列貝利同埋幾件靚仔
攻力唔多有保證

而韋拉抖多過踢
後面又仲要靠杜林
加埋個冇料教練杜明尼治
分組賽出局唔奇

而荷蘭既當務之急就係要
唸清楚究竟踢咩陣式
4-4-2 定係 4-3-3 先?
而佢地後防既甩漏都幾多
隨時令佢地付上沉重既代價

講名氣同往績
羅馬尼亞真係輸晒
但其餘3隊一定唔敢睇小佢地
講外圍賽既表現
佢地班後生仔比其餘3隊更穩定
對住荷蘭仲1勝1和
絕對不容忽視
以而家法國同埋荷蘭略為名大於實既水準
佢地再威多次唔會令小弟(同埋其餘3隊)感到太意外

2007-12-4 (2)

1)
陳濤被傳快將加盟熱那亞
如果成事佢會係歷來第二個登陸意甲既中國球員

2)
之前講過上星期既歐聯賽事
Big Sam 親自去晏菲路球場睇般奴艾維斯
而佢旗下既球探為左睇薩克達既球員
而去睇佢地作客些路迪既比賽
而原來佢地仲有人去睇布加勘斯特星隊既比賽
目標就係羅馬尼亞中堅哥安

佢下星期就27歲,高6呎4吋半
佢擅頂,盯人緊,仲助攻力強
代表作就係上個月對荷蘭入波
幫國家隊40年來第一次羸荷蘭

近半年先後有多間大球會打佢主意
多蒙特卡6月原本想簽佢
最終因為慳錢而簽左自由身既羅拔高華
史特加就於10月出價250萬鎊被拒絕
曼聯於同期亦已經搵左人去睇辦
而早於年半前已經打佢主意既曼城
仲被傳願意開價670萬鎊

3)
有消息指 Big Sam 既處境好唔掂
除左對上5場聯賽只得1分外
部份球只對佢既戰術同埋訓練都唔滿意
而球會亦拒絕評論佢會否被炒
更有傳言話如果聽晚對阿仙奴有咩差池
佢將會被炒

4)
雷丁方面將於1月增兵以補充實力
因為佢地既射手列達同埋索尼
好可能因為唔肯續約而被出售套現
前者被傳成為米堡,新特蘭同埋樸茨茅夫既400萬鎊增兵目標
而後者就再被傳於1月轉投韋斯咸或者紐卡素

5)
西班牙傳媒指米堡向巴塞隆拿開價1000萬鎊買細哨
小弟覺得米堡班高層應該唔會咁唔自量掛
佢地最近都係傳緊斟酌一0的平貨射手
例如比亞堤,艾卡達尼,列達甚至係福爾柯克既莫天拿
唔似會突然將買人目標 set 到咁高 level 掛

6)
韋根被傳將於1月向阿仙奴借用阿曼特查奧爾
亦會向布力般流浪開價200萬鎊買羅拔斯

7)
禾夫斯堡被傳於1月簽列文

8)
迪西里表態想教加納
而雲拿保斯就話想教愛爾蘭

9)
歐洲足協澄清克羅地亞唔涉及假波醜聞
所以英格蘭無望後補參賽

10)
被西維爾長期放入雪櫃既軒基可能回流德甲
以300萬鎊既轉會費加盟拜仁

11)
葉士域治將被當地富商伊雲斯收購
佢出價4400萬鎊買佢地87.5%既股份
當中有3200萬鎊將會用來為球會還債

12)
現眼報!
插水成性既C7尋晚正正經經於禁區扭波被尼美侵犯
但球證就話前者插水而罰佢黃牌

費格遜賽後就投訴球證誤判
但小弟就覺得佢其實係為左將來搵著數
因為遲少少C7再插水搵食既時候
球證可能會因為尋晚件事而影響判決

13)
祖記被指將於1月向漢堡開價1000萬鎊買雲達華治

14)
曼聯被指將向拜仁開價200萬鎊買沙洛
以替代傷患纏身既加利仔

15)
英國傳媒指阿仙奴將於季尾
向燕豪芬開價600萬鎊買佢地既中場艾菲利

16)
英國傳媒指摩連奴竟然已經唸左接手英格蘭後既安排
話佢將會落 order 重建訓練中心
同埋組織一隊獨立身份既醫療隊

2007-12-4 (1)

歐國盃抽晒籤後
先為A,B兩組拆局

A組方面
捷克同埋葡萄牙牌面較高
但兩隊近年既表現都有少少走樣
後者既教練史高拉利既地位仲已經冇之前咁穩
面對有主場之利既瑞士
未必出硬線

瑞士本身最大既問題係水準唔穩定
可以羸荷蘭
但又可以輸日本3:4
同埋尼日利亞0:1
如果佢地既表現可以穩定0的
小弟認為佢地絕對有力出線

而同樣海鮮波,不過冇主場之利既土耳其
能夠出線應該全因挪威更加不濟
佢地雖然有力左右大局
但出線機會明顯最低

B組方面
德國明顯抽到上上籤
有如虎入羊群

克羅地亞既教練比歷表示
雖然要同德國同組
但佢依然滿意抽籤結果
咁就唸到其餘0個兩隊係咩貨色

波蘭雖然連續兩次可以出線大型比賽既決賽週
但論實力只係一般
靠穩守突擊
面對機動既德國同埋克羅地亞
都幾難搵食
前途真係唔樂觀

而奧地利雖有主場之利
但係睇返佢地過去年幾既表現
除非佢地表現突然有大躍進
否則將會係繼2000年既比利時之後
另一支分組賽就出局既主辦國球隊

2007-12-3 (2)

1)
法國足球雜誌正式公佈
卡卡當選今季既歐洲足球先生
而2至10名分別係:
C7,美斯,杜奧巴,派路,尹佬,伊巴謙莫域,法比加斯,羅賓奴同埋托迪

2)
歐國盃分組有左抽籤結果：
A組：瑞士,捷克,葡萄牙,土耳其
B組：奧地利,克羅地亞,德國,波蘭
C組：荷蘭,意大利,法國,羅馬尼亞
D組：希臘,瑞典,西班牙,俄羅斯

小弟之後會寫小組既初步分析

3)
歐洲足協將調查多場假波賽事

4)
英格蘭代表隊又有一單性醜聞
今次既主角係艾殊利楊格
佢於球隊作客俄羅斯前一晚
玩 Cyber-sex
'世界新聞報'收到料後親自成功放蛇

5)
舒夫真高被傳將於1月
被賤賣到AC米蘭或者祖雲達斯
價錢只係佢當日轉會費既4折
即係1200萬鎊

6)
本地球證又鬧笑話
話說尋日本地聯賽和富大埔對東方
球證鮑世賢指
前者既袓利亞主射12碼時假動作太多
所以12碼入左都無效
不過竟然冇得重射
反而示意東方開自由球
有冇咁離譜呀?

7)
波比笠臣表示
佢將會提議5個人選接手英格蘭
包括:奧尼爾,軒迪克,摩連奴,卡比路同埋侯利亞

8)
古莊臣被傳將以700萬鎊既價錢轉投里昂

9)
雷丁被傳開價200萬鎊買韋斯咸既森莫拉

10)
由於盧普利於費倫天拿得唔到預期既出場機會
有消息指身價高達500萬鎊既佢可能提出轉會
盛傳既可能目的地包括:
拿玻里,帕爾瑪,拖連奴同埋烏甸尼斯

11)
文仙尼被傳將於季尾被羅馬
以高價1300萬鎊賣到國米或里昂

12)
以借將身份效力卡利亞里既霍治亞
被傳將以1000萬鎊既高價加盟拿玻里

13)
費拉利被傳將於1月被羅馬放棄
消息指佢將被賣到祖雲達斯或者AC米蘭
轉會費約400萬鎊

14)
雖然卡特朗聲稱皇馬於1月唔會增兵
但西班牙傳媒指皇馬仍想於1月向祖雲達斯借用泰亞高

另一方面,迪羅斯被指係皇馬季尾既增兵目標

15)
史特加既葡萄牙中堅美拉
被指成為樸茨茅夫既增兵目標

16)
以色列中場國腳 Tamir Cohen
成為保頓1月既增兵目標

17)
由於戰績差劣
貝迪斯高層決定怒炒教練古柏

2007-12-3 (1)

有幾場英超想講:

1)
第一場就一定係愛隊利物浦對保頓
佢地羸4:0有少少令我意外
因為自從麥臣接手保頓後
佢地踢聯賽1勝3和
重現以往爛仔波既風格
雖然話佢地尋晚冇左路蘭,古費利同埋亨特
小弟估利記都依然要幾出力先有得羸

最終羸4球咁多
小弟覺得原因有幾個

首先,利記未入2:0前幾分鐘
加歷查同佢口中既世界3大門將之一既拉爾拿有誤會
無啦啦撞埋一堆
但安歷卡心急兼冇腰力
咁多時間射空門都唔入
咁都追唔返1:1對保頓本身都打擊幾大
而死唔去利記就趁完半場前入多球

而下半場一開波
球証見哥治跌低
卜3送左球12碼比利記
3:0既記錄就判左保頓死刑
但講返轉頭
上半場有球波哥治於禁區侵犯奇雲戴維斯
犯規動作仲大都唔使輸12碼
球証既執法尺度值得商榷

而最後一個原因就梗係利記冇手軟
佢地今季已經多次羸兩,三球都唔留手
(例子有對圖盧茲,新特蘭,打呲郡,比錫達斯同埋紐卡素既比賽)
令小弟好滿意
佢地自己有幾球波把握唔到
而謝斯高連倫又有水準演出
否則利記將羸得更多

2)
冇左法比加斯同埋希比
阿仙奴既組織差晒
作客羸到波有少少運

3)
新特蘭繼對熱刺同埋富咸後
於主場再次於尾段入波
今次羸既就係打呲郡
3場加埋最終羸兩場和一場
由2分變成7分
任何球隊作客光明球場真係要好小心
紐卡素早前打呲唔使輸真係要還神

4)
熱刺大好形勢輸波
真係多得羅比堅尼唔少
入兩球既佢
亦由英雄變狗熊

另一方面,麥利殊上手就幫伯明翰羸波
一反佢地之前作客倫敦球會既劣績
而咁多球會換完領隊後既戰績都有改善
可能會影響到米堡,紐卡素,甚至雷丁既領導層

2007-12-1 (2)

1)
難以置信......

浦和紅鑽於煞科日作客榜尾既FC橫濱
竟然又輸0:1
將聯賽冠軍勁戲劇性咁'相讓'鹿島鹿角
人地主場炒左清水心跳3:0
以8連勝之勢後上羸得今季J-League

小弟睇死佢地3日前主場對J2排第10既FC愛媛
唔會有好下場
因為佢地唔旨在天皇盃
結果佢地真係留力輸波
但一場關乎聯賽冠軍既比賽
作客榜尾都輸就點都講唔通

佢地今季仲要保持作客不敗
之前16場作客羸12場和4場
偏偏今場作客成季只得3勝4和26負既榜尾隊先出事

而更令人意想不到既係
佢地於最後5場聯賽只得3和2負既劣績
失左足足12分
將之前既10分優勢倒水咁倒
真係世事無絕對

小弟睇左波19年
聯賽被隊手過頭好平常
但印象中好好好離譜咁反勝為敗輸聯賽既例子
除左91-92英甲(之後就升格做英超)既曼聯
就只有今季既浦和紅鑽

小弟覺得佢地出事既原因主要有3:
a)
之前聯賽羸得太多令佢地過份分心亞冠盃
而佢地成功捧盃之後踢返聯賽真係冇晒集中力
而佢地自恃大把優勢在手
亦踢到好似有0的輕敵
b)
上一場主場對鹿島鹿角踢多個都輸波
令原本已經6連勝既對手氣勢仲勁
c)
季尾多人傷兵同埋停賽

2)
歐聯參賽資格將於2009-10年球季有變
當中英格蘭,意大利同埋西班牙既聯賽第3名
可以直接晉身分組賽
但第4名就要參加第二圈外圍賽

而決賽亦會改於星期六踢

3)
2009-10年球季起
圖圖盃將被取消

新賽制會將48隊參賽球隊分為12組
每組4隊踢6場分組賽
頭兩名出線
加埋8隊歐聯分組賽第3名既球隊
(i.e. 12 * 2 + 8 = 32)
總共32隊就會開始踢主客制淘汰賽

4)
祖雲達斯被指想於1月向皇馬借用沙維奧拿

5)
軒迪克可能重掌澳洲隊

而岡田武史就落實重掌日本隊
佢同日本足總簽約至09年尾

6)
雲加爆料艾蒙尼亞將首次被選入西班牙國家隊

7)
法比加斯好可能今晚缺陣對維拉
最壞打算要抖大約10日

2007-12-1 (1)

1)
尋日講過英格蘭足總搵顧問
原來當中仲包括:
雲加,費格遜,波比笠臣,卜比查爾頓,泰萊同埋荷度
不過英格蘭足總就會稍後先問佢地既意見

而消息指今次既新人選一定要係世界級
亦要有一定功績
令可能人選少左好多

2)
世界足球先生已有最後3強
包括卡卡,美斯同埋C7
小弟覺得卡卡既機會最大
而佢成為今年既歐洲足球先生已係公開既秘密

3)
他信表示艾歷臣將於1月
買一個前鋒同埋一至兩個既中場
但就講明要係合理價錢

他信咁講令哥治轉投既傳聞再現
不過賓尼迪斯就否認同球會仲有18個月約既佢會離隊

4)
鶴臣已向芬蘭辭職
意大利傳媒就指佢會重返國米
出任一個類似足球總監既職位
主要幫手買人

5)
傳聞巴塞隆拿將細哨定價4000萬鎊

6)
利物浦否認其中一個班主希斯
有意將持有既股份出售

7)
古莊臣被傳於1月重返車路士

2007-11-30 (2)

1)
多謝讀者'死佬'來電提醒
原來英格蘭代表隊再傳出性醜聞......

