2008-4-21 (1)

幾場波想講......

1) 阿仙奴對雷丁

冇晒心理包袱既小兵果然唔同晒
'水銀瀉地'或者'行雲流水'都係佢地上半場演出既最佳形容詞

最終只羸兩球
只係因為兵工廠下半場既攻擊略為放緩
同埋條門楣救左雷丁兩次

P.S.:
成班兵仔今場波都令人好有好感
除左希比就例外
佢咁茅都冇牛肉乾收
有冇搞錯?

2) 富咸對利物浦

睇作客雷丁既往績同埋利記本身會留力踢歐聯
加上雷丁搶分心切
小弟根本就預左利記會失分(甚至輸波)

點知機會送到埋來
雷丁都唔識把握
仲因為基拿既低級犯錯反而先落後
搞到最終輸波收場
佢地最終要降班都唔好怨人

11年前巴西對美國
前者有羅馬里奧領軍
仲一場埋門超過20次
美國都可以力保不失
就係全憑當時基拿一夫當關既表現
堪稱球迷奇遇記

但星期六晚所見(其實近幾年都係)既基拿
明顯已不復當年勇
佢雖然出晒聲叫富咸同佢續約
睇怕機會都唔大

3) 布力般流浪對曼聯

曼聯半場落後
輸在防線再有低級錯誤
同埋被布力般流浪既體力化踢法牽制

費 sir 好野在半場即刻用蘭尼入替傑斯
前者落場後好搶
而佢地下半場真真正正控制晒場波

如只計下半場既表現
紅魔絕對值全取3分
但遇上再次守到上左身既費度同埋發雞盲既球證
和波不失為理想賽果

P.S.:
唔知點解暴力幫連續兩場波(連埋上場對利記)
都不斷犯天條
而其實佢地兩場波亦各有一次值得獲判12碼
(兩場波加埋應該最少有7球12碼)
但兩場波既球證最終一球都冇吹過
真係好奇

4) 拜仁對多蒙特

小弟唔以賭波角度
都覺得前者抵俾人鬧係'衰波'
佢地再一次臨尾香而搞到要踢加時
防守唔集中固然抵鬧
不過更抵鬧既係佢地不思進取
羸一球就以為夠數

隊波咁衰
好大程度係因為本身個格衰啦
但更攞命既係
英明一世既軒斯菲特
竟然會同埋班高層一早就宣佈下季分手

領隊一早講定離隊
通常都冇好下場
睇下拉素時代既艾歷臣,
01-02 年球季既費 sir,
同埋今季有雲馬維克一早宣佈接手荷蘭......
就已經知拜仁班波會唔掂
軍心不穩就不在話下
如果隊中有0的冇咩職業操守既球員
隊波就仲大鑊

有興趣可以數下臭馬雲邦美今季既紅黃牌數目
又例如開晒聲話要搵新挑戰既盧斯奧
佢今季因為踢高章波而引致既失誤
十隻手指都未必數得晒
而迪米捷利斯夠膽死話位置唔岩就罷踢
明顯係因為當準備走既軒斯菲特冇到

而班衰波於德甲超晒班
班友又可以睇住踢
以留力6月既歐洲國家盃
咁多原因加埋就解釋左佢地點解咁令人討厭

當然佢地咁高質素
今季捧盃就一定坐三望四
但咁冇皇者風範
捧幾多隻盃都依然會係一班衰波
要重整隊波既風氣
睇來只有靠奇哥

5) 紐卡素對新特蘭

新特蘭早前3連勝
上岸在望即刻走晒樣
上場對住出名作客差既曼城都可以輸波收場

今場話晒打呲
雖然話冇左幾件正選
但佢地上半場踢得咁屎
場波未踢完半場已經分左勝負
真係爭唔落

紐卡素方面
而家其實已經重拾正軌
對住咁既對手
踢得唔算特別好都已經夠嬴

6) 曼城對樸茨茅夫

主隊今場雖然入頭兩球都算有運
但整體而言總算似返隊波
加上樸茅未到半場就已經踢少個
小弟搵唔到任何藉口唔轉台睇'新聞.話事.人'

水浸眼睸先識驚既唔止早幾個星期前既新特蘭
原來仲有艾歷臣
似乎他信出下聲真係好有用

佢條老淫蟲
溝女就識自動波
返工就偏偏要老闆去聲控
做人隻馬
踢一踢先識郁一郁
份工都唔慌可以做得耐
姑且睇下艾歷臣可以教到幾時