尋晚阿仙奴對紐卡素
主隊靠艾迪巴約帶罪立功於下半場連入兩球
加上畢特既烏龍波
令紐記收足3隻光蛋
亦令小弟有0的意外
賽前兵工廠有唔少不安因素
週中大敗,內訌同埋
部份主力唔夠時間回氣
就算佢地有主場之利
對住以逸待勞既紐記
都唔見得質素較高既佢地特別有優勢
講真只睇上半場
未見夫添既主隊
對住更唔齊人既客隊
初段明顯未入局
仲有路斯基早段傷出
客隊更令人有少少反客為主既感覺
不過阿倫史勿夫少少唔夠運
未能先開記錄
就放生左主隊
小弟認為這個係今場波既其中一個轉捩點
而上半場中段起
主隊開始慢慢上力後
之後既時間都未曾試過處於下風
不過今場波基雲既表現唔錯
伊度亞度同埋迪亞比既中距離都威脅唔到佢
而後防亦只有史堤芬泰萊犯過一次錯誤
overall 幾穩定既防線
加上中前場又迫得算緊
就為客隊保住半場不敗
但下半場一開始
佢地既防線終於出事
人多蝦人少之下
艾迪巴約都可以有時間補中伊度亞度既中柱波
基雲幾好身手都冇用
而 lead 住一球既主隊可以睇定來踢
間中簡單幾腳又有埋門機會
入唔到波係佢地既射手腳風唔順
當然基雲繼續有好表現亦係原因
相反客隊羸既就只有控球時間
而唔係形勢
加上奧雲,杜夫同埋占士米拿
都受體力下降既影響
佢地幾個,以致全隊既表現明顯走樣
而只倚靠畢特,阿倫史勿夫同埋尼索比亞又做得幾多
中前場既壓迫結果真係唔算緊
而佢地後備席中冇咩好貨色可換入搏殺
令基瑾都冇咩可以做
結果下半場佢地連似樣既攻勢(或者應該講組織)都唔多
又點樣可以返平
艾迪巴約既第二球
同埋畢特既烏龍波
咁遲先出現
對主隊而言只係錦上添花
週中對熱刺既大敗
印象中係兵工廠今季既第3次低潮
但佢地全部都即刻反彈
反彈之快,一個字:勁!
前兩次佢地反彈得咁快都唔奇
但被熱刺狂數同埋內訌
咁大鑊都可以幾日內反彈
小弟真係估雲加唔到
近一兩個星期睇報紙
成日睇到佢老人家被人話失手
今場波希望可以令批評者收聲
之後要睇既係雲加點樣安撫賓特拿
同埋處理禾確特,列文同埋基拔圖施華既去留
最好就執靚0的條防線啦
而紐記方面
中後場既問題全世界都知
亦都講過 n 次
而前線既奧雲繼上場同艾美奧比後
今場同阿倫史勿夫又擦唔出火花
由於維度卡明顯已走緊下坡
小弟認為長遠而言
紐記應該搵個有二傳能力既射手去同奧雲合作
艾殊頓同埋哥治應該都會係好選擇
5 comments:
講真，我覺得各打半埸好波，不過唔同既係我地把握唔到機會。人地有人護到空門，我地失第二球又係有人護空門，但係人地護到我地護唔到。
今埸睇到我都有番d希望，因為無話俾人禁住打，係失左波後成隊死哂。
上半埸入唔到波，前面要負責任。基本上攻係有組織，可惜大家都唔多肯起腳。加上又有球禁區辛達路斯手球球證無吹。
全埸波要讚既係基雲，杜夫兩位。失三球其實都唔係好關基雲事。而杜夫上半埸踢得好生，無佢可能上半埸都壓唔住阿仙奴。
占士米拿回防都清唔少波，不過成日都係果套，好易俾人睇通。佢對住基治無啖好食。
上半場踢得好好,杜夫做了進攻既泉源,踢回blackburn及車仔時既水準,可惜只限上半場
下半場太快失球,四個後防都清唔到個波,
畢特,史勿夫,同尼索比亞三個今場打得最差,而後兩人在下半場差不多隱左形,令人失望,佢兩個時常好似踢自己波或唔適走位配合,令紐記今季時常都攻力疲弱,責任最大,而史勿夫再這樣好似夢遊球場,同埋唔知自己做緊乜既表現,下季無可避免要被kk清洗...
畢特太慢,佢踢個位對球隊咁緊要,但佢太慢,連繫唔到後防同中場,佢今季用得太盡,如果faye番來,佢最好做後備好d...
荷西安歷基明顯踢英超唔係太掂,好多時左面都比人爆,要中堅去補位,今季佢係球隊新加盟既球員中身價最貴,但表現未符理想,怪不得big sam都要貶佢做後備,我估佢下季會被kk清洗...
米拿好多時所企既位都好差,根本中場好難傳到波俾佢,下半場佢好多時都參與右路既防守多過進攻,變左另一個謝列美,我覺得佢雖然只得22歲,但好似再無進步既空間...
今季球員沒有以前果種堅毅既意志,次次在下半場好快失波後便成隊都冇左士氣,心態好唔專業,kk要協助球員改一改這種一失球就放棄左場波,好似唔想踢既劣等心理質數,否則今季既排名只能維持最高既第11名(算是較去季進步兩名,但沒有意思)
幾樣野想講:
1)
紐記上半場係踢得好
特別係初段仲反客為主
但總括成個上半場
又未至於好過阿仙奴
2)
紐記班友真係唔知點解唔多肯起腳
成場波只得4次攻門
真係太少
雖然當中有3次中框
3)
冇基雲
紐記一定唔止輸3球
4)
杜夫上半場真係幾生
不過佢向來體能唔多好
而復出唔耐又未上晒力
於下半場發覺佢真係謝晒
5)
占士米拿又係體力唔多掂
加上正如舒利亞同埋 sammysir 所講
佢好多時間回防
但咁樣就更加冇力去進攻啦
而佢既個人技巧唔算好突出
面對路數唔算好
但起碼夠快既基治
又邊會有運行
另外,小弟覺得佢既最大問題係
有時好鍾意一個人死去
6)
史勿夫全場令人有印象既
就只有被基治護空門0個球波
但小弟又未至於覺得佢夢遊球場
反而覺得佢因為踢既位置同做既野成日都有變
咁會令佢好難有任何一個位踢得好
佢之前被傳將會被基瑾清洗
不過原因好似唔係表現唔好
而係佢球場外既惡行
7)
尼索比亞係踢得唔好
不過唔係今場既事
佢上場都已經踢得唔好
小弟覺得因為佢未適應重新踢返中場
8)
畢特係唔好
但小弟想幫佢講句好話
紐記聯賽主場對阿仙奴0個場
畢特係踢得幾好
因為有巴頓同埋謝列美幫下手
但尋晚紐記既中場
除左佢同埋改踢中場既尼索比亞
係可以踢得比較防守性既
杜夫同埋占士米拿講真唔幫得好多
既要睇住法比加斯
仲要對付迪亞比同埋費文尼兩個藍領
成場下風都怪唔晒佢
9)
講鬥志
今場已經比對曼聯同埋利記個兩次好
不過當然仲有改善空間啦
10)
辛達路斯球波
小弟唔多肯定
P.S.:
兩位回返咁多隻字真係好
唔想只係有我講
冇人講
有時好想知人地點睇
利記似乎無意賣哥治喎!
唔賣好過賣
冇左佢
又少一樣武器
Post a Comment