英國傳媒爆料
繼作客俄羅斯敗北後
原來對克羅地亞前一晚
有兩個因傷病同埋停賽而唔會落場既球員
帶左 model 同埋學生各一
到球隊下榻既酒店既酒吧搞淫亂 party
參加 party 既球員當中
其中兩個第二日仲正選出場

帶女返酒店既球員其實唔難估
因為又傷又停賽而冇落場......
小弟估應該係里奧費甸南同埋泰利
因為今次係淫亂 party
而唔係賭局
所以小弟估唔關奧雲事

而參加 party 之後踢正選既兩個球員
小弟就估人選應該不出胡禮菲臘斯,林伯特同埋祖高爾同埋布歷治4人
其中前兩個仲係大熱
因為0個 model 原來之前已經去過
胡禮菲臘斯既 birthday party
而林伯特 n 年前同里奧費甸南
一齊去塞浦路斯搵女球迷搞野兼拍帶

不過有份搞野0個兩個球員就無從稽考啦

2)
麥阿里士打承認佢好多個月前
(即係麥利殊接手前)
有同蘇格蘭足總會面傾接手既問題
但佢承認佢想專注其他方面既發展

3)
前英格蘭教練艾歷臣表示
如果摩連奴肯接手英格蘭
將係佢既教練生涯既大挑戰

4)
士砵亭方面表示
佢地唔會讓維路素於1月離隊
而就算佢最終於季尾離隊
買家必須付出2000萬鎊

5)
雖然今朝講過紐卡素唔打算買 Jonas Olsson
但佢依然唔愁出路
因為有消息指保頓想出價300萬鎊買佢

6)
雖然畢特同紐卡素既合約要到下季尾先完
但佢已經表態希望同球會續約

7)
高高可能以自由身加盟昆士伯流浪

2007-11-30 (1)

1)
尋日講過黑金案拉左哈利列納同埋史杜利
其餘3個原來係李斯特城班主文達歷, agent 麥基同埋前球員菲爾
文達歷係樸茨茅夫前班主
菲爾就係黑金案所涉及既球員

另一方面,消息指 Big Sam 會係下一個被拘捕既英超高層
小弟覺得有一定可信性
因為一直以來好多英超領隊或者高層
都同這些負面新聞扯上關係
當中以佢,桑拿士,格拉咸同埋哈利列納被人傳得最勁

2)
有消息指瑞典後衛 Jonas Olsson
其實唔係紐卡素既增兵目標

最新同紐卡素扯上關係既係波圖中堅般奴艾維斯
Big Sam 被發現星期三去左晏菲路睇辦

而佢地既球探 Paul Montgomery
就被發現去睇些路迪對薩克達既比賽
消息指佢既目標係後者既球員

3)
柏天尼,碧根鮑華,鶴臣同埋陶錫
都被英格蘭足總邀請做顧問
問佢地搵新領隊既意見

而正副隊長泰利同埋謝拉特既意見亦會被考慮

4)
米堡通知李東國可於1月離隊
而洛查碧克就否認會重返士砵亭

5)
蘇連遜表示推左幾間德國球會
因為佢 prefer 踢英超

小弟覺得佢加盟米堡既機會幾大
因為對佢有興趣既英超球會只有米堡同埋曼城
而曼城陣中有最少3個唔錯既龍門
佢又應該唔肯去

6)
托迪否認復出國家隊

7)
祖雲達斯被傳將於1月買巴沙利
仲會將基斯薛圖外借半季作為交易既一部份

另一方面,佢地被傳想簽富咸既基斯杜華
小弟覺得機會唔大
因為佢既質素只係一般
但可想而知佢地幾等中堅用

8)
澳洲足總將投訴艾禾卡特反口

9)
伯明翰主席高特表示
楊家誠如果收購球會失敗
將會向佢作出反收購

10)
柏迪遜可能於1月由紐卡素轉投諾域治

2007-11-29 (2)

1)
摩連奴一句 'Come and get me'
令英國傳媒多左好多野寫
佢佢又表示英格蘭足總冇人搵過佢

2)
祖維爾接手打呲郡

3)
岩岩當選亞洲足球先生既艾卡達尼
得到車路士既邀請
將會去跟操幾個星期
之前同米堡扯上關係既佢
表示希望去西甲或者英超搵食

4)
波歷克可望被納入對阿仙奴既球員名單

5)
樸茨茅夫領隊哈利列納
同埋行政總裁 Peter Storrie
以及另外3人
因涉嫌收取非法回佣
被警方拘捕問話

但哈利列納就聲稱件事同佢無關

6)
前英格蘭足總副主席 David Dein 表示
侯利亞係其中一個接手英格蘭既好人選

2007-11-29 (1)

尋晚得到場內好多 banner 同埋歌聲支持既賓尼迪斯
用實際行動向球迷致意
帶領利物浦於主場羸波圖4:1
順便向兩個美國老闆示下威

講返尋晚場波
睇比數以為羸得好輕鬆
其實驚風散都食唔少

佢地開波就搶
曾兩,三次埋門都入唔到波
要等到19分鐘
因對手防守角球出錯先可以打開記錄
謝拉特開角球
托利斯竟然會冇人睇
任佢輕鬆頂入

不過及後未能擴大比數既利記
就因為防守出錯而要付出代價
講真波圖全場有威脅既攻門真係唔多
不過尋晚利記有一條唔夠緊密既防線
就一次意外都足以致命

33分鐘,波圖既波蘭中場 Przemyslaw Kazmierczak 於左路傳中
人地既射手盧比斯補定個靚位輕鬆頂入
小弟幾嬲既係當時盯佢既
竟然唔係加歷查或者希比亞
而係移入中路幫手補位既艾比路亞
佢勤力有餘,但就唔多用腦
搶點既 timing 同位置都錯晒

之後盧比斯再有單刀機會
好彩佢把握唔到干沙利斯既妙傳
而M.施治及後既助攻又無功而回
否則利記半場隨時連和局都保唔住

半場後利記既防線睇落好似有左改善
但前面就仲未搵到入波機會
而基維爾於61分鐘亦代替今場表現一般既禾路連
前者同埋巴布,班拿約,希比亞,馬斯查蘭奴
既多次埋門都未能轉化為入球

班拿約今場對住波圖既發揮未能
於技術上有明顯優勢
而巴布就始終令人覺得佢只係一個人踢緊波
而佢傳中落點唔準之餘
仲好多時唔夠高
講傳中球既質素其實比賓納特更差

而哥治亦於71分鐘被換入去屈機
但利記今場最信得過既始終係托利斯
佢於79分鐘轉身擺脫對方後衛再攞遠柱入
球波羸在佢轉身0個下夠快
令佢身後既後衛冇野可以做

而波圖雖然即刻換入普加迪斯以圖反撲
但唔生性既史甸彭路夫於禁區打排球
令謝拉特以12碼為利記贏夠兩球
跟住散晒既波圖防線
仲自殺式唔搵人睇哥治而輸夠1:4

利記將於11/12既最後一場分組賽
作客尋晚輸波既馬賽
0個場波和都唔掂
以佢地作客法國球隊既往績
小弟真係好擔心
希望到時又有驚喜啦

2007-11-28

1)
近日賓尼迪斯同兩個美國班主不和
消息指前者原本想買400萬鎊身價既卡拉迪斯
以作為加歷查同埋艾加既替補
但而家就因為冇水而要放棄

消息更指其實佢仲睇中兩個
將於季尾成為自由身既球員
但佢老人家已經打定輸數

2)
尹高爾聲稱佢有興趣接手英格蘭
但又話唔會於2009年夏天前離開阿爾克瑪爾

小弟覺得咁即係新領隊唔會係佢啦

3)
古迪被指係曼城既增兵目標
但佢最想既始終係同皇馬續約兩年

4)
愛華頓仲未搵到人做副領隊
有消息指佢地想搵白賴仁傑特
不過錫菲聯就講明如果屬實
佢地將會要求100萬鎊作賠償

5)
般尼前鋒拿菲特
被指成為樸茨茅夫既200萬鎊增兵目標

6)
桑坦德被傳打算向維拉利爾開價300萬鎊買華倫西亞
佢自上季起就被外借到韋根
而韋根亦被指可能會開出相同價錢買斷佢

7)
尹達華治既代表向傳媒透露
幾間頂級英超球會都想簽這個荷蘭中場
消息指當中包括車路士,阿仙奴同埋紐卡素

8)
搵唔到班落既迪亞奧
被指可能重返史篤城]

9)
前紐卡素'廢物'中堅保桑既經理人表示
保桑冇意離開祖雲達斯
而佢證實拉素同埋里昂於暑假曾打聽羅致保桑既可能
而對於傳聞皇馬想買保桑
佢就話佢都有聽聞
但就話皇馬方面 so far 冇人聯絡過佢

小弟覺得佢似吹水多
因為保桑咁廢
邊有可能會有咁多球隊打佢主意

10)
米堡主將艾卡即將復出
佢表示佢今日會復出踢預備組賽事

而勤加操練既佢即使唔可以踢足90分鐘
亦希望可被納入作客對雷丁既名單
而佢仲希望可於對阿仙奴既比賽踢返正選

2007-11-27

1)
卡比路被指成為英格蘭新領隊既大熱
消息指英格蘭足總開價400萬鎊年薪
仲講到似層層話卡比路會搵埋
好熟英格蘭球壇既蘇拿或者柏列做副手
而萬一斟酌失敗
就會改為向摩連奴埋手

但小弟覺得英格蘭足總既出手唔多吸引
因為當年艾歷臣既人工係500萬鎊
比對卡比路既 offer 足足多左 1/4

另一方面,柏天尼就發表意見
認為英格蘭足總搵人應向本土埋手

2)
意大利既體育戰報搞既'小金球獎'
每年選一個21歲以下既世界最佳球員
今年佢地就選左美斯

3)
列卡特同埋賓尼迪斯都被傳
會係下一個被炒既名牌領隊
死因都係同高層不和

後者由於可能知自己玩大左
尋日一位接近佢既消息人仕就放風
佢希望化解今次既不和事件
仲希望可以長期留效利記

4)
比利戴維斯成為最新一個被炒既英超領隊
打呲郡方面而家有3個候選人
仲有信心新領隊可以趕及星期六作客新特蘭既護級大戰
傳聞麥卡倫同埋恩斯都係熱門人選

另一方面,被炒既比利戴維斯亦唔愁出路
佢被傳係蘇格蘭下任教練人選既大熱

5)
英格蘭足總決定控告費格遜行為不檢

6)
麥諾艾維斯搏炒成功
連續3日無故缺席練習
最終令飛腳炒左佢
佢亦如願轉投伊蒂哈德
小弟覺得佢咁冇品
真係幾好波都冇用

7)
艾迪莊遜同埋艾迪杜里兩個美國年青射手
都被指係紐卡素既增兵目標

另一方面, NEC 既24歲瑞典後衛 Jonas Olsson
被指可能於1月轉投紐記

8)
應邀出席參加世界盃抽籤既
前奧地利名宿保格斯達疑遭劫殺
而比亞荷夫亦被人偷左公事包
事件令人好擔心南非既治安問題
對佢地舉辦世界盃既影響

小弟覺得唔止南非
連2014年既主辦國巴西既治安都好有問題
根本就唔岩舉辦大型運動會

9)
迪科爾同熱刺既合約將於季尾完結
主席利維提醒佢要盡快同球會續約以示忠心
一般相信如果佢仲唔肯續約
就會於1月被賤賣

10)
波歷克尋日於對伯明翰既預備組賽事復出
踢左45分鐘

11)
曼聯副領隊昆洛斯指維路素唔係佢地既增兵首選
因為佢地既中場夠晒人用
但英國同葡萄牙既傳媒都指佢既經理人
已經同曼聯既高層會面

而亦有消息指曼聯開價2500萬鎊
買佢同埋摩天奴
仲願意將青年隊既施華兄弟外借去士砵亭

2007-11-26

1)
2010南非世界盃外圍賽抽籤有左結果
香港人最關心既英格蘭同埋中國都唔多好彩

前者又同克羅地亞同組
真係好睇過戲

後者就入埋死亡之組
同組既澳洲同埋伊拉克既實力都一定在國足之上
就算佢地對住卡塔爾亦冇必勝把握
小弟對此非常擔心

2)
英格蘭領隊既新人選
又有新版本
奇連士文被指有意接手
西班牙傳媒更指英格蘭足總已同蘇斯達有初步接觸

小弟認為而家個勢
英格蘭足總其實係想搵奧尼爾
但佢又唔多似肯接手
仲話舒利亞先係好人選

不過直到目前為止只有外籍領隊被指有興趣
包括納比,卡比路同埋奇連士文
但小弟就唔多信英格蘭足總會搵蘇斯達
因為佢岩岩接手皇馬
仍未完全證明到佢既能力
佢本人對傳聞亦好意外

小弟既立場好簡單
如果本土既然冇好人選
而舒利亞亦唔肯接手
而家又有外籍領隊好似肯睇錢份上
咁就不如真係搵個夠惡既外人

而英格蘭近年最好既領隊波比笠臣
就表示奧尼爾係佢既心水
其次先係外藉領隊

3)
有消息指費格遜邀請麥卡倫返曼聯擔任教練一職
麥卡倫曾經係老費既副手
但而家佢成隻過街老鼠
仲廢到咁既地步
老費都竟然敢搵佢返曼聯
如果單料係堅既
佢老人家都真係幾夠雷

4)
費格遜透露曼聯準備買斷迪維斯
仲聲稱曼聯已傾掂轉會費

另一方面,佢承認曼聯試過斟安歷卡幾次
但就一直未能成功

5)
費格遜因為怒球証
可能被罰停賽1-3場

6)
布魯士將獲韋根撥款1500萬鎊於1月增兵

7)
沙洛向拜仁要求於1月離隊
消息指曼聯同祖雲達斯可能係佢既落腳地

8)
波爾多可能向波爾多開價200萬鎊買佢地既射手 Arturo Alvarez

9)
打呲郡右閘米爾斯
被指成為利物浦1月既增兵目標

10)
由於買比亞堤可能有阻滯
傳聞米堡可能改打紐根特既主意

11)
傳聞保頓已經打定輸數安歷卡會於1月離隊
繼前幾日講過既湯馬臣
又有傳佢地想買喜伯年既20歲射手史堤芬費查

另一方面,佢地亦被指想向莫斯科斯巴達開價120萬鎊
買佢地既捷克中堅 R.高華

12)
日本足總可能搵米路天奴域執教
而伊朗足總就想斟酌盧森保高

2007-11-25 (2)

