2008-1-1 (1)

新年快樂!

先補返幾場波既賽後感:

1)
車路士對紐卡素
主隊羸波羸既兩球都有運
講真佢地場波踢得唔好

排陣仲令小弟R晒頭
祖高爾 + 卡奴 + 胡禮菲臘斯 既前場組合一睇都知唔會有火花
之前摩連奴於傷兵潮都被迫用過類似既組合
格連都唔知唸咩
小弟寧願用比沙路踢正選好過
起碼有個唔同功能既
擦出火花都易0的

波歷克可能因為未上力
幾日內捱唔到兩場波
今場冇上一場咁搶

紐記方面
表現係抵讚既
Big Sam 今次用 4-5-1 係合理既排陣
因為實力真係唔夠人好

點名想讚既係菲爾同埋畢特一對防中
前者踢法雖然粗枝大葉
但勝在夠勤力
而家巴頓單野應該有排搞
Big Sam 可以考慮用佢多0的

另一個想講既係畢特
唔計下半場一開波幾乎擺老烏
佢今場真係踢得好
上半場仲幾乎助攻馬田斯入波
下半場仲有入波
不過最重要既係以佢為首既第一道防線
冇被對手比下去
佢係小弟認為今場最好既紐卡素球員
佢既表現再次令人覺得
米基爾既1600萬鎊身價係好唔合理

當然基雲今場表現穩定
幫球隊一度吊住條命
亦係另一個踢得比較好既紐記球員

佢地追平後既十幾分鐘
一度迫得車仔幾辛苦
輸第二球係輸在判証廢
最緊要輸波唔輸士氣

佢地今晚對住曼城
Big Sam 星期日去左睇曼城對利物浦
見到人地以夏文 + 哥魯卡既防中組合化學作用一般
艾蘭奴又冇態
華素爾亦過左高峰期
應該知聽晚點搞掛

以小弟愚見
只要後防唔大意
比爾唔好掛住助攻
等馬田柏度夫冇空位踢突擊
中場 keep 住對車仔既水準
有冇得羸既關鍵反而係
睇 Big Sam 點樣砌掂前線既組合
小弟心水: 馬田斯 + 維度卡
前者夠靈活
後者可以去同鄧尼鬥衝
反而辣椒仔今場岩踢中場

2)
愛華頓對阿仙奴
阿仙奴贏4:1
睇賽果以為好勁
其實只係主隊防線突然走樣

當然兵工廠下半場兩分鐘就追平
亦係場波既轉捩點

3)
韋斯咸對曼聯 同埋 打呲郡對布力般流浪

兩場波都係捉到鹿唔識脫角
12碼唔入就輸返轉頭

不過要注意既係
韋斯咸係踢得比較曼聯好
全場入波機會其實仲多

而打呲郡反勝為敗
同佢地下半場失機頻頻有關
這個亦係佢地今季既最大問題
全季只有作客樸茨茅夫同埋紐卡素兩場波可以一場入兩粒
咁既球隊踢得幾有鬥志都冇用

4)
曼城對利物浦
兩隊既穩定先生鄧尼同埋加歷查一齊擦靚自己個招牌
不過前者更加搶鏡
佢一夫當關既表現令利記下半場羸晒形勢都冇用
毫無疑問係場波既最佳球員

不過講返轉頭
利記羸唔到波既另一原因係謝拉特疲態畢露
今場波係佢近來比較差既一場

5)
想寫樸茨茅夫對米堡
不過未睇波,同埋要等再有時間先

樸茅今場波又中柱
計埋之前12碼唔入
同埋又遇過侯活上晒身
佢地已經5場主場冇波入

而米堡......唔識講
真係太海鮮
好難估,亦唔易寫