2008-4-30 (1)

想講下尋晚場波......
曼聯主場 KO 左巴塞隆拿絕對係合理賽果
羸既主因係防守做得好好

雲達沙,里奧費甸南同埋史高斯兩回合都守得好穩陣
後者尋晚仲把握對手解圍失誤入左球世界波

朴智星不惜氣力既踢法亦令巴塞隆拿既三線受到唔同程度既壓力
而布朗尋晚突然超水準既演出就令人好驚喜

不過最抵讚既都係費格遜
針對首回合球隊於中場經常唔夠對手人多既問題
佢尋晚索性改踢　４－５－１
雖然控球時間依然少過對手
但最少令對手於中後場已開始感到難以組織攻勢

佢另一樣抵讚既係
由於對手於上半場既攻門比曼聯更多
佢預料下半場對手會施加更多壓力
毅然先下手為強
下半場頭１５分鐘佢地成功製造幾次有威脅既攻門
又曾經迫到佩奧爾犯手球（不過球證冇罰）
雖然唔能夠拉開比數
但最少撲熄左對手把火
０個段時間印象中巴塞隆拿係一次埋門機會都冇
結果令列卡特終於要變陣換入亨利
而此時既曼聯先再次墮後等對手攻上來

巴塞隆拿兩 round 都羸控球指數
不過佢地好多時只係於後半場慢慢搓
而曼聯亦冇中計胡亂向前撲
結果巴塞隆拿面對曼聯中路咁多人專心防守
以佢地而家既人腳同埋狀態
對曼聯既威脅真係好有限

巴塞隆拿於魯營球場都叫做有幾次似樣既埋門
尋晚作客就算係強差人意
有時搓唔到入去就索性浪射一腳
咁既球隊點可能有運行

美斯唔 fit　明顯係死結所在
（小弟已經忘記左細哨好耐．．．．．．）
小弟依然認為 top fit 既美斯有力以一己之力幫球隊反敗為勝
不過趕唔切催谷狀態都真係好無奈
曼聯經過首回合後
尋晚更加注意佢移入中路搵食既踢法
亦解釋左點解佢尋晚踢得沉過首回合

不過列卡特既調動亦有問題
恩尼斯達形同虛設都可以踢６０分鐘
伊度奧直情踢左７１分鐘
有冇搞錯？
早少少換入熟晒曼聯條路既亨利
或者索性用佢踢正選似乎比較明智

曼聯今季踢歐洲賽既表現有進步
除左作客冇腳軟之外
更加注重防守似乎先係主因
佢地既踢法真係幾似意大利球隊

有時硬要擊倒對手
只會為自己做成致命傷
穩守突擊其實係有自知之明既進攻意識

P.S.:
識得咁唸既一定包括賓尼迪斯
今晚可唔可以絕處逢生冇人知
不過佢老人家一定唔會同你急
因為佢仲有９０分鐘在手
可以做（亦可以發生）好多野