米堡對維拉
過程亦係令人意外
而主隊既表現係好令人失望
(事實上同位於東北部既紐卡素同埋新特蘭都令人好失望)

修夫基似乎唔擺得好耐
小弟估就算佢最終就算唔使炒
佢地既主席都可能考慮會搵雲拿保斯做修夫基既助手

講返場波
佢地今場改以 4-5-1 陣式應戰
端基幾令人意外只係後備
而收回己用既莊臣就反而有正選踢
佢地最初面對客場成績甚差既維拉
係踢得幾主動
但冇左艾卡既米堡真係等如被廢左3成功力
開波初段既唐寧突破越位但射近柱被卡臣撲出
已經係初段(甚至全場)最有威脅既攻門

上半場中段起
客隊維拉就慢慢唔同米堡客氣
終於臨完半場前
卡維純技術擊倒韋達
佢大腿一控,再轉身抽入
為客隊先開記錄

下半場開波初段
佢地亦係預期會還拖
不過卡達莫一下好低級既解圍失誤
令米堡又輸一粒

之後小弟就見到成條防線近乎散晒
只有右閘楊格仲係正常既
(佢同右中場奧尼爾係成場波踢得比較似樣)
艾邦拉賀有最少3次黃金機會
如果唔係楊格由右面包到左邊
如果又唔係艾邦拉賀羸到韋達但羸唔到門柱
佢一定唔止入一球
而維拉最終一定唔止輸3粒

睇返成場波
米堡其實冇咩能力破關
冇左米度,艾卡同埋端基
攻力真係差好多
就算落後既時候換入洛查碧克同埋克捷臣
都冇咩幫助
前面入唔到波最多冇波羸

但後面唔掂就只有等死
活基治今場既表現在水準之下好多
輸第3球明顯係輸佢同埋舒華沙
後面既韋達於失守後就越踢越走樣
最慘既係球隊冇咩好貨色可以代替韋達
最好既已經係長期傷兵侯夫就已經知大鑊
輸波其實係佢地尋晚既唯一合理結果

佢地應該慶幸尋晚只有保頓爆冷羸曼聯搶到3分
其餘護級既難兄難弟都係輸波收場
不過佢地已經跌到尾4
僅以1個得失球差力壓新特蘭
佢地究竟仲有幾多路可退?

2007-11-25 (1)

先講紐卡素對利物浦
從雙方排陣到比賽發展,以至結果都幾令小弟意外

先講排陣
主隊紐卡素可能因為怕輸
先排出一個穩守意慾既明顯既陣容
但小弟對於 Big Sam 放棄慣用既 4-3-3 陣式
而取 4-4-2 就有少少驚喜
因為小弟一直認為 4-4-2 係比較岩紐記用

但 Big Sam 既用人就有值得商榷既地方
主要問題在於中場:
a)
佢地冇一個明顯既右中場
畢特,阿倫史勿夫加埋安利3個都於中路搵食
右路倚靠既就只有今場改踢右閘既謝列美
b)
而今季多數踢左閘既尼索比亞
改踢左中場亦顯得進退失據

小弟覺得占士米拿其實可以解決這兩個問題
占士米拿+畢特+阿倫史勿夫+安利
似乎係一條比較完整既中場線

利記既排陣都有少少令人意外
盧卡斯同埋基維爾一齊踢正選
而佢地既中場線亦冇明顯既右中場
謝拉特多數於中路(有時甚至偏左)搵食
基維爾就反而有時於右路出現
不過就冇咩貢獻

就比賽發展
初段既紐記其實守得唔錯
後防4人起碼做到本份
令利記羸既只有控球時間
不過謝拉特一腳世界波打破悶局
就令到紐記開始進退失據
半場完結前如果唔係托利斯冇運
利記已羸夠兩球

下半場開波
正路期望係紐記經過調動後
會嘗試力圖反撲
不過利記初段一次角球攻勢羸到2:0
就幾打擊佢地既士氣
之後 Big Sam 再令人失望地以巴頓入替安利
廢埋紐記原本已經冇咩既創造力
場波既餘下時間基本上已經係垃圾時間

小弟之後見到既紐卡素
似斷開3份
後防依舊有4人
但踢來慌失失
中場線既組織同用波都好差
前面只有馬田斯不惜氣力去追波
維度卡根本冇態
如非後備席冇人用
佢唔可能可以踢足90分鐘

而利記方面
謝拉特基本上亦都唔使點樣幫手進攻
前線只需要有空位
托利斯,古積特同埋後備入替既巴布就會有發揮空間
如果佢地既射手(特別係托利斯)把握能力比較好
利記羸半打都唔出奇

但最後小弟想幫 Big Sam 講幾句好說話
而家既紐記係真係好令人失望
但如果隊中冇咁多傷兵
佢又肯考慮多用 4-4-2 陣式
同埋多用馬田斯
紐記依然係有希望既

而搵人替 Big Sam 真係唔易
唔通搵舒利亞咩
而紐記同佢簽左幾年貴價合約
反映佢地最初真係有心長用 Big Sam
如果而家炒佢
對紐記反而會弊多於利

2007-11-23 (3)

1)
辛洛高同埋阿爾拔圖因為互相動粗
而被雲達不來梅內部停賽

2)
曉士落實同布力般流浪續約至2010年

3)
摩連奴既私人顧問表示
英格蘭足總到目前為止未有聯絡過串王

4)
維拉利爾已同意將列基美賣到小保加

5)
AEK 雅典既奧地利龍門馬曹
被傳被米堡睇中

6)
美國年青射手艾迪杜里既經理人
主動向傳媒放風
表示皇馬睇中這個18歲射手

7)
蘇格蘭教練麥利殊成為伯明翰新領隊既大熱
有賭波公司甚至將有關投注封盤

8)
碧根鮑華表示奇連士文會係英格蘭新教練既好人選

9)
對於自己同英格蘭教練一職扯上關係
舒利亞表示驚訝
但就暗示唔會接手

2001-11-23 (2)

1)
利物浦班主基列同埋希斯發表聲明
以澄清佢地同賓尼迪斯既不和傳聞
仲表示將於12月同佢開會
傾球員買賣既野

另一方面,賓仔被問到會唔會接手英格蘭
佢就話將來既野冇人知
如果佢既英文能力將來有進步
都有咁既可能

2)
國米準備以破世界紀錄既750萬鎊年薪
利誘伊巴謙莫域續約5年

3)
曼聯準備同艾夫蘭以及布朗
分別續約5年同埋4年
計埋里奧費迪南,維迪同埋賓科士打
佢地陣中比較年青既防守要員都有長約縛住
只要再搵到右閘取代將會淡出既加利仔
未來幾年既防線將會定型
小弟覺得費格遜這步做得好好

4)
比安基透過經理人表示無意離開曼城

5)
艾歷臣獲加薪4成
年薪高達350萬鎊
當中甚至包括追加季前到而家既人工

6)
利物浦被傳想簽海倫芬既射手艾朗素
佢之前已經被傳係曼城既增兵目標
不過消息指佢最快要到季尾先會獲發工作証
所以可能下季轉戰英超

7)
韋斯咸被傳將於1月向祖雲達斯借用泰亞高

8)
史高拉利拒絕接手伯明翰
小弟覺得伯明翰既高層一0的都唔自量
仲何況佢地咁對升班功臣布魯士
搵阿水加盟咩?

小弟估佢地隨時搵唔到人
將而家臨時拉佚既比歷克升正

9)
熱刺可能於1月向皇馬借用巴迪斯達

另一方面,迪亞拉因為表現未達蘇斯達既要求
被傳將於1月被皇馬賣走

10)
挪威防守球員 Brede Hangeland
被指最快將於1月離開哥本哈根
而家佢最有可能轉投紐卡素
轉會費約400萬鎊

身高6呎5既佢擅長踢中堅
亦可客串防中

其實佢早於暑假已經同紐記,維拉以及曼城扯上關係
不過當時佢同球會都極力否認

11)
一旦安歷卡於1月離隊他投
湯馬臣被傳將成為佢既替補

P.S.:
聽日或者後日會有兩段賽後 REPORT
1)紐記對利記
2)米堡對維拉

2007-11-23 (1)

有關英格蘭既下任領隊人選
衛視體育台於直播後已提到8個人選
小弟而家就逐個講:

1)摩連奴
佢同車路士達成既解約協議唔限制佢執教英格蘭
早前英格蘭足總已被傳用700萬鎊年薪利誘佢
不過串王就講過冇興趣
佢既下一站多數係意甲
而好多人都知佢最想教既國家隊只有葡萄牙

2)軒迪克
岩岩帶領俄羅斯力壓英格蘭出線
冇理由唔帶隊踢決賽週
早前又同俄羅斯足總續約
冇咩理由會肯過檔

3)史高拉利
佢上年借英格蘭足總過橋
令葡萄牙足總最終願意加薪留佢
而家庭理由亦令佢 prefer 長留葡萄牙
同埋佢又係岩岩成功帶領葡萄牙入決賽週
冇理由而家走

4)納比
前者06年捧完世界盃
之後等緊機會出山
不過佢出名眼角高
小弟唔信佢會為名大於實既英格蘭出山
因為聲望對於佢而言都幾重要

5)卡比路
佢被皇馬炒後冇野做
而家聲稱有興趣接手
佢係有能力改善英格蘭既防守

但相對於艾歷臣
佢既硬朗作風
隨時同足總高層以及其他英超領隊擦出火花
而佢職業生涯唔止一次被傳同球會高層不和
可能會嚇怕英格蘭班高層

6)奧尼爾 + 7)Big Sam
佢兩個都只係教戰績只屬中上既中型班
亦冇大場面既經驗
而上年佢兩個都有應徵過教練一職
但英格蘭足總當時就寧願請麥卡倫
就已經大約估到佢地今次既接手機會
而佢兩個亦已經否認會接手

8)舒利亞
佢幾日前放風話想接手
潮流又興搵少帥
之前講既7個人選又唔多似會係繼任人
如果佢最終跑出
絕對唔會令小弟感到意外

P.S.:
最新候選人原來仲有哈利列納
不過小弟覺得佢既機會頂多同Big Sam 以及奧尼爾差唔多

2007-11-22 (3)

經過英國時間今朝8點半既緊急會議
麥卡倫落實被炒
消息指佢將按合約得到300萬鎊既賠償

好多參與會議既高層都提早到場準備
而麥卡倫本人就留於酒店
未有出席會議
似乎預左自己會被炒

另有消息指原來於上星期六
以色列對俄羅斯既賽前
英格蘭足總已有7:3既投票結果決定炒麥卡倫
只不過因為俄羅斯爆冷輸波
英格蘭突然間主導出線權
先令佢可以留職多幾日
但英格蘭足總就否認這個消息

小弟覺得真係大快人心......

2007-11-22 (2)

1)
歐洲國家杯種籽分佈
第一種籽: 瑞士、奧地利、希臘、荷蘭
第二種籽: 克羅地亞、意大利、瑞典、捷克
第三種籽: 德國 、葡萄牙 、西班牙、羅馬尼亞
第四種籽: 波蘭、法國、俄羅斯、土耳其

荷蘭好唔情願之下做左種籽
跟意大利,德國同埋法國有可能組成死亡之組

2)
杜夫已可復操
但暫時仍未有復出日期

3)
納比拒絕接手伯明翰

4)
被傳成為曼聯增兵目標既侯頓
原來亦受到紐卡素既注意
紐記球探 Paul Montgomery 透露已經睇左佢一段時間
但球員本身就透過經理人表示冇意思離開格拉斯哥流浪

5)
雲佬同皇馬續約至2010年

6)
樸茨茅夫被傳想買哥治

7)
馬田拿臣同維拉仍未就新約達成協議
有消息指兩支唔夠中堅用既球隊
祖雲達斯同埋熱刺
都想於1月用平價買佢
或於季尾搵佢以自由身加盟

8)
拉爾拿表明無意於季尾轉投馬體會

9)
早幾日講過阿仙奴,皇馬同埋祖雲達斯都睇中既 Martin Caceres
佢既身價被估計已上升至900萬鎊

10)
加納射手基恩透露
曼城已經同烏甸尼斯傾好佢600萬鎊既轉會費
佢好快會落實於1月加盟

2007-11-22 (1)

Impossible is nothing......

4日前俄羅斯敗走以色列
令出線形勢全盤扭轉
點知尋晚竟然出現睇波以來其中一個最令人難忘既反高潮
英格蘭主場好意外咁輸2:3
繼94世界盃後再度未能出席決賽週
將出線權送返比作客僅羸安道爾1:0既俄羅斯

先講出場陣容
只想求和既麥卡倫一如所料排出 4-5-1 陣式
唔捨得放棄之前踢得唔錯,負責攔截既巴利小弟怪佢唔晒
謝拉特加林伯特這個冇化學作用既組合負責後上
冇料到係預左
亦因為睇住英格蘭錯左幾年而已經冇晒感覺
(某程度係因為佢地仲有好多被人插既地方......)

