先講摩達歷單野
(因為小弟最忠實既讀者舒利亞好似好有興趣......)
而家傳得幾勁話佢會加盟紐卡素
不過落筆既一刻都未成事
講佢轉會單野
要先講少少 background
其實最初識貨既人係雲加
時間係上年暑假
當時薩格勒布戴拿模賣左伊度亞度達施華俾阿仙奴
手頭上話有大筆資金
唔想賣走另一主力摩達歷以維持球隊實力
(不過小弟估其實可能係薩格勒布戴拿模既叫價嚇親雲加
詳情之後再講......)
連阿仙奴都對佢有意思
其他列強當然唔執輸
當中包括車路士,曼城,熱刺,阿積士,皇馬同埋巴塞隆拿
小弟唔知佢地確實出價幾多
有傳聞薩格勒布戴拿模同意車路士既1370萬鎊出價
(小弟對轉會費咁低有所懷疑......)
不過車仔表示陣中冇位俾佢踢
要佢先去燕豪芬浸淫一季
摩達歷唔肯被外借令交易胎死腹中
季中薩格勒布戴拿模既會長曾到倫敦一個星期
消息指佢期間同車路士,熱刺以及曼城既代表先後會面
不過又唔成事
因為佢獅子開大口
叫價1800萬鎊
之後會長宣佈摩達歷會留隊直至歐國盃之後
好明顯係睇好摩達歷踢完歐國盃之後會大紅
再待價而沽
4月初副會長再到倫敦
先同熱刺方面傾
不過又唔成事
因為熱刺只肯出價大約1000萬鎊
跟住就到紐卡素出場
韋斯負責帶隊同人傾
這段時間唔知點解突然傳出利物浦對佢都有興趣
(小弟都 R 晒頭......
因為佢唔係利記最急住要買既球員)
摩達歷亦表示好想踢利記
直至近日
傳出紐記終於同薩格勒布戴拿模傾掂數
價錢傳聞仲係破左球會 record
小弟認為成事機會幾高
因為消息指紐記既出價原來係全英超(應該係話全世界)最高
小弟事後孔明
其實佢去英超球會唔奇
(不過之前冇唸過係紐記)
因為摩達歷一直都話最想踢英超
亦似乎只有英超隊先肯出咁高價去滿足薩格勒布戴拿模
如果再心水清少少
阿仙奴近日好似忽然再冇同摩達歷扯上關係
(其實兵工廠係小弟心目中最岩佢發揮既球會)
原因亦不外乎係一個錢字
4 comments:
唔懷疑佢實力，況且中埸確實有需要增強。不過今日聽聞球會好似係用二千萬鎊去買佢，我都驚左一驚。咁貴既價錢，會唔會真係冒險左少少呢?況且我地今年仲有後防甚至前鋒需要增兵，咁快用咁大筆錢，真係唔係太好。當然，如果佢真係幫到球隊，咁都值既~問題係，其實我唔清楚佢打法，唔知佢對球隊幫助有幾大。
To: 舒利亞
幾樣野想講:
1)
單野仲只係傾緊
2)
小弟聽過幾個紐記既傳聞出價
1200萬鎊?
1500萬鎊?
1800萬鎊?
2000萬鎊?
小弟信係後兩者既機會較大
3)
如果想簽摩達歷
紐記係焗住用咁大筆錢
因為如果用1000萬鎊就可以買佢
英超好多隊都一定唔肯放手
唔計佢因為唔肯被外借到燕豪芬
而唔肯去車仔
亦唔計佢口中最想加盟既利記
(小弟到而家都唔信利記趕住買佢)
英超都仲有最少3隊同紐記爭
(阿仙奴,熱刺同埋曼城)
而紐記最少都爭唔羸阿仙奴
而家肯為佢出1700萬鎊或以上
全英超,甚至全世界應該只得紐記
咁仲爭唔羸?
如果咁都簽唔到佢
唯一既可能就係佢嫌紐記下季冇份踢歐洲賽
4)
佢既打法有機會再講
聽完之後你就會明點解小弟覺得
阿仙奴最岩佢踢
嘩..看來快要打破紐記在轉會市場既記錄,
其實值唔值咁昂貴呢?
買佢一個,會不會需要送走好多現役球員呢?
To: sammysir
1)
值唔值咁貴就睇你點睇
如果紐記唔咁樣頂爛市
佢地簽到摩達歷既機會係等如零
小弟雖然覺得佢仲勁過卡蘭積卡
遲早會成名
但佢而家真係仲未成名就要咁貴
始終係幾冒險
2)
紐記大把錢買人
應該唔使賣人去吐現
3)
小弟認為如果摩達歷落實加盟
會令原本已經冇咩出場既安利走得更快
Post a Comment