2008-5-9 (1)

好多時講球隊既轉會消息
都係先講 'in', 跟住再講 'out'
不過阿仙奴就肯定係其中一個例外

每日都有佢地球員離隊既傳聞或者消息
已經走左既有費文尼
肯定會走既有列文
好大機會走既係基拔圖施華同埋辛達路斯
另外,希比,伊保爾,沙格拿,基治同埋法比加斯得到垂青既報導亦有好多

雖然主席希活岩岩又話會有錢俾雲加用
但雲加手頭上既錢永遠睇落都係少人地好多
早幾日既版本仲話最多只會有2500萬鎊
人又成日被人起勢咁搶
但隊波都仲可以每年交到下功課
從這方面去睇教授既功力其實係相當深厚

先講希比既傳聞
國米想斟佢跳槽已係公開既秘密
另有版本指佢可能會買斷同兵工廠既合約
再以自由身加盟
而最新消息係佢經理人表明這個白俄羅斯中場一定會於暑假離隊

而法比加斯方面既版本就應該只係吹水野
雖然西班牙傳媒言之鑿鑿話巴塞隆拿肯用3000萬鎊買人
仲話迪高,伊度奧,古莊臣,甚至乎亨利都可以用作交易條件
不過點睇法比仔都唔似會走

而皇馬卡達朗早幾日暗示想搵法比仔既言論
類似既以前都講過唔少
既話卡卡,又話 C7
所以都係可以只當故仔聽
不過就激到原本已經有好多野煩既雲加更加火消心

不過雲加似乎已經積極搵緊新血
第一個要搵既位置就一定係防中
里爾既桑馬干同埋 AC米蘭既加度素就被係可能人選
不過前者有死對頭熱刺同佢地爭
後者所吸引到既買家就仲多
當中包括曼聯,紐卡素,拜仁同埋熱刺(冇睇錯......又係熱刺)

而萬一冇左希比
教授亦係要被迫搵個新既進攻中場
當中同鄉哥古夫同埋拿斯尼都係熱門人選
不過兩者既身價都係要最少1500萬鎊
計落唔多化算
反而賓艾化似乎仲有機
因為佢成季都同佩連不和
隨時玩野要離隊

而巴利亦可能係一個令人驚喜既人選
消息指阿仙奴亦有興趣同車路士同埋利物浦爭埋一份

講完兵工廠
就想講下熱刺
除左尋日講過既保定
同埋岩岩講過既桑馬干同埋加度素之外
熱刺仲傳過其他既防中人選
包括利記既沙比艾朗素同埋樸茨茅夫既迪亞拉
小弟認為佢兩個最終成事機會都唔大
但熱刺先後同咁多個防中扯上過關係
可見索高拿於球隊既位置並唔穩陣

另一方面,保羅羅賓遜勢必被放棄
所以同佢地扯上關係既龍門一個接一個
烏甸尼斯既漢丹奴域就係最新既一個
身高手長既佢現年23歲
近年已經係國家隊既正選門將
佢唔算係一個頂級門將
但優點係表現夠穩定

而搵西班牙同鄉加盟係拉莫斯搵兵既另一特點
佢地甚至可能已經取代利物浦
成為西甲球員既最熱門落腳地
最新一個例子就係薩拉戈薩既沙治奧加西亞
佢夠靈活之餘,波底亦唔錯
佢可能係西甲其中一個最被低估既射手
不過佢被人睇小
應該同佢表現唔夠穩定有關

而熱刺近年其實幾肯花錢買新血
下一個加盟既新秀好可能係狼隊既 M.Kightly
現年22歲既佢其實係熱刺既青訓產品
不過熱刺幾年前就放棄左佢
佢踢非聯賽有個綽號叫'非聯賽傑斯'
個朵都拋得下人

由於佢兩隻腳都咁靈活
令佢可以踢晒兩邊既翼位
佢未至於好似賓特尼咁高班
不過勝在基本功,速度,傳中能力等方面都算 above average
佢近年曾先後同曼聯,愛華頓,維拉同埋查爾頓等球隊扯上關係

今季狼隊又升唔到班
睇來佢一定會轉會他投
消息指身價大約350萬鎊既佢
下一站應該係熱刺或者韋斯咸

另外,熱刺亦被傳出價1000萬鎊試探賓尼迪斯
睇佢肯唔肯放走哥治

而熱刺買咁多人
走既一定唔少
曾有傳聞指拉莫斯除左肯留用
羅比堅尼,貝碧托夫,京治,曉頓同埋活基治之外
其餘全部待價而沽

最新一個會離隊既應該係龍門施尼
佢證實昆士伯流浪已經俾左 offer 佢
既然熱刺借佢咁耐都冇意思買斷佢
佢轉戰英冠既機會好高

而貝碧托夫亦勢必離隊
佢岩岩又再次被傳會加盟巴塞隆拿