但麥卡倫夠膽死事先張揚收起碧咸就點都講唔通
佢兩個不和已經唔係秘密
前者幾個月前如果唔係水浸眼睸
都一定唔會重召後者
但尋晚突然間夠吉士唔用
小弟覺得同佢既狀態無關
反而係因為唸住尋晚應該唔使輸
而即刻過橋抽板

尋晚個場積水問題嚴重
正常人都知唔應該用只擅長識扭波,但唔識斬波既胡禮菲臘斯
結果佢有份出場既45分鐘入面
就只有接應哥治傳送,但被撲出既一下近射
而6呎7既哥治冇左碧咸既傳中作配套
就好似一支插於禁區入面既旗桿
佢頭45分鐘既好波亦只有岩岩提到既一腳傳送

講返場波
8分鐘,卡臣彈琵琶先輸一球
佢責無旁貸
但小弟唔係想幫佢講口說話
麥卡倫於生死戰突然要佢踢正選
之前亦只係於對奧地利既友誼賽比佢熱身
早唔用,遲唔用,麥卡倫今場先來雪藏保羅羅賓遜
但點解唔用國際賽經驗比較多
而同蘇金寶又有默契既占士

14分鐘,胡禮菲臘斯就同其他防守球員一齊孭鑊
前者回防越幫越忙包埋越位
一對中堅蘇金寶同埋尼史葛
就竟然一齊'行'住伊度亞度達施華
佢兩個冇默契亦冇提場
一個去逼,一個去包波
有少少足球意識既都應該識啦
連埋最後一個回防既謝拉特總共6個白衫球員
居然阻唔住人地一對箭頭

面對半場輸兩球既困局
有事鍾無艷既麥卡倫就梗係即刻以碧咸入替胡禮菲臘斯
再用埋迪科爾而改踢 4-4-2 搏殺
被換走既當然係有作用,但冇名氣既巴利

56分鐘,對方冇料既後衛施蒙歷於禁區內侵犯迪科爾
林伯特既12碼為英格蘭帶來希望
亦係佢今場波既唯一貢獻

65分鐘,碧咸又來一下招牌式助攻
哥治既一腔一射
再次為英格蘭帶來出線既主導權

但只滿足於和波既英格蘭之後放軟手腳
未有乘勢再向克羅地亞施壓
結果自作自受
77分鐘,面對柏歷既中距離射門
'回塘'既蘇金寶竟然驚波
令卡臣反應慢左
柏歷致命既一腳將咁將英格蘭踢出局

英格蘭今場追和再輸
其實係佢地分組賽出局既縮影
形勢都係先由惡劣發展到擁有主導權
再自己不思進取咁將難得既機會糟蹋

如果俄羅斯敗走以色列
為英格蘭帶來唔應該有既第2次機會
今場先輸兩球都追平應該係佢地既第3次機會
3次機會都唔識把握
除左怨自己,仲可以怨邊個?

泰萊之前被認為係英格蘭有史以來最差既教練
人地當年既人腳冇而家咁好
但就起碼識得簡單用長傳急攻踢 4-4-2
麥卡倫有好好多既人腳
但用人同排陣就比當年更差
似乎史上最差教練應該係佢先岩
今日出席緊急會議既英格蘭高層
應該會為慳錢而請麥卡倫既愚蠢決定而好後悔

2007-11-21

1)
隨住副領隊 Alan Irvine 轉投普雷斯頓
紐卡素既教練 Steve Round 成為愛華頓既羅致目標

2)
雷丁否認對 Michael Mifsud 有興趣
佢早前於奧脫福連入兩球而成名

3)
被熱刺放棄既加里
再次被傳成為伯明翰既增兵目標

4)
格拉斯哥流浪既右閘侯頓
被傳成為曼聯既增兵目標
轉會費大約600萬鎊

5)
阿祖安奴被傳將加盟雲達不來梅
轉會費估計高達800萬鎊

6)
飛燕諾被傳將於1月向布力般流浪買奧查

7)
利物浦表示對查維馬天尼斯冇興趣

8)
有消息指艾斯美將被拜仁放棄

另一方面,有傳拿姆將離隊加盟巴塞隆拿
以替補被傳因家庭理由而離隊既森保達

9)
祖維爾同埋桑拿士
而家成為伯明翰新領隊既熱門

2007-11-20

1)
賓尼迪斯否認將轉投拜仁

2)
傳聞曼聯向巴塞隆拿提出
用沙夏再加500萬鎊
去交換伊度奧

3)
傳聞紐卡素將於1月向車路士
開價100萬鎊買賓希姆

4)
祖爾拒絕接手伯明翰

5)
傳聞馬基尼里將於季尾加盟馬賽

6)
對於奧雲再度'為國捐軀'
紐卡素將向英格蘭足總索償50萬鎊

7)
傳聞車路士想搵創造力強既中場
人選有俄羅斯既比耶列甸洛夫
同埋克羅地亞既莫迪歷

8)
巴朗落實加盟紐卡素
接替因健康理由離職既 Terry Gennoe 成為守門員教練

9)
繼阿仙奴後
皇馬同埋祖雲達斯都被指
想簽由維拉利爾外借到維爾瓦
既烏拉圭19歲中堅 Martin Cáceres

10)
艾邦拉賀否認會離隊加盟阿仙奴

11)
米堡否認想簽沙地射手艾基達尼

但佢地就被指對馬其頓射手 Ilco Naumoski 有興趣

2007-11-19 (2)

1)
米杜士堡被傳想簽沙地25歲射手艾基達尼
佢而家效力 Al-Hilal
佢當年身價高達390萬鎊
係國內轉會費紀錄
佢亦係國家隊歷年來最年輕既隊長

佢有速度同腳法
兼擅長搶點
小弟認為佢絕對係亞洲一線既射手

不過小弟覺得佢既體能同身體對抗性只係一般
係佢於英超立足既最大障礙

2)
原來除左諾域治之外
保頓,伯明翰,甚至米堡
都被傳打艾美奧比既主意

3)
熱刺被傳將於1月向華倫西亞開慏3000萬鎊買韋拿

4)
意大利傳媒指卡卡已經同意續約到2012年
年薪將增加到640萬鎊

5)
森瑪拉斯可能於1月轉投拉素

6)
森保達可能因為家庭理由
而於1月轉投AC米蘭
其實佢當年亦因此而唔想離開意甲
只係當時祖雲達斯唔想益AC米蘭
佢最後先被迫加盟巴塞隆拿
所以傳聞有一定可信性

而巴塞隆拿就被指想簽拿姆做替補

7)
侯斯頓戴拿模羸新英倫革命2:1
奪得美職冠軍

8)
蘇連遜被傳可能加盟米堡

9)
好耐之前講過利物浦同埋阿仙奴都想簽
FK Teplice 既捷克20歲射手 Martin Fenin

而家祖雲達斯卻可能遲來先上岸
因為這個小朋友同佢既經理人
將於月尾到都靈同祖記傾個人條件
佢可能於1月先以借用身份加盟

10)
一腳救左英格蘭既以色列射手高倫
賽後放聲氣話要出國搵食
仲話最想踢車路士
因為當日就係格蘭選佢入國家隊

11)
幾日前講過紐卡素派左球探去睇 Valeri Domovchiyski
但佢地而家唔認想簽這個保加利亞年青射手

12)
AEK 雅典被傳向祖雲達斯開價530萬鎊買阿米朗

2007-11-19 (1)

1)
香港作客土庫曼輸0:3
兩回合合計亦以同樣比數出局
緣盡2010年世界盃
唉!......

2)
巴尼斯好有可能於1月由打呲郡加盟韋斯咸
19歲既佢係打呲郡上季既最佳年青球員
踢進攻中場既佢將會同盧保拍檔

但小弟覺得佢仲未於英超證明佢既能力
早前仲要斷過腳
但轉會費都要500萬鎊實在幾貴

3)
有消息指如果麥卡倫最終被炒
(唔理出唔出到線都被炒?)
舒利亞將有興趣接手執教國家隊

4)
前巴拉圭國腳費利拉
克服車禍後冇左左手既困難
成功復出加盟祖國球會古亞利
日前於練習賽仲踢左60分鐘

5)
布魯士同韋根已經傾掂合約
稍後簽埋約就可以落實
韋根將要向伯明翰賠償300萬鎊

另外,布魯士想帶埋助手布歷克過檔
但伯明翰就肯定唔想

6)
之前講過阿仙奴唔肯接收阿祖安奴
但而家又有消息指佢老人家改變初衷
可能同基拔圖施華去交換

7)
拜仁擊敗AC米蘭,皇馬同埋祖雲達斯
從聖保羅簽得18歲後衛比爾奴
轉會費高達930萬鎊

8)
艾禾卡特決定繼續執教辛尼特
令澳洲足總又要重新搵人
奇連士文而家成為接手既大熱門

2007-11-18 (2)

1)
英格蘭死裡逃生!

俄羅斯尋晚作客以色列爆冷輸1:2
令佢地既出線機會大打折扣

有睇場波既人都知
尋晚以色列係踢得幾好
俄羅斯就只有下半場一段好波

但唔可以否認既係
尋晚以色列係羸得幾有運既
俄羅斯追成1:1後
圍住以色列去抽
軒迪克不惜以'2-5-3'陣式豁出去搏命
而施捷夫既幾次攻門都足以羸波
當然包括89分鐘既中柱波
如果俄羅斯可以先射成2:1
小弟打死都唔信以色列可以於補時有波入

2)
蘇格蘭尋晚雖然於主場以1:2輸比意大利
再一次冇份踢決賽週
但其實佢地除左開賽既10幾分鐘踢得唔好
其餘時間都踢得幾唔錯
人到波到
借住雨勢不斷用簡單既組織去屈機
踢到補時先輸1:2都真係唔失禮

小弟寧願決賽週見到佢地
都唔想見到而家又將自己當係世界級強隊既英格蘭

3)
葡萄牙同埋荷蘭有冇搞錯
主場對弱隊都只贏1:0
佢地近1年幾既表現真係幾令小弟失望

2007-11-18 (1)

1)
日本國家隊教練奧森周五中風
而家陷入昏迷狀態
現正於深切治療部接受治療
情況嚴重
佢個仔好可能會暫時代佢教國家隊

2)
哥治被傳將被賓尼迪斯出售以吐現
消息指曼城,維拉,樸茨茅夫,紐卡素同埋祖雲達斯都有興趣買哥治

3)
國米將阿祖安奴送回巴西至明年1月
等佢'恢復狀態'

小弟覺得其實係文仙尼唔想再對住佢
反正佢1月離隊既機會極高
因為岩岩又有消息指聖保羅想簽佢

4)
伯明翰同意讓布魯士同韋根商討個人條件
佢既人工將由而家既15000鎊加到45000鎊
將會簽約3年

5)
雲祖柏宣佈掛靴

6)
費倫天拿希望於1月向皮亞琴察開價420萬鎊買柏達連奴

7)
迪亞比可能為左增加出場機會而離隊
英國傳媒指祖雲達斯同埋熱刺都對佢有興趣
而後者亦睇中丹尼臣同埋阿曼特查奧爾
不過一般相信雲加唔會放人

8)
車路士被指將向哈化柏林開價250萬鎊買彭達歷

另一方面,佢地再次否認會簽細哨

9)
傳聞利物浦睇中畢爾包既19歲中場查維馬天尼斯
但佢既1700萬鎊毀約金成為轉會既障礙

賓尼迪斯被指可能要放走最少1個中場以套現
有消息指想增加出場機會既施素高係可能人物

10)
傳聞 Big Sam 想將賓希姆帶到紐卡素

11)
巴路士被傳將以400萬鎊既價錢加盟曼城
因為海倫芬既艾維斯被指代表國家隊既次數太少
而唔可以獲發工作證

12)
賓科士打透露稍後將接受再被外借

13)
卡域克既轉會費被傳高達1800萬鎊

14)
米堡決定重召阿當莊臣歸隊
佢於屈福特表現出色
10場就入左5球

15)
雖然艾美奧比好想被外借到紐卡素
Big Sam 再次表明佢係組軍計劃既一部份
所以唔會於1月將佢外借

2007-11-16 (2)

1)
士砵亭既俄羅斯借將 Marat Izmailov
成為曼城既增兵目標
佢可以踢前鋒同埋進攻中場

2)
有消息指文迪達被通知可以離隊他投

3)
索菲亞利夫斯基既21歲射手 Valeri Domovchiyski
被保加利亞傳媒指
已經成為紐卡素既增兵目標
紐記之前仲派埋球探去睇佢比賽

4)
賓尼迪斯表明卡臣可於1月正式離隊

小弟覺得這係雙羸既局面
因為利記可以賺錢
卡臣又可以於維拉做長期正選
有利佢之後挑戰羅賓遜於國家隊既正選位置

另一方面,佢今晚對奧地利既比賽將會正選登場

5)
巴路士指自己被教練佩連捨棄
而因為又有其他球會斟佢
所以於1月佢可能會離開里昂

6)
祖維爾表示對執教愛爾蘭有一定興趣

2007-11-16 (1)

1)
波比笠臣終於因健康理由而要退下來

小弟睇波19年
覺得佢係英格蘭近年來最好既教練
90年世界盃殿軍(除66年外既最佳戰績)已係有力證明

佢後來教PSV燕豪芬(即係而家既燕豪芬)
同埋巴塞隆拿等球隊
都繼續大打高質既進攻足球
就算有時最終捧唔到盃
小弟都依然覺得佢係有料到

到後期佢以賤價接手執教紐卡素
雖然奇雲基謹同埋杜格利殊既成績表比佢好
但佢兩個同埋古烈治奇實都係大花筒
交到成績係應份既
(但古烈治連貨都交唔到就知佢有幾廢......)

但波比 sir 限米煮限飯
兼被高層削權
都依然有貨交
仲兩度進軍歐聯
其中02-03球季0個次
分組賽先輸3場
再絕地反擊嬴晒餘下3場
令人印象深刻

之後佢出山幫手扶住史當頓執教愛爾蘭
以佢既聲望根本唔使睇住個新仔教波
但佢都唔計較職位同埋人工
可以睇到佢對足球既熱誠

佢真係小弟睇波以來其中一個最喜愛既領隊

2)
比利時,荷蘭同埋盧森堡
想申辦2018年世界盃決賽周

但要注意既係
賽事只會在比利時同埋荷蘭舉行
而盧森堡只會負責舉辦1個技術會議
因此唔會獲得決賽周席位

3)
油王又派羸波獎金......

