幾場波想講......
1) 曼聯對阿仙奴
上半場阿仙奴踢得比較好
班波有鬥心
亦比曼聯識用波
新仔桑治雖然試過有嚴重犯錯
但都比艾迪巴約令小弟順眼
畢竟前者臨危受命
爆左鑊都唔怪得佢
後者死剩把口
個格同個樣都咁衰
埋門一腳又屎
雖然佢下半場為阿仙奴先開記錄
但小弟依然覺得佢上半場 miss 左咁多機會
始終都係阿仙奴輸波既頭號罪人
如果世界上有曱甴識踢波
小弟寧願睇隻曱甴都唔睇佢
到左下半場
艾迪巴約因為里奧犯錯而打破悶局
唸唔到加拿斯又爆鑊輸12碼
令場波好快就重回起點
之後曼聯仲靠夏格維斯既靚罰球反敗為勝
曼聯有得羸波
其中一個原因係可以於短時間內追平
打起晒隊波既士氣
同埋費 sir 識換入泰維斯同埋安達臣
改善左球隊中前場既組織能力
不過講到佢地羸波既最大功臣
一定唔係心理質素好好既C7同埋夏格維斯
而係雲達沙
如果冇左佢90分鐘內不斷左飛右撲
曼聯近兩場波其實唔可能會有分落袋
最後想講幾句雲加既排陣
相信 n 個人同小弟都會有同感
點解教授有伊保爾唔用
係都要用高路托尼踢右閘
就算伊布爾移後踢閘
其實都仲有禾確特可以踢右中
雲加唔肯咁排陣既唯一合理解釋
就係佢想等到對手殘到七七八八
先用禾確特
令佢可以更加屈機
對利身浦追成2:2既入球就係一個好例子
不過以小弟既愚見
既然條防線已經不穩
倒不如用托尼長置於中路
否則只會賺埋都唔夠蝕
P.S.:
教授既理財能力向來出晒名好
如果佢肯同恆生賣廣告
絕對比風之后點人400萬養大個細佬來得有說服力
不過足球世界好現實
遊戲規則向來係捧盃鬥多
而唔係鬥慳家
小弟真係好希望佢可以改變主意
肯花少少錢買三兩件貴貨同其餘3強死過
反正董事局都開晒聲佢大把錢可以用
一間板凳有深度既兵工廠
真係好令人期待
2) 樸茨茅夫對紐卡素
今場大家羸唔到對方
只好願班射手唔爭氣
想講幾句紐記
佢地中後場班友既老毛病下半場再現
只係一個迪科爾已經有幾次機會
真係唔知個死字點寫
而踢下踢下
奧雲越墮越後
巴頓就跟住向左移
搞到隊波變左隊唔正常既 4-4-2
基瑾應該唸清楚要 4-3-3 抑或 4-4-2
同埋點樣去擺位
否則佢未必做得到佢口中下季既合理要求......
聯賽5-8名
3) 祖雲達斯對AC米蘭
究竟係施素高勁左
定係加度素早左回塘
4) 雷丁對富咸
今季連護級都咁緊張
真係好!
富咸出名作客差
雷丁都可以主場俾人拑住砌
如果唔係富咸冇運下半場3次省中楣
雷丁主場一定會輸到大大鑊
抵佢地而家仲有降班威脅
雷丁主場威力冇左7成
防線又比上季差左7成
班波又俾人睇到通晒
最終要降班都唔抵可憐
2 comments:
其實之前三埸失一球，某程度係對手實力較低，同埋夏柏表現好既關係。本來都已經覺得防線今埸會遇到考驗，最後無失波，或者只係對方把握力差，夏柏又穩定。
阿仙奴贏唔到，其實真係幾可惜。講表現，今埸佢地比曼聯好。怪就只好怪佢地前鋒既把握力。如果佢地下季再唔買位高質前鋒，隨時再次四大皆空。
To: 舒利亞
1)
紐記而時條防線始終好難令人放心
所以傳左好耐基瑾會搵鄧尼幫手
今日仲傳佢會打加度素既主意
2)
阿仙奴既把握力向來係 Big 4 當中最差既
艾迪巴約講就天下無敵
雲佩斯就衰玻璃腳
禾確特仲等緊機會上一線
賓特拿就只係四肢發達
原本經過半季適應期
唸住可以倚靠既伊度亞度又慘遭重創
小弟到而家都認為佢既受傷
係今季兵工廠由盛轉衰既轉捩點
所以有傳雲加會再打賓施馬既主意
不過小弟只會當係八掛新聞聽住先
因為一來好好好好好難買佢
而來佢應該傾向為中後場搵人先
小弟反而認為
教授下季會俾更多機會禾確特
或者索性轉型多0的用 4-5-1 陣式應戰
Post a Comment