有人話韋根會放水俾曼聯
又有人見到 JJB 球場0的草忽然靚左好多
就話韋根偏幫曼聯
不過小弟覺得全部都係廢話
小弟睇左場波既重播
韋根對得住車路士有餘
佢地既控球時間同埋射門次數都多過曼聯
對於保斯輸12碼
同埋巴布爾包左第二球既越位
0的人亦唔可能怪佢地太多
講真佢地平時都係咁屎波架啦
與其怨天尤人
倒不如插油王兩刀
因為如果佢冇炒摩連奴
今季車仔一早羸左英超啦
只要睇下俾格蘭教既車仔
唔計尋晚對保頓場波
之前已經5次領先下被追平
當中仲有4次係臨天光賴尿
雖然球隊被迫和唔係全部關個領隊事
但責任既野就點都有0的掛
如果領軍既仲係摩連奴
小弟打死都唔信摩佬會失手咁多次
而只要格蘭衰少其中一次
車仔已經攞住半隻盃耳鬥保頓啦
小弟就打死都唔信咁既形勢下
車仔於主場會羸唔到保頓
尋晚當曼聯羸到2:0後
車仔班友都知冇機先會放軟手腳
所以尋晚場波小弟唔會入格蘭數
捧唔到聯賽
都羸場波向球迷謝幕啦
咁尋晚場波邊個負責先?
就梗係解圍解到唔湯唔水既阿歷斯啦
小弟雖然踢波唔叻
但自問都有能力踢得走0個球波
踢得咁衰
唔怪得當日摩連奴極力反對晏尼臣召佢返車仔
仲搵人剪輯佢歷來於燕豪芬出錯既'精華'
再送俾晏尼臣以示不滿
所以你地話係咪油王炒左摩連奴
就整定車仔今季冇運行?
雖然小弟於摩帥被炒時講過車仔成季都冇運行
不過小弟最近發覺自己睇錯左
事緣車仔班波始終質高
只要佢地個別球員上返力
跟返摩帥之前0個套
根本就好似一架 set 左 formula 既戰車
就算無人駕駛都依然可以好得人驚
只要格蘭唔好攪亂檔
同埋泰利同埋杜奧巴趕及傷癒
踢歐聯決賽去莫斯科又始終有半個主場之利
邊個話曼聯羸硬架
最後想講下護級組
今日某份報紙話富咸僥倖護級成功
小弟好唔同意
睇下雷丁個勢不斷 falling down
臨尾仲搞埋內訌
抵死!
又睇下伯明翰
雖然麥利殊同埋麥法頓都表態唔會跳船
前者亦得到保證唔會被落鑊
表面好團結
但董事局班友而家先識埋怨楊家誠搞垮佢地
後知後覺!
搞到布魯士都跳槽去幫韋根
佢地最終要降班都唔抵可憐
富咸方面
雖然小弟都唔覺佢地多左咩野必殺技
陣式都冇大變動
不過成隊波起碼上個月忽然有鬥心起來
臨尾5場羸4場
當中仲球會史上首次作客3連勝
而羸4場波當中
包括羸雷丁同埋伯明翰兩個護級對手
兩場波前後都6分波架
對護級好關鍵
另外,艾法耶茲於煞科戰前48小時
仲推晒所以公私事務去親自督住隊波
上星期起又帶晒禮物去探班
咁既老闆去邊度搵呀
及時發力,又團結,亦冇負面消息
而護級對手又各有問題
富咸成功護級有咩咁僥倖呀?
4 comments:
其實有咩理由可以咁講?無左個冠軍，根本就係抵車仔死。唔應該講車仔，係抵油王死。佢同摩連奴唔岩，炒佢，無計。佢係老細，有人唔聽佢支笛，佢唔happy，炒左，都算正常。摩連奴係有料，不過得罪老細就只好怨老細心胸狹窄。但係油王做得最錯就係俾格蘭呢條廢物做領隊。雖然要搵番個同摩連奴一樣咁有料既係好難，不過我相信要搵個比格蘭有料既，真係易過借火。
富咸一度係成為陪打比郡降班既大熱門，不過季尾發力，抵佢地護級成功。
三隊降班球隊都係抵死，我有興趣既只係想知大家可以係佢地三隊執到幾多靚野。
話韋根放水比曼聯果d真係唔識睇波....
韋根果場真係踢得好好....上半場比曼聯好大壓力,全場好緊逼咁搶波。
而一過星期前新聞都知韋根換草地既原因係唔想比曼聯輸左有藉口話球場差
想係一個較好既condition下舉行衣場賽事
韋根上半場同下半場係2 隊波! 弱隊真係弱隊!
To: 舒利亞
1)
下季如果真係由列卡特執教
而佢又可以重拾自04年起0個兩季既水準
加上有老拍檔坦卡特幫手
車仔應該可以重上正軌
2)
雷丁既好貨最少有:
索尼,列達,傑臣,史堤芬亨特同埋杜里
伯明翰就最多,當中包括:
麥克泰萊,基祖,梅菲,梅姆巴,拿臣,卡普,迪列達,科素,謝路美,麥法頓,薩拉迪同埋奧干拿
打呲郡就最少,不過都有:
卡路爾,米拿,沙維治,安梳爾同埋班尼斯
To: Terry
雖然講左好耐話重舖草地
係唔想曼聯有咩閃失既時候賴地爛
不過突然整靚撻地
難免令人會亂唸
To: 死佬
韋根已經算係咁
有時唔可能對佢地要求太高
佢地對得住車仔有餘
Post a Comment