繼上場俄羅斯對英格蘭
每名球員50萬鎊
今次作客殘陣兼用幾個新人既以色列
就每名球員10萬鎊

4)
打比郡居然吸引到美國財團既收購興趣
買家係萊爾迪士尼
佢係迪士尼既第3大股東

5)
艾加將於下星期六作客紐卡素既比賽復出
但班拿約就未必可以趕及

另一方面,沙比艾朗素將可以於下星期復操
但未有確實既復出日期

6)
傳聞熱刺想向皇馬開出驚人既2800萬鎊買卡斯拿斯
但皇馬同埋當時人都表示冇興趣

另一方面,拉莫斯亦繼續重組中場
繼將索高拿既工作簡化後
傳聞佢打算將卡域克帶回熱刺

7)
拿斯尼同埋迪亞高
都被指係國米季尾既增兵目標
以解決球隊冇人識派牌既老問題

2007-11-15

1)
紅鑽首奪亞冠盃

2)
菲爾要養傷3星期
將會缺席對利物浦同埋布力般流浪既聯賽

另外,基雲同埋卡爾就接近康復
而後者亦岩岩宣佈退出國家隊

3)
韋根想斟布魯士過檔
布魯士表示如果伯明翰准既話
佢都有興趣同韋根傾
但伯明翰主席高特就講明會阻止

小弟覺得布魯士可能真係有興趣接手韋根
因為伯明翰(特別係楊先生)對佢真係唔係好尊重
佢留隊都唔開心
不過佢亦有可能借韋根過橋向楊先生施壓

另一方面,韋根既另一目標麥利殊
表示有興趣教英超球會
小弟覺得佢於帶隊對意大利前咁講
其實好唔專業
因為會影響球員既士氣

4)
祖雲達斯被傳會出價600萬鎊買雲達華治

另外,佢地否認會接收阿祖安奴

5)
森伯達於烏甸尼斯既出色表現
令佢成為強隊既獵物
但烏甸尼斯將佢定價1200萬鎊
遠高於祖雲達斯既600萬鎊 budget

而費倫天拿就被指願意用盧普利再加700萬鎊
條件比祖記吸引得多

6)
同熱刺扯上關係既查基
被傳亦係馬體會願意出價800萬鎊既增兵目標

7)
因為迪達同埋卡勒既水準都好唔掂
所以AC米蘭被傳想簽維拉利爾既迪亞高盧比斯

8)
拿姆只係講過話
巴塞隆拿係出國搵食既好選擇
就被西班牙傳媒
吹水指巴塞隆拿想開價1000萬鎊買佢

9)
巴素利既20歲瑞典中堅 Daniel Majstorovic
成為拉素增兵既目標

10)
傳聞麥法登成為些路迪既400萬鎊增兵目標

11)
曼城再被指將開價600萬鎊買施斯
不過小弟記得當時人已經講過好多次冇意思離開馬賽

12)
哈利列納表示冇收過任何
關於馬華路禾尼同埋馬菲泰萊既斟酌

13)
桑拿士表明佢唔會去教般尼

14)
路斯基透過經理人
表明唔會1月轉投國米

其實8月尾國米打佢主意既時候
雲加已經 reject 左國米
但意大利傳媒寫左幾個月都唔厭
唉......

2007-11-14 (2)

1)
杜安總共12名現役及前度球員
因為涉嫌與未成年少女發生性行為
日前被當地警方拘捕

2)
拉科同埋華倫西亞被指有興趣買彭美拉斯中場華迪韋亞

3)
馬體會被傳有興趣搵摩連奴同埋哥利斯馬加盟

4)
漢堡最終爭羸利物浦,車路士,曼城同埋熱刺
成功簽左尼日利亞17歲射手 Macauley Chrisantus
佢於幾個月前世少盃入左7球
成為賽事既神射手
仲羸埋銀球獎

利記簽唔到佢
小弟真係勁失望

5)
路達否認佢會將艾美奧比帶到諾域治

但有消息指柏達臣其實先係路達既真正目標

6)
車路士,羅馬同埋朗斯
都有興趣簽法國23歲前鋒 Guillaume Hoarau
佢而家踢緊國內小球會 Le Havre

7)
拿玻里被指將向巴勒莫開價800萬鎊買阿馬利

8)
意大利傳媒指利記老闆希斯同羅馬會長辛斯會面
有意收購羅馬部份股份
涉及金額高達1億英鎊
不過希斯已對消息作出否認

9)
三都主被指成為紅鑽既增兵目標

10)
曼城被指將會簽 Litex Lovech 既波波夫
佢係保加利亞 U-21 既前鋒
現年20歲既佢亦可串演右中場

11)
桑坦德既阿根廷中堅加雷
被傳成為利物浦既增兵目標
身價約值1000萬鎊既佢之前亦同AC米蘭扯上關係

12)
恩斯亦被指係韋根新領隊既人選

13)
新特蘭被傳打算開價400萬鎊買馬菲泰萊

14)
施素高被傳成為國米既增兵目標
以取代抖多過踢既韋拉

15)
謝斯高連倫被傳將於1月加盟曼聯
轉會費為跳樓價60萬鎊

16)
米堡被傳想簽錫菲聯既比亞堤
但白賴仁笠臣就表明唔想佢離隊

2007-11-14 (1)

1)
伯明翰主席高特再炮轟楊家誠
質疑佢可唔可以於限期前籌3000萬鎊
以完成交易

2)
洛杉磯銀河表明唔肯將碧咸外借英超球會

3)
卡爾斯魯厄有正選龍門米拿要長抖半年
但佢地否認會簽列文

而列文表示為左有正選踢
不惜轉投德乙球隊

幾個月前其實有傳過暮遜嘉柏想簽佢
佢地既美國龍門基拿又已經重返英超
唔通傳言係堅既?

4)
祖維爾表明唔會重返韋根
而家前愛華頓領隊萊利最有機會接手
佢岩岩以私人理由拒絕接手李斯特城

5)
卡華路要抖兩個月

6)
巴頓為對艾度曉既粗野攔截道歉

7)
國米被指將於1月向帕爾瑪開價800萬鎊買施加連尼

而阿古路亦被指係佢地既增兵目標
不過小弟唔覺得馬體會放人

8)
對於已經幾次被傳將會轉投維拉
懷斯再次重申冇咁既事
仲話希望於利記掛靴

9)
蘇達度再被傳將會賓菲加
消息指轉會費約為500萬鎊
因為皇馬體育總監米積杜域
表明佢係唯一一個可以於1月離隊既球員

10)
富明尼斯再被傳將於1月開價600萬鎊買列基美

11)
之前祖雲達斯被傳將向費倫天拿開價600萬鎊買蒙杜利和
但而家有消息指佢地已將計劃擱置

而意大利有球評家提議佢地
將艾比亞由費倫巴治帶回意甲

另一方面,由於佢地唔夠中堅用
佢地被指願意向雲達不來梅開價1000萬鎊買梅迪薩卡

12)
聖保羅中場李哈利臣被指成為羅馬既增兵目標

2007-11-13

1)
意大利足總宣佈
今個星期既本土賽事取消
但因意大利將於星期六作客蘇格蘭
所以意甲冇受影響

但未知之後意大利主場對法羅群島既比賽
同埋之後既意甲賽事
意大利足總會有咩安排

2)
原來雷丁既辛高
係阿仙奴既沙格拿既堂哥
但佢地素未謀面
因為前者於塞內加爾長大
而後者就係法國出世兼長大

尋晚阿仙奴作客羸雷丁3:1 0個場波
先係佢地咁多年來第一次同對方見面
真係奇聞......

3)
內地傳媒報道
兩間負責轉播西甲既公司達成共識
西甲既直播將回復正常
不過有線電視就表示
暫未收到官方既有關通知

4)
如果落實改制
英超第3名將可直入歐聯分組賽
但第4名就要參加第二圈外圍賽

5)
米杜士堡已批准佢地既守門員教練保羅巴路
同紐卡素傾個人條件
佢可望於今個星期內落實轉投紐記

6)
皇家蘇斯達被指想借用列基美同埋古莊臣

7)
馬體會被傳將出價400萬鎊
買費倫巴治既烏拉圭中堅列根奴

8)
曼城成為最新一間同祖維迪扯上關係既球會
消息指佢地同曼聯都開價700萬鎊

9)
韋根被傳有興趣搵蘇格蘭既教練麥利殊接手

10)
簡拿華路被指將返回拿玻里養老

11)
之前講過烏化奴斯將於季尾同費倫天拿約滿
拜仁同埋國米都被指有興趣簽佢

12)
熱刺被傳想向愛斯賓奴開價600萬鎊買查基
佢24歲,可踢中堅同埋防中
但'西班牙人'已表明唔想放人

13)
雖然賓施馬被指成為阿仙奴同埋曼城既增兵目標
但佢表明無意離開里昂

14)
列文承認考慮於1月離隊
以力保國家隊正選龍門既位置
佢多數會回流德甲

15)
古華斯同阿美利加既合約將於年尾約滿
佢可於1月自由轉會
樸茨茅夫,維拉,打呲同埋布力般流浪都想簽佢

16)
開普敦同埋伊莉莎伯港既兩個新球場
可能趕唔到 deadline

17)
唐寧表明想離開米杜士堡

18)
米路天奴域以戰績唔理想為理由
而被牙買加足總解約

2007-11-12

1)
意甲又搞出事......

賽前一班拉素激進球迷
襲擊一小撮祖雲達斯球迷
巡警開兩槍驅散搞事者
一名拉素球迷兼當地出名既DJ
意外中流彈身亡
以致國米對拉素同埋
羅馬對卡利亞里兩場比賽宣布延期

而同時間進行既其他賽事
就分別延遲10至15分鐘開賽

而阿特蘭大對AC米蘭
因有球迷試圖破壞玻璃圍欄
球證以安全為理由
即時腰斬比賽

意大利波真係好唔掂
害群之馬雖然唔會佔大多數
但一個都嫌多
球會方面
就假波,做假數,經營不善,兼保安唔掂
球迷方面
就種族歧視又暴力
令人扯火兼失望

2)
由反私有化曼聯既球迷所成立既聯曼隊
(## 唔係曼聯!)
出年可能來港參加7人足球賽

3)
傳聞曼城想用比安基交換阿祖安奴

4)
開拖抽羸比比既新人巴布亞
被蘇斯達暫時逐出一隊

5)
巴頓可能因粗野攔截
而被足總抽後算帳罰停賽3場

抵死!
天地有正氣,佢條 PK 衰到秘......

6)
馬斯查蘭奴再次表明希望留效利物浦
佢表示希望留隊事宜可於下月落實
仲話如果唔可以留於利記
佢唔會願意加盟其他英格蘭球會

7)
布里斯托城既防中馬雲艾利洛
成為樸茨茅夫1月既增兵目標
阿當斯曾經睇過佢既比賽
對佢非常滿意
轉會費大約100萬鎊

8)
於富咸冇立足之地既哥連斯約翰
被傳成為保頓1月既增兵目標

9)
西班牙傳媒指維拉利爾亦有興趣借用碧基

2007-11-11

1)
上海申花既郜林,毛劍卿同埋王大雷
將去曼城試腳

2)
班拿約尋晚對富咸整傷鼠蹊受傷
好可能缺席以色列下星期主場對俄羅斯既比賽

3)
比比尋日於操練期間
遭沙治奧拉莫斯粗野攔截
之後竟然發泄於新人巴布亞身上
飛剷人地引起爭執
結果比比被出拳打傷鼻樑

比比又貴又屎波
仲要有份搞事
小弟覺佢隨時比簡拿華路更早離隊

4)
柏夫里約真高同埋保羅羅賓遜
被傳成為曼城既增兵目標
前者就係上個月對英格蘭入兩球波0個個射手

5)
傳聞車路士想向飛燕諾開價
買加拿大年青中場約拿芬迪根斯文

6)
尋日講過曼聯買左個14歲前鋒高菲
有消息指佢既轉會費高達100萬鎊

7)
史甸臣幾日前同阿爾克瑪爾續多1年約

2007-11-10 (2)

東北部打呲
緊張而有球味
客隊紐卡素應該為佢地執返1分
而返屋企還神
因為主隊新特蘭於光明球場
踢出佢地本季最好既一場比賽
但未竟全功

先講排陣
雙方都以 4-4-2 陣式應戰
主隊有麥沙尼同埋艾華士復出
客隊既 Big Sam 就有少少令小弟失望
因為佢竟然唔出謝烈美
簡接令佢地更加難搶中場

其實安利或者阿倫史勿夫應被收起
事實上前者唔夠狀態
小弟最有印象只係佢於頭13分鐘
兩次幾粗野,但都竟然冇黃牌既攔截
而後者全場最叻只係護左一次空門

主隊形勢明顯佔優
佢地唔擅長組織攻勢
但以鬥志搭夠
一人走多步以簡單踢法去控制比賽

主隊最終羸唔到波
只好怪佢地埋打把握力差
同埋'好波唔夠好運好'
客隊既占士米拿無心插柳既傳中竟然彈遠柱入
但佢地既麥沙尼就頭槌中楣

今場波小弟最欣賞既就係夏迪
佢老人家全場踢過左閘,左翼衛同埋右閘3個位
都有一定水準
踢到尾仲咁好氣好力
而佢既隊友鐘斯,麥沙尼,哥頓同埋希堅保咸都唔錯

客隊既菲爾雖然成日被講波佬讚
但小弟覺得佢全場頭槌解圍係多
但失誤亦有唔少
上半場前半段已經兩次包越位
而新特蘭先開紀錄亦同佢既回傳失誤有間接關係
佢既失誤肯定係同羅辛奴唔夠默契有關

而夏柏兩次出迎角球既失位
最終只失一球都算有運
輸波0個球羅辛奴都有份失位
而占士米拿亦跟唔緊希堅保咸

近期新特蘭對阿仙奴同埋韋斯咸
輸波都有一定口碑
只有上場對曼城較差
希望堅尼把握國際賽期執靚隊波
佢地既前境仍然係唔錯既

2007-11-10 (1)

