2008-1-8 (1)

尋日個頭同個胃痛到想死
冇寫賽後感
而家補返
有5場足總盃賽事想講:

1)
維拉對曼聯

雖然奧尼爾賽後話覺得輸得唔抵
但實情係佢地輸波只係時間既問題

雖然卡比路話對0的快馬既表現有好感
但佢地班快馬其實會發覺
成場波既發揮空間都唔多

而佢地新年0個日靠死球屈機入左兩粒
但同一招對住曼聯條防線根本冇用
因為曼聯搵左適當人選去貼身招呼佢地

就咁樣兩度板斧都被人尅制住
之後要睇就係點樣可以唔使失波
但曼聯全場都係睇住來食
到後段先換入感冒初癒既朗尼入場
就令到維拉既防線亂左陣腳
紅魔鬼要羸波真係唔難

而面對進攻冇威脅既對手
最終入一球或者兩球其實分別唔大
最大意義反而係朗尼既入波令卡比路留下好印象

2)
般尼對阿仙奴
對小弟而言
最大賣點就係場波好可能係列文既告別賽

場波既關鍵可能係雙方既射手
主隊既拉菲特6分鐘頂中門框
先放生左兵工廠
跟住伊度亞度9分鐘就開記錄
一來一回對士氣同信心好大打擊

拉菲特冇運冇人怪佢
不過下半場仲唔生性於球証隔離
都粗野攔截基拔圖施華
就真係爭唔落
齊人既時候都踢唔羸兵工廠
踢少個天更加冇運行
伊度亞度一下簡單直線
就益左賓特拿入埋'保險'既第二球

講返轉頭
其實般尼踢得唔差
面對演出其實好一般既兵工廠
再加上辛達路斯同埋阿曼特查奧爾既低能犯錯
全場都入唔到波
只好怪自己把握能力差

而兵工廠踢得比較好既只有一對箭頭
其餘既都係行行企企,食飯幾味
走位同埋組織都係水準以下
不過咁都有得羸
就只係因為場波初段既一來一回
同埋質素始終高好多

3)
布里斯托城對米堡

修夫基聲稱佢地未失波前控制戰局
只係衰入唔到波
但以佢地咁既防線就只有失波既下場

不過唸唔到今次輪到舒華沙犯錯
人地死球斬埋來
咁近都冇出去沒收
與其話佢被人阻住
不如話佢冇咁既意識

不過米堡有運在對方個龍門仲差
封近柱都可以咁核突符個波入網
而近有運既係下半場主隊球員對住咁大個空門都唔入
就益左米堡有後福

最初只睇精華都唔敢咁快下定論
但睇晒成場波既重播
只可以講米堡唔使輸之餘
重羸埋真係大話夾好彩

4)
盧頓對利物浦
(連埋對韋根場波一齊講)

利物浦前幾日對韋根踢得失禮
前晚作客盧頓就仲衰

對韋根場波令人意外咁用賓納特
而唔用班拿約
跟住只用托利斯一個箭頭改踢 4-5-1
只入得一球既原因除左把握差之外
就係因為馬斯查蘭奴同埋沙比艾朗素都唔擅長後上攻門
4-5-1 既威力唔止拉開兩邊
更主要係中場球員後上攻門令對方後衛防不勝防

賓尼迪斯解釋踢 4-5-1 係要從兩邊拉開對手防線
但小弟覺得佢既解釋唔 make sense
因為只要負責側擊既球員交到功貨
踢 4-4-2 都可以有相同成效
但如果佢老人家要求抖左兩個月既賓納特
一出場就做到野
就同佢既排陣原因一樣咁令人費解

當然之後謝拉特罕有犯錯就益左巴布爾入波
連一球優勢都保唔住
亦令布魯士繼續 keep 住於聯賽帶隊
從未輸過比賓尼迪斯既優良數據得以延續

前晚作客對盧頓
利記踢得咁辛苦
可能同對方發窮惡有關
人地領隊提出要利記奉獻20萬鎊收入去江湖告急但被拒

但更大原因係佢地比對韋根既時候踢得仲差
而陣式既演練比幾日前更令人莫名其妙
名義上既右中場班拿約好多時移入中路搵食
原本唔係大問題
不過芬倫今季既水準明顯跌 watt
助攻能力差左起碼一半
結果右路既側擊多由古積特負責
加埋左路既巴布成日一個人踢波
前線只得哥治一個
最慘既係高佬於前場似係睇波
而唔係踢波
因為冇人供應高波

睇人腳應該係 4-4-2 陣式
結果又係 4-5-1
但側擊同後上攻門既能力就比對韋根時更差
而冇組織既佢地似打緊亂章
入波都只係靠人地防線犯錯

利記被追平個球係冇運
但要講既係佢地入波之前唔使先落後
其實佢地已經好有運

5)
史篤城對紐卡素
客隊今場用奧雲
但依然唔識入波
睇來舒利亞應該出山
不過唔好取代 Big Sam 做領隊
而係做前鋒教練

紐記上半場真係控制到比賽
不過下半場就似乎以主隊踢得比較好
紐記唔使輸波
真係要多謝班防守球員有表現
難怪 Big Sam 要重點讚下班防守球員
否則佢可能已經被人炒左

最後想講下佢地既人腳
今場 Big Sam 用人
已經令小弟有儲夠數出場既感覺
而安迪卡奴爾同埋18歲中場小將路亞路亞都要做後備
人腳真係好唔夠
Big Sam 真係要快手買人
因為之後惡戰連場

P.S.:
如果唔係低組別對手把握差
以兵工廠,米堡,利記同埋紐記既表現
前者好難羸得咁輕鬆
其餘3隊甚至乎應該已經出晒局