兩場波想講:
1)紐卡素對保頓
基瑾既回歸令好多人對紐記突然充滿期望
主場對保頓普遍被睇好
最終互交白卷相信會令人幾失望
基瑾通常用 4-4-2 陣式
相信之後都會係
但今場波連搵11件出場都難
所以都冇謂唸點解佢既第一擊竟然排出冷門既 3-5-2 陣式
講真睇直播既時候
小弟係搞唔清楚佢既陣式
可能因為唔係踢慣既位置
部份球員明顯踢唔出平時既水準
而佢地羸既只係控球時間
因為唔識攻都係冇用
難怪基瑾被指想打泰亞高同埋卡域克既主意
中場出鏡比較多既有尼索比亞
因為佢成日要斬波
不過又冇咩邊腳特別靚
而史堤芬泰萊同埋羅辛奴就由於後防好清閒
而多左機會開上前場助攻
但就冇咩建樹
前線既艾美奧比同埋奧雲亦擦唔出火花
印象中抖左好耐既前者
踢到77分鐘先第一次於危險出帶頂羸對手
反而佢抽水打人小弟就仲有印象
而後者最令人印象深刻既
就只有唔知道佢可以戴幾耐既隊長臂章
對手保頓全心為1分而死守
後防全場都冇嚴重失誤
如果唔係基雲失左位都擋到森姆既攻門
佢地隨時有意外收鑊
結論:悶戰一場,和波都好合理
不過保頓既護級路途近左少少
基瑾既前6目標就遠左......
2)布力般流浪對米堡
前者近年既對賽往績羸晒
但最終搞到咁狼狽先迫和對手
就要怪下佢地條防線又睇人唔緊
連小弟都知有死球既時候
米堡既韋達就會開上前場助攻
但尼爾遜都可以睇佢唔住
講真佢地今季條防線繼續粗枝大葉之餘
大意失誤亦比上季多左
實在係佢地爭前6既障礙
如果唔係費度只係有少少走下坡
佢地條防線會仲大鑊
而中前場方面
摩頓柏達臣同埋麥卡菲都走樣
可以倚靠既只有辛達告魯斯同埋賓特尼
今場全隊亦只有後者既表現比較似樣
米堡方面
今場又係被睇淡就嚇人一驚
不過最終守唔到尾
除左因為冇運兼把握力差
拉唔開比數
就係佢地條防線都唔多掂
面對下半場踢得好左既主隊
韋達始終係防線既計時炸彈
助攻能力超強既佢結果又包越位
講真佢爆鑊同埋助攻入波既次數一樣多
都幾有娛樂性......
真係岩晒'大娛樂家'基瑾
唔怪得有吹水新聞指紐記想出價400萬鎊買佢
不過小弟暫時就唔多信......
3 comments:
韋達好明顯又包越位
侯夫又睇唔得佢咁多
佢真係令人又愛又恨
亦令侯夫無助攻機會
前鋒又不能送波入網
希望阿方素能加盟啦
悶和保頓有少少失望，不過始終係基瑾第一埸，加上無咩人用得，又唔可以要求太多。反而艾美奧比見到好似都幾勤力(當然，做唔做到野又係另一回事)奧雲又係無咩表現。羅辛奴打防中打得唔錯，不過中間真係無咩傳送，所以始終要買中間。
To: CK
侯夫有 potential 成為一個好中堅
但路途仲好遙遠
佢同辛達路斯都唔夠硬朗
兼冇位置感
但小弟比較睇好侯夫
因為佢助攻能力比較好
亦靈活少少
而更重要既係佢雖然於國家隊級既國際賽經驗
少過辛達路斯好多
但平常於球會出場既機會較多
對一個年青球員而言更為重要
米堡既前線把握力真係仲有好大既改善空間
羅致埋門一腳超強既艾維斯
應該會係其中一個解決方案
To: 舒利亞
艾美奧比同奧雲冇料到
最大原因係冇供應
(當然以前者既能力
送到埋口佢都未必食得出)
Post a Comment