1)
朗尼要養傷4個星期

2)
維拉已經付出175萬鎊以借用卡臣今季
有優先購買權既佢地被傳會再用825萬鎊買斷卡臣

其實上個月已經傳過維拉會出價
轉會費有兩個版本
分別係600萬鎊同埋1000萬鎊
小弟唔記得當時有冇提及價錢
只記得寫過奧尼爾否認有關報導

3)
曼聯擊敗車路士同埋利物浦
成功從般尼簽下14歲射手高菲

轉會費就不詳
不過曼聯日後如將高菲轉售
般尼將可獲其中1/4既轉會費收入
而曼聯亦要於1年後同般尼進行友賽
條數計埋都幾貴
唔怪得利記早前出價25萬鎊被拒

4)
路達打算以借用形式
將艾美奧比帶到諾域治

5)
古比士利否認
早前離開利物浦既 Pako Ayesteran
會加盟韋斯咸出任技術總監

6)
今季以借用形式效力維爾瓦既
烏拉圭中堅 Martin Caceres 聲稱阿仙奴想簽佢

幾個月前其實已經有消息指
阿仙奴派球探去睇佢
小弟記得當時都有提及過

2007-11-9

1)
古烈治落實接掌洛杉磯銀河

2)
維迪同曼聯續約至2012年

3)
傳聞AC米蘭願意接收阿祖安奴

4)
傳聞夏柏可能於1月離開紐卡素

5)
李華蘭尼可能於1月由費倫天拿轉投熱那亞
轉會費為300萬鎊

6)
傳聞羅馬將於1月向西維爾開價700萬鎊買保臣

7)
達葛治被傳將於1月加盟里昂

8)
莫斯科戴拿模同埋辛尼特被傳
都有興趣將基沙哥夫帶返俄羅斯
轉會費高達800萬鎊

9)
有傳AC米蘭想簽沙治奧拉莫斯
但當時人表明唔想離開皇馬

10)
車路士拒絕加入 G14

11)
阿美利加既墨西哥龍門 Guillermo Ochoa
聲稱可能於季中或季尾加盟曼聯

12)
美爾保,艾沙維同埋列基美
都被傳成為紐卡素既增兵目標

13)
土庫曼既球員有興趣
趁西亞同埋俄超既聯賽完左
於歇冬期間於香港落班

14)
西班牙傳媒指馬體會將碧基視為增兵目標
唸住於季中向曼聯先借用
再於季尾買斷

15)
無聊傳聞兩則
一係新特蘭想出價800萬鎊買列基美
二係韋斯咸再次斟阿祖安奴
仲願意開價1400萬鎊

2007-11-8

1)
基沙哥夫成為最新一個
同熱刺扯上關係既西維爾球員

另外,拉莫斯講明
邊個想走都可以走
小弟覺得其實佢好明顯係同貝碧托夫講既......
及後當時人貝碧托夫亦公開表示唔會於1月轉投曼聯

2)
烏化奴斯好快同費倫天拿約滿
佢既經理人聲稱有8間球會對佢有興趣
當中包括布力般流浪

小弟覺得佢之前講明就算唔踢意甲
亦只會去西甲
而佢於8月尾連利物浦既斟酌都 reject
邊會肯去'暴力幫'

另一方面,有傳費倫天拿一旦冇左佢
就會以500萬鎊買賓菲加既盧斯作替補

3)
韋根主席韋倫表示想搵前領隊祖維爾回巢
而當時人亦暗示有興趣

另外,韋倫表明冇搵桑拿士接手

小弟之前已講過祖維爾係理想人選
至於桑拿士......
小弟都係覺得佢比較岩去講波

4)
古烈治被指將接手洛杉磯銀河
但該隊拒絕回應有關傳聞

5)
西班牙傳媒指皇家蘇斯達好有機會
被一中資企業收購
當中有特別條件要佢地買列基美
而費用就由該中資企業負責

6)
西班牙同葡萄牙兩地既傳媒指
葡萄牙警方正調查比比加盟皇馬
當中是否涉及洗黑錢或者瞞稅

小弟覺得比比簡直係年青版既卡卡巴
但竟然要2000萬鎊
難免令人懷疑......

7)
賓特拿既老豆兼經理人表示
國米曾提出用阿祖安奴去交換佢個仔
但被阿仙奴拒絕

8)
熱刺,阿仙奴同埋車路士都派球探去睇
布吉納法索天才中場 Charles Kabore
佢18歲,而家踢緊法國小球會 Libourne-Saint-Seurin
佢既身價約值50萬鎊

9)
阿仙奴睇中剛果民主共和國射手 Tresor Mputu
佢21歲,而家效力國內球會 TP Mazembe

10)
雲加表明唔會接手英格蘭

11)
傳聞曼聯想於季尾以'零機價'簽下謝斯高連倫

12)
傳聞AC米蘭想於季尾簽下加拿斯

13)
艾曼紐臣否認將由阿積士轉投羅馬

2007-11-2 (2)

1)
貝碧托夫個老豆爆料
話佢個仔想於1月離隊

2)
白禮達意圖限制每支球隊既外援球員數目
費格遜表態支持
仲話阿仙奴會反對得最大聲

雲加反駁指用人只睇能力
而唔係睇護照
佢批評曼聯本身今個夏天都用左好多錢買外援球員

3)
車路士將年青前鋒冼佳亞
外借到昆士伯流浪
直至15/12

4)
阿仙奴今晚作客布拉格斯拉維亞
將有法比加斯,希比,高路托尼同埋路斯基缺陣
前二者獲准休息
後二者就因傷缺陣

5)
利物浦既新球場興建計劃
得到當地市政府既正式通過而於史丹利公園動工在即
預計將於2011年夏天可落成啟用

6)
A.莊臣同愛華頓續約5年

7)
朗奴高文明言希望從漢堡簽下雲達華治
佢兩個當年於阿積士合作愉快
轉會傳聞有一定可信性

8)
西維爾否認法比安奴會轉會莫斯科中央陸軍既傳聞

9)
巴塞隆拿再被傳想簽阿瑪利

10)
簡拿華路被傳將於季尾加盟AC米蘭

11)
意大利傳媒指國米想向史浩克04
開價600萬鎊買拉傑錫

而佢地亦被指同利物浦以及曼聯
爭摩納哥既文尼斯

12)
費格遜贊成艾歷臣既建議
英超既後備席由5人增至7人

13)
傳聞保頓打算於1月向車路士
借用賓希姆半季

2007-11-7 (1)

利物浦尋晚於主場以8:0狂炒比錫達斯
破左歐聯羸波既最大差距
加上波圖幫手於主場羸馬賽2:1
令利記重燃出線希望

尋晚場波係賓尼迪斯帶領利記既第50場歐洲賽事
加埋新球場興建計劃得到市政府通過
好似整定尋晚要開P

尋晚利記既陣容
係近期小弟最順眼既一次
小弟近期成日講哥治應該有更多既出場機會
而班拿約更向來係小弟既心頭好
結果佢兩個一齊踢正選

懷斯就被移前取代經常一條友踢晒既巴布
前者加埋班拿約令利記既兩翼側擊得到平衡
而禾路連亦取代狀態平平既古治

開賽初段
冇左後防主力辛恩既客隊
未失波前都仲頂得下
但失波後佢地被迫要壓前去踢
令尋晚展示出好多進攻板斧既利記
有更多空位進襲

而下半場初段
當班拿約連續兩次龍門口執雞後
落後0:4既客軍明顯散晒
之後任由利記魚肉
終於狂數對手成功反底

禾路連同埋班拿約都踢出加盟以來既代表作
頭5個入波,有4個都同前者有關
講表現應該值9分
後者3個入波加兩下助攻
表現更加值10分

如果只計上半場
哥治肯定係最佳球員
全場計埋都值8.5分

謝拉特今場其實都踢得好
有波入
活動範圍又大
射死球又有威脅
都值8.5分

其餘球員分數如下:
拉爾拿:6分
艾比路亞:6.5分
加歷查:6分
希比亞:6分
奧拿里奧:6分
馬斯查蘭奴:7.5分
懷斯:8分
巴布:8.5分
盧卡斯:6.5分
基維爾:7分

2007-11-6

1)
小弟真係好希望賓尼迪斯
今晚會派哥治踢正選
因為佢既身高優勢真係好明顯
而家對方最擅頂既辛恩仲好可能因傷缺陣
仲唔屈機唔通等下季咩

2)
有傳曼城想向西維爾開價買保臣
但後者已表明唔會放人

3)
意大利傳媒指費倫巴治
將於1月向國米開價買阿祖安奴
費倫巴治既教練薜高係阿祖安奴既偶像
'皇帝'可能會願意轉會
傳聞有一定可信性

4)
英國傳媒爆料
一旦今季利物浦既成績未如理想
董事局將於下季請摩連奴去取代賓尼迪斯

小弟覺得可信性唔大
因為摩佬講過下一站多數係意甲

5)
有消息指本地足總打算邀請
橫濱水手,獨立隊同埋莫斯科戴拿模
參加賀歲盃

6)
熱刺重申貝碧托夫唔會於1月離隊
另外,戴倫賓特亦否認將會離隊加盟韋斯咸

7)
早前入股伯明翰既泓鋒國際控股有限公司
尋日宣佈委任范志毅為執行董事

8)
傳聞祖雲達斯將於1月
向樸茨茅夫出價700萬鎊買馬華路禾尼

9)
比安基再被傳將於1月以借用身份加盟AC米蘭

10)
米堡再被傳會於1月
向阿爾克瑪爾(AZ)出價買右閘史甸臣

其實7月既時候
若非AZ將叫價由230萬鎊
突然加至400萬鎊
轉會早已成事

而家米堡已簽左楊格
可以串演右中場既史甸臣又已同球隊續約
加上米堡1月最想買既其實係前鋒
其實可信性幾低......

2007-11-5 (2)

1)
韋根終於炒左領隊夏瓊士
小弟於 Preview 已經講過佢唔多掂
只要睇佢季前貪小便宜簽巴布爾
已經知佢冇料到

而佢搞到隊波毫無隊形
前日對車仔仲夠膽死搵基爾賓尼踢左閘

小弟一直都覺得佢同巴布爾
係成隊波最大既不安因素
佢最終被炒完全唔令小弟意外

而家韋根搵副領隊巴路做看守領隊
小弟認為前領隊祖維爾係最好既接手人選

2)
傳聞新特蘭想向車路士開價500萬鎊買薜維爾

3)
車路士再次被傳想出價買占邦達

4)
卡華路否認佢會離隊加盟祖雲達斯

5)
紐卡素批准教練李爾奇勒
接受諾域治既斟酌
事成既話
佢就可以同路達再度合作

6)
米堡既主席吉遜表示仍支持領隊修夫基
仲話將於1月撥款等佢可以買個前鋒

7)
雖然利物浦有財政壓力
但有消息指賓尼迪斯於1月
仍將獲撥款2500萬鎊以增兵

2007-11-5 (1)

好多場波想講:

1)
紐卡素主場對住樸茅慘敗1:4
真係唸都唸唔到
8,9同埋11分鐘竟然各輸一粒好明顯係死因
佢地班波又唔係冇經驗
但輸左第一球就好似突然成隊崩潰

輸4球波
卡卡巴有兩球都要負責
而羅辛奴同埋菲爾
各有一次出手於禁區'打排球'
都唔使輸12碼
否則紐記輸得仲甘

成班波搶中場又搶唔羸
就算有波在腳都唔識用
計表現仲衰過上次輸比打呲郡0個場
唔怪得 Big Sam 賽後即刻要認衰仔話再冇下次

而英國有傳媒即刻吹水話
紐記管理層想搵曉士頂 Big Sam 個位
不過相信真係吹水多
因為布力般已經準備同曉士續約兼加人工

2)
阿仙奴主場對曼聯和波
大家都冇明顯優勢
和波合理

3)
愛隊利物浦又死火
對手布力般就一次中柱一次中楣
利記有1分落袋已經冇野好怨

4)
馬體會對維拉利爾
繼幾日前對西維爾後又整場4:3
不過佢地係今場既輸家
但佢地可以講係自作孳

李奧法蘭高出迎打空氣送一球比人
哥倫比亞中堅賓利亞又有兩球盯人唔緊
而麥斯洛迪古斯射12碼連框都唔中
搞到初段就羸緊2:0既佢地最終主場首次落敗

5)
祖雲達斯對國米既所謂國家打呲
緊張但唔精彩
主隊明顯比較有決心
但踢得亂就幾有決心都死

主隊上半場有既只有浪射
單係尼維特就已經有起碼3次
結果被告魯斯偷襲得手

下半場國米繼續踢突擊
祖記全靠保方先至可以吊住條命
繼後換出尼維特同埋迪比亞路既主隊
反而踢得仲好
最終靠甘莫蘭尼斯一腳有運既射門逼和對手

6)
皇馬今季已經唔止一次暴露左
佢地冇第二條輸血管既弱點
之前作客華拉度列同埋愛斯賓奴
皇馬已經因為咁而失分

對手只要凍結史尼達
或者今場既古迪
皇馬就再冇人識分波
因為迪亞拉同埋加高既功能只有攔截
而前面有幾多射手都冇用

7)
細哨好
巴塞隆拿自然好

繼季初對畢爾包之後
細哨尋晚對貝迪斯再有好表現
入左兩個靚罰球
(亦係佢今季唯一似樣既兩場賽事......)

2007-11-2

1)
就曼城再次被傳於1月開價買奧雲
主角就堅稱佢無意離隊

而曼城亦被傳開價以森瑪拉斯再加現金
總值1385萬鎊既條件
買海倫芬既巴西射手艾方素

2)
尼斯好可能願意收留杜拉素

3)
路達接掌諾域治後
表示想問阿仙奴借人

4)
傳聞米杜士堡準備於1月
向西布朗開價150萬鎊買謝拉

5)
伊奧古獲格拉斯哥流浪准予自由轉會
佢既下一站好可能係奧咸

6)
已知會 SK Brann 唔會續約既 E.Huseklepp
被傳成為曼城既增兵目標
佢係前挪威 U-21 既前鋒
亦可客串踢翼

7)
奧尼爾表示直到目前
從未同利物浦傾過要買斷卡臣

2007-11-1

1)
朗奴高文同華倫西亞達成合作協議
由燕豪芬轉會加盟
佢一直同會長不和
上季羸聯賽之後都傳過佢想劈炮
而家離隊唔令小弟意外

但之前華倫西亞聲稱要搵'big name'領隊
最終既選擇竟然只係佢
就令小弟幾失望
咁即係算點
買唔到個橙,就買返個桔呀?

