2008-5-4 (2)

1)
先講下利物浦既增兵消息......

巴利單野之前講過唔再多講
韋拿單野就因為皇馬既吸引出價而令利記成事機會大減
當然皇馬對韋拿既吸引力亦好大......

想講兩單成事機會唔明朗既交易
先講大衛施華
佢已經唔止一次被傳會加盟利記
而佢亦好肯定係賓尼迪斯既心頭好

趁機會講個關於佢既故仔
當年賓尼迪斯執教華倫西亞時
於國內既地區球會發掘佢既潛質
當時佢曾經以唔想離開屋企而拒絕左賓帥既斟酌
賓帥為左可以成功簽到佢
不惜運用佢既影響力
令球會請左佢既老豆做球會保安
以陪伴唔想離開家鄉既大衛施華

最終當然係大衛施華肯加盟華倫西亞青年隊
而佢於賓帥轉投利記後
因為出色既表現而得到科利斯起用
最終踢出名堂
由此睇來賓尼迪斯係好欣賞大衛施華

加上以現時華倫西亞既財政狀況
就算賣左韋拿都依然未夠填數
可能仲會有星級球員要被迫出售以套現
大衛施華既轉會傳聞係有一定可信性

另一個想講既係高車士打既17歲中場 M.艾利圖
佢於剛果出世
但就代表英格蘭 U-17 同埋 18 既代表隊出賽
身形因為仲未發育完成而略嫌單薄
但速度唔錯既佢可踢兩邊既翼位
中距離射門亦有一定水準
之前亦傳過曼聯想買佢作長線投資
而家利記想要人亦最少要同紐卡素爭過

2)
山齊士向英國廣播公司第五台透露
由於富咸炒左佢之後一個仙補償都未俾過佢
佢最終被迫要將件事搵領隊既仲裁法庭
以討回公道同埋佢既賠償

3)
卡蘭積卡既老豆向國內傳媒透露
雲加有興趣搵佢個仔加盟兵工廠
仲話希比離隊後
佢個仔係好合適既替補人選
隨即傳出阿仙奴會出價1200萬鎊買人

4)
早幾日講過熱刺斟酌國民隊既烏拉圭20歲射手科拿路尼
而家韋斯咸亦被指加入戰團
而佢既身價已升至600萬鎊

5)
花邊新聞一則......
隨住同皇馬簽左合作協議
施丹竟然成為昆士伯流浪領隊既可能人選......
雖然成事機會近乎零
不過迪肯尼奧上左手幾個月就被傳冇得撈都幾慘

p.s.:
由於時間關係
車仔對利記既賽後感要再遲少少先有
請見諒