2008-1-30 (1)

想講尋晚場阿仙奴對紐卡素:

幾日前足總盃鬥完
兩隊尋晚又於相同地點再對多次
阿仙奴用上更完整既陣容
用埋伊度亞度踢正選
當中只有高路托尼同埋路斯基缺陣
明顯比較重視聯賽

而客隊方面
尼索比亞由中場移回左閘位置
荷西安歷基之前既表現明顯未能令基瑾滿意
加上紐記已傳過幾單買左閘既傳聞
睇來佢過得到1月
都過唔到暑假

而羅辛奴今場就正選上陣
伙拍畢特作為球隊既第一度防線
阿倫史勿夫就明顯比上場退得後左
前場只得奧雲等運到

比賽開始後
紐記冇好似上場咁反客為主
可能同吸收左幾日前食3蛋既教訓有關

但更大既原因
應該係阿仙奴用上更完整既陣容
而幾日前先炒完紐記
球員信心十足
順理成章咁向紐記施壓

不過比賽初段
阿仙奴只係主導比賽
面對紐記起碼夠人多既防線
加上中路推進又被畢特同埋羅辛奴 block 左
所以初段並冇太多有威脅既攻門

而紐記雖然係唸住先死守
不過後面幾個如果有人唔生性
最終當然亦只有失波既下場

由於路斯基缺陣
替補既迪亞比既側擊能力又差得多
基治又唔見有太多助攻
兵工廠上半場既進攻多集中於右路
希比,沙格拿,費文尼,伊度亞度同埋艾迪巴約
都先後於右路進襲

而再次踢左閘既尼索比亞
唔知佢係咪踢唔慣
抑或佢始終攻強守弱
位置感不足
有幾次都出現失位既情況
而紐記又唔見有人同佢補到位
佢地於左路出事
就變成遲早會發生既事

而中路既史堤芬泰萊同埋卡卡巴
冇緊盯對手既一對箭頭
如果人地既射手走去邊線出波
佢兩個如果緊守中路
學人踢聯防唔跟埋去
小弟覺得都仲講得通

但當艾迪巴約會有大把時間門前大腳抽高
而移入中路補位既卡爾
唔止一次出現於艾迪巴約同埋伊度亞度身旁
小弟就忍唔住會唸一對中堅究竟攪咩

結果面對紐記只係人多
但左路同埋中路都有問題既防線
(唔怪得紐記成日被人傳會為這兩個位置增兵)
費文尼4分鐘內兩度傳中
艾迪巴約就把握到其中一次
阿仙奴咁就少少地羸住一球返更衣室

下半場接戰
由於悶局已被打破
雙方都踢得放左
阿仙奴既攻勢都比較多花款
迪亞比多左於左路入鏡
佢同埋費文尼亦有試下遠射

今場勇冠全場,前又見佢,後又見佢既費文尼
72分鐘一腳世界波就收死基雲
其實佢幾分鐘前既一腳被基雲撲出
已為紐記防線響左警號
但佢入波既時候
衝出去封佢既好似只係史堤芬泰萊
咁畢特同埋後備落場既巴頓前後兩次究竟死左去邊
兩球波就令大局已定

而後備出場既賓特拿助攻法比加斯入第3球
雖然應該有越位
亦於大局冇損

(不過講返轉頭
占士米拿上半場其實有兩次越位
旁證都睇唔到
旁證今場既水準講真只係一般)

而紐記最終破唔到蛋都幾可惜
畢特個靚罰球中楣
而艾美奧比又把握唔到加拿斯犯錯而出現既入波機會
整定紐記再吞3蛋

最後想講下基瑾既換人
講波佬話佢太遲換入艾美奧比
但講真以艾美奧比既質素同埋狀態
入場又會有咩作為

而小弟覺得佢下半場未夠10分鐘
就換入巴頓算係唔錯既選擇
因為佢唔夠狀態應該先做後備
但踢一陣都應該仲得
(雖然最終證實表現平平)

但佢對進攻方面既貢獻
一定比畢特或者羅辛奴好
所以其實搏得過

只不過被換走既係羅辛奴
而唔係其中一個中堅
小弟就比較失望
以紐記近兩場加埋吞半打蛋既表現
史堤芬泰萊伙拍卡卡巴既組合唔值得踢足180分鐘
羅辛奴去取代其中一個中堅似乎比較好