2)
英格蘭有意申辦2018年世界盃決賽週

3)
尋日講過車路士被傳想買B.艾雲洛夫
卡華路就因而再被傳打算離隊

4)
西班牙傳媒報導
有唔願意透露身份既巴塞隆拿高層透露
如果有吸引既 offer
細哨最快可於1月離隊

沙維亦因恩尼斯達既地位越來越穩固
而被指唔再係球隊既非賣品

5)
泰亞高被傳將於1月重返英超
以800萬鎊既價錢加盟韋斯咸

6)
李雲在,李東國,金相植同埋禹成用被指
在國家隊被巴林以2:1擊敗既前一晚
同埋輸波後既一晚
都一齊流連色情場所

而家佢地面臨被逐出國家隊半年至一年既處分
兩個字:抵死

7)
意大利傳媒指AC米蘭想打車路士球員既主意
當中包括杜奧巴,阿歷斯同埋波歷克

8)
美爾保被傳將於季尾以自由身加盟祖雲達斯

9)
利物浦將泰利科外借到 Hereford 一個月

10)
傳聞曼城想向些路迪開價500萬鎊買保路錫

11)
屈福特表明唔會出售馬龍京治予維拉

2007-10-31

1)
巴西將主辦2014年世界盃決賽週賽事

另一方面,國際足協宣佈2018年世界杯
將放寬主辦國限制
但只限於非洲同埋南美洲以外既國家舉辦

英格蘭,澳洲,荷蘭同埋比利時都有意申辦
其中後兩者係繼2000年歐洲國家盃後再合作

2)
沙比艾朗素要長抖3個月

而已經抖左成個月既艾加
就要抖多10-16日

托利斯既情況就比之前估計好
但都要抖多兩星期

最好彩既係馬斯查蘭奴
佢照完X-ray之後證實冇大礙
仲已經可以跟大隊練波

3)
路達落實執教諾域治
簽約兩年半

4)
由於摩連奴同埋納比
都拒絕華倫西亞既斟酌
而佢地一再表明只想搵名牌領隊
所以卡比路同埋迪保基斯
已經係佢地既最後希望

5)
葉士域治決定唔同馬歷簽約

6)
雖然一直有傳樸茨茅夫同埋曼城
都想將施斯帶返英超
但佢透過經理人表明冇意思離開馬賽

7)
尋日唔記得講
巴貝利已經搵到班落
佢岩岩接手教寶路華流浪

8)
G-14 證實40間歐洲大球會既代表
將於下月13-14號兩日於布魯塞爾開初步會議
商討成立一個更大既組織

9)
維拉利爾領隊柏歷真奴
因為球隊開季成績好而人氣急升
佢既經理人爆料原來車路士炒左摩連奴之後
曾經搵過佢過檔

10)
'晶片足球'終落實將如期於世冠盃試用
但增加兩個'禁區球證'既'實驗'就遭到押後
小弟一直認為由第四球證即場睇住電視或者電子儀器
有咩唔妥就用無線電聯絡球證
係比較正路既做法
但偏偏未得到接受
真係吹脤

11)
繼祖雲達斯同埋國米之後
車路士成為最新一支同B,艾雲洛夫扯上關係既球隊
而佢既身價已由上月既700萬鎊
升至最新既1000萬鎊

12)
為左增強後防既實力
新特蘭被指將於1月向曼聯開價200萬鎊買伊雲斯

13)
國際足協將修例
球員既擁有權唔可以涉及第三者
一定要由球會全權擁有

14)
葡萄牙傳媒報導
Big Sam 近月都有派人
去觀察賓菲加既巴拉圭射手卡度素
而傳聞紐卡素仲打算開價600萬鎊買佢

2007-10-30

1)
傳聞華倫西亞斟酌摩連奴失敗
而家改為向納比游說

2)
梯家誠聲援有信心於聖誕前
完成對伯明翰既全面收購
仲話之後就會同布魯士傾續約
同埋撥款供球會增兵

3)
自季前已有消息指史譚將會掛靴
而家消息終於得到當時人證實

而雲達沙表示佢會於08歐洲國家盃後退出國家隊

4)
哈利列納同樸茨茅夫續約至2011年

5)
史高斯因膝傷要抖3個月

6)
李斯特城放走麥臣後
打算搵曾經執教愛華頓同埋曼城既萊利接手

另一方面,麥臣既前副手泰加特
再次表明冇意思跟隨麥臣加盟保頓

7)
世青盃神射手 Macauley Chrisantus
幾乎肯定簽約曼城
曼城擊敗阿仙奴,薩格勒布戴拿模同埋利物浦等球會
成功爭取尼日利亞射手既加盟

而佢既世青隊隊友踢左翼既 Matthew Edile
亦係曼城既心頭好

另一方面,有消息指蘇連遜可能於1月
以賤價加盟曼城

8)
桑拿士表示有興趣接手愛爾蘭國家隊

9)
無聊傳聞一則......
賓尼迪斯被指想向新特蘭開價
以哥治再加現金
總值1000萬鎊既出價
利誘佢地出讓射手鐘斯

10)
咸美頓既16歲天才中場占士麥卡菲
吸引到包括利物浦,巴塞隆拿,拉科等大會既注意
上星期既一場比賽
仲吸引左20間大球會既球探去吼路

11)
後衛 Lorenzo De Silvestri 仲未同拉素達成續約協議
意大利傳媒指幾間大會都想搵佢以自由身加盟
當中包括AC米蘭,國米,祖雲達斯同埋阿仙奴

12)
傳聞雲加準備派基拔圖施華聽晚串演中堅
但被後者拒絕
增加左佢地不和傳聞既可信性

13)
傳聞車路士願意出價1500萬鎊買維拉既巴利
但奧尼爾已經講明冇打算放人

14)
西維爾將為拉莫斯被熱刺搶走而作出投訴

2007-10-29 (2)

1)
利物浦將於30日內為7億英鎊進行債務重組
事緣利記起新球場最初估價要1億8000萬鎊
但而家嚴重超支
而家估計最少要4億英鎊先可以埋單
加上球會本身原有既債務
令債務重組成為利記唯一既選擇
暫時未知嚴重負責對球會買賣球員既影響

2)
拉莫斯成為熱刺既新領隊
簽約4年半
週薪高達9萬鎊
成為全球最高薪領隊
而熱刺據報為佢向西維爾賠償2500萬鎊
另再賠償被炒既祖爾520萬鎊

拉莫斯於1月將獲撥款4000萬鎊以作增兵
佢透露目標有舊將簡奴迪同埋丹尼爾

有入自然有出
據報佢會清除部份瘀血
當中包括保羅羅賓遜

3)
西維爾提升B隊教練甘美尼斯接手
佢尋晚首次帶隊就炒左華倫西亞3:0

但幾日前已有消息指佢只係臨時教練
西維爾既目標其實就係華倫西亞既教練科利斯

但做戲咁做
科利斯尋晚於賽後被華倫西亞以成績差為理由炒左
(小弟覺得同高層不和先係佢既真正死因
詳情有機會先講)
而家有消息指西維爾可能即刻搵佢過檔
而華倫西亞就被傳會搵犘連奴加盟

4)
前錫耶納教練L.迪肯尼奧
成為昆士伯流浪新領隊既大熱

5)
阿仙奴既青訓總監林伯拉迪
被傳獲邀擔任愛爾蘭既教練

6)
哥迪奧拿於01年被指服用興奮劑罪名成立
日前佢終於上訴得直
成功還自己一個清白

7)
前法國U-21代表隊既射手 Jimmy Briand
被傳成為紐卡素既最新增兵目標
現年22歲既佢一度成為阿仙奴既目標
當時雲加派基文迪睇左佢好多場比賽

2007-10-29 (1)

有幾場波想講:

1)
第一場講既梗係愛隊利物浦對阿仙奴
兩隊賽前都於聯賽未輸過
紅軍連場失利後
於主場對住之前連羸12場,氣勢正盛既兵工廠
賽前被略為睇淡

賓尼迪斯以禾路連同埋古積特串演左右中場
中場中路就有沙比艾朗素傷愈復出
客隊由於有尹佩斯仍要養傷
雲加寧願用少個前鋒
索性以路斯基正選登場
雙方都以一個介乎 4-5-1 同埋 4-4-1-1 之間既陣式
搶中場既心態非常明顯

上半場以主隊既表現比較好
7分鐘佢地更令人驚喜先開紀錄
謝拉特把握對手人牆出現空隙勁射先開紀錄
球波其實冇咩角度
連講波既陳炳安都話如果冇排人牆既話
球波佢都可以撲到

之後主隊繼續人到波到
令客隊難以組織攻勢
後防仲表現出近期難得既高水準同埋集中力
希比亞同埋加歷查仲試過連環護空門
唯一可以挑剔就係後者曾於禁區起手肘打伊保爾

而中前場方面只有缺態既托利斯交唔到貨
佢地既之後既幾次埋門都有一定威脅
半場統計5射5中
不過有優勢下都只係羸得一球
就為被追平埋下伏線

半場利物浦以哥治入替形同虛設既托利斯
佢以表現證明佢其實應該得到更多既出場機會
佢無論於前場拖住個波,回傳同埋埋門都有一定水準
但可惜都唔能夠為主隊拉開比數
有少少體力不繼既佢地之後既時間仍有一定既攻勢
但就明顯唔夠阿仙奴既入肉

57分鐘,伊布爾狂抽省中近柱
冇人看管既法比加斯補射竟然遠遠偏離目標
但已為紅軍後防響起警號
之後雙方分別換入班拿約同埋禾確特變陣

68分鐘,沙比艾朗素衝門後落地扭傷右腳
利記被迫以艾比路亞入替串演防中
小弟覺得沙比艾朗素既傷出
係利記被追和既其中一個關鍵
因為艾比路亞唔慣踢防中
而法比加斯自此既表現就更加活躍
佢先突入禁區時明顯被加歷查拉跌
但利記竟然又唔使被判罰12碼
不過佢地過得到初一
都過唔到十五

因為阿仙奴最終憑法比加斯於77分鐘
接應希比既過頭波
放甩艾比路亞起碼幾個身位
輕容快腳射死拉爾拿
佢既入球唔止令賓尼迪斯失望
相信去吼路既費格遜都會一樣失望

而佢於86分鐘把握希比亞既誤傳
於20碼遠射又中柱
後備入替既賓特拿補射又高出
整定阿仙奴既連勝走勢要終止

而利記就執返1分都偷笑
不過佢地於主場已經失左8分
難怪賓尼迪斯賽後面都黑埋
不過,賽後托利斯同埋沙比艾朗素都證實要抖成個月
馬斯查蘭奴亦要抖幾個星期
相信佢老人家既心情會更惡劣

2)
車路士主場大炒曼城6:0
真係好令人意外
林伯特加上杜奧巴既威力果然超勁
但仍要拜客隊既差勁防守所致
佢地輸晒中場已經大鑊
後防,特別係左閘既加拉度,仲盯人唔緊
真係想唔輸都難

3)
AC米蘭主場對羅馬
又輸0:1
都唔知佢地踢到幾閎先識於主場羸波
而客隊上季有托迪射失7球12碼
幾日前就到文仙尼射失
尋晚又有迪羅斯玩高章射失
究竟佢地全隊有邊個識射12碼架?

2007-10-26 (2)

1)
傳聞新特蘭想於1月向曼聯開價600萬鎊買布朗

2)
傳聞國米想向阿仙奴開價1400萬鎊買雲佩斯

3)
傳聞曼城想向海倫芬開價1000萬鎊
買佢地既巴西射手阿方素

4)
傳聞於維拉冇出場機會既蘇連遜
可能於1月轉投桑坦德

5)
傳聞富明尼斯想向維拉利爾開價600萬鎊買列基美

6)
傳聞皇馬想向桑坦德開價1000萬鎊買格雷

7)
泰亞高加盟祖雲達斯後由於出場機會唔多
而要求於1月離隊
意大利傳媒指祖記想用佢去交換維拉利爾既列基美

8)
曼城將卡斯柏舒米高外借到卡迪夫城1個月

2007-10-26 (1)

想先講幾件關於領隊既消息:

1)
雖然班主希斯公開表示仍然信任賓尼迪斯
但有消息指如果利物浦既戰績再冇大起色
佢老人家將被開除

但小弟覺得就算佢真係冇得撈
都一定會係季尾
冇可能係而家
因為咁既日子唔會有人夠吉士接手
而對球隊運作都唔會有利

2)
麥臣正式加盟保頓
簽約兩年半

小弟覺得佢既當務之急係於1月搵幾件好後衛
同埋留住幾件可能有離心既主力

3)
祖爾終於被熱刺解僱
而一隊教練曉頓亦冇得留低
而基夫阿倫就被委任為臨時領隊
拉莫斯就被傳熱刺搵佢接手
而普耶就被傳成為副領隊既人選
以協助拉莫斯適應語言問題

雖然祖爾好肯用新仔
但用勁多錢去亂買人真係被人炒都抵死
買戴倫賓特,保定同埋卡佩奧
加埋竟然已經用左超過3000萬鎊
成隊保頓,雷丁或者打呲既正選都未必要用咁多錢啦
佢買人既眼光同出價計數既能力
唔單止被雲加, Big Sam, 韋斯咸時代既哈利列納比下去
比好多人打機玩'Football Manager'更加差

小弟於 preview 亦講過佢未能解決
隊中冇好 keyman 既弱點
結果中場兩件廢物
今季分波同回防都唔掂
整定隊波唔會有好下場

而雖然代隊長羅比堅尼
開晒聲同埋每場都搏晒命去撐佢老人家
但佢始終食唔住某0的大牌球星
當然令佢死得更快

不過唔多有料既佢
依然再被傳加盟阿積士就幾令人意外

4)
杜斯亞表態想接手執教愛爾蘭

5)
德國足總同意與教練路夫續約至2010年

2007-10-25 (2)

1)
之前話推左保頓既麥臣
而家同李斯特城傾掂數
將於短時間內加盟保頓

2)
意大利傳媒指祖雲達斯斟林伯特過檔

3)
雲加上星期六返祖家睇里昂對摩納哥
英國同法國兩地既傳媒就即刻跟進
話佢老人家原來係去睇蟀
仲有消息指阿仙奴會於1月向里昂開價2000萬鎊
買賓施瑪同埋賓艾化

但亦有消息指曼城願意出價1500萬鎊買賓施瑪

4)
馬田斯否認會於1月加盟祖雲達斯
佢聲言紐卡素有 Big Sam 既日子都會有佢

5)
傳聞AC米蘭願意出價1800萬鎊買貝碧托夫

6)
傳聞艾美臣將於1月以100萬鎊既賤價
由巴塞隆拿加盟馬體會

2007-10-25 (1)

大件事......!
利物浦尋晚於歐聯分組賽又輸多場
作客以1:2不敵比鍚達斯
而家於分組3場只得1分排包尾
如下3場要全勝先可以肯定出線

今場利記既表現依然冇回勇跡象
後防方面
加歷查同埋希比亞持續不穩
前者既解圍失誤加上後者連續第二場擺老烏
造就左對手先開紀錄
而失第二球
後者既出腳實在係慢
而幫佢補鑊既竟然唔係前者
而係盧卡斯
小弟講過n次唔夠好中堅用會好大鑊......唉!

芬倫同埋懷斯既助攻亦繼續死火
成條防線只有拉爾拿係比較好
唔係佢利記一定唔止失兩球

中場方面
謝拉特既狀態持續低迷
佢離門15碼既插水式頭槌雖為球隊領來一絲既希望
但佢於上半場錯失左一個追平1:1既黃金機會
小弟覺得其實係今場比賽既其中一個關鍵

而賓納特同埋巴布就繼續夢遊球場
另外,冇左沙比艾朗素
令球隊少左長傳打突擊

前線既古積特同埋禾朗連都係非常大方既球員
小弟覺得哥治應該得到正選
或者可以較早後備落場
佢於球隊落後兩球,83分鐘先落場
賓尼迪斯既調動實在遲得有點兒過份

幾日後就要主場對連羸12場
兼比利記失少4分既阿仙奴
小弟只有寄望到時沙比艾朗素同埋托利斯可以復出
而幾個後衛同埋謝拉特可以回勇

而因為阿仙奴應付高波既能力只係一般
賓尼迪斯最好肯用哥治屈機啦

否則......

2007-10-24

1)
阿仙奴尋晚主場狂數布拉格斯拉維亞7:0
平左歐聯羸波既最大差距紀錄

2)
佩亞達後繼有人
佢既遺腹子艾托日前出世

西維爾已承諾為艾托成立慈善基金
希望艾托長大成人後
可繼承佩亞達生前著既16號波衫

3)
愛爾蘭正式決定炒左史當頓
奧拉利被傳將會接手

4)
原來桑拿士已經拒絕加盟加頓

5)
碧咸要搵球會跟操
佢既選擇包括:
葉士域治,曼聯,阿仙奴,車路士,熱刺,韋斯咸同埋皇馬

6)
華斯高搵羅馬里奧做臨時領隊

7)
熱刺領隊祖爾聲稱佢會於1月
放棄部份冇表現既球員
傳聞當中包括:
保羅羅賓遜,迪科爾,戴倫賓特,索高拿,李榮杓,戴臣......
但小弟覺得第一個被清除既瘀血應該就係佢老人家

8)
由於迪達同埋卡勒實在太唔掂
傳聞費爾成為AC米蘭既增兵目標

9)
里昂會長承認想將杜奧巴帶回法國
法國傳媒指佢地願意開價2000萬鎊

10)
費倫天拿既總監哥雲奴透露
原本施素高係佢地既增兵目標
但佢同利物浦續約後既170萬鎊年薪
已經超出費倫天拿既 budget
令佢地轉移目標

11)
傳聞於皇馬地位不保既魯爾
成為曼城於季尾既增兵目標

2007-10-23

1)
西班牙傳媒指烏化盧斯同埋巴迪斯達
都成為左西維爾於1月既增兵目標

2)
唔夠後衛用既祖雲達斯
被指打算向獨立隊開價100萬鎊買 Javier Matheu

3)
意大利傳媒指國際米蘭打算於季尾
向拿玻里開價600萬鎊買佢地既阿根廷攻擊球員拿維斯

4)
堅尼否認會接手執教愛爾蘭國家隊

5)
森巴同布力般流浪續約5年

6)
高文澄清保頓冇搵過佢接手
而麥臣同埋保夫萊特
就已經推左保頓既斟酌
上季被查爾頓怒炒,而家教緊高雲地利既杜維
而家就被傳成為保頓既最新目標

7)
紐卡素尋晚於主場羸熱刺3:1
踢9場得17分
係佢地10年來最好既開季成績

另一方面, Big Sam 表示由於非洲國家盃期間
球隊會冇左幾名主力
佢可能會出手再買人以維持實力

8)
迪達經過上訴後
獲歐洲足協減少停賽一場

9)
尼亞拿最近於愛斯賓奴同埋國家隊既好表現
令佢成為皇馬最新既增兵目標

10)
於利物浦市打呲犯錯頻頻既球証卡頓保
將唔會於下輪既英超賽事中執法
但要注意既係佢只係輪空
並唔係被罰停吹賽事
佢於週中既歐洲足協盃賽事仍然會執法

11)
傳聞熱刺準備於1月向維拉利爾借用列基美
如果佢成功適應英超既節奏
熱刺將於季尾提出買斷佢

12)
馬斯查蘭奴表示唔希望佢既轉會費被定得太高
以免利物浦因而放棄留用佢

13)
岩岩由車路士轉會到阿仙奴既迪亞拉
由於冇咩出場機會
表示如果情況持續
將於1月要求轉會

14)
意大利傳媒指泰基拿迪可能重返阿特蘭大

2007-10-22

1)
傳聞英格蘭足總想斟摩連奴
仲開價年薪700萬鎊
簽佢至2010年

但當時人已講明冇興趣接手
仲話佢既下一站多數係意大利球會
當中最有機會既就係AC米蘭

另一方面,繼 Big Sam 同埋奧尼爾後
每年人工最少要500萬鎊既奇連士文
亦被傳會接手英格蘭這個難攤子

2)
古莊臣被傳將加盟華倫西亞
轉會費為800萬鎊

3)
桑拿士被傳成為保頓新教頭既目標
但佢上年曾經講過話以後都唔想再教波

另一方面,保頓如果最終選擇起用高文
就要向皇蘇賠償100萬鎊

4)
有消息指抖左好耐既杜夫將於12月復出

5)
打呲郡為左改善入球能力
被傳將於1月向紐卡素借用艾美奧比半季
同埋向樸茨茅夫開價700萬鎊買紐根特

6)
史當頓又一次被傳會被愛爾蘭足總解僱
小弟覺得今次應該會係真
因為愛爾蘭已經肯定冇份踢歐洲國家盃既決賽週

7)
早幾日講過車路士,皇馬同埋米堡都想斟
FC Midtjylland 既丹麥年青中堅 Simon Kjaer
而家有消息指連利物浦都有興趣
個小朋友既身價估計約值300萬鎊

2007-10-21

1)
先講尋晚愛華頓對利物浦
主隊先贏後敗
關鍵係佢地既右閘希拔太魯莽
連累球隊輸12碼兼踢少個

講真就算謝拉特射成1:1
比賽都只係重新開始
以利記尋晚既水準
有冇得羸波其實好成疑問
但希拔既犯錯令利記及後明顯佔優

不過,講返轉頭
小弟認為場波和波比較合理
因為完場前主隊既尼史葛於禁區內真係比人拉跌
但主隊就得唔到12碼
難怪賽後球證被人狂插

2)
奧尼爾同埋 Big Sam 都被傳可能獲邀執教英格蘭

3)
羅馬既意大利國腳龍門古斯被傳
成為巴勒莫於1月既增兵目標

4)
賓尼迪斯否認森美李爾既回巢

5)
德古天奴域透露佢唔想加盟紐卡素
係因為紐記冇份踢歐聯

2007-10-19

1)
前阿仙奴主席彼得希活相信
雲加有朝一日會成為球會主席

2)
賓尼迪斯再次表明唔會賣哥治

3)
傳聞岩岩失業既森美李爾會重返利物浦
擔任副領隊一職

4)
卓卓於港隊出發前玩失蹤
佢解釋話因為護照有問題
港隊教練黎新祥對此勁不滿
表明任內唔會再選佢入港隊

5)
車路士,米堡同埋皇馬都被指想簽
丹麥 U-19 小將 Simon Kjaer

6)
傳聞曼城想各巴勒莫開價1000萬鎊
買佢地既射手阿馬利

7)
艾美臣承認佢將於短期內被迫離開巴塞隆拿
而家傳聞佢可能於1月以賤價加盟紐卡素

8)
古莊臣傳聞於1月以借用身份加盟熱刺

9)
里昂既射手賓斯馬被傳成為
AC米蘭,祖雲達斯同埋費倫天拿既增兵目標
意大利傳媒指佢既身價高達1200萬鎊

10)
FK Teplice 既捷克20歲射手 Martin Fenin
被指可能以600萬鎊既價錢
於1月加盟利物浦或者阿仙奴

2007-10-18 (2)

1)
唔肯續約既林伯特被傳於1月離隊

2)
森美李爾向保頓請辭
而球會既 General Manager 麥柏蘭亦同時離職
傳聞高文,布魯士,麥臣甚至於史必都係保頓既考慮人選

3)
Big Sam 表示於1月非洲國家盃期間
由於陣中會有4名球員短暫離隊
所以巴巴耶路將會得到出場機會
亦係佢於紐卡素既最後一次機會

4)
雖然羅馬同文仙尼傾掂續約
但傳聞羅馬將會於季尾待價而沽

2007-10-18 (1)

先講尋晚俄羅斯對英格蘭既大戰
英格蘭一心死守
中場4件全部縮後
再搵機會突擊
講真血肉長城上半場守得唔錯
俄羅斯被人一種老鼠拉龜既感覺

雙方半場各只得1次有威脅攻門
但'好波不及好運'
26分鐘,主隊既沙里恩洛夫放冷箭
球波被羅賓遜撲到再中柱
大難不死既英格蘭
之後唔夠3分鐘就入波
人仔細細既奧雲接應長傳
竟然頂贏伊拿舒域治二傳朗尼
朗尼身邊既V.比里蘇斯基竟然掛住舉手示意越位
絡果冇人逼住既朗尼輕易大腳抽入

下半場,主隊教練軒迪克即刻變陣
以托比斯基入替失波罪人V.比里蘇斯基
將陣式由3-5-2轉為4-1-3-2
佢地捱過初段兩次死球既失波危機後
軒迪克再以柏夫里約真高入替
名氣大,但冇表現既基沙哥夫
而托比斯基逐漸發揮佢補位快既作用
令球隊既運作更加機動
艾沙維同埋施哥夫亦勤加走動
全隊傳失波既次數比上半場少左好多

而英格蘭既防線明顯被人拉得開左
亦踢得開始有少少亂
連朗尼都要墮後幫手
佢地既失守其實只係時間既問題

69分鐘,上半場射中柱既沙里恩洛夫被朗尼於禁區邊拉跌
但前者借勢插入禁區令球證誤判12碼
由柏夫里約真高操刀建功
4分鐘後,佢面對英格蘭更亂既防線
亂軍再執一隻死雞
俄羅斯於4分鐘內靠佢入兩球而由地獄上返天堂

之後到麥卡倫要為英格蘭變陣
但佢既調動一睇就知唔掂
林伯特,達寧同埋哥治
入替尼史葛,祖高爾同埋胡禮菲臘斯
巴利被移後踢左閘
林伯特一直以來拍住謝拉特都冇好下場
今場當然唔例外

起用哥治屈機當然冇問題
但應該換走既係全場只有一下靚二傳既奧雲
而唔係胡禮菲臘斯
佢被換走之後
米卡李察士要一個人踢晒右邊
麥卡倫直接廢左自己既右路

最衰麥卡倫冇吉士
換人睇名氣
俄羅斯既基沙哥夫雖然有一定名氣
但軒迪克覺得要換就換
換轉係軒迪克教英格蘭
小弟覺得奧雲尋晚一定會被換走

兩年前英格蘭班高層一心唸縮數
麥卡倫既年薪只係艾歷臣既6折(300萬鎊/500萬鎊)
以為每年可以慳200萬鎊
但佢地有冇唸過(或者識唔識去唸)
麥卡倫既功力其實連艾歷臣6成都冇......

2007-10-17

1)
紐卡素既主席表示奧雲既合約
其實係有 buy-out clause
不過有關既期限已過
即係暗示奧雲已經唔可以隨意轉會
而舒利亞亦表示奧雲樂意留隊
粉碎佢於１月加盟曼城既傳聞

2)
迪比亞路同祖雲達斯續約至2010年

3)
尋日講過曼聯想簽祖雲歷
柏迪遜既高層講明要到季尾
先會考慮0個小朋友既去留問題
而西班牙傳媒指皇馬原來亦有興趣搵佢加盟

另一方面,泰維斯既細佬去曼聯試腳失敗
不過唔係因為唔好波
而係佢去左英國一個星期就已經有思鄉病

4)
尋日講過比安基想離開曼城
而家就有消息指曼城可能將佢外借到AC米蘭
亦可能被賣去拖連奴或者拿玻里

而盧卡利尼亦想離開薩克達
不過佢多數以先以借用形式
加盟AC米蘭或者拖連奴

5)
傳聞阿仙奴同埋拉素都準備向河床出價700萬鎊
買佢地既21歲中場費蘭迪斯

6)
曼城既３號門將伊薩臣
為左保住國家隊既位置
可能於1月離隊
佢而家屈居於卡斯伯舒米高同埋赫特之後

7)
國米同埋祖雲達斯都繼續搵後衛
一齊睇中燕豪芬既迪哥斯達

8)
傳聞車路士打算向漢堡開價2000萬鎊買雲達華治

9)
傳聞韋斯咸打算向愛華頓開價1200萬鎊買安德魯莊臣

10)
傳聞樸茨茅夫打算向屈福特出價400萬鎊買馬華龍京治

11)
荷度否認會執教昆士伯流浪

12)
西班牙傳媒指皇馬將於季尾
向華倫西亞開價3500萬鎊買佢地既射手韋拿

13)
傳聞貝迪斯想簽波圖既射手普斯迪加

14)
阿仙奴小將阿曼特查奧爾反對查爾頓既借用建議
佢表示寧願留隊爭取出場機會

15)
傑斯同曼聯續